شبكة همس الشوق - عرض مشاركة واحدة - ليه عمري مالقى لبرده دفى الا دفاكي للكاتبه ذكرى نجديه

31 - 12 - 2014, 01:56 PM

ظهر ثاني يوم قامت وتسبحت وصلت وامسكت جوالها واتصلت على نوره

..شاخباركم شاخبار نوف

..الحمدلله تمام

..اسمعي حنا بنسافر بكره وبعد االمغرب بجي اسلم عليكم

..لا لاتجين هنا كلنا بنروح لبيت عمي ابو نايف

..غريبه ليش

..عمي قال لنا وقال لنا نبلغك

..وليش ان شالله ماقلتي لي

..انتي ليش غبيه احد يدق الظهر ترى حنا للحين الظهر

..طيب طيب ماقلتي لي ليش بتروحون هناك

..بقولك بس لاتقولين لنواف عمي اليوم رايح يخطب مها لفهد

فرحت من قلبها فهد بمكانة اخوها ومها لها معزه عندها ..صدق والله وناسه اجل انا بستعد القاكم هناك
سكرت تلفونها ولقت نواف وراها انحرجت منه ..وش الي الخبر الي مخليك تستانسين

..هاه لا بس لان اهلي بيجون لبيتكم ونجتمع هناك

..حلو حتى يصير مشوار واحد

..انا بروح استعد

..وين وين تو الوقت بدري على الروحه >>ومسك يدها

..نواف اتركني بنتاخر

..ماراح نتاخر مافي طلعه قبل المغرب ..........

.................................................. ..............

اجتمعت العائله سوالف ووناسه ولمه حلوه كلهم بانتظار المعاريس

مها ..وش فيهم تاخروا

نوف ..طيب اتصلي عليهم

..والله انك على نياتك نواف من اتصلت عليه قفل الجوال ويوم اتصلت على جوال ساره رد على وزفني يقول لي انتي صايره مثل اللقمه في البلعوم

..ههههههههههههه خلاص الحين يجون

دخلت عليهم ساره وعلى وجهها شي من الخجل

رقعت مها زغاريد عاليه ...ككككككككككلوش >>وشغلت التصفير هي واختها نجود

سدت نوره اذاناها ..حسبي الله على ابليسك فجرتي اذوني

نوف ..الظاهر ازعجتي البيبي

بعد البوسات والتعليقات ..غريبه ساره اليوم مخليه اللقافه

تكلمت بصوت واطي وهي تخفي ابتسامتها .. عروس

..ههههههههههههه ضحكو كل البنات عليها وكملوا وناستهم

عند الرجال

نواف ..ماجا فهد

..الحين بيجي ليه

..له دين عندي

..دين وش دينه

..خله يجي وانا اقولك

دخل عليهم فهد كاشخ وراز عمره بينما الشياب كانو يتكلمون بصوت واطي

..هلا بالمعرس الف مبروك

وهويمسكه من ياقته >>الله لايبارك فيك

..افا ليش

..اجل انت تضحك علي البارح وتقط على كلام وتحرجني قدام الرجال

نايف ..ههههههههههه قلت لك ماراح تعدي على خير

..امزح ياخي امزح

وهو يدزه بشويش .. لاتمزح مره ثاني

..يعني ناوي تزوج مره ثانيه

..عن خفة الدم واترك حركات البزران وقم قهوني

..لاوالله انا الضيف واقهويك ناد بدر خله يقهويني

..

&&&

..اقول نوف انتي مارجعتي لزوجك

انقهرت من اسلوبها واستفزازها لها ..لا ليش

..ابد بس كنك طولتي كنه ماصدق على الله

توترت من اسلوبها ماتحب ترد لكن لطيفه تعتد حدودها ..والله على راحته واعتقد هذا شي مايخصك

..تصدقين عاد اتوقع انه يرجع لحبيبته وينساك

تدخلت مها ..لطيـــــــــفه

ببرودوهي تمط شفايفها ..ماقلت الاالصراحه والصراحه تزعل

..انا مارد على وحده مثلك ارفع نفسي عنها

نوره ..نوف قومي نروح لغرفة ساره يالله ياساره

..احسن بعد

سحبتها نوره وساره الي حست انه من غير الايق تتكلم احتراما لزوجها وخواته قامن للغرفه وتركن لها المكان

مها ..لطيفه عيب الي سويتيه

..انا بس حبيت اعلمها على حقيقتها

..وانتي وش عليك منها ترجع ماترجع شي مايخصك

..انتي الي مالك دخل ولاتعلميني كيف اتكلم يالطيفه

..لطيفه ترى محترمتك لانك اختي الكبيره ولاتخليني ادخل نواف بالموضوع وانتي عارفه نواف

..وانتي مصدقه تخوفيني بنواف اقول روحي بس عن وجهي >>>ومشت من عندها

صفقت مها بيديها ..هذي مريضه اكيد

كانت سهره حلوه لكن خربتها لطيفه بحقدها

اليوم الثاني سافرت ساره ونواف سفره قصيره

كلم ابو سلمان ابو نايف بموضوع الخطبه على ان يتشاورون ويردون له خبر بعد مايرجعون لجده

.................................................. ......

