يا خيالي صف جنحانك بجو صفا
فوق روض من صفاته ومن ماريته
عن عيون مقرنسين الهواجس في خفا
شردن لا مرت بقلب ميت احيته
اعطني ما يجذب الود ويذيب الجفا
اعطني ما عطاه يوسف لأبوه ابجيته
المقام أكبر من النحت في صم الصفا
والمكان تقول حاتم وديوانيته
عند بن مرسان الافراح نور ما طفا
كن هلال العيد ذا الليل تثبت رؤيته
شيخ يعز المراجل ما يعطيها قفا
حبها ومشربٍ حبها ذريته
كابر من روس اكابر رصيده من وفا
يبطي العساف ما أودعه في ماليته
ابلج فعله ما يقرن مع كلمة افا
في رحابه ما اعظم الطيب وانسانيته
يا سلام الله لملفى الضيوف ومن لفا
عد نوٍ غصت الأرض من وسميته
السلام اللي على الكون لو وزع كفا
كل مخلوق من الخلق يصلح نيته
والهواجر صيتهم نابهٍ ما قد غفا
الكرم والجود بيدينهم ملكيته
مستحيل انك تجد هاجري ذل او هفا
مستحيل ان بينهم حي ناره ميته
اذكروا من ذكره لكل معلول شفا
لا إله إلا الله أشهد بوحدانيته
والختام ازكى صلاته لروح المصطفى
وآله وصحبه ومن سار حسب وصيته