مجموع الأوسمة: 17

.
نادر : ولييييه ساكته على الحرق ليه مارحتي لامي وقلتي لها تحط لك اي شي يخففه ويهديه لين اجي
صدت شوق ماتبي تبين له ان امه السبب لكن وصل لنادر هالاحساس ووقف بذهول وهو يقول بصوت اشبهه للهمس من الصدمه : لا يكون امي لها علاقه بهالحرق
لفت شوق بسرعه : لا لا مالها شغل ماتدري ولا لها شغل
تأكد نادر ووقف بغضب لكن مسكته شوق : وين رايح !
نادر : ابعدي يدك واجلسي لين ارجع ونطلع المستشفى
شوق : نادر حلفتك بالله يانادر ماتروح ولا تزعل امك مالها والله
نادر: الحييين تقولين وش صار
شوق ؛ والله ماصار شي انا احرقت نفسي بالغلط والله خالتي مالها شغل والله
ماصدقها نادر لكن من كثر ما ترجته قرر يمشي الموضوع ولف بغضب: ألبسي عباتك بسرعه يلا
ركضت شوق تلبس ونادر متكتف وطلعوا وشوق تدعي انه مايسوي مصيبه
لكن طلعت ام نادر وهي متكتفه : وين على الله !؟ وش بلاك داخل مثل الطياره ولا فكرت تمر امك وتسلم عليها ! سيده لغرفتك!
التفت نادر بقهر : والله يا يمه انا مدري وش اقول ! انا لو بجلس سنين افكر اني يوم من الايام يكون قهري من امي ما اصدق
ام نادر: قهرك من امك !! ليييه شسويت لك يا نادر ! انا اللي شلتك وربيتك وتعبت عليك الحين تنكري
نادر : والله ما نكرتك يمه ! ما نكرت انا خايف لو بقيتي على هالحال وش بيصير فينا
ام نادر: ماعمري فكرت اني اذا زوجتك بتلعب بعقلك هالبزر وتغيرك علينا من يوم دخلت هالبيت وانت ما انت طيب
نادر بذهول : مب انتي اللي حطيتي رجل بالسماء ورجل بالارض والا تزوجيني بنت خالتي! وش صار الحين!؟ وش غير تفكيرك الحين! من هالشيطان اللي دخل براسك وقساك كذا! كل شي سكت وبسكت عنه الا انك توصلين للحرق
شهقت ام نادر: ايا اللي ما تخاف الله انت وياها تتهموني اني محرقتها ؟ لا ياحبيبي ماحرقت احد هذا من الرباده وقلة الدبره والسناعه لكن الشرهه ماهي عليكم علي انا اللي زوجتك اياها لكن اقولك من الحين ياتسنعها يا تطلقها
كانت شوق تسمع وتبكي مالها حل ولا حيله
ضحك نادر بغبنه: لا يا يمه لا و الساعه اللي بفكر فيها اني اطلق شوق افضل اني اموت ، ولا هي محتاجه انها تسنع ! وياليت يمه تتركين هالموضوع ترا دمرتوا بما فيه الكفايه !؟ وشوق لا تطلبينها شي هاذي الشغاله واطلبيها للي تبين شوق لا احد يتعرض لها
التفت لشوق وهو يمسكها بيدها: يلا ياشوق
اخذها وطلع ووقفت امه بغضب تراقبهم واول ما استقروا فالسياره لفت شوق : نادر ليه قلت كذا انا مستعده اسوي اي شي تبيه خالتي
صرخ نادر بغضب: لا يا حبيبتي مانك مستعده لشي ولا ابيك تستعدين لشي وسكري الموضوع
.
.
صرخ نادر بغضب: لا يا حبيبتي مانك مستعده لشي ولا ابيك تستعدين لشي وسكري الموضوع احسن
عم الهدوء ونادر بيموت من القهر مايدري ليه امه تتصرف بهالطريقه وليه اصلا قلبت على شوق وهي اللي كانت بتموت لو ما اخذها! وماكفاهم انهم حطوه في امر صعب مثل هالامر بيعذبونه فيه بعد! كفايه سلبوا من احلامه كم سنه وسلبوا من شوق حياتها وطفولتها وبعد يحاجون ! عجز يفهم وعجز حتى يتصرف