يوم سفر عيلةابو نايف

..نايف تعال بغيتك شوي

طلع نايف مع ابوه وهم مستغربين من السر الي ممكن يكون بينهم

..خير يبه وش عندك

..اسمع ياوليدي عمك ابو سلمان خطب مها لفهد وانا ما عطيته رد لين اشاورك اذا كان الولد زين شاورت البنت

..انت شتقول يبه فهد ماشالله عليه ماعليه كلام

..اجل باذن الله انا بشاور البنت واردعليهم

..على خير

..الحين يالله وصلنا للمطار

.............................................

..نوره

التفت له بهدؤ يشبه طبعها ..هلا

تردد قبل يبدا بالموضوع ..انا استاجرت بيت بالشررقيه وان شالله هالكم يوم بننتقل

تغير لون وجهها من الي سمعت ..استاجرت متى وليش ماقلت لنا

حب يحسم الموضوع معها وياخذ رايها ..اذا ماتبين تروحين على راحتك بس انا ماقدر اخلي امي وابوي

غرقت عيونها وابتسمت ..انا قلت لك انا معك وين ماتروح >>تقول كلامها وهي تكفف دموعها

قام ومسك يدها وحبها ..مشكوره حبيبتي كلامك خفف عني همي كله

..تدري باشتاق للرياض وامي وفهد >>لاول مره تعبر عن شي داخلها وهو يسمعها بحب

..علشان خاطرك باسوي المستحيل عشان ارجع

كملت كلامها ..حتى ساره باشتاق لها ولهواشها

بان الضيق بعيونه من الي قالته قعدت تناظر له ماعنده كلام يقوله بصوت عالي وهي تبكي ..بس ماحد يغنيني عنك >وشهقت اخذها وضمها لصدره وقعد يمسح شعرها بدون كلام
تضغط على نفسها علشانه ماعندها استعداد تخسره
.......................................

هــــــلا ياقبلة الدنـيـــــا هلابك واسكن الاهداب،،،

تبختر وســـــط بستانك حـــلالك مابـــها خشـــــــره،،،

تفضـــــل صــــك بستانك غلا في منهـــج الاحباب،،،

دخيلك ياعــــــديل الـــــروح ترى وسط الحشى جمــــــره،،،

عندنواف وساره

وفي وحد من المدن الفرنسيه يمشون بالشارع ماسكين يدين بعد

..تدرين حبيبتي اتمنى لو الاسبوع يطول مايمشي

..حتى لوكان سنه الساعات الحلوه تمشي بسرعةالبرق مانحس فيها

..ابي اللحظات الي انا فيها معك ماتتحرك تبقى واقفه

..نواف ترى ماقدر على هالرومانسيه

مسك يدها وصار يلعب بالخاتم ..اذا صرتي معي بوكلك رومانسيه وبقعدك على رومانسيه وانومك على رومانسيه

ورغم كل هذا نواف بينه وبين قلبها حجاب ليش ياترى

.................................................. ..

..انا بروح معكم
..مايصير يانوف انتي على ذمة رجال حرام تمشين بدون شوره وبعدين وراك جامعه
..ناصر انا بتفق معه مايمنع ان بيني وبينه مشاكل اني اكلمه واتفاهم معه والجامعه انا بعتذر ليناقدر انقل هناك
..بس انتي تلخبطين حياتك
..سلمان الله يخليك اتركني بكيفي هذي حياتي
..اخوك خايف عليك ومايبيك تضيعين دراستك وزجك
..قولوا انكم متضايقين من وجودي
ناظر لها بحنان يحس انها متوتره هذا ماهواسلوب نوف ولا طريقة تفكيرها ..ماعش الي يتضايق منك وانا اخوك البيت لك بس مثل ماقال ابوي زوجك لازام يدري
..خلاص قولوا له وانا الي بواجهه واتفاهم معه
..براحتك مانقدر نجبرك انتي ابخص بمصلحتك
.................................................. ..

..شف ياعبدالله انا ماعادعندي صبر

..الله يهداك يمه الدكتور قالت لنا انها بدت تتجاوب للعلاج وان شالله يصير حمل

..اسمع انا بعطيك ست شهور ان ماحملت لطيفه وانت ماتزوجت لانت ولدي ولاعارفك انا مدري وش الي مخليك تصبر عليها

..خلاص خلاص يمه الي تبينه بيصير بس لاتزعلين نفسك

ام عبدالله ماعاد تصبر ولدها ضيع حيا ته مع وحده ماتستحق الصبر والعمر الي يمضي معها

كان قرارها حازم هالمره

......................................

