شبكة همس الشوق - عرض مشاركة واحدة

29 - 3 - 2014, 11:38 PM

وانتهى الدوام الدراسي ورجع الكل الى بيته ..
الكل .. ما عدا بطلنا اللي بدل لا يتجه للبيت اتجه لمكان ثاني ..
وطول الطريق لهالمكان كان تفكيره مشوش ..
شلون كل هذا حصل وهو ما يدري ..
بنت اخته تنخطف .. وتكون على وشك الموت وهو اخر من يعلم ..
ضغط عالدركسون وهو حاس بذنب كبيير ..
هو حاليا المسؤول عنها .. اصلا كان غلط منه انه يسمع لرغبتها ويخليها تعيش في ذيج الشقه لوحدها ..
خلاص توبه .. تعلم من غلطه ومستحيل يسمح لها تبعد عن نظره ولا ثانيه وحده ..
ولا ثانيه وحده ..
اخذ نفس عميق وقال: الحمد لله على كل حال .. الحمد لله على سلامتها .. الحمد لله ..
وصل للمكان اللي كان يقصده ..
نزل من السياره ودخل للداخل ..
وبعد عدة اجرائات امنيه وضروريه جلس في المكتب ينتظر ..
بعد خمس دقايق دخل عنده رجل بثياب ضابط وقال: مهلة الزياره عشر دقايق بس ..
هز بسام راسه وهو يقول: اوكي ..
ابتعد الضابط ودخل معاه السجين رقم 237 ..
بعدها خرج وقفل الباب ..
طالع السجين في بسام ببرود بعدها تقدم وجلس عالكرسي وهو يقول: هذا انت ..!!
ابتسم بسام بإستهزاء وقال: واخيرا دخلت السجن .. ها .. شرايك فيه ..؟! يليق فيك صح ..؟!
ما رد عليه واكتفى بنظره بارده له ..
بسام: قلت لك اني ما راح ارتاح الا وانت بالسجن .. عالعموم ممكن هذا الشيء يكفر من ذنوبك اللي اقترفتها بحق زوجتك وبنتك ..
سعد ببرود: شنو تبي .. ما اتوقع انك ياي تعين لي محامي صح ..؟!
بسام: ما ندمت ..؟!! ما حسيت بأي ندم اتجاه اختي وبنتها ..؟!
سعد: اندم على شنو ..؟! وحده خاينه والثانيه بنت حرام ..
بسام بحده: خاينه في عينك .. ما اسمح لك تتكلم عن اختي جذي .. اختي اشرف منك .. اختي ما عمرها حبت احد كثر ما حبتك وانت ببساطه تشك فيها بدون ادني دليل .. تشك فيها وبصاحبك كمان ..!! اي مشاعر تملك يا رجل ..؟!!
رفع سعد حاجبه لفتره بعدها ابتسم وقال: ما شاء الله عليك .. شكلك عارف كل شيء .. ماكو شيء ما تعرفه ..
بسام: عشان شكوك باطله اتهمتها بالخيانه .. ولا حتى صارحتها بالامر عشان تبرر لك ..
سعد: تبرر لي ..!!! تمزح .. راح تنكر يا حبيبي فايش استفيد ان صارحتها ..؟!
انشدت اعصاب بسام وقال: انت مو انسان ياخي .. خساره تكون من جنس البشر .. اهتمام عبد الغني ببنتك مو دليل انه ابوها .. دراسة سميه معاه مو دليل حب .. نظراتهم لبعض مو دليل عشق وخيانه .. وبدون اي سبب اتهمت طفله بريئه بانها مو بنتك .. ياخي اذا انت من النوع الشكاك ففيه شيء اسمه تحليل الـdna .. حلله وراح تشوف التطابق ..
سعد بإستهزاء: احلل الـ dna ..! انت مجنون اكيد ..!! انت ما تعرف شكثر اعدائي .. مو ببساطه اعطي تحليلي للمستشفى .. افرض واحد من اعدائي استخدمه ضدي ودخلني بقضايا مالها اخر .. مستحيل اعمل جذي ..
عض بسام على شفته بقهر ..
ما توقع ان هذا بيكون عذره ..
بس مع هذا فهذا مو عذر .. ابدا مو عذر ..
