مجموع الأوسمة: 17

البارت السبعــــون ..


تقولين :لماذا تحمّل الأربعين مالا تطيق؟!
لماذا تكثر الشكوى منها .. ومما فعلت بك؟!
تقولين أن الأربعين سن هادئة متزنة تخلصت من حمق العشرين
ومن غرور الثلاثين .. وقبلت أن تتعايش بسلام..
مع نفسها ومع العالم..
ما تقولينه ، أيتها الصديقة ، صحيح ومنطقي..
ولكن منذ متى اعترف الشعراء بالصحيح والمنطقي؟!
الشعراء يرون في الأربعين رحيل الشباب وقدوم الكهولة ،
سفر الربيع ووصول الخريف ، هروب النهار وهجوم الليل..
وأنا ، يا سيدتي ، أخاف أن تقلّم الأربعون أظافري ،
أن تكسّر أقلامي ، أن تحنطني ، أن تعطيني قلباً صناعياً ،
أن تجعلني مليئاً بالوقار .. والقش..
أود أن أظل في طفولة لا تنتهي..
والأربعون هجوم كاسح على الطفولة ..
تقولين : ولكن الطفل يبقى في الروح..
يبقى .. يبقى.. ولكنه يوشك أن يختنق..
ثمة كلمة أخيرة .. سأكف عن الحديث عن الأربعين ..
لسبب آخر..
ذلك أن الحديث عن الأربعين بعد أن تجاوزتها..
بخمس سنين قد يعتبر من باب التضليل!...

المرحوم بإذن الله تعالى..غازي القصيبي..


أرسلت الرسالة وهي تحس براحة..
لانها راح تقهرهـ وتغيضه..
وقبل لا تقفل جهازها أتصل عليها..
ظلت تناظر الجوال بتشفي وإبتسامة نصر مهزوزة..

أجل أنقهر أنا لوحدي قبل النوم..
لا يا حلوو حتى انت باخليك تموت قهر..

قررت تقفل الجوال بما أنه صار يعرف رقمها..
وصلتها رسالة وكانت متأكدة إنها منه..
فتحتها وغصة بإبتسامتها..

يامن عذابه يشققني ويرفاني
فرقاك غصب علي بالحيل مكتوبه ..
خبرت نصف تعب من نصفه الثاني
بعضي الرماد وبعضي نار مشبوبه ..

قفلت الجوال ورمته بالدرج الجانبي لها..
ضمت ذياب لها وغمضت عيونها..
فراقي صار عذابه ..؟؟
غيابي عنه مشقيه..؟؟

شف كذب أبووك..يقول أنا نصفه الثاني..
وهو ميت من دوني..
لو كان بيموت من دوني كان مات السنين اللي غبتها عنه ..
يحسب إن الكلام بيعوضني مافقدته..

الزمن بيحكم بينا ياذياب..
خلك شاهد علينا...

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛

كانوا بحديقة البيت مسوين باربكيو..
كلهم مجتمعين ما ينقصهم الا غازي..
لان راجح ما طلب حضورهـ..
وبعناد من رشا أتصلت في أخوها وطلبت منه يشاركهم..
تعذر بشغله وما يقدر يتواجد معهم بس هي لزمت عليه..

