دنياك لو تسوى من الحِزن ذرّه
ما كان تاليها توابيت وقبور
وما كان للكافر بعمره مسره
وما شفت في ملكه ملايين وقصور
العمر يمضي بين حلوه ومره
والموت حق وقابض الروح مأمور
دام الحياه الفانية مستقرة
ورزقك يجيك وبين الأجواد مستور
لا تنشغل بالوقت برده وحره
واحذر تصير بقسمة الناس مقهور
وحكم القدر لاجاك خيره وشره
أشكر عظيم الشأن والذنب مغفور
والمجلس اللي يزعجك لا تمره
خله تراك بشوفته منت مجبور
سـاعـات صمــتٍ ما وراها مضــره
تسوى الكلام اللي به إذنوب وشرور
أطلق خيالك وأترك النفس حره
وخل الطبيعة في حياتك لها دور
وبالليــل لا بانــت نجــوم المجــرة
أذكر بديع الخلق بـِ إحـساس وشعور
واسجــد لرب الكُــون مـره ومـره
وأحفظ لسانك وأترك الكذب والزور
وفـــروض ربــك خلهــا مستمــرة
وطاعتك لا يدخل بها نقص وقصور