شبكة همس الشوق - عرض مشاركة واحدة - فوق الجروح اللي بقلبي من سنين يكفي دخيل الله لا تجرحوني

9 - 2 - 2015, 08:19 PM

الرابع و العشروووووووون

دخل جناحه وكان يبي بس يختفي عن الكل ويختلي بنفسه كان حيل متضايق موعارف ليش هذا الي يبيه فراقها ليش يتضايق المفروض يفرح
شاف الخدمات طالعات وكان معاهن شناط عهد حس بضيق بيرجع يعيش وحيد بهالمكان الي نبض بالحياة بوجودهاو الي حس انه بيصير موحش عقب ماتركته
بس الي مريحه انه هو بعد بيسافر وماهب جالس هنيه
لين مايتعود ويحس انه تقبل موضوع طلاقها

بعد ماطلعن الخدم سكرالباب وقفله ماله خلق احد خاصة امه حاس انها بتجي وتكمل عليه بسالفة عهد

وفعلا قبل لايدخل غرفة انطق الباب بشكل متكرر
سند بغضب:من
توقع امه او الخدم ناسين شي بس انصدم طلع حمد
حمد بنرفزه:انا افتح
كان جاي بيفهم السالفه من سند نفسه ليش طلق عهد وليش يعاملها بجفاف سمع من سهام عجب العجاب وحس بالخجل من تصرفاته هوعارف برفضه لزواج لكن مولهدرجه انه يحرم نفسه من زوجته ويعذبها عشانه مغصوب عليها

سند بدون نفس فتح الباب ولف بيروح لغرفة
حمد شافه صاد وقال بعد مادخل
حمد بنرفزه:تقدر تفهمني انت ليش طلقت مرتك
سند كان متضايق ماهم فاهمينه بس قاعدين يلومونه قال:ماكنا متفقين من البدايه وكله نتهاوش
حمد بقهر:وين بتلقى الي تتفق معك وانت على هالحاله
سند بق عيونه دلاله على غضبه وكان ممكن في اي لحضه يموت حمد بس حمد لحق الموقف وقال برجا يخالطه خوف:سند ياخوي انت لازم تنسى المرحومه سعاد وصدقني انك تقدر اذا عطيت نفسك فرصه مع عهد
وكمل بتنهد عقب شاف سند استكان وقام يزفر بقوه عشان يبعد الغضب عنه:عهد بنت حلال واكيد بتساعدك

سند بقهر:عندك شي غير هالكلام
حمدبرجا:سند ا
قاطعه بغضب وهو رايح لغرفة :اذا ماعندك شي فرجاآ انا دايخ وبنام وطنش حمد ودخل مايبي ينجذب لكلامه يخاف يضعف ويرجع عهد

وهو حاس انها سعيده اكثرمنه بسالفة الطلاق
تنهد معقوله كلام امي صج انها هي شايفه لها شوفه
استغفر ربه لان الوساويس قامت تلعب براسه

وراح داخل بينام

وحمد عرف ان مامن قعدته فايده وان سند لايمكن يسمع له فطلع من جناحه وسكر باب جناحه مثل ماطلب منه

بعد اسبوع

عهد بالموت رضى عمها تجلس عند ام فارس هالاسبوع بس وكان ناوي يجيها وياخذها تسكن عنده
لان سند ازعجه من كثر الزن انه يجيبها غصب ومايتركها عند الغرب

وهي ماكانت راضيه بس حكم القوي على الضعيف اخلصت من عمتها وبطشها وطاحت بعمها
شكلها بتم طول حياتها تدفع ثمن غلطة ابوها

بس حاسه ان فواز ارحم من حصه لانه سمح لها بالقعده عند ام فارس هالاسبوع لان هي كانت بحاله سيئه حتى الدوام اخذت اجازه اسبوع

كلمت ناصر الي اعتبرته ابو لها وعطاها وقال متى ماتبين تداومي تعالي ومعاشك ماشي سوا داومتي او لا

ماتدري شالي فيها زواجها من سند وطلاقها منه

خلاها تحس انها ولاشي وانها ناقصه سند بالاشهر الي طافوا وعيشتها معاه خلاها تحبه وتعلق فيه وفي شخصيته حتى جبروته وعصبيته كانت تعشقها
تحس بالغيره والحسد حتى من زوجة سعاد الميته لانه صان عشرتها ومااخذ وحده ثانيه عقبها مرات تمنى لو هي سعاد