رمى راجح علبة مويا على طالب اللي يصارخ على شوق..
راجح\وعود يشق بلعومك..تصارخ عليها قدام عمها..
إذا رحت البيت كفخها..
طالب ينفخ\أنت تعال اسمع وش الخبلة تقول..
شوق بسرعة\طالب اسكت لا تعلمهم..
طالب\لا خليهم يدرون بهبالك..
شوق بزعل\طويلب مالك شغل..اذا ماعجبك الموضوع لا تجي..
طالب\هههههههههههه حلوة اعجبتني لا تجي..
يعني لمن بيزفونك..؟؟
راجح بهدوء\وش السالفة..؟؟
طالب\بنت اخوك تبي تسوي حفلة وتلبس فستان زواج..
راجح يبتسم\طيب وانت ليه معترض..؟؟
طالب عقد حواجبه\معترض لان كم سنة صار لنا متزوجين..
وبعدين إذا أنت ناسي ترى الحرمة حامل..
راجح\هههههههههه بس هي في خاطرها تسوي حفلة لنفسها..
وتبى تلبس فستان ابيض انت وش دخلك..؟؟
طالب\تلبس أبيض لمن..؟؟والحفلة مالها وجه ..
راجح\تلبس لنفسها..هي حابة تلبس وتسوي حفلة..
طالب\مايصير حفلة من دون معرس..
راجح\مالك شغل تستعرض في فستانها وتطيب خاطرها..
أنت خلك في شغلك أو في بيتك..أنا باحضر العرس..
شوق براحة\فديتك يا عمي..فهمت الحين شيء وفي خاطري..
كل البنات لبسوا فساتين لعرسهم وأنا ابى البس مالك شغل..
طالب برفعة حاجب\وأنا ابى البس المشلح وانفخ صدري ويعنني المعرس..
تصدقين اعجبتني السالفة..
رشا\ههههههههههههههه هذا اللي جالس يهاوش يوم جات على المشلح رضا..
طالب\أجل اللي لبسوا احسن مني..
لبى عصقووولة ولا يهمك احسن عرس نسويه..
ام غازي\ياوجه الله انت من جدك بتماشيها في هبالها..؟؟
تبون تفشلونا قدام الناس..؟؟
طالب\أفا حن نفشلك..؟؟
ما احد من الناس له عندنا شيء..كيفنا نعرس اليوم بكرهـ بعد سنة..
كيفنا نسوي عرسنا متى ما نبي..دمقراطية..
راجح\في عينك قال دمقراطية..قم شف اللحم أستوى ..
طالب\أعتقد إني ضيف ماله داعي أكرف..
قم أنت شف اللحم..عازمني تبى تشغلني عندك..
هذا وانا عريس وباخذ بنت أخوك..
أروح اتعشى فلافل أحسن من منتك علينا..
راجح مفتح عيونه\أعوذ بالله قلنا شف اللحم ماقلت أكنس الحوش..
رشا\ههههههههه عايش جوه أخوي مرة..
شوق تبتسم\وهو صادق عازمنا زوجك يشغلنا عندهـ..
راجح يتنهد\استغفر الله وش اللي خلاني أعزمكم عندي..
طالب\أتغشمر معك يوبه وش فيك..الله يهداك ماتقبل غشمرة..
قام طالب يشوف اللحم وراجح يضحك على كلامه..
راجح\أجل اتغشمر معاك...
طالب يبتسم\عامر يقول كذا..عاجبتني الكلمة..
غازي\السلام عليكم وحمة الله ..

ردوا السلام عليه ورشا حضنته ورحبت فيه..
جلس جنب أمه بعد ماقبل راسها..
وكانت ردت فعلها السكوت والتحيز عنه..
وبعد ماصافح راجح صد عنه بهدوء..

جلس قريب من شوق وهو يسمعها تتكلم عن حفلتها..
ناظر في أمه بس هي كانت صادة عنه وماتكلمه..
من بعد رجوعهم من عند هديل..
قالت كلمة وحدة في وجهه وبعدها صدت عنه..
أم غازي بقهر\ليتني ما شفته ..

تمنت إنها ماشافت ولدهـ ولا ضمته..
مايدري بسبب كلام هديل لهم..او لانه ولده..
مايلومها على كلامها لهم ولا يشره عليها..
هله ماقصروا فيها وكله منه..
تمنت امه لو حرمتهم من ذياب..
لو طردتهم او غلطت عليهم..
ع الأقل يكون عندهم سبب يواسيهم..

شوق\هاه غازي وش رايك..؟؟
غازي بهدوء\على راحتك..
بس انا مو عاجبني الموضوع..
شوق بزعل\ليه..؟؟والله إنها في خاطري..
أم غازي بحدة\أنا قلت لك بتكون حركة بايخة ومالها داعي منك..
هذا أنتي متزوجة وألحين حامل وتوك تبين تسوين حفلة زواج..
شوق بتصميم\يومه كان لنا ظروفنا لما ماسوينا حفلة..
بس الحين الحمدلله كل شيء تمام..وبعدين مو حفلة ومعازيم..
حفلة صغيرة تجمعنا وتجمع أهلنا القريبين منا وصديقاتي..

