شبكة همس الشوق - عرض مشاركة واحدة - جددي فيني حياتي باللقاء للكاتبه وديمة العطا

1 - 4 - 2015, 01:18 PM

الجزء الخامس والثلاثون

في غرفة الضيوف تحت كان سعيد راقد ورافع ريله وتحتها خمس مخدات ابتسمت الريم اول ما شافت شكل ريله..وحطت يدها على
فمها مانعه ضحكتها من التوقيعات الي موقعنها غنوم على ريل سعيد
تمت اطالعه وقلبها ايدق هذا اهو حبيبها الي اشتاقت له وايد
سعيد نايم بثوبه وازرار ثوبه مفتوحه وخصايل شعره نازله من جدام على جبينه
قعدت الريم قريب امنه تتامله تتامل حبيب الطفوله الي من يوم كانت صغيره وهيه تكن له مشاعر غير
عن الباقي كانو دائما يلعبون وكان دائما سعيد يختارها اتكون عروسه خبيث من يوم كان صغير
هيه ما نست هذيج الايام ودائما اتشوفه اهو غير كان ايدافع عنها يختارها عروسته او الممرضه الي تعالجه وكبرت الريم وكبر حب سعيد في قلبها
تنتظر دائما روحتهم لبيت خالتها او ييتهم الهم سعيد من بلغ سن البلوغ تغيرت افكاره ونسى سالفة الريم وانشغل
بافكار الشباب والحياه المقبلين عليها سيراته لبيت خالته قلت وحتى الايام الي يون فيها لابوظبي كثير كان كل اوقاته برا البيت
ولانه دائما تسمع سلمى وشما يتكلمون عنه كانت تفكر فيه وايد واذا درت انه موجود في مكان كانت اتروح وتراقبه من بعيد
شكله تغير وكبر وشكل اللحيه بدت تطلع فيه كل هالسنين الريم حب سعيد يكبر معاها وسعيد ماعنده خبر
واخر مره شافته قبل لا يخطبها كانت عندهم في البيت وكانت الصاله متروسه حريم وريايل
بعض البنات متغطيات ومن ضمنهن الريم يوم دخل سعيد وسلم على الكل وتم يمازح امه وخالته
كانت ماخذه راحتها واهيه اطالعه اهو ماكان يعرف من الي موجودات وبعدها بفتره خطبوها له
وكان شي مب في الحسبان وصلت سعادتها للسما ورفضت انها تطلع عنده من شدة خجلها وخوفها ان مشاعرها تفضحها حتى بعض الاحيان اذا كبس عليها اذا زارهم في العين كانت تتغطى
وتقنعه العاش ان هذي صديقتها بنت الجيران وهو كان وايد ايزورهم على امل ايشوفها واول مره شافها في لستور يوم فاجئها واغمي عليها
تنهدت الريم واهيه تتذكر الي صار الها عقب معاه والمشاكل والاحزان الي مرت ابها....الحمدلله هالحين وضحت الصوره
حزنت وايد عليه من الي سمعته ونوت اتعوضه بحياه ثانيه ما يتخيلها وبينها وبين نفسها قررت ماتفتح له موضوع
سلامه والي عرفته عنه...دامه ماتكلم خله على راحته
فتح سعيد عيونه واتفاجئ بالي قاعده اطالعه
سعيد:الرييم؟!!!!!!!!!!!ّ
رفع راسه عن المخده
الريم:خلك مكانك ارتاح
سعيد:انتي شو يابج؟
وقفت الريم:وان شالله تبانيه ارقد بروحيه فوق
سعيد:العاش مب عندج؟
الريم:العاش اتصل عليها ريلها وقالها تعالي وانا تميت بروحيه ولو ما انا ما اخاف جان بت بروحيه
تم سعيد ايطالعها ما يعرف شو يقول وهو يشوف عدالتها ولبسها الي دوخه
الريم بتوتر من نظراته:انا هالحين وين ببات وانته راقد على شبريه نفر ونص هذا غير ريلك الي ماخذه
نصف الشبريه
ماعرف شو يقولها
الريم:بشوف الكبت يمكن احصل اليه فيه فراش
فتحت الكبت وحصلت فراش خذته وفرشته قريب امنه
تم ايطالعها واهيه تستعد للرقاد
سعيد:يعني من الروع تنزلتي وييتي ترقدين اهنيه؟
حطت الريم راسها واهيه ملتفته لجهته:هممم