كانت بغرفة سحر وتجهز باقي اشناطها بعد فتره جت لها سحر

سحر بتعب اجلست وقالت: خلاص معند عمج ألا تعيشين عنده
عهد بود:اي وكملت بحب:وبعدين انتم ماقصرتوا لي متى بتحملوني
سحربغضب:لاتقولين هالكلام عهد حنا خوات وامي معتبرتج بنت لها وانتي عارفه

عهد بحزن:والله اني عارفه هالشي والشاهدالله اني ماعتبركم ألا اهلي حتى أهلي الصج ماوصلوا لغلاكم عندي

سحربحنان: خلاص دام جذي اجل لاتقاطعي وخلينا انشوفج علأقل كل نهاية اسبوع

عهد بتنهد:ان شالله بحاول
سحربأهتمام:ألا صج شخبار الدكتور ناصر وكملت بسعاده :ماتدرين شكثر بفرحت لما طلع من اهل امج
عهد برود:ماعليه وماقصر بسالفة الأجازه وقال متى ماتبين داومي
سحر بسعاده:الله يوفقه وكملت بخبث:متزوج
عهد افهمت تلميحاتها وكانت حاسه بالضيق مستحيل ترتبط بأحد عقب سند عقبه عافت كل الرجال الزين منهم والشين
قالت بقهر:مادري عنه وبعدين الرجال كبرابوي ومعتبرني بنت له مافكر بالي في بالج
سحربحب:ماقلت شي بس بسأل وعرف
وكملت بسرحان:يمكن بعده يحب المرحومه امج وماتزوج ولما شافج قرر ياخذج لانج نسخه منها
عهد بغضب:سحر شكله خالد معه حق لما زعلج انتي صايره مغثه مع هالحمل
سحربقهر وهي بتطلع:هين ياعهد بشوف واشلون بتحملين فراقي
عهد برجا:لاتكفين اضحك ماقصدت
سحر عارفه بس هي حز بخاطرها طاري خالد صارلها اسبوع مادق ولاشي مع انه كل يوم جاي يأخذ عياله ويشوفهم

بس ماكان حتى يطلب يشوفها
وامها حاسه وساكته وهي قالت بس لعهد عن سالفتها
قطع عليها عهد بحزن:سحر عفيه لاتزعلين وال
قاطعتها عهد حساسه بشكل ماتحب احد يزعل منها حتى لو هو الي غلطان قالت :مازعلت وعجلي ترا مابقى على جية عمج شي

عهد براحه:ان شالله

عند سند

رجع لشغله برا وحس انه بدأ يتأقلم شوي على سالفة الطلاق مع ان جلسة عهد عند ام فارس قاهرته خاصة وان عندها ولد للحين ماتزوج

كل مره يلح على فواز يجرها لو بالغصب بس قاهره انه متفق معها تجلس بس اسبوع
لانهاقايله له انهامتأزمه من طلاقها
حاس بالقهر اشلون اقدرت تضحك عليه بهالسالفه هي الي كانت تبي الطلاق اكثر مني بس مشت على فواز هالجذبه لانه عارف برفضي لزواج

اخ احسها اقهرتني وكل مازادت افعالها الي تقهر زاد تعقلي فيها اكثر واكثر

متى بنساها او اشلون وانا مابقى احد مالآمني على طلاقي اخواني وفواز من صوب امي من صوب بس امي انا عارف ليش تبي عشان تتم تحت رحمتها وتفنن بتعذيبها لانها بنت ضحى الي خلت ابوها يتبرأ من سالم احس ان الوالده تخيلها هي ضحى نفسها لانها يمكن تشابها لان تصرفاتها مو طبيعيه صارلها اسبوع زعلانه علي وماتكلمني حتى وهي مسافره عند شهد الحين ترفض النقاش معي بس مايهم انا اعرف بمصلحتي
تنهد وهو يتخيل شكلها وجمالها رغم انها فاتنه ألا انها مافيها ذرة غرور يمكن لان ابوها راعي خرابيط فماتقدر ترفع راسها ودايم منذله ومكسوره

اه ياكثر مادوختني بجمالها وكنت بالموت ماسك نفسي لااهجم عليها

ومرات يفتني ألسانها خاصه لي طال يحسسني بضعف واني على وشك الهزيمه ومااقدر اتحكم بمشاعري فضطر اطقها عشان بس تنحاش عن وجهي لا اتهور

