شبكة همس الشوق - عرض مشاركة واحدة - فوق الجروح اللي بقلبي من سنين يكفي دخيل الله لا تجرحوني

8 - 2 - 2015, 09:40 PM

اما عند سند

سهر مع ربعه في الشاليه لين ماصارت الساعه ثلاث فقرر يرجع لبيت
لانه متوقع نومتها هالوقت مايبي يلتقي فيها ويضعف قدام انوثتها الطاغيه

دخل وشاف النور مطفى وتوقع نومها بالغرفه فقرر ياخذ له ملابس ويطلع بس اول مادخل انصدم انها موفيه وان الفراش مرتم وماعليه احد

حس بفضول انه يعرف وينها فيه
راح طل على المجلس لقاها مسويه لها فراش على الكنب ونايمه كأنها بتفكه من هالمشكلة الي هو يحاتيها

كره نفسه وحس بالحزن اتجاه هالبنت الي ماعاشت حياتها الطبيعيه وابتلت بواحد مثله
تنهد ودخل الغرفه وبدل وانسدح بينام

صحت على الصلاه كانت موقته منبه لها عشان لاتطوفها الصلاه
توضت بالحمام الي برا وصلت

بعد ماخلصت جلست فتره على سجادتها تسترجع الي صار لها مع عمتها هي ليش تكرها وتحب اتشوفها متعذبه شنو السبب الي يدفعها لهذا كله وانا مستعده جان عندي الحل اني لسويه بس تتركني بحالي

تنهدت بضيق كافي ياعمتي كافي ماجا منج من أهانات وذل واخر مابه زوجتيني من ولدج غصب وهو رافض الزواج

امسحت دموعها الي نزلت هي متى وقفت اصلا
جفت دموعها من اصعدت امس عقب الي صار مع حصه وهي فارشه لها بالمجلس فراش ودافنه روحها فيه تصيح خافت يجي سند ويكشفها مع ان هذا مستحيل يصير

حست انها شبعت صياح فحاولت تهدي نفسها وتمسح اثر الدموع

قامت بتروح تشرب ماي
بس صدمها طلعت سند بوجهها كان توه جاي من الصلاه فكان ناوي يقومها بس انصدم انها قايمه

وان اعيونها منفخه وجهها احمر
قال بخوف:اشفيك صايحه

كان قريب منها وهي ردت للمجلس ولفت عنه
عهد وألي هذا شيصرفه الحين قلت برتباك: لا بس كنت ادعي لأهلي ودمعت

مالقت ألاهالعذر مع انه ماهب مصدقه بس مستحيل تبين له لانه اكيد بيوقف مع امه ضدها فهي على امه موقادره تحمل ضربها فشلون اذا هو بعد رفع يده عليها
سند بشك: بس هذا مو دموع هذا صياح
وانتبه لحمرار خدها جا من غير قصد بيلمسه كان منصدم وهالشي زاده بعد قال :من

عهد بتوتر وهي تصد عنه: مافيني شي وياليت مادخل نفسك بشي مالك فيه

سند بقهر:شقصدك بهالكلام
عهد ماعرفت وش تقول او تخربط قالت: اقصد حياتي ماتدخل فيها وكملت: انا ادري انك ماتبيني وان امك هي الي غاصبتك علي وانك كرهتني لأني وافقت
فالي ابيه انك ترضى اني اعيش عندك كأخت وانا مستعده اني ماضايقك بشي

حس بضيق وكأن خنجر يخترق جسمه عقب الي قالته يعني هي عارفه برفضي وساكته
قال بأهتمام وهو حاس ان حمل وانشال عن صدره لانها عارفه بكل شي: بس هذا مايمنعني اني اعرف سبب هالصياح والكف الي معلم بوجهك

حتى لأخو من حقه يعرف صح
ولا انا غلطان

عهد بأصرار:اسمح لي ماقدر اقول
سند بقهر:يعني السالفه سالفة عناد
وبس

عهد بخوف:اعتبرها مثل ماتبي وراحت وجلست على فراشها وكأنها بهالحركه طنشت سند الي فار غضب قال: كيفك ياعهد بس انا مصيري بعرف
وطلع

وعهد رمت نفسها تنام وهي مطنشته

اليوم الثاني

بعد ماسكرت من حمد وهي حاسه بالفرح لسعادة ولدها الي بان عليه السعاده من كلامه معها

انتبهت لنزول سند وجيته صوبها
حصه كانت متوتره هي تخاف من سند خاصة اذا عصب فخافت تكون عهد جارته صوبها ومحرضته عليهم مع ان هذا من سابع المستحيلات يصير

