أشوف في عينك لحزنك تفاسير
عينك تعلمني خفيات الأسرار
من نظرتك حللت بعض التعابير
قريت فيها ماحصل لك وماصار
فكرك مشتت وأشغلتك التفاكير
شكلك يقول انك عليك الزمن جار
عطني همومك كلها دون تأخير
وأشيلها عنك ولو حمولك كبار
لاتعتذر مابه للأعذار تبرير
ماني بقايل لوتعذرت الأعذار
ماتدري أن لك محبة وتقدير
وأني على نفسك من همومك أغار
تطوي علي بلذة النوم ويطير
شفتك وعن عيني لذيذ الكرى طار
وعبرت عن ماكنه القلب تعبير
قصيدة عن حبنا وموجز وأخبار
واللي حصل عله عن الذنب تكفير
تخفيف لذنوبك وتسلم من النار
أرقد وخل الهم تصبح على خير
واتركني أخذ لي مع الهم مشوار