مجموع الأوسمة: 18

البارت 99

أشواق وهي تناظر زوجها بنظرات ماتدري ايش هي عجزت تحدد موقفها منه هي متقبله فكرة الزواج منه وماعندها اي مانع بس خايفة انها تفشل في حياتها الجديدة معه خاصة انها عرفت شخصيته العصبية ومزاجه المتغير رغم ان تصرفه العصر معها جرحها كثير ورد على الندبة اللي متوسطة خشمه والله انها ذحين ندمانه ماتدري ليش
فجأه ندمت كثير ..هي بتحاول قد ماتقدر ان الزواج هذا يستمر مهما صار هي مؤمنة بأختيار الله لها مهما كان وليس سلبية منها انها وافقت تتنازل عن وظيفتها لأن جدها جاها وهو منكسر وهو يقول أشواق طلبتش لا ترديني انا رجال دمي حار واغار على محارمي ولا ارضى لش مهنة الطب ابد والله اني ذحين اموت الف مرة كل ما اتذكر انش كنتي دكتورة وانا واثق فيش بس حنا نغار على طرف محارمنا وسبق أميرة بنت عمش علي كانت تبغى تمريض ورفضنا ..وانتي بنت شيوخ خمس من جدانش كلهم شيوخ معروفين .،؟
لو فكرت فيها من ناحية ثانية هي تعبت من داومها تعبت كثير واخذ منها كل وقتها وعندها دخل كبير يجيها من عقارات ..ورصيد في البنك وفله وعيادة خاصة فيها يعني ماهي خسرانه شي تبغى ترتاح سنة سنتين ثلاث سنوات حلمها أسرة واطفال وعائلة قالت له ابشر ماطلبت شي وجدها يستاهل
اللي يلبي له طلبه وهو فعلآ يغار حتى على جدتها العجوز اجل كيف هي واخواتها .؟
هي بتحاول قد ماتقدر ان الزواج هذا ينجح ويستمر هي ماتحب الفشل راح تتمسك بزوجها نفس ماقالت لها أمها راح تطبق وصايا أمها .؟
وجدتها هيلة قالت لها تمسكي في زوجش حتى لو كان عصبي ترى محمد انا ربيته واعرف انه حنون بس مايظهر حنانه .!
رفعت عيونها للممرضة اللي دخلت وهي تبتسم لها وتفك المغذي من يدها وزوجها باقي جالس جنبها وماسك يدها الثانية بدون مايتكلم ..
فكت يدها من يده بشويش وهي ترفع يدها الثانية وتلف شعرها وترجع تلف الطرحة على شعرها وتلبس نقابها حاولت تعدل جلستها وتقوم ماقدرت حست نفسها بينقطع رجعت تجلس .؟
محمد اللي يراقبها عرف انها مو قادرة تقوم قرب منها وهو يمسك يدها : يله قومي انا بساعدش العربية قريبه هنا
وقفت معه وهي تناظر تحت عند رجولها عرف انها تدور حذيانها قال لها : جيتي بدون حذيان ناظرت فيه كأنها تقول كيف
أمشي طيب .،
قال لها العربية هنا قريب مشت معه وهو يفك يدها ويحاوط كتوفها بيده ويحس فيها ترجف من قربه
جلست على العربية وهو يدفها لين وصلوا موافق السيارات قربت من السيارة وهي تسمع صوتها وتشتغل الأنوار حقتها فتح الباب وهو يساعدها تركب وقفل الباب،.
غمضت عيونها وهي تحس بدوار في راسها وصداع تعرف انها اعراض هبوط ضغط علشان كذا ماسألت ايش عندها وعرفت من محلول الحديد اللي في المغذي ..حست فيه يركب جنبها ويشغل السيارة ويحركها ويمشي مبتعد عن مواقف المستشفى سمعت صوت جواله يدق ويرد عليه : هلا الحمدلله بخير هذا حنا طالعين من المستشفى وقفل بدون اي كلمة زيادة
لفت تناظر له وملامحه المشدودة مااسرع تغير مزاجه وقلب كذا فجأه شالت عيونها عنه وهو ينزل الصيدلية
سندت راسها على الشبااك وهي تذكر أمها ورحيلها الموجع
لهم ولها يالله ماعمرها تخيلت بشاعة رحيلها وماكان بيدها انها تمنعها مستحيل امها تتراجع عن اي قرار تتخذه علشان كذا فضلت تشاهدها ترحل عنهم وهي ساكته لين شافتها تخرج مع البواية وبعدها هي غابت عن الوعي ..
وصلوا البيت وهي تحس بوحشته قبل تدخله شافته ينزل ويفتح لها الباب بعصبية وهو يقول بحدة تقدري تمشي لوحدش وإلا اساعدش
رفعت عيونها له وهي تستغرب تغير مزاجه بسرعة كذا ..وبأختصار : لا مشكور اقدر امشي لوحدي
نزلت من السيارة وهي تحاول توزن نفسها وتمشي وهو يمشي قريب منها لين وصلت البوابة دخلت وهي تشوف جدها واقف عند الباب ينتظرها
بمجرد ماشافها قطع المسافة بينهم وهو يتحرك لها وبفرحة ويحضنها : الف لا بأس عليش ياروح جدش اخذتي قلبي الليلة .،
اشواق بحب : جعلك تسلم واسفة اني خوفتكم وينها جدتي .؟
الجد محمد وهو يفكها ويناظر في سميه وهو يدخل المجلس قال لها : جدتش نامت صدعت شوي وندى اعطتها حبوب ونامت .؟
اشواق وهي تحس بضيق في صدرها والدوار يرجع لها وهي تحس بوحشة في قلبها على أمها مسكت يد جدها علشان ماتطيح غمضت عيونها وهي تسمع صوت جدها الخايف عليها ينادي فتحت عيونها وهي تقول : لا تخاف انا بخير بس دوخة بسيطه وحست في
جدها يدنق لها ويحط يد تحت راسها والثانية تحت رجولها ويشيلها وهو يقول والله مايدخلش الغرفة إلا انا وهو يضحك على اعتراضها .
ظ 
ظ 
دخل المجلس بدون هدف ورجع خرج منه ولا يدري ايش يبغى رجع يدخل المقلط وهو يخلع ثوبه ويعلقه بالباب وينسدح يحس انه غير مرتاح يبغى يروح لها غمض عيونه وهو يرفع يده ويشوف انها الساعة ثلاث الفجر حاول ينااام وعجز قام اخذ جواله من جيب ثوبه وضغط رقمها وحصله مقفل كيف ذحين يطمئن عليها بدون مايتصل على جده ..؟