بسام: لعلمك .. انا اخذت تحليل من سميه ومن إياد واثبتت انها بنت سميه واخت إياد .. تبغاني اوريك الاوراق عشان تتأكد ..
ما رد سعد عليه فكمل بسام: هذا يعني انها بنتك يا حضرة الاستاذ سعد .. من لحمك ودمك ..
سعد ببرود: اها .. اوكي طيب ..
عصب بسام من اسلوبه وقال: طيب اندم ياخي .. حس بشعور الندم .. ظلمت اختي وبنتها وضيعتهم .. اختي قضت حياتها في مستشى الطب النفسي .. اختي تأذت مشاعرها لدرجة انها قتلت وحده بدون ويه حق .. بنتها تشتت بالشوارع وتدمرت حياتها .. لُقبت باللقيطه واكثر من واحد عايرها بلقبها .. تعذبوا بسببك وانت بكل بساطه تقول اها ..!!!
سعد: كان ميرد خطأ فليش اندم .. عالعموم خلاص انا طلقتها فلا تييب طاريها وطاري بنتها ..
فتح بسام فمه بيتكلم بس سبقه سعد يقول: اذا بتكرر نفس الموضوع فانا راح اطلع ..
هز بسام راسه وهو يقول: فعلا اللي ما يملك مشاعر ماكو فايده من الكلام وياه .. اسمع .. انا يايك كمان بموضوع ثاني .. تقدر تسميه طلب ..
رفع سعد حاجبه وقال: انت تطلب مني طلب ..!! غريبه ..
طالع فيه بسام لفتره ..
مستحيل يجي اليوم اللي يطلب فيه لسعد طلب ..
لكن غصب عنه عشان بس اسيل ..
اخذ نفسه بعدها قال: فيصل .. مسجون بكندا عشان قضية التهريب ..
سعد: اه فيصل .. ايه هذا من افضل موضفيني .. ما كنت ابغاه ينسجن بس غصب عني عشان اسجن جوزيف ورينا ..
بسام: حسب الاوراق اللي عندك فتُهم التهريب اثبتت عليك .. وبيطلع ان فيصل كان شريك وياك ..
سعد: ادري .. وشهو طلبك ..؟!
بسام: ابغاك تبعد فيصل عن هالقضيه وتطلعه براءه .. قول انك استخدمته هو بالاصل ماكان عارف بذي الامور ..
رفع سعد حاجبه وهو يقول: ومن امتى تعرف فيصل عشان تحاول تطلعه من القضيه ..؟!
بسام: ما اعرفه .. لكن اهله بحاجته .. هو الاخ الكبير وامه تعبانه بالمستشفى عندها السرطان الحميد .. هو اللحين ولي امرهم واللي شايل حملهم .. اهله بيضيعوا من بعده .. عالاقل اعمل عمل انساني يفيدك باخرتك ..
سعد: واخراج شخص بالجذب يُسمى عمل انساني ..؟!!!
بسام: ايه اعرف انه مجرم .. لكن انا واثق ومتأكد بانه حاليا ندمان .. ويمكن كمان يكون هدفه من اخر عمليه هو الاطاحه بالشركتين والدليل هو الاوراق اللي ما زال محتفظ فيها والبيانات اللي في جهازه واللي انا استعملتها عشان ادخلك بالسجن .. ادري ان كل مجرم لازم يتعاقب بس ...
ظل بسام ساكت ولا كمل ..
ابتسم سعد وقال: اول مره ادري انك انسان عاطفي هههه ..
وقف واتجهه للباب وهو يقول بلا مبالاه: اوكي اوكي راح اطلعه .. بس مو عشانك طلبت .. بس عشان اكافئه على اخلاصه لي ..
دق الباب ففتحه الشرطي واخذه للسجن ..
تنهد بسام وهو يحس نفسه مو راضي ..
المجرم مكانه السجن .. بس هذا طلب اسيل ..
مو قادر يرفضه لها ..
مو قادر ينسى ترجيها له ودموعها ..
واهله كمان بحاجته ..
مالهم احد غيره .. لازم يكون معهم ..
خسارة الاب تكفي .. ماهم قد حمل مسؤولية خسارة الاخ الاكبر ..
وهو حاليا يتمنى انه يكون فعلا ندمان ..
او تكون نيته من هالمهه اللي انسجن عشانها هي فعل خير مو شر ..
قام من مكانه وطلع من الغرفه ..

