شبكة همس الشوق - عرض مشاركة واحدة - فوق الجروح اللي بقلبي من سنين يكفي دخيل الله لا تجرحوني

9 - 2 - 2015, 08:26 PM

عند فواز

حس بالراحه بعد ماكلمه سند وتطمن على عهد بس مراح تكمل راحتة ألا بعد مايشوفها هو بنفسه ولان سند كان ناوي يمرهم عشان اغراض عهد واوراقها الرسميه

فقرر ياخذ ندى من بيت حصه على استعجال ويرجعون لبيتهم قبل وصول عهد

ندى بعتب وهي تدخل البيت مع فواز:
انت راضي انها تسافر معه وبروحها لف عليها فواز وقال بضيق:شاسوي هو زوجها وانا مالي سلطه عليها الحين
قالت بقهر:صارله فوق الشهرين مطلقها ولادرا عنها والحين جاي وياخذها بارده مبرده

قطع عليه صوت الباب قال:هذا هم وصلوا
وكمل بضيق:صكي الموضوع
وطلع يفتح لهم

سند قبل لا يطق الباب عطى عهد محاضره طويله عريضه في اي اسلوب او معارضه تسويها عند فواز

وهي طنشته ماكان يهمها شي من الي قاله هي خلاص صارت عدم ولاتعتبر لوجودها اي قيمه في هالحياه

حتى دراستها قررت تنساها لان ماهي قادره تحقق حلم امها وهذا مضايقها حيل بس لانها تعتبر عهد بنت ضحى ماتت بحضن سند امس
فما تلوم نفسها لي تركت تحقيق حلم امها

ولانه بقربه لها خلاها إنسانه متحطمه كل احاسيسها ومشاعرها

أنسلخت روحها عن جسدها بأمواجه المتلاطمه من كل الجهات

انفتح الباب وقبل لاينطق سند بحرف انطلق فواز وعهد نفس الشي وحضنوا بعض

بعد فتره
بعد مادخلوا و عقب السلام الحار الي حاوط عهد من عمهاومرته وكان فواز مازال حاضن عهد بذراعه
ومجلسها جنبه وقال بثقه وهو يتفحصها ويركز بكل شي:اذا ماد يده عليك قولي لي والله ل
قاطعه سند بنرفزه:الزم حدودك وكمل بغرور:وبعدين شايفني حقير لهدرجه عشان افرد عضلاتي على حرمه

اي حقير ونذل وجبان وسافل ياسند ياليتك ذبحتني بالطق ولا سويت الي سويته ياليتك بس٠

سند بنفس الاسلوب وعيونه تحرق عهد حراق من كثر الخز : وبعدين في احد عنده هالقمر ويضربه كان يقولها بسخريه بس بداخله صادق وحالف لو شنو سوت مايطقها ابد

فواز بستغراب من صمت عهد قال: عهد اشفيك ليش ساكته من دخلتي

زادت رغبتها بالصمت عقب كلام سند لانها حاسه انه يتمصخر عليها وانها راح اتشوف منه انواع الضرب لانه سبق وهانت عليه وضربها بدون رحمه
خافت على فواز لايتخرع قالت بهمس لدرجة ان سند ماقدر يسمعه:ابد سلامتك مافيني شي وقالت بحب : عمي راح اشتاق لك حيل انت وندى وماحست ألا وهو يضمها بقوه
عشان تحس بالأمان
عهد بدلع وهي تهمس:عمي ترا ندى بدت تغار فكني شوفها شلون تخزك

و فعلا في احد غيران منهم بس مو ندى لانها فرحانه بعهد اكثر من فواز
كان سندوقال بغيره :قومي شوفي اغراضك وجهزيهم على ماروح ادور لنا حجز
وطلع بسرعه لانه تأثر بالموقف واشلون عهد متشدده بفواز كأنها تحتمي فيه عنه

بس الي زاد قهره همسها كان يبي يعرف وش قالت له بس لأسف ماسمع شي

بعد فتره وعهد تحط كل اغراضها ومعها ندى كانت تناقشها بكل شي بس عهد كانت ترد وبتحفظ ماتبي تفضح نفسهم اكثر بين اهلهم

خلاص الله كاتب لها الذل طول حياتها وانها تعيش ذليله لسند وامه فماتبي تقاوم او تعترض او تطلب العون من احد بتواجهه هي بنفسها كل شي لان كل هذا مانفع معها قبل بالعكس زاد من لعانة حصه وحقدها