اخذته الافكار لها وماحس بنفسه ألا وهو غاط بالنوم

عند نور

باقي اسبوع على عرسها ماتبي تسوي عرس تقول مابي فضايح خاصة وان هذا رابع عرس لغانم فقالت حفله صغيره بيتنا احسن

جهزت الأشيا الضروريه واضطرت تنشغل عن عهد بس كانوا على اتصال دايم وتعلمها بأخر الأخبار

ادخلت البيت كانت جاية من الصالون تأكد الحجز وتشوف ثوبها قبل الاستلام
اول مادخلت كشرت كان غانم جاي هو ولده سعود

ضاق خلقها شيبي جاي مايقدر يفكنا من وجهه لو اسبوع
علأقل عشان اتشوق لوجهه لليلة العرس
امحق عزالله بطول على ماحس بالشوق له هالشايب
تمت واقفه وسلمت عليهم برود كانت منحرجه من سعود
شكله محترم وحبيب عكس الزفت ابوه

غانم الي كالعاده يجي عند خالته ومعه سعود يسلم عليها
ابتسم يوم شافها داخله
حس بسعاده صارلها فتره مشغوله بالتجهيز
غانم تنهدبحب بعد ماردوا عليها السلام :اشلونك
نور بقهر:من الله بخير وجت بتروح

بس هو وقفها بصوته الي علاه بس عشان يسمعها:يمه اشفيها بنتك ضعفانه لايكون من التجهيز شكلها اذا جاالعرس تكون عظم وجلد بس

نور انحرجت الأخ مدقق فيها عدل وعارف هي فعلا ضعفت نفسها منسده ماتاكل بس مو من تجهيزها لحضرة جنابه لا لانها منقهره من زواجها منه

الكل سكت ولا رد ونور اطلعت لغرفتها بسرعه ماتبي تسمع منه شي

ام ماجدبعطف:خنت حيلي هلكانه من التجهيز
غانم بثقه:ليش ماتجلس والي تبيه تطلبه

سعود بطها ضحك ألتفت له ابوه وقال بنرفزه:شي ضحكك
سعود استحا من ام ماجد قال :ابد سلامتك ذكرت شي هو يضحك على انفعال ابوه وحرصه على نور الي مرات تقهره ماتحس بالي ابوه يسويه عشانها وتبين له كرهها له بدون مجامله

عند نور بغرفتها

رمت نفسها على السرير مو متقبله فكرة زواجها من غانم خير شر
ولا هي متخيله شكلها زوجه له هو صح انه مزيون ورزه والي يشوفه مايقول عنه بالأربعينات بس حتى كانت راسمه لها خيالات حلوه مع زوج المستقبل وعن اول لليله بعرسها بس كل هذا تبخر اول ماملكت على غانم

قطع عليها تليفونها كانت عهد

نور بحب:هلا عهد
عهد :هلا فيج اشلونج
نوربتنهد:بخير الحمد لله
واخذتهن السوالف وبعد ساعه

عهد بعجله عمها وصل وبتطلع له:مع سلامه نور وانا بحاول ازورج ان شالله بس يرضى عمي
نوربترحاب:حياج الله بآي وقت
وسكرت منها وحست بالجوع فقررت تنزل تاكل

اول مانزلت وجت بتروح صوب المطبخ شافت امها طالعه من المطبخ ومعها الخدامه بصينية فطايروشاي
نور بشفاحه:يابعد عمري جنج حاسه فيني اني ميته جوع

امهابحزم وهي تبعد يدين نور عن الصينيه:روحي للمطبخ اخذي هذا لغانم وسعود
نور منقهره امها تحب غانم وولده اكثر من عيالها حتى: عناد باخذ من حقه
ومدت يدها واخذت فطيره واجلست وقالت بغرور:كان ودي اخذه كله بس لان سعود هالمسكين بتركه لهم

ولا غنوم خساره فيه
امها مشت وقالت بتنهد:امشي ياريتا تأشرلخدامه وكملت:مابي اتكلم معاج لان الكلام معج فاضي

نور حمقت وراحت للمطبخ بتأكل ابرك لها

لان لايمكن احد يوقف بوجه امها قدام الدفاع عن غانم

في بيت فواز

دخلوا البيت وكان بستقبالهم ندى

عهد كانت تدعي من مشت من بيت ام فارس ماتبي تجربتها في بيت حصه تنعاد وترجع تعذب من جديد
ندى بحزم:حي الله من جانا
عهد بتخوف:الله يحيج
فواز بأهتمام:حبيبتي دلي عهد على غرفتها وخلي الخدم يجهزون العشا