بقيـّت لي بغــيآب روحــك..مســاكين.../...عـيني وقلـــبي والأمــــل وألأمــــاني..
كــن الثـواني في غيآبك سكـــــاكـين.../...ليتـك تـذوق شوي طعــم الثــوانــــي

وصل خبر لناصر الي جن جنونه من موقفها حس بخيبةامل لكن مارضى انه يستسلم ويوقف عند هالحد
وهي بالجامعه ماتدري وش ينتظرها

قبل موعد خروجها بحوالي ساعه الاربع دق جوالها الجديد الي كان بديل لجوالها الي تكسر ورقم فضلت تغيره عرفت رقم ام ناصر وردت بهدؤ

..السلام عليكم
ماحتاجت وقت حتى تعرف صوته غمضت عيونها كنوع من الملل من تكرار الموضوع ..آآآآآآه وعليكم السلام

..لهالدرجه كارهه صوتي

..ناصر الله يخليك ماعد عندي كلام اقوله موضوع انتهينا منه

ببرود..بس انا عندي ولاخلص كلامي

..انت الحين وش تبي مني انا كرهتك كرهة الحياه معك >>هذا الي تتمناه

طنش الي سمعه ..انتي خلصتي محاضرات

..اي الحين باتصل على السواق يجي ياخذني

..لاتتصلين انا بجي اخذك

..لا انا بتصل واذا جيت مابركب معك

..يالله اطلعي انا برى واذا عانتدي ترى اسوي الي ببالي >>سكر الجوال وقف ينتظرها

خافت من اسلوبه ناصر مايهدد ومن اسلوبه حست انه يقصد الي يقوله استسلمت ولبست عباتها وطلعت كان لابس بنطلون جنز وتيشيرت ابيض وكاب ونظاره ومبعد السياره متعمد
تتلفت بين السيارات تدور سيارته لكن ماشفتها هو عرفها بالعبايه وابتسم وهو يشوفها تدور عليه دق جوالها ..انا الي واقف عند الجدار ويأشر لها بيده ماعرفته لان جسمه ناحف شوي الابعد ماركزت فيه ..خلاص شفتك

مشت له وهو ظل واقف لين وصلت عنده فرحته ما توصف لانه شافها وصلت عنده ..وين السياره

مسك يدها ومشى معها ..ناصر الناس تشوفنا

..خليهم يشوفنا والي له شي عندي يجي ياخذه

سكتت ومشت معه تحس بالامان وهي تمشي معه لكن الجرح الي سببه لها اعمق من أي شي وصل السياره وترك يدها وفتح الباب

..الحين وين تبينا نروح

..للبيت طبعا

..اي بيت

حركاته ثقيله عليها ..بيت ابوي

..طيب ليش ماتروحين معي لبيتي

..ناصر الله يخليك اتركني بحالي مابي اسمع أي شي

..ليش يانوف ليش ماصارت غلطه الي غلطتها

كلمته ادمت قلبها ..غلطه تجرحني وتهيني وتتهمني بشي ماهوفيني وبكل بساطه تقول غلطه

..بس انا اعتذرت ومستعد لاي شي يرضيك بس تبدين معي صفحه جديده

نزلت راسها وتكلمت بالم ..مانكر اني عشت معك حياه حلوه بس الي صار بركان ثار و احرق كل شي حلو فيها واولها قلبي والحرق اذا ماموت يشوه

..انتي ليش متشائمه ليش ماعندك استعداد تنسين

ضربت يدها على رجلها ..لانه ماينسي انت كسرت شي حلو فيني

..انتي قولي والي يرضيك انا بسويه

..طلقني <<

ثار من الي قالته وصرخ بوجهها ..انتي مجنونه اكيد مجنونه

..وشلون ترضى تعيش مع وحده مجنونه

..نوف لاتستفزيني طلاق ماراح اطلق لو تنطبق السما على الارض

..ماتقدر تجبرني اعيش معك

..الا اقدر ولاتخيلين انك تصيرين بيوم مطلقه قبل ماتصيرين ارمله

شهقت والتفت له وهو ماسك السكان بقوه كانه يبرد ناره فيه سكون مايكسره الاصوت السيارات

وصلها لباب البيت وهي ماحست ..انزلي >>رفعت نظرها شافت واقف بيت اهلها

وهي مستديره بجسمها تفتح الباب ..ترى انا بروح مع اهلي للشرقيه

ضرب ضربه على السكان ورفع راسه لفوق ..عارف روحي يانوف روحي بس طال الزمن ولاقصر بترجعين >>طلع من جيبه ظرف ..خذي هذا

..وش هذا ؟؟

..فلوس تصرفي فيها

..بس ابوي وسلمان مايخلوني احتاج شي ومكافئتي تكفيني

..خذيها واحرقيها >سحب يدها وحط الظرف فيها >>والحين انزلي وقبل تسافرون انا بجي اشوفك

