شبكة همس الشوق - عرض مشاركة واحدة

17 - 4 - 2014, 09:45 AM

* رايد *

جالس انا ومريم بصمت بمجلس عمي .. توني طالع من دوامي وقلت ازور مريم واشوف احتياجاتها للزواج

والحين جالسة تبكي بصمت وانا ساكت ومنقهر

زي ماكنت متوقع ... مر شهرين الحين وماشروا لمريم الا طقمين ذهب وكم لبس على عين اهل عمر وباقي مهرها الهفوه ببطونهم

60 الف ومااخذت مريم منه الا طقمين وكم لبس .. حسيت مرارتي انفقعت من القهر .. فيه عاقل يرضى بهالشي ياناااااااااس

التفتت لمريم بصمت وهي تمسح دموعها بعد ما اشتكلي واللي زاد بكاها اني صارخت عليها من القهر

لفيت وجهي عنها منغبن .. هذا اللي كنت خايف منه انهم مايعطون مريم شي من مهرها .. وغريبه منهم انهم شروا لها طقمين

كملت مريم كلامها بقهر وهي تبكي

مريم = عمي مايصرف علي ( ورفعت راسها تطالعني ودموعها على خدها ) ناقصتني اشياء كثيرة استحي اطلبها وعمتي ماتخليني اروح للسوق براحتي كل شي تشتريه هي على ذوقها .. مارحت للسوق الا 3 مرات بس ( ومسحت دموعها بالمنديل اللي معها ) من يوم جيت لبريدة مارحت للسوق الا هالمرات بس .. كل شي اخذه من اغراض بنات عمي مالي شي خاااااااص

رايد بصراخ = طيب ليه ماتتصلين علي .. ماتعرفين رقمي والا مالك لسان تقولين تعاااال .. دايم الاتصالات بيننا مافيها شي اذا اتصلتي اجيك اخذك للسوق وعمي ماعلينا منه خلاص انتي ما انتي على ذمته

مريم = من وييييين ومهري عنده ( وبكت ) ياما تهاوشت معه وكل مرة يضربني .. انا تعبت خلاص .. وعمتي كل شوي رايحة للسوق وكل شي تشتري اللي يخصني على ذوقها

رايد = مب على كيفه ياخذ مهرك .. والله لأشهر فيه قدام الجيران وافضحه

مريم = لا اسكت .. تفشلنا عند العايلة اللي ابروح لهم .. مابيهم يشفقون علي ومابي عمر هذا بعد يشفق علي .. حرام عليك يكفيني اللي فيني وبعدين ماحد مصدقك .. عمتي شرت لي كم طقم والناس بيشوفونه علي ويكذبونك .. الناس مالهم الا الظاهر مالهم الا الظاااااااااهر يارااايد

لفيت وجهي عنها و سكتت .. معها حق الناس مالهم الا الظاهر وهم شروا لها اللي تتجمل فيه قدام زوجها

كملت مريم كلامها منقهره

مريم = حتى فستاني الابيض استئجار .. فساتين بنات عمي لو تشوفه احسن منه مليون مرة

وغطت وجهها بيديها تبكي

التفتت لها وانا مغبون ومنقهر

رايد = طيب بكرة خليني اوديك للسوق وتشترين اللي ينقصك وبراحتك بدون عمتك هذي اللي قاطه وجهها

رفعت مريم راسها لي وقالت بتردد

مرم = بس .. آآآ .. مامعي شي

سكتت وانا اطالعها

بعد ما انتهى عمر من مشكلة المهر صار راتبي لي .. وعمر الى الحين يتسلف احتياجاته الخاصة حتى ثوبه الجديد مفصله سلف مني

والله بلشت فيهم هالاثنين .. زوجتهم وطاحوا على كبدي .. صرت اصرف عليهم

رايد بابتسامة = انا معي لا تشيلين هم .. والا ناسية اني اشتغل

مريم = بس قهر انت تشتري لي ومــ

قاطعتها

رايد = شنسوي بعد .. المهم تتزوجين وتطلعين من هنا ونرتاح

سكتت مريم وهي تمسح دموعها بالمنديل وتفكر وبعدها التفتت لي مرة ثانية بخوف

مريم = طيب اخاف عمي اذا عرف اني طلعت معك يضربني

رايد = هذا قبل كنتي على مسؤوليته الحين انتي على ذمة عمر ..

