تابع........



عند جيرانهم في بيت اهل صلاح ... كانوا البنات يرتبون البيت و رجعوا كل غرض لمكانه ... و صلاح كان يساعدهم ... جوال صلاح ما سكت و هو يرن......

سوسن : يا اخوي رد على جوالك...

صلاح : رقم غريب ما اعرفه...

سميه : و اذا انت رجال عادي رد..

صلاح : مالي خلق..

سوسن : ازعجنااا جوالك..

صلاح : اللحين بصمته...

اخذ جواله و راح لغرفته ........ و بعد ما راح...

سميه بهمس : ما تحسينه متغير ...؟

سوسن : أي والله تتوقعين السجن غيره ؟

سميه : لااا يا سوسن .. احسه صاير تعيس..

سوسن : يعني واحد عاطل باطل و طاردينه من شغله اكيد بيزعل...

سميه : كاسر خاطري .. كان يحب شغله كثير..

سوسن تنهدت : يا ليت لو نقدر نساعده...

دخلت عليهم امهم......

ام صلاح : انتي و هي يلا خلصوا اللي بيدكم عشان نسوي العشا..

سميه : ان شاء الله يمه ما بقى شي...

سوسن : انا بروح اجيب المكنسه بكنس الارض مره مغبره..

سميه : اوكيه انا بكمل تزيين الكنبات...

عند صلاح بغرفته......

صلاح ~ وش هالرقم الغريب ؟ يعني لازم لازم ارد .. اكيد واحد يعرفني و لا ما أصر انه يدق علي....

بعد تردد و تفكير رد........

صلاح : الو نعم!

: هلا و غلا اخيرا رديت...

صلاح ابعد الجوال عن اذنه ... مين هذي ؟؟؟؟؟

: الووووو .. الووووو رد علي...

صلاح : مين انتي ؟

: لااه لااا كيف ما عرفتني ؟ انا اللي جيتك المركز ما تذكرني ؟ انا اصايل..

صلاح هاذيك البنت : اصااااايل خير ان شاء الله ليه داقه علي ؟

اصايل : ليش تكلمني كذا .. بس حبيت اتطمن عليكم و اشوف اذا رجعتوا لبيتكم و لا لا ...

صلاح : و انتي اش دخلك بالموضوع...

اصايل : كيف اش دخلني و انا اللي طلعت اهلك من البيت ... ما قلت لك ذاك اليوم..

صلاح بعصبيه : و اذكر اني قلت لك إلا اهلي لا يجيهم شي..

اصايل : هممم بيبي خلاااااص انا غلطت و هذاني رجعت اهلك .. سامحني تكفى...

صلاح : انتي من أي نوع من البشر ؟ .. لا عاد تدقين على ذا الرقم فهمتي !؟

و قفل الجوال بوجهها...

صلاح .. اش هالبنات ؟ .. كيف تتجرأ ماهي متربيه .. استغفر الله بس.....

عند اصايل ....... رمت الجوال..

اصايل ... ليييييييش ! ليش اسلوبه كذا معي ... اووووووف اش االسواة كيف اقدر اقنعه ... اصلا ليش انا متعلقه فيه كذا .. مع نفسه....

اندق باب غرفتهاا .. دخلت عليهاا اختها جود....

اصايل : هلا جود..

جود منزله راسها : هلا فيك..

اصايل تأشر ع المكان اللي جنبها : تعااالي تعاالي .. وش فيك كذا ؟

جود : انا .. بصراحه .. يعني انا ... ( سكتت)

اصايل بخوف : عسى ما سويتي شي غلط...

جود : هاااه ... لا لا لا ما سويت .. بس بغيت اقولك اني فكرت في كلامك .. و اكيد كلامك صح .. بس انا احبه...

اصايل بضيق : يعني بالاخير طلع شكي في محله .. طلعتي معه ؟

جود : لا لا ما طلعت .. بس اكلمه و يكلمني و نرسل لبعض....

اصايل : مين هو و وين تعرفتي عليه...

جود : ما تعرفت عليه هو تعرف علي...

اصايل : ما فهمتك اشرحي لي...

جود : تذكرين يوم زواج اختي منار.. ؟

اصايل تهز راسها : اييييه..

جود : هناك هو شافني .. و كلمني و عطاني رقمه..

اصايل : و انتي يا الغبيه دقيتي عليه...!

جود : اش اسوي كان عندي فضول مع اني عارفه ان اللي اسويه غلط..

