شبكة همس الشوق - عرض مشاركة واحدة

17 - 4 - 2014, 09:32 AM

* الجــزء الســادس والعشــرون *

* عمر *

الاربعاء .. الظهر

ابعدت اللحاف عني بضيق وانا احس بالحر وجلست
احس حرارتي خفت اليوم .. التفت لي رايد اللي جالس على كنبة منفردة قبالي ويلعب بالاب توب حقي وابتسم وهو يطالعني

رايد بابتسامة = ماشاء الله شكلك صحصحت .. لك اسبوع وانت بس طايح

نزلت راسي ومارديت عليه .. مر أسبوع على وفاة الغالية ... مر أسبوع وانا بحال مايعلم فيه الا الله ... مر اسبوع وانا مصدوم ... ماتحملت الخبر .. آآآآه الانسانة الوحيدة بحياتي راااحت
تنهدت بألم ... مر اسبوع ماشفت احد من اقاربي .. لا جدي ولا عمي ابو سامي ولا عيال عمي ولا احد ولا احد ... آخر مرة شفتهم يوم الدفن

جدي ادري انه تعبان ... المفروض انا اروح ازوره بس الحمى منعتني

كأني سمعت رايد يعلمني وانا تعبان ان جدي يتصل عليه يوميا يسأله عني .... اسمع رايد وهو يكلمني بس طوال الاسبوع اللي راح اسمعه وكأني مااسمعه

لي اسبوع حي وبنفس الوقت ميت ... احس باللي حولي واحس باللي يزورون من الجيران ويعزون واحس بيديهم وهي تتحسس وجهي وجسمي يشوفون حرارتي واسمع اسألتهم لرايد واسمع تعازيهم لي بس بالي مو معهم ... بالي مع الغالية اللي دفنتها يوم الجمعة

رفعت راسي لرايد اسأله اتأكد ولقيته يطالعني بصمت

عمر بحزن = كأني سمعتك تقولي مرة ان جدي دايم يتصل عليك ؟

رايد = ايه دايم يتصل يسأل عنك

عمر بحزن = اتصل عليك اليوم ؟

رايد بتنهيدة = ايه ... اتصل وانا برا البيت وقلتله انك بخير ( وسكت شوي ) دايم يقولي انه يبي يشوفك بس تعبان ولا قدر

نزلت راسي

عمر = ابحاول اروح له اليوم .. احس نفسي احسن ( رفعت راسي لرايد ) رحت انت اليوم للشغل ؟ اظن انك غايب عن شغلك لك اسبوع صح ؟

ابتسم رايد ابتسامة عريضة وهو يطالعني

رايد = حلوة ذي اظن ... عندك تشوفني قدامك اسبوع مارحت وتقول اظن ؟

تنهدت ... وانا اصلا كنت حي الاسبوع اللي فات ؟

عمر بحزن = مدري .. اسمعكم انت والشباب واحس باللي حولي بس كأنه حلم

رايد = الله يرحمها ( وكمل يجاوب على سؤالي ) لا .. مارحت لشغلي ماخذ اجازة عشانك ...

عمر مستغرب = طيب قبل شوي تقول اتصل عليك جدي وانت برا البيت وين كنت اجل ؟

سكت رايد شوي وبعدها نزل راسه لشاشة الاب توب وهمس

رايد = رحت للبنك اسأل عن شي ( ورفع راسه بمرح كأنه يغير الموضوع ) الشباب بيستانسون اذا عرفوا انك اخيرا صحصحت .. كل يوم يجون يسهرون عندنا ويتطمنون عليك

ابتسمت مجاملة ... مالي نفس لشي ... مالي نفس لمرح الشباب .. مالي نفس اجامل احد

نزلت راسي .. الحمى منعتني اشوف نادر ... ابد ماعمري شفته ... اسبوع لا زرته بالمستشفى ولا ادري وينه اصلا اكيد طلعوه

تنهدت ... الله يرحمك يمه ... حققتي امنيتي بأخو بس رحتي انتي ... ادري انك تزوجتي عشان تجيبين لي هالاخو ... امنية كنت اتمناها من يوم كنت صغير ... دايم اجيك واشتكي لك .. يمه ليه انا مالي اخوان ... ويوم جالي اخو ... اختفيتي انتي ... ليه فرحتي دايم تصير ناقصه لييييييييه

رفعت راسي لرايد وابتسمت ابتسامة صغيرة وانا اتخيل نادر اخوي

عمر بابتسامة = ابروح اليوم ازور جدي واسأله عن نادر اخوي ... ماعمري شفته

ارتبك رايد

رايد = نادر !!!