سعيد:يعني اذا احتجت شي في الليل ما اوعيج
الريم:ايكون احسن اصلا انته منو كنت بتطلب مساعدته؟
سعيد:بتصل على الطباخ ايي ايساعدنيه
الريم واهيه تنجلب على ظهرها واطالع سقف الغرفه:هالحين بتفهمنيه انك ما تقدر تتحرك بريل وحده
ليش ما تنقز على الثانيه
سعيد:وظهريه؟
اعتدلت الريم بسرعه ووضح الخوف في صوتها:شبلااه ظهرك
ابتسم سعيد:ظهريه ايعورنيه
الريم:انزين خلاص بساعدك امري لله
سعيد:ان شالله ما حدج على مساعدتيه وانتي ما تبين
التفتت الريم للجهه الثانيه عشان ماتفضح نفسها لان قلبها عورها عليه
حطت راسها وبعد شوي قعدت
الريم:سعييييد تسمع الي اسمعه؟
سعيد باستغراب لانه ما سمع شي:شووه؟
الريم:اسمع صوت ايخوف
سعيد مستغرب يعني شوايخوف:ما اسمع شي؟
وقفت الريم واقتربت امنه:اسمع هااه انا اسمعه يعني اجذب عليك؟
حاول سعيد يسمع زين لاكنه ما سمع:كيف اهو الصوت؟
الريم وعيونها ادور الصوت:هااه اسمع تسمع؟
ابتسم سعيد:صوت شووه يمكن انا متعود اسمع الصوت هذا واعرف اشووه اهو
الريم واهيه تمسك طرف لحافه وترفعه وبعدها واقفه قريب امنه:الصوت واضح انه شي ايخوف
انتفض قلبه واهو يشوف يدها الي ترفع اللحاف....اللــــــــــــــــــــــــه ناويه ترقد عداليه الحبيبه
سعيد:لحظه لحظه...خلينيه اسمع زين
تمت واقفه اطالعه
سعيد:اوف شو هالصوت تونيه سمعته
في خاطرها تبتسم لانه اخيرا فهم
الريم:تسمعه صدق؟
سعيد:صوت شوه هذا؟اول مره اسمعه
قعدت الريم عداله واهيه ترفع ريولها ادخلها عداله وهو يلز شوي عشان تاخذ مكانها عداله
الريم:يامييي انا خايفه
سعيد:افا ياذا العلم اتخافين وانا عندج؟
الريم:وانته شو بتسوي وريلك مكسوره
سعيد:والله انيه اقدر وايد اسوي تعالي بس انتي ارقدي
نامت الريم على يده مدعيه الخوف وهو يلفها بيده ويقربها امنه اكثر...اااااه يدري انها اتحبه
كل شي فيها ايقول انها اتحبه وما غصبها على الزواج الا وهو متاكد انها اتحبه
سعيد وهو يحضنها اكثر:خلك قريب ياراعي الصوت تحمل تروح بعيد
ابتسمت الريم وكبتت ضحكتها الي حس ابها سعيد واهيه في حضنه
سعيد:فديت انا الصوت وراعي الصوت
..................................................
دخلت العاش قسمها ونقز سهيل واقف ايشوفها وهو يحس بدقات قلبه بتفضحه
سهيل:ليش ييتي؟
العاش:الريم نزلت عند سعيد
تم واقف ايطالعها واهيه ارتبكت وما عرفت شو تسوي عقبها راحت للغرفه وهو واقف ايطالعها
تمت العاش في الغرفه فتره طويله وسهيل تاركنها بروحها وهو ينتظرها تطلع واهيه تنتظره يدخل
حست العاش انها بدت اتعصب امنه مسكت تيلفونها وقعدت اطالع الرسائل الي فيه وتمسح رسال حمده
الي من اصبحت واهيه اتطرش الها ابيات شعر فيها عتب ولوم وفراق والعاش متجاهلتنها
دخل سهيل وتم واقف منصدم انها مشغوله بالتيلفون
سهيل:انتي شو تسوين؟
رفعت له نظرها:ما شي
اتقرب منها وكانت توها اتريد تمسح الرساله..مد يده وخذ التيلفون تم واقف ايطالع الرساله والرسائل الثانيه
عقب وقف ايطالعها وفعيونه نظرات مافهمتها العاش...ايحس انه منقهر منها
سهيل:يامدام انتي هالحين متزوجه والحركات هذي اتركيها
العاش:شقصدك؟
سهيل:التيلفون هذا بشله وبيب لج تيلفون ورقم ثاني
العاش:بس انـــ...
