مـن فهمـها فهمـها
لـذة العـمـر يــوم ولــذة الـيـوم سـاعـه
بالسنيـن القديـمـه والسنـيـن الجـديـده
خير مافي حياتك صيـت طيـب وطاعـه
لا مشـاهـد قـنـاه ولا تـصـفـح جـريــده
الزمن لو ضحـك يضحـك عليـك بلكاعـه
وانت تضحك ولا تدري عن اللـي يريـده
مابـه إنـسـانٍ إلا واغـبـر الـوقـت لاعــه
ليـن يجـزا مـن أيــام الـزمـان الزهـيـده
ماتشوف المصايـب ليـن يكشـف قناعـه
وإن تلقـاك وجهـه شفـت فيـه النكـيـده
وإن قفيته سحبك وعشت نشوة ضياعه
وإن تقفاك قفـى بـك علـى القبـر سيـده
من وثق به غـدر بـه قبـل يجنـي متاعـه
كم زرع به بشـر وأقفـى وخـلاّ حصيـده
نطـرد أحلامنـا والعمـر يطـوي شـراعـه
والعمـر مثـل طيـرٍ مـادرى مـن يصـيـده
والليـالـي تعـلـم دون كـرســي وقـاعــه
وأغـلـب دروسـهـا لـلـي يتـابـع مـفـيـده
والبشـر كلهـم مـن بعـد ســن الرضـاعـه
ياخـذون الـدروس وجامعتهـم وحـيـده
قسم واحد مهـي بأقسـام طـب وزراعـه
لا تخصـص لغـات ولا تخصـص عقيـده
تعـطـي دروس مختلـفـه بـفـن وبـراعـه
مــن فهمـهـا فهـمـهـا والبـلـيـده بـلـيـده
 |
|
|
|