سند الي سلم وجلس عندها وهي ردت
حصه ببتسامه:وعليكم السلام

قالت بشك:وين مرتك هم اليوم ماهي متغديه معنا

سند بجفاف:مادري ولاسألتها

حصه استبشرت خير من رده وان عهد ماقالت له شي عن الي صار امس

قالت :اي ترا حمد يسلم عليك توه كلمني فديته طاير من الفرحه الله يتمم عليهم

سند بحب:امين

حصه استأذنت بتشوف الخدم يحطون الغدا
بدون لاتسأل عن عهد هل بتجي او لا

بعد فتره دخلت شهد الي جايه هي فجوره عشان امها عازمتها سند فز قلبه وفتح ذراعه لفجر وهي جت له ركض

بعد ماسلم على شهد وجلس وفجر مازالت بحضنه قالت له شهد ببتسامه:وين مرتك ماشوفها

سند برود:فوق
شهد :ليش ماهي متغديه معنا
سند:مادري
شهد بنرفزه من بروده: اشلون ماتدري ابي افهم

سند خزها بنظره خوفتها: مالك حق تفهمين حياتي وانا حر فيها

شهد بخوف:اي ماقلت شي بس
سند رحم خوفها:لاتبسبسين وكمل برود:وعشانج ام هالمزيونه وباس فجر الي موفاهمه شي وتلعب بتيلفون سند بروح اشوفها

وقف ونزل فجر وستأذن يشوف عهد

اما عهد الي من قعدت وهي شاغله نفسها بالمجلات او تلفزيون بس عشان تنسى همها
دق تيلفونها وكانت سحر

حست بسعاده وقعدت تكلمها وتكلم ام فارس وتطمنهم عليها

ماحست بالوقت وهي تكلم ألا بعد ماشافت سند واقف عند باب مجلسهم استأذنت وسكرت من سحر

سند داخ من اسلوبها من ابتسامتها للي تكلمه وحس بغيره من الي تكلمه تسند على باب المجلس وتركها تاخذ راحتها في الكلام

او بالأصح هو ياخذ راحته في تأملها
ماحس ألا بعد ماقالت بحيا من نظراته:بغيت شي

سند حس انه ابله ونسى هو ليش جاي اصلا قال بركاده تخفي توتره :اي شهد تحت

صج اني ثور وبعدين معك ياسند من تشوف هالبنت تضيع علومك
عهد بأرتباك ماتبي تنزل وتواجهه حصه عقب امس خاصة وانها محذرتها من النزول :واذا
سند:تبي تشوفك فتعالي تغدي معنا بدال أكلك بروحك

عهد كأني اكلت شي ابتسمت بمكر وهالأبتسامه حركت بجسم سند مية عضله قام يهتز هز قال وهو صاد عنها :كيفك اذا ماتبين ماله داعي تجين بس عشان شهد ماتبلشني وجا بيروح قالت بخجل: لا بجي بس انطرني ببدل
كانت ناويه تقهر حصه وتواجهها ولا تخليها تشمت فيها على انها سمعت كلامها ومانزلت لانها خايفه منها

قررت تعاملها بهالطريقه قدام عيالها بتحترمها وبعيد عنهم بتقهرها قهر

ألبست لها دراعه فخمه في اقل من ربع ساعه جهزت وطلعت له وهو كان متوتر حده وهالشي ماخفى عن عهد بس ماحبت تسأل
وفضلت انها ماتدخل في حياته

نزلوا مع بعض وشافت نظرات حصه الي مافارقتهم من اول مانزلوا لين ماوصلوا لهم وسلموا وجلسوا

عهد احتارت وين تجلس بين سند وامه مستحيل بس فجر ارحمتها وقامت من عند امها وراحت بتجلس عند سند وهالشي فرحها وتمنت تبوس فجر على هالمساعده العظيمه

اجلست مكان فجر ولفت لشهد الي قالت بضحكه:الله يعينج على فجر انالو مكانح اعتبرها ضره لي

عهد اضحكت بحيا وسند حاول مايبين ارتباكه واشغل نفسه بفجر وسوالفها
اماحصه من شافتها جت وهي مفوله من الغضب
اخ ماكفاها تهديدي الي امس ناطه لي اليوم بعد ونازله
كانت تخزها بنظرات وعهد تسوي نفسها مومهتمه وحست انها غلبت حصه بشيين كونها طنشت كلامها امس وانها حصلت لها وجبه غدا دسمه

بعد المغرب

كانت جالسه بيتها حاسه بطفشه ودوخه موراضيه تهدها ابد

كانت مقرره تستأذن من خالد عشان تزور عهد بيت زوجها

بعد مده دخل عليها خالد وبتسامته سلم وجلس جنبها
قال بحب:شعنده الحلو ماد البوز

كمل بخبث:يمكن يبي بوسه وقرب شفايفه لها بس سحر ردته وقالت بقرف: لا خالد عفيه بعد عني