وكمل وهو يلتفت لعهد:روحي لغرفتج ارتاحي على مايجهز العشا
ندى برود:تعالي اوديج لغرفتج
عهد بتحفظ :ان شالله راحت مع ندى وفواز اشر للخدامه تصعد شناطها فوق

هو حاس بالحزن على حال عهد مايبي يبتلش فيها فوافق على زواجها من سند على طول مع انه عارف برفض سند
بس كان يبي يرتاح من مسوليتها بس الله ماكتب لها ورجعت له
وصار مسوؤل عنها من جديد

اما عند عهد وصلتها ندى لغرفتها وكانت غرفة نوم وفيها حمام كانت على زاوية لظيوف اذا جاو لهم
ندى برود:اخذي راحتج واذا خلص العشا بناديج
عهد بأرتباك:مشكوره ماقصرتي بس لاتنطروني على العشا ماشتهي
ندى بأصرار:تبين عمج يزفني واذا موحابه تنزلي بطرشه لج هنيه
عهد بخجل:لا خلاص بنزل
لفت ندى بتطلع وقفها كلام عهد: لو سمحتي حست بالخجل هي حتى اسمها ماتذكره ولا ام شنو
ندى :اسمي ندى او قولي لي ام فيصل
عهد بتوتر:عاشت الأسامي بس انا كنت بسأل اذا تكلمي عمي وتقولين له عن دوامي لان من باجر عندي دوام

ندى برود:ان شالله بكلمه
وطلعت ندى ماهي معارضه على عيشتها عندهم بس كانت متخوفه من ان فواز يلتفت لها وينساها هي وعياله بس الي وضح لها من البدايه ان فواز مايبها تجي عنده ولايبي يتحمل مسؤليتها لانها بنت اخوه الي تبروا منه بسبب عمايله السوده

هي حست من بداية شوفتها لعهد بعرسها انها طيبه ولاهي راعية ألسان مثل ماتقول حصه لفواز دايم
بس خايفه انها تمثل عليها الطيبه وبعدين تكشف عنها القناع مثل ماسوت مع حصه
ماتدري ان حصه الي ظالمه لانها قليل ماتختلط معها وندى من النوع الصعب الي موبسرعه يختلط بالناس فكانت بالنادر تروح لأهل فواز

انزلت تحت ولقت فواز متسند على الكنب ومغطي عيونه
كسر خاطرها اكيد تعبان اشغاله زايده ماتخلص دوام وتصليح بيت والحين موضوع بنت اخوه عهد

مشت له بشويش ولماوصلت عند راسه اجلست على ركبها ومسحت راسه بخفه وقالت بهمس :حبيبي
فواز بأرهاق:ها
ندى بنفس الأسلوب ونفس الطريقه:تعبان امش لغرفتنا ارتاح
وكملت بضيق:انت على قعدتك من الصبح
فواز رفع راسه وألتفت لها قال بحب وهو ذايب فيهاوفي حنانها الزايد:خلاص بس امشي معاي ولي نمت روحي
ندى متفشله اشلون وعيالها وعشاهم ولا عهد الضيفه الي توها ماتأقلمت
عليهم قالت برجا وهي تمسح خده:حبي انت روح ارتاح وانا اوعدك اول مااخلص عشا عيالنا وبنت اخوك اجيك
فواز بضيق:يووه نسيت ان عندنا ضيوف
وقرب لها وباس خدها وقال بخبث:بحاول اقاوم النوم وانطرك بس استعجلي
ندى بخجل:ان شالله
اعتدل فواز وقعد وقال بتنهد وهو يرفع ندى ويقعدها على فخوذه:مشتاق لج حدي من جينا وحنا كل واحد منشغل عن الثاني
ندى بحب انا اكثر ياقلبي بس استحت تقول وقالت:عسى الله لايفرقنا قول أمين
فواز قرب بيبوسها بشفايفها ولا تسمع ندى صوت نعول جاي صوبهم فلحقت نفسها وبعدت بسرعه
فواز كان غاط ولاسمع قال بقهر:ندى متى بتخلين هالحركات وكمل بحزم:تعالي ببوسك
ندى غاصت بهدومها من الفشله وخاصة ان عهد دخلت على هالكلمه
عهد تلاحقت الموقف وقالت بخجل:سوري قطعت عليكم لامت نفسها لانها جت كان قعدت ابرك لها بس هم لزموا ألا تنزل تعشا وهذا هي خربت عليهم
ماكانت تبي تقطع خلوتهم
فواز بحيا بس تدارك الموقف قال:حياج ياعهد تعالي
ندى بخجل:بروح اشوف الخدم يجهزون العشا
فواز:احسبي حسابي بتعشا معاكم
طار عنه النوم وبيجلس مع ندى لين ماينامون

