شبكة همس الشوق - عرض مشاركة واحدة

11 - 7 - 2014, 11:42 AM

كانت معصبة وقاعدة تصارخ عليه وهو نفس الشيء يعني بمعنى ثاني يتهاوشون . ما صدقت انهم وصلوا الغرفة اخيرا .. حد يسوي سواته وشو هذا ولا كأن عايش برا فترة طويله لا ودارس برا بعد .. اف منه .. اف !
دانه " وهي تصارخ " : اقول انت وشو فشلتني جدام الريال !
جاسم : لا يا شيخة خايفة على مشاعرة .. انتي وشو ما تستحين .. على الاقل احترمي ريلج الي واقف وياج !
دانه: وانا وش سويت .. واحد جه سلم علي ورديت السلام ! عادي مجرد زميل !
جاسم : زميل يجي يسلم ويقول ليش ما تدقين علي ! انتي صار لج 4 شهور تاركه الوظيفة .. ليش اتدقين عليه قبل ! اساسا ليش كنت تدقين عليه !
دانه: اقول لا تذبحني ! انت كنت تشتغل معانا وتعرفة
جاسم : ولاني اعرفه ما ابي مرتي تقعد وياه .. وحتى لو ما كنتي مرتي انتي بنت عمي ! يعني حتى لو شفتج قبل اتكلمينه كنت باكسر راسج !
دانه: اقول انا محد يقدر يكسر راسي ! مو انا الي حد يهاوشني .. دام ابوي عمرة ما هاوشني !
جاسم: عشان جي هاي تصرفاتج . عشان جي انتي دلوعه .. عشان جس انا مو قادر اتحملج !
" ما يدري اشلون قال الكلمه الاخيرة اهمه لحد الحين في شهر العسل .. تروح تقول للبنت انا ما اتحملج .. ! ما وعى الا وهو شوفها طالعه برا الغرفة ودموعها على خدها .. اشوي ولا جواها يرن .. طلع حب يشوف من المتصل :
دانه " وصوتها متغير " : هلا سهر ..
سهر: بسم الله ليش صوتج جي !
دانه: انا خلاص تعبت .. مو قادره اتحمله !
سهر: دانو بسم الله عليج شفيج .. انتي توج معرسه! شالسالفه .. انا دقيت ابي افضفض
(( ما وعت الا والجوال ينسحب من يدها بهدوء .. التفتت لقت جاسم وراها وماسك الجوال .. رد بهدوء على سهر .. ما قال غير باي .. ولا اشوي وتلاقي جوالها ينفلع من الدريشة .. لفت عليه باستغراب ولا تشوفة مبتسم بهدوء .. واشوي الا وهو يسحب جواله ويفلعه من الدريشة هو بعد .. ))