....
شفتها يا سعود صدفه بعد ما غابت سنين
عند قسم المختبـر وسط مبنى الجامعـه
جيتها ثم قلت ممكن في سؤالي تسمحيـن
ناظـرت فينـي بدهشه نظره متواضعـه
قالت انته تـحسبني من بنات صايعيـن
تـحسبني في زماني عن طريقي ضايعــه
قلت انا ماراح اطـول كلها لك كلمتيـن
وابعـدت عني شويه ثم جتنـي راجعـه
قالت اسال واضح انك من رجال طيبيـن
بس هـرجك يالسنـافي كان وشو دافـعــه
قلت انا حبيت وحده يـوم كنا صغيـرين
ومن ثمان اسنيـن راحت للمواصل قاطعـه
عقبهـا ماذقـت نـوم يهتنيـه النايميـن
ساهر في طول ليلي لين شـمسي طالعـه
اذكر انه فيه حبه فـوق ثغـره من يميـن
واذكر انه لاجـرينا كـن شعـره تابعـه
واذكر انـه عاشـقٍ فـالورود الياسميـن
صار قلبي بالـورود اللي عشقهـا زارعـه
طابعٍ اسـمه بقلبي فيه سيـن وفيه عيـن
وفيه الف وفيه دال وسط قلبـي طابعـه
قاطعتنـي بقولها سبحـان رب العالميـن
كـررتـها مـره ومـرتـيـن ورابـعــه
قلت وشفيك وشبـلاك يابنـيه ترجـفيـن
ليش عـينك يابنيـه من كلامـي دامعـه
قالت الموقف وقلبـي والمحبـه والحنيـن
كيف اشوفك بعد ماكنـت عنك قانعـه
قلت انا بسألك ان كنتي انتـي تذكـرين
عن مواثيـق ثـمنها من حياتـي دافعـه
قالت ظروف الزمان ماتطيـع العاشقيـن
بيعونـي غصب حبك لـو ماني بايعـه
انا في دنياي حالي كنهـا حال السجيـن
حتـى لو فكـوا سراحه فيه شي مانعـه
زوجوني غصب واحد وحرموني حاجتيـن
السعاده فـي زمانـي والحيـاه الرائعـه
والحين انا امٍ لثلاثه ريـم وياسميـن
والولد اسمه خالد على اسمك والمشاعـر جايعـه
|
