البارت 25


وجدان وهي داخلة لغرفة نجود بحماس: نجود نجود بقولك
نجود اللي التفتت على وجدان : ايش؟
وجدان وهي متروعه: يؤ شفيك؟؟ تعبانه؟
نجود هنا ماقدرت تتحكم قي دموعها كأنها محتاجة احد يسألها شفيها
وجدان وهي تحضن اختها: بسم الله عليــــــــك .. شفيييك؟؟!!!
نجود اكتفت بالدموع اللي كانت تعبر عن ضيقها وهمها..
وجدان باستغراااااااب: طيب من اللي مضايقك؟؟ من قاهرك؟؟
نجود اللي حاولت تتكلم.. تشكي.. تفضفض.. كانت دموعها تسبق كلامها
وجدان: خلاص ياقلبي هدي.. ولو اني ماادري شفيك بس من الاخير مافيه شي يستاهل والله
*********************
في بيت ابو نواف
ابو نواف: لاااااااحول ولاقوة الا بالله..
ام نواف: الله يهديه بس..
ابو نواف وهو يحاول يستوعب: مسيار مسيار!! انا اذا جلست مع الرجال وسمعنا بواحد معرس مسيار نقدت عليه.. يصير ولدي معرس مسيار !! لا ومن غير مايقول .. الظاهر انه مافكر يعلمنا الا عشانها حملت _وهو ينزل راسه_ لاحول ولاقوة الا بالله .. هذا اللي اقوله بس
ام نواف: يمكن خيرة يابو نواف ماتدري وين الخيرة فيه
ابو نواف: هالولد من عمره وهو مايسوي الا اللي براسه مايشاور احد ولا يعمل حساب لاحد ولايراعي شعور احد .. ويبرر لنفسه اكبر الاغلاط.. الله يهديه بس
ام نواف: امين .. .وتوه متصل يقول انهم بيجون بعد بكره
ابو نواف: خير ان شاء الله .. انا بروح اسير على ابو سعد تعبان اليوم ماشفناه بالمسجد
ام نواف: مايشوف شر.. فمان الله
***************
ام طارق: هلا بالقاطعه ياكافي كأن مالك اهل
نوف: هههههههههههه لا يما شدعوى.. بس ابيكم تشتاقون لي
جيان وهي رايحة تسلم: مشتاااااااااقين والله مشتاقين _ وتبوس اختها وتاخذ ركوني منها_ ياااملللللللللللحه كبر صار يجنن
نوف: ههههههههه ايه يا حبيله
ام طارق: ان شاء الله مايحوسونك العيال؟؟
نوف: الااااااااا بشكل ما تتوقعون سلومي يغار منه بشكل فضيـــــــــــــــع مره جيت ولقيته حاط المخده على وجهه ركوني شوي ويموت وابوهم سوالي محاظره انتي ما تهمتين ومدري ايش
ام طارق: وهو صادق انتبهي له تراهم في ذمتك
نوف: شسوي يما والله اني حاطه عيوني عليهم بس سليمان الله يهديه مايجلس بمكانه وشقي
بيان وهي داخله: اوه الزينه عندنا اليوم _ وراحت تسلم على اختها_
نوف وهي تبتسم : هههههه.. اخبارك؟
بيان : تمام _ وتاخذ ركوني من جيان_ يا حليله والله صار رجال
جيان: هيه انتي ما تشوفيني منسجمه وانا العبه عيب
بيان : اقول فكينا... الا وين سلومه من زمان عنه الدب
نوف: مع طارق مدري وين وداه
جيان: الا انتي شفيك منفقعه كذا ؟؟
بيان: ايه والله انحفي صايره بطريقه
نوف عقدت حواجبها: صدق؟
بيان واللى عجبها ان اختها تضايقت وصارت تزيد في الكلام:ايــــــــــــــه مره بعد منتفخه صايره دباااا مو مليانه ولا نص ونص دبا دبا
نوف: يوووووه حتى ابراهيم يقولي سامنه .. والله ضيقتوا صدري
ام طارق: يلعبون عليك هذا انتي بعدين طبيعي تسمنين توك طالعه من النفاس
جيان: لا يما بس مو كذا
ام طارق: جيانوه اعقلي وخلي اختك بحالها

جيان: مشكلتها والله محد قالها افرمي وانفقعي
نوف: خلااااااااااااااص والله ضيقتوا صدري
بيان: لالا نمزح معاك شفيك ... بس سامنه هههههههههه
وجلسوا يسولفون ويضحكون ويتريقون على جسم نوف اللى سمنت بعد النفاس
*******************
في بيت ابو فهد
بعد ما هدت نجود شوي وقدرت تتكلم
وجدان: شفيك والله خوفتيني عليك؟؟؟
نجود بحزن: انا وعبد الله تركنا بعض
وجدان: يوووووووو انتي وياه دايم تقولين بنترك بعض بعدين ترجعون
نجود بصوت مبحوح : لا خلاص المره هذي ماراح نرجع لبعض ابد
وجدان باستغراب: ليــــــــــــــــــــــه!!