كان عنده امل يشوفها لكن امنيته ماتحققت والكلام ماجاب معها فايده خايف انها تدمر كل شي بعنادها

بعيد شوي وفي بيت ابونايف

..هاه وش رايك

مطت شفتها وهزت كتفها ..مدري يمه شوري علي

..انا الي اعرفه ان الولد ينشرى وابوك سئل نايف وانتي تعرفينه ماعنده لعب

..والله مدري انا حلمي اعيش بالرياض بس متردده

..فكري واستخيري ترى ابوسلمان مستعجل

...ان شالله يمه بفكر وارد عليكم

ماتدري ولاهو يدري انها البنت الي شافها ولاقدر يشيلها من راسه

.................................................. ...........

دخلت للبيت تركض وقفت بنص البيت دارت عيونها المليانه دموع بالبيت رمت الظرف وجرتها رجلها الى حيث ترقد امها

دخلتها وسكرت الباب وراها ثنت رجولها قدام السرير وبكت بصوت عالي ..بروح واخليه انا احبه يمه نسيت كل شي علشانه بس جرحني

كل شي اقدر اتحمله الاانه يتهمني بشرفي >>ارتد الصوت لها وبدت على وجهها انفعالات وكانها حست ان الكلمه كبيره

كملت وهي تسمعها ولاول مره تحس انها واعيه للكلام الي تسمعه

..بس انا بدوس على قلبي برجلي واحط كرامتي على راسي انا ابيه يطلقني >> حطت راسها على السرير سمعت تمتمه رفعت راسها وتلفت بالغرفه

اعتقدت انها يتهئ لها نزلت راسها مره ثانيه وبكت لكن

فــــــــــجــــــــــــئــــه

حست يد تلمس شعرها وتعبث فيه بحنان فتحت عيونها على وسعها وسكتت ومثل ماهي مارفعت راسها كانها خايفه

بس الشي الي ماخطر على بالها

..نـــــ نــــووف

في بيت ابو نايف كانت الملكه مختصره الى ابعد حد لان الوقت مايسمح ابدا لاي مراسم

نوره منعها سلمان من السفر معهم لانه خاف عليها من الطياره وام سلمان بما ان مافيه احد راح يروح ما استحبت انها تروح وكلهم رجال بس وصت فهد على الصور

تمت الملكه بهدؤ وباجواء اسريه ضيقه جدا جدا فهد ماكان متشفق لاي شي

مافكر حتى يشوفها بس لانه معه شبكه لها اشترتها نوره وامه وعلشان الصور قرر يدخل ماكان كاره بس ماكان متحمس

مها كانت ناعمه بكل شي بلبسها بمكياجها حتى احسيسها عاديه جدا مافي رهبه اوخوف اوحرص انها تشوفه

طلب منها بدر انها تنزل بعد مادخل فهد في المجلس وقعد ينتظرها

دخلت عليه وهو يتلفت بارجاء المجلس كانه يستكشف وبصوت هادي خالي من أي احساس ..السلام عليكم

بمجرد ماطاحت عينها عليه حست ان كل شي صدق كانها مكذبه

فهد اول ماشافها تذكر انه وجه ماهواول مره يشوفه نسى انه القت السلام وقف بمكانه..وعليكم السلام

قرب لها وصافحها وحب جبهتها وهو معلق انظاره عليها استحت منه احرجها بنظراته نزلت راسها تهرب من عيونه الي التهمتها شقت وجهه ابتسامه يوم تذكر وين شافها الحين عرفها بس لازام يتاكد

..مبروك >>ردت عليه وهي منزله راسها ..الله يبارك فيك

جته جراءه ومسك ذقنها برقه ورفع راسها ..ليش منزله راسك ؟؟؟

بردت من لمست يده فكها صار يطق ببعضه وعيونها تروغ بسرعه ارتاعت من حركته ..وشلونك <<وهو يضحك

حسته ماهو طبيعي تكلمت وصوتها يتقطع من الخوف ..الحمدلله

على وضعه شد يده عليها بعد ماحس انه تحاول تتخلص من مسكته لكن ماقدرت تخلص ذقنها من يديه ..عارفه اني حبيت وحده بس لاني شفتها مره وحده وماقدرت اشيلها من راسي

ماخافت انصعقت من الي سمعته والخوف صار حقدوبينها وبين نفسها>> هذا جاي عشان يهيني مستحيل هذا واحد بعقله هذا اكيد مجنون ولا شارب شي معقوله نايف يغشني بواحد زي هذا بغضب فلتت نفسه من يده كمل وهي تقتحمه بعيونها يدري انها ماراح تسئله بس فضل يكمل ..بتسئليني وتقولين وين شفتها باقولك يوم ملكة اخوك نواف