وخاصة ان سند بكل الحالات يساندها ابتسمت بقهر وقالت اسم على مسمى ياسند

ندى بنرفزه وهي ترد على فواز الي دق ولا حست عهد:نعم وش جايبها

على طول فكر عهد راح لحصه وفعلا طلع صح جايه تشوفها وتطمن عليها

عهد بدون احساس وبرجفه بعد ماعلمتها ندى: ندى تكفين مابي اشوفها قولي طلعت عهد كانت ناويه فعلا تطلع من باب الخدم
ندى بستغراب:بس سند عندها تحت وبتعرف انج هنيه وهو الي قايل انزلي

عهد بضيق :انا بتم هنيه على ماتروح

اجلست على سريرها ندى بحب وهي تجلس يمها :خلاص انا بنزل وبحاول اشغلهم عنج لين ماتذلف هالحصه

عهد برجا عساها تذلف صج وتفكني مابي اشوفها ان شافتني معناه انها حققت وعدها وراح اتشوفني بالشكل الي هي تمناه مذلوله وكسيره

شافت ندى اطلعت ونسدحت وهي حاسه بضيقه بصدرها ورغبه بالصياح بس تخاف احد يحس
بدون احساس كانت تضغط على مخدتها بقوه كانت شوي وتنغرس اظافرها داخلهم
لان مر بخيالها فعايل سند معها

اه ياسند كرهتني فيك وانا الي كنت اعشق اترابك
بتنفيذك لطلب امك ولمره الثانيه وعلى احساب تعاستي خليتني احتقر حتى اطالعك
بالأول عذرتك ولأنك شرحت لي وضعك
بس هالمره وش عذرك خاصة عقب لليلة امس

كان في دمعه خانتها وانزلت وامسحتها بسرعه بس صدمها مسكت يد
كانت ناويه تمسح دمعتها اول
عهد بخوف ماحست بدخولها ابد ولا تدري اشلون ادخلت ومتى
ابعدت يدها عنها بشمئزاز وجلست
حصه انطحن قلبها طحان عقب هالمنظر خاصة شوفة نظرة الحزن الي كاسيتها

انخرطت بالصياح وقالت:ادري انج اأ كارهت ني بس تكفين سامحيني
حلليني انااأ
ماقدرت تكمل كان ودها تصرح لها عن سبب العداوه
عهد انصدمت ولا نطقت بحرف كل الي سوته اوقفت بعد ماشافت ان الجلسه طالت تركت لها المكان

حصه رمت نفسها وتمت تصيح وتحسر على حال عهد الي هي سبب تعاسته

اما عهد فأول مره تشوف حصه بهالمنظر عمرها ماتوقعت انها حساسه كانت تحس ان احساس حصه معدوم اصلا
كانت نازله ولا هي منتبهه فصدمت بجسم صلب وكانت بطيح بس هو مسكها بحرص
اول مااستوعبت وعرفت من ابعدت عنه

قربه صار مقرف لها جسمه الي تمنت حضنه صار نار ولهيب لها
سند برتباك كان حاب انه مايبعد بس طريقتها اقهرته ولان البيت فيه ناس :خلصتي اغراضك

عهد ماتبي ترد فرحمها الله بالخدم كانوا ينزلون اشناطها هي موصيه ندى تقول لهم

سند مانطر الأجابه عقب شاف الشناط قال برود: قبل نمشي سلمتي على امي
تسأل عنك

عهد ودها تذبحه هي ماتحملته هو عشان تحمل امه لاويبيني اسلم عليها
تمت تهلوس من داخلها وقطع عليها

صوت حصه
الي انزلت وسمعت اخر حوار قالت بتنهد:اي يمه سلمت عليها

وكملت بضيق وهي تمسح راس عهد عقب وصلت لها: ماوصيك دير بالك على عهد وتراها امانه برقبتك

سند تعجب بس ماحب ينزل من قدر امه قدام عهد ويسأل وعهد حست انها بتنخرس صج مو كذب بعد ماسمعت وشافت حصه اشلون تكلم لو بتحلف انها تمثل جان حلفت بس الصياح الي فوق واثار الحزن الي كاسيها وش معناه

بس هم ماشفع لها عند عهد ولا حست بأي لوم او رحمه لها لان الي شافته مو شويه قررت تترك المكان وبتستمر تترك وتبعد عن اي مكان تكون فيه حصه
بس كلام سند ارغمها توقف وتسمع قال برود:لاتحاتين عهد بعيوني وان شالله كل مااحصل اجازه راح اجي اناوياها

