مشاهد من حياتنا سأذكرها على عجل ..
وسأتحدث بشكل عامي ليكون أقرب للقلب
أرتجي من رب العباد أن يكون له أثر في النفس ..
( ادع .. استغفر .. تصدق ) ..
لست ذات الدين الكامل .. ولست طاهرة من جميع ماأذكر ..
لكن في القلب غصة ..
/
الحين لو بنت مرت من عندنا لابسه " تنوره طويلة " جلسنا نضحك عليها
وقلنا وش هالبنت كأنها كبيرة !!!!! وام عيال ..!!
يعني يابنت ألبسي قصير علشان تكونين شيء وااااو وجميل !!! وعادي جداً تغضبين الله ..
ألبسي عباية على الكتف ( مليانه زينه ) .. علشان تعيشين حياتك ..
ولا شفنا رجال لابس ثوب قصير .. وشماغ بدون عقال ..
علطول لفينا وجيهنا .. لأن أشكالهم غير محببه ..!!!
وألبس شوووورت .. وبتلقى جميع العيون تلاحقك .. وتعدى حدود عورتك مو مشكلة ..!!!
وأنتِ لاصرتِ ماتغتابين .. أنتِ ماتصلحين في المجلس ..
أجلسي وتكلمي وقطعي لحم الناس ..
خشمها كبير .. وع لبسها خايس .. شعرها كأنه خيشه " يعني مو ناعم " ..
والرجال ..
قزم .. وياشنبه تقول مكنسة شوارع .. أما وجهه أستغفر الله بس ..
وترى الغيبة هي سر السعادة عند بعض النفوس ..
أبسال .. أنتِ وهو ربي خلقكم ملاك كاملين ..!
أتذكر حديث للرسول بمامعناه ..
أستهزى في أحد الرجال بنحف ساقيه .. فقال الرسول صلى الله عليه وسلم
ردًا على من أستهزى بأن هذه الساقين تزن جبل أحد ..!
يعني لاتقلل قيمة الخلق .. فـ الله رفعهم في أشياء مانعلمها ..
ولاأشغلنا موضوع .. يضيع الوقت في التفكير فيه
وأكيد الكثير .. لاأشغله موضوع .. حتى في صلاته يجلس يفكر
حتى يمكن يلقى الحل في وقت الصلاة ..؟
طيب هالموضوع اللي أشغلنا بالنا فيه .. لدرجة أننا ننسى سنن الدين ..
من راح يحله ..؟
أنت .. ولا حرصك الزايد اللي خليت تروح صلاتك بدون خشوع ..؟
ويمكن الموضوع يأخذ شهر ويقل ويزيد .. والتقصير في العبادة يزود ..
يعني لاقللت عبادة .. ربي بيسعدك ..
يعني لاقللت عبادة .. ربي بيرفعك درجة في الجنة ..!!!
سبحان الله تشغلنا الحياة كثير كثير ..
حتى من كثر مانحرص على أمورها نظن أن هي حياتنا الوحيدة ..
ننسى الموت ..! ونننسى القبر ..! وننسى الله ..! وننسى الحساب ..!
وننسى النار ..! وننسى الجنة ..! وننسى الأنبياء ..!
كثير برودكاست تنرسل في هالوقت ..
دعواتكم لفلان توفى .. ودعواتكم لفلان سوى حادث ..
حتى من كثرتها ماتلاحظون قلوبنا ماتت ..؟ ماعاد تهتز مثل أول ..!
كل أهتمامتنا صارت دنيوية ..
ليش مانطلع مثل عائلة فلان ..؟ وليش مانسافر مثل فلان ..؟
ليه هم يسون وأنا لا ..؟
طيب القناعة وينها .. طيب مافكرنا أن كل هالأشياء بأمر من الله ..
صح أشياء تكون بأرادتنا .. لكن تكون أمور فوق أرادتنا تمنعنا أننا نتخذ قرارات بأنفسنا ..
والأهم الأهم الأهم ..
كنا قبل لاسوينا شيء حرام نموت خوف من الله ثم ثم ثم الناس ..
وبعد فترة لاسوينا حرام نخاف من الله .. ومن ثم ثم الناس ..
إلى أن وصلنا أننا نخاف من الناس ثم الله ..!!!
صاعقة كلامي ..!
لاوالله ماهو صاعقة .. واقع نعيشه ..
وخوفنا خليناه للخلق ..
أذكر وحده كانت لابسه لبس مو راضيه فيه ..
وكان المجلس مليان بنات .. والكل لابس " بنطلون " ..
ولأنها تبي تكون شيء حلو وتماشيهم لبست أكمام صغيرة ..
يعني " من بداية الكتف إلى الكف .. مو ساتر " ..
جلست وجلست وجلست ..
وقامت من المجلس .. ولبست جكيتها ..
وهي تلبسه تقول يارب أني أخلصت هذا الشيء لك يارب أني أخلصت هذا الشيء لك
وفي نفسها صراع يقول أنتِ مالبستي الجكيت إلا من خوف من الانتقاد ..!!!!!!!!!!!!
تبي تماشي العصر .. وتبي ترضي ربها ..!!
يعني كان لبسها علشان ماتنتقد ..
لكن قوت شيطانها وقالت يارب إني أخلصته لوجهك وتركت شيطانها ..
لهالدرجة ..؟
أنـّا ماعاد نخاف من نار تسلخ لنا جلودنا ..