اصايل : اش ذا المخ السميك اللي عندك .. بعدين انتي صغيره مو حق ذي السوالف .. هو اش اسمه ؟ و ولد مين ؟

جود : قال لي ان اسمه مشعل .. و هو يصير ولد عم معاذ زوج منار .. يعني عايلتهم حلوه من مستوانا...

اصايل مصدوووومه : اييييييييييييييييييش ! .. ( مسكته مع كتوفهاا ) جوود حبيبتي انتبهي من عايلتهم .. انسيه فهمتي انسيه لا عاد تكلمينه ( قامت تتذكر كلام رائد لما قال لها انه يقدر يأذي صديقاتها و اختها ) .. اوعديني انك ما عاد تكلمينه..

جود : بس............

اصايل قاطعتها و هزتها بقوه : اوعديني!!

جود وش فيه انقبلت علي كذا يمه تخوف : اوك وعد...

اصايل هديت شوي : اسمعي والله اني اقول هالكلام عشانك .. انتبهي منه و من كل عايلتهم تراهم ماهم زينين زي ما انتي مفكره .. انتــــــــــــــــــــــبهي...

جود هزت راسها : ان .. ان شاء الله...

ثم طلعت من الغرفه مستغربه ردت فعل اختهاا....

قدام بيت منار ... وصلت الجوهره و معها الجوري .. نزلوا من السيارة يطالعوا البيت ........

الجوري : اللحين هم مو ناس تجار ؟! .. كيف منار عايشه بهالبيت...

الجوهره : هو كبير و باين انه دورين بس.......

الجوري : ايييييه قديييييييييييم و بالحيل بعد..

الجوهره : ما علينا اهم شي تكون مبسوطه .. خلينا ندق الباب...

دقوا مرتين و ثلاث و اربع لكن لا رد...........

الجوري : غرييييب وين الناس !؟

الجوهره : يمكن مو في البيت يمكن طلعوا يتمشوا...
الجوري : اش نسوي ؟ نستنى ؟؟!

الجوهره : لااا وش نستنى .. اقولك نقعد 10 دقايق ثم ندق مره ثانيه اذا محد ففتح نرجع البيت و نجي بوقت ثاني...

الجوري : اوووك .. بس لا نكون مضيعين و هذا مو بيت منار...

الجوهره تطالع الورقه اللي فيها العنوان : إلا هو انا متأكده...

الجوري : يعني معقوله ما عندها خدم يشوفوا الباب حتى و ان كانت طالعه..

الجوهره : تدرين كلامك صح .. شي يخليني استغرب ... زي ما قلت خلينا نستنى شوي ثم نحاول مره ثانيه...

الجوري : اوووكيه امشي نقعد بالسيارة...

من جهة منار كانت قاعده بغرفتها متكوره على نفسها اصلا معاذ قافل عليها الباب و طالع....

منار حقييييييير معااااذ يسوي فينا كذا .. هو يدري اني اخاف لحالي .. لييييييييش يسوي فينا كذا !؟

لما دقوا الجوهره و الجوري الباب الخارجي .. منار سمعت بس بشكل غير واضح ........

منار كني سمعت احد يدق ع الباب ... لا مستحيل مين رح يجيني .... هئئئئئئئ يعني بديت اتخيل .. شكلي بنجن ع الاخيييييييير ... لا لا بيديت اخااف يعني اسمع اصواااات!

بعد 10 دقايق رجعوا يدقوا ع الباب مره ثانيه....

منار .. لازم اشوف مين لو من الشباك ..... بس خاااايفه .. تشجعي يا منار و شوفي .....

طبعا راحت تطل من شباك غرفتها لعل و عسى تقدر تشوف مين هذا اللي يدق ع الباب !؟

منار .. هئئئئئئئئئئئئئئئئئئئئئئئ جوج و جوااااااااااااره يا حبيباتي اشتقت لكم ( قامت تبكي)

منار فتحت الشباك وصرخت : بناااااااااااااااااااااااات...

الجوري & الجوهره لفوا للمكان اللي جاي منه الصوت......

الجوري : شوفيهاا فوق من الشباك...

الجوهره : أي والله ( تأشر لها بيدها ) منووووووووووره حبيبتي افتحي الباب احنا جينا نشوفك و نتطمن عليك...

منار تشهق بكي : انا ... اناا .. ما اقدر ... اقصد ......( غطت على فمها و هي تبكي) ....

الجوري : اش فيهاا ليه تبكي ؟!