شفت شبح ابتسامة على وجهها وبين دموعها كأنها تشجعت شوي وقلت افرحها

رايد = تدرين بعد .. عمر كل شوي يطردني من البيت عشان عمته تأثث .... والله لو تشوفين البيت الحين صار يفتح النفس .. قبل يوم انا وعمر فيه لحالنا صاير كأنه حظيرة حيوانات هههههههههه

ابتسمت مريم ونزلت راسها بخجل

قمت واقف وقامت مريم معي وهي ماسكه ظهرها

رايد = خلاص اجل بكرة اباخذ سيارة احد الشباب ونروح انا وانتي ودانة ( وسكت شوي ) صح على طاري دانة .. ترانا اذا انتقلتي لبيت عمر بناخذ دانة معنا لا يمكن نخليها عند عمي لحالها

مريم = طبعا اكيد .. بس الى الحين ماكلمت عمي بهالخصوص

رايد = بعد ناخذ رايه !!!.. انا اخوها مب على كيفه

هزت مريم راسها بايه

مريم = ايه مب على كيفه كل شي الا دانه .. خاصة انها متعلقه فيني .. ماتنام الا عندي

طلعت وانا احسب اليوم اللي احتريه من زماااااااان

باقي اسبوعين بس ونجتمع انا واخواتي ببيت واحد وبدون تسلط عمي وزوجته

ياسلااااااااااااااااااااااااااام

مريت المطعم اشتري غدا كالعادة ودخلت بيت عمر ودخلت الصاله ولقيت الاخ نايم على الكنبة الجديدة ..

الكسلان .. حمل مادتين معه بالجامعة .. والحين معطل وطايح لا شغل ولا مشغله

عرفت منه بعد زواج عمته ان جده ابو فهد وجدته انتقلوا لعنيزة عند مصعب ومعاذ

طلعت من الصاله ورحت للمطبخ احط الكيس واجهز الغدا .. عمر من يوم اثثوا بيته وهو يراقب الشباب بكل صغيرة وكبيرة اذا جوا يسهرون عندنا

لا احد يدخن
لا احد ينثر
لا احد يخرب
لا توسخون
شوي شوي على الاثاث
لا تلمسون شي

والشباب يعلقون عليه وبنفس الوقت زعلانين انهم خلاص مافيه مكان يسهرون فيه مثل بيت عمر والله يعينهم يدورون استراحة

وابتسمت .. فرحتي ماتوصف وانا اشوف عمر خصص غرفتين مأثثهم غرف نوم وقال لي وحنا فوق يوريني احدى الغرف

عمر بابتسامة = هالغرفة لك يارايد ..

بغيت اطير من الفرحة ..

انا لي غرفة نوووووووم

من زمااااااان ماصارت لي غرفة خاصة بسريرها وبدواليبها

سنة كاملة معاناة .. سنة وانا متشرد .. ياما نمت بملحق بحوش عمي .. يمر علي الساعة والساعتين وانا احتري غداي والا عشاي تجيبه مريم بعد ماتفضى من خدمتهم

ياما نمت على كنبة وسخة باستراحة مادري وش مصيري فيها

ياما نمت مع عمال

وياما نمت بالشوارع ليلة بحديقة وليله بمزرعة ميتة وليلة بالطعوس بجنب المباني

وياما عانيت من هالتشرد بين جوع وظلام و خوف وقهر .. والحين بعد سنة يصير لي غرفة بأثاث جديد لحالي وداخل البيت وبكرامة

وقتها ماقدرت امسك دموعي وضميت عمر اشكره وحنا عند باب غرفتي

ما انسى وقفته معي .. ما انسى احسانه علي .. وبعمر راح اجتمع باخواتي

اثث البيت اثاث جديد ومانساني ..