سهيل بحده:بلا بس
سكتت عنه ونزلت راسها تحت
طلع من الغرفه صافق الباب وراه
نزلت دمعتها واهيه مقهوره امنه ومن حمده وسالفة رسالها...المشكله ان الرسائل كلها ابيات شعر
لين الساعات الاولى من الصباح والعاش ما ياها النوم وسهيل نفس الشي

فتح سعيد عيونه وشاف الريم الي رجعت ترقد في فراشها بعد ما ازعجها بحركاته وقبله طول الليل
سعيد:الريم
التفتت له:نعم
سعيد:وقف الصوت عشان ترجعين ترقدين تحت؟
الريم:هييييه
سعيد:صدق صدق ليش رحتي ترقدين تحت؟
الريم التفتت للجهه الثانيه وابتسمت:لانك وقح
سعيد:ههههه...فدييتج
الريم:ممكن تسكت اريد ارقد شويه
سعيد:ااااه وانا اريد ارقد والله
دقايق وراح سعيد في سابع نومه...قعدت الريم وقربت امنه
الريم:اخيرا رقدت
قامت الريم ولبست عباتها وقربت امنه وتمت اطالع ويهه قبلته على جبينه
الريم:فديت روحك
قامت والتفتت وتوها بتطلع
سعيد:الريم
وقفت منصدمه ومتروعه انه درا بالي سوته رجعت له
الريم:نعم
سعيد:وين بتروحين؟
الريم:باروح فوق ابدل
سعيد:وانا
الريم:انته شوووه؟
سعيد:بتخلينيه بروحيه
الريم:ياويليه عليك بيبي؟
سعيد بنظرات طفوليه هز راسه
الريم:شتريد؟
سعيد:مابتساعدينيه ؟
الريم:لاا
التفتت بتروح
سعيد:الريم
الريم:نعم
سعيد:احبج
الريم:لووووتي
طلعت وراحت فوق جمعت كل الاغراض الي تريدها وملابس سعيد وترست شنطتين وطلبت من الخدامات ينزلنهن تحت
بعدها لبست لبس مغربي جناان وتمكيجت ونزلت للمطبخ جهزت لسعيد الفطوروبخرت البيت اتحس بفرحه وشعور غريب
طلع سعيد للصاله متكي على عكازه وشاف امه في طريقه سلم عليها
ام سعيد:يامرحبا بالغالي ان شالله اصبحت اليوم بخير
سعيد وعيونه تلمحها عند طاولة الفطور:الحمدلله يالغاليه
ام سعيد:حياك اليوم حرمتك مسويه الريوق
قرب منها وهو يطالعها التفتت له وابتسمت رفع حواجبه واشارت لامه
سعيد:عشان اميه يعني
الريم:اكيد عشان منوه عيل
ابتسم سعيد وهو يتذكر شو سوت قبل لاتطلع

فتحت العاش عيونها وريحة عطر سهيل تارسه الغرفه قعدت بسرعه والتفتت ناحيته وشافته واقف جدام
المرايه وهو يعدل عقاله تلومت انها اتاخرت في النوم
العاش:كم الساعه؟
سهيل بطنازه:كملي رقادج الوقت بجير بعده
قامت واقفه:انته وين بتروح اصبر بسويلك ريوق
سهيل:ما يحتاي بنزل تحت اتريق
طلع وتركها وتمت اهيه واقفه ومتضايقه
نزل سهيل وحصل امه وسعيد واطلق صفير على ترتيب الريوق والبخور الي ايفوح
سعيد:هاااه معرسنا ماجنك ترقد وايد وانته الي كنت اتقوم من وقت
ابتسم سهيل وقعد متجاهل غلاسة سعيد اما الريم فراحت للغرفه الي باتو فيها
وغيرت من شكلها بالكامل بمساعدة الخدمات غيرت مكان السرير والتسريحه واضافت للغرفه لمساتها من مفارش وشموع
وشمعدانات واجرار نزلتهن من قسمها وسوت جو رهيب في الغرفه لانهم اكيد بيتمون طول فترة
ما سعيد ريله مجبسه حتى مفرش الزفه نزلته وعطرت الغرفه وبخرتها وعقب طلعت عندهم برا
كانت العاش نازله وسلمت على الريم والي شافتها اليوم غير شي غريب يشع من عيونها وفرحه
العاش:الريم اليوم انتي غيير اتجننين
الريم ابتسمت:اكيد غير هههه
كانت العاش لابسه فستان بسيط وحاطه مكياج بسيط دخلت مع الريم للغرفه الي صارت لسعيد والريم
العاش:اللـــــــــــــــــــه شو سويتي بالغرفه
الريم:حلووه؟
العاش:اتجنن
الريم:بتعجب سعيد؟
العاش:وليش ماتعجبه؟تعالي قوليليه اخبارج معاه
الريم:العاش سعيد ايجنن فديته الحمدلله ياربي
ابتسمت العاش فرحانه لاختها