الجوهره : ما ادري .. و انا خايفه عليهاا .... ( ناظرت فوق ) منووووور تكفين افتحي الباب ترانا خايفين عليك...

منار مسحت دموعها بعنف .. انا مستحيل اورطهم مع معاذ والله لو درى معاذ انهم جوني البيت لا تصير مصيبه : انااا ما فيني شي ... انا بخير و بنعمه .. و ... و...

الجوري : اش فيك طيب افتحي الباب .. ودنا نقعد معك اشتقنا لك...

منار : انا بعد اشتقت لكم .. بس .. ( لقيتهااا ) .. مفتاح البيت ضايع و انا قاعده استنى معاذ .. رح يتأخر لا تستنوا انتوا ارجعوا...

الجوهره : بعد كل ذي المعاناه الى ان لقينا عنوانك تبينا نرجع..

الجوري تنهدت : خلينا نرجع و نجي بكره .. يعني ما نقدر نسوي شي و مستحيل نستنى الى ان يجي معاذ...

الجوهره : بس قهرررر حابه اقعد..

الجوري : يعني انا اللي ما ودي ! .. خلينا نمشي اهم شي شفناها و هي بخير الحمدلله...

الجوهره : والله من بكيها ما احسها بخير .. خلاص نمشي اللحين و نجي بكره ... ( لفت لمنار ) .. منووور بكره رح نجيك اوووكيه...

منار لأ ما لازم يشوفهم معاذ .. ما لازم يجوا : لاااا تتعبوا حالكم انا و معاذ مقررين نسافر بكره..

الجوهره : اييييييييش ! اجل بنجيك المطار نودعك..

منار ياااا ربي تكفوووووون لأ : بس انا ما ادري متى طيارتنا معاذ قالي مفاجأه...

الجوري : جوج خلاص امشي..

الجوهره : خليني اسألها ع الاقل متى رح ترجع ... ( لفت عليها و سألتها)

منار : ما ادري بعد قالي مفاجأه...

الجوهره : آففففففف جينا ع الفاضي .. اوكيه حبيبتي انتبهي على نفسك و حاولي تدقي علينا مره قلقنا عليك...

الجوري : خلاص والله ازعجنا الجيران .. خلينا نمشي...

الجوهره : اوكيه ( اشرت لها بـ مع السلامه) ...

ثم مشوا للبيت.....

قرب اذان المغرب .. في شقة وليد .. وصله ماجد طبعا للشقه...

ماجد حط وليد ع اقرب كنبه : خلك قاعد ارتاح و قولي وين شنطة الاسعافات...

وليد يبتسم بالغصب : ههه مو لازم .. ترى ما فيني شي..

ماجد : انت طالع وجهك بالمرايا بعدين تكلم..

وليد : يااا ربي .. الشنطه بغرفتي بدرج السرير...

ماجد : اوكي اللحين بجيبها انت ارتاح..

وليد تنهد ... ما احب لما يقلق علي كذا ... الله يهديك يا ماجد...

رجع ماجد بالشنطه .. و بدا يعقم له الجروح و يحط له اللصقات الطبيه...

ماجد : احكي لي اش صار ؟

وليد : آه وش اقولك ... اللي كنت اكلمه بالبي بي اللي بمدرسة حمد طلب يشوفني و انا رحت على اساس انه ما رح يعرفني .. بس مدري كيف عرفني و طاح فيني طق هو و ربعه....

ماجد تنهد بتعب : تعرف انك تستاهل كم مره اقولك لا عاد تمقلب احد شوف وش صار لك..

وليد : وش مدريني انه يعرفني...

ماجد : اكيد شافك مع حمد...

وليد : لو ما كان حمد ماخذ اسمي كان علمتك فيه ذا النذل هتان...

ماجد يحط معقم على جرح بجبهته : ابتعد عن المشاكل بس....

وليد : آآآي يألم .. ما احب اعقم جروحي...

ماجد : ههههههههههههه ... قسم بالله كنك خكري...

وليد عطاه كف خفيف على وجهه : كل تبن...

ماجد : ههههه اللحين الشباب بيجوا للشقه صح ؟

وليد : ايييييه...!

ماجد : كيف رح يشوفوك بهالحاله .. ؟!

وليد قام لأقرب مرايه يشوف شكله : هئئئئئئئ اللحين هذا شكلي .. آخ وش ذا متفقع وجهي صح...

ماجد : ههههههه صباح الخير .. بدري تلاحظ...

وليد : اقولك دق عليهم و قول لهم لا احد يجي...

