عبدالله اللي غيبته هزت آفاق الحزن فج نفوسنا واعتصرها
ياالله ياللي تشرح الصدر لا ضاق
يا عالمٍ سر النفوس وجَهَرْها
حكم المنيه ما تبع رأي وأذواق
بقدرتك تجري البرايا لقدرها
يا رب صبرنا على مر الفراق
واجبر قلوبٍ موت غالٍ كسرها
القايد اللي حطنا وسط الأحداق اللي يساوي عيوننا مع نظرها
كلِّ الشعب من صدمته ما بعد فاق
وقع الخبر نارِ تضارم سعرها
نبكي عليه بدم والدمع حراق
والعين عقب النوم ذاقت سهرها
مرحوم ما اهتزت على غصونها أوراق
واعداد نبت الأرض وازهى زهرها
واللّه ما ننساه عهدٍ وميثاق
لا والِّذي أرسى الجبال وفطرها
تمضي الليالي وسيدي خالدٍ باق
منزله فقلوب بحبه غمرها
سمح النبا للجود باذل وسباق
علِّه بجنة خُلد يجري نهرها
صفحته فالتاريخ ناصعة الإشراق
أفعاله البيضاء محال نحصرها
أضحت سنينه بين طاعات وإعتاق
وإكرام شعبه من روايع صورها
للمجد شاد المجد لا كذب ونفاق
هذي حقيقه صدق محدٍ نكرها
معه العسير يصير سهلٍ وينساق
ولخدمة الأمه حياته نذرها
للسِّلم نادى وللحقايق يبي إحقاق
أكبر قضايانا بحزم نصرها
درع البلد عن كل حاقد ونعاق
دمَّر خلايا الشَّر واللي أمرها
من يقصده يدبلِّه الطاق بالطاق
يمنى كريم ما تشح بمطرها
هذي مشاريعه تسامت بالاعناق
من فوق هام السحب تلمع دررها
وصارت مياه البحر شهد لمن ذاق
كم سدِّ يشهد له وعينٍ حفرها
وأغدق على شعب البلد خير وأرزاق
عمِّ الرخا بدوانها مع حضرها
حاديه عزمٍ للعلا دوم تواق
كم بادرة طيبٍ سعى وابتدرها
بالقول عملاقٍ وبالفعل عملاق
كلِّ الفضايل حازها واتجرها
بالحق يصدع كان به وضع ما لاق
كم سنِّةٍ أحيا وبدعه دثرها
عبّد طرق والصخر شقه بالأنفاق
والأرض عمَّر سهلها مع وعرها
وبيوت ربي خصها بزود الإنفاق
يا ربِّ تكتب له أجر من عمرها
لجل المرض وفر علاج وترياق
وهذي صروح العلم واضح أثرها
مفتاح خير وللفتن دوم مغلاق
كم فتنةٍ في مهدها قد قبرها
الخير في عهده هطولٍ ودفاق
له حكمةٍ نجني أطايب ثمرها
ينشي ويبني ما شكى همِّ وارهاق
ما قصرت جهوده ولا هو عذرها
طيب أصل طيب فصل طيب أعراق
شمس البلاد ونجمها مع قمرها
ما غرّته دنيا البشر جِلِّ ودْقَاق
في مهجته كِلِّ المباهج حقرها
يسعى لسلعه ما تحصل بالأسواق
جنات ربي اللي لعبيده ذخرها ندعي له الله عد ما هاضت أشواق
وعدِّ السنين بْحلوها مع كدرها
كم دولةٍ غرقت سفنها بالاعماق
في وسط غبات الفتن غاب أثرها
والمملكه في خطَّها مجتمع راق
في نهجها تبقى يتيمة دهرها
يا للي تريد بنا التهم تلصق إلصاق
وش لك بمن سنة نبيه نشرها
دولة قيم دولة شيم دولة أخلاق
دوله بها الاسلام مصدر فخرها
ما همنا أبواق خاين وبواق
كم نفس ماتت في حبايل قهرها
يا رب تحفظ بيرق العز خفاق
واحفظ بلدنا برها مع بحرها
وازكى صلاة عدِّ ما لاح براق
تغشى الِّذي ربه ذنوبه غفرها
ناصر بن جمعان آل عوض - وادي الدواسر