طنشتها أمها وماحبت تناقشها قدام احد..
جلست رشا جنب غازي وهي تبتسم له..
رشا بفرح\مشتاقة لك..مر وقت طويل ما سولفت معك..
غازي بمحبة\برسم الخدمة متى ما تبيني جيتك..
رشا\فديتك يا ابو ذياب دوم تجبر بخاطري..
شوق\آآآهـ ياقلبي على ذياب وش زينه..
رشا\ماخذ زين ابوهـ ..
غازي يبتسم\نسخة من أمه..
شوق بهدوء\متى أخر مرة شفت ذياب..؟؟
غازي\في ايطاليا..
شوق\ليه ما تطلبه منها..ع الأقل تشوفه وترجعه لها؟؟
غازي\انا وهي واحد..وما ابي ذياب الا وأمه معه..
رشا\اممم احيان كنت اشوف هديل تشبهك..
شوق بعبط\بدا تاثير النوم..بتنام الحين يا أخوي جاملها..
رشا بتطنيش\اكرميني بسكوتك..
لا والله بجد غازي..كنت اشوف فيها منك..
غازي باهتمام\كيف..؟؟
رشا بتفكير\اممممم اتذكر مرة في المزرعة بايطاليا..
دخلت مكتبك وكنت انت تهاوشها..وهي واقفة وتصارخ عليك..
كنتوا مقابلين بعض وانت معصب عليها مرة..
ههههههههههه هي ضربتك بكتاب وهربت منك..
وأنا قفلت الباب ما خليتها تخرج من المكتب..
شوق\ههههههههههه يوم كبت المويا بوجهك وزحلقتي..
رشا\ههههههه ايه..يعنني فازعة لاخوي..
طحت أنا وهي ع المويا وبدل مايرفعني رفعها يشوف لا يكون صار لها شيء..
غازي يبتسم\ايه أذكر..بس وين شفتي الشبه بينا..؟؟
رشا\كنت اشوفها تشبهك في قوتها..وكانها تستمدها منك..
كانت تصارخ عليك وتضربك مستقوية فيك..
ولما رفعتها من على الارض واهتميت فيها لانت معك..
وانتوا قبل دقايق كنتوا بتذبحون بعض..
صرت احسها تطبع بأطباعك..اذا كنت معقد حواجبك ومعصب..
تعقد حواجبها وتهاوشك قبل أنت تهاوشها..
واذا لنت معها تظل معصبة عليك بس بهدوء...

أم غازي\ياليتها خذت أطباعه..يمكن كانت اليوم مرتاحة..
شوق\وليه ما ترتاح..؟؟الحمدلله هذا هي رجعت وبخير..
ام غازي باستنكار\بخير..؟؟تسمين حالتها بخير..؟؟
لو سوت مثلنا وحرمتنا من الولد خمس سنين وقالت لنا مات..
يمكن تصير بخير..ولو طعنتنا في عرضنا وتقولت علينا..يمكن تصير بخير..
لو ضربتنا كلنا وحبستنا يمكن تصير بخير..
غازي\بس هي ماهي بمثلنا..وعشان كذا بتكون بخير..
راجح بحدة\ولو تظل بعيدة عنا بتبقى بخير..
أم غازي\وهذا اللي بيصير..صح يا غازي..؟؟

ناظر في امه وفي راجح اللي ماخذين موقف كبير منه..
ومابيرضون إن غازي يأخذ هديل مرة ثانية..
يدري برغبتهم يظنون إنهم يريحونها بإبعاده عنها..
ولو وقفوا ضدهـ بيرجعها له..لانها زوجـــته..

إذا راحوا جميع الناس عنّي وهانـتْ العشـرهـ
أضل الشامخ بـ دمعي وأقـول لـ ضحكتـي صيـري
أنـا مثـل الـذي يمشـي بـ غابـه كلّهـا خطـرهـ
أكمّل خطوة دروبـي ولا توقَـفْ خُطـا سيـري..

