شبكة همس الشوق - عرض مشاركة واحدة - فوق الجروح اللي بقلبي من سنين يكفي دخيل الله لا تجرحوني

9 - 2 - 2015, 08:33 PM

صحت وهي تحس بيد تحاوط خصرها افتحت اعيونها بشويش واعرفت انه سند حست بسعاده وانها بحلم حلو وما ودها تقوم منه
تمت ساكنه بمكانها ماتحركت وهي تحس بدفا يده عليها بعد فتره طويله قررت تقوم
خاصة وان الوقت طاف وهي ماصلت الفجر
لامت سند الي ماقومها ماهي عادته دايم يحرص انه يقومها

بس الظاهر حتى هو ماصلى ياربي تغفر لنا
قامت وهي تسحب من يده بصعوبه ولفت صوبه قالت بتنهد بعد ماشافته غاط بالنوم: سند قوم
كملت بطفش:الصلاة خاف ربك على الأقل ألتزم بفرضك
اقصدت هالكلمه تبي تغيضه

يافتاح ياعليم يارزاق ياكريم
شتم على الصباح الناس تقوم على همسات ولمسات حنونه وانت ياسند تقوم على صراخ وشتايم
فتح اعيونه شاف ساعته كانت تسع تو الناس هو مانام ألا خمس وتعب يقومها بس ماقامت وبعد اضطر ياخذ اجازه اليوم عشان يرتاح ويطلع عهد لسوق طالعها بنظرات عتاب ورجع ينام وهو يغطي راسه بالمخده
عهد بقهر:كيفك الي بيحاسبك على ذنوبك ربي مو انا
جت بتوقف بس يد سند منعتها سحبها من كفها بعد ماابعد المخده
قربها لصدره حيل وكان يشعر بحرارة انفاسها ويسمع دقات قلبها
سند بجمود: صلاتي محافظ عليها قبل اعرف اشكالك
كانت طعنه بقلبها
وكمل بسخريه: وماهب انتي الي بتعلميني بفرضي يابنت الس
كانت طعنه ثانيه بس قاتله مميته
حس انه مو قادر ينطقها او ان ألسانه انشل عن نطقها هي مهما كان مالها ذنب وان كان ابوها شخص فاسد فهي لا كانت احرص مني على فرضها
عهد بنظرات قهر ماعمرها حست بالذل ولأهانه ألا عنده هو وامه حتى الناس الي عاشت معهم وشافوا عمايل ابوها محد منهم مسها بكلمه او قال عن اخلاقها شي كانوا يشهدون لحسن اخلاقها وأدبها
وهذا يرجع بعد الله لأمها الأنسانه الطاهر العفيفه الصابره على المصايب
بس محد منهم فكر ياخذج ياعهد ولا احد منهم طق بابك معناه ان غلطة ابوي بتم لاحقتني طول العمر قلت بحزن: كمل ليش سكت قولها يابنت السكران قولها

حاولت امسك ادموعي غصب ولا ابين له ضعفي قلت بجفاف وانا ابعد عنه : الله يساعدك ياسند اول مولود راح يجيك بيكون حفيد لسالم وانت اخبر مني بخالك
وكملت بتنهد:عشان جذي انصحك تتخلص م
سند دارت فيه الدنيا وسب نفسه ميته مره دايم يتهور ولايحاسب لأفعاله ألا بعد فوات الأوان بضيق: عهد انتي عارفه وش تقولين خافي ربك

عهد بخوف: اي عارفه وعارفه انه حرام
بس بس وماقدرت تمسك ادموعها الي انخرطت بكثره وراحت ركض ادخلت الحمام وهي تشهق من الصياح

سند ضرب راسه بقوه وكان يصرخ بداخله نذل وحقير ياسند

شكلها وانكسارها امرضه وتعب قلبه
قام ولحقها وقف عند الباب قال برجا:عهد انا اسف
عهد
ماكانت ترد او ماتبي ترد اجلست تشهق بصياح قطع قلب سند
كانت محتاجه لأمها خاصة بهالظروف الصعبه سند مو راحمها ابد ولا راح يرحمها قبل اعتذرت له ان كل فعايله بسبب امه بس الحين امه معادت معاهم وصارلها فتره مختفيه وساكته
بس مادري وش ورا سكوتك ياحصه اكيد دمار