حصه بضيق:ان شالله

عهد بقلبها عسى الله يموتني ورتاح منكم الأثنين

عند شهد وفهد

كانوا بالمطار يستعدون لرجعه لديارهم الي ذبحهم الشوق لها

فهد بحب:ارسلت لسند وقلت له عن رجعتنا وعدني مايقول لاحد
شهد بضيق:ليش مو انا قايله لاتقول لأحد حتى سند

فهد بضحكه:ياقلبي اضطريت اقوله عشان يجي ياخذنا مابي ادفع سعر الأجره

بس فهد بداخله كان خايف ان سند يسافر صج وهم ماشفوه لان سند كان قايل له يدور له هو وزوجته حجز مستعجل بما ان فهد يشتغل بالسفريات وخبره في هالشي

فعشان جذي قاله وطلب منه يأجل عشان خاطر شهد الي فرحانه انهم بيجتمعون ثاني

اركبوا الطياره وكانت فجر بينهم بالوسط ولافه صوب ابوها الي يحاول يشغلها لين لحظه الأقلاع

شهد تأملت شكلهم ماتدري شكثر تحمل بقلبها من حب وشوق لهالشخصين فجروابوها

حست برفسه افزعتها بس كانت بتضحك وكأن الي في بطنها يذكرها فيه وانه هو بعد محتاج هالحب وراح يكون له نصيب منه

قعدت تحسس بطنها بحنان
وهي تطمنه انه بتسوي المستحيل عشانه فهو جزء مشترك بينها وبين فهد حبيبها
وكل شي يربطها بفهد تعشقه

الكل استغرب قراره المفاجئ وانه بيجلس يومين بعد ماكان مستعد لطيران بعد ساعه

اعتذر بشغل ضروري بس ماصدقوا سند اذا بغى الشي لازم يسويه واشغاله محدده باليوم والساعه مافيها جدال ولا فيها اشغال مفاجئه جذي

طلب من الخدم ترجع شناط عهد فوق

واصلا عهد اكثر وحده افرحت حست براحه على الأقل بتشوف فواز وندى بهاليومين قبل رحلة الظلام الي في بالها

اصعدت لغرفتها٠٠٠واعتذرت عن الأكل بس ندى مارضت وارسلت أكلها فوق

كلت لها شوي بس عشان خاطر ندى ولاهي نفسها مسدوده من كل شي

بعد ماخلصت ادخلت تبدل وتسبح للمره الثالثه فهي تسبحت في الشاليه وتسبحت اول ماجت ونزلت ملابس شهد الي عطاها سند والحين بعد عقب ماكانت متجهزه لسفر وتأجل قررت تسبح وتحط راسها وتنام كانت حاسه بنقراف من نفسها ومن جسمها عقب لمس سند

اطلعت بجمامه رمادي بنقش وردي كانت ساتره حيل
بس جسم عهد الساحر يلفت النظر حتى بالساتر

افتحت شعرها الي مبلول وكان ينساب لي لفخذها
اتركته عشان يجف وراحت انسدحت بتنام

اول ماحطت راسها صحاها صوت صكة الباب اعتدلت تشوف من
فنصدمت كان سند وش جايبه لغرفتي بعد لايكون غير رايه وبنسافر

حاولت ماتهتم ورجعت تنام
وهي مرتبكه وجوده معها وبغرفتها يوترها
قام تنفسها يسرع وبشكل ملحوظ
وهالشي ماغاب عن سند ابد
فصخ ثوبه ونسدح بالطرف الثاني عنها

لف صوبها وقال برود وهو يمسح شعرها الرطب:قومي جففي شعرك بيحوشك برد من التكيف
عهد برجفه وبقلبها احسن
ماتدري بخوفه عليها
وماردت وعرف انها طنشته مع انه مايحب هالأسلوب بعمره ماحد تجرأ يطنشه او يقهره ويستفزه بس هالعهد استباحت كل هالأمور

من دخلت حياته

بدون شعور وكأن عواطفه هي الي تقوده لها قرب وحضنها من ورا قال بذوبان وهو يستنشق ريحة شعرها الي فتنه من اول لقاء له فيها كان اكثر شي جذبه هو يموت بالشعر الطويل: ترا كنت ناوي ارجع معاك لشاليه عشان اقدر أدبك بعيد عنهم بس قلت حرام خل تفرح بهاليومين

كمل بقهرمن صدها وبرودها وهو يزيد من ضغطه عليها كأنه ناوي يكسر عظامها وعهد مابينت اي ردت فعل بس فاجأها برجعة شهد وعرفت ليش سفرهم تأجل :وترا مو عشانك عشان فجر وامها الي جايين اليوم