العاش:الحمدلله
سمعت العاش والريم اصوات سهيل وسعيد عند الباب
وقفت العاش وعدلت عباتها ولفتها زين
دخل سعيد الي كان متكي على سهيل
سعيد:اوب سهيل اظني اننا مغلطين في الغرفه مب اهيه الي احيدها
سهيل:هااه ياريال اكيه حرمتك
الريم:حياكم تراها الااهيه الغرفه
سعيد تم ايطالع ترتيبات الغرفه وايحس بفرحه معقوله كل هذا مسواي اليه شو سالفتج يالريم
احس انج راضيه عنيه والله احس بنظراتج غيير
العاش:احم احنا بنطلع
طلعت العاش ولحقها سهيل الي وقفها في الممر
سهيل:تعالي انتي
التفتت له:شووه
سهيل:اشوف شو لابسه؟
انحرجت امنه
العاش:لابسه فستان
سهيل بصوت عالي شوي:اشوووف؟
كشفت العاش عن لبسها
رفع سهيل صبعه وهو ياشر لفوق
سهيل :روحي فوق وبدلي هالبس
العاش:هااه بس انا لابسه عباه
سهيل:وانا قلت سيري بدليه سكت الج البارحه بس اليوم مابسكت لبس فساتين ما اريد تحت
ومثي هالمكياج ماله داعي
نزلت العاش نظرها تحت متحقره امنه لاكنها قويه وما بتستسلم لدموعها جدامه رفعت راسها
العاش:ان شالله
مشت متخطيتنه وراحت لفوق
تم سهيل واقف وهو متضايق من نفسه بعدها راح وطلع من البيت
؟

سعيد وعيونه تتبع الريم الي تتحرك في الغرفه اترتب بقية عطوراتها
سعيد:يعني خلاص قررتي انتم اهنيه
الريم:عشان الدريول مسكين مافيه كل شوي وداك فوق
سعيد:وانتي
الريم:انا شبلانيه
سعيد:بتمين معايه؟
الريم:شو اسوي بخالوه قالت قعدي عند ريلج
سعيد:اااه يعني مش عشان الصوت البارحي؟
ابتسمت الريم وهيه مشغوله بترتيب العطور
الريم:اظن الصوت كان صوت الدروازه
سعيد:اااه اتصدقين حتى انا شكيت
سعيد حس بتغير الريم الي بدت تتعدل اكثر والابتسامه ماتفارق شفايفها لاكنها ما اعترفت له انها
راضيه بالي تسويه وكل شي اتسويه اتقوله انها مضطره اتسويه سعيد فهم الها وقام يلعب معاها نفس لعبتها
اتقرب منها واهيه واقفه عند التسريحه واهو يعكز على عكازته ترك العكازه قاصد
صرخ مستنجد بالريم الي التفتت بسرعه واتداركته لاكنه فقد توازنه وطاحو مع بعض على الارض وهو في حضنها
سعيد:اووه اسف عورتج؟
ارتبكت:انته اتعورت؟
سعيد:شويه ركبتيه عورتنيه بس مشكور انج ساعدتينيه
الريم:اوكيه ممكن اتقوم؟
سعيد:لاا قصدي ما اقدر يعني ما اعرف كيف اقوم؟
تمت اطالعه:ترانيه فاهمه هالحركات
سعيد باستعباط:اي حركات؟ صدق انا ما اقدر اتحرك ريليه ما تساعد
الريم:وشو خص ريلك؟ فيك ايدين تقدر اتساعد نفسك
سعيد بابتسامه خبيثه:ليش ماتريدين اتصدقين كيف اقوم يعني؟تبينيه انادي اميه ترا الباب مفتوح مش مقفول
شهقت الريم وسحبت نفسها بعيد عنه اعتدل اهو وطاح على ظهره وسحبها لحضنه قبل لاتبتعد
سعيد:هههه عنبوك يالروع ترانيه ريلج شو المشكله
سكتت الريم وبعدها مستسلمه لضمته
سعيد وهو ايزيد من ضمها:الريييم احسج اليوم غييير انتي راضيه عنيه
ابتسمت ورفع راسه ايطالع ويهها ويشوف ابتسامتها ودعست راسها اكثر في صدره
سعيد:ياويل حاااالك ياسعيد والله انها راضيه عنك فديت روحج
تمت الريم ساكته
سعيد:الريم سامحينيه على كل الي ياج منيه والله ما تستاهلين الي صار كله انا ادري انيه قسيت عليج ولعوزتج معايه بس انا عنديه اسبابيه
يمكن في يوم اقولج اياهن بس صدقينيه انتي الوحيده الي ملكتي القلب وكل البنات الي مرن في حياتيه ما
يعنن اليه شي
قرصته في صدره
سعيد:ااوج انتي اسمعينيه بس كل الي قلته لج من قبل نصه خراطه تذكرين البوكسات الي شفتيهن في غرفتيه وعليهن حرف الاس