========================================

الساعه 2 الظهر ..
كانت واقفه عالشباك تطالع في الساحه الاماميه لهالمستشفى الخصوصي ..
ناس داخله .. وناس طالعه ..
ناس مريضه .. وناس سليمه ..
لكل انسان هم .. ولكل انسان مشاكل مختلفه عن غيره ..
التفتت بسرعه عالسرير بعد ما سمعت صوته ..
جت عنده وقالت: إياد .. صحيت ..؟!!
لف نظره لها وقال بضعف: منو ..؟!!
انصدمت من كلامه وقالت: شلون ما تعرفني .. إياد انا اختك .. انا اسيل او سهى مثل ما تبي تسميني .. لا يكون فقدت ذاكرتك مستحيل ..
ظل يطالع فيها لفتره بعدها انفجر ضحك على كلامها وهو يقول: فقدت ذاكرتي ..؟!! تخيلي .. مستحييييييل ..
ارتاحت بعدها قالت: انه انت خوفتني .. اول ما صحيت تسألني منو انتي ..
إياد: طيب هذا سؤال روتيني يسأله الانسان اول ما يصحى ويلاقي نفسه في المستشفى .. عرفتك لما صحيت بس حبيت اقلدهم هههههه ..
اسيل: وقسم سماجه .. خوفتني وقتها عالفاضي .. المهم انت بخير ..؟!
إياد: يعني وشرايج ..؟!
جلس بالصعوبه وقال: المهم .. متى راح اطلع ..؟!
اسيل: مدري .. سامي سألهم اليوم الصبح فقال الدكتور خلوه اولا يصحى بعدين اسألوا متى يطلع ..
إياد: هههه المهم روحي اسأليهم اللحين ..
اسيل: طيب لما ييي بسام ياخذني اخليه يسأله لاني ما اعرف منو الطبيب وراح اضيع ..
ميل إياد فمه وقال: ما منج فايده ..
سكت شوي بعدها تذكر كل شيء فلف على اسيل وقال: هيه اسيل شنو صار امس ..؟!
اسيل: ولا شيء .. بس انت خوفتنا حسبناك حتموت .. انقطع نفسك بس سامي تدخل وفتش في جيوبك وهو يقول ان عندك الربو واكيد معاك اوكسجين .. وفعلا لقينا اوكسجين معك بعدها وصل الاسعاف وانتهت كل السالفه ..
سكتت شوي بعدها كملت بهدوء: رينا وواحد من اتباعهم ماتوا .. ليو واللي معاه انسجنوا وسمعت انهم بيسفروهم لكندا عشان حكومتهم تعاقبهم اما جوزيف فاخذوه للمستشفى يتعالج بعدها كمان بيسفروه ..... حتى ابوك انسجن لانه من زمان مطلوب ..
طالع إياد فيها فتتره وقال بهمس: اها .. انسجن ..
شوي ابتسم وغير الموضوع وقال: ايه شسالفة ذاك اللي مع سامي ..؟! اول مره اشوفه ..
اسيل: تقصد طارق ..؟! هذا واحد عندنا بالجامعه سنه ثالث مثل سامي .. ما اعرف شنوع علاقتهم ببعض ..
إياد: ياليتكم مثله .. لغه وتخطيط ومهارات قنص وذكاء .. تعرفي اخر حركه صلحتها انا وياك .. هو اللي اشر لي اعملها ..
اسيل: أي حركه ..؟!
إياد: ماش .. ماكو عقل .. تذكري لما جوزيف يتكلم مع ابوي .. مو ذولاك اتباعه الثلاثه كانوا مصوبين مسدساتهم علينا عشان ما نهرب وعيونهم للاسف في رئيسهم ..
اسيل: ايه ايه تذكرت .. بس للاسف للحين ما اعرف فايدتها ..
إياد: قلت لج من قبل انه ماكو براسج عقل ..
ميلت فمها بعدم رضى فكمل: في كل مسدس تقريبا شيء اسمه صمام الامان .. هذا فايدته انه يحفظ المسدسات .. اذا كان مفتوح فعندها لو تطلقي من اليوم لين باجر ما راح تخرج ولا رصاصه وحده .. لانه كثير تحصل الواحد وهو مثلا ينظف المسدس يضغط بالغلط وتنطلق الرصاصه وراح تُهدر ارواح بذي الطريجه .. فعملوها للامان .. واحنا في حين غفله من ذاك اللي عندنا فتحنا هالامان .. لو حصل اننا بنهرب فراح يطلقوا علينا ونصير جثث في ثواني .. بس بعد ما فتحناه ما راح تنطلق ولا رصاصه .. وعلى ما ينتبه ويقفله نكون احنا تصرفنا وقتها ..