ابتسمت اكثر

عمر = ايه .. لي اسبوع ماشفت احد اكيد طلعوه من المستشفى بس مدري ويــ

وقاطعني رايد مرتبك

رايد = عمر .. آآآآآ .. هم سموه بس ماسموه نادر سموه فارس

طيرت عيوني برايد مستغرب

عمر = فارس ؟

رايد = ايه ... يوم الاحد رحنا انا والشباب لبيت جدك نعزيه وعلمنا سامي انهم سموه فارس وجيت ابعلمك بس انت دايم اكلمك ولا ترد علي

اطالع رايد بصدمه ... لا .. انا وامي اتفقنا نسميه نادر وراح يصير نادر

كمل رايد كلامه

رايد = عمر انت ماعلمت احد من اهلك انك بتسميه نادر ؟.. انت طولت ولا رحت لهم ابد ولا شفت الولد .. اكيد بيسمونه قبلك

تنهدت ونزلت راسي

عمر = انت تشوفني قدامك توني خفيت ( ورفعت راسي لرايد ) ابروح اشوف اليوم ( وقمت بتعب ) المهم ابروح اتروش

العصر ..

لبست ثوبي اخذت شماغي وطلعت من البيت ركبت سيارتي وانا اتلثم مالي نفس اكلم احد .. حركت السيارة وتوجهت لبيت جدي .. وطلعت جوالي وانا اسوق .. ولقيت مكالمات لم يرد عليها بالهبل ورسايل

تنهدت وانا اطالع جوالي ... من زمان ماهتميت فيه ... لولا رايد كان خلص شحنه من زمان وحاطه رايد على الصامت

فتحت المكالمات التي لم يرد عليها
اكثرها من جدي ومها .. ومكالمتين من سامي ومكالمات من عمي ابو سامي ومكالمات من الزملاء بالجامعة

فتحت الرسايل اقراها وانا كل شوي ارفع راسي للطريق وارجع انزل راسي اقرا

اكثر الرسايل تعازي من الزملاء

تنهدت ونزلت الجوال بالمرتبة بجنبي باهمال وكملت الطريق

وصلت بيت جدي بس لقيت الباب مسكر .. ضربت الجرس وفتحت لي مها

دخلت الحوش وفكيت اللطمة عني واول ماسكرت الباب وراي ... على طول تعلقت مها فيني وبكت وهي متعلقه برقبتي

مها بصوت باكي = ويييينك اسبوع من صار الحادث ماشفناااااااك ( وبكت ) ندري انك زعلان على امك الله يرحمهااااااااا

منحني شوي لمستواها ... حطيت يدي على ظهرها وانا احاول امسك نفسي

عمر بحزن = كنت تعبان ..

ابتعدت مها عني وانا اعتدلت واقف

مها وهي تمسح دموعها = والله لولا الولد اللي عندك بالبيت كان رحت لك بس صعبة ندخل بيتك انا وامي وهو فيه .. وابوي تعبان ... هم يسألون عنك وااااجد وانت ماترد على اتصالاتنا

ورفعت يدها وحطتها على جبهتي

مها = الى الحين حااار

عمر = لا الحين احسن .. كيفهم جدي وجدتي

مسكت مها يدي تجرني

مها = تعال .. لهم اسبوع بس يسألون عنك وابوي وده يروحلك بالبيت بس كل يوم ياما عنده رجال او تعبان ما يقدر يمشي

جيت ابسألها عن اخوي الجديد بس مها ماسكتت وهي تجرني معها

مها = دايم نتصل عليك ولا ترد .. كلنا زعلانين بس ما انعزلنا عن العالم مثلك

وقبل ندخل البيت وحنا عند العتبه الداخليه .. وقفت مها وكأنها تذكرت شي والتفتت لي على طول

مها = صح عمر ... فيه شي لي يومين افكر فيه ..