وقف وطلع من حديقة البيت اللي كانوا مجتمعين فيها..
لارد على أمه ولا على راجح..
تظل بعيدة عني وتكون بخير..
أجل والله ماعرفتوها..
هـــي تعاني..ماهو تبي قربي..
لانها ضايعة وعايشة بدوامه..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


في بيت ابوعلي..
كانت جالسة في الصالة مع الجدة وحنان..
هديل الصغيرة بحضنها وذياب يحاول يسحب هديل من حضن أمه..
حنان\هههههههه هديل تكفين هاتي بنتي ولدك متوحش..
هديل\ماعليك منه ألحين اعطيه كف يأدبه..
هههههههه شوفي كيف يبي يمسك شعرها..
فديته ذيب أمه الغيران..
الجدة\احرقتي قلب الولد قطي البنت وشلي الولد..

مدت هديل الصغيرة لامها وضمت ذياب بحضنها..
هديل\أفا يا عسووولة طلعتي تفضلين الولد على البنت..
يعني ذيبي أحب عندك من هديل..
الجدة\مابه شك..الولد احب من البنت..
هديل تضحك بصدمة\ههههههههه يومه حرام جاملي حنان ههههههههه
الجدة\اتكلم عنكم كلكم..دوم الولد يكون احب من البنت..
حنان\الله يسعدك يومه تحسبين انك تجرحين مشاعرنا..
ندري ان الولد يكون اغلى من البنت عند هله..
الجدة\الله يرحم أبوي كنت بنته الوحيدة وسبعة اخوان..
وكان يغليهم اكثر مني..
مع انهم كانوا يعذبونه كثير بمشاكلهم مع عيال الحارة..
وأنا كنت مباركة مايطلع مني الا لبيه وتامر..
بس هذا شيء مزروع في الآوادم..
أم علي\والله أنا ما افرق بينهم احب عيالي وبناتي..
حتى حنان أعتبرها مثل بنتي وغلاتها من غلات زوجها وعياله..
حنان\عساني فدوة لك انتي وقلبك الطيب..
بس حتى عندنا صح أبوي يحبنا انا وأخواتي..
بس يظهر كثير غلاة اخواني أكبر منا..
هديل\مع كل اللي صار معي بس ماحسيت ان ابوي يحب أخواني اكثر مني..
بالعكس احس إنه يحبني أنا وغادة أكثر..
الجدة\لان أبوك حنوون وقلبه طيب معكم..
أبوي كان يحبنا بس كان شديد ومايحب الدلع..
هديل\الحمدلله أنا غير ذا الذيب ما باجيب..
عشان لا افرق بينهم ولا أقهرهم..
الجدة بسخرية\إيه وزجك بيخليك على كيفك..يبي عيال وبنات..
هديل بقهر\وأنا وش دخلني فيه..؟؟
الجدة\أمك يا حسين..وش دخلك فيه..
أجل من وين يجيبهم عياله..؟؟
هديل\من البقالة ويخب عليه..
الجدة بشهقة\اقربي اقربي أشوف..
هديل بحذر\والله ما اقرب..شوفي يا عسولة خلينا حلوين مع بعض..
الكلام هذا لا تعيدينه وباجعل نفسي ما سمعت..
حنان\ههههههههههههههه ياويلك أشردي..
هديل بصراخ\يوووووومه لا تضربين آآآآآآآآآآآي ...
الجدة بتشفي\وعيديها يا بنت حسين اتمسدك بالعصا على ظهرك..
ام علي\ههههههههه خلاص سامحيها ما بتعيدها..
هديل\تضربيني قدام ورعي تبين تطيحين شخصيتي..
الجدة\العلم صار في بطنك..
هديل بجدية\يا ام حسين الكلام في الفايت نقصان عقل..
العلم صار عند أبوي وأخواني..ومن ذا البيت ماني بطالعة..
انا ادري إنه كلمك بس مدري وش قايلك..
بس والله يومه ما يعرفني ولا أرجع له وهذا أنا حلفت..
الجدة بعصبية\وش اللي عرفك إنه كلمني..؟؟
هديل بقهر\لاني أعرفه..وشكيت من كلامك الدايم عنه..
وكل ماحلا لك الجو فتحتي سيرته..وأكد لي عبدالله..
خذيها مني وبصراحة لو يموت مارجعت له..
الجدة بعصبية \والله إنـ............
هديل تقاطعها بحدة\والله أقهره مثل ماقهرني..

طلعت من الصالة وتركت جدتها معصبة من كلامها..
الجدة\تشوفين بنتك..ماخلت فيها سحى..
تراددني وتهدد..
ام علي\كلنا عارفين رايها..هي قالت ماتباه ولا بترجع له..
فليه تحدينها على أقصاها وتحلفين..
الجدة\راضية إن بنتك تترك زوجها ويطلقها..
ام علي\إن كان في قرارها راحتها فإيه راضية بطلاقها..
الرجال شكله قاسي ومن حرمانه لها منا واضح انه قاهرها..
الجدة\اللي بين الزوجين مايعلم به الا الله..
عقلي بنتك..الدنيا ماهي بعلى شورها..وإن سكت عنها الحين
فماهو بساكت بكرهـ..والولد بياخذه ويوجعها فيه..
ام علي\بيسكت ماعليه شر..
مثل ما صبرت بنتي سنين وتعنت معه بيسكت..
خليه يعرف إن الدنيا سلف ودين..ومثل ماضامها بينضام..
الجدة\لا تكبرين راس البنت بكلامك..
أنتي لا قابلتيه ولا سلمتي عليه كود إنه طيب وزين..
أم علي بزعل\ولا ابى اشوفه ولا اسلم عليه..
من يسوي سواته معروف انه شين وقوي عين ..
حنان\اذكروا الله وصلوا على النبي..
الموضوع كبير وماينحل كذا..هديل صاحبت الشأن..
وهي اللي بتقرر..
أنتوا تناقشوا معها بالحسنى ولا توقفون بصفه ضدها..

انتهى النقاش بينهم ولازالت الجدة على رايها..
إن هديل لازم ترجع لزوجها وتبطل زعل..
هو كلمها وهي هاوشته وشرشحته..
وكان يرد عليها بنبرة هادية واثقة..
واللي زاد عليها لما يقول لها يا عسولة..
تحس وكأنه يعرفها مثل عيالها..

الجدة بغضب\وش أنتي مسوي فيها يالوجه الودر..؟؟
غازي يبتسم\إن شاء الله كل خير..
الجدة\دامه خير ليه ماتبى ترجع لك.؟؟
غازي\هي ماقالت لكم فليه أقول..؟؟
الجدة\لانها بت أصيلة وتحفظ أسرار بيتها..
غازي\وأنا اشهد..
الجدة\بس أنت قاهرها وموجعها..
وهي كاتمة..قل وش انت مسوي..
وإن كنت على حق فلك مني أرجعها لك..
وإن كنت على باطل فوالله ماتعرفها وأنا حية..
غازي\ ليه والحلف يا عسولة..بغيناك عون يا ام حسين...
الجدة\عون لك على الناس..أما عليها فلا..
غازي\وماغلبني من الناس غيرها..
الجدة\شف يا أبوذياب والله إن قلبي يوجعني منك..
بسبب سواتك فينا وفيها..ولو الزمن يرجع ماتاصلها ولا تعرفها..
غازي\ما انتي أول من طلب الزمن يرجع..
ولو بيرجع صدقيني ما تبنا يا أم حسين..
الجدة\انت تباني أفزع معك عندها..؟؟
غازي\ولا لك لوى..
الجدة بإستغراب\وش علمك..؟؟
غازي\ما ابى أحد يزعلها ولا يضايقها..
كلمتك لأني اعرف غلاتك عندها..وانتي كبيرتهم..
لا احد يقهرها..

رغم إنه أعجبها إهتمامه فيها..
وكيف إنه ماطلب إلا راحتها..
بس تبى تكون قاسية معه وماتبين له راحتها له..
الجدة بحدة\إن كان لقت القهر معك فمابتلقاهـ معنا..
وشكلها والله أعلم ماذاقت الا مرارتك..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