مجموع الأوسمة: 17

حرك السيارة وطلع من البيت..
من بعد اللي صار بينهم..
كل واحد ألتزم الصمت والصد..
قبل نص ساعة عرفت إنهم راجعين إيطاليا..
ما ناقشته ولا حاولت ترد عليه..
طمنها لما قال لها بيمرون على أهلها..
توادعهم قبل تسافر..

لمت اغراض ذياب وبعض أقل أغراضها..
بدت رحلة الرجوع من المنفى..
يتعالج ذياب وارجع لهلي وهو لحياته..
وبعدها مانعرف بعض..
يمكن هو ادرك مثلي إن الحياة بينا مستحيلة..
ماضينا بنى سد كبيييير أمام مستقبلنا..
مانقدر نتجاوزهـ مهما تصورنا ونافقنا بعض..

وقف قدام باب بيت هلها..
وقبل تتحرك من مكانها حرك السيارة مرة ثانية..
ومشى بسرعة كبيرة..
حتى إن الكفرات طلعت صوت قوي ..
ألتفتت على ورى ناظرت بإتجاه بيتهم بصدمة من تصرفه..
شافت هادي اخوها ومعه مســـفر..
ويناظرون بسيارة غازي بحيرة..

مد ذراعه عليها ومنعها تناظرهم..
ولفها بيده على قدام..
حست بيأس كافر يسيطر عليها..
وتاكدت إنها ما بتشوف أمها ولا ابوها قبل تسافر..
ماحاولت ولا فكرت تتكلم معه او تحاول تقنعه يرجعها..
كلامها لا زال آثر عقابه على شفايفها..
ومسفر موجود قدام باب بيتها..
مستحيل يرجعها..
صدت عنه وركزت عيونها على الشارع..
بتترك المملكة مرة ثانية..
من دون وداع أمها ولا رضى ابوها..

لما حست بافكارها تضايقها..
صارت تستغفر وتقرأ من صغار المفاصل..
خايفة لا يعورها ظهرها أكثر..
انجرح ظهرها امس بحربهم القاسية..
ماقدرت تنام ولاتتحرك من فراشها..
وبعد جهد نامت..
صحت وكان جالس على السرير قريب منها..
أبتعدت عنه بسرعة وتوجهت لدورة المياهـ..
كرهت وجودهـ ونظراته..
وتفاجئت بالعلاج مغطي جروحها..
حتى شفايفها بجزء منها لاصقة جروح..
ولازال يداوي بعد ما يجرح..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

تنهدت بقهر وهي تكلمها وتطلبها لـ المرة الثالثة..
مرام\أنا اخر وحدة جيتك..أنتي أبداً ما تزوريني..
خلود\عيييب وشق جيييب ازورك..
مرام بقهر\عطيني أمك ما ابي أكلمك..
خلود\أخاف تخربين اخلاق امي..
مرام\ههههههههه بالله خلوود تعالي..
خلود\لا تحاولين..تعالي انتي..
مرام\لا ولدي مزعج مرة..ما ابي ازعج امك واخواتك..
خلود\ايه صح لا تجيبينه..
مرام\حتى هو حاقدة عليه..؟؟
خلود\ما اضمن يمكن يكون متجرثم..
مرام\هههههههه انتي مو صاحية ابداً..
نص ساعة واكون عندك..
انا جاهزة لأني اعرفك مابتجين..
أشوف مين يوصلني لك..
خلود\تعالي على رجلك ولا تركبين مع رجال..
ترى مالهم امان يصكونك بالسيارة بأقرب جدار وتموتين..
مرام\ياشينك لا تفلسفتي..
مع السلامة..

قفلت وأخذت عبايتها..
نزلت وكان مسفر جالس مع جده..
سألتهم عن تركي..
مرام\وين تركي..؟؟
مسفر\طلع مع أبوي..
مرام\اممم طيب تقدر توصلني عندي مشوار..
مسفر\إيه اوصلك..وين بتروحين..؟؟
مرام\صديقة..
مسفر\يالله إذا جاهزة مشينا..
مرام\انا جاهزة بس اشوف الشغالة واجيك..