عمر = وش ؟

مها بضيق = بعد زواجي مابي امي وابوي يبقون لحالهم بالبيت .. اخاف عليهم

قطبت حواجبي .. صح جدي وجدتي مين بيهتم فيهم بعد مها

عمر = طيب .. زواجك باقي له شهرين حـ

وقاطعتني مها تصحح لي

مها = لا اجلناه شهر .. بيصير بعد ثلاث شهور

سكتت شوي

عمر = المهم زواجك باقي له ثلاث شهور حاولتي تكلمينهم بالموضوع وتشوفين رايهم ؟

مها = لا استحيت ابيك انت تكلمهم وتشوف وش ناوين عليه بعد زواجي .. الصراحة مابيهم يجلسون لحالهم هنا .. اخاف ما ارتاح

تنهدت وانا اهز راسي بايه

عمر = ابكلم جدي واشوف

مها = ايه اقنعهم تكفى لا يجلسون لحالهم

دخلنا الصاله ولقيت جدي و جدتي جالسين بالارض وساندين ظهورهم على الكنبة الطويلة اللي وراهم والمركى بينهم وجدي ممدد رجوله

اول ماشافوني قدامهم فرحوا ..

جدي بفرح = هلااا والله بعمر هلا والله بالغااااالي

ضربت جدتي بيدها على الارض بجنبها ( يعني تعال عندي ) هي وشوي وتبكي

جدتي = هلا والله تعال ياعمر تعال عندي

مشيت بسرعة وجدتي ماده يديها لي ... جلست قدامها على ركبي وانحنيت على جدتي وسلمت على راسها بس جدتي مسكت وجهي بين يديها وسلمت على خدي وضمتني لصدرها وكملت بصوت باكي وانا ساند راسي على كتفها

جدتي بصوت باكي = اشغلت بالي عليك .. الله يعوضك ياوليدي.. الله يرحم امك وعمك ( وبكت ) الله يعوضك خير عن ابوك وامك

غطيت وجهي بشيلتها احاول امنعي دموعي تنزل ... ابعدتني جدتي عنها تطالعني وتحسس وجهي بيديها

جدتي بحزن = وجهك حار .. وشلونك الحين ... والله ياوليدي ودي اروح لك لبيتك واتطمن عليك بس هالولد اللي انت مسكنه عندك ( وكملت بقهر ) هو الى متى بيصير ببيتك ليه مايشوف له مكان ثاني .. مــ

قاطعة جدتي قبل تكمل

عمر = جده انا بخير ماتحسنت الا اليوم وعلى طول جيت ( والتفتت لجدي ولقيته يطالعني يحتريني اخلص من جدتي ابتسمت ) جدي وشلونك ؟

ومشيت على ركبي وانحنيت على جدي وسلمت على راسه

مسكني جدي مع اكتافي يطالع وجهي بحنان

جدي = علمني سامي انك مريض من يوم الجمعة والله ياوليدي اني تعبان من رجيلاتي كل ماحاولت اجيك يجون عندي رجال .. حتى عمك ابو سامي اشغلناه معنا هو وولده من يوم جوا من السفر مارتاحوا .. كل الشغل فوق راسهم ياوليدي

سلمت على راس جدي مرة ثانية

عمر = ماعليك جدي .. انا اللي مقصر المفروض انا اللي اجي عندك

وجلست قدامهم مثل وضعية التشهد وقعدت اتلفت ادور بلهفة على نادر

عمر بابتسامة = وين اخوي الجديد ؟

ابتسمت جدتي وحطت يدها على فخذي

جدتي = اخوك قريب ياوليدي ( والتفتت لجدي ) اتصل عليهم خلهم يجيبونه لعمر

قطبت حواجبي مستغرب

ابتسم جدي بفرح والتفت لمها اللي وراي و الى الحين واقفة عند مدخل الصاله

جدي = مها هاتي التلفون

عمر مستغرب = ماهو عندكم ؟

التفت جدي لي

جدي = لا عند اخوانه بعنيزة ... هم جابوه لنا وشفناه بس ماطولوا امهم بالحداد و مايقدرون يخلونها لحالها

مدت مها التلفون لجدي وهي تكلمني بفرح

مها = عمر سميناه فارس ..