الله يخلصني منك ياحقير
يمه ابي اكون عندك
يارب ساعدني
تقطع قلبها وبعد ساعه صياح قضتها بالحمام اقدرت توقف وكانت حاسه بثقل الحمل برز والطفل يكبر يوم عن يوم كانت تحس بكل تغير وتشوف مراحل نموه
تنهدت بضيق:ياترا بقدر اشوف مراحل نموك لي طلعت ولا لا

غسلت وامسحت اخر دمعه وطلعت

اما هو فضل واقف عند الباب ويترجاها تطلع وتفطر قلبه من كثر مايترجاها بس هي معانده

فقرر يروح يجلس بعيد عنها عشان تقدر تطلع

في مكان ثاني

عند سهام كانت معصبه من حمد من فعلته امس معاها لما ضحك عليها بالهديه والحين تبي تروح لجامعه مو راضي يقوم بتأخر على محاضرتها كالعاده ويزفونها الأساتذه

ابتسمت لسعد الي قام على صوتها وقعد يلعب بألعابه وهو يرسم لها احلى بتسامه بالوجود

شافت ان حمد مافيه فايده وقررت تسوي خطه
شالت سعد وبطحته على ظهر حمد العاري
وسعد من الوناسه قام يرافس ويصدر اصوات ازعجت حمد من ألعابه
حمد بنعاس:ياشيخ ازعجتنا
سهام وهي ماسكه سعد لايطيح قالت بغيض:احسن بطوف محاضرتي وانزف وانت نايم
حمد بشهامه وهو يعدل نفسه بعد ماشالت سهام سعد: افا حبيبتي سهام وام سعد تنزف
قالت بضيق:اي
حمد وهو يقرب منها ويبوسها:ماعاش ولا كان دقايق بس وراح اوديك باس سعد بقوه وراح ركض عشان لايتأخر

بعد ربع ساعه
انزلوا ومعاهم سعد الي يلعب بغترة ابوه
وكانت حصه جالسه ومجهزه الفطور
سلم حمد عليها وباس راسها وهي ردت بحب وكانت عينها على سعد تحس بسعاده بس يكون معاها
اخذته وقالت:افطروا
حمد بعجله وعينه على سهام:لا يمه مستعجل حبيبتي مابقى على محاظرتها شي

وطلعوا وحصه اندمجت بألعب مع سعد

عند عهد

بعد مااوهمت نفسها كالعاده ان سند كان صادق بكل حرف انطقه وان وجودها عنده مراح يستمر بس تولد له طفله راح يطلقها
كانت في افكار تعارضها وان سند يمكن يحبها او يتركها عنده عشان طفله وماهب مطلقها مثل ماتوهم

اشغلت نفسها بالترتيب والغسيل كانت هذي عادتها لي ضاقت اشخلت الشقه شخال ونظفتها

دخل عليها سند بغرفة الغسيل وهي ماعطته بال وكملت شغلها
كان حاس بمدى غلطته الكلام الي يقول كان اعظم من الطق عند عهد تمنت لو يطقها لليل نهار بس مايجرحها بهذا الشكل

سند بأرتباك: عهد انا
قاطعته بقهر: ممكن تسكر على الموضوع
قال بضيق: مو قبل مااعتذر لك انا صح غلطت
قالت بسخريه:ياكثر ماسمعتها منك
ماتحس بالخجل من نفسك
فعلا حس بالخجل كلامها حسسه بمدى صغره قدامها

ماقدر ينطق بس طلع وصفق الباب بقوه ارعبت عهد
قالت بنرفزه:وجع٠
وكملت شغلها ببتسامة نصر على اشفاها لانها ردت له الصاع صاعين وخلت سند العاقل والي الكل يهابه ويحسب له الف حساب ينقد على نفسه ويخجل قدامها

اما هو فبعد ماانجرح بالوريد من كلامها حب انه يبتعد طلع برا وراح يمشي وهو يحاول ينسى همومه كل ماحس ان هم انفرج رجع وانفتح له هم اكبر منه وصعب انه ينفرج