بان على وجهها انها تفكر من الي حضر ملكة نواف لكن الى الان ساكته وتسمعه وهو يجر الكلام ..كانت لابسه فستان اصفر وشعرها اسود >>ويمثل بيده ..لاهي قصيره ولاهي طويله لاهي سمينه ولاهي نحيفه >>كل هذا وهي صاكه اسنانها رفع ذقنها مره ثانيه يوم ابعدت عيونها عنه وبدا يجر الكلام من جديد ..نزلت صينية القهوه عن باب الرجال ورجعت بسرعه عرفتيها >>شوي شوي لانت ملامحها وارتخت وهو خاف يكون جاب العيد مالت شفتها بابتسامه بطيئه لين ملت ثغرها واخيرا نطقت ..انـ نـا>>تاكد انها هي وارتاح انها مالخبط لان امه قالت له نوف
نزل يده عنها ورفعها مره ثانيه واشر باصبعه عليها ..انتيـ عليك نوررر >>من قلبها انبسطت لانها فهمته غلط وتنمنت انها بحلم مزعج تنتظر تقوم منه
قعدت ساكته من ملكة نواف وهو يفكر فيني وانا مدري عن شي ..ليش ساكته
تجاوزت الخجل والربكه وبدت تسترجع ذهنها واسئلته ..وشلون عرفت انه انا ؟؟؟
ابتسم ..تصدقيني اذا قلت ماعرفت انها انتي لين شفتك الحين ومع اني لمحتك لمحه بس حفظت ملامحك
فرحت من قلبها كلامه بدا قاسي لكن بالتدريج صار احلى من العسل عليها عرفت سر الراحه له خلص كل الكلام بعد الي قاله
استئذنت ام بدر للمصوره انها تدخل وتبدا شغلها الحين تجلت فرحتهم وحسوا انهم اسعد اثنين اكتشاف متاخر لكن كان له نكهه حلوه
انتهت مقابلتهم ودعها وحمد ربه انها صارت زوجته وهي احساسها لايمكن وصفه ملت صدرها الفرحه ودعته بعد ماخذ رقم جوالها وعدها يكون بينهم اتصال

.................................................. ........

آصعب عذأإأإأإأب الشـــــــــووووق لاصــااار

صــــــاااااامت

مثل الطفل يفهم ولايعرف

البــــوح

رجع لشقته وهو يفكر وش السبب الي يخليها ترجع لاهلها وتترك بيتها ويتسال >>ليش يفكر فيها مع انه ماشافها ولاصار بينهم مواقف تذكر

ليش مافكرت فيها قبل تتزوج هل هو اعجاب ولا حب ولا وش اسمه بالضبط حتى يوم تزوجت تمنى لها التوفيق شي غريب يحسه تجهها يمكن بسبب كذبة لطيفه عليه لولاها كانت الحين زوجته ماعرف يسمي الي يحس فيه ماقدر يوقف عن التفكير فيها مايتمنى انها تتطلق
هرب من التفكير لشغله يمكن يقدر يشيل الافكار من راسه

.................................................. ..
.في غيبتك تعبت أردد على شفاي !
إنت الوحيد اللي أحسه فهم لي

تكفى الى من جيت كلي من اقصاي
إفرد يدينك يالغلا و أبتسم لي !!

بعد مارجع سلمان اهدته ساره موشح سب وشتائم استقبلها برحابة صدر لانه عارف شعورها وبتصير بعيده ماتهون عليه لكن مجبر

حاول يهديها ويخفف عنها ووعدها ان المده ماراح تطول بس الالم مازال بصدرها ذاقت الغربه قبل ماتجربها واستطمعت مرارة البعد لكن خلاص

مابيدها حيله

مترادفات على السرير وامهم وسطهم تستمتع بقربهم كان بينهم كلام حميم ساره ماسكه يديها بين ايديها وتكلمها ..ماتوقعت ابد اني ارجع والقاك تحسنتي >>ماردت عليها بس ابتسمت لها

..يمه شوفيهم بيحرموني منك وان ماصدقت ترجعين

ميلت جسمها له ولمست شعرها وضمتها ..باحس اني وحيده

دمعت عيونها وهي تشوفها حزينه ..مصيرنا نـ نـ رجع

شددت ضمتها ..بترجعون بس بعد ماشبع من الوحده

وبكوا كلهم بصوت عالي

..................................................

وهاهو الدولاب يدور والايام تتداوال

ناصر حياته بارده فراغ ممل تتركته نوف

نوف قرار اتخذته من يدري ربما تعدل عنه

نوره وسلمان حياه هاديه مريحه وينتظرون مولودهم بفارغ الصبر

نواف وساره حياه ظاهرها الحب الذي يملئ قلب نواف وباطنها الضياع الذي يملئ قلب ساره

ام سلمان رجوع شبه بطي الي حياتها

مها وفهد حب نقي طاهر وعلاقه رائعه لايشوبها شائبه

.................................................. ...