بس اوعدينيه ما تقولين للعاش هذيلا كلهن حق سهيل انا ما اعرف السوالف هذي
انصدمت الريم من الي تسمعه ورفعت راسها اطالعه
سعيد:صدقينيه انا تلميذ عند سهيل راعي لمغازل الحقيقي
انا كانت اليه اهداف بس اهو رايح في عينها ومن حب العاش ترك كل هالسوالف لانها اشغلت قلبه من انه ايطالع غيرها
الله يصلحه دايمن بلاويه ايعقها عليه
رفعت الريم راسها اكثر وتمت اطالعه
الريم:صدق سعيد؟ يعني انته ماعندك اي علاقات
سعيد:ما بجذب عليج كانت علاقات الها اهداف بس كلهن والله مايسون التراب الي تمشين عليه
الريم بابتسامه:اتحبنيه؟
سعيد:يووووووووه الا اموووووت فيج الريم انا عنديه كلام وايد اريد اقوله لج
انتي ماتدرين شو سويتي فيه في الفتره الي فاتت...والله والله يالريم من اول يوم شفتج فيه في لستور وانا
احس شي ايصير في الي بين ضلوعيه
طالعته الريم:الي اهوه؟
سعيد:هذا هههههه اقصد قلبيه
الريم:بس انته جرحتنيه بكلامك هذاك اليوم في غرفتك
سعيد:لاتلومينيه فديتج كنت تونيه اعرفج وبصراحه ارتبشت وانا اشوفج اتصيحين وانتي ماتدرين عن البلا الي كان فيه
كانت فاهمه شو يقصد بس سوت عمرها مش فاهمه
الريم في محاوله اتغير الكلام:عيل سهيل هو الي طلع مغازلجي؟
سعيد:عنده دكتوراه فيها بس حاليا ترك كل شي في سبيل بنت دار الزين مثل مايقول
ام سعيد واهيه واقفه عند الباب:وااايه شمطيحنكم عند التواليت ماشي شبريه
عضت الريم شفايفها منحرجه
سعيد:امـــــــــــيه ههههههه ماتعرفين ادقين الباب
ام سعيد:عاده انا شدرانيه نسيت انكم اهنيه
قامت الريم بسرعه واهيه منحرجه ووجهت نظرات غاضبه لسعيد الي فطس من الضحك
سعيد:زين جذيه غيضتيبها انا ماهقيت امسكها
ام سعيد:تغربلت هذا وانته ريلك مكسوره اتسوي جذيه....
سعيد:هههههه كملي عيل وين لو ريليه مب مكسووره
الريم باحراج:سعييييد
سعيد وهو مازال طايح على الارض:ياقلب سعيد وروحه وعمره
انحرجت الريم اكثر وطالعت خالتها منحرجه
ام سعيد:الله ايعينج عليه بس...اسمحوليه عاده مره ثانيه بدق الباب
اما سهيل فالامور اتازمت عنده وصار يقضي اكثر اوقاته برا البيت مما احرج العاش الي لاحظ الكل انها بدت
اتقل عدالتها ولبسها صارعادي وكله بسبب اوامر سهيل...الليل كان يقضيه جدام التلفزون والصبح بعد ما تصحى العاش وتطلب امنه تنزل تحت
يدخل الغرفه ويرقد
الريم وسعيد عايشين الرومانسيه وهم مش معترفين بالي ايصير امبينهم طبعا وسعيد زايد الدلع حبتين
مر اسبوع وراح سهيل للدكتور وفتح عنه الجبس لان ايده مش مكسوره بس فيها شعره
الليله العاش لبست فستان رهيب وما كانت تدري ان فتح جبيرته وتعدلت بعد ما اقنعت نفسها انها لازم اتحل الوضع الي بينهم
اول ما دخل سهيل القسم وشافها صرخ عليها
سهيل :شووو هذا؟ اشوف كلاميه مب ماشي معاج
التفتت له العاش منصدمه من صريخه
سهيل:انا ما قلت ماريدج تلبسين اللبس هذا تحت
العاش:سهيل انا ما بنزل تحت
سهيل:لا والله وحق منوه لابسه هالبس؟
سكتت العاش واهيه اطالع تحت اتحاول واتحاول ماتنزل دموعها
رفعت راسها:خلاص بعقه
مرت من عداله ومسكها من يدها:حق منوه؟
رفعت راسها له:مب حق حد..ممكن اتخلينيه اروح ابدل
انتبهت اهنيه ليده الي مافيها جبس وكان ماسكنها ابها من قهرها امنه سحبت يدها بشويش وراحت لداخل الغرفه
بدلت وغسلت ويهها ودخلت في لفراش على طول
كل ماحست انها اتريد اتصيح تمنع نفسها مدعيه القوه وان مافي شي يستاهل انها اتصيح عشانه