تنهد بضيق وألتفتت يتأمل وين وصل شاف انه بوسط محلات وكان قدامه اكبر محل ألعاب
بدون شعور حس برغبة في انه ياخذ ألعاب لعيال اخوانه ودخل
استقبله راعي المحل بسعاده وقام يعرض له ارقى الألعاب واثمنهن عشانه حس انه هامور عود من هوامير السوق

وسند ماقصر اخذ نص المحل لعيال شهد ولسعد والباقي بيحتفظ فيه لمولوده القادم
سوا كان ولد اوبنت مراح يقصر عليه بشي وبيسوي المستحيل عشانه لانه غالي خاصة وانه قطعه من عهد

اعطاهم عنوان البيت عشان يوصلونهم وطلع يكمل تسوق هو يحب الشراء وبعد هواشه مع عهد حط حرته بالتسويق

في الكويت

عند حصه
قررت تقول لعيالها شهد وحمد انها تبي تجهز الشاليهات ويطلعون فيها اسبوع في إجازه نصف السنه وبعد ماتخلص سهام من الأمتحانات

كان ودهايجتمعون ويستانسون من زمان ماطلعوا ولا سافروا

حصه وهي تكلم بوياسر حارس الشاليه
قالت بأهتمام:شوف يابوياسر ابي كل شي جاهز
في ظرف اسبوع ابيك تخلص الصبغ والأثاث
والجناح حق العيال ابيك تغيره مابي فيه شي قديم

قال بتوتر:حتى جناح استاذ سند
حصه بأصرار:اي حتى جناح سند

حصه في بالها من زمان انها تغير جناح سند الي عندها وتشيل كل اغراضه القديمه بس هو رافض وعشان جذي بس يجي الأسبوع الجاي راح تحاول فيه وبأصرار لين مايوافق
كافي عليه هالسنين وهو محتفظ بحاجات سعاد عنده كانت عارفه بس خوفها منه مسكتها
لكن الحين لازم يتخلى عن كل شي يذكره بسعاد عشان خاطر عهد

كانت تنطر الساعه الي بيجي فيها سند وعهد وعشان تقر عينها فيهم

ميته تكلمها بس كل مره يعتذر سند بأنها يانايمه او مشغوله بس هي بعدين اقنعت نفسها ولا اطلبت اتكلمها عارفه ان عهد كارهتها وبقوة ولا تلومتها الي سوته في عهد مو شويه
عيشتها بذل وظلم طول ماهي عندها
قررت تنتقم من ضحى بعهد بنتها
على خطفها لسالم وتغيره بعد ماتزوجها

تنهدت وطالعت ساعتها كانت سبع وحبت تدق على شهد وفواز تعطيهم خبر لطلعه
لان حمد عنده خبر بس باقي سند فراح اتقوله بعد مايجي عشان تكون مفاجئه لهم

الساعه تسع
طق الباب وراحت تفتح بعد ماألبست اجلال كانت خايفه سند من طلع العصر ماجأ ولا اتصل قهرها بطبعه ومو عادته
وقامت تدعي ربها يرجع بالسلامه

دخلو العمال ونزلو كومة اكياس اكبار وفيها اغراض
استغربت وسألت بس محد فهمها وسلموها الورقه شافتها بأسم سند وعنوانهم

اشكرتهم بلباقه وطلعوا سكرت الباب ونزلت اجلالها بتأفف
وبعده قررت اتشوف الأكياس دامها لسند

استغربت كان اغلبهم ألعاب اطفال
واحد كيس عطور ابتسمت سند يحب العطور والغرشه ماتاخذ عنده اسبوع
عطره مميز دايم حتى بفترة الوحام اسمع ان الحرمه تكره العطور بس انا لا كنت احب اشم المكان بالغرفه بعد مايتعطر سند ويطلع
صح اكره عطوري وانقرف منهم بس عطوره لا ومرات اتعطر من عطوره
دامه ماينام معاي كنت اخذ راحتي وهو ماحس