ماجد : من جدك ؟

وليد : لا من عمي كاااااااك...

ماجد : اجل ماني داق على احد..

وليد : ليييييييييييه ؟!

ماجد : هذا بيتك مو بيتي وش دخلني اطرد الناس...

وليد : قال ناس قال .. تراهم الشله الدشير عااادي كلمهم وش فيك ؟! ..

ماجد : معليش ما اقدر ادق عليهم و اقولهم لا تجون .. كلمهم انت..

وليد : اووووووف خلالااااص ابرسل لهم مسجات .. و خلنا نطلع من البيت عشان اذا فيه احد ركب راسه و جا للشقه ما يلاقي احد فيها..

ماجد : هههه كل ذا عشان لا يشوفوا خشتك...!

وليد : لا تخليني اجي اغير ملامح وجهك .. عشان نصير في الهوى سوى..

ماجد : وووه عصبت .. لا خلاص بسكت ما بتكلم...

اذن المغرب و طلعوا للمسجد و راحوا يتمشوا بعد الصلااااه....

في بيت ام حنان ... حنان راحت لغرفتها و قعدت على سريرها .. ضمت المخده لصدرهاا.....

حنان .. آه يا غرفتي اشتقت لك .. غرفتي كانت فيهاا سميه .. حبيبتي سميه يااا رب انك تفهميني و نرجع زي قبل و احسن .. كل ما اتذكر ايامي معها احس اني ببكي .. لييييييش يا سميه ما تسمعيني بعد كل هالعشره حراااااااام عليك...

فتح الباب و دخل بدفاااشه.......

حنان شهقت من الخوف : ههئئئئئئ بسم الله خوفتني يا التبن ... و اش فيك مطفوق !؟

فيصل : هههههههه عادي من يومي مطفوق...

حنان رمت مخدتها عليه : نعم ! خير ! وش بغيت ؟ الواحد ما يقدر يقعد مع نفسه شوي ....

فيصل سكر الباب و تسند عليه : اش اسوي .. امي و امك قالوا لي روح شوف حرمتك وش فيهاا...

حنان تشد بشعرهاا : ياااااا ربي هذا اللي يقهرني و يرفع ضغطي .. و انت على طول جيت ؟!

فيصل : آآآآآآآآش لا تصارخين .. لا تخلينهم يسمعون .. انتي عارفه هم خلقه شاكين صصصصح !؟

حنان تنهدت : و بعدين ؟ .. يعني كل ما بنجي لبيتنا بتكون هذي حالنا ؟

فيصل : لييش انتي زعلانه و متضايقه ... ما اشوف أي شي يستاهل زعلك..

حنان : ماني زعلانه و لاني متضايقه...

فيصل : طيب احكي لي عن اللي صار بالرياض .. ما صارت لنا فرصه نعرف كيف اخذوك معهم....

حنان قالت له كل شي من لما نادوها للوكيل لحد ما وصلت للرياض بس ما قالت له لما مشاري ضربها او حركات يزيد في اشياء خبتها لانها خافت تسوي مشاكل...

فيصل : انتي متأكده ما سووا لك شي...

حنان : لااا عاملوني عادي .. يمكن لو انت ما جيت يمكن صار لي شي..

فيصل : الحمدلله اني جيت .. ما توقعت ان هتان توصل فيه المواصيل انه يسويها و يخطلف للرياض...

حنان : صدق الولد خطير و صاير يخوف .. يقدر يسوي أي شي يبغاه ما عدت احس بالامان بالمدرسه...

فيصل : قلت لك خلاص اسحبي بس ما تسمعي الكلام..

حنان وليد قالي بيتصرف معهم : معليك مستحيل افارقك مره ثانيه حتى لو انه المدير نفسه يبغاني...

فيصل تنهد : ما تتوبي و تبين تداومين بعد!

حنان : مو بكيفي مجبوره .. انت لا تضايق نفسك حتى و ان صار لي شي .. على مسؤوليتي...

فيصل : بس هتان و شلته لازم يتعاقبون على اللي سوواه..

حنان : طلبتك ماا ابي مشاااكل..

فيصل آخ بس لو امسك هتان لحالنا .. ما برحمه بس انه جبان ما يمشي إلا مع قروب .... ( ناظر حنان شافها سرحانه ) .. وين رحتي ؟

حنان : و لا مكان...

فيصل : ابقعد معك الى ان تروقي...