رمشت اسيل بعيونها وقالت: صح معاك حق .. لما ابوك اطلق الرصاص على جوزيف كانوا راح يطلقوا علينا فلاحظت انهم ما اطلقوا بسرعه .. ما اذكر زين بس اللي لاحظته انهم ما اطلقوا بسرعه وبعدها اُصيبوا كلهم وما اعرف من مين ..
إياد: شايفه كيف .. هو طارق اشر لي اعملها فعملتها باللي قريب مني وخليتج تعمليها باللي في جهتج .. وفعلا الاغبياء ماكانو حاسين .. يفتقدون للحس ..
حرك إيده وهو يقول: اما سام مثله مثل هالاغبياء .. فاغر هههههههههه ..
اسيل: هههههههههههههه لا مو لهالدرجه ..
إياد بحماس: سُهى نسيت اقولج شيء .. تتذكري ذاك المحل اللي قلت لج ان صاحبه مهستر كاتب نوكيا للاتصالات وحاط صورة بلاك وآي فون وجالكسي .. ههههههه اشتريته وغيرت الاسم لـ إياد للإتصالات ..
اسيل: ههههههههههههههههههههه خبل ..
إياد: ايه صح نسيت احكي لج سالفة غرفة مساعد ..
اسيل: يا ذي الغرفه .. ها وش قصتها ..؟!
انفتح الباب بدفاشه ودخل شاب وهو يقول: هــــــآآي إيــدو ..
لفوا كلهم عليه ..
ميل إياد فمه وهو يقول: هذا انت ..
اسيل بدهشه: باسل ..!!
رمى باسل الورود اللي معاه عالكنبه وقال: له له له .. اول ما سمعت انك بالمستشفى قلت لازم ايي ازورك .. ازيك ..؟!
دخلت من بعده رؤى تقول بعصبيه: مو جذي الناس يدخلون .. وكمان ليش رامي الباقه عالكنب ..؟!! تراها غاليه ان كنت ما تعرف .. هذا غير انه لازم تقدمها بأدب للمريض ..
حرك باسل إيده بلا مبالاه فقال إياد: اوووه رؤى .. ما توقعتج بتيين ..
حطت رؤى علبة الشوكولاته عالطاوله بهدوء وهي تقول: ولد اختي بالمستشفى وما تبيني ايي .. الحمد لله على سلامتك ..
إياد: الله يسلمج ..
واخيرا دخلت سيرين وقفلت الباب وراها وقالت: إياد هههههههه يا حرام .. لا لا امزح .. الحمد لله على سلامتك ما تشوف شر ..
إياد: هههههههههههههههههه حتى ام ريشه يت ..
اعفتس وجهها وقالت: إيـــــــــــاد يا اهبـــــل ..
إياد: ههههههههههههههههههههههههههههههههههههههههههه ..
لفت رؤى عالباقه وشالتها من فوق الكنبه بعد ما رتبت بعض الورود اللي انتثرت وحطتها عالطاوله وقالت: ايش اخبارج يا سجى ..؟!
ابتسمت لها اسيل وقالت: الحمد لله بخير ..
ميل باسل فمه وهو يقول: سجى ..!! وش هالاسم الغبي مثلج ..؟! ناديها بأسيل ..
اعطته رؤى ذيك النظره اللي خلته يبتسم بترقيع فقال إياد: اسيل ..!!
لف على اسيل وقال: انتي عندج اسم ثالث كمان غير سجى وسهى ..؟!
رؤى: هااااا ..!!! من فين هالسُهى كمان ..؟!
إياد: هذا سر بيني وبينها ..
سيرين: خلاص شفيكم قلبتوها قضية اسماء ..؟!
باسل: سيرو معها حق .. اسمها من زمان اسيل ونادوها اسيل .. سجى وسُهى .. اسماء غبيه ..
إياد: بالعكس .. سجى واسيل اسماء غبيه ..
رؤى: وبعدين معكم ..