كان ودي افتحهم واشم ريحتهم بس استحيت يمكن مو له
يووو نسيت مو هو قالي بنسافر لأهلنا اكيد شاري هدايا لهم
كنت مستغربه ألعاب وعطور
صج نذل معناه ماهب مطلعني لسوق
كان ودي اروح من زمان مارحت من اول ماجينا رحت مره
وانعجبت باسواقهم حلوه وفخمه حيل
خاصة الملابس عندهم شي فوق الخيال
ودي اشتري لكل وحده نفنوف و عطر
اخ قهر

سند لف السوق وخلص بعض الأشيا وبعدين قرر يرجع حس بتعب وارهاق خاصة وانه على طلعته من العصر وتارك عهد بروحها
اول مادخل شاف عهد جالسه بالأرض وتشوف الأكياس
سند سلم وجا صوبها
عهد بخجل ردت وبعدين اوقفت وقالت: تبي احط لك شي تاكله
سند بأرهاق وهو يجلس:لا
وكمل وعيونه عليها: بعدك زعلانه

عهد بتنهد وعيونها تبعد عنه وتطالع بالأغراض: ماعتقد بيهمك اذا زعلت او رضيت

جا بيتكلم وقاطعته بجمود: خلنا بالأهم مو قلت بتوديني السوق ليش رحت وخلصت اغراضك عني

سند كان وده يخلصون من السالفه اول وبعدين تقول الي تبي
بس دمها معارضه تناقشه بيماشيها بالي تبي قال بتنهد: متى ماتبين انا جاهز
وكمل وهو يأشر على الأغراض :وبعدين من قالك خلصت هذولا بس ألعاب حق اعيال شهد وسعد ولد حمد

عهد استانست يعني ماشرا ألا حق الأطفال قالت برود:ابي اروح لمحل الألعاب باخذ لعيال سحر وبنت نور
وكملت :وعيال فواز شكلك ناسيهم استغربت انه ماجاب طاريهم مع ان الألعاب كثيره
سند كان جايب ألعاب زايده قال بجمود: انا زايد بالكميه اصلا اخذي الي تبين حتى لو بتوزعي على شارعنا بيكفي

وقف عشان يدخل يرتاح وقال بتنهد:انا داخل انام مابي عشا
كان دايخ امس مانام ألا متأخر واليوم صبحته عهد بهواش
فحب يدخل يغط بنوم عميق لعله ينسى لو شي بسيط من همومه
مر جنبها وهي اوقفت ساكنه كان كل واحد يخز الثاني ماحست ألا وسند يطبع بوسه على خدها
وتركها وراح تمت صامده وتحسست مكان بوسته افرحتها خلتها ترجف رجف من كثر مامشاعرها متلخبطه

اجلست بشويش وحاوطت بطنها بيدها وهي تفكر بسند وحياتهم اول النهار هواش وذباح وبس يغيبون فتره عن بعض يرجعون يتصافون كأن شي ماصار
ابتسمت وانسدحت وهي غارقه بفكارها نامت بهدوء

عند فواز

من امس يقنع بندى توافق على طلعة الشاليه بس هي رافضه رفض تام
خاصة وانها بتجلس اسبوع مع حصه راح تنجلط اكيد
فواز برجا:ندوش حياتي عشاني عشان اعيالنا بنونسهم
قالت بضجر:عشانك اسوي المستحيل بس هذا
قاطعها فواز قرب صوبها وحضنها قال: اعتبريه مستحيل وطيعيني ياحبيبي خل نستانس
كمل بحب وهو يبوس خشمها:ولا تنسي عهد بتجي بعد اصلا حصه مسويه هالجمعه عشان زيارة سند لنا بهالعطله
قالت بقهر:خلاص موافقه بس تأكد اي تحرش منا ولا منا من اختك راح اشيل قشي وامشي
فواز بضيق:وانا موافق
استسلمت له ووافقت عشان خاطره هي عشان فواز تسوي كل شي حتى الحمل صارت تراجع وتشوف سبب تأخر حملها وبدون لا فواز يعرف اكتشفت ان عندها ضعف بسبب المانع الي تاخذه وقررت تعالج

كل هذا تضحيه لفواز حبيبها

الساعه خمس

قام على المنبه يصلي واستغرب ان مكانها فاضي معناه مانامت جنبي تنهد بضيق صج انك ثور ياسند ذال البنت وقاهرها وتشرط لي اتركتك