اثث البيت كله الا غرفة امه .. خلاها على حالها يقول ريحتها فيه

واشوفه كل ماتضايق والا حب يجلس لحاله قفل على نفسه بغرفة امه

ولما سألته عن غرفة النوم الثانية لمين ..

قال هذي للبزارين نادر ودانة

فرحت اكثر .. انا قلت له وعطيته علم اني اباخذ دانة ولا يمكن اخليها عند عمي بعد ماتطلع مريم من عندهم

تنهدت يوم تذكرت علاقته بولد عمه

الصراحة عمر ومعاذ علاقتهم الى الحين على حالها ..

ذاك اليوم .. بيوم زواج عمته .. تضارب هو ومنصور على الحركة اللي سويناها فيه برسائل الجوال ويوم عرف اننا كلنا كنا متفقين كفخنا واحد واحد وكسرنا

كانت الفكرة من مصعب بس باءت بالفشل ولا استفدنا شي بس حسيت من عمر انه وده يتقرب من معاذ بس احس كبرياءه يمنعه

ومرة صارحته وحنا نتغدا لحالنا

رايد = انت الحين ليش ماتطيّح الحطب مع ولد عمك .. عاد تصدق معاذ شكله يعطي طيّب احسه مثل اخوه مصعب

تنهد عمر وحط اللقمة بفمه

عمر = ماقلت شي بس لو اتصالح معه الحين بيظن اني تصالحت معه عشان راتبي وسيارتي عشان يرجعهم لي .. ابي اثبت له انه ماهزمني و اني اقدر ادبر نفسي واحرّه

رايد باستهزاء = وش اهزمه واحره ومادري ايش .. بحرب انت واياه

حرك عمر يده بضيق وكمل اكله

طلعت من المطبخ بعد ماجهزت الغدا ورحت للصاله لعمر الكسلان النايم وقومته يتغدا معي

* عمر *

السبت .. بعد صلاة المغرب

اخذت سيارة منصور ورحت لعنيزة ازور جدي وجدتي و عمتي اللي ساكنه مع اهل ياسر وصارت جاره لعيال عمي

والله حاله صاروا اهلي كلهم بعنيزة .. جدي وجدتي وعمتي

صرت انا الوحيد ببريدة ..

كالعادة وحيد بكل شي

واشوف جدي وجدتي مرتاحين هناك بين عيال عمي وامهم وخاصة ان بنتهم بيتها بجنبهم ومرتاحين هناك نفسيا

خلااااااااااااااااااص هانت باقي يومين على زواجي وارتاح انا بعد

ويرجع لي راتبي وسيارتي ونادر وبيصير عندي اسره

ويارب اجيب درزن عيال .. وضحكت مستانس اتخيل اسرتي وانا اسوق

وصلت بيت عيال عمي ووقفت السيارة وضربت الجرس

شوي وطلعلي معاذ

واول ماشفت خشة معاذ قلت بفرح على قرب انتهاء معاناتي

عمر بابتسامة = خلاااااااااص يومين وترجعلي حقي ... هاااااه ارتحت الحين نقدر نقول وحدة بوحدة

سكت معاذ وهو يطالعني وكمل باستهزاء

معاذ = خسارة ارجع لك راتب ابوك .. شهور وانا العب لعب باربع الاف وخمسمية ريال

سكتت .. مدري ليه حسيت بآلم من كلمته

شهوووور يلعب بفلوس ابوي وانا ماخليت احد ماتسلفت منه .. بس كتمتها بصدري

هالحركة انا اللي علمته عليها واخذت فلوسه العب فيها وهو كان محتاج ويمد يده لبوه

معاذ = ادخل عند جداني وش فيك واقف

انتبهت انه فاسح الطريق لي يبيني ادخل

نزلت راسي .. بس الصراحة معاذ عطاني درس ما انساه

علمني اللي ماعلمنياه المدارس والجامعات
وفتح عيني على احاديث وآيات كنت غافل عنها و عن معانيها

( عامل الناس كما تحب ان يعاملوك )
( الابتسامة في وجه اخيك صدقة )
(وَقُل لِّعِبَادِي يَقُولُواْ الَّتِي هِيَ أَحْسَنُ إِنَّ الشَّيْطَانَ يَنزَغُ بَيْنَهُمْ )