اقدرت تبلع غصتها وتسكت بس الي ماقدرت له هي مقاومة سند الي كان ناوي عليها بالعذاب

كان حاس انه ضعيف عندها وانها تقدر تكسر راسه وتلخبط كل اموره
بالأول اقدرت تكسر قراره في رفضه لزواج وانفرضت عليه

وحاول قدر الأمكان انه ماينجذب لها او ينساب في تيار انوثتها
بس هاهي تهزمه وللمره الألف في كل شي

دفن راسه بشعرها الرطب وتنهد بعمق وبحزن لي متى بتعذب معاك ياعهد حرام عليك ارحميني

كان ينطق بداخله وده لو تحس وتسمع

الساعه ست المغرب

عند فواز

كان بالمجلس مجهز قهوه من بعد العصرو ينطر نزول سند

قعديتقهوى مع ندى ويسولفون
ندى بأهتمام: مو جنه سند طول في غرفة عهد
فواز بنرفزه :وانتي شعليك فيه رجال ومرته
كمل بغضب:حريم
ندى بقهر: ثمن كلامك حبيبي
وبعدين انا مالي شغل بولد حصوه ماهمني الي احاتيه هاليتيمه الي قافل عليها عنده
احسه ذ
قاطعها
فواز بقهر:ندى

حطت يدها بفمها وكملت:خلاص توبه
خافت لاتكبر السالفه وطريقتها ضحكت فواز
وبدلت غضبه سعاده
يعشق حرصها على رضاه

عند نور

دخل عليها غانم شافها تحاتي وفي يدها التيلفون

غانم بحب بعد ماسلم:اشفيك ياقلبي
قالت بتنهد:عهد ياغانم ادق عليها من امس ماترد وقلبي ناغزني اخاف فيها شي

غانم وهو يجلس جنبها ويحضنها:سلامة قلبك ياقلبي

وكمل وهو يمسح على خدها بيده:هالعهد هذي حيل احسدها احسك تهتمين فيها وتحبينها اكثر مني حتى وضغط على خشمها بأصابعه

نور بصدق: لا غنوم حبيبي كل شي ألا عهد
كملت بتنهد:عهد بالنسبه لي بنتي الي ماولدتها او اختي الصغيره هالبنت من شفتها داخله علي شفت السعاده

غانم بغيره: بنتك من منو اعترفي من ابوها
نور بضحكه:انت طبعا

في غرفة عهد

ملت من كثر ماهي كاتمه مشاعرها وصامته بالأخير قررت تبعد عنه لو بالغصب

ارفعت نفسها بتقوم بس هو كان اسبق منها ومنعها

انقهرت تبي تخنقه عشان يموت وترتاح منه
قال بنعاس:كم صارت الساعه

عهد اخ يستعبط ويمثل النوم هو عارف بالوقت اصلا من قدر ينام فينا

اوف دفت يده بكل قوه وبعدتها عنها وقامت

مرت اخذت لها روب ودخلت الحمام

اما هو فجلس على السرير عقب غادرت عهد السرير حس بالبرد كان متنعم بالدفء في قربها

حاس بخجل من نفسه اشلون نسى الجماعه الي تحت خاصه وانه في بيت فواز
تنهد بقهر:هو الي يجلس مع عهد يذكر احد

كمل بثقه:انا زين مانسيت صلاتي بسبتها

مد يده لأرض اخذ فنيلته لبسها وقام

كان ينطرها تطلع

عشان يقولها عن قراره بيبعد عنها ويتركها ترتاح عند فواز لين مايسافرون

كان عنده احساس انه بهالتصرف بيخليها تشتاق وتحس فيه

عهد اطلعت بالروب ولفت صوب التسريحه بدون لاتناقشه او تطالعه حتى

كانت تشغل نفسها وتوترها من نظراته بتجفيف شعرها بالأستشوار
تعمدت تعلي عليه عشان ينزعج ويبعد بس صدمها موقفه طفأ البلاك بدون اي نقاش وقال بثقل وغرور: شوفي لي فوطه بتسبح

عهد انقهرت ونزلت الي بيدها وراحت تجيب له فوطه بس يذلف ويتركها

اليوم الثاني

الساعه ثمان الصبح

وصل للمطار على الموعد وفعلا اعلنوا عن وصول رحلتهم

سند الي كان جاي لفهد واهله
هومن طلع من عند عهد امس مادق عليها ولافكر يكلمها حتى كأنه يعاقب نفسه قبل لا يعاقبها هي او يحتقرها

