شبكة همس الشوق - عرض مشاركة واحدة

16 - 2 - 2018, 10:12 PM

قصيدة يا عظيمة
يا عظيمه كل شيٍ له حدود وله نهايه
لكن انتي ماوقفتي عند حدّك ياعظيمه

استلذّيتي بطعناتي واخذتيها هوايه
كن ما لك حربةٍ توجع وطعناتٍ أليمه

آه ليتك ما تماديتي بطعنات البدايه
لين صار لكل طعنه فالحشا معـنـى وقيمه

الله يبيحك ولكن كيف في أغرب روايه
تكتبين الحب كذبه والهوى دقّه قديمه

وانتي اللي كل ما لدّت عيونك فالمرايه
ما لمحتي الا اليتيم اللي خذت قلبه يتيمه

واليتيمة فاليتامى مالها حق الوصاية
الوصية عودها الغض ونواياه السليمة

لكن انتي صار لك حق الوصاية والولايه
واستبدّيتي وشدّوا البدو و أضحيتي مقيمه

ما رحلتي لين حطّمتي بما فيه الكفاية
عاقلٍ حب الجنون وصـوت نارك في مشيمه

استبحتي حرمة المجنون بإدراك وعناية
والتفتي له بعقلك وارتكزت في صميمه

امتلكتي غايته لو كان ماله فيك غايه
وانتصرتي في عيونه واعترف لك بالهزيمه

من كثر مايعشقك ماقال لك بالحب رايه
خايف الأيام لا تطلع عواقبها وخيمه

في طريقك كل ماكنّه لمس درب الهدايه
تاه ودروب الحياة المستقيمة مستقيمة

تايهٍ بصري ومن جابه لبيت الله تايه
عذر من غمّض بعين وعينه الأخرى كريمه

فدوتك مافات من ليّام واللي عاد جايه
يا بعد عمرٍ مخاسيره معك عندي غنيمه

أنـتـي الفارع بقد وجد واسماء وكنايه
من عشق مثلك يجوز من الهوى وشداد ريمه

ليه لا وانتي بحسنك في ذوات الحسن آيه
لا ذهب لا ماس لا ياقوت لا احجارٍ كريمه

شاعرٍ له مع هل الرايات فالمرقـاب رايه
كل ماهبّت هبوبك فلّها قدر وحشيمه

سامحك مـن ألف باء الذنـب الى مالا نهايه
واستباحك عن خطاه وكل طقٍ بتعليمه

يوم قلتي أعطني حرّيتي أطلق يدايه
ما ذخر عن وجهك الا طعنتينٍ في صميمه