حنان : اش اقول ... حابه اقعد لحالي بغرفتي ممكن ؟

فيصل : بس هم..........

حنان قاطعته : تككككككككفى!

فيصل : هنا ما اقدر إلا اني امشي .. و بشوف لي صرفه مع امي و خالتي..

ناظرها بحزن لانهاا متضايقه .. ما كان بيده شي ثم طلع.....

حنان تمددت على سريرهاا .. اش اسوي اللحين .. بديت اتعب من طريقتي اللي عايشتها من جه هتان و المشاكل اللي صارت لي معه ... و من جه وليد بعدين وليد وليد يا ناس اللي احبه مستعده اسوي أي شي عشانه يااا رب ما يطلع يحب هاذيك البنت .... ( قامت تفكر شوي .. تذكرت نواف و حركته ) اووووف ليش جا على بالي اللحين .. اصلا ليش تضايقت منه هالكثر هتان باسني مع خدي بس ما تضايقت هالكثر.. لا لا لا تفرق هتان باسني بسرعه بدون ما احس حتى .. بس ( تحط يدها ع خدها ) نواف غير .. ما اعرف كيف بس غير يااا ربي ليش سوا كذا مع انه مو متأكد اني بنت ...(غطت على عيونها ) احس اني مره خجلانه و ما اقدر حتى اناظره مره ثانيه ..... خجلانه و منحرجه و متضايقه منه ... ما ودي اشووووفه ما ودي......

دق جوالهااا ... رفعته تشوف مين....

حنان هئئئئئئئئ توني افكر فيه يقوم يدق ! وش يبي مني بعد !؟ ما رح ارد عليه....

استتمر جوالها يدق و يدق و هي مطنشه و احيانا تعطيه احمر...

حنان كيف يبيني ارد بعد اللي سواه .. له وجه يتصل ؟!.. القهر اني كذا و لا كذا مصيري بتقابل معه بالمدرسه او حتى بالشقه .. اووووووف اش ذي الحاله !؟ استغفر الله بس....



تركي اخذ ابو خالد للمستودع بعد ما انتهى ابو خالد من شغله....

ابو خالد : هذا هو المكان ؟

تركي : اييه طال عمرك...

ابو خالد : هممم .. ماهي هينه اصايل .. خلنا ندخل...

تركي : سم طال عمرك...

دخل ابو خالد شاف رائد محطوط بفراش ع الأرض و جنبه مغذيات و ممرضات يعالجونه...

ابو خالد : وين الدكتور اللي عالجه ؟

تركي : طلع من ساعه يقول انه محتاج لشوية علاجات و رح يرجع على طول .. احتمال اللحين يكون بالطريق..

ابو خالد : انا ما ودي استنى كثير دق عليه و قول له يجي...

تركي : ان شاء الله طال عمرك...

توه بيدق إلا و دخل الدكتور......

تركي : دكتووووور ابو خالد يبيك...

قرب الدكتور لأبو خالد .. سلم عليه....

ابو خالد : اشلونك يا بندر ؟ اقصد الدكتور بندر...

د/بندر : آه يا ابو خالد مُصر توقع نفسك بمشاكل يعني...

ابو خالد : والله القصه طويله يا بندر .. و ما عندي احد غيرك يساعدني..

د/بندر : ع العموم حصل خير .. قدرنا نلحق عليه و اللحين صحته زينه..

ابو خالد : طيب يقدر يتكلم ؟ ودي اتكلم معه..

د/بندر : أي طبعا متى ما صحا رح يتكلم..

ابو خالد : طيب صحيه انا مستعجل...

د/بندر : استنى شوي اصلا مفعول المخدر بينتهي ( يطالع ساعة يده ) بعد تقريبا 5 دقايق و ممكن انه يصحى...

ابو خالد : الظاهر ان الانتظار لا بد منه...

د/بندر : حياك اقعد خلنا نسولف شوي على بال ما يصحى...

قعدو على كنبات حطها تركي هناك خصيصا لابو خالد.....

ابو خالد : زي ما قلت لك يا بندر لا احد يدري عن هالولد..

د/بندر : هذا مو رائد ولد ابو معاذ ؟

ابو خالد : إلا هو للأسف..

د/بندر : انت عارف لو ابوه درى اش بيسوي ..؟ ممكن تروحوا للسجن .. كلنا نعرف عن علاقات ابوه...

ابو خالد : بس ولده هو الغلطان .. بعدين ابوه ما يقدر يسوي لعايلتنا شي لو كان قادر كان سواها من ايام جدي الله يرحمه...