ماقدر ينام اصلا حس بالشوق لها لدرجه الجنون بس صارع هالشي عشان لاتنكسر شخصيته عندها اكثر مما هي منكسره

أليا ذكرتك من حلا النوم
فزيت
وخليت باقي النوم للي
يبونه

قطع عليه تفكيره بعهد شوفته لشهد وفهد الي شايل فجر نايمه

ابتسم وراح لهم بخطوات مستعجله عشان يشيل فجر عنه

عند نور

كانت تكلم عهد ماصدقت نفسها اول ماشافت اسم عهد يضوي بشاشتها

عهد حست بالوم وانها لازم ماتخوف الناس الي يعزونها ويعتبرونها وحده منهم

فقررت تكلم نور اول وبعده سحروام فارس

نور بوله صادق ماخلت كلمة شوق وحب مااطربت عهد فيها لدرجة ان غانم اول مادخل وشافها تكلم استغرب وحاشه غيره ولماعرف انها عهد ضحك وطلع عنها: عهد خليني اشوفج

كملت :شوفي اي مكان انا ماعندي مانع
عهد بضيق :ليش ماتخلينه عندي بيت عمي تعالي صدقيني راح تفرح ندى لي عرفت

نور ببتسامه:خلاص بس اقرر اقول لج
ابي اشوفج قبل يخطفج هالسند
قالتها بضيق
لان عهد عطتها معلومه عن الي صار لها وانه سبب غيبتها

عهد بتنهد:مافي اقرر لازم تجين

اليوم الي بعده
في بيت حصه

الكل مجتمع بمناسبه رجعة شهد وزوجها حتى فواز جا ومعاه ندى

بس عهد ارفضت تروح ولا عارضوا رغبتها

مع انها متشوقه لشوفة شهد
بس مستحيل تطب بيت حصه

سهام بضحكه تكلم شهد: شوفي حبيبتي مو باجر اعيالج ياخذون الجو عن عيالي ترا ماسمح لج
شهد بثقه:حبيبتي شنوجاب اعيالنا حنا المزايين لعيالكم الجياكر
سهام بقهر:عدال ذابحج زين فهد
شهد بنفس الطريقه والأسلوب:فديته يهبل
الكل ضحك عليهم

٠

بعد مافضا البيت وجلست بروحها لان عيال فواز راحوا عند جدتهم

حست بالوحده وهي صارت تكره الوحده عقب جت عند اهل ابوها وتعرفت على شهد وندى وسهام

حاولت تشغل نفسها باي شي اجلست على التلفزيون عل وعساه يشغلها عن سند

بس مانفع لان غياب سند عنها من ذاك اليوم شاغلها صح انه اسعدها بس في شي يمنع سعادتها ويقول لها سعادتج هي قربه

وليس بعده
تمددت على الكنبه وضمت نفسها لانها حاسه بالبرد وتمنت حضن امها عندها يدفيها

دارت بفكارها وعيونها على الفلم بس تركيزها مومعه وبالأخير قطع سرحانها صوت المسج

افتحته بسرعه تمنت انه من سند لو فيه كلام جارح بس يطمنها انه بخير
بس طلعت من نور تبي عنوان بيت فواز
افرحت اخيرأ قررت الست نور وارسلت العنوان بسرعه وراحت تجهز لزيارة نور

اما سند فكان معهم بالجسد بس_ _ _ اما الفكر
والروح بعد معها كان جالس بالمجلس ومقابل له فهد الي قال بخبث وقطع سرحانه: الحبيب وين سارح

وغمز له

كمل حمد بلعانه: في بنت الخال

سند بغضب اخرسهم وبصوت هامس عشان لاحد يسمع من الظيوف:احشموا نفسكم لاقوم اسطركم
قبال الرجال

فهد بغصه:تسويها مو بعيده عنك
حمد مات ضحك وسند ابتسم من كلام فهد

اما عند الحريم

بسبب الحمل وتعبه كانت امها مجهزه لها غرفه تحت

وكان عندها البنات سهام الي داخله التاسع

وندى وساره حماة شهد أخت فهد

ساره بسعاده:شوفي ترا نبي ولد هالمره ملينا من دلع البنات

شهد بحب:فديت البنات انا
سهام بتأييد:اي والله انا اتمنى اجيب بنوته

شهد :كل مايجي من الله خير وبركه
وكملت :ألا ندى عهد ليش ماجت مشتاقه لها موت

ندى بتوتر:تعبانه شوي وماقدرت تجي

شهد ماتعرف بتفاصيل رجعة سند لعهد

وتوقعت عدم جية عهد لبيت اهلها خوف من ذكريات العذاب الي عاشتها في هالبيت

فهي مقرره تزورها متى مافضت
بس الي ماتعرفه بعد ان عهد بتسافر بعد يومين

ماهو قادر يتحمل الوساويس الي ارهقته من كثر ماهو يحاتيها صار لها فوق الاربع ايام مختفيه ولا ترد على تيلفونها

