مجموع الأوسمة: 17

في بيت راجح..

أم غازي ورشا في الصالة العلوية..
لأن رشا ماتقدر تنزل بسبب الجبس..
راجح في مكتبه المنزلي..

رشا\تكفين يومه حني عليها..
أم غازي بهدوء\عجزت أربي فيها وأعلمها..
حذرتها من الظلم ومن انها تتعرض لبنت الناس..
ماتسوي الا اللي في راسها..خليها تتربى يارشا..
رشا\لا تنكري انك مومشتاقة لها..؟؟
أم غازي\هذي بنتي وأكون كذابة أن قلت ما فقدتها..
بس بنتي لوت ذراعي باللي سوته..
وأثبتت لي أني ماعرفت أربي..
رشا\صل على النبي..الأمور كلها بتنحل..
أم غازي\اللهم صل على نبينا محمد..
وش اللي بينحل..وان رجعت شوق ورضيت عنها..
واذا رجع اخوك ورضيت عنه..
بنت الناس عن من بترضى..؟؟
بنتحمل ذنبها عند رب العباد..
لاتقولين غازي المسئول الوحيد عنها..
لا كلنا مابنطلع من ذنبها..
رشا\أنا والله مارضيت باللي يصير فيها..
لا لها ناقة ولا جمل في موت سعود..
صح هي تكون اخت القاتل..وقلبي في البداية صد عنها..
بس صدي عنها كان من قهرنا على الغالي..
راجح بحدة\الغالي الله يرحمه..
ومثل ماقلتي يا ام غازي كلنا ظلمناها..
وحن ندري بان الله مايرضى بالظلم..
قال الله في حديث قدسي
(ياعبادي أني حرمت الظلم على نفسي وجعلته بينكم محرماً فلا تظالموا)
مالنا عذر مهما تعذرنا..
رشا بعصبية\بس حن مارضينا بظلمها..
حاولنا نساعدها..بس غازي مافسح لنا المجال..
أم غازي\حاولنا..؟؟
ومتى حاولنا بعد ماجنت البنت..
بعد ما أنطفى نورها..
أهانات ضرب تحقير..
ما أحد قصر فيها..
راجح\مايفيد العتب بعد مافات الوقت..
وأنا صح تركت غازي براحته هالفترة..
يمكن يقدر يرضيها أو يصلح اللي كسره فيها..
بس اذا ماتعدل الوضع فأنا اللي بعدلها بعون ربي..
رشا\وش ناوي تسوي..؟؟
راجح يناظرها\أحط النقط على الحروف مـــع الكل..
رشا ما أرتاحت من كلامه..
والتفتت على أم غازي تهرب من نظراته..
رشا\طيب وش قلتي مع شوق..؟؟
أم غازي\لا..خليها تتربى..
راجح\أنا رايح الشرقية هاليومين..
اذا تحبين يا أم غازي تعالي معنا..
أم غازي\الله معكم يا ابو حمد..
بس مالي طاري لا على الشرقية ولا غيرها..
راجح\على راحتك..وعلى قولك خليها تتربى..
رشا\ومتى بتروح الشرقية؟؟
راجح\بنروح بعد يومين ع الخميس ان شاء الله..
رشا\نروح...؟؟؟
راجح\ايه ماتبين تشوفين أخوك؟؟
رشا\بلى..
راجح\بنروح لأخوك..

ليش قلبها مو مطمن لها السفرة..
ولا لكلام راجح ونظراته..
وش فيه ماهو طبيعي..؟؟
لازم انتبه لكل تصرفاته..
يمكن هو مايقصد شيء وانا شاكة فيه من عبط..
لا هو يقصد..وعنده موال وبيغنيه ..
اللي كاتم سر مدفون مثلي..
بيعرف اللي كاتم سر مثله..

تقابلت نظراتهم ونسوا من تواجد ام غازي..
كل واحد يقول مصيرك تنطق وتقر بسرك..



؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛

فزت من نومها وهي تصرخ بصوت مخنوق..
كوابيس كلها قسوة وألم..
ترتجف بمكانها وتتشهد بخفووت..
لاقدرة لها على النوم..
ولا قدرة لها على الصحوة..

أضقت بي ياعالم الظلام..
لم تنبذيني أيتها الأحلام..
ألا تحتضنني مملكتكم..
وتمنحني رؤية أمي..؟؟!


كادت تصرخ بذعر وهي ترىء الظلام يتحرك..
ويقترب منها بهدوء..