تم سهيل ايطالع التلفزون وهو يفكر حق منوه متعدله معقوله حقيه اتريد يعني تقنعنيه انيه ارضى بالحال هذا كيف ارضى
وانا كل يوم توصلنيه على تيلفونها ابيات الشعر الي ادل على حال راعيهن وحمده هذي بعد تبالها اتكفيخ جانها صدق قاعده اطرش رسائله
دخل سهيل الغرفه وشافها في لفراش والنور مطفي تم قاعد عند طرف السرير بعدها قام وخلع ثوبه ودخل عدالها في لفراش
كان ايفكر وايفكر وتعب من التفكير
سهيل:العاااش
العاش:نعم
سهيل:واعيه؟
العاش:همممم
سهيل بعدفتره من السكوت:العاااش
العاش:نعم
سهيل:تعااالي
ومد يده الها الي حست ابها ماكانت تقدر تستحمل اكثر على طول لبة الدعوه وحضنها سهيل بقو
لين ما حس انها بدت اتصيح...اهنيه ما استحمل وصرخ عليها
سهيل:شبلاااااج؟
منعت نفسها من الصياح واهيه تشاهق
كمل صريخه:قووومي
اعتدلت العاش قاعده واهيه ترفع الفراش وانتحبت بصوت عالي واهيه حاطه ايديها على ويهها
فتح سهيل الابجوره وتم ايطالعها بنظرات معصبه وقعد مجابلنها
سهيل:شو الي ايصيحج هالحين؟
ماردت عليه وكملت صياح
سهيل:لحووووه يعني بس عشانيه ضميتج خلاص دريتي انج عايشه في الواقع
زاد اكثر صياحها الي قطع قلبه وزاد غيضه
سهيل:العاااش خلاص عاده شو تبينيه اسوي ...ادري انج مغصوبه وانج ماتريدينيه وقاعده تجبرين نفسج عليه
العاش:اسكـــــــــــت
سهيل:انا تفاجئت ان ابويه حيرج ولا انا خلاص شليتج من باليه بعد ما دريت ان..................
العاش:اسكــــــــــت اسكت انته كيف اتفكر فيه بهذا التفكير؟
تمت اتصيح وبين كلمه وكلمه تشهق
العاش:انا ياسهيل انا اتفكر فيه بهذا التفكير الحقير انا؟
تم ايطالعها وايريد يفهم شو قصدها رفعت له نظرها وعيونها محمره
العاش:انا ...انا؟ وانته اكثر واحد تدري انيه هب راعية هالسوالف
سهيل:انتي شو تقصدين؟
العاش بصوت عالي:انته كيف اتفكر انيه على علاقه بعوض هذا؟
كبت غيضه وتتكلم عنه بعد
سهيل:ادري ان مافي علاقه بينكم لاكن في مشاعر يدريبها كل واحد فيكم
العاش:اي مشاعر الي قاعد انته تتكلم عنها؟
سهيل وعيونه مفتوحه على وسعهن:تسئلينيه انا عنها؟
العاش:اسمع عاد انا خلاص ما اقدر استحمل اكثر من جذيه ولا اقدر استحمل نظرات التحقير الي قاعد اطالعنيه فيها
صاحت شوي
العاش:حرام عليك ياسهيل اتشك فيه انا انا عوض هذا والله ما اعرفه ولا اعرف شي عن مشاعره
ومابينا اي شي من الي انته اتفكر فيه
تم ايطالعها ايريد يستوعب شو تقول؟
العاش:حتى انا ياسهيل ما كنت ادري بالي ايصير والافكار السودا الي اوهمتك ابها.....حـ حمـ...الله ايسامحها
كل الي اعرفه انها قالتليه ان في واحد بيي ايخطبنيه واسمه عوض والله انا ما اعرفه ولا قلتلها انيه موافقه عليه
انا كنت رافضتنك لانيه ادري انها اتحبك
سهيل:منيه الي تحبنيه؟
العاش:اهيه حـ حممده
بعده قاعدايطالعها ايريد يستوعب اكثر
العاش:وحتى يوم ادخل عليك الميلس ماكنت ادري ان في حد اهناك يانيه تيلفون منها ان في مفاجئه اليه في الميلس
انا صح اتسرعت وركضت للميلس لاكن والله ما كنت ادري بنيتها
رجعت اتصيح
العاش:سهيل والله انا مب نفس ما انته متخيل
بعده سهيل متنح مش مستوب وايحاول يفهم اهيه شو قاعده اتقول بنظراته الي قاعد ايطالعها ابها
العاش استمرت اتصيح واهيه اتشوف ان ماعنده ردة فعل كل شوي رفعت نظرها له اتريده ايقول شي
وهو مسمت قاعد ايطالعها
العاش:والله يا سهيل والله ما اجذب عليك ...انا خلاص ما عليه منها...شفت منها الي ايكفينيه
ما زال سهيل ايطالعها
