شبكة همس الشوق - عرض مشاركة واحدة

4 - 5 - 2014, 03:03 PM

جالسه بحنق في غرفتها ..
من الصباح نايم وماصحى الا للصلاة صلى ورجع في يده جرايد رياضيه وغدا ..
ولا كأنها عروس يفترض انها عايشه بدلع ودلال ..
طقطقت اصابعها بتوتر ووقفت راحت للمطبخ وهو مارفع راسه عن الجريدة ولاحسسها باهتمام .
شربت لها كاسة موية ورجعت جلست في الصاله ..
قالت بصوت مخنوق : ممكن اتكلم معاك ..؟
فتح فهد صفحة ثانية من الجريدة قال : تكلمي محد مانعتس .
عضت على شفتها السفلى قالت بحرج : طيب ممكن تترك اللي في يدك ..؟
رفع راسه لها وللمرة الثالثه او الرابعه يطالع فيها من اول مادخلت بيته ..
قال : قولي لي كل طلباتس مرة وحده موب كل شوي ممكن وممكن ..!
زفرت بعصبيه ووقفت رايحه للغرفه بنفس بيجامتها حقت البارحه ..
سكر فهد الجريدة ..
على قد مايبيها تتكلم حتى يعرف وش عندها على قد خوفه من اللي بتقوله وتزيده على اللي قالته له ..
شد على شعره والتفت على الجوال اللي دق واخرجه من توتره المسيطر عليه بوجودها حقيقه في حياته وعدم وجودها ايهام وكذبه ..
فتح الخط وهو يشوف اسم عماد على الشاشه وكلمه بصوت عالي ..كانت ضحكاته تملا المكان على تعليقات عماد عليه والحاحه على جيته اليوم حتى جدته تشوف حرمته ..
قفل من عماد وهي واقفه ومتكتفه وعيونها مليانه دموع ..
صد عنها بألم قال : جهزي نبي نروح لبيت نايف جدتي عندهم وتبي تشوفتس ..
قالت : طيب انت زعلان ..؟
رفع راسه لها وشافها مكسورة ورجع فتح الجريده بدون تركيز قال : زعلان ولا موب زعلان مهب شغلتس .. اعجلي خلينا نمشي وراي شغل ضروري .
عقدت حواجبها قالت : شغل ..؟
تأفف فهد ورمى الجريدة من يده بعصبيه ظاهره وتوتر خفي قال : معتس نص ساعه ولاتطولين الحكي اللي مالتس فيه .. ان ماخلصتي مشيت وتركتتس .
انسحبت من قدامه بعصبيه ودخلت الغرفه ..
يدينها مشبكتها بقلق ودموعها بدت تنزل وهي تحاول تكبحها ..
عقلها مشلول عن التفكير رغم ازدحامه بالافكار ورغم مشيتها السريعه في الغرفه ذهاباً وإياباً ..
دق عليها الباب وهو يقول : انا طالع للمسجد برجع احصلتس جاهزة ..
ثواني ووصل لسمعها صوت باب الشقه يتسكر ..
مافيه بد من انها تنفذ امره حتى تحظى برضاه او على الأقل يحس ان افكارها عنه تبدلت ..

***