رفعت راسي لمها

عمر = بس انا ابي اسمه نادر

سكتوا كلهم يطالعوني

مها = نادر !!! يع نادر ... فارس احلى ... نادر قديم .. فارس تحس كشخه

عمر = كشخه والا مو كشخه انا وامي متفقين نسميه نادر ... انا ابي اسمه نادر

طالعوا بعض جدي وجدتي ورجعوا التفتوا لي

جدي = بس اخوانه قد سموه

عمر = وانا بعد اخوه والا مالي حق اسميه

جدتي مستغربة = لا والله لك حق ياوليدي بس كلنا يهالبيت ماهتمينا باسمه ... جا معاذ عندنا وقال ابسميه فارس وقلنا هذا اخوك سمه زي ماتبي

جدي = وانت نتصل عليك ولا ترد علينا وانا انشغلت وتعبان ولا قدرت اجيك .. قلت لمعاذ يروح لك ويشاورك باسمه وقال طيب .. هو جا عندك معاذ ؟

عمر = لا ماجا عندي ولا شفته

جدي = والله ياوليدي انا ماكنت بحاله .. وفاة ولدي خلتني مادري عن شي ( ورفع سماعة التلفون اللي بحظنه ) خلني الحين اتصل عليهم وتشوفه ويصير خير

مها = عمر والله وش نادر .. نبي اسم فارس احلى .. يع ناااادر

رفعت راسي لمها

عمر = لا اسمه نادر ( والتفتت لجدتي اسألها ) اظنهم مايمديهم سووا تبليغ وسجلوا اسمه صح ؟

جدتي = مايسجل لين يطعم

مها بزعل = يع نااادر

طنشتها ولا رديت عليها وقعدت اطالع جدي اللي يكلم بالتلفون

جدي = هلا معاذ ... وشلونك .. بخير كلنا بخير ياربي لك الحمد .. معاذ ابيك تجيب فارس عندنا المغرب ... نبي نشوفه .. زين زين نحتريك المغرب .. ياهلا

وسكر السماعة

ابتسمت اتخيل نادر .. متحمس متى يجي المغرب ... اول مرة يصير لي اخو .. اخيرا ابحس بطعم الاخوة والاسرة .. من يوم طلعت على الدنيا وانا محروم منها ... ابتسمت اكثر وانا اتخيله هالصغير ابيض والا اسمر بيشبهني والا لا

= يع نادر

قطعت علي تخيلاتي هالعمة المزعجة و رفعت راسي لمها بعصبية

عمر بعصبية = من زين اسمك عاد .. والله لو تقولين يع من هنا لبكرة نادر يعني نادر

مها وهي تجلس على الكنبة = بس حنا لنا يومين تعودنا نسميه فارس ... انت توك تنتبه .. وينك اسبوع ؟

عمر = اسبوع كنت تعبان

مها = كلنا زعلانين على اللي صار بس ما انعزلنا عن العــ

قاطعها جدي يسكتها

جدي = مها خلاص .. هذا اخوه وله حق يسميه

مها = المشكلة مايعرف يسمّي .. وش قال قال نادر

نزلت راسي وابتسمت اتخيله ... اباخذه واربيه عندي .. اخيرا بيصير لي اخو يسكن عندي بالبيت .. ماراح اصير لحالي بالبيت .. لا .. ورايد عندنا بعد .. يعني اخيرا صرنا مجموعة مثل الاخوان بالضبط ... اباخذه عندي

قامت مها وطلعت من الصاله .. شوي وجابت القهوة وجلست بجنبي قدام جدي وجدتي وهي الى الحين تتطنز علي وعلى اختياري بالاسم بس مطنش .. اول شي مالي نفس اخذ واعطي معها ثاني شي ماعلي من احد اسمه نادر يعني نادر .. سحبت الصينية من يد عمتي وقعدت اصب لهم

ساعة ونص و سمعناه يذن لصلاة الغرب

التفت لي جدي ..