العاش:سهيل انته مصدقنيه؟
انا والله انصدمت من حمده وكملت اسبوع مش مستوعبه الي اهيه سوته
ورجعت اتصيح اكثر وتشاهق
العاش:لاطالعنيه جذيه قل شي والله انامظلومه والله ما اعرفه ولاقد سمعت عنه اي شي من قبل
سهيل وهو ايطالعها توه استوعب منيه هذي الي قاعده جدامه الحلم الي كان ايشوفه وانها مجرد خيال اختفى
استوعب اخيرا الصوره الي جدامه استوعب ان هذي اهيه العاش الي كان ايحلم ابها ليل ونهار العاش بنت دار الزين
والي اهيه عنده الزين كله معقوله عنده من اسبوع وما استوعبها لين اليوم بسبب افكار حقيره زرعتها في راسه حمده
سهيل:يـ يعني بنت دار الزين راضيه عن ولد بوظبي
شقت ابتسامت العاش دموعها
العاش:واتحب ايديها مجلبه بعد
صرخ سهيل:عاااااااااااااااشووووووه
قفزت العاش من صرخته
سهيل وهو يوقف:قومي اشوف قومي
مسكها من يدها ويرها موقفنها مجابلتنه وهو ايطالعها زين كانه توه مكتشفنها
سهيل:اشوووف دوري
العاش:ههه شبلااك سهيل؟
سهيل:اتقوليييليه شبلاااك هااه لحظه اشويه
ركض سهيل للدريشه وفتحها وصرخ بصوت عاااااااااااااالي شي كابتنه ومن الفرحه قاعد ايطلعه بالصريخ
توه استوعبها في حياته بعد ماطارت الافكار والشكوك الي في راسه
في الوقت هذا كان توه سعيد والريم داخلين قسمهم وسمعو الصريخ فتح سعيد دريشته وصرخ على سهيل
سعيد:سهيلووووه
نزل اسهيل راسه تحت ايطالع سعيد وهو يضحك
سعيد:حد قالك انك طرزان قاعد اتصارخ اخر الليل
سهيل:هههههه فدييييييتك
سعيد:حــــــر بلاك انته؟
سهيل:يا اخي كيفيه اصارخ انته شو حارنك
سعيد بخبث:ااااه عشان الجبس يعني الي عقوه عنك
دخل سهيل
وتم سعيد واقف وصرخ عليه ابوه الي واقف تحت جدام الميلس
ابو سعيد:سعيدان
التفت سعيد لبوه تحت:هلا ابويه
ابو سعيد:عنبوك ما تستحي على ويهك تصارخ اخر الليل فضحتنيه في الريال الي راقد في الميلس يفلتوبه
سعيد:لا ابويه هذا سهيلوه
ابو سعيد بغيض:وانته كل شي اتعقه على سهيل سهيل عاقل ما يسوي هالينان الي انته طايح فيه
سعيد وهو ياشر على فوق:لاوالله ابويه هذا سهيل
ابو سعيد:سر سر داخل وصارخ في غرفتك فضحتونا
ودخل عقبها ابو سعيد داخل رجع سعيد والتفت فوق
سعيد:سهيلوه ماعليه ياسهيلوه ماعليه اتعقها في راسيه يالخمام
دخل سهيل داخل وهو ايطالع العاش مبتسم واهيه واقفه مبتسمه وعيونها متنفخه من الصياح وقرب منها اكثر ونزل وشلها فوق وتم ايدور ابها
ضحكت العاش وهيه تترجاه اينزلها نزلها واحتضنها بكل قوته وكآنه ايريد ايدخلها بين ضلوعه
سهيل:العاااااش ...انا اسف اسف غناتيه والله اسف
بدت دموعها تنزل واهيه في حضنه
بعدها شويه ومسكها من ويهها واصبوعه تمسح دموعها
سهيل:لااااا ارجوج ما اريد اشوف دموعج انا اسف والله اسف لحمار حمدوه والله لا ارويج فيها
العاش:لا سهيل دخيلك خلها اتولي....مسكينه تراها اتحبك
سهيل:حبها برص... وانا متى قد عطيتها ويه ولا لمحت الها بشي على كيفها اهيه يعنيه افارق ويهها الي معيشتنيه طول الوقت الي فات في جحيم ما اعرف راسيه من اريوليه حتى فرحتيه بعرسيه
ما خلتنيه اتهنا فيها...يعني انتي تعتقدين انيه كنت في حاله طول الفتره الي فاتت
تمت دموعها تنزل
العاش:حتى انا سهيل اول شي عشت اانب ضميريه انك خطبتنيه واهيه تحبك ما كنت ادري بالي
انته اتفكر فيه لين ما يت وحده جزاها الله خير ووضحت اليه الصوره عرفت عقبها ليش انته مستحقرنيه
سهيل:والله انيه حمار
ضحكت العاش:لااا حرام عليك ليش اتقول جذيه