_______________________.
وفي بيت ام ضاري
دخل ضاري وهو يركض دخل وهو يستبشر ويبشر ركض لامه اللي واقفه بعصاتها فالمطبخ : يمممه وش تسوين يمه
ام ضاري : قهوه يمه
اخذها ضاري منها وجلس وهو يجلسها ولفت امه تناظر الفرح بعيونه: وش فيك يمه!؟ من هاللي مفرحك الله يفرح قلبه
ابتسم ضاري وقال: اليوم كلمت خلف وقلت له كل شي عني وقلت له بعد انك تبين تخطبين له عمته وتدرين يمه وش قال!؟ ام ضاري بترقب: وش قال!؟ قرب ضاري يعيد لها كلام خلف بالحرف حفظه بقلبه قبل لسانه يبشر امه فيه وكمل يقول: تدرين يمه وش كثر فرحة بهالحكي ! جاء يمه مثل الماء البارد غسل كل شي شين في قلبي رفعني فووووووق فوق وصلني الغيم يايمه ، تدرين اني بعد هالكلام ماهمني شي حتى لو رفضني جده وابوه وكل عايلته انا مابي الا هالكلام منه
ابتسمت امه بفرح وهي تمسح دموعها بشيلتها: حمدلله يمه والله يسخر لك الارض ومن عليها يا وليدي الطيب الناس ما تنساه يمه وان شاء الله ربي يكتب لك نصيب فيها يمه
ابتسم ضاري:اللهم امين يمه، تدرين اني كل ما شفت خلف والله ما اتذكر الا دعواتك الطيبه لي
ام ضاري : ان كانت دعوتي واجابها الله عشانك رضي يمه وبار في امك
ضاري :يابعد قلبي يمه يابعد قلبي
ام ضاري : ومتى تبي نروح
ضاري : بكره يمه بكره
ام ضاري : زييين يمه
سكت ضاري بحب يتخيل بس وش بيصير بعدين وكيف بيكون مصيره
_______________________.
وفي بيت ابو ناصر
رجع خلف ووقف على باب بيتهم وهو مايدري كيف يفتح الموضوع ودق الباب بهدوء وركضت شهد : مييين !
خلف :انا ياشهد
ابعدت شهد وهي تقول : اصبر شوي وادخل
انتظر خلف شوي وبعدها دخل متجهه للمجلس رغم احساسه بالعيون اللي تراقبه الا انها توجع قلبه و تحسفه مليون مره على قراره في اتخذه في تركها
دخل وهو يقول بصوت هادي : مسهم بالخير
لفوا عليه جده وعمه محمد : مساء النور ادخل ياخليف
دخل خلف وسكر الباب وجلس : وش الاخبار والعلوم
محمد بشك: مثل ماخبرتها! لكن الظاهر عندك اخبار
ابو ناصر: قل وانا جدك نسمعك
خلف : والله ياجدي انا عندي خبر وقررت اكلمكم فيه قبل ابوي يجي وعقاب بعد والعيال .
.
خلف : والله ياجدي انا عندي خبر وقررت اكلمكم فيه قبل ابوي يجي وعقاب بعد والعيال
محمد : صاير شي!
خلف : ماصاير الا كل خيييير ، لكن تعرفون ضاري
ابو ناصر: خويك اللي معك!؟
خلف :ايه
ابو ناصر: وش فيه!؟ خلف : كلمني اليوم قال ان امه يوم جت الزواج شافت وحده من عماتي وخاطرها تخطبها لضاري
لفوا يناظرون بعض ويناظرونه وقال محمد : طيب! ودامه بيخطب يدل البيت يجي ونشوف
خلف : ايه يدل البيت لكن قبل فيه شي لازم تعرفونه
ابو ناصر : وشو!
خلف بكل ثبات بدا يقص قصة ضاري وبكل قوة دافع عنه واثبت وجهة نظره وكمل يقول : من شهور تعرفون ضاري وشفتوا فزعته وشفتوا موقفه وتعرفون انه رجال وماناقصه شي ابد
ابو ناصر: والله والنعم لكن هو ماعرف احد من اهله ابد
خلف : لا ياجدي وتأكد ان هالشي مايعيبه دامه رجال شايل نفسه وانت بنفسك تقول كفو
محمد : انا بالنسبه لي مايهمني سالفة الاهل والقبيله كل المهم انه يخاف الله وانه رجال وغير ذا مو مهم
خلف : وانت ياجدي
ابو ناصر: قلي كلمه وحده بس توصف ثقتك فيه لدرجة انك تزكيه كل هالتزكيه
خلف بسرعه قال : يا جدي انا والله لو كل هالدنيا ضدي وضاري على يميني ان ما علي خوف وانا مستعد احط روحي على كفه ولا اسأل ابد وضاري لو يطلبني عيوني ما تغلى عليه وانت تدري اني مستحيل اقبل بأي شخص لعماتي
ابو ناصر : وانا ياخلف اثق بكلمتك اكثر من اي شي وعشان كذا توكلنا على الله وانا جدك خله يجي وان شاء للله خير
ابتسم خلف بفرح: زين وابوي وعقاب !؟ محمد : ابوك وعقاب انا اتفاهم معهم
دخل عقاب بهاللحظه : وش بتفاهم مع عقاب عليه!؟ الكل سكت وخلف يناظر بعقاب يدري انه بيقوم الدنيا ولا يقعدها
محمد : جيت بوقتك يا عقاب تعال
تقدم عقاب وجلس وهو يناظر بشك: وش صايرر!؟ محمد : ضاري صاحبكم كلم خلف يقول ان امه امس شافت وحده من البنات وبتخطبها
سكت عقاب فتره والكل يراقبه وقال : من هاللي بيخطبها
خلف : من عماتي
ابو ناصر: وش قولك ياعقاب
عقاب رغم كرهه لضاري الا انه في قرارة نفسه يعرف ان ضاري كفو وشاايف وعارف انه انسان يقدر يأمنه على حياته مو بس عماته
ويعرف انه طيب ويستاهل كل خير وعلاقته المضطربه معه كلها بسبب غيرة عقاب على خلف اللي كان صديقهم لحالهم وفجأه صار لهم شريك
قال بهدوء محد توقعه منه: والله ما اظلمه ابداً ضاري كفو ويتساهل كل خير واذا انت راضي ياجدي الله يوفقهم
انصدمو كلهم واولهم خلف اللي يحاول يتسوعل الموضوع عجز عقاب ما يرضى كذا الا وراه شي
محمد : زين اجل
وقف خلف : عقاب تعال ابيك شوي
.
