نفس العزيز الله خلقها كتموه
ما يشكي من الهم و لاّ المعاناة
لو تتصل تنشد عن آخر اعلومه
ما تـسمـع الا كلمة الـحمـد لله
لو كان مايملك سوا قوت يومه
ابما قسمله رازق الناس يرضاه
قلبه معلق في صلاته و صومه
و كل درب يمه الخير تلقاه
يقضي لزوم اللي نصاه بلزومه
من ينتخيبه لو على النفس بداه
محتاج لكن ما تناسى اسلومه
ما عنده الا تم و ابشر وحياه
لطيب و الفزعه تتله اعزومه
ما ينثني لو حاول الوقت مثناه
يكرم لو هو راس ماله اهدومه
عن الكرم مارده الفقر و ارخاه
كبر على روس المراجل أرجومه
يوم الردي زاد الرخم كبر علباه
واللي مثل هذا نبيه و نرومه
جعل الردايا كلهم من فداياه
وليد حمدان