د/بندر : انتوا يا العايلتين امركم غريب .. عايلتكم ماسكه عليهم شي و عايلتهم ماسكه عليكم شي .. صراااحه شي غريب...

ابو خالد : زي ما انت قلت .. بس محد يعرف غير ابوي و جد ذا الولد ( يقصد رائد ) .. عشان كذا لو كان مات و اكتشف ابوه اننا ورى موته اكيد بتصير مصيبه...

د/بندر : حتى لو صحى الولد على بالك بيسكت ؟

ابو خالد : بتفاوض معه .. و انا عندي شغلات بهدده فيهاا .. و ان شاء الله ما بيصير شي ....

د/بندر : الله يعين بس!

** ابو خالد و الدكتور بندر اصدقاء من الطفوله.....

عند نواف كان في حديقة بيتهم .. بكل لحظه يتخيل اللي سواه مع حنان .. و يقنع نفسه انه ما غلط ... و يحاول يدق عليها على أمل انها ترد.....

نواف والله ما ااخليك إلين ترد ... ارسل لها مسجsms..

" حمد اذا ما رديت علي والله لا ادق على فيصل و اعلمه باللي صار بيني و بينك .. و ممكن اجيك وين ما تكون ... الساعه 8 و نص بدق عليك اتمنى ترد ......" ثم ارسااااال ......

نواف .. ان شاء الله يرد ..كان المفروض الليله نسهر بشقة وليد .. كنت متأمل اشوفه هناك .. لكن مدري اش عنده وليد ارسل مسج ان محد بالبيت و السهره تأجلت اوووووف قهر!

طبعا كان نواف بالحديقه ينتظر ولد عمه الغالي خالد .. و وصل خالد..

نواف : هلا خالد حياااك .. تحب نقعد هنا و لا داخل ..؟

خالد : اللي يريحك..

نواف : اجل تعال داخل...

راحوا للملحق و ضيفه نواف و قعدوا سوالف......

خالد : ليش انت متضايق ؟

نواف ابتسم مجبور : ماني متضايق ... ليش تقول كذا ؟

خالد : نوووواااااااااااف .. أي احد ممكن يصدقك إلا انا .. بغيت الحقيقه انت من امس بالعزيمه ما كنت طبيعي..

نواف ادري والله محد يقدر يفهمني الا هو : ما ودي احكي والله .. معليش ما تسألني ؟!

خالد : ما بضغط عليك .. اذا انت منت حاب تتكلم ما اقدر اقول شي .. بس لازم تعرف اني بكون جنبك و بساعدك دايما .. لا تتردد تقولي باللي في خاطرك...

نواف : اكيد عااارف .. انت اخوي اللي ما جابته امي .. مالي غنى عنك..

خالد ابتسم : الله لا يحرمني منك.....

نواف: ....................

نرجع للمستودع ... صحى رائد .. و راح ابو خالد يكلمه......

ابو خالد : الحمدلله ع السلامه..

رائد بتعب : انت يا الحقير....

ابو خالد : انتبه لنفسك و لا تغلط .. و اعرف مقامك...

رائد سكت لانه تعبان....

ابو خالد : اسمع انا اللي انقذتك و لا كنت رح تموت .. اذا ودك تطلع من ذا المكان لازم تنسى كل شي حصل هنا و لا كنه صار و تنسى بنتي اصايل مفهوم ؟

رائد : انت من تحسبني ؟ والله ما اعديها لكم و انا ولد ابوي..

ابو خالد تنهد بتعب : هذا اللي توقعته من ولد ابو معاذ .. انت تعرف لو ابوك درى بتكبر المشاكل بين العايلتين و ممكن نخسر كثير .. و اكيد انت ما ودك ذا الشي يحصل صح و لا لا ...؟

رائد : ما يهمني احد و لا يهمني شي إلا اني انتقم...

ابو خالد : وش تبي اللحين عشان تنسى ...؟

رائد سكت يفكر ثم : زووووووووجني بنتك

ابو خالد فتح عيونه ع وسعهم : مهبووووول انت ؟!!!

رائد بعناد : هذا اللي عندي..

ابو خالد : مو يكفي اخذتوا منار .. بتاخذوا اصايل بعد !؟

رائد : اذا ما ودك العداوه بين العايلتين تكبر و تصير مشاكل زوجني ااياهاا و اوعدك وعد رجال و اذا تبي بحلف لك ع المصحف اني انسى اللي سويتوه فيني هنا...

