يا ملاك الكون ألماسك ثميني لك سلام وحب مع زود احترام
دام انا غاويك بالعطف ارحميني والطفي بالحال واهديني السلام
وهاتي يدينك فديتك في يديني في فضاء العشاق والدنيا عدام
وأسكريني ومتعيني وذوبيني واسكبيني عشق في كاس الغرام
زوديني من حلاتك واشربيني في شفاهك اه منن تحت اللثام
في جنانك جننيني وطيريني بالهناء زوجين في سرب الحمام
وامرحي من وين ودك تمرحيني ضيعيني ؛ لا عتاب ولا ملام
عوضيني ما مضى لي من سنيني عيشيني حلم في عذب الكلام
وارسميني يا هواي وامسحيني بعثريني في مساحات الهيام
وسمعيني من غرامك واسمعيني واشعلي لي شمعتك وسط الظلام
في دلالك يا حياتي دلليني دامني وياك ما بدي نظام
واغرقيني في عيونك وسط عيني واحرقيني شوق بعيون الأنام