شبكة همس الشوق - عرض مشاركة واحدة

29 - 3 - 2014, 11:53 PM

جالس بكل هدوء في سيارته يطالع في الدركسون بسرحان ..
اسبوع .. مر وقت طويل ولحد الآن مو عارف وشهو ..
مو عارف وشهو هالشيء اللي بيطلعه من الحاله اللي هو فيها ..
طارق قال انه بيتصرف .. ولحد اللحين ما صار شيء ..
لحد اللحين الامور مثل ماهي ..
مافي شيء تغير ..
بدأ يحس ان طارق كان يضحك عليه ..
تنهد بعدها ابتسم وهو يقول: اقول خلاص بلا عبط .. لا تقلبها نفسيه في هالوقت ..
لف عيونه عالبيت اللي موقف قدامه وهو يقول: خلوني اتصرف مع هالبنت اللي لين اللحين تضن اني ميت ..
نزل من السياره وراح الباب ..
ابتسم وهو يتذكر اول مره جاء هنا ..
وقتها فتحت الباب وهي لابسه ملابس ولد فحسبها عادل ..
دق الجرس وبعد شوي فتح عادل ولما شافه قال: اهلين اخوي ..
ضربه سامي على كتفه بدفاشه وهو يقول: اخسس يا دنو .. لا تحاولي ما راح انخدع مرتين ..
بغى عادل يطيح عالا رض من ضربة الدفشه فقال: عفوا اخوي .. انت منو ..؟!
رفع سامي حاجبه وهو يقول: افا بس .. يعني صحيح اموت شوي بس يعني مو بالسرعه تنسين شكلي ..
استغرب عادل منه .. واللي زاد استغرابه هو انه يكلمه بصيغة مؤنث ..
لحضه ...!!
لا يكون هذا من اصحاب دانا ..؟!!
طيب حتى لو من اصحاب دانا ففيه فرق شاسع بينه وبينها ..
مو لهالدرجه يغلط ..
رفع حاجبه وهو يتذكر جملته *مو بالسرعه تنسيني* ..
ما يدري منو اللي ناسي شكل الثاني ..
ابتسم عادل وقال: اخوي انت شكلك غلطان .. إذا كنت تبي دانا فللأسف انا مب دانا .. انا اخوها .. فيه فرق واضح جدا بيني وبينها .. احنا مب نسخه من بعض والشبه اللي بيننا مو كبير ..
حك سامي شعره وهو يطالع فيه .. فعلا الشبه بينهم مو كبير لان هذا ما يشبه دانا ..
اذا .. شكله غلط ..
ضحك بإحراج وهو يقول: هههههههه معليش آسف ما قصدي .. شسمه ممكن تنادي لي دانا .. ابغى اكلمها شوي بس .. وان شاء الله ما اكون ازعجتكم ..
عادل: لا عادي ماكو ازعاج ولا شيء .. دقيقه اناديها لك ..
دخل لداخل واتجه لغرفة دانا ..
فتح الباب بهدوء فشافها جالسه على الارض ضامه ركبتها وقدامها كتاب مفتوح تطالع فيه بسرحان ..
عادل: دانا ..
دانا: ............................
تنهد ورفع صوته شوي وهو يقول: دانا ..
رفعت راسها له بهدوء وقالت بهمس: نعم ..
عادل: واحد من ربعج برى يبيج ..
طالعت فيه لفتره بعدها رجعت تطالع في الكتاب وهي تقول: ما ابي ..
عادل: دانا ما يصير جذي .. شوفي شنو يبي .. واذا ما تبين روحي له انتي وقولي ما ابي ..
دانا: ..............................
تنهد وقال: اذا يلستي على ذي الحال راح تتعقدي نفسيا بدون لا تحسي .. الريال ميت له فوق النصف شهر .. ادعيله بالرحمه ..
تحركت شفاتها وهي تقول بهمس: جذب .. ما مات ..
طالعت في اخوها وقالت: ما مات .. انا متأكده .. مستحيل يروح ويخليني جذي .. مستحيل ..
تنهد عادل وقال وهو يجاريها: معاج حق .. يمكن يكون كله جذب ... والحين اطلعي شوفي شنو يبي .. يمكن يكون فيه شيء مهم مع ان حركاته العبيطه ما تدل ان عنده سالفه ..
طالعت دانا فيه بنظرات كلها ألم ..