دخل الحمام واغتسل وبعد مااخذ ساعه تحت الماي الدافي يزيح التعب والأرهاق عنه طلع بالروب
ولبس ملابسه وكبر يصلي
اول ماانهى صلاته قام بيشوف عهد ويقومها تصلي

مايبي تنعاد غلطة امس لما تركها
طلع يدورها استغرب ماهي بغرفة التلفزيون توقعها فيها كالعاده
وراح لصاله شاف الأغراض على حطتهم من امس وألتفت يدور وشاف عهد وكأنها حورية بحر الفاتنه الي وصفها الروات كانت ساحره وجذابه وكانت حاضنه نفسها تبحث عن الدفا لان ماكانت متغطيه

قرب عندها وقال بهمس ويده تمسح شعرها وخدها بخفه: حبي ماكمل حس انه خاين وانه يخون سعاد
شاف عهد افتحت اعيونها وكمل برود وهو يبعد:عهد قومي صلي
اوهمت نفسها انها تحلم وان سند مالمسها ولا همس لها بحب

عدلت نفسها وقامت كان يتأملها بصمت حس انه الحمل تعبها كانت بالموت تحرك وبركاده مع انها بالسادس بس سند حريص على صحة طفله ومايطوف كل شي يساعد على نموه حتى الحليب شرح لطبيب برفض عهد وعدم تقبلها له وصرف لها ادويه فيتامينات بديله لكالسيوم
قرب منها وحاوطها وساعدها على النهوض
عهد انصدمت من حركته كان ماسك خصرها بقوه وهي مسكت كتفه اوقفت عدل وقدرت تحكم بنفسها بس سند مازال حاضنها وهي بتروح تصلي قالت بهمس: ممكن اروح اصلي
سند توه يستوعب تركها:اي طبعا ومشت عهد رايحه عنه كان يتأملها
وهي احمدت ربها انه تركها ونحاشت قبل تنفضح مشاعرها قدامه ولا كان داخت بحضنه خاصة وان ريحة عطره فايحه بالصاله من اول مادخل

اليوم الثاني

عند شهد كانت جايه لأمها من الصبح عشان تروح مع امها لسوق ويشترون كل حاجات الطلعه
من مفارش وفرش واطقم مطابخ لطبخ
كل واحد اختارت له حصه من عيالها على ذوقها اما شهد بماانها معاها فقررت تختار بذوقها

ادخلو البيت بعد تعب دام اربع ساعات متتاليه بالسوق
شهد بتعب وهي ترمي نفسها بالكنبه:اه يارجولي
حصه :اي والله تعبنا بس الحمد لله الي خلصنا باقي بس الأشيا البسيطه وراح اطرش السايق يجيبهم
شهد تنادي بصوت:دينا
كانت خادمة اعيالها تبي تشوفهم حيل اهملتهم اليوم مو بالعاده
حصه بحنان:ارتاحي انتي ولاحقه على اعيالج
وضغطت جهاز مناداة الخدم عشان يجهزون لهم شي ياكلونه

دينا ومعاها طلول شهد او ماجت عندها خذت ولدها بحضنها قالت بحب:ياقلبي اهملتك اليوم
اسألت اذا شرب حليب وردت الخدامه وقالت لها ان فجر طلعت جا ابوها واخذها

شهد بقهربعد ماراحت الخدامه: ياربي هالبنت مدري متى بتكبر وتترك الدلع
الحين بيزفني فهد لاني ماخذتها معاي
حصه:لا تكبرين السالفه تلاقينها اطفشت المسكينه ودقت على ابوها يطلعها
شهد بضيق:ماخربها وكبر راسها ألا سند وانا وفهد الي تورطنا

حصه بتنهد:عسا الله يبلغني بشوفة ضناه واشوفه يدلعهم بعد
شهد بحب:أمين

بعد ماصلت الفجر ارجعت نامت بالسرير جنب سند كان قايم يقرأ قران
وعهد حطت راسها وعطته ظهرها تبي تنام بس صوته وترتيله ارغمها تقعد وتسمع