حكت نجود كل الكلام اللى دار بينها هي وعبد الله اللى كانت تقطعها شهقاتها
وجدان كانت مصدومه من الكلام اللى قالته نجود وحست صدق ان ماراح يرجعون لبعض مثل كل مره
وجدان:خلاص ياقلبي هدي .. الموضوع ما يستاهل كل هالدموع والمناحه اللى مسويتها
ناظرتها نجود وعيونها مليانه عتب ودموع: مايستاهل؟؟!! .. اقولك بتركه خلاص ماراح اسمع صوته..._وتركز عيونها بعيون وجدان _انتي متخيلة معي ؟!!
وجدان واللي مستاءة من وضع اختها: ادري ياحبيبتي طبيعي انك الحين متضايقه لانك مابعد استوعبتي بس يا نجود مصيرك بتنسينه والحياة ما توقف على احد ..صدقيني ياقلبي انتي بعد كم شهر بتلهين بالجامعة ودراستك بعدين بتتزوجين وتعيلين ..وبيصير عبدالله شي حلو مر بحياتك وبس..وهو نفس الشي بعد فترة طبيعي بيتزوج وبيلهى وبتروحين عن باله والله
_ لحظه صمت قصيره_
نجود بقهر: حنا ليش متناقضين ؟؟
وجدان طلعت عيونها: نعم؟؟ وش متناقضين فيه؟؟
نجود بنفس نبره الصوت: ايه .. حنا في الزواج يا قبيلي ولا لااااااااا ما ناخذ بس في الصداقه عادي صادقي اللى تبين مافيه احد يقولك لا يا تصادقين قبيلي ولا لا تصادقين .. هذي ندى اقرب البنات لي ومو قبيليه محد قال ليش صادقتيها ولا اتركيها مو قبيليه ليش في الزواج يتغير كل شي .. وهذا بن باز الله يرحمه كان مفتي المملكه ماقالوا مو قبيلي ماراح يصير مفتي ... انوع التناقض والعقد استغفر الله
وجدان : بسم الله عليك نجود هذا زواج غير و...
قاطعتها نجود:وليش غيــــــــــــــــر ؟؟؟ لييش؟ الانسان نقيسه ونقيمه بشخصه مو لايش ينتمي
وجدان:اول شي هذي اعراف تدرين شلون اعراف؟؟ يعني اقوى من العادات والتقاليد .. العادات ممكن تتغير عند ناس وناس حسب نظرتهم لكن العرف انسي يتغير مهما تغيرت العقليات والنظريات..ثاني شي انتي اول مرة تقولين الكلام هذا تدرين ليش؟؟ عشان عبدالله بس حبيتيه وتمنيتيه زوج وصار التعصب القبلي عائق لكم عشان كذا قلتي تخلف وعقد..تجربتك هي اللي غيرت نظريتك مو عقليتك انتي ..يعني بعديييييين لو صرتي ام وبنتك خطبها واحد توب بس ماله اصل بتوافقين؟؟_ومع ارتفاع صوت وجدان شوي شوي _وبعدين بصراحة يانجود المفروض ماتتأزمين انتي اللي جبتيه لنفسك محد قالك خذي رقمه محد قالك كلميه محد قالك ارجعي له بعد ماعرف انك اخت فهد ... لاتسوين مناحه انتي اللي حطيتي نفسك بهالموقف ...
نجود رجعت تبكي
وجدان اللي حست انها المفروض تأجل كلامها اللي كانت مقتنعه فيه ناظرتها بحنيه: بعدين ماتدرين ياحبيبتي كل شي خيره...فلنفرض انه قبيلي او انتي مو قبيليه تتوقعين خلاص الموضوع محسوم؟؟! لاطبعا عشان انتم بعيدين المدى عن بعض بس .. يمكن هالشي يخليكم تتعلقون ببعض زياده .. انتي عشانك تحبينه ماتشوفين الا محاسنه بس .. لكن لو المشاعر هذي لزوجك بعدين بتكون اصدق لان الزوج بتحبينه بسلبياته وايجابياته..ياحبيبتي لاتعيشين حزنك وسعي مدى تفكيرك .. فكري بواقعيه ومنطق
نجود وبعد مااقنعها وهداها شوي كلام وجدان: ادري بس بفقده
وجدان: طبيعي بتفقدينه لانك متعوده عليه وعارفه روتينه
نجود: لا لاني احبه ومااتخيل نفسي من غيره
وجدان: ( عسى ان تكرهوا شيئا وهو خيرا لكم.وعسى ان تحبوا شيئا وهو شر لكم.والله يعلم وانتم لاتعلمون)..قومي بس تعوذي من ابليس وغسلي وجهك وروحي كلي شي لانك ماتغديتي واجلسي معنا تلهين مو تحبسين نفسك .. ترى انا مااحب السلبيين
نجود: طيب
وجدان: كش عليك كنت جايه متحمسه بقولك شي
نجود: ايش؟؟
وجدان: خلاص بعدين.. الحين انزلي وانتي تتغدين بقولك
نجود وهي قايمه: طيب الحين بجي
وجدان وهي طالعه : يلا انتظرك