عهد اجلست بنا على طلبه ولا قدرت تنطق بحرف حاسه بالخجل
خاصة وان الي صار رجعها بذاكرتها لورا قبل ماتطلق من سند لما باسها غصب عنها هذي هي الشي الوحيد الي حصلته من سند ولو ان بوسته كانت بوقت مومناسب بس مازالت محتفظه فيها بعقلها
قطع عليها صوت فواز:انتي راجعه تشتغلين ممرضه
عهدبتوتر:اي
فواز بحزم:وليش كان عليك ناقص ولاسند مايصرف عليك اساسا
خاف من هالشي لان لوكان صج بيكون سند نذل وحقير بعينه
عهد بتخوف:لا هذا ولاذاك بس انا ابي اعتمد على نفسي

قال بنرفزه: بهالوظيفه الخايسه انا ماارضى انك تشتغلي هالشغله ماتصلح لبنت مثلك

عهد حزبخاطرها كلامه خاصة كلمة بنت حست انه عارف بنوع علاقتها هي وسند

قالت:هذا تخصصي وبعدين انا توظفت في مستشفى ثاني وعند دكتوره يعني ماختلط بالرجال حيل
ارتاح شوي ولو انه معارض قال بأهتمام:اذا تطيعيني اتركي شغلك وانا اعطيك كثر الراتب الي تاخذينه

عهد بأرتباك لانها مصره ألا تشتغل:اسمح لي ياعمي بس انا ابي وظيفتي وماقدر اتركها مهما كان
ووقفت وكملت بضيق:انا طالعه فوق احس اني نعسانه بنام كانت بتهرب منه تحس انه بيفرض عليها جبروته مثل ماكانت حصه تسوي
فواز بجفاف:اتركي عنك الدلع اذا قصدك الشغل خلاص براحتك داومي بس اجلسي تعشي
جت بترد بس وقفها دخلت ندى الي قالت:العشا جاهز تعالوا وطلعت ووقف فواز واشر لها تمشي وهي راحت معه حست براحه وستبشرت خير في قعدتها عنده لان معامله فواز لها غير عن حصه

صح انه مابين لها حبه بس كان رحوم وعطوف عليها عكس اخته تماما

عند سحر

عشت اعيالها وجهزتهم عشان ينامون
كانت منسدحه بينهم وتقص عليهم قصه
سمعت صوت مسج توقعته عهد هي ملزمه عليها تطمنها لو بمسج
افتحته بس انصدمت كان من خالد
وزاد صدمتها كلامه

كان يقول تجهز نفسها هي وعيالها ساعه وجاي ياخذهم

ماتدري شتسوي الوقت متأخر وامها نامت فشله تروح بدون لاتسلم عليها

بس ماتدري هي منقهره ولا فرحانه لان روحتها معه اسعدتها خاصة وانها اشتاقت له حيل
ومنقهره من تصرفه هذا قطع عليها صوت ولدها
براءه:يمه قولي شنو صار
كان يقصد القصه وسحر تخرعت بس ابسرعه استوعبت قالت بحب:حبايبي بروح اكلم بابا دقايق واجيكم
عادل وعبود براءه اقعدوا وقالوا:بنكلم بابا
عبود على وشك الصياح:ماما بكلم بابا
انصدمت اعيالها متعلقين بأبوهم اكثر منها صح يحبونها بس تحس حبهم لخالد اكثر توقعت انهم تعلقوا فيه حيل هالفتره بسبب حملها فكانت حيل منشغله عنهم
ارسلت له رساله وقالت لعيالها:بابا الحين جاي قلت له انكم تبونه
انقزوا من الفرحه وهي اضحكت على اشكالهم وبعده جاها مسج وافتحته هي كانت مرسله له انها موافقه وحبت تشوف شنو ارسل