ماكو غير سامي يتصرف بعبط ..
لكن .. اختفى ..
قامت من مكانها بهدوء وطلعت برى ..
اتجهت للباب وفتحته ..
ابتسم سامي لما شافها وقال: اخسس لابسه بيجامه .. طالعه كأنج باربي ذيج العروسه ..
اتسعت حدقة عينها وهي تطالع فيه فضحك وهو يقول: هههههههه امزح امزح لا تعصبي علي مثل ذيج المره ..
تجمعت الدموع في عينها فقال وهو يضحك: ههههه لا يمكن .. شفيج بتصيحين ..؟!
شهقت .. مره واثنين وثلاثه ..
هذا حلم .. هذا مو صح .. لا يمكن اصلا ..
حرك سامي ايده وهو يقول: اشاعه جذب طلعتوها يا اصحابي الحلوين .. انا مت ..!!! لما سمعت هالشيء بغيت اموت .. وش ذا الفال اللي ما قبلته ابدا ..؟!!
حط ايده على كتفها وكمل: حاولوا الشله يتصلوا عليج بس موبايلج مغلق ومحد يعرف طريج بيتج .. في الفتره اللي راحت انشغلت بسبب تراكم الدروس هذا غير اني احاول اتعلم لغه انجليزيه .. نسيتج بس اليوم تذكرتج وقلت لازم اصحيها من غفلتها .. صج انج طفله وتصيحين على أي شيء ..
ما زالت عيونها مفتوحه على آخرها وتطالع فيه ..
ماهي مصدقه .. ماهي مستوعبه شيء ..
بدأت تختفي صورة سامي من عيونها ..
كانت بتطيح فمسكها وهو يقول بصدمه: هيه دانا شفيج ..؟!
جلسها عالارض وقال: دايخه ..!!! طبيعي مو انتي عندج انيميا .. لا يكون بس الفتره اللي راحت ما كليتي عدل ..؟!! هذا مو بعيد عنج ..
تجمعت الدموع في عينها وهي تقول: سامي ..!!
ابتسم وهو يقول: بلحمه وشحمه ودمه وكل شيء ..
هزت راسها بلا وهي تقول: كيف .. كيف ..
هز كتفه وهو يقول: مدري عنكم .. البلا فيكم مب فيني ..
شهقت للمره العاشره وهي تقول: كنت اتمنى .. تمنيت تيي وتقول كنت امزح .. كنت عارفه ان امنيتي غبيه .. غبيه ..
مسحت دموعها وهي تقول بضعف: بس تحققت .. تحققت ..
بعدها غطت وجهها بإيدها تبكي بصمت ..
حك سامي شعره وهو يقول في نفسه: "تبجي .. وش ذي الورطه .. شلون يتصرفون الناس بذي الحاله" ..
عصر مخه الفاضي بس مالقى شيء ..
تنهد بعدها وظل يطالعها بهدوء ..
مو بس يحبها .. يعشقها ..
اول بنت ينجذب لها لهالدرجه ..
بس هو مو مثل بقية البشر عشان يحب ويتزوج ..
قدره غير .. قدر انفرض عليه من ساعات ولادته الأولى ..
قدر مستحيل يتغير ..
ابتسم بإستهزاء .. شلون صدق طارق لما قال راح اساعدك ..
ماكو طريقه اصلا ..
قام من مكانه وقال بهدوء: مع السلامه ..
بعدها راح للسياره وركبها ..
رفعت دانا راسها وشافت سيارته وهي تبتعد من هالمكان ..
اللي توه صار .. حقيقه صح ..؟!
ايه حقيقه ..
هي متأكده من هذا ..
متأكده وبقوه ..

....................

وصل سامي للبيت فنزل من السياره ودخل وهو يطالع في ساعته ..
ميل فمه وهو يقول: غريبه .. وصلت متأخر .. هذا كله من السرعه البطيئه ذي ..
تنهد وقال: اصلا توبه .. ماكو سرعه بعد اليوم .. شفت الموت بعيوني .. ما ابي اجربه مره ثانيه ..
جلس عالكنبه ونادى بصوت مرتفع: رينـــــــــــــــــــدا ..
جت ريندا اللي قالت بإبتسامه: هل عدت يا سيد سامي ..؟!
سامي: لا باجي برى .. ييبي لي قلاس ماي ..
ابتسمت وقالت: حسنا ..
راحت وبعدها جابت له كوب مويه ..
شرب منه وهي واقفه تطالع في بإبتسامه ..
بعد ما خلص طالع فيها وقال: تتأمليني ها ..!! يوا الشله رقم اثنين بس يتأملون فيني ..
ريندا: انت حي .. من يصدق هذا .. انا حقا سعيده ..
ابتسم سامي وتربع وهو يقول: هيه ريندا .. جذي ابي تحكي لي عن شعورج بعد ما ضنيتي اني مت .. والله وناسسه ..
ابتسمت وقالت: فيما بعد .. انا ألان مشغوله ..
سامي: حسننا ان انتهيتي من عملك لا تنسي ان تأتي إلي لتحكي لي عن مشاعرك .. أفهمتي ..؟1
ابتسمت للهجة الساخره على لغتها وقالت: حسنا .. لقد فهمت ..
اخذت الكاسه ورجعت لجناح المطبخ ..
تنهد سامي وحاس بطفش كبير ..
سمعت صوت احد يدخل من الباب فلما لف شاف ابوه هو اللي دخل ..
من وقت ما رجع للبيت نادر يشوف ابوه لانه اربع وعشرين ساعه برى .. واذا شافه ما يحصل بينهم أي احتكاك ولا حتى بالنظرات ..
حس سامي بالضيقه من هالشيء ..
ابنه حصلت له الكثيير من المشاكل ومع هذا ابدا مو مهتم ولا اصلا داري وش صار ..
لف سلطان نظره على جهته وقال بهدوء: سامي ..
استغرب امي .. معقوله اللحين بيكلمه فقال: نعم ..
سلطان: الحقني فوق للجناح ..
بعدها طلع الدرج وسامي يطالع فيه بإستغراب ..
قام وطلع وراه ..
دخل سلطان للجناح حقه .. نزل البشت وعلقه بهدوء ..
دخل سامي وقفل الباب وراه ..
جلس عالكنبه المقابله لكنبة ابوه ..
طالع الاب فيه ببرود وقال: سمعت انك عملت حادث .. الحمد لله عالسلامه ..
ارتسمت على شفة سامي إبتسامة استهزاء ..
توه يسأل ..!! صح النوم ..
طالع في ابوه وقال: الله يسلمك .. بس ترى من زمان حصل هذا ..
سلطان ببرود: ادري ..
اضطر سامي يسكت ولا يجادل ..
طالع سلطان فيه لفتره بعدها قال: شكلك اللحين عرفت مخاطر السرعه .. هذا درس مفيد لك واتمنى تكون تعلمت منه ..
سامي: ايه تعلمت ..
سلطان: ما ابغى اسمع نبرة الاستهزاء في صوتك ..
لف سامي نظره بعيد عنه وما رد ..
صحيح يكره .. بس مع هذا يحترمه ..
هو الشخص اللي رباه وانتشله من الضياع اللي كان فيه ..
طالع سلطان فيه لفتره بعدها قال: وين الورقه ..؟!
لف سامي نظره لناحيته وهو يقول بإستغراب: أي ورقه ..؟!!
سلطان: الورقه .. الخاصه بالمُستشفى اللي انولدت فيه .. اللي كنت بأرميها بس انت رفضت واخذتها عندك ..
فهم سامي وش يقصد .. يقصد الورقه اللي شافوها دانا + انس ..
طلعها من محفضته واعطاها لابوه ..
طالع سلطان في الورقه وقال: انت عارف ان امك لما ولدتك هربت بيك من المُستشفى عشان لا يتسجل اسمك تحت اسم جاك .. لانك مب ابنه .. المُستشفى مع هذا ما قدرت تسكت عن الامر .. بس ما بيدها حيله لانك ما كنت موجود .. بس لما انا اخذتك كنت وقتها تعبان فوديتك للمستشفى وصادف انه نفس المُستشفى اللي ولدت فيه .. لما شافوك تطابقت تحاليلكك مع تحاليل ذاك المولود .. وكانوا وقتها بيرفعوا قضيه ضد امك وجاك بسبب انهم اخرجوك من المُستشفى قبل لا يكتبوا لك هويه .. القانون عندهم صارم وخصوصا بحقوق الاطفال ..
حرك الورقه وكمل: هذه الورقه اللي كانوا راح يسلموها للقانون .. بس انا اخذتها منهم بطريقتي .. لانها لو وصلت لهم راح يكتشفوا انك مب ابن جاك وبعدها راح تدخل بقضايا مالها اخر وانا مب فاضي .. هذا غير اني ما ابيك تعيش في الغرب فيبتك هني ..
هز سامي راسه .. هذه الاشياء تقريبا كان عارفها من قبل ..
سلطان: قبل سبع سنين كنت بأتخلص منها بس بعناد اطفال اخذتها مني وكنت تقول اني قاسي وابغى اخليك طول عمرك بدون شيء يثبت ان لك عائله .. كنت تكره امك .. بس مع هذا متمسك بوجودها وبذي الورقه لانها الثابت الوحيد على وجودك ..
ابتسم وكمل: على طاري امك .. سافرت اليوم .. وكمان غيرت اسمها لـ إيفان .. حلو اسمها صح ..؟!
ما اهتم سامي لهذه النقطه ..
تسافر .. تغير اسمها .. هي حره .. ما يبي يسمع عنها أي شيء ..
رمى سلطان الورقه على الطاوله وقال: جاك انسجن بعد ما اُثبتت ضده قضية الشروع في القتل .. طبعا الدليل كان مقطع صوتي سجل رفيجك اللي مدري ايش اسمه ..
سامي: طارق ..
سلطان: ايوه اضن ان اسمه جذي ..
ابتسم سامي غصب عنه ..
جاك انسجن .. كان يتمنى انه يموت عشان يفتك منه ..
اكثر من مره كان راح يفقد حياته بس الله ستر ..
سامي: وجم بيقعد بالسجن ..؟!
سلطان: تقريبا 15 سنه ..
بعدها كمل: يعني بتتزوج وتخلف وهو لسى ما خرج .. وإذا خرج راح يُرحل لبلده ..
تضايق سامي من طاري الزواج فرفع ابوه حاجبه وقال: شفيه ويهك انقلب ..؟!
سامي: ماكو شيء ..
اشر سلطان بعيونه عالطاوله وهو يقول: هذه ساعتك .. اتصلوا عليّ بعد ما كانت مواصفات سيارتك نفس المواصفات اللي بلغت عنها ولما ييت شفت حادث فيها وتقريبا ثلاثة ارباع سيارتك تفحمت من الحريق .. والشيء الوحيد اللي لقيته هو ساعتك ..
ابتسم بإستهزاء وكمل: قلت اكيد ان جثتك صارت رماد من هالحريق ومابقي فيه شيء ..
طالع سامي فيه لفتره بعدها قال: اعرف ان هذه هي امنيتك . اسف لان امنيتك ما تحققت ..
ما يدري ليه سامي قال هالكلام ..
يمكن من الاحساس اللي بداخله ..
متضايق كثيير من طريقة كلام ابوه .. يكلمه وكأنه ولا شيء قدامه ..
ابتسم ابوه وقال بهدوء: بالعكس .. فرحت كثير لما اتصل علي رفيجك وبلغني بأنك حي ..
انصدم سامي وطالع في ابوه بصدمه ..
وشو ..؟!!
وشو هالكلام اللي سمعه ..؟!
حقيقه ولا يتهيأ له ..؟!
طالع سلطان فيه بنظرات بارده وقال: من بعد ما شفت سيارتك رماد توقعتك مت .. بعدها بفتره ارسلت مراد يبحث في المستشفيات عشان يتأكد .. وفي احدى المستشفيات كان فيها مريض اسمه سامي وما قدروا يعرفوا عنه معلومات اكثر لان حاجياته ضاعت في الحادث اللي عمله .. وهذا السامي مات في وسط العمليه .. من بعدها كل اللي هنا قالوا انك مت .. حتى انا ضنيت انك مت بس حبيت اتأكد .. لما رحت المستشفى اكتشفت ان ذاك اللي اسمه سامي يوا اهله وتكفلوا بدفنه .. وان عمره اصلا فوق الاربعين سنه ..
سكت لفتره وهو يطالع في سامي بعدها قال: كنت ناوي اروح اقتل ذاك اللي اسمه جاك .. بس مكالمة رفيجك وقفتني .. رفيجك بصراحه كتله هائله من الذكاء .. وخلاص امك سافرت وجاك انسجن بعد اسبوع من المحاكمه .. محاكمة بسبب الشروع بالقتل .. وكمان امك تحاكمت .. لكن السبب مختلف ..
استغرب سامي من كلامه .. وليش تتحاكم امه ..؟!