طلع مسفر ينتظرها في السيارة..
تاخرت عليه..ولما ركبت تمسخر عليها..
مسفر\نومتي الشغالة..؟؟
مرام\ههههههههه لا..
بس كنت اوصيها على الولد..
مسفر\ليه ما اخذتيه معك..؟؟
مرام\لا تكفى ابيه..
لو أخذته معي بتذبحه الخبلة..
مسفر\ههههههههه أعوذ بالله من حبها له يعني..؟
مرام\إلا من كرهها له..
مسفر بإستغراب\صديقتك تكره ولدك وعادي عندك..؟؟
وبعدين وش مسوي لها البزر عشان تكرهه..؟؟
مرام\هذا شغلك ماهو شغلي..
مسفر\شغلي..؟؟
مرام\إيه شغلك..
بصراحة يا مسفر البنت حالتها مستعصية..
هي بسم الله عليها عاقلة وطيبة وخلوقة..
مسفر\بـــــــس..؟؟
مرام\بس تكرهـ الدنيا لان فيها رجال..
تحقد على كل رجال..سواء قريب لها..
او واحد يمشي في الشارع..
حتى أخوها من امها وابوها تكرهه..
هههههههه تفكر تطلعه من البيت لما يخلص ثانوي..
مسفر\هي نفسها اللي صدمتها بسيارتي..؟؟
مرام\إيه هي..وترى حتى انت تكرهك..
مسفر بهدؤ\شيء طبيعي تكرهني..
مرام بإستغراب\شيء طبيعي تكرهك لأانك كنت بتصدمها بالغلط؟؟
مسفر يبتسم\لا اقصد شيء طبيعي تكرهني في حالتها..
يمكن أكون الرجل الوحيد اللي أذاها..
اعني تسبب لها بوجع جسدي..
مرام\لا تكون واثق..
مسفر\هي أبوها متوفي صح..؟؟
مرام\إيه مات مقتول..
مسفر\اممم واللي قتله أنقتل..؟؟
مرام تتنهد\لا ما انقتل..
مسفر\مرام أنا ابي اقابل صاحبتك هذي..
مرام بصدمة\نعـــــم..؟؟
مسفر\أبي أقابلها..أقنعيها تجي العيادة عندي وتعالي معها..
مرام بعصبية\هذا اللي طلع معك..؟؟
مسفر\أنتي قلتي إنها صارت شغلي صح..؟؟
مرام\انا قصدت تتزوجها..
أنت دكتور نفسي وبتقدر تتعامل معها..
والله من غلاتها عندي ابيها تطلع من حالتها وتعيش حياتها..
أعرفك طيب ومتفهم..وبعدين يا قلبي أنت صرت كبير..
ثلاثة وثلاثين سنة ليش ماتتزوج..؟
مسفر بحدة\لا زواج ماهو في بالي هذي الفترة..
وانا صرت مهتم بأمر صاحبتك..
لأني احسها فعلاً محتاجة مساعدة..
حالتها صعبة بما إن حقدها وصل لأخوها ولولدك الصغير..
فحاولي فيها وتحايلي عليها..
جيبيها العيادة ابي اتكلم معها وفهميها اني طبيب..
مرام بإحباط\ليش ماتبي تتزوج..؟؟
مسفر\انسي موضوع الزواج وفكري في اللي قلت لك..
مرام\عشان تمزع رقبتي..
بأقول لأمها وهي تقول لها..
مسفر يبتسم\طيب براحتك..هذا بيتهم صح..؟؟
مرام\كيف عرفته..؟؟
مسفر بسخرية\نسيتي إني صدمتها مرة وكنت بأذبحها..
ثم وصلتها بيتهم وكانت بتذبحني..
مرام\ههههههههه فديتك لا مانسيت..
اذا ما لقيت تركي بأتصل عليك لا تبعد..
مسفر\سواقك أنتي وزوجك..؟؟
انزلي قبل ارجعك البيت..

نزلت وهو انتظرها لحتى دخلت البيت..
أنصدم لما تقفل الباب بقوووة وهو واقف..
بعد ثواني ضحك وهو متأكد إن خلود هي اللي قفلت الباب بهذا الشكل..
وكأنها تبين وتوضح مدى كرهها لشوفته ووجوده..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛

مر عليهم وقت طوويل..
مستحيل كل هذا مشوار لـ المطار..
هم طالعين من الرياض..
وتوقعها انهم متوجهين لـ الشرقية..
وقفوا قبل ساعتين وصلى المغرب قريب من السيارة..
وهي صلت معه..
وكانوا مثل الغريبين مايتكلمون ولا يناظرون بعض..