بس كانت عهد (حبيبتي ابشرج انا بخير وعمي فواز وزوجته احسهم طيبين حيل قولي لأمي عشان لاتحاتي)
سحر افرحت وكانت على وشك النقزه مع عيالها بس امسكت نفسها لانها تذكرت حملها

وقفت وقالت لعيالها:قوموا ابوكم جا بروح لبيتنا
اعيالها طاروا من الفرحه وهي راحت تنادي خدامتها

اوصلوا بيتهم وطول الوقت وخالد مانطق معها بأي حرف بس كان يتحاشاها ومندمج مع عياله واهبالهم

هو حاس انه تمادى معها ذاك اليوم وبعد تركه لها طول هالأسبوع عند امها وبدون لا يكلمها
عشان جذي قرر يخذها من بيت اهلها بدون لايشاورها وبهالوقت المتأخر عشان يوضح لها حبه وشوقه بدون لايعتذر لان الأعتذار عنده صعب

دخلوا البيت وكان شايل عبود وعادل شايلته الخدامه ناموا بالسياره مومتعودين على السهر
راحوا بيصعدون فوق لغرفة العيال
سحر بأهتمام للخدامه:فصخي نعالهم
وكملت:وانتبهي لتكيف الغرفه لايكون بارد
هي ناويه تأكد من كل هذا بس مو الحين لي جت تنام لانها الحين بترتاح بالصاله تحت
حاسه برود في علاقتها مع خالد وماعجبها تعامله معها بس ماتبي تناقشه لان لو بتناقشه بيعصب و يمكن تضيع حياتهم ومستقبل عيالهم

صعد ولده وراح بدل ملابسه ونزل بيشوفها
ويحاول انه يعتذر بأسلوب غير مباشر

هي كانت مندمجه تراسل عهد وبعد ماخلصت قررت تصعد تنام ذبحها ظهرها من القعده
وقفت بتعب وهي حاسه بتعب نفسي اكثر من الجسدي
لفت ولا يصدمها وجوده من متى كان هنيه

محد قدر ينطق والكل ينطر الثاني يبدأ بس مافي أمل وقررت سحر تروح مرت من عنده بتصعد بس هو اعترض طريقها وقفها بيده

كان ماسكها بذراعها لفت بتشوف ودها ترجع علاقتها بخالد الي قبل ماتدري شنو الي قلب حاله
اول ماطاحت عينها بعينه قرب منها وشالها بخفه وهو يقول: خليني اوصلك تعب عليك الصعده
سحر بضيق:نزلني اقدر اصعد
كانت على وشك الصياح
خالد طنشها وقال بيقهرها:مراح انزلك وادري انك مغتاره من شيلتي لعبود فقلت اطيب خاطرك واشيلك
ماحست بنفسها ودفنت راسها برقبته وقعدت تشهق

عند شهد

طفشت من قعدته الطبيب وسمح لها تطلع بس ماترهق نفسها حيل وتتم على ظهرها وقت اطول عشان يثبت الحمل
كانت فرحانه بجية امهاوفجر عندهم
وطول الوقت فجر ماتفارقها بس جالسه يمها بالسرير وحاضنتها
كسرت خاطرها حيل افقدتهم وزعلت عليهم بس بالموت راضوها

لحت على امها تجلس اسبوع ثاني بس ارفضت حمد الي جايبها مستعجل بيرجع وقررت ترجع معه
اما فجر فبتجلس معهم لان جلستهم مطوله ومايبون يخلونها خاصة وان الحمل صار وبس باقي مراجعات الحمل مع شهد اما فهد فماعنده شي فبيهتم بفجر

شهد حاسه بالوحده امها اليوم رجعت وفهد طلع يوصلهم للمطار
كانت نايمه وجنبها فجر الي بسابع نومه
شافت فهد الي جا ابتسمت له
فهد ببتسامه بعد ماسلم:نامت

شهد :اي فديتها وكملت بحب: مارضت تنام ألا بحضني
فهد بضحكه :افا يعني انا مالي مكان اليوم
شهد بضحكه:لا بنتي اولى منك

فهد بخبث وهو يبدل ملابسه ويلبس له بجامه نوم:هين ياشهد
وجا صوبها وشال فجر بخفه وشهد كانت ميته ضحك على هبال فهد
وبعد ماحط فجر بالسرير الي حاطينه لها قرب منها وانسدح جنبها وقال بخبث:ها بنتك اولى ياشهد
وقرب لها وحضنها بخفه عشان الحمل وشهد مازالت تضحك قالت بدلع:خلاص وابوها بعد

