السلام عليكم ورحمة الله وبركاته
للحزن والذكرى وللوجد والشوق
ياخي بيوت الشعر دايم بديعه
وانا كذا عاشق ومن غير معشوق
مرضي غروري والعوض لا القطيعه
شفني مكيف طايرن بالسماء فوق
واحياناً اخرج عن حدود الطبيعه
تعال اهلهل لك وابتغزل بشوق
ذيك الهنوف اللي من اجلي صريعه
في حبها ماشفت انا شيء به عوق
ظروفنا دايم تجينا وديعه
وعذولنا يابو فهد مات محروق
ودفنه حرام بما تنص الشريعه
اشواقهالي تطلع بهالسما بروق
وترتجف بي القاع رجفه سريعه
لبيه جعلي كلني فدوة الموق
اهد لك كل الحصون المنيعه
ياترف يامعسول ياذرب ياذوق
يامعجزه ياكارثه يافضيعه
ياراقيه ياشيك .. ياوضع مرموق
يامرضيه ياراضيه يامطيعه
ياشامخه ياراسيه .. يا اطهر عروق
يامحشّمه يامنزّهه يارفيعه
بسمتك طهر ونظرتك صوبي شروق
واقفاك لي موت وجروحك شنيعه
وصلك عمر وإجفاك تذبل به عذوق
وحبك فتح له في ضلوعي وديعه
زينك حشى ماشفت مثله بمخلوق
لامطربه لاممثله لامذيعه
يا(شوق) وينك جاوبي صوت مخنوق
الظاهر اصنع حلم كاذب واطيعه
هذا وهو مافيه لي (شوق) محموق
وشلون لاحلمي تحقق جميعه
يابو فهد لاتلومني صرت مطفوق
اخاف اقوم ألطم كما لطم شيعه
لو الهوى يشرى وينباع بالسوق
عهدٍ علي اشريه مرضا ابيعه
عايش على ليل وتأمل وطاروق
دام الحياة بما حوت له وضيعه
هذا انت تشكي لي من الجور والبوق
اتشوف كيف الواقع المر ليعه ؟؟
خلك كما طيرك ولاكن بلا اسبوق
اكفخ وخل اهل العلوم الخليعه
يابو فهد كم لي وانا ارقّع اشقوق
لين الفجيعه ماغدت لي فجيعه
دام السما مبطي بها السمع مصروق
شيئٍ على هالارض كلٍ يذيعه
يابو فهد صدر الرجاجيل صندوق
لاماتشيل الحمل كتف ٍ مليعه
حتى الصديق ان كان صادق وموثوق
ماهو غريب تشوف منه الخديعه
دام المراجل صارت لسان وحلوق
عوّل على ذراعك بضيق الوسيعه
الطيب بحبال الهماليش مشنوق
يابو فهد هالوقت صاير رثيعه
لو تقلب الصوره من اسفل الى فوق
تشوف تالي جيشنا بالطليعه
خله لربك والا انا خلني ل(شوق)
ملعابتي خارج نطاق الطبيعه
الشاعر
سالم السويلمي