قضينا في الرياض البارحه واليوم والليله = سقا الله الرياض ويمها تحلا مشاويري
احب انسان فيها لابس البرقع مع الشيله = قصيدي له وحبي واحترامي له وتقديري
اصيل الطبع ماحصلت به حيله ولاميله = ولايوفي بحبي والغلا شعري وتعبيري
تميز بالصراحه واشتهر بالصدق في جيله = انا لاغبت عنه مايفكر في هوى غيري
احبه حب صادق صعب تحويله وتبديله = وكيف انسى الذي سايل معه عقلي وتفكيري
سكن وسط الرياض ومن سكن جده ينادي له = اذا ماسار يمي يم داره بالقدم سيري