عند سحر تركها خالد بالغرفه ودخل يبدل وهي تمت على السرير كانت تشهاق بصمت وهي منسدحه على طرف

بعد فتره طلع وكان ماخذ له شاور ولاف عليه الفوطه
اول ماشافها تنهد بضيق لي متى وده انها ترضى عنه خلاص مل من كثر ماهم بعاد عن بعض جا وجلس جنبها مسح على ظهرها قال بحب: سحر
سحر بصياح جلست وبعدته عنها بجفاف قالت: ابعد عني لا تلمسني

ماتدري ليش انفعلت بهالشكل كانت تبيه يراضيها مو يطنشها جذي

خالد بضيق: حبيبتي أشفيج علي وكمل بأسف:سامحيني ياعمري لو كان الغلط مني
سحر بشهاق:اي منك ناسي وش مسوي صارلك اسبوع محتقرني كأني مرتكبه جريمه بحقك
وكملت بصياح وهي تمسح دموعها:ابي اعرف بس وش الذنب الي سويته
كسرت خاطره ولام نفسه حيل قال بحنان وهو يسحبها ويحضنها غصب:ماسويتي شي وانا الي اسف وقعد يزيد من حضنه لها وهي كانت تقاومه بس هو كان٠اقوى منها

كان يبيها تهدأ وترتاح لان الحين ماهو وقت تفاهم
بعد ماستكانت بصدره كانت تستنشق ريحة شامبوالجسم الي فايحه منه

هدت شوي وماحست ألا بشفايف خالد الي طبعت بوسته على جبهتها رفع راسها عن صدره وقال بشوق: مشتاق لك
سحر بخجل وبين دموعها:انا اكثر
خالد حط اصبعه على شفايفها كانت على وشك الصياح بعد بس هو تدارك وقال:اوش مابي صياح وكمل بخبث:خلينا بسالفة الشوق احسن

اليوم الثاني

حاسه براحه نفسيه لانها حست ان معاناتها مع حصه خلصت وبجلستها عند فواز مراح تقدر حصه تأذيها لان فواز ماهو مثل سند حاروعصبي

صحت مبجر وخذت شاور وألبست بتلحق على الدوام

اول مانزلت شافت فواز وندى قاعدين يفطرون
حاسه بالغيره منهم تمنت لو حياتها مع سند بهالشكل
بس طبعا مستحيل هالشي

عهد بحيا وهي داخله عليهم:سلام عليكم

فوازوندى ردوا السلام وكمل فواز برود:مصره انك تشتغلي
عهد برجا:عمي ارجوك لاتضغط علي

فوازبطفش:خلاص بكيفك وقالت بتخوف :مشكور بس ابي منك خدمه بسيطه
ممكن
فواز:قولي اذا اقدر مراح اقصر
فواز ماهومثل حصه وانه ممكن يعذب بنت سالم الي فضحهم بين الناس لان هالسالفه خلصت مر عليها خمس وعشرين سنه ومعضم الناس نست هالشي

بس هو كان خايف من غيرة ندى لي سكنت عهد عنده
بس الي يشوفه انها ماغارت عليه مثل ماتغير عليه من حصه واستغرب هالشي
عهد بنفس الاسلوب:ابي اشتري لي سياره وابيك تساعدني في اخذ الرخصه

فواز بتفهم :خلاص مومشكله وكمل بنرفزه: بس مو لي صارت السياره تحت امرك باجر قمتي تطلعين بدون أذن ماتطلعين من هالباب ألا بأذني مفهوم

خايف تمرد وتجيب لنفسها الكلام كافي عليها لقب مطلقه عهد بطاعه:ان شالله
وجلست تفطر عشان تروح لدوامها
هي عارفه بحرصه عليها وعلى سمعتها فماعارضت الي يقوله
فواز برود وهو يقوم:انا انطرك بالمجلس عشان اوديك
عهد بأستعجال:اصلا انا مخلصه وجاهزه ووقفت
ندى بأهتمام:مافطرتي كملي اكلك وفواز ينطرك ماعنده شي
عهد بحب:والله شبعانه وكملت بود:ماقصرتي ياندى وطلعت مع فواز وندى راحت تكمل نومتها
دام ماعندها شي وخاصة انها امس سهرانه ^_^