ماقلت الكلام الحسن لمعاذ ونزغ الشيطان بيني وبينه
معاملتي مع اخوياي والشباب احسن من معاملتي بمعاذ وهذا هم الشباب عاملوني مثل ماعملتهم صحيح اني كنت نذل معهم شوي بس معاملتي معهم احسن بكثير من معاملتي مع معاذ

معاذ كل ماشفته كلمته بغرور وتكبر وصار هو بنفس الاسلوب يكلمني
معاذ اذيته بماله وبمال اخوه واذاني بنفس الطريقة
وياما تشابكنا بالايدي انا واياه

معاذ = الى متى تبينا نصير واقفين عن الباب .. فاضيلك انا .. يإما ادخل والا رح فارق

رفعت راسي لمعاذ وتنهدت

طالعته شوي ساكت ورفعت يدي وحطيتها على كتفه

عمر بندم = معاذ ادري اني قبل زودتها معك واعترف اني كنت نذل معك ومع غيرك .. انت الوحيد اللي غيرتني ( وابتسمت )

قطب معاذ حواجبه مستغرب مني بصمت ..

وعشان ما اخلي له فرصة يظن اني جاي هالوقت اتسامح منه عشان سيارتي وراتب ابوي

دخلت لحوشهم وتركته عند الباب وراي .. ودخلت المجلس عند جدي

بعد مرور يومين

الاثنين .. بعد صلاة العشاء

كل شوي اجلس واقوم

اجلس وارجع اقوم

اجلس وارجع اقوم

مشكلة المهمين والمشهورين امثالي

كل ماجلست جا واحد يسلم ويبارك

جالس على الكنبة المخصصة للمعرس بقصر الافراح وجدي بجنبي على اليمين وعم رايد بجنبي من الطرف الثاني

وانا كل شوي اعدل البشت واوزع ابتسامات فرحان .. ماني مصدق اني ساعات بس وادخل على زوجتي ( مريوم )

جلست بعد ماسلمت على واحد ما اعرفه وانا ابتسم .. بدينا ادلعها من الحين

رايد طوال اليوم ماشفته الا بعد صلاة العشا .. من العصر و كل واحد مشغول بنفسه

انا مشغول اهتم بنفسي عند الحلاق وعبد الله ومنصور معي و مانسوا نفسهم بعد ماخلصت انا

رفعت راسي وانا اشوف من بعيد عيال عمي سامي وعمار ومصعب ومعاذ وسعود واقفين و يستقبلون

مساكين رحمتهم

وابتسمت اكثر وانا اشوف رايد رايح جاي .. يقاله اخو العروس والفرحة ماليه وجهه

واخيييييييييييرا قام عمي ابو سامي من مكانه وجا عندي يوصلوني للفندق وعم رايد معنا

واشوف الشباب من بعيد يسون لي حركات يستهبلون

يالله يالله يمشووووون عمي وابو بندر .. ودي اركض واشغل سيارة مصعب اللي جهزها لي وامشي للفندق واخليهم

بس لازم نحافظ على الرزانة شوي

وهناك شفت مريم

زوجتي

بغرفة لحالنا

ضاعت علومي وانا اطالعها

اول مرة بحياتي اشوف بنت شابة بكامل زينتها قدامي على الطبيعة غير مها

مالي اخوات ..

دايم دايم مااشوف الا مها بخشتي

بس مها .. مالي احد غيرها من محارمي بنت شابة

كل اللي اشوفهم ويكشفون لي حريم كبار

جدتي وامي وبس

قلبي يضرب باعجاااااااب وانا اشوفها بفستانها الابيض

هذي لي انا ؟

زوجتي

ماني مصدق

التفتت للباب وراي وقفلته

ما ابي احد يزعجنا

الثلاثاء ... يوم الصباحية المميز

جالس بغرفتي بالفندق واطالع مريم وهي تتجهز

جت الساعة 10 وهي ماخلصت

احلى ساعة انتظار مرت بحياتي ..