ابو خالد والله ماهي بشينه اهم شي ما تكبر المشاكل و لو درى ابوي ان اصايل سوت مصيبه مع عايلتهم بتروح علينا كلنا بس ما لازم اتسرع مهما كان هذي بنتي : اسمع بفكر يومين بالموضوع ثم برد لك خبر .. انت خلك هنا ارتاح الممرضات و الدكتور بيهتمون فيك الى ان تطيب ... يلا ابخليك اللحين...

بعد ما راااااااااح....

رائد والله ان ما ذليتك و كسرت راسك و مسحت فيك الارض يا اصايل ما اكون رائد .. خلي ابوك يوافق و تشوفين لا اصبحك بطراق و امسيك بطراق .. اصبري علي بس .. كل هذي الآلآم و الجروح لا ارجعها فيك ... و اذا قتلتك حلال.....

الساعه 8 و ربع .. في بيت حنان ... كانوا قاعدين ع السفره يتعشوا مع بعض....

حنان ماني قادره اشيل مسج نواف من بالي .. معقول يسويها و يكلم فيصل..

فيصل : اش رايكم بالعشا ؟ هذا مطعم جديد اللي طلبنا منه...

سعود : لذيييييييييييييييذ..

سعد : فيصل دايما اطلب لنا..

فيصل : ان شاااااااااااء الله كل ما جيت الببيت ابطلب لكم..

ام حنان : حنااان ليه ما تاكلي ؟

حنان كانت سرحانه......

فيصل : حنووو امك تكلمك...

حنان : هـ هلااا..

ام حنان : انتي فيك شي ؟

حنان : لا لا اش بيكون فيني..

ام حنان : طيب ليه ما تاكلي ..؟

حنان : قاعده اكل يا يمه اكل لا تشغلي بالك..

ام فيصل : ناديه وراك ع البنت صايره ع اللقمه تحاسبيها..

ام حنان : بنتي...!

ام فيصل : ايييه بنتك بس خففي قلق شوي..

ام حنان : حااااضر يا ام فيصل أي اوامر ثانيه ؟

ام فيصل ابتسمت : الله يهديك...

حنان : يمه زي ما قالت خالتي خففي قلق .. اناا مره مبسوطه و مافي أي شي يقلق ..ارتاحي بس ... يلا انا شبعت الحمدلله .. بروح غرفتي شوي...

بعد ما راااحت.....

ام فيصل : فيصل اذا خلصت اكل روح شوفهاا..

ام حنان عطتها نظره : شووووف مين القلقان اللحين!!

ام فيصل : هههه بس ماني زيك انتي بالمره قلقك زايد...

ام حنان : اهم شي يكونوا مبسوطين مع بعض عشان قلبي يرتاح...

فيصل : خاااالتي صدقيني مبسوطين...

ام حنان : عساكم دوووم ان شاء الله..

ام فيصل : فصيييل حكي لنا اشلون عايشين بالشقه...

فيصل وش اقول بس يا يمه : عااادي عايشين..

ام فيصل : يعني حنان تطبخ لك ؟

ام حنان تناظرهاا باستغراااااااب......

فيصل : ههه ايييه ايييه تطبخ...

ام فيصل : وش فيك يا ناديه ولدي ابتطمن عليه..

ام حنان : ابد ما فيه شي...

فيصل : عن اذنكم...

راح فيصل ورى حنان ... حس ان فيه شي شاغل بالها كان متوقع انه وليد ... حنان كانت قاعده بغرفتها ماسكه الجوال خايفه اذا دق نواف اش تسوي ؟!

اندق الباب.....

حنان : يمه هذا انتي ...؟

فيصل : لأ هذاا حبيبك فصوووولي..

حنان : حبك برص و عشره خرص وش بغيت ؟ بعدين اش عندك مؤدب ..!!؟

فيصل : ههههه تمونين يا الغاليه .. صرت مؤدب عشان ما اروعك...

حنان وقفت : ليش لحقتني اللحين ؟

فيصل : ممكن نتكلم ؟

حنان رجعت قعدت : قول اللي عندك بسرعه ( تناظر ساعة الجوال 8:20 .. باقي 10 دقايق و يدق) ...

فيصل قعد جنبها : انتي لسا متضايقه على وليد ؟

حنان بدون نفس : لأ....

فيصل مسك يدها : صاااارحيني الله يخليك انا عارف انك تحبينه..