ماعاد فيه خوف من الله ..
واللي ينصح ترى ماهو متطور ويجيه هجوووووم كثير
الناس تطوروا وأنت للحين ماتطورت .. وينك أنت عن الدنيا ..؟
يعني .. ترى الدنيا لازم تسوي فيها كل شيء حرام علشان تعيش ..!!!!
تعرفون الحين وش الرجال في المجتمع ..؟؟
هذا الكلام على لسان واحد من الشباب تقريبًا عمره 19 ..
يقول الرجال الحين هو اللي يكلم بنات كثير ومااااااايصلي ..!
واللي مو رجال .. هو اللي يستعمل مخدرات ..!
أبفهم يعني المخدرات طلعت شيء أهم من الصلاة ..؟
ولا نحط الأحكام على هوانا ورغباتنا ..؟؟
أنتوا تعرفون أننا كثير كثير غافلين عن لحظة الموت ..!!
ركزوا بالله وأقروا الكلمة بكل تركيز وتفكير ..
" الموت "
" الموت "
" الموت "
يعني توقيف عمل .. يعني كل ذنب أذنبته بتشوفه ..
يعني بتندم وبيتحسر قلبك على كل شيء سويته في الدنيا ..
يعني تجلس لحالك في قبرك .. لاصديق يفزع معك .. ولا أم تمسح على رأسك ..
يعني الأمور اللي أشغلتك في حياتك عن ربك .. ماااااااااااااافادتك في أخرتك ..
يعني بتكون وحدك .. مع رب صبر عليك سنين وسنين ..
ينتظر توبتك وأنت غااااافل ..
قال تعالى : ( كل نفس ذائقة الموت ) ..
يعني أنت راح تموت راح تموت ..
يعني الله ماقال بعض الخلق بيموت والبعض لا علشان
يكون هناك أمل نسعى في الحرام ومانفكر في آخره ..
ولا قال سبحانه اللي إيمانه قليل بتركه .. واللي إيمانه كثير بقبض روحه ..
لا .. قال : ( كل نفس ذائقة الموت ) ..
وتعرف ..؟ عيالك اللي أشغلت عمرك على رضاهم ..
ووصلت للربا والرشوة علشان تسعدهم .. أنهم يوم القيامة ماراح يفيدونك في شيء ..!
وأنهم يمكن يزودنك ذنب على ذنب وأنت في قبرك ..!
في المقطع تفحيط لبعض الشباب ..
طبعًا الآن طلعت فئة " الدرباوية " ..
لعيون محمد وسعد وحمد .. ويفحط ويفحط ويمووووووت ..
يعني منتحر ..!!!!!!!!
وبيجي بعض الناس يبرر موقفه .. طيش شباب ..! مسكين كان يحب خويه ..!
يعني كأن هالمبررات بتخلي ربي يغير حكم هالمنتحر .. وبيقول علشانه مراهق وطايش ..!
والتبريرات الثانية ..
عيد ميلاد .. يأخرون اليوم أو يقدمونه ..
أنا ماراح أكون أعلم من المشايخ ..
لكن احتفال بعيد الميلاد قبل اليوم اللي أنولد فيه .. يكون حلال عند البعض ..
مو تحسونه تلاعب في الدين ..؟؟
كأننا نقول ربنا .. ترى غيرنا اليوم بس علشان مايكون في نفس اليوم ..!
وأغاني العيد ميلاد تكون موجوده في الحفلة .. وعلى الكيكة رقم السنة ..؟
يابنت الحلال تبين تفرحين في عيالك ..؟
أفرحي فيهم وسوي حفلة لهم .. قولي هذي لكم فرحة فيكم ..
ليه عيد ميلاد ..؟ صرنا نقلد العالم تقليد أعمى ..
وكنا قبل نعصب على البنت .. ونقول لها لاطبوا النار بتطبين معهم ..؟
وطبت هي وأنـّا معها .. يعني لاشفنا أحد مسوي شيء حلو وهو حرام ..
سويناه وطبينا النار معهم ..
وتدري أن ربي كتب متى بتموت وفي أي ساعة ..
ومافيه مجال للمفر ..
( فإذا جاء أجلهم لايستأخرون ساعة ولايستقدمون ) ..
حتى الدقيقة ماراح تزيد ..!
( وماتدري نفس بأي أرض تموت ) ..
يمكن الحين الله يقبض روحك ..
حتى يمكن عيونك تتوقف عند هذي الكلمة وماتقرأ باقي كلامي ..؟
يمكن وأنت جالس تضحك وتشرب الشاهي مع أصدقاك ..
يمكن وأنت ماسك كأس الخمر ..! لاتقول لا مستحيل ..
الله قال : ( وماتدري نفس بأي أرض تموت ) ..
يمكن وأنت نايم ماتقوم .. وأنت جالس ماعاد تقوم ..
يمكن وأن ترقص في حفلات الرقص .. يمكن حتى وأنت تهز كتوفك ..! وأنتِ تهزين خصرك ..!
يمكن وأنت تصعد الدرج ..؟ يمكن وأنت تطالع التلفزيون ..
ويمكن وأنت تقرأ قرآن .. ويمكن وأنت رايح للمسجد ..!
ويمكن وأنت تصلي .. ويمكن وأنت سـاجد ..؟
/
على حسب العمل تختم حياتنا ..
آخر تعديل حنين الأشواق يوم
13 - 7 - 2021 في 01:21 AM.