ساعة وانا انتظرها تخلص واطالعها بابتسامة كل مامرت من عندي

و مامليت وانا انتظر

جدي و عمي ابو سامي ينتظرونا ببيت جدي ببريدة بحارة عم مريم

والكل مجتمع هناك وينتظرونا

طلعت مريم بعد ماخلصت وتجهزت وراحت للشماعة تاخذ عباتها والتفتت لي بخجل وهي منزلها راسها ونطقت بهمس بصعوبة سمعتها

مريم = خلصت

مارديت

شوي ورفعت راسها لي وعادت كلمتها وانا اشوف وجهها يحمر اكثر واكثر وهي تعيد كلمتها وضامه عباتها لصدرها بخجل

مريم بهمس = خلاص خلصت

وتوني انتبه اني مفهي فيها وناسي عمري

عمر = هاااه .. آآآ .. ايه ( وقمت واقف )

وطلعنا من الفندق وانا ملاحظ الانحناء بظهرها

وحنا بالسيارة ( سيارة مصعب )

لا حظت عليها تفرك يديها مرتبكه .. التفتت لها وانا اسوق .. بس متغطية بالكامل وما اشوف الا بياض يديها بحظنها وتفركهم ببعض

طالعت قدام مستغرب .. مدري هذي عادتها والا من زود حياها تفرك يديها والا وش القصه ؟

شوي وسمعت همهمات منها

التفتت لها مستغرب

عمر مستغرب = تكلميني ؟

تفرك يديها بقوة وكأنها خايفة

مريم بهمس = فيه شي مهم ابي اقوله .. آآآ .. اذا سمحت

عمر مستغرب = ايه .. تفضلي

ياشين الذرابة .. اذا سمحت وتفضلي وماادري ايش ... لكن شنسوي هذه الجدّة .. ان شاء الله كم يوم وكل واحد يعطي الثانية بوجهه بدون هالرسميا ت

سمعت همهات مرة ثانية من مريم ورجعت التفت لها

عمر مستغرب = نعم ؟

وطالعت قدام اشوف الطريق ورجعت التفت لها مستغرب

مريم بصوت خفيف = ابي نمر بيت ... آآآ .. بيت عمي ووو وناخذ اختي الصغيرة عمرها 5 سنوات الحين ومافيه احد يعتني فيها الا .. آآآ .. الا انا

يالله اسمع صوتها .. غير اركز معها بقوة ومايل شوي ناحيتهاعشان اسمع وانا اسوق

التفتت لها

عمر = تقصدين دانة ... تبين ناخذ دانة الحين ؟

التفتت لي وهي متغطية وعلى طول رجعت ونزلت راسها

مريم = انا خايفة عليها ووو .. وابي اخذها عند رايد اليوم

عمر = طيب خلي رايد يروح ياخذها .. رايد اخوها صعب اخذها انا من عمها

رفعت راسها والتفتت لي

مريم = بس ابيك تطلبها من عمي لان البيت بيتك وعشان يعرف عمي ان صاحب البيت ماعنده مانع .. ( سكتت شوي وكملت وهي تفرك يديها ) اقصد يعني اذا كان ماعندك مانع

طالعت قدام اشوف الطريق ... كلامها منطقي .. انا قبل قالي رايد انه يبي ياخذ دانة عندنا وانه ماعليه من عمه

رايد كان يتكلم عن موضوع دانة بعدائية وتحدي لعمه
اما مريم جابت موضوع دانة بمنطقية

صح .. لازم نبين لابو بندر اني راضي تسكن دانة مع اخوانها ببيتي .. ماجا ببالي ولا ببال رايد هالنقطه

ابتسمت والتفتت باعجاب لمريم .. اشوى ماطلعت مثل اخوها غبي

عمر = ماطلبتي شي ... من عيوني ( وكملت ذايب ) ياعيوني

وابتسمت اكثر وانا اشوف مريم ترفع يدها لمكان فمها بحياء

والتفتت اطالع قدام وشهقت لما انتبهت اني ملت بالسيارة عن الطريق

وبسرعة عدلت السيارة .. وتنهدت بارتياح