سيرين: اوكي إسألوا اسيل ..
لفت على اسيل وقالت: شتحبين ينادوج فيه ..؟!
هزت اسيل كتفها وهي تقول: مدري .. بس انا احب اسم اسيل .. ولكن اسمي الحقيقي الحالي هو سجى ..
باسل: ههههههههههه إياد سامع .. لا تناديها بسهى ..
إياد: شب مالك شغل ..
طالع في اسيل وكمل: بناديج بسهى لين امل ..
اسيل: خذ راحتك .. الاسماء ما تفرق عندي ..
سيرين: عيل انا بناديج راما ..
رؤى: خلاص عن العبط ..
باسل: سيرو مو عبيطه .. بلاها اسيل وسجى .. حتى بأسميها راما ..
رؤى: وبعدين معك انت الثاني ..؟!
باسل: اني اتضامن مع زوجتي المستقبليه ..
إياد: هيه رؤى .. لا تزوجين سيرين لذا العبيط ..
باسل: ههههههههههههههههههههههههههههه خلاص انتهى الوضع .. هي وعدتني وانتهى الموضوع فلا تحاول يا مخرب العلاقات ..
ميل إياد فمه بعدم رضى وقال: بس هو مهستر وعبيط ..
رفع باسل حاجبه وهو يقول: العبيط اللي جدامك يدرس قانون .. وخلال جم سنه بيطلع محامي ئد الدنيا .. عيل لو طحت في قضيه احلم اطلعك منها ..
إياد: ههههههههههههههه تخيلوا شكله واقف بالمحكمه .. هههههههه نو كومنت ..
تكتف باسل وقال: إياد باقولك شيء .. بديت تزعجني ..
إياد: هههههههههههههههههههههههههههه وهذا هو المطلوب ..
سيرين: انت ما تبطل استفزاز .. عيل انتبه من باسل والله يعينك هههههههه ..
ابتسمت اسيل وهي تطالع فيهم ..
هذولا هم عائلتها الحقيقيه ..
صار عندها اللحين هويه .. واسم .. وعائله ..
صار لها اصل وفصل ومكانه ..
محد اللحين يقدر يعايرها بكلمة لقيطه ..
محد راح يشمئز منها ومن وجودها ..
محد راح يحاول يبتعد عنها وعن المكان اللي هي موجوده فيه ..
محد يقدر يهينها ويسبها مثل ما يبغى ..
لقيطه ..
حياة صعبه عاشتها من وقت اكتشافها لهالحقيقه ..
تشردت بالشارع ..
ذاقت انواع الذل والاهانه ..
ما حست بحنان الام والاهل ..
مشاعرها .. انسانيتها .. تحطمت وتدمرت ..
عاشت حياة كثييير عاشوها من قبلها اللي من نفس حالتها ..
لقيط .. طلمه كانت دايم تسمع عنها ..
بس عمرها ما توقعت ان حياتهم بهذه القسوه ..
تجمعت الدموع في عيونها وهي تقول في نفسها: "يارب استر كل لقيط ولقيطه .. يا رب خفف معاناة كل لقيط ولقيطه .. يا رب ابعد عنهم السوء والهم والحزن .. يا رب هم من عبادك .. يا رب الطف بهم فمالهم غيرك بحياتهم" ..
ظهرت القسوه في ملامحها وقالت في نفسها: "يارب .. كل هذه المشاكل بسبب استهتار الاب والام بالدين فعاقبهم .. عذبهم .. لا تذقهم السعادة في حين ان ابنائهم لم يذوقوها" ..
جلست عالكرسي وطالعت في الارض بألم ..
ودها تلف العالم واي لقيط تشوفه تحضنه وتخفف من حالته وتساعده بكل اللي تقدر عليه ..
ودها ان اللقطاء اللي بالعالم يعيشوا احلى حياة ..
ودها ما يكون فيه شيء اسمه لقيط عشان لا يتعذبوا مثل ما تعذبت هي ..
ومع هذا هي متأكده ان اللقطاء اعدادهم بإزدياد ..
وبعضهم يعيشوا اسوأ من الحياة اللي عاشتها ..
تكرههم .. تكره كل اب .. وام عملوا بأولادهم كذا ..
تكرهم وتتمنى لهم العذاب .. ولو نص العذاب اللي عذبوه لاولادهم ..
ولو النص بس ..