تنهد صوته هادي وحلو
اخذ فتره وقف قراءه وعهد غمضت عيونها تدعي النوم
حست بلمست يده على كتفها

ارتجفت وسمعته قال: مراح تطخين وتسامحيني
كان وده يسمع قبولها لعذره بس هي معانده وراكبه راسها وسند مايحب هالأشكال الي تغلآ وتكبر اسلوب عهد هذا اكد له سخافة اخلاقها وصغر عقلها
عهد ماردت وطنشته بس كانت فرحانه سند يلح عليها تسامحه معناته تعلق فيها

مايمدي فرحتها تكمل ألا وسند جارحها بالي اعظم: والله الشرهه علي الي عامل لك احساب واراضيك
كمل بسخريه:عمرك مارضيتي
وانسدح ونام وعهد صبت دموعها فرحها بس ماسرع ماذبح فرحتها

هذا هو مستحيل يتغير عصبي وحار بشكل
حاولت تنسى وتنام ابرك لها

الساعه حدعش

بالموت اقدرت تقوم من فراشها تحب النوم بشكل انتبهت لساعه وتنهدت مابقى على رجعة سند من الدوام شي
خل اقوم اجهز قهوته واشوف شنو اطبخ له
اخ ياسند على شين افعالك معاي ألا اني ماقصر بشي اتجاهك هذا لاني غبيه وطول عمري غبيه
حتى سحر كانت تزفني وتهاوشني على سذاجتي وسكوتي عن حقي في الشغل بس وش تبيني اسوي اذا كنت بلا سند ولامعين انا مالي ألا رب العباد
هو الي بياخذ حقي منهم كلهم
واولهم سند الزفت

على هالطاري انفتح الباب وكان هو سند نفسه فدخلت الحمام بسرعه ترش جسمها وتبدل عشان تنتعش بدال الكسل

اطلعت بالروب اخذت لها ثوب ابيض بورود زرقا لي نص الساق وكمه جبنيز وكانت فتحة الصدر واسعه حيل تضايقت عهد منها خاصة وان صدرها بارز بزياده مع الحمل كان شكله فظيع فأكيد بينتبهه سند لها

افتحت شعرها وقامت تسرحه
ودخل سند عليها سلم وردت برود كانت تشغل نفسها بالتمشيط ماتبي اتشوفه عقب زف اليوم الصبح توعدت له وياكثر ماتوعد بس ماتنجز من وعودها شي

سند اسحره شكلها واكثر شي شعرها كان واصل لي فخوذها

عهد انتبهت له كان فاتح فمه ومسرح فيها قالت بتغيضه وهي تمشط: افكر اقص شعري غثني
سند بصدمه:ششنو
وبسخريه:ماسمعت عيدي يامدام شنو بتقصين

كان منفعل بجد لانه يموت بشعرها وطوله
عهد بنفس الأسلوب وهي ترفع شعرها بجهته: افكر اقص هذا
استوعبت الحين

سند قرب ومسك شعرها وقال بقهر:هذا ماينقص وأذا ودك بالقص قصي ألسانك ابرك
دفته بقوه قالت: مالك خص ومتى مابغيت قصيته

وكملت بحقد وعشان تقهره:ولا اقول خل لين اولد احسن
وكملت وهي تمسح بطنها: عشان مايكون لك سلطه علي ذاك الوقت

سند انقهر وفار دمه بس ألتزم الصمت خاف يطلع بأعظم من الي امس
تركها وراح يبدل وهي ارفعت شعرها وراحت للمطبخ

انقهرت ليش مارد ليش سكت كانت تبي تعرف هل ممكن انه يطلقها او انها بتم على ذمته

بس هو كان اذكى من هذا وخلاها تصارع افكارها

بعد ماخلص لبس وتعطر طلع سمع صوتها بالمطبخ وراح
لها
دخل وشافها تجهز الغدا وكانت حاطه حرتها بالخضره كأنها سند وقاعده تقطعه بقسوه
قال بهدوء :اتجهزي بعد العصر بنطلع لسوق

عهد التزمت الصمت لو تكلمت انفجرت فماتبي تفتح فمها

ابرك لها وسند مانطر ايجابه اصلا بسرعه طلع لصاله وتركها