شبكة همس الشوق - عرض مشاركة واحدة

23 - 1 - 2018, 05:21 AM

ماعاد تفرق معاي إنْ رحت والا رجعْت
جيَّتْك / والا عدم جيَّتْك / عندي استوَت

علمني الوقت يوم إني صغير وسمعْت
النفس / تظهر ملامحها على ما حوٓت

وانا على حسْب ما شفته معك وإطلعْت
نفسي قوَت / يوم لك نفْسٍ لبعدي قوَت

وش نزَّلك منت كنت اتشوف بأنْك إرتفعْت
الظاهر إنَّك دريت / إن الخطاوي هوَت

والظاهر إنَّك دريت إنَّك نزلت و خضعْت
مؤلم شعور النفوس / اللي تجي لـَ أنكوَت

ماقول ما كنت نجمٍ في حياتي سطعْت
لكن يا كثر النجوم اللي طفَت من ضوَت

وما آقول كارهْك / لكنِّي بعَدْك إقتنعْت
إنَّ المحبَّة لها أغصانٍ / من إيدك ذوَت

وما قول ماضقْت / لكنِّي بعَدْك إستطعْت
أروِّض ذيابة الضيقة / بعَد ما عوَت

قصرت فيني وخاويت الغياب وقطعْت
حتى رويت العيون مْن الجفا وإرتوَت

والحين ناوي تبي ترجع بعَد مـَ انت بعْت
نويت ترجع / ولكن عزتي ما نوٓت

ياليتك بيوم فرقانا / بوجهي دمعْت
على الأقل مـَ أعتبرتك / صفحةٍ وإنطوَت