حنان سحبت يدها بهدوء : احبه بس ما يحبني بديت اكره نفسي .. لو اني ظليت بنت ما كنت رح ألتقي فيه ابد و يوم اني صرت ولد مستحيل يحبني .. فهمت علي ؟

فيصل : اييه فهمتك ... ( نزل راسه يناظر الارض) ...

حنان ناظرته : ليه انت زعلان ؟

فيصل : بعترف لك بشي .. انا كنت مفكر اني انسى فكرة انك تحبيني و اغير طريقة معاملتي معك اصير جاف يعني و ما اهتم فيك عشان ما اتعلق فيك زياده .. انتي لاحظتي ذا الشي صح ؟

حنان : أي والله اني قايله انك متغير علي ... بس اللحين رجعت طبيعي...

فيصل : اش اسوي ما هنتي علي ... مهما كان انتي حنووو يعني غلاك بقلبي غير ... و لاني خصوصا بعد ما تزوجنا........

حنان قاطعته : لا تكمل ... انا و انت ما نصلح لبعض .. فكر في سميه تراها بنت طيوبه و حبوبه و تستاهل...

فيصل : تبيني افكر فيها بالرغم من انها تخلت عنك ؟؟؟!!!

حنان : معذوره انا بالنسبه لها خنتها و خدعتها ... و لا هي مافي احسن منها..

فيصل : اللي يبيع صديقه بيوم ما يناسبني...

حنان : لااااااا .. لا تفكر كذا هي ما باعتني قلت لك معذوره...

فيصل ناظرهاا عينه بعينهاا....

حنان يمه ليش يناظر كذا ؟ اش ذي النظرات اللي ماني فاهمتها ؟ : اش فيك ؟؟؟؟!

فيصل دفها ع السرير و قرب وجهه من وجهها....

حنان : فيصل انت انجنيت ؟؟ وش ناوي تسوي ..؟ فيييييييصل ابعد عني احسن لك...

فيصل حط اصبعه ع فمها : آآآآآآآش .. اسمعيني لآخر مره ... خليني اقولهاا يمكن لآخر مره ... اذا خسرتك ما عاد رح ترجعي لي .. و انا احس اني مشوش هاليومين و مشاعري ماني فاهمه .. لكن لازم تعرفي اني.........

حنان قاطعته مره ثانيه : فييييييييييييييييييييصل!

فيصل حط يده ع فمها بحيث انها ما تقدر تتكلم : غصبا عنك بتسمعيني .. انا احـــــــــــبك و مستحيل اطلقك....

حنان انصعقت من اللي سمعته و ابعدت يده بسرعه : وش تقول انت ؟؟ منت صاحي...

فيصل : لا انا صاحي هذا اللي كان لازم تسمعينه...

حنان دفته يبعد عنه لأنه كان تقريبا فوقها : مع انك تعرف اني احبه .. كيف مارح تطلقني .. ما اتفقنا كذا...

فيصل : الى ذاك الوقت ممكن تكوني غيرتي رايك...

حنان : فيييييييصل لا تصير انت بعد علي .. الله يخليك هذا مو وقته .. انت تعرف اني ما احبك و انت لسميه ليش مُصر تعاندني ..!؟

فيصل : مو عناد هذي مشاعري و سميه ما اقدر احبهاا..

حنان وقفت بعصبيه : لأول مره احسك اناني .. لأول مره احس اني.......

فيصل يناظرها باهتمام : انك ايش ؟؟؟!!

حنان تضرب برجلها ع الارض و قابضه ايدينها بقوه : أكــــــــــــــــــــرهك!

فيصل لسا قاعد مصدوم من اللي سمعه اصلا ما استوعب الكلمه .. قالت له الكلمه و طلعت من الغرفه للحوش و معها جوالها....

اووووف وش يحس فيه فيصل ... ليش يسوي كذا ؟ يقهرررررني .. كم مره اقول له مستحيل احبه .. سامحيني يا سميه ما كان قصدي يصير كل هذا ... كل ما فيصل حبني اكثر كل ما كرهت نفسي اكثر...

تناظر الجوال ... اللحين بتصير 8 و نص وش اسوي ارد و لا ما ارد.. !

عند نواف كان لسا قاعد مع خالد.....

نواف : خالد انا عندي مكالمه مهمه .. بطلع الحديقه اسويها و ارجع لك ..انت خلك هنا طيب ؟

خالد : اوك خذ راحتك....

طلع نواف و خالد كان شاك ان المكالمه بتكون لحنان.....

يتبع.......