.
وقف خلف : عقاب تعال ابيك شوي
طلع عقاب مع خلف وهو عارف صدمته ولف خلف بهدوء يناظره : غريبه راضي
ضحك عقاب : وليه تبيني ارفض!
خلف : بالعكس ما ابيك ترفض لكن كنت اظن انك بترفض والسبب معلوم! انت ما تطيق ضاري !
ابتسم عقاب : ما ادانيه ايييه لكن ما اكرهه له الخير ، ولا اظلمه ولو تعلق بنجوم السماء بجلس عمري كلمه ماهضمته لكن مابي اوقف بنصيب احد
ضحك خلف : والله انك تحييير يا عقاب ماينعرف لك ابد
التفت له عقاب بهدوء: صح هذا انا لكن انت وش اللي مغيرك!؟ وقالبك فوق تحت ما انت على خبري
اعتدل خلف بهدوء: وش بيغيري يعني !
عقاب : مدري بس ما انت عاجبني من تالي
مد خلف يده يخبط على كتفه: ريح نفسك اموري فالتمام
عقاب : حمدلله
سكت خلف يفكر وشلون قادر يخفي على عقاب ! عقاب اللي من عمر ماخبى عليه شي ! كيف قاادر يكذب عليه بكل قوه ! لكن يفضل يكذب عليه ولا يخسره
والتفت وقال : عقاب بقولك شي
عقاب ابتسم: قلت لك فيه شي!
خلف : لا ما تخصني تخص ضاري
عقاب : ايييوه رجعنا لضاري!
خلف : فيه شي لازم تعرفه
سكت عقاب يسمع قصة ضاري من خلف ولفت به الدنيا من الصدمه وقف مذهول يقول : انت صادق ولا بتخليني اتعاطف معه
خلف : مافيه شي يخليك تعاطف معه هذا واقع وصار
انصدم عقاب وهو يدور: شلون كيف ماحسينا !
خلف : ماحسيت لانك لاهي في تجريحه وكل شىي تدور طريقه تحرجه فيها
مسك عقاب راسه بضيق وفشله يتذكر كلامه اللي كان مثل السم لضاري والتفت يناظر خلف اللي قال : انا ماقلت لك قصته عشان تشفق عليه او تحاول تعاطف لا انا ابيك بس توقف هاللي تسويه فيه ابيك تعرف ان ماورى كل ضحكه حياة سعيده ولا كل انسان مثل ضاري يتسحق معامله شينه بالعكس وانت تدري
وما ابيك تضرب ضاري بهالحقيقه
لف عقاب بغضب: افا يا خلف لا توقع اني خسيس لهدرجه وكأنك ماتعرفني انا يمكن غلطت معه لكن ماتوصل اني اسوي هالسواة
خلف : انا ادري وابيك تصرف بحذر
عقاب : ابشر ابشر
ابعد عقاب في ذهول مصدوم عمره مافكر بهالشي وعمره ما توقع ان الانسان اللي يشع طاقه وراه هالقصه طاح من عين نفسه وضاق وكرهه الساعه اللي استقعد لضاري فيها
_______________________.
الليل
في بيت مبارك
اللي طول اليوم يراقب وعد يحاول يفهم صادقه او تكذب عليه لكن مجرد ما يناظر وجهها يحس انها ما تعرف الكذب في حياته كان تقريباً جمالها نقطة ضعف عنده عجز يبررها
اما وعد كانت فاهمه وحاسه بنظراته وكانت لصالحها وماصدقت ان العشاