شبكة همس الشوق - عرض مشاركة واحدة

23 - 10 - 2014, 06:01 AM

اليوم الثاني ..
ببيت أبو طلال..
ابتسمت ام طلال وهي تبوس بنتها: شرح صدري هالخبر الله يشرح صدرك لطاعته وحبه والقرب منه..
أبو طلال: مبببروك يانجد الله يوفقك يابوي.. اليوم راح ابشر الدكتور ماجد.. ومنها تسوين التحاليل والدكتور كذلك..
نجد كانت ساكته وتسمع لكلام امها وأبوها..ومستانسه لاجل فرحتهم لها وساكته ..
.
.
.
ببيت الجده..
كان زياد يفطر مع جدته ..: جدتي انصحيها لاجل تنام من البارح مانامت وناسية انها حامل ..
جدته: مرتك ماتسمع لكلام نفسها .. كيف تبغاها تسمع كلامنا..
دخلت العنود وجلست ..
جدتها: مابعد نمتي يالعنود ..
العنود: الحين راح ننام .. زياد ادخل للمجلس لاجل راح نطلع ننام أنا وشجن بغرفة عمي عناد القديمة..
قام زياد وسحبها معها: جدتي نادي البنت لاجل تدخل وبأخذها معي شوي,,
دخل المجلس ورافض يفك يدها : شايفه الارهاق شلون لاعب فيك ؟ ليه ماتنامين لازم تريحين نفسك..
العنود بنظره: طيب فك يدي ..
فكها ويترجاها: تكفين نامي ..
العنود : قبل شوي وشو قلت ؟ هماني قلت بطلع انام ..
زياد حط يدينها على الجدار وهو مندق : شرأيك نروح للمستشفى ولاراح نطول بس اتطمن عليك..
العنود تناظر أظرافها وناظرته: لا ..
زياد أخذ نفس وتعوذ من ابليس: طيب ليه لابسه هالشد الضيق مع الحمل..
العنود تناظر نفسها: لابسه طيب بلوزه طويلة ..
زياد: اشوفها .. بس الشد ضيق عليك وراح يضيق على البيبي .. (تذكر وابتسم وبحماس) عرفتي جنس المولود؟
ضحكت :عرفت ..
زياد طار مخه من ضحكته : وشو؟
العنود : منيب قايله خلك الين تعرف مع الناس..
كشر وبعد يدينه على الجدار: طيب قولي هماني أبوه ..
العنود : الا محد ينكر يامنسم .. بس تحلم اقولك .. والحين خلني اروح لـ شجن..
باسها وبعدته بسرعة وبعصبيه: زياد لاتفكر تسوي هالحركة..
زياد ناظرها بقوة: لاتنسين أنك زوجتي زوجتي يالعنود ..
العنود دفته : ولاتنسى سوياك مع نورة بأسطبل الخيل ..!
طلعت ولاعطته فرصة للكلام وهي يتذكر أي سواه ذي ؟!
.
.
.
بريطاينا..
شقه فارس*ساره..
كانت تلبس للجامعة وهو يناظرها عقب ماخلص لبس قرب لها:سارآ..
ناظرته ونزلت عينها وهي تكمل لم كتب محاضراتها .. باسها وهو يهمس لها..
ساره دمعت : لاتقول أنك تحبني وأنت تكذب..
مسح دموعها وهو ماسك وجهها بخفه وبهدوء قال: مااحبك حرام عليك..
ساره تناظره ..
فارس وأنفه على حد أنفها: قولي الا وش كثر تحبني يافارس؟ أحبك كثر فقدي لـ فهاد وكثر حنيني للرياض ولتراب المملكة وكثر الم كل متغرب عن ديرته وشوقه لها وكثر ألمي لما كنت تزعلين وتنامين ودمعك بخدك واخاف امسحه وتصديني..
سكتت لفتره ووجهها غطاه اللون الاحمر : طيب خل نروح للجامعة..
فارس ابتسم وبعد شوي عنها: ودي اطلب منك طلب بس اخاف تحليين هالكتب فيني بصكه محترمة..
ضحكت بروقان له عقب كلامه واعترافه لها : وشو؟
فارس يأشر بنص اصبعه : بوسه صغنونه.. لو عطيتني راح تكونين كسبتي أجري لان ماعمر احد باسني ..
ضحكت ومشت لبرآ الغرفة ..
فارس وقف قبالها : وحده بس..
سارآ تروح من الجهه الثانية وفارس ماتركها الين باسته .. نقز وسوى حركه بيدنه بوناسه وهستره وساره تناظرها وتضحك وهو يقول :
yyyyyyyyyyyyyyyeeees
.
.
.
بعد اسبوع ..
ببيت أبوعبدالله ..
متعب كان يناظر ابوه وهو يهاوش ويصارخ :خلاص أنا متزوج ..
أبوه : انقلع عن بيتي .. تكسر كلمتي يامتعب ..!
متعب بهدوء: يبه محشوم لاكن منيب متزوج بنت عمتي ..
العنود مسكت يد أبوها: يبه تكفى خلاص خل متعب يقرر حياته بكفيه..
أبوها بحده: العنود اخوتس أنا برئ منه انقلع عن بيتي..
متعب : طيب بطلع .. وعلى فكرة عرسي بكرة بـ سدير وبعده بسوي عرسي بالرياض وحجزت القاعه وكان ودك يبه تشرفنا فتأكد أني فرحتي فرحتين ..
طلع من بيت ابوه ولحقته العنود مسكت بثوبه: متعبب ..
متعب لف عليها: ها يالعنود خلاص أبوي تعبنا معه ..
العنود ابتسمت: طيب ليه مكشر .. اصلن ويكون بعلمك شريت فستان لعرسك وراح احضره ..
ابتسم بضيق : وحملك ..
ابتسمت : اضيع عرس متعب .. أكثثثر شي حماااااس وصراحه ودي اشوف هالحلوه اللي تحديت الكل لاجلها..
متعب ابتسم: وتستاهل مهاوي التحدي لاجلها.. طيب بس أنتي راح تحضرين..
العنود : عرس متعب وأنا احضر وحدي.. لا يابعدي الكل راح يحضر وأبوي بيحضر وهو يبارك لك..
متعب: وعمتي حصة ؟!
العنود تطلع جوالها : تدري علاقتي معها خربانه خربانه ..خل ادق واعلمها..
متعب : لا عنود ..
العنود ابتسمت :دقيت ..
شوي وردت عمتها..
العنود تمشي مع أخوها متعب: هلا عمتي..
عمتها: العنود كيفك ؟
العنود : بخير ياعمه .. اخبارك؟
عمتها: بخير واحنا وصلنا الرياض والحين ببيت جدتس..
العنود: اها الحمدلله على السلامة.. اجل بكرة راح تجون عرس متعب ..
عمتها ضحكت: متعب بعدها عروسة كأنه مستعجل خليه يعجل..
العنود بهدوء : عمتي متعب تزوج ومملك من قبل ........
قاطعتها عمتها وهي تصرخ بعدت العنود السماعه وهي تمسك ثوب أخوها وتقوله: الحمدلله مااخذت بنتها ..
ضحك متعب بقوة ..
العنود : عمه .. عمه .. (صرخت بخفه) خلاص اسمعيني .. متعب من قبل خاطب ومملك من زمان بس السالفة سر بيننا وابوي كان مصر على خطبته لالهام لاجل كذا لاتزعلين والله يعوض الهام باللي احسن من اخوي ولو ان مافيه احسن منه ..
ضحك متعب ويناظرها..
العنود تناظر جوالها : آفف سكرت بوجهي ماتستحي هالعمه ..
متعب باس راسها : الله يجعل بطن جابتس للجنة ..
ابتسمت :امييين ..الحين روح اجهز ياعريس وأنا بطلع بعد شوي للمشغل لاجل احجز كوفيرة .. وعلى فكرة على أغراض مها والتجهيز حقها جاهز بس متى راح توديها..؟
متعب: الحين بمر ريان يعطيها لان بيروح لسدير ..
العنود: حلو.. بالنسبة للقاعه هنا حجزها بدر وكروت الدعوة توزعت بنص الاسبوع اللي طاف لكل معارفنا ووحسبي الله على اللي دق على وقال لابوي عن الكروت
متعب: ناس همج .. الله لايحرمني منكم ماقصرتم..
العنود : مافيه اغلى منك بيعرس بس خسارة ماقدر ارقص بكرآ..
ضحك متعب ..
.
.
.
ببيت أبو بندر..
زياد كان يناظر عمه : قصدك أني ارجعها ..عمي بنتك مالها عيشه معي والغلا اللي لنورة كان من اثر السحر ..
عمه: يازياد ماترضاها الناس تدري أن نورة تروح للسحره..
زياد بحده: دامها نجست نفسها بالروحه خلها تستاهل اللي يصير.. باعت دينها .. هي ماتدري عن حكم الروحه للسحره ..!
قوله صلى الله عليه وسلم (( مَنْ أَتَى عَرَّافًا فَسَأَلَهُ عَنْ شَىْءٍ لَمْ تُقْبَلْ لَهُ صَلاَةٌ أَرْبَعِينَ لَيْلَةً )) ، وقال صلى الله عليه وسلَّم (( مَنْ أَتَى كَاهِنًا فَصَدَّقَهُ بِمَا يَقُولُ فَقَدْ كَفَرَ بِمَا أُنْزِلَ عَلَى مُحَمَّدٍ صلى الله عليه وسلم )) ، وقد صح عن ابن مسعود أيضا
دخلت نورة لان أبوها امر انها تجي ..
زياد ناظرها باحتقار ..ووقف: عن اذنك ياعم ..
أبو بندر : اجلس معها وتفاهموا..
طلع أبو بندر وصك الباب ونورة تدمع عيونها وتناظره: زياد اهم شي انك زوجي يعني اجتمعنا ..
زياد يناظرها وهي صارت قريبه منه : زوجك بس غصب عني .. بالسحر يالساحرة .. اعوذ بالله منك ومن شرك وكلك ..
نورة بكت : لاني احبك ..
زياد : أنتي بعتي أغلى شي بحياتنا اللي هو الدين بعتي دينك واللي باعت دينها اتوقع منها أي شي ..!
نورة ضربته على صدره: كله لاجلك ..!
لاول مره بحياته يضرب مره صفقها كم كف أكثر مره مره الين حمر باطن كفه:تفو عليك وعلى هالتربية اللي ودتك للسحره والكهنه .. دامني ماجيتك بطيب نفسي فتأكدي أني ماابغاك .. وأن معي اللي تسواك .. مو محرق(ن) قلبي اني كنت ازعل العنود لاجلك وهي اللي هزت عقولن كثيره بزينها وعقلها ..

طعت عقلك يوم قيل إن العقل للبنت زينه
لكن الشرهه علي اللي كنت أحسب إنك تكانه
من بعد ما كنتي أنتي في حشاي أغلى سجينه
بوعدك بطلق سراحك و أتهميني بالأدانه
وين رايح ؟ لأي دربٍ ما يرجع للمدينه
ليه رايح؟ لان قلبك ما ترك قلبي و شانه
كيف أبنسى ؟ ربي اللي ملهم القلب السكينه
مثل ماعانه بقربك لا نوى فرقاك عانه
كان قاسي يجرح أطراف السكاكين السنينه
ما يطيح و بنتٍ مثلك حبها هزت كيانه
و الا أنا خابر خفوقي ما يمد الا الثمينه
و إن بغى يغيض الثريا قعد القمرى وزانه
مزعلٍ لجلك هنوفٍ رجت عقول رزينه
و إن تهادت بالطريق الجرهدي تزهر جنانه
جادلٍ كن الجمال قبالها كتف يدينه
و القمر لو شاورت له ينزح و تقعد مكانه
كانت أول من تحكم في فروع الياسمينه
وأن تعدتهن تثنن خيزرانه خيزرانه
بعتها لجلك و صارت لأصغر أطرافك رهينه
و ألا هي لفتة هدبها تغمرك ثقل و رزانه
و الخفوق اللي تغذى من معزة والدينه
مشكلته إنه تعلق في زمن ماهو زمانه
كل مازادت جراحه و أكتشف غلطة ضنينه

طلع من مجلس عمه .. وتركها وراها وهي كارهه نفسها كثر مااذنبت بهالدنيا ..دخل أبوها على بكاها وضربها لكل شي بالمجلس .. قومها :نورة وراك يابوك ..
دفت ابوها وطلعت لغرفتها وهي تبكي وموب طبيعيه ..
.
.
.
ببيت أبوعبدالله ..
أبو عبدالله يناظر بدر وعبدالله اللي جاو من بيوتهم لاجل يتكلمون معه عن سالفة زواج متعب..
أبوهم : لاتكلموني عنه ..
عبدالله : يبه طلبتك احضر عرس متعب .. متعب شال ثقال الحمول على صغر سنه موب حق له اننا نبارك له بعرسه..
أبوه : عبدالله منب موافق..
العنود فيها ابتسامه: يبه ترى عمتي حصة درت عن عرس متعب..
أبوه انفجع: وشو؟
العنود : درت وقلت لها انا .. يعني يبه كل واحد من أعمامي يدور على سعاده عياله ليه ماتسوي مثلهم .. يبه خل متعب براحته خلاص يبه ..
أبوها هزته كلمت العنود (كل واحد من أعمامي يدور على سعاده عياله ليه ماتسوي مثلهم) ..!
.
.
.
اليوم الثاني ..
العصر..
العنود تأخذ بشت أبوها وتبخره : ياجعل عيني ماتبكي أبوعبدالله ..
ضحك على بنته ..وقال يمزح: تهقين اغطي على اخوتس متعب..
ضحكت وباست أبوها بحب : وه فديت قلبك تغطي على كل أخواني .. الله لايحرمنا منك ..
ضحكت ام عبدالله وفواز على كلام العنود وابوها ..
دخل زياد لبيت عمه وفهى فيها ..
العنود ناظرته وسكتت ..
عمته: حيالله زياد ..
زياد ابتسم : الله يحيك عمتي.. مشينا لاجل نروح الحين لاننا بنوصل على المغرب لـ سدير..
العنود سكتت ومشت الوضع لاجل ماتخرب فرحه امها وابوها..
فواز بهمس لها: اخسسس ماقلتي شي..
العنود بنفس همسه : لاجل مااخربها..
ضحك .. وطلعوا ..
.
.
.
وصلوا لـ سدير على حزه المغرب..
العنود : يمه العرس ترى ببيت جد البنت..
امها: وذا بيتهم؟
العنود : الظاهر ..
دخلت العنود وامها .. وكان موجود من اهلهم بس وجن ووعد .. سلمت على اهل العروس وجلست جنبهم: وين شهد ونجد؟
وجن: ماراح يجون لان شهد تخاف عليهم من الطريق ونجد نازله تجهز هي وريما وشهد الليلة نزلت معهم ..
العنود : اها ..
وعد: العروس موب من قبيلتنا ..
العنود : عادي ..
وعد: وعمي لو درى..
العنود ابتسمت وهي تسولف بينهم بصوت واطي : قلت له واستانس على انها من هالقبيله وقال انها فخر ..
وجن: الله يهدي ابوي ياحبه للشغلات ذي..
العنود: عاد ابوعبدالله ..
أخذت القهوة: يسلمو ..
ابتسمت لها البنت..
العنود تشرب قهوة: شكل العزيمة عائلية..
وعد: آييه يقولي بدر هنا عائلية بس بكرآ بأذن الله راح تكون للكل من قرايب وبعاد ..
العنود : أيييه اكييد..
جات ام عبدالله وجلست جنب بناتها ومره ولدها..
العنود: يمه وين رحتي؟
امها مبتسمه: رحت مع جدة مرت اخوك لاجل اشوفها .. الله لايضرها مزيونة آثر اخوك ماتحدانا وكسر كلمة أبوك الا وهي مزيونة..
.
.
.
الرياض..
السوق..
كانوا يتعشون بأحدى المطاعم الموجوده بالمجمع
ريما:أنا لما جهزت سويت كذا..
نجد بألم: حتى بزواجي الاول جهزت كذا..
شهد ناظرت نجد وهي تتكلم وتذكرت انها قسمت اغراضها لقسمين وعطتها بنتين يعرفونهم كانوا محتاجات وهم محتارات كيف يجهزون للعرس ..
ريما : يالبببى عناد يدق..
ردت عليه وجلست تسولف معه وتالي عطته شهد ونجد ..
سكرت نجد من عمها: راح يجي اليوم على الفجر..