كيف دخل..؟؟
هل سمع الصراخ..
هل وصل نحيبها وهي نائمة الى أبواب قلبه..
أم تسللت شهقاتها الخائفة لجدران أذنيه..
أم انه يحنث بوعده من جديد..
فيتعدى حدودها المرسومة بالرصاص..؟؟!

أدركت بعد ثوان..
أنه كان بغرفتها قبل ما تصرخ..
وقبل ماتصحى وهي تبكي..

ما أهتمت لوجودهـ..
لأنه يدري أنها تبكي وهي مايمة..
ويدري بالكوابيس اللي تزورها كل ليلة..
لما تصحى يكون جنبها ورغماً عنها يحضنها..

بس الليلة ما أقترب منها..
ظل واقف بمكانهـ..
يراقبها..

جلس على آخر السرير..
مايقدر يشوف معالم وجهها بوضوح..
مايبين بها الظلام الا بريق عيونها..
وتمرد غرتها على جبينها..
الغرفة غارقة بالسواد ..
الا من نور خفيف يدخل من البلكونة الزجاجية..


غازي\أنا لازم أسافر..
سفرتي ما بتاخذ أكثر من عشر أيام..
هذي راح تكون سفرتي الأخيرة من دونك..
أبيك تكونين بخير..
وتوعديني بهذا الشيء..
لاتفجعيني فيك..

كان يتمنى لو تطلب منه طلبها الدائم..
وأنا بأروح معك..
ما بأجلس هنا لحالي..
ماهو بكيفك ترميني هنا وتروح..

لكن هالمرة غير عن كل مرة..
الجسم موجود..والأرادة مسلوبة..
القلب ينبض..لكن الروح غايبة..
يمكن هي بترتاح بغيابه على عكسه..
ويمكن تتشافى بغيابه..
لكن قلبه يخاف انها تختفي من حياته..

غازي\ما أبيك تطلعين من القصر أبداً..
ولا تفكرين ترجعين الملحق..
القصر لك باللي فيه..
لاتطلعين منه..
أوعديني تظلين بخير..


صدت عنه بألم..
دفنت نفسها بفراشها وتغطت بالكامل..
مايظهر منها غير شهقات مخنوقة بالوسادة..

لو أنه لم يعدها..
لكانت تبكي على صدرهـ إن شائت أو أبت..

فلتتجبر بصمتها وصــدها..
فهي من تملكت مالم يُمتلك من قبل..


هم أهل ودَي وإن صـــدوا وإن هجروا
وغايتي إن رضــوا عنّي وانْ غضبــوا

دَعْهُم يجـوروا فما للصَّبَ من أَحَدٍ
يُنجيه منهم إليه منهمُ الهَربُ

فهم أحبـــــــة قلبي لا عدمتُهُمُ
ما دمتُ حَيّاً وإن بانـوا وإن قربـوا ..


خرج من القصر متوجه للمطار..
محذر الخدم من ازعاجها او مضايقتها..
مهدد الحرس الشخصي..
بالمراقبة والحماية..

إستودعها الله قبل لا يطلع من المزرعة..


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛


شوق بخوف\ليش ماقلت لي من قبل؟؟
طالب ببرود\هذاني أقولك..
شوق\عمي راجح جاي بعد ساعة وتوك تقولي..؟؟
طالب\ليش خايفة منه..؟؟
شوق\لا مو خايفة..بس كان لازم أعرف..
طالب\اذا مو خايفة ليه مرتبكة؟؟
شوق بعصبية\لأنك بارد ماتحس عمي بيجي وانت مريح قلبك..
طالب بسخرية\وش أسوي مثلاً أقطع شعري..ولا أنحاش من السعودية..؟؟
شوق\طيب رشا معه؟؟
طالب\ايه رشا وغازي..
شوق شهقت بقوووة وتجمدت بمكانها..
وقف طالب وقرب منها..
طالب\وش فيك يا بنت؟؟
شوق بهمس\لا بــ يجي
طالب\لاتخافين مابيسوي لك شيء..
شوق\غـ غازي بيــذبحني..
طالب بحدة\تستاهلين الذبح..
لكن اللي بيجي غازي الصغير ولد رشا..
ولا أخوي واخوك تبرى منا..لاتنسين..
شوق بيأس\دائماً تقولي فوقي على نفسك..
أصحي من أحلامك وأوهامك..
وأنت ليش ماتصحى من ظلمك..؟؟
لاتنسى أنك أنت السبب في اللي صار..
طالب يهزها بقوة\من اللي تبلى البنت؟؟
من اللي ظلمها بظنونه التعبانة؟؟
شوق تبكي\أنــــــا..أنـا اللي ظلمتها
انا اللي كذبت عليها عند غازي..
أنا اللي تبليت عليها..
وأنا اللي أنجرحت منك ومن حقارتك..
طالب\أنا ماكنت أعرف هي من تكون..
شوق بضيق تصرخ\مايهم أن كنت تدري أو لا..
مايهم أن كانت هديل مايهم...
اللي يهم أنك حبيتها..حبيت غيري..
لا مو بس حبيتها الا عشقتها بجنون..
طالب\أنا ماحبيتها أفهمي هذي تخص اخوي..
كانت مثل الخيال في بالي بس..
شوق تضربه\كـــذاب كـــذاب..
شفت عيونك شفت شوقك لها..
وأنت ماعرفتها الا من عيونها..
ماشفت الا عيونها بس عرفتها..
تحبها لا تنكر لا تنكر..
طول عمرك أناني ماتراعيني..
تدري باللي في خاطري بس تكسرني..
أزعل وأزعل بس مايهمك..
تدري أني في النهاية راضية وساكتة..
وبأخر طعنة تحب وتعشق..
بس أنا ماعدت أبيك من زمان..
أنت ماتعترف بأغلاطك..
ماتعترف انك سبب في قهري..
ولا انك سبب في اللي صار..
كــــــــــــــــــــذاب..
طالب يهديها\أهدي الحين ونتفاهم بعدين..
راجح وهله وصلوا..
شوق خلينا قدامهم طبيعيين..
وأوعدك أفهمك كل شيء..
ولا تخافين من راجح ولا من غازي..

سحبت نفسها منه وطلعت غرفتها..
كانت تتسبح وهي تبكي..
وعتبانة على نفسها ليش ضعفت وبكت قدامه..
وتأكد لنفسها هالوقت ماهو وقت انهيار..
خصوصاً بوجود رشا وراجح..


خلصت لبس وبدت تسرح شعرها..
لما دخل طالب عندها..
هذي أول مرة يدخل غرفتها..
طالب\أنقلي أغراضك ألحين لغرفتي ..
راجح ورشا بينامون بهذي الغرفة..
وانتي نامي عندي..

خرج من غير مايسمع ردها..
والأكيد أنه لا..
وهي أحتارت مثله..
اذا ظليت هنا وش بيقول علي راجح..
ورشا بتذبحني..
يقولون اللي يقولونه..
لو يطق مارحت لغرفته..
وأحسن عشان يعرفون بالوضع وأنا ارتاح وأرجع مع عمي..


تركت أغراضها بالغرفة ونزلت..
سلمت على عمها وهي تحس بجموده معها..
كانت خايفة لا يتوطى في بطنها وزوجها وزوجته موجودين..
جلست جنب طالب عل وعسى تبعد عنه..
طنشها راجح أغلب الوقت وما تكلم معها..
الا لما سالته عن حاله..
ياويلي وأنا اللي ناوية أرووح معه..
والله مير يدفني بين الشرقية والرياض..

حست بروحها بتطلع لما خرج طالب من الصالة وطلع فوق..
تمنت لو تشرد وراهـ..
بس ماسوتها..
أنتظرت الهووشة طول الليل لكن ماصار شيء..
لا هاوشها ولا ضربها..


طلعت لغرفتها ورشا معها..
حست أنها تذوب بملابسها..
لان رشا بتفضحها الليلة وتهاوشها لانها بغرفة وطالب بغرفة..

وماكانت تدري أن رشا نفس حالها مرتبكة ولا تدري كيف تحل الوضع..
لانها تعرف بيت أخوها..
مافيه غرف نوم كثير..
غرفته وغرفتها..
فأكيد هو وزوجته بغرفته..
وانا وراجح بغرفتي..
ياربي وش هاالاحراج..
حتى كنبة مافيه..

طالب وراجح كانوا جالسين بالصالة العلوية..
وأغلب كلامهم عن مشروع غازي اللي أبتدوا فيه..
وراجح جاء الشرقية عشان يوقعون الأوراق الخاصة بالشراكة..

طالب\يالله يا أبو حمد تمسون على خير..
راجح\وأنتوا بخير..
دخل غرفة رشا وعينه على شوق..
طالب\تمسين على خير يأم غازي..
رشا\وأنت بخير فديتك..
طالب\شوق تعالي..
شوق\طيب..عن اذنك..
رشا\تصبحي على خير..
شوق\لا راجعة لاتنامين..
طالب يسحبها\لا مابترجع نامي..
رشا\ههههههههههه ان شاء الله..