مجموع الأوسمة: 18

البارت 37

وقفت قريب منها وهي تشوف جنبها على السرير صينة فيها أكل عبارة عن قرصان بر اسمر وصحن فيه سمن والثاني عسل وفنجال قهوة تأكل بشرود وذهن غايب ولا حست فيها وهي توقف عندها قربت منها لين انتبهت لها أمها وهي تشوف كيف ابتسمت لها بمجرد ماشافتها.
عايشة/فديت ذا الفال وذا الوجه تعالي يمه كلي معي.
أشواق مالها نفس تأكل شي جلست قريب منها وتمد يدها لصحن علشان تجبر بخاطر أمها.
عايشة وهي تناظر في وجه أشواق بحب عظيم تحس لما تشوف بناتها انها تملك الكون كله يكفيها من الدنيا انهم معها وحولها تحس ان اشواق بخاطرها شي من رجعت من الدوام مرت سلمت عليها وكان في عيونها كلام ولاحبت تضغط عليها تعرف انها راح تجي وتقول لها في الوقت المناسب
تعرف أشواق انها غامضة ولا تشكي مثل خواتها كتومة ولا ادري ايش بخاطرها بس تعرف ان شخصيتها قوية وحكيمة وتوزن الأمور بعقل وحكمة علشان كذا ما اعارض اي قرار تتخذه .
اخذت فنجال القهوة وشربت منه شوي وخلته في يدها وهي تناظر في أشواق قالت لها : ايش معش من علم عساه خير .
اشواق وهي تغمس الخبز في السمن وبعدين في العسل وتاكل بتلذذ وفي محاولة هرب فاشلة من أمها : مين من البنات مسوية الخبز يجنن.
عايشة نزلت الفنجال من يدها وبحزم : أشواق قولي ايش معش من علم تراني ساكته عنش لي اسبوع .
أشواق وهي تزفر بقوة مسحت يدها بالمنديل رفعت عيونها لأمها: يمه جعلني قبلش .
وقبل تكمل انتفضت امها بجزع استغفري استغفري الله لا يستجيب لش لا والله جعلكم الباقي انت واخواتش وجعل سنينكم تبطي ولا اذوق لكم حزن وبغضب
كم مره قلت لكم لاعاد اسمع وحده تتفداني وتقول جعلني قبلش .
أشواق /طيب طيب ابشري ماطلبتي شي المهم انا جيتش وعندي علم يخصش انتي وعلم يخصني انا .
وهي تناظر في أمها الساكتة وتناظر في وجها كأنها تقول كملي.
اشواق : العلم اللي يخصش يمه نتائج التحاليل اللي اخذتها منش طلعت اليوم يمه لازم تراجعين عيادة السكر ضروري يمه السكر عندش ماهو مستقر مره يطلع ومره ينزل والضغط نفس الشي .
بلعت ريقها بصعوبة وهي تناظر في أمها : وعندش وظائف الكلى منخفضة مرة ومجموعة حصى في المثانة والحالب تحتاج تدخل جراحي لازم تاخذين حبوب الضغط بانتظام وحبوب الأسبرين علشان الجلطات بعيد الشر عنش ولازم تروحين معي المستشفى علشان السكر يحددون تاخذين حبوب او ابر وامشي على جدول تغذية حمية السكر علشان تتعدل نسبة السكر عندش يمه.

ناظرت في أمها اللي مطنشتها

وهي تغمس الخبز في العسل والسمن

تاكل ولا عبرتها بكلمة او اي ردت فعل.،

قالت يمه سمعتي اللي قلته لش.

عايشة/ الله ياسمعته ودخل من هنا وخرج من هنا وهي تأشر على أذنها تبغين اخذ حبوب والله ماتطب بطني ووالله ماغير آكل اللي خاطري به والموت واحد يعني اذا اخذت علاش ولا بموت هيا لاعاد اسمع كلمة.
أشواق وهي متوقعة من أمها لانها ماتحب المستشفى ولا عمرها تذكر انها راحت مستشفى تقول انا اعالج الناس بعجز اعالج نفسي حتى التحاليل غصب رضيت ان اشواق تاخذها قربت يدها من أمها وهي تمسكها عجزت حتى انها ترتب الكلام وهي تعرف عناد أمها
اذاقالت كلمة مستحيل تتراجع عنها بس ضروري تاخذ على الاقل حبوب الأسبرين وحبوب الضغط والسكر والحبوب المدرة للبول علشان تساعد الكلى وتروح السوائل المحتبسة في جسمها علشان ماتتأثر الرئه من السوائل
خاصة وهي تلاحظ صعوبة في التنفس عندها قالت بمحاولة يائسة: ابشري يمه اللي تبغيه بيصير بس الحبوب تاخذينها علشان خاطري يمه وبجيب الش ممرضة وتشوف لش كل شي ماتحتاجين نروح المستشفى والأكل يمه شهر بس حميه لين يتعدل السكر وبعدها بالعافيه عليش.
عايشة/تراش اتعبتي روحش على الفاضي قد خرج مني حلف ماتطب بطني حبة وحده والأكل والله مااخليه اللي خاطري فيه بأكله والموت واحد.،! واللي بتجيبنها والله ماغير اسرحها مع الحلال ترعى.!
أشواق انجلطت من أمها وعاجزه كيف تقنعها وخايفة عليها.
اشواق بتعب: يمه طيب على الأقل المويه لاعاد تشربين من البير اللي برا اشربي معنا من العلب صحية وافضل .
عايشة/ والله مااشرب إلا موية ربي اللي خلقها احسن من العلب اللي كلها كلوركس وبسرعة
قولي ايش هو علمش .
أشواق وهي مثقلةبالعجز وقلة الحيلة من أمها ومثقلة بالخيبة من كل شي .
ناظرت في أمها : يمه انا قبل شهر جيت وكلمتش اني ماعاد ابغى ماهر يمه حاولت وفكرت واستخرت بس عجزت يمه عجزت سنتين وانا اقول بيتغير بحاول اغيره وهو يمه على نفس الوضع انتي تعرفين ظروف زواجي منه كيف رحت وسويت الخلع يمه ودفعت له 50الف والحمدلله حسيت اني ارتحت.