جدي = عمر لي يومين ما اصلي الا بالبيت ماعندي احد يوصلني .. ابيك ياوليدي تروح معي للمسجد و توصلني

قطبت حواجبي مستغرب

عمر مستغرب = اوصلك ؟؟ كيف يعني اوصلك .. المسجد قريب دايم تــ

وقاطعني جدي

جدي = رجيلاتي ماعادت تشيلني

قامت مها وطلعّت عصا كانت مركوزة بجنب التلفزيون وعطته جدي وساندته يقوم عشان يروح يوضي

توني انتبه للعصا .. رفعت راسي لجدي مستغرب وهو واقف

عمر = العصا هذي لك ؟.. ماكنت تمشي بعصا

مها = يقولك رجيلاته ماعادت تشيله .. قم وصل ابوي للمسجد

عشر دقايق وطلعنا انا وجدي متوجهين للمسجد وانا اساند جدي واساعده على المشي

فعلا كلام مها وخوفها بمحله .. لازم جدي وجدتي مايقعدون لحالهم بالبيت بعد زواج مها ... ( وابتسمت ) فرصة اطلب منهم يجون عندي بالبيت خــ

لحظة .. صح .. نسيت

رايد عندي بالبيت .. صعبه جدتي ورايد يصيرون ببيت واحد .. وصعبه اطلب منه يطلع .. ماله مكان يضفه غير بيتي

التفتت لجدي اللي يمشي وهو منحني شوي .. خلني افتح معه الموضوع الحين

عمر = اقول جدي .. آآآ .. اذا تزوجت مها وش بتسوي انت وجدتي ..

رفع جدي راسه لي يطالعني

جدي = الا ياوليدي فكرت .. قلت ابروح عند عيال عبد العزيز .. معاذ ومصعب الحين مسؤولين عن اخوانهم وامهم .. والمسؤولية كبيرة عليهم اساعدهم باللي اقدر عليه

سكتت ... ماعندي رد .. كنت اتمنى يصيرون عندي خاصة اني اباخذ نادر عندي واكيد ابحتاج جدتي بس رايد مشكلة .. صعبة اخليهم هو وجدتي ببيت واحد

وحل جدي لا بأس به .. اذكر جدي وجدتي كانوا مرتاحين يوم كانوا بعنيزة والحين فعلا مصعب ومعاذ يحتاجون خبرة جدي بهالمسؤولية اللي عليهم وانا الله يعوضني بنادر ورايد يحسسوني باللي اتمناه

طلعنا من المسجد وانا اساند جدي اللي يالله يالله يمشي

ناخذ ساعة عشان نوصل ... دخلنا الحارة وشفت من بعيد سيارة معاذ .. ابتسمت فرحان

اول مرة افرح بجية معاذ .. مب له والله فرحان للي مع معاذ ..

ودي اترك جدي واروح مسرع للبيت واشوف نادر .. بس جدي بطييييييييييييييئ

متحممممممس .. ودي اشيل جدي واركض للبيت

اخيرا دخلنا البيت .. ساندت جدي لين وصلنا الصاله وتركته

ولقيت بالصاله

معاذ ومصعب جالسين على الكنب

وجدتي جالسة على الكنبة الطويلة قبالهم

وكلهم ما بحظنهم شي ... طالعتهم مستغرب وانا اتلفت على الصاله كلها ادور شي ملفوف او أي شي صغير

وينه

قام مصعب يوم شافني واقف عند مدخل الصاله وجا يسلم علي

تنهدت احاول اصير ثقيل شوي وسلمت على مصعب واعزيه في ابوه واخته ويعزيني في امي ..