ريما بتملل: مليت من وظيفته احسسها مأخذته مني.. بس الله يخليه لي لما يجي يحاول يعوضني قدر مايقدر..
شهد ابتسمت وهي تدعي لعمها بطولة العمر بداخلها بحب له وهو اللي وقف معها بكل لحظه تخصها ووقف قبال الكل معها ..
نجد :بنات من طلعت تنائج التحاليل وقالي ابوي ان الملكه والعرس بعد عرس متعب بيوم لاجل مافيه قاعات راقيه موب محجوزه الحين وبنفس قاعه متعب ولان بعد ابوي عنده مؤتمر وأنا احس برهبه من التجربه مع ان ماجد احسه طيب ..
شهد : نجود لاتخافين .. خلي عندك ثقه بنفسك لتجاوز الازمه .. وحتى ماجد مشالله الكل يشهد له بالخير..
نجد : آييه ادري حتى أنا كنت اشوف تعامله بالمستشفى مع الكل تخيلي حتى عمال النظافة يعاملهم كأنهم من أكبر الاطباء عندنا بكل اخلاق وتواضع بس حتى خايفه .. وعنده بنت اخاف اخطي بحقها من غير قصد..
شهد عورها قلبها وشدت على كف بنت عمها الحنونه: تكفين نجد هالبنت انتبهي لها وخليك احن عليها من أبوها .. ولاتهاوشينها ولاتحاولين تأخذين ماجد منها .. عطيها كل اللي تقدرين عليه تراها فاقدة امها والفقد جربته ياهو يهد الحيل ..
نجد ابتسمت: أنا كنت احتقر اللي يعاملون عيال أزواجهم بقسوة.. وحتى أنا ميته على وتين مشالله يابنات تجنن حبيتها كثير ودايم تكون معي ومع البنات بالمستشفى لانها تجي مع أبوها .. ياعمري ياشهد ذكرى وتين رجعت لك الماضي..
شهد ناظرت عيالها النايمين بالعربه : حيييل .. الله يبيح(يسامح)كل من تسبب لي بجرح واذى بصغري ..
.
.
.
سدير ..
طلعت العروس وكانت زفه حيل عاديه واعتبرت ملكه ..
العنود : مشالله تجنن ..
وجن تناظرها: آيييه الله لايضرها ..ياعمري ليت امها معها..
العنود : امها متزوجة ومسافرة مع زوجها برى المملكة..
سكتوا لانهم مايدرون عن أبوها ..
وعد: راح يأخذها متعب الليلة..
العنود ضحكت: لا امي تقول الليلة تجي معنا مها لاجل جدها خلاص سوى العرس من عنده وصعب تجلس عندهم خبرك بكلام الناس ..
بعد وقت ..
كلم متعب العنود وقالها خل يطلعون لان وراهم خط ..
.
.
.
سياره متعب ..
كان يسوق ويناظر لـ مها كل شوي .. ويبي يتكلم معها : الجو حار؟
ماردت عليه..
متعب : طيب تبين اعلي التكييف ..
ماردت عليه ..
سكت واحترم رغبتها بعدم الكلام .. ماتحمل وناظرها : مها ترى سجلتس بالقدرات لاجل تختبرين .. والاختبار بعد بكرة يعني بعد عرسنا بيوم (قالها وهو مبتسم)
مها كانت تسمع له وموب مصدقة..
متعب تحطم يعني حتى هالخبر ماعلقت عليه مادرى ان الدراسة بالنسبة لها كانت حلم والحين هو يحققه لها بتقديمه لاختبار القدرات ..
.
.
.
ببيت ماجد ..
يناظر بنته اللي صارت تحب ترسم وماتتكلم معه مثل قبل .. :وتين..
ناظرت ابوها وكملت رسم ..
ماجد يجلس جنب بنته على الارض وكانت منبطحه على بطنها وترسم:وشو ذا بابا؟
وتين : أنا ..
أبوها : ليه راسمه نفسك وحدك.. ؟
وتين ترسم بيد وحاطه يدها الثانية تحت خدها : لاني دايم اكون كذا..
ماجد تضايق:آفا وين راح البابا؟
وتين ماتكلمت وكملت رسم ..
سكت ماجد وهو يناظر رسمها والهم اللي شكله بدء بحياه بنته من الحين..
.
.
.