بعد ماهدت شوي بدت تسئل اختها عن احوالها وهم مثل ماهم محاوطين امهم بحب
..ماقلتي لي وش اخبارك مع نواف

..آآه يانوف وش اقولك بيني وبينه سور عالي ماني قادره اذوبه

..ليش انتي شفت منه شي يزعلك

..ياليت عشان ماحتقر نفسي لاني ماقدرت احبه

..اجل وش المشكله

..يجيني شعور ان حياتي معه زي اللعبه او شي مثل الوهم

..يمكن لانك تزوجتيه عناد تحسين كذا

..كل شي جايز والحين انتي قولي لي وش الي خلاك تحطين كل شي ورا ظهرك وتهربين

..تدرين اني لايمكن اترك ناصر الالشي كبير خصوصا بعد ماحبيته

..طيب قولي وشوهالشي

حطت عينها بعينها ..انتي ترضين تعيشين مع رجال يشك انك على علاقه مع غيره

ساره بعد ماكانت متركيه اعتدلت بجلستها ..ناصر ناصر يشك فيك ليش اش شاف خلاه يشك فيك

قالت لها نوف السالفه ..اكيد السالفه هذي وراها راس مدبر

..مايهمني من الي دبرها ولايهمني انه عرف انها لعب الي يهمني انه صدق الكلام فيني وانا ماني مستعده اتحمل انه يشك فيني

..يعني ناصر يمكن غلط بس انتي تسرعتي

..لا ماتسرعت انا لو باتسرع كان تركته من اول يوم تزوجته انا تحملت لكن مانفع معاه الصبر خلاص الي بينا انتهى

..معقوله يانوف انتي تقولين هالكلام

..اي انا انا تعلمت ان الانسان بلا كرامه ولاشي كل شي ينعوض الاالكرامه مثل الما اذا انكبت لايمكن ترجع وحتى حبه مايشفع له عندي

..وناصر وش رايه ؟؟

..ناصر ندمان لكن بعد ماطاح الفاس بالراس

..فكري يانوف بابوي وسلمان وش بتقولين لهم

..مادام انهم ساكتين انا بسكت واذا اسئلوني من حقهم انهم يعرفون يعني بخليها للظروف

كانت ام سلمان تسمع وتعي الكلام الي سمعته كله

الله البنات كبروا وصارات لهم افكار وقناعات وتغير كل شي فيهم ماعجبها الكلام لكن صمتها ماراح يطول

.................................................. ....

واقفه بمكان ضيق وحار شافت نوف تمشي لها وهي تبكي

وقفت قداهما ..حسبي الله ونعم الوكيل ,حسبي الله ونعم الوكيل

اختفت عنها ماتدري وين راحت بس حست يدين تخنقها وهي تقاوم لين صحت من نومها مرتاعه

..اعوذ بالله من الشيطان الرجيم الظاهر نوف يتلاحقني حتى بالنوم

........................................

أذنبت في قلبي .. وهو تو مولود ....

.... ويتمته بجرم الوفاء دون ماابكيهـ

:

:

.. امشي الرجال ينتظر برى

..ماني طالعه له قله نايمه قله ماتت

..طيب علميني وش السبب الي مخليك رافضه حتى تقابيلنه >>ماكان يدري ان سبب رفضها انها تضعف قدامه وماهو كره لشوفته

..اسباب خاصه بيني وبينه

..وهالاسباب الخاصه تخليك تتركين كل شي حتى دراستك الي كانت حلمك تكملينها

..خلاص ياسلمان خلني على راحتي

..اوكي لا تقولين السبب بس اطلعي للرجال

..قلت لك ماني طالعه

عصب منها مانفع معها التحايل ..بتطلعين بالطيب ولا والله لاشيلك ووديك عنده

..سلمان وش هالاسلوب ..

..هذا الي عندي ماقدر اطلع واقوله ماتبي تقابلك يالله بسرعه اطلعي

..اف خلاص طالعه >>اخذت شال من الصوف قريب منها لان الجو فيه شي من البروده

..وان شالله بتطلعين كذا

ناظرت لنفسها كانت لابسه قميص بيت سماوي ثقيل وشبشب سماوي ولبست عليه شال اسود يعني لبس متواضع جدا ماهتمت حتى بنظرته لها ..ليش وش في لبسي

عرف انها ماراح تغير رايها ..خلاص بس روحي

مشت بخطوات متردده تحاول تستجمع الكلام الي راح تقوله وتضبط اعصابها لكن ماامهلتها المسافه القصيره وصلت المجلس ودفعت الباب بهدوا

جالس ينتظرها على جمر ومثلها يحاول يدور كلام ينقال لها سمع صرير الباب ووجه نظره صوبه يتاملها بعد ماسلمت وقفت بعيده عنه حست ببرد او قشعريره لمت الشال وكتفت يديها على نفسها رد السلام وتاهت نظرته فيها لاحظ التغيير عليها سئلها على طول ..ليش قاصه شعرك ؟؟

نست انها من بعد ماقصت شعرها ماشافها لاارديا مسكت طرف شعرها تحسسه بس تذكرت وردت ..اعتقد هذي حريه شخصيه

ابتسم.. بس تصدقين حلو..

