شبكة همس الشوق - عرض مشاركة واحدة

29 - 3 - 2014, 11:30 PM

واشرقت شمس صباح اليوم الثاني ..
دخل للجامعه شايل كتبه ومعاه صاحبه اللي يقول: هههههههههه شف شف عيونك كيف .. واضح انك نعسان وبقوه ههههه ..
تنهد صاحبه وقال: لو انه مو يوم مهم جان غبت وارتحت .. امس كله مشغول رايح من مجان وياي لمجان وبالاخير اضطريت اقطع فوق المدري جم كيلومتر عشان اودي اختي وبنت عمها للخور .. وبعد ما رجعت رحت لشغله .. يعني فترة نومي ساعتين وعشر دقايق ..
ضحك صاحبه اللي كان انس وقال: هههههههه اهم شيء انك متذكر هالعشر دقايق ..
تنهد طارق وقال: اول محاضره هي المهمه .. راح احضرها وبعدها بأسحب .. مستحيل اكمل .. امس تعبت تعب مب طبيعي واحتاج للراحه وخصوصا ان اغلب وقتي في المخفر ..
انس: لا طارق عن الهبل .. بتخليني لوحدي ..؟!
طارق: عندك فهد يا مال الزهايمر ..
انس: هههه فهد غايب .. سافر لزواج ولد عمه .. ياخي ودي احد يتزوج بسرعه .. من زمان ما رحت زواج ..
طارق: تتحجى عن الزواج ..!! ياخي حسيتك بنت ..
انس: روح انقلع ياخي .. يعني البنات هم بس اللي يروحون الزواج ..؟!! الزواج والقاعه ذي ما راح تكون مويوده لولا الريال .. طير ..
طارق: ههههههه عصبت ليش ..؟! خلاص اتغشمر معك ..
تنهد وقال: خلاص والله مالي خلق اتحجى ..
دخلوا للقاعه وجلسوا في اماكنهم ..
زحلق طارق جسمه عالكرسي شوي وغمض عيونه لين تبدأ المحاضره ..
دقه انس وهو يقول: طارق قوم .. صدقني دامك ما نمت فراح تنام وانت مو حاس بعمرك .. وقتها حتى لو بدأت المحاضره بتنام بنصها ..
طارق: اها ..
انس: وشو اللي اها ..؟! قوم يا ريال .. ايه واحكي لي عن اللي صار امس .. ما حكيت لي الا اشياء سريعه وبس .. قوم ..
فتح طارق عيونه بعدها جلس واعتدل بجلسته وقال: انس ..
انس: نعم ..
طارق: والله احبها ..
عصب انس وقال: غبي .. مو هذا الحجي اللي ابغى اسمعه ..
طارق: فعلا انس انا اتحجى وياك بجد .. لانه تييني لحضات اقول فيها انها من الممكن ما تتقبلني وبعدها راح احاول اكمل حياتي بدونها وراح اقدر .. بس يوم عن يوم اكتشف اني حاس باني مستحيل اقدر اكمل حياتي بدونها .. كل ما شفتها احبها اكثر ..
سكت لفتره وكمل: قطعت قلبي امس .. لو شفت شكلها وهي تبجي .. كان ودي وقتها احضنها واهدي من حالتها .. ابوها انسان جشع .. الله يعينها تحملت كثير ..
انس: تبجي ..؟! ليش ..؟!
طالع طارق فيه لفتره بعدها قال: اخوها ..
انس: شفيه ..؟!
قطع كلامهم عهد اللي قالت: السلام عليكم ..
تأفف طارق من الوضع بس ما اظهر هالشيء وقال هو وانس: وعليكم السلام ..
طالعت عهد في طارق وقالت: ممكن اخذ من وقتك جم دقيقه ..؟!
فتح طارق فمه كالعاده عشان يلقي ببعض الكلمات اللي تجرح بس دقه انس من تحت وكأنه يقول خلك محترم ..
ما اعجبه طارق هالوضع .. بس خلاص راح يوافق ويشوف اخرتها مع هالبنت ..
طارق: ايه ممكن ..
ظلت عهد تطالع فيه لفتره بعدها قالت: اعتذر عن طرد ابوي لكم من العماره و ....
قاطعها طارق: هذه السالفه منتهين منها ..
سكتت بعدها قالت: اها .. طيب بأقول اللي بغيت اقوله .. امممم طارق انا اعتذر .. احس اني ضايقتك كثير وانت ابدا مو راضي تتقبلني .. ايه انا جدا معجبه بشخصيتك وما اخفي عليك اني فعلا اتمنى لو امممممم .. المهم انا اسفه .. الحب ما يي بذي الطريجه .. فكرت في كلماتك اللي دايم تقولها لي .. الله يسعدك مع اسيل .. وكمان الله يسعدني مع اللي يستاهلني واستاهله وبس .. مع السلامه ..
وراحت من المكان بعد ما حست بإحراج شديد ..
انس + طارق في قمة صدمتهم ..
ابتسم انس وقال: شكلها ترددت كثير قبل لا تيي وتقول هالكلام والدليل هو هروبها في النهايه .. ياللا كويس .. اصلا اللي يعرفك راح يفقد الامل في انك راح تطالع فيه هههه ..
ظل طارق يطالع في عهد لفتره بعدها قال: كويس .. ما توقعت ان هذا بيكون كلامها .. وما توقعت اني بكون في يوم من الايام سبب لتغير حياة وتفكير احد ..
انس: ياللا سجل هذه ثاني وحده تغير تفكيرها وحياتها .. عقبال البقيه ..
طالع طارق فيه بإستغراب وقال: من الاول ..؟!
انس: سامي .. لا يكون نسيت ..!!
تنهد طارق وقال: لا ما نسيت .. بس هي كانت عباره عن كلام قلته في لحضة انفعال .. هههه اول مره ادري اني احكي دُرر ..
انس: هههههههههههه ياخي انت كتله من اللامبالاه لدرجة انك مو عارف شيء حولك ..
اسند ظهره عالكرسي وغمض عيونه وهو يقول: طير ..
انس: هييه طارق قووم واحكي لي عن اللي صار امس ..
للاسف .. لا مجيب ..