مَادمت تسوى عيوني يامعنيني
جمع محطات عمري لا تبعثرها
حبك يضخه فؤادي مع شراييني
يعني لو أعطيك روحي لا تكاثرها
أنته موكل بها ماعاد يعنيني
والله لو أحتجتها مانيب ذاخرها
ياقبلة أيام عمري وأجمل سنيني
سعادتي في عيونك لا تصاغرها
تراك تقدر تضحكني وتبكيني
ولو دمعتي ماتحدر وأنت خابرها
تدري ليا من ذكرتك وش يجي فيني
أعيش حالة غريبة ماتصورها
أضحك وأسولف بحبك بيني وبيني
وأفتح رسايلك وأقراها وأكررها
وأقول ليتك ليا ناديت توحيني
غيبتك شبت على قلبي سعايرها
محبتن عن جميع الخلق تكفيني
ياجعل ربي علينا مايغيرها
وأحيان لا والله أسرح مع شيطايني
وأذكر حركات منك أزريت أفسرها
وأقول ياهل مثل مآ أغليك تغليني ؟
ولا المشاعر لأجل غيري موفرها
وأمسي وانا الهم يبعدني ويدنيني
وتقول لي حاجه ضاعت وأدورهآ
وأليا ذكرت أن ماغيرك ملى عيني
أربط فرامل مشاريهي وأقهرها
وأجر صوتي طرب مسحوب وهجيني
وأصوغ فيك أجمل الأبيات وأندرها
أطرف قصيدة بشخصك من دواويني
يقال عنها تبيض وجه شاعرها
لكن تكفى طلبتك لا تخليني
والناس لا عاد تلعب في مشاعرها