خجلت منه ونزلت راسها ..مافكرتي

رفعت راسها بهدؤ ..فكرت بايش

..بحياتنا

..فكرت وقررت وقراري قلته لك

..لمتى وانتي تعاندين

..انت الي بديت بالغلط وانا متاكده لو جاي مني ماكنت سامحتني

..بسامحك لاني احبك وماقدر على فراقك ولايمكن استغني عنك

..بس انا قدر استغني عنك

ببرود ردعليها ..كذابه

لفت عنه وعطته ظاهرها ..واجهيني لاتهربين الهروب ماهو حل

وراح قابلها من الجهه الثانيه ..انا ماهرب

..نوف انا صدق شكيت فيك واعترف اني غلطان

..انا ماني موضع شبهه

..عارف انك اكبر من كذا بس الي جاني خلاني انسى نفسي وانتي لازام تقدرين

ظلت واقفه وسكتت ولاردت ..للحين مصره تروحين

رفعت راسها وهزته ..انتي تعذبيني

ابتسمت باستهزاء ..مدري ليه دايما تتكلم عن نفسك عمرك مافكرت تحط نفسك بمكاني ولامره وحده قلت احاول احس احساسها

..صدقيني انا ماقدر استغني عنك

..لا انت ماتلقى وحده تسكت عنك مثلي

..واخر كلام عندك

..اخركلام هو اول كلام مارجع بعد ماذليتني

سدت كل الطرق راوده شعور ان الي بينهم انتهى خلاص ماقى كلام يقوله حس بضيقه

..فكري صعب علي قرارك

وقف بعد ماجلس ..انا الحين ماشي

فتحت عيونها حتى ماتنزل دموعها يوم حست انه بيروح كانت معطيته جنبها وتلعب بطرف الشال

استرقت النظر وهو يمشي يمها ..عطيني يدك >>ناظرت له باستغراب

بس توقعت بيصافحها عطته يديها سحبها وحطها عند فمه وغمض عيونه وحبها بشوق بعدت وجهها عنه حتى مايشوف دموعها

..اشوفك على خير

تركها كانه طار بسرعه اختفى عن نظرها تحسه حلم وعت على نفسها تدور بالمجلس تدوره ركزت على المكان الي كان واقف فيه ماشافته شافت بمكانه كيس مشت له و بيدها الي ترتجف رفعته فتشت تبي تعرف وش فيه مثل ماتوقعت ظرف باين فيه فلوس وفيه علبه فتحتها دمعت عيونها وهي تشوف الحرف الي اهداها اياه بالعيد بحركه اليه اخذته وعلقته بصدرها الي امتلى دموع والعلبه بيدها وبجنبها كرت صغير

رفعته قدامها وقعدت تقراه

يالغايب الحاضر معي وسط الافكار

يالمرتوي منّي .. وأخايل سرابك

انتالمطر وانت البَرَدْ وانت الانهار

وشلون أضما بوقفتي عند بابك .؟

وإنتالفضا يالرحب .. والباقي أسوار

أضيق فيهم وأتفيّـــــــــا سحابك

قرات سطوره وحطت الورقه على صدرها وطلعت وهي تحس روحها بتطلع

,................................................. ................................

..الحين ليش تبكين ؟؟؟

..صعب اتخيل نفسي بعيده عن اهلي مالحقت افرح بامي

..افا سارونه وانا وين رحت

..انت موجود ولاتقصر بس هذولا اهلي

..حبيبتي ساره غيرك كثير يبعدون عن اهلهم شوفي مها بتتزوج وتترك اهلها وتجي هنا

..مها انتم عندها واختها موجوده هنا انا حتى اختي بتروح

استغرب ..نوف بتروح معهم ليش وزوجها

..زوجها زعلانه منه

..زعلانه منه وتسافر وتخليه

..لانها ماتبي ترجع له ويمكن تتطلق

..ليش كل هذا؟؟

انتبهت انها قالت كلام مولازام تقوله ..مدري مدري

..طيب اسمعي حبيبتي هم بعد بكره بيسافرون الليله بوديك عندهم واتحمل فراقك لين يسافرون

تهلل وجهها بفرحه.. صدق مشكور حبيبي >>لاول مره تقول هالكلمه

ضحك على عفويتها بس رحمها فعلا راح تصير مثل الغريبه

.................................................. ...

