مجموع الأوسمة: 17

مرام بهدوء\قمر..عمي بيدخل إذا حابة تغطين راسك..
أخذت الشال من مرام وتحجبت قبل لايدخل أبونايف..
أرتبكت لما دخل معه ولده تركي ومسفر وأبوهـ..
تمنت تختفي ولا تجتمع معهم بمكان..
الكل\السلام عليكم ..
هديل بصوت خافت\وعليكم السلام..
ابونايف بمحبة\بشري يا بنتي كيفك الحين؟؟
هزت راسها وهمست\الحمدلله..
ابونايف\الحمدلله محتاجة شيء يابنتي بخاطرك شيء..
لا تترددين تراك صرتي منا وفينا..
مسفر برفض\ايه حياك الله لا يردك الا لسانك..
ابونايف\حن هلك يابنتي وهذولاء عيالي مثل أخوانك..
مسفر\حتى انا...
ابونايف طنشه\قالت مرام انك تعبانة..ومارضيتي تروحين الطبيب..
مسفر\وشهو له تروح..نجيب الطبيب هنا أحسن..
تركي\مسفر..!!
مسفر بهدوء\مو تعبانة؟؟كيف تروح وهي تعبانة..الا اذا كانت ماهي بتعبانة..
تركي\ترى أبوي يناظرك اسكت قبل لا يتوطاك..
مسفر\ماني بساكت واللي مايعجبني ما ارضى فيه..
هديل بهدوء\لا ياعمي انا مافيني شيء الحمدلله بخير..
مسفر\الحمدلله المهم بخير..
ابونايف بعصبية\ولـــــد ....
مسفر ببرود\سم طال عمرك...
ابونايف\نايف خذ ولدك قبل لا احوسه..
مسفر\لا تحوسني ولا أحوسك..اسمعي يابنت الناس..
ان كنتي منقوصة وفاقدة غالين فحن هلك وسند لك..
بس إن كنتي مطرودة ومرجومة فمالك عندنا مكان..
اللي في بطنك منهو عليه جاوبيني؟؟
ابو نايف\مسفــــر..

وقف تركي بسرعة وسحب مسفر وخرجه غصب عنه..
خرج مسفر بعد ماوتر الجو بزيادة..
ما تستغرب نظرته لها..ولا رفضه لوجودها..
هي مثل الانسان التايه اللي تلاقيه بالشارع..
تضمه وتأخذه لبييتك..ماتعرف أصله ولا فصله..
ماتعرف اخلاقه ولا دينه..
تجهل أحواله عاداته..وهو يصد عنك وأنت تحويه..

ابومسفر\أعذري مسفر تراهـ عصبي ومايفكر الا بحالك يكون بخير..
ابونايف\ماعليك منه يابنتي..البيت لك انتي الداخلة وهو الخارج..
وأنا وعدتك مهما كانت ظروفك انا أبوك وحن هلك..
هديل بغصة\الله يعطيك العافية ياعمي..
بس أنا لي قرايب ولي أهل هنا وأنا ناوية اروح لهم..
ابونايف بقوة\أحلفي بالله العظيم إن لك اهل في ايطاليا..
هديل بصوت مكتوم\ماله داعي أحلف الله يخليك تخليني على راحتي..
ابونايف وقف\والله ماتطلعين الا ويدك بيد هلك ولا ماتطلعين..
كلام مسفر النذل لا يهمك ولا يزعلك..كفاية النظر بوجهك وينعرف أصلك..

خرج وأبو مسفر معه..
كان معصب على مسفر ويتمنى لو يذبحه بعد سواته بهديل..
بس مالقاه في البيت...
تهاوش مع تركي اللي خرجه قل لا يشوفه وهو معصب..

مرام بحنية\قمر ياطيوبة..لاتزعلين من مسفر..
والله مايقصد..تراه طيب مرة..بس مدري وش اللي صابه..
هديل بهدو\لاتعتذري عنه شيء متوقع من مسفر وأمثاله..
عن اذنك باروح غرفتي..

عاتبت نفسها بقهر..
وش اللي زعلك من كلامه...
مو كلامه صح وهذا اللي جرحك أكثر أن كلامه صح..
مو أنتي مطروودة..مرجوومة بحكم الـ................
إيه هو قال الصدق..ماتبلى عليك..
لا اللي صار ماهو انا السبب فيه..
أنا ماني مثل مايقول ويظن..
لازم أترك هالبيت وهله..
انا مو مرتاحة معهم ماني مرتاحة..

مرام تبكي\الله لا يسامحك يامسفر الله لا يسامحك..
مسفر يهديها\ليه ياقلبي كل هالزعل والدموع..
أنتي المفروض تفهميني..
مرام بقهر\لا ما ابى أفهمك..انت بس تبي تزعلني وتقهرني..
أنا حبيتها حبيت وجودها معنا..
ليه تهينها كذا..ليه تجرحها..
مسفر\لاني ماني بمثلكم طيب وعلى الفطرة..
بنت تايهه بدولة اجنبية مامعها محرم ولا اهل..
ماترضى ترجع السعودية وتطلع حامل والله يعلم وش من بلاوي مخبية وراها..
مرام\اسمع أنت..لا تقرب من البيت ولا ترجع ..
ما ابى اشوفك مرة ثانية هنا فاهم..
مدامت قمر موجودة أنت تظل بعيد..ولا أقولك أرجع السعودية..
مسفر\تظنين ما أدري وش اللي تفكرين فيه يا خالتي..
ولا غشيم عنك وعن تركي..أنسي اللي في بالك لانه ماراح يصير..
مرام\مسفر لا تتبلاني ولا تحلل نفسيتي وتستخدم هبالك علي..
البيت لا تقرب منه ولا ابي اشوفك..
مسفر بحدة\اللي في بالك أنسيه..
مرام\ليش تكرهني..؟؟مو أنا اخت امك وحبيبتك..ليش تكرهني ليش؟؟
مسفر بحنية\تدرين أني أموت فيك وأفديك بروحي..
بس هالبنت ما ابيك تحتكين فيها ولا تتاملين بشيء..
مرام بقهر\أكرهك..

قفلت الخط بوجهه وراحت تشوف تركي وتطلب منه يبعد مسفر عنهم..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

مدري بيبكي صاحبي لا توفيت..
ولا حبيبي ماتهمه حياتي..
أخاف ياقلب إلا من توفيت..
يبخل علي بديته في صلاتي..


قرب من أبوه وقبله على كتفه..
ومد كفه يمسح دموع ابوهـ..
علي بمودة\لا ماشاء الله اليوم الوجه منور والحال يطمن..
هادي\ايه الحمدلله حالته اليوم أحسن بكثير..
ابوعلي يهز راسه بزعل لعياله اللي مافهموا عليه..
احتاروا من دموعه المالية عيونه وتطفر بين فترة وفترة..
ابوراكان قرب منه وقبله على راسه..
ابو راكان\الحمدلله على سلامتك يا أخوك..
ابوعلي يهز راسه لاخوهـ اللي كان فاهم وش اللي بقلب حسين..
علي\ياعمي تكفى ابوي وش في خاطرهـ..
ابوراكان\الله أعلم....لاتضايقه بأسئلتك ياعلي..
علي قرب من أبوه\تكفى يوبه ريح قلبك مابه شيء يستاهل الزعل..
إن كنك عايف نفسك ترانا نموت فيك ومالنا غنى عنك..
هادي بمحبة\لا خلاص الزعل ماله عندنا مكان..
زعلنا على قدنا..صح يا الغالي..
ابو علي شد على يد هادي وسحبها لشفايفه يقبلها..
هادي مفجوع\استغفر الله يوبه..
تكفى يا ابوي لا تسويها..
جعلني فدوة لك..أنا أحب ارجولك ويدينك..
نزل براسه وقبل يدين أبوه وركبه وراسه ويحس بضيقة تكتم على قلبه..

ابوعلي يناظر أخوه يبيه يفهم سواله..
ابو راكان بغصة يهمس له\إنا لله وإنا اليه راجعون..
البقا براسك يا حسين دفنوها بيوم موتها..

طلع صوت بكاء ابوعلي عالي ويحزن القلب..
شهقات ونحيب مكتوم..
العيال ماهم فاهمين وش صاير مع أبوهم وعمهم..
الأب يبكي ويشهق..
والعم منزل راسه يداري دموعه..

هادي بدموع\يوبه تكفى خلاص لاتعذب نفسك..
وش اللي مزعلك وش اللي صاير معك ومبكيك..
راكان\يوبه اسالك بالله تريحنا..تراكم قطعتوا قلوبنا بحالكم..
وش اللي صار معكم وش اللي ذابحكم..؟؟

ابو راكان قرب من أخوه وصار يقرء عليه من القرآن بصوت جهوري خشوع..
ادمعت عيون راكان وعلي لسماع القران بصوته..
بعد لحظات من البكاء الملكوم..
خفت شهقات ابو علي ونام مغلوب على أمرهـ..

وظلت علامة الاستفاهم الكبيرة على حال الشايبين بعقل علي اللي كان مصمم يعرف وش وراهم..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

جالس ورى مكتبه..
عيونه تدور بالمكتبة..
مازال ترتيب الكتب نفس ترتيبها..
رامية كل كتاب بجهه..متقصدة تعانده وتضايقه..

ألتفت لأحد النوافذ بزاوية المكتب..
بأيام زعلها وجفاها له..
بعد ماضربها بالسوط..
وهي أعتصمت الصمت ورفضت تتكلم معه وتسامحه..
كانت جالسة تناظر الثلج من ورى الزجاج..
وهو جالس يراقبها..ويتعذر بأوراق منثورة على مكتبه..
سرحانة عنه بعالم مايشمله ولا يعترف بوجودهـ..
سرحانة بأهلها وماضيها..
يبيها تتكلم معه..ترد عليه..
تفتح له مجال يعتذر منها ويراضيها...

طال السكـــوت ولي متى حبل الزعل مشدود..
طال السكـــوت ولي متى بينا الرضى مفقود..

جلس قريب منها حط يده حوالين كتفها..
شهقة بألم بعد مالامست يده الجروح اللي بظهرها..
رفع يده وقبلها على راسها..
صدت عنه وكأنه غير موجود..
تلمس شعرها بأصابعه وكانه يمشطه..
همس لها\ابي ارضيك..
سكوتك متعبني..ردي علي بكلمة..
ارجعي مثل اول..فقدتـــك أرجعي..

أهتزجسمها الملاصق له من كتمها لشهقاتها..
مدت يدها تمسح دموعها..
سحب كفها من على وجها وقبل باطن يدها..
قبـــل دموعها اللي بيدها..
وأحتضن كفها بيدهـ ورفع راسها له..
نزلت راسها بسرعة وخبته بصدرهـ..
لمها بقوووة وهي بكت بصوت عالي..
أنتحبت بتعب وهي ترتجف..
بكت من اللي سواهـ فيها..
بكت ظلمه لها وخوفها منه..
ومن ألمها والحريق اللي تحس فيه بظهرها وجسمها..
بكت ويدينها تشد عليه بقووة..


رمى راسه على مكتبه بعنف ..
لعل ذكرياته المحاصرة له تخف وترحمه..

وداعاً صغيرتي وداعاً أميرتي
وداعاً يا ذنباً تفوح منه رائحة الطهر
بـ هاتان اليدان جلدت روحكِ بـ هما
أقترفت أسوء أفعالي ...!
بهما لامست طُهر بشرتك بهما
غازلت شعرك وكانت أصابعي مشطاً ..!
أهـٍ ياوجع يحتل يساري أيعقل أنكِ
لم تعودي فوق الأرض ..!

نور الحربي..


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


راجح حاول يتعذر لشوق وزعلها..
ويفهم طالب أنها مصدومة هالفترة لما تهداء وترتاح بتغير رأيها..
طالب ماكان عاجبه كلامها ولا الوضع اللي تبي تحطهم فيه..
حتى هو مصــــــدوم وأنفجع بخبر موتها..
مايتخيلها ميته وتحت التراب..
عيونها اللي سحرته نايمة لآخر الزمان..
وجهها..كيانها ..اسمها..
هي انسانة دخلت حياته..بغض النظر من تكون..
كان لها مكان كبير عندهـ..من أول ماشافها..
حـــزن ودمعت عينه لفراقها وموتها...

طالب بعصبية\ماهي بالحالها ياراجح المصدومة..
وماهي الوحيدة اللي ظلمتها..
راجح\طيب أنت وش ناوي تسوي..؟؟
طالب\أنا بأتصرف معها..بس انت ما أبيك تدخل بينا..
أطلع من البيت أو روح نام بكيفك..المهم هي لاتشوفك..
راجح\أنا بأخذ هلي وأروح بيتي..فمان الله..
خرج راجح مع زوجته وغازي الصغير وتوجهوا لبيتهم..
طلع طالب لغرفة شوق فتح الباب وفتح النور فيها..
طالب بحدة\قومي إلبسي عباتك يالله..
شوق بزعل\طالب لاتتعبني معك..قلت لك ما ابى ارجع معك..
خلني عند امي..
طالب بعصبية\الى متى؟؟؟
شوق بغصة\على طووول..ما ابى اطلع من بيت هلي..
ما ابى اروح معك..ابى اكلم هديل..خلوني اكلمها..
طالب\وهديل ماتت..كيف بتكلمينها؟؟
شوق\أكرهكم أكرهكم..أنت خليتني أظلمها أكثر..خليتني أتبلا عليها..
بسببكم قسيت عليها وظلمتها..
أنت وغازي المفروض تتعاقبون..وانا إيه حتى انا لازم أتعاقب..
بس كيف..قلي كيف..هي ماتت خلاص..ماتت..
طالب بهدوء\الله يرحمها...خبر موتها صدمني ياشوق..
حسيت بطعنة في قلبي هزتني...
يمكن لو ماعرفنها ماتعذبت..لو تركنها عند هلها ماماتت..
بس هذي كانت ساعتها ولحظت موتها..واللي ربي كاتبه لها..
ولو كانت بحضن أمها ماكانت بتسلم من لحظة الموت..
شوق\كذب علي مثل ماتكذبون على أنفسكم..
قولوا قدرها ومكتوب لها..قولوا نصيبها..
أكذبوا علي وعليكم وعلى الناس..
بس ربي أكبر منكم ومن كذبكم..حن قتلناها حن مسئولين عنها قدام ربي..
طالب وقف\وأنتي مو أرحم من ربي...
الله رحيم غفور..هي راحت للي يحبها أكثر منك ومن أمها وأبوها..الله مايعرف الظلم..
ومايقدر أحد يظلمها ويوجعها وهي عند ربها..
شوق\يعني ربي بيعاقبنا على اللي سويناهـ..؟؟
طالب\الله بيرحمنا..أنتي توبي واستغفري وربك كريم..
شوق\عاشت مقهورة ياطالب...ما أقدر أعيش معك وانا قهرتها وظلمتها ما أقدر..

صد عنها فتح الكبت طلع عبايتها وطرحتها..
توجه لها شالها وهي تصرخ فيه..
خرجها من الغرفة ونزل على الدرج وهي تصارخ وتنادي أمها وراجح..
خرجها منالبيت وركبها السيارة وغطاها بعبايتها..
كانت بتطلع ..ثبتها بحزام الأمان ..
وحرك السيارة وطلع من البيت..

كانت تهاوشه وتصارخ فيه تبيه يرجعها لبيتها لكن مارد عليها..
فهمت منه إنه بيكنسل الطيارة وبيروحون الشرقية بالسيارة...
لأنها ماتنضمن وش ممكن تسوي بالمطار وخصوصاً أنها بحالة نفسية سيئة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


خرج عبدالله من البيت وأتصل بأبوهـ..
عبدالله\السلام عليكم..
علي\وعليكم السلام هلا عبوود كيفك ؟؟
عبدالله\الحمدلله بخير..أنتوا كيفكم وسفرتك كيف؟؟
علي\الحمدلله بخير وكلنا مفتقدينك..يعني لو خذيتك معي كان أنبسطت..
حتى عمك هادي مشتاق لك ويسلم عليك..
عبدالله\الله يسلمه..يوبه ابي اكلم جدي حسين..
علي\جدك يصلي الحين لما يخلص باقوله يكلمك..
عبدالله\لا ماهو يصلي عطني اياهـ..
علي\قلت لك يصلي..افهم الكلام..
عبدالله\طلع من العناية ولا باقي..؟؟حي ولا مات؟؟
علي بصدمة\انت وش تقول؟؟عبيد من قالك هالكلام..؟؟
عبدالله بصوت مكتوم\أدري أنه مريض وأنت سافرت عشانه بيموت صح؟؟
علي\لاوالله يا أبوك هو بخير الحين وطيب وماحوله شر..
عبدالله\ليه ماتخليه يكلمني؟؟
علي\عبدالله تراك رجال وينشد الظهر فيك...
لاتعلم أحد باللي تعرفه لاجدتك ولا غادة ولا امك..
عبدالله\أنا أصلاً عرفت قبلك وماقلت لك..فكيف تعتقد بأقول للحريم..
علي\عرفت قبلي؟؟وش اللي عرفته؟؟
عبدالله\أن جدي تعبان وفي المستشفى..وعرفت أكثــــر من كذا..
علي\من اللي قالك؟؟تدري اكلمك بعدين لازم اقفل الخط..
بس صدقني يا عبيد جدك بخير الحين وحاله طيب..

قفل عبدالله من أبوهـ وهو يفكر بجدهـ وإذا كان مسافر عشان سياحه مثل ماقاله..
بس هو مو مصدقهم...

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


خرجت من دورة المياه بروب الحمام..
وتفاجئت بوجود مرام عندها بالغرفة ونايمة على سريرها..
مرام تبتسم\لأني أخاف عليك وعلى البيبي..
قررت أكون ملازمة لك هالفترة واهتم فيك..
هديل بهدوء\لاتغلبي نفسك معي..أنا صرت بخير روحي لزوجك الله يخليك..
مرام عفست وجها\لا ما ابى اروح له..باظل عندك..
صدقيني انا حبيتك وحبيت وجودك معي..
هديل\أنتوا عايشين هنا على طول..؟؟
مرام بحزن\لا أنا جاية مع تركي ومسفر أتعالج..
عمي ووابو مسفر جايين زيارة وراجعين السعودية..
كان المفروض يرجعون من فترة بس أجلوها..
هديل\يمكن علشاني اجلوها..؟؟
مرام\مو يمكن الا اكيـــد..
هديل\منحرجة منهم وهقتهم فيني..
مرام\لاتقولين كذا بيزعل عمي عليك...
هديل\سلامتك قلتي أنك تتعالجي..؟؟
مرام بغصة\كنت بخيــــر بـــ..ـــ..ـس ماعدت بخيـــ...ـــر...
دفنت وجها بوسادتها وبكت بصوت مخنوق..
ألتزمت هديل بمكانها وماقربت منها..
لكل إنسان همومه ومشاكله..
ماتقدر تدخل بحياتهم لأنهم بيطالبوا الدخول بحياتها...


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


الى الملتقى فجر الثلاثاء باذن المولى جل وعلى ..

كونوا بخيــــــــــــــــــــــــــر ,,,



صدووود’’’