هي من جت لهنا ما عملت أي شيء غلط على حسب علمه ..
سلطان: انت ولد حرام .. وراح تظل ولد حرام وماكو أي طريجه تطلعك من هذا الوضع .. ماكو غير الصبر .. اما شيء ثاني فلا ..
حس سامي بالضيقه من كلامه ..
هو عارف فمو لازم يذكره ..
ظل الوضع هادي لفتره بعدها قال سلطان: بس فيه شيء اسمه تمويه .. راح يساعدك تعيش حياة افضل شوي ..
اندهش سامي وطالع فيه وهو يقول: شنو ..؟!!
سلطان: رفيجك هو اللي خبرني عنها .. امك اخذت اوراقك اللي كانت معي وراحت للمحكمه عشان تثبت انك ابنها .. ومن خلال تحاليك ثُبت بانك ولدها .. بس كمان ثُبت بانك مو ولد جاك فاعترفت بانك من ريال غير زوجها .. يعني ولد حرام .. اعترفت بهذا .. وما اعترفت انه انا .. قالت انها نسيت من يكون ..
سكت لفتره بعدها قال: خلصت الجزء اللي يخصها من المحاكمه وباجي شوية جزء يخصك .. وفي الشرع .. ولد الحرام يُنسب لأمه .. وانت راح تُنسب لامك .. يعني ما راح يكون اسمك سامي سلطان ابدا .. ولا بيني وبينك أي علاقه .. ميرد يتيم وانا تكفلت بكفالته .. اصلك الحقيقي هو من جهة امك .. صار واضح للكل انك ولد حرام بما انه نسبك لامك ..
استغرب سامي .. لا صُدم من اللي سمعه ..!!
هذه هي المُساعده اللي يتكلمه عنها ..
لا بكذا انفضح اكثر من قبل ..
أي مساعده يقصدها طارق ..؟!!!
والمشكله يقول تحمل العواقب ..!!!
مو مصدق ان هذا اللي صار ..
خلاص هو راضي بأنه يكون بدون نسب .. عالاقل مو الكل راح يعرف بنسبه الحقيقي ..
عالاقل بعضهم راح يضن انه كان ضايع من اهله وعشان كذا ماله نسب ..
اما بذي الحاله فصار معروف ان ولـــد حـــرام ..
فتح فمه بيعترض بس قاطعه ابوه يقول: انت وافقت على كلامه .. ما ابغى اسمع اعتراض ..
اندهش سامي من رده وللمره الثانيه كان بيعترض بس نظرة ابوه الحاده خلته يوقف ..
بعد فترة سكوت قال سلطان: وان اعترضت .. هذا راح يغير شيء ..؟! خلاص كل شيء صار بإيد المحكمه .. وماكو مجال للإعتراض ..
سكت فتره يطالع في ملامح ولده اللي يطغى عليها الألم ..
بعدها قال بهدوء: من اليوم ورايح بيكون اسمك سامي إيفان جونز الـ****** .. مو سامي سلطان محمد .. لكن ..
وسكت من بعد هذه الكلمه فطالع سامي فيه وكأنه يقول وشو بعد كلمة لكن ..
كمل ابوه: لكن .. الناس هني .. شنو بيعرفهم ان اسم إيفان هو اسم حرمه ..؟!
لحضة صمت .. ما فهم سامي وش يقصد ..
فقال سلطان وهو عارف ان قدرة ابنه على الاستيعاب بطيئه: اسم إيفان بتركيا ينطبق عالرجل والمرأه .. مو شرط تقول للي حواليك ان اسم إيفان حرمه .. كل من يقرأ اسمك يحسب انك ولد رجل اجنبي وبس .. وبجذي بتطلع قدامهم على اساس انك ولد اجنبي مو شيء ثاني ..
فتح سامي عيونه بصدمه وهو مو مصدق الكلام اللي يسمعه ..
سلطان: هالفكره ما قد طرت على بالي .. اللي بيفتش بأوراقك راح يعرف ان نسبك موصول بأمك وهذا يعني انك ولد حرام .. بس منو هذا اللي بيروح يفتش بأوراقك ..؟! جهات العمل هي اللي تعمل جذي .. وانت لا كبرت ما راح تحتاج تتوضف لانك بتفتح بنفسك شركه وانت اللي توضف الناس فيها .. واذا حصل واحد عرف فهذه هي الحقيقه اللي ما منها مهرب .. واكيد راح يتغاضى عن الامر لانه ماله مصلحه بفضحك ..