حتى الجامعه دقت عليه هو بعد مايأست من عهد في انها ترد وكانو يبونها تجي تستلم جدول المحاضرات

وهو راح لهم واستلم الجدول وقرر يروح لبيت عمها بنفسه ويطمن عليها وعشان يعطيها الجدول

كان جالس في مكتبه وتارك كل اشغاله وساهي في بنت ضحى
الي يعتبر نفسه مسؤول عنها لانها جزء من ضحى

بعد فتره دق تيلفونه شافه ابتسم كانت بنته وحبيبة منال رد بحب
ناصر:هلا بشيخة البنات
منال بدلع:هلا بابي وكملت بنفس الدلع:بابي حبيبي متى بتجي
ناصر كان ناوي يطلع من دوامه سيده لبيت فواز بس اتصال منال وسوالها منعه: كلها ساعه وجاي ان شالله
كمل بتنهد:ليش بغيتي شي

منال بفخر:لا بس بغيت الدكتور ناصر يعطيني رايه بأخر لوحاتي

منال من هواة الرسم وناصر يشجع موهبتها
قال بحب:ان شالله بس اخلص راح اجي على طول

مراح ينفذ قراره بروحته لبيت فواز اليوم فترك الروحه لباجر

عند عهد

حست ان روحها هدت شوي عقب جية نور
خاصه وان نور ماخذه راحتها دام البيت فاضي وقاعده تقول لعهد عن مواقفها العوجه مع غانم

وان حملها غير اسلوبها وصارت تحترمه غصب عنها

عهد ماتحسدها بس تمنى لو هي تعيش لو جزء بسيط من السعاده الي الكل ذاقها ألا هي من اطلعت على هالدنيا

ماشافت يوم سعيد

تنهدت بحزن وقالت بنفسها اللهم لاعتراض على حكمك

نور بقهر:تدرين خاطري اذبح سند وافكج منه
ابتسمت بحزن وقالت:واذا انسجنتي بسبتي من بيفكني من ثار غانم
قالت بأستسلام:مادري من قهري قمت اخربط

وكملت :متى سفركم بالضبط
عهد:مادري على كلامه لي اخر مره قال بعد يومين
نور بصدمه :شنو بعد يومين يعني اكيد باجر
موقلتي ماشفتيه من قبل امس٠

عهد بضيق:مادري مادري وفكينا من هالطاري خلينا باي شي غير سند

نور بحنان :خلاص على امرج وكملت:
ألا شخبار سحر من زمان قاطعه
عهد :ياحياتي تعبها الولادة وتدرين هي في النفاس

نور حاشه خوف:الله يسهل علي وعليها
وعهد لاحظت بس ماوضحت لان ماعندها خلفيه عن هالامور
وحست برعب لو حملت اشلون بتصرف او وش بتسوي وهي بغربا مع سند

تمنت ماتحمل ابد لانها لايمكن تحب طفل ابوه سند
حتى لو هو ولدها من أحشاها

حاولت تدخل بموضوع ثاني بعيد عن الوساوس

عند سند

كان سارح وعشان محد يضايقه او يزعجه جلس بروحه في جناحه طول الوقت يتقلب مو قادر تغفى عينه من التفكير فيها
وده يسمع لو صوتها بس في داخله شي يمنعه يتنزل لها

ابعد الفكر المزعج وقرر يتصل والي يصير يصير بس يرتاح باله

عدل نفسه ودق وهو حاس بلهفه وشوق لسماع صوتها
الي انحرم منه صارله ايام

ماتدري انها بالأسلوب تذبح سند وتزيد من عذابه

ظل يدق ويدق ويدق

بس
ماحصل رد

عاود الأتصال عشر مرات بدون فايده خمن انها نايمه وقرر يدق على فواز احسن

اما هي فكانت تشوف الأتصال وعارفه الرقم بس حبت تطنش مع انها مشتاقه
لسماع صوته موت
حطته صامت وكملت جلستها مع نور خاصة وان ندى رجعت وحلوة الجلسه اكثر
في نظرها
بعد فتره
قهرها ماكان يبطل راحت نور وهي صعدت تنام بعد ماانشغلت ندى بعيالها
وهو بعده مصر يكلمها
حذفت جهازها ودخلت تبدل