استغرب منها وقال بجفاف:ياليت يامدام انك مادخلين امور زعلك في حياتنا كزوجين
سحر بضيق:خالد انا اسفه ماقصدت بس
خالد بقهر:بس شنو ياسحر ترا مليت طقت جبدي كل مره جايه لي محاتات بهالعهد
والله لو انا بمكانها ماحصلت الي هي محصلته

وقام وتركها ودخل غرفته وهي حست بضيق هي ماتقصر معه بشي وكل شي يبيه توفره له بس خالد يدور اي زله عشان تترك شغلها وتجلس له ولعياله بالبيت وهي ماتبي هالشي وموسالفة حاجه للفلوس لالان خالد مغرقها بفلوسه ومايخليهاتصرف من عندها شي بس هي مقسمه امورها بين شغلهاوبيتها وماقصرت

بس هالاسبوع جايها مثل الارهاق وكارهه قرب خالد وتحس بالقرف وهو ماعبرها ياخذ الي يبي غصب كأن السالفه عناد وبس

اوقفت وراحت لغرفتها بعد ماسكرت الجناح الي يفصل بينها وبين غرفة اعيالها

ادخلت شافت خالد نايم على بطنه وحست ان تصرفاته تدل على انه طفل ويبي من يدلعه ويهتم فيه خاصة ان خالد فقد امه من هوصغير فزواجه من سحر عوضه عن حرمانه مع ان العمر بينه وبينها اكثر من ثمان

جت وجلست عند رجوله وقعدت تمسح له ظهره قالت برقه:خلود حبيبي

خالد اه ياسحر مشكلتي ماقدر على اسلوبك من كلمه يذوب كل الي في قلبي اتجاهك

انا مابيك تشغلين نفسك بأمور غيرنا انتي لي ولعيالي وبس وغير هالشي مابي
قال بجفاف:ماله داعي تجين تمصلحين عندي عقب الي صار خلاص طابت نفسي

سحر بخوف لا وش قصده طابت نفسه لايكون عافني لا والله اموت قهر قالت وهي ترمي نفسه عليه وتحضن ظهره :خالد حرام عليك والله مو قصدي بس انا حاسه بتعب وشاكه اني حامل

هي شاكه بهالشي خاصة وان الأعراض باديه عليها من اسبوع بس ماحللت

خالد انبه ضميره وعدل نفسه وقال وهو ماسك كتوفها :حامل

سحروعيونها تدمع:اي
خالد بسعاده وهو يحضنها:اخيرا تركتي الحبوب مابغيتي
خاصة وان عيالك ثيران شكبرهم

سحر دفته بصدره قالت بدلع: لاتقول لعيالي ثيران وبعدين فديتهم توهم فصول- اولى بتدائي وعبود اربع سنوات

والله صغار
خالد بخبث:لا ماهب صغار وبعدين طقت جبدي ابي بنت

سحربخجل:هذا بيد الله لابيدك ولا بيدي كانت بنت او ولد
خالد بحب:ونعم بالله وكمل بتوسل: طلبتك ياسحر قولي تم

سحر بالأول توقعت شي ثاني بس شافت ان نظرته ماتدل على الي بالها:قول وان شالله اقدر

خالد:ألا تقدرين بأذن الله شغلك اتركيه
سحر كانت حاسه مهما كان مستحيل يسكت بيضل يزن عليها وهي طفشت وخافت تخسر بيتها على شي تافهه وخاصة ان الي مونستها بالدوام والي تشتغل سحر عشانها طلعت وتركت الشغل فقررت توافق منها ترتاح ومنها تطيب خاطر خالد من هالموال
قالت:خلاص من باجر بروح اقدم استقالتي

ماحست ألا وخالد ضامها ويبوس فيها
سحر بطفش بعد مافكت نفسها منه: مستانس على هالشي
خالد بذوبان:بشكل ماتصورينه لان شغلك مختلط وانا مابي احد يشوف ملكي لانك لي وبس وقرب لها بس سحر اسبقته وهربت وهالشي قهر خالد مو عشان الي باله لا عشانها نست حملها
قال بقهر:هيه شوي شوي نسيتي حملك
سحر بدلع ويدها على خصرها: لا مانسيت ومافيني شي وجت بتطلع لفت صوبه وقالت برجا:بما اني وافقت على طلبك فياليت انت بعد توافق على طلبي وتخليني ازور عهد باجر

خالد ببتسامه:من عيوني وانا الي اوديك بعد
سحر بحب:تسلم لي عيونك
هي عارفه ان خالد مايكره عهد وماعنده شي بالي قاله بس غيرته من شغلها تخليه يتصرف بهالشكل