سهيل:عيل انتي عنديه طول الفتره الي فاتت واتحاولين اتفهمينيه انج راضيه ابيه وانا حمار
مخيه ضارب
العاش:هههه تعبتنيه والله
سهيل تم ايطاعها مش مصدق انها حقيقه جدام عينه
سهيل وهو ايضمها اكثر:فديييييت روحج انتي ماتدرين انج الغلا كله انتي دقات قلب سهيل ونبضه
ابتسمت العاش واهيه اطالع تحت
سهيل:يالله فديت انا الضحكه...لا خليت منها والله انيه حمار
العاش:سهيل بس عاده ما اسمحلك اتقول هالكلمه مره ثانيه
رجع سهيل ايطالعها مره ثانيه:عاد صدق انتي بنت دار الزين اهنيه عنديه انا مش مصدق
العاش:شبلاااك انا من اسبوع عندك
سهيل:ثوووور لانيه ثووور ما استوعبت
العاش:ردينا على ثور
سهيل:لين اصلب حمارة الروا وانا ثور
العاش:قلتلك خلها اتولي
سهيل:وقصائد العتب حق منوه امطرشتنهن؟
العاش:قريتهن؟
سهيل:بغيت اين في الايام الي فاتت كنت اتخيلها من عنده عتب الج
هزت راسها بلاا
العاش:حاز في خاطريه انك صدقت هالكلام عنيه
سهيل:ليش ماوضحتي اليه؟
العاش:قلت بتفهم انيه احبك من طريقتيه
سهيل متنح:بفهم شووووه؟
العاش:هاااه؟
سهيل:شو قلتي قبل اشوي من طريقتج افهم شووه؟
ابتسمت العاش:انيه ا احـ احبـــــــــــــــــــــــــــك
سهيل طاح على السرير بقو وهو فارد ايديه:اااااااه
بعدها قام ويرها لحضنه وهو واقف
سهيل:العاااااش انا مب امصدق والله مب امصدق انتي عنديه وملكيه
انا مادري كيف عقليه كان ضارب الفتره الي فاتت ...ماتدرين شكثره انا اتعذبت والافكار الخبيثه مسيطره على تفكيريه
ماتدرين كيف كنت بموت وانا اتخيل ان عقلج وقلبج عند شخص ثاني
ولا يوم قالو انج انخطبتي صدق كنت بستخف لانج انتي الحب الوحيد الي حسيت فيه
مسكها من ويهها وتم ايطالع في عيونها
سهيل:صدق انيه فرحت يوم دريت ان ابويه حيرج اليه لاكنيه كنت دائمن احس بفرحتيه ناقصه
وانج منجبره عليه...ياربييييي والله انه شعوور فضيع الي كنت اعيشه شعورين في نفس الوقت مش عارف على شوووه ارسي....ليتنيه اعرف بس
اهيه ليش سوت جذيه واهيه تعرف انيه عمريه ما عطيتها ويه
العاش:ليش انته نسيت شو كنت اتقول الها يوم كنا في البحر ويوم شليتها وخليتنيه وراكم
سهيل:والله ماكنت احفل ابها انا كل الي كنت اسويه قاصد فيه انيه اعصببج...بموووت يومها على عصبيتج
واتنرفيزج كنت اشووفج غير ...احس بدقات قلبيه يوم اشوفج...اما اهيه والله ماعنت اليه بشي وهذا
الي تدعيه مب حب انا في حياتيه ما شفت حب مثل هذا هذا حب تملك لا غير...انانيه...كيف رضت اتضرنيه واهيه تدعي انها اتحبنيه
العاش:الله ايسامحها انا ماكنت اريد اقولك عنها بس ما قدرت استحمل اكثر
سهيل:المفروض من زمان قلتيليه لانها تقدر في المستقبل اتسوي اشيا وايد...واحنا لازم ناخذ حذرنا منها
العاش:بس ارجوك...لاتبين الها شي وخلنا ناخذ حذرنا منها
ابتسم سهيل:زين ذكرينيه دوم لانه يمكن اعطيها كف على ويهها اذا شفتها
العاش:لااا ارجوك
سهيل وهو اينزل راسه لمستوا ويهها ايطالعها بتمعن:لحظه انتي صدق عاشوووه ترانيه لين الحين مش مستوعب
العاش بابتسامه:انزين شو تبا دليل عشان اتصدق
قرب خده منها واشار الها
ابتسمت وقربت امنه وطبعت حبه على خده بالسريع
بعدها قام ايناقز على السرير وهو ايصارخ مستانس
كان سعيد قاعد وعيونه اطالع فوق للسقف
قعدت الريم عداله:شبلاهن عيونك معلقه فوق في السقف؟
سعيد:يخرب بيته سهيلوه تسمعين الحشره الي فوق
ضربته الريم على ظهره واهيه تضحك
ودمتم وديمه العطا