،*
سألتيني اش كثر حبي وانا من هالسؤال ارتاع
جمعت احساسي في صدري وفاجأ قلبي المجموع

خجلت احكي.. لكنك جبرتيني.. وقلبي انصاع
لذا.. إخذي الجواب اللي يفسر حبي من أي نوع

أحبك.. كثر ما به ناس ملت من ترف واشباع
واحبك كثر ما عيني ترى ناس قتلها الجوع

كثر ما في جرايدنا حروف مثقله باوجاع
كثر ما راحت الغيره بداخلنا بدون رجوع

واحبك كثر ما كل يوم في التلفاز والمذياع
خبر للقدس أو بغداد.. وعادي ما ذرفنا دموع

واحبك كثر ما دنس نفوس اهل اليهود اطماع
واحبك كثر ما طهر صلاة المؤمنين خشوع

كثر ظلم القوانين.. وكثر ما نشكي الأوضاع
كثر ما ع الفقارى بس تطبق كلمة الممنوع

كثر ما به طفل عايش في حرب ما له فيها ذراع
كثر ما صحت اصوات المدافع هالطفل مفزوع

كثر ما به وجوه طيبه.. بس.. طيبه باقناع
كثر ما في البشر زيف..ونفاق..وتابع..ومتبوع

واحبك كثر ما حول الغني تتمصلح الأتباع
كثر ما تنسب الدنيا جرايمها لاهل الطوع

وهذا ربع ما عندي.. وفي صدري ثلاث ارباع
إذا ودك أكملهم.. أو اسكت.. وانهي الموضوع

عرفتي وش كثر حبك في صدر(ن) بالهموم التاع
طلبتك.. إجمعي حبي.. وقولي لي: كم المجموع؟
،*