سكت شوي بعدها كمل: والعواقب اللي كان يقصدها رفيجك هي انك راح تواجه الكثير من التساؤلات وخصوصا من طلاب جامعتك .. شلون تغير نسبك ..؟! كيف صار جذي ..؟! اشرح لنا .. واسئله مالها نهايه .. انت تصرف وقتها ..
قام واتجه لباب غرفته ..
وقف ولف على سامي وقال: لما علمني رفيجك بذا الشيء انا رفضت بالبدايه .. فاتهمني بالانانيه واني ما ابغى مصلحتك .. بعدها ... وافقت لاني شفت انه في هذا الشيء مصلحتك .. سبب رفضي كان اني ما بغيتك تبعد من هني .. حتى لو كان بالحرام .. انا ما يبتك لقطر إلا لأني اعتبرك ولدي اللي مالي غيره .. ما تزوجت لاني ما بغيت يكون لي ابناء غيرك ..
لف سامي يطالع فيه بصدمه فكمل سلطان: كنت قاسي عشان اعلمك شلون تتخطى الشيء اللي انت فيه .. بعدها كبريائي رفض يعترف لك بانك شيء مهم بحياتي .. كان عادي انك تكرهني بس المهم تظل هني .. رفيجك طلب مني اني اخبرك لان في اعترافي ذا راح اسبب لك اكبر سعاده ..
طالع في سامي المصدوم لفتره بعدها قال بحده: الريال ما يبجي ..
انصدم سامي من جملته ..
فتح عيونه وغمضها فلاحظ ان الدموع متجمعه فيها لا ايراديا ..
بلع ريقه يمنعها من النزول مع انه مو عارف شلون تجمعت ..
بس اللي سمعه شيء مو سهل ..
فرحه .. مالها حد ..
وده يصرخ بأعلى صوته عشان يطلع كل مشاعره المكبوته لبرى ..
رفع عيونه يطالع في ابوه ..
الشخصيه القويه .. النظرات الحاده .. المظهر اللي يفرض هيبته ..
انسان مرعب ..
بس اللحين تغيرت النظره ..
مو انسان مرعب بالنسبه له ..
لا .. انسان بقمة الـ ....
غلط .. اب بقمة الحنان ..
لف ابوه ودخل للغرفه وهو يقول: وتذكر اني ما تمنيت تيي للدنيا وانت ولد حرام .. بس صار اللي صار ..
بعدها قفل الباب وراه ..
اما سامي فجالس مكانه يرتب الصدمات اللي تعرض لها ويحاول توضيحها لنفسه ..
مو قادر يستوعبها كلها مره وحده ..
يفكر .. والابتسامه ما فارقت وجهه ولا لحضه ..
ولد حرام وبيضل ولد حرام ..
بس مو كل الناس بتعرف بحقيقته ..
حتى يمكن ما راح يكون فيه احد بيعرف بحقيقته ..
ذاك الطارق .. ليه ساعده من الحادث ..؟!!
كان غباء منه لما يقول ليتك ما ساعدتني ..
لو انه ما ساعده .. كان اللحين مات وهو متضايق ..
وهو كاره لحياته .. وابوه ..
بس اللحين لا ..
يحب حياته .. و .... يحب ابوه ..
ضيقته انخفضت كثيييييير ..
اكثر من الكثيــــــــــــــــــــــــــــــــــر ..
لحضه ..!!!
هذا يعني انه فيه امكانيه انه يتزوج ..
ايه صح اولاده لا كبروا راح يكون اسمهم منسوب لاسم ابوهم ..
سامي بيكون خايف من مسألة احد يعرف ان نسبه لامه ..
بس اولاده ما راح يكونون خايفين من نسبهم لانه منسوب لابوهم .. ومحد اصلا بيفكر يبحث عن اصل اسم الجد ..
يعني لو حصل ولقى بنت راضيه فيه وبكونه ولد حرام فراح تكون هذه سعاده مالها نهايه ..
مالها نهايه ..
حس بالعبره تخنقه ..
كل شيء تغير ..
نظرته للمستقبل تغيرت 180 درجه ..
رب العباد ما ينسى عبده ..
ما ابتلاه إلا لانه احبه .. ما اشقاه إلا ليُسعده ..
إلا ليُسعده ..