عمر = عظم الله اجرك

مصعب = اجرنا واجرك جزاك الله خير .. وعظم الله اجرك في الوالدة

عمر = اجرنا واجرك

دخل جدي وجلس بكنبة منفردة

التفتت لمعاذ اللي واقف عند مكانه يحتريني اجي عنده واسلم

دخلت الصاله وتوجهت لمعاذ ومديت يدي اصافحه

عمر = عظم الله اجرك

معاذ = اجرنا واجرك ( وسلمنا على بعض بالوجه وجلس معاذ على الكنبة )

ورجع مصعب وجلس بجنب اخوه وهو يسألني

مصعب = يقولون كنت تعبان ؟

رديت عليه وانا اجلس بجنب جدتي قبالهم

عمر = ايه .. حمى ..والحمد الله راحت

هز مصعب راسه بهدوء

مصعب = انشغلت هالاسبوع

سأل جدي عيال عمي

جدي = وين اخوكم خلوا عمر يسلم عليه

ابتسمت هذا اللي ابي اقوله اول مادخلت .. وين اخوي

ردت جدتي معصبة

جدتي = اخذته مها تقول بتصوره مدري وش بتسوي .. مدري متى بتعقل هالبنت على وجه زواج والى الحين مطفوقه

اووووووه يعني ماتصور الا الحين

صاح جدي باعلى صوته يناديها

جدي = مهاااااااا يامهااااااااااا

سندت ظهري على ورا واطالع مدخل الصاله مافيني صبر .. احتري هالعمة تشرّف

شوي ودخلت مها ومعها شي ابيض ملفوف تشيله بين يديها

ابتسمت فرحان وانا اطالع هالشي الملفوف اللي بين بيدها وقمت واقف وعيني عليه

وغصب عني ضحكت بفرح

عمر = ههههه هذا اخوي ؟ ( ومديت يدي ابي اخذه ) عطيني اياه

وقفت مها قبالي وحطت بيدي هالشي الخفيف الملفوف

مها = لا يطيح منك شيله زين

تصلبت بمكاني وقلبي يضرب بفرح وانا اشوف وجهه الصغير .... اوووووول مرة اشيل رضيع ... ما اعرف ... خفيف مررررررة .. كأني ماني شايل شي

اطالع وجهه بلهفة ...

حسيت بيدين مها على اكتافي وتضغط اكتافي تبيني اجلس

مها = اقعد وحطه بحظنك .. لا يطيح منك

جلست وعيني مافارقت وجه نادر

مغمض عيونه ونايم .. خشمه صغير مرة مدري وشلون يتنفس هذا .. ضحكت وانا اطالع اللهاية بفمه وهي تتحرك ...

ضميت ركبي من بعضها وانحنيت اتركى على ركبي ويديني الثنتين تحت نادر

ابيض ... احس بنعومته ...

طلعت يدي اليمنى بشويش من تحت نادر وطلعت اللهاية من فمه ونزلت بجنبي باهمال ... وابتسمت ابتسامة عريضة وانا اشوفه فاتح فمه يحسب الى الحين اللهاية فيه

فجأة تذكرت امي ... تنهدت بألم.. حسيت بحرارة بعيوني يوم تذكرت امي وامه ... كأني اشوف وجهها فيه الحين

ليتها موجودة تفرح معي باخوي ... يمه تحققت امنيتي وصار عندي اخو بس فقدتك انتي

سالت دموعي على خدي غصب عني ... انحنيت و حبيت خد نادر .. وغصب عني بكيت وانا اشم ريحته ... ماقدرت امنع نفسي

حمدت الله ان شماغي طاح طرفه وانا منحني ... الحمد الله يغطي علي .. احاول اتكم صوتي واخفي دموعي عنهم

آآآآه يانادر امنا رااااحت ... راحت وخلتنا ... حشرت خشمي برقبته مستمتع بريحته

انا انولدت بدون اب وانت ياخوي انولدت بدون ام ولا اب ... حاولت اتكم صوتي اكثر بس غصب عني بكيت بصوت مسموع ... وحشرت خشمي اكثر برقبة نادر احاول اكتم صوتي

بس حشرجت صوتي و شهقاتي تفضحني

حسيت بيد جدتي على ظهري وهي تكلمني بصوت باكي

جدتي = الله يعوضكم ... مات ولدي سعود وجيت انت والحين مات ولدي عبد العزيز وجا اخوك ... فرحتي دايم ناقصه ( وبكت)

سمعت جدي يرد على جدتي بحزن

جدي = احمدي ربك واشكريه .. اللي خلف مامات

الى الحين مغطي وجهي بنادر احاول اهدي نفسي ... فعلا الحمد الله على كل حال