وطنشته

ولا هي خايفه من وش ممكن يسوي فيها
تبلدت احاسيسها اتجاه سند وصارت ماتخاف من اي ردة فعل ممكن يسويها

بعد مااخذت ساعه في الحمام تاخذحمام عطور تريحها وتبعث في جسمها الأنتعاش من جديد

اطلعت وهي منتعشه لأخر حد كانت تنشف شعرها فسمعت صوت مسج جاي لها

نزلت المنشفه واخذت تيلفونها تفتحها كانت توقع انها نور

بس انصدمت كانت من سند وفيه نوع من التهديد لها

هي صح تمادت في تطنيشها لان فوق العشر دقات ولاردت
بدون شعور اكتبت له

(اسمح لي نسيت اقولك أن ألساني مايخاطب ألسانك فلاتعب حالك في انك تخاطبني)
ماتدري شلون جتها الشجاعه ونطقت هي صح موضعيفه خاصة قدام سند كانت تجيها قوه وشجاعه هي نفسها تستغرب منها
بس عقب رسالة الي كاتب فيها(ردي احسن لك من اني اجي لك بهالوقت واخذك غصب ادري انك قاعده فواز قالي)

رسالته ذكرتها بأخذته لها لشاليهه وذكرتها بالليله السوده الي قضتها معه

انفجع
انصدم
اندهش
كل علامات التعجب والدهشه بانت على وجهه

شتقول وش تقصد بكلامها انها بتقهرني اذا تمت ساكته ولا ترد علي

حب انه يقهرها زياده ورد عليها (يكون احسن بس جهزي حالك بمرك قبل موعدنا بساعه عشان تسلمي على شهد قبل نسافرهذا الي كنت داق اقوله ولايروح فكرك بعيد على اني داق اتغزل مثلا)

حذف جهازه ورد انسدح وده ينام عشان يوقف عن التفكير فيها

عند حصه

بعد ماالبيت فضا والضيوف مشوا

اجلست هي وشهد وسهام الي مندمجات بالسوالف عن الحمل
وهي طفشانه من سوالفهم

كانت تفكر بعهد وش حالها
وشنو الي خلاها صامته جذي شنو الي سواه سند

طق
هو كذا مره طقها بس كانت تزيد من قوتها وعنادها ولا تستسلم

ودها تسأل سند بس ماتجرأ سند من بد اعيالها كلهم تخاف منه
فشلون اذا صرحت له عن فعايلها الكاذبه

حست فيها شهد وقالت:يمه اشفيج

حصه بحزن:مافيني شي وكملت بغصه وهي تقوم بتروح تنام:بس حاسه بصداع وبدخل انام

اتركت المكان وشهد مانزلت عينها عنها قالت بضيق:امي مو عاجبتني احس فيها شي

سهام بتنهد:من سالفة رجعة سند وعهد وهي جذي

شهد بصدمه:رجعة سند
كملت :ليش هو سند رجع عهد

سهام بخوف وارتباك:اي رجعها صارلهم اربع ايام

شهد صح فرحانه بس حتى ولو عهد ماتستاهل سند دامه بهالتعقيد

قالت بقهر:ورجعها برضاها ولا غصب

سهام بنفس الأسلوب :لا بالغصب
وكملت بغضب: هارب فيها يوم كامل والكل يحاتي حتى امج خافت بس عقب شنو عقب ماطاح الفاس طلع احساسها قالتها بسخريه

بالموت غفت عينه عقب الأرهاق والتعب بس مايمدي يرتاح في نومه ألا وجاه الصوت المزعج

قعد وعصب من الي يتجرأ ويزعجه وبهالوقت كانت الساعه وحده بالليل

قام وراح بيفتح له وكان مجهز لصراخ بوجهه الي جاي مهما كان او وش كان يبي بيهاوشه

فتح وقال بغضب وهو مستغرب صعدت شهد:نعم

شهد نساها أمر عهد تعبها ولزوم الراحه قالت بقهر وهي تعداه وتدخل بدون لاتستأذن حتى لانها ماتبي احد يسمع: اقدر اعرف بسر رجعتك لعهد