نوره كانت جالسه مع امها يتفرجون على الصور وفرحانين لانهم كانوا يشوفونه فرحان

.. اقول فهيدان اشوف الضحكه شاقه الوجه ماكنك الي رحت من عندتا كنك واحد ثاني

..لاوالله ماحد جبرني انا الي رحت بكيفي

..صح ماحد جبرك بس ياخي فيك شي غير قل قل وش السر

..نوره اتركي اخوك ماعليك منها الله يهنيك واشوفك مبسوط دايم

ابتسم وهو يتذكر يوم سئل امه عنها وقالت انها نوف لف رجل على رجل ومسك رجله بيده ..اقول ام فهد

نزلت الصور على الطاوله ..تذكرين البنت الي قلت لك اني شفتها بملكة نواف

قعدت تتذكر ..اي هذي نوف وش طراها على بالك

..الله يهداك يمه انتي قلتي انها نوف

..اي ياولدي نوف مافي غيرها

..هي انت أي بنت واي نوف فهمني السالفه

..هذا وانا اخوك شفت بنت ذاك اليوم نزلت القهوه وقلت لامي وقلت لها لابسه اصفر

..اي هذاي مها انا قلت لها تطلعها بس وشلون شفتها

اشر بيده على نوره وهو ساكت بمعنى فهمتي ..

..وش يدريني ياولدي كلهم نفس الالوان

..هههههههههه وانت ياحرام من ذاك الوقت مشغول فيها

..لاوبعد تقول نوف تزوجت خلني اخطب لك مها

ضحكوا كلهم عليها وماقدرت ماتضحك على نفسها والبس الي صار معها وبقلبها تحمد ربها انه ماتعذب

رجعت تتامل الصور ..بس ماشالله عليها قمر

.................................................. ........................

من يلوم العين لو هلت دموع

ومن يلوم القلب لو صفق وصاح

لي حبيب راح ماطرى الرجوع

ليتني ودعت زوله يوم راح

اه من قلب كفخ بين الضلوع

مثل كفخ الطير مكسور الجناح

كانت ببيت اهلها من يومين حزينه تحس انها مكسوره ضعيفه لاحول لها. اليوم رايحيين جايين ينقلون اغراضهم للسياره اكتفو بالضروريات استاجرو بيت على قد عايلتهم الصغيره وافرشوه باثاث بسيط الى ان يستقرون كانت تراقبهم وهم مشغولين وقلبها يعتصر على فراقهم سلمان الاخو والصديق ونوره تحبها وتعتبرها اختها نوف اختها روحين في جسد واحد شريكتها في الافراح والاحزان ابوها الرجال الوقوروالصدر الحنون امها الدفئ الي افتقدته سنين رجع لها فجئه وانسرق منها فجئه كل هذا طواه البعد وفرق بينها وبينه

حست انه انتهى كل شي وقفوا يستعدون للانطلاق للمطار هوت على امها بكرسيها المتحرك وحبت راسها وعينها ويدها ماقدرت حتى تتكلم رفعها ابوها ولمه بحضنه ..ماراح تطول غيبتنا >>بعد الكلام خذلها سلمت على اخوها ونوره التفت على نوف وضمتها تحسها بتترك قطعه منها

مشوا وهي تتبعهم الين وصلت لمدخل البيت وكل مده يلتفت واحد منهم لين اطلعوا مع الباب وهي تراقب خيالهم يختفي عن نظرها

طلعوا ونواف واقف بسيارته عند الباب نزل وودع ابو سلمان وسلمان ..نشوفكم على خير

..وصيتك ساره يانواف

..لاتخاف ياعمي بعيوني ان شالله

..ادخل لها لاتخليها >>ومشى وتركه ركبوا سيارة فهد الي راح يوصلهم للمطار وقف لين اختفوا

تنهد ودخل كانت بنفس الوضع ونفس المكان الي شافها فيه اول مره يشوف جسمها يهتز اول مره شافها ماكان له الحق يقرب منها لكن اليوم قرب لها وجلس جنبها رفع راسها بيده وبحنان مسح دموعها..دموعك غاليه>>حضنته وبكت على صدره لين طلعت شي من الي داخلها فتح يدها واخذ المفتاح منها وقام وقفل مدخل البيت ورجع لها قومها وطلع ركبت وهي تشوف البيت انطفت انواره صار كانه مهجور من سنين

8

كل طيرٍ له اللي بالسمـاء يجذبـه

وكل غصنٍ تجوز له الهبايـب يميـل..

صرت أقول الكلام المر وأستعذبـه

صرت أخاف الدفاء لوني وحيدٍ نحيل..

كم صبرت وليال الصبر مستغربـه

لين قلت حلاة الصبر لو هـو جميـل..

الزمن صعب والنسيان يـا مصعبـه

والدفاتر نشيّلها الهمـوم..وتشيـل..!