شبكة همس الشوق - عرض مشاركة واحدة

16 - 10 - 2014, 11:04 PM

ابو محمد وهو يقاطعه بعصبيه:"اذا تهمك مصلحتها لا تتدخل في حياتها طول ماانا حي..."
محمد:"يابوي عبير بنت ضعيفه وممكن تتأثر من الكلام الحلو اللي اكيد تسمعه لما تروح الاسواق لوحدها...انا مستعد اوديها وين مابغت بس تترك الروحه مع السواق على كيفها"
ابو محمد"محمد ماعليك من اختك..."
محمد وهو قايم بيطلع:"ترى ذنب عبير في رقبتكم لو ضاعت لانكم انتو اللي ضيعتوها بطاعتكم العمياء لها..."

^^^^^^^^^^

في غرفتها وهي سرحانه وتفكر صعب احساس البنت لما تنخطب وتفكر في حياتها مع اهلها وانها ممكن تترك كل شئ وتروح مع شخص غريب...وتصير لما تجي بيت اهلها كانها ضيفه....
"امل للحين مالبستي..."
انتبهت على امها اللي ماحست فيها لما دخلت...
امل:"ها...شوي واكون جاهزه..."
جلست بجنب بنتها اللي كان مبين عليها الشرود وكثر التفكير هاليومين...
بدريه:"امل....اذا ماتبغين ولد عمك تأكدي مااحد بيغصبك.."
امل:"ادري يمه بس احس صعب اني اترك بيتي واهلي"
ضمتها امها لصدرها بحنان كانت علاقتهم مو ام بنتها كان بينهم علاقه صداقه قويه..
بدريه:"مصير كل بنت....وبعدين حتى لو صار نصيب الزواج بعد سنتين يعني لا تشيلين هم الفراق من اللحين"
امل وهي تتنهد:"كل البنات يحسون باللي احسه اللحين"
بدريه:"كان سألتي بسمه..."
امل:"سألتها قالت انا اختلف عن البنات في كل شي..."
بدريه:"يمكن قصدها ان اهلها ما ينحزن عليهم.."
امل:"لا...تقول كل شي مختلف حتى اول ليله غير...سالتها اشلون غير ...قالت غير وبس..."
بدريه:"عاد انتي يالقفك يمكن تحرجينها لما تسألينها..."
امل:"لا ماحسيتها منحرجه قد ماهي حزينه..."
بدريه وهي قايمه بتطلع:"اقول قومي تجهزي اللحين بنروح لاهلي"
امل:"من اول احب اروح عندهم من بعد ماجات بسمه صرت انبسط اكثر..."