اليوم انصدم بما فيه الكفايه فصار مايستبعد اي شي حتى من فجر الطفله
قال بنرفزه:لو مو حامل جان عرفت ارد عليك لانك مو قد هالسوال الحين

شهد بغضب:سند لاتجنني انت شتبي بعهد دامك بهالتعقيد

سند سكر الباب وقال بغضب: اي عقد ياشهد

قالت بصراخ:انت ادرى وترا ماسمح لك تعذب عهد كافي الي جاها منك ومن امك

وكملت :اترك البنت بحالها
سند ماهو مصدق شهد حاسه بكل شي وساكته
ولا ان عهد شاكيه لها معقوله
جلس بكرسي منفرد وقال برودعشان يهدي شهد الي مومن صالحهاالصراخ وهو بداخله يفور فور من الغضب:اجلسي وقولي لي عهد شكت لك

شهد بتنهدوبعد ماجلست :من غير لاتشكي الكل شايف وحاس
قال بشك:بشنو مثلا

شهد بخوف:بعلاقتك فيها وانك ماتبي زوجه عقب سعاد

بتنهد وهو وده يكسر راسها وراس عهد الي فضحت امره بس توعد لها بسفرهم : بس انغصبت وتزوجت عهد وكمل برود:مع اني كنت رافض وانتي عارفه بس ضغطت على نفسي وعطيت عهد كل حقوقها٠

بنزفزه قالت: لاتلعب اي حقوق هذي انت مهر ماعطيتها ولا ناسي

انغرس فيه خنجر من كلامها لانه فعلا ماعطاها حقها بعد المتعه
هو قبل رافض لانه مستحيل يلمسها اما الحين لا
قال بصراخ وغضب:شهد اطلعي برا اا
قبل لا اسوي شي مايعجبك

قالت بخوف وبكي:سند انا حاسه فيك ولا الومك بس حتى ولو عهد من حقها تزوج وتجيب اطفال مثلنا

قال بغضب:براا ماتسمعين
اطلعت وصكت الباب بقوه وهو تم يفور غضب

حاس نفسه لئيم وحقير الي استخسر بعهد مهر حالها حال اي عروس
ضرب راسه بيده من الغضب
وفجأه قرر يطلع حاس روحه بتطلع لو جلس

الساعه اربع الصبح

سمعت طق باب غرفتها اقعدت وابتسمت اكيد فواز يقعدها لصلاة كالعاده

قالت بنعاس:قاعده عمي قاعده

قامت بتوقف بس استغربت فتحت الباب ولفت شافت عمها وجهه مشحوب قالت:عسى ماشر اشفيك
فواز الي خرعه سند وغضبه ولا قدر يمنعه من انه يكلمها بهالوقت
قال:سند تحت اخليه يصعد
عهد بخوف:لا وش يبي باقي على سفرنا كانت خايفه لايكون جاي يعاقبها على المسج
فواز بيأس:مارضى و
قاطعه سند الي دخل عليهم عقب عرفت ندى بوجوده واجلست بغرفتها بنا على طلب فواز:عهد بدون نقاش جهزي اغراضك وامشي معي
فواز بقهر:انت ماتخذها ألا بالغصب ياخي تعدل لو مره وحسس البنت بأهتمامك

عهد بغت تبطها ضحك اي اهتمام ياعمي قول احترام اول راضيه فيه
بس مو كل ماجته رغبه جاني طاير
قال :عهد ممكن تمشين معاي قالها برجا وهم عبالهم سخريه عهد هزت راسها ودخلت توضا تصلي وبعده تشوف شغلها

اما فواز فترك المكان وسند قعد يسكر الشناط الي شافهم جاهزات
اطلعت عهد وشافته استغربت بس من داخلها منقهره لانها موعارفه وين بتروح
وكارهه رضوخها لكل تصرفاته العوجا

قال بعد مالف صوبها:انطرك تحت وبنزل شناطك معاي

ومشا صوب الباب ومعاه شنطتين لعهد بس وقفه صوتها
الهامس والي فيه نبرة خوف

عهد الي خايفه انه ياخذها لذاك المكان الي تكره ذكراه عندها تحمل بيت حصه ولا تروح لشاليه :لاتوديني لذاك المكان

سند حس بضيق قال:اي مكان
عهد بنفس الاسلوب:الشاليه

وراحت بتصلي وهو حاول يكتم ضيقته ويطلع استحقر نفسه على اسلوبه معاها
بس داخله شي يشجعه ويقول هذا الي لازم يصير من زمان
وهو لازم يستقر دامه تقبل عهد كزوجه عقب الحبيبه سعاد