تحركت في مكانها وابعدت ظهرها عن المقعد..
بدأ الألم يزيد عليها..
سمعت صوت ذياب..
ألتفتت عليه جالس بمقعد أطفال..
مدت يدينها له وخذته بحضنها..
أنبسط وصار يشهق ويصفق بيدينه..
تمنت لو يتكلم..
لو تسمع صوته..مشتاقة له..
شهرين كيف بتقضيها مع ابوهـ..
لو تدخلت بينا امس يا ذياب..
ماسمعت صراخي وبكاي..؟؟
ولا قلبك قاسي مثل ابوك..؟؟

وقف بحضنها ومد يدينه لغازي..
مسك ذراع أبوه وصار يشدهـ له..
سحبت يدينه بسرعة من عليه وابعدته عنه..
تضايق وصار يتحرك بملل..
تركته لغازي اللي مد يدهـ ..
سحبه له وجلسه بحضنه..
وذياب بحركة سريعة سحب العقال من على راس ابوهـ..

توترت وخافت لا يلهيه عن السيارة..
مدت يدينها بتأخذهـ ..
بس هو طلع صوت غاضب وتعلق بابوه اللي ضحك على تصرفه..
أنقـــهرت وصدت عنهم..
تبي ابوك ولا تبيني..؟؟
حبه ومووت عليه..
بس مصيرك تفترق عنه..
وحتى لو هددني فيك..أو انت عفتني ورحت له..
بأتركم واعيش لحالي..
ما بتجبرني ارجع له يا ذياب..
بعد علاجك يطلع من حياتي..
وحتى لو هدمني للمرة المليون..
بأتركه..
واتركك حتى إنت لو فضلته علي..

لما قربوا من نقطة تفتيش..
خفف سرعة السيارة وشال ذياب من حضنه ومدهـ لهديل..
تجاهلته ولا مدت يدينها له..
وقف السيارة ولف بجسمه على ورى..
جلس ذياب بكرسيه وقفله عليه..
نسف شماغه وعدله..
وبعدها كملوا مشوارهم..

وقف عند فندق فخم..
نزلت وهي تتنفس براحة..
كانت خايفة ياخذها لبيت شوق وطالب..
خافت لا يمنعها من اهلها ويقابل هله..
أول مرة يخالف ظنونها..ويطلع فيه عدل..

جلست مع ذياب لحتى يحجز غرفة..
رجع لها وهي وقفت ومدت يدها تاخذ المفتاح من يده..
عطاها المفتاح ورد على جواله..
غازي\هلا وعليكم السلام...
الحمدلله طيبين...كيفك وكيف شوق والوالدة..؟؟
اممم ليه تسأل....انا في الرياض....
هههههههه كيف عرفت......لا ياشيخ..

قفل جواله والتفت..
شاف طالب جاي لهم وهو مبتسم..
سلم على غازي وهو يسأل عن الحال..
رفع راسه لها والقى سلامه وسؤاله عن حالها..
ماردت عليه ولارفعت راسها له..
قرب منها غازي وخذا ذياب وعطاهـ لطالب..
سمعته قبل تبتعد يقول ان شوق وامها بالحديقة..

صدت عنهم وتوجهت لـ الأصنصير..
شافت رقم الغرفة على المفتاح وسألت احد العاملين..
دلها على الطابق اللي فيه غرفتها..
حست بوجع بقلبها..
غبيـــة..من متى وهو يعرف العدل..؟؟
إن ماراح لهم الجبيل جابهم لـ الخبر..
متى تكبرين وتفهمين اسلوبه..
وتقولين خالف ظنك الشين فيه..
لا ماخالف ظنك..
واستحملي نفاقهم وضحكهم بوجهك..
تحملي مرارة شوفتهم وحرمانك من هلك..
هانت يا هديل هانت..

كلمآ زآد بي الحنين وأعترتني نوبة بكآء .
همستُ لِ ذآتي :
..أسألك بِـ الله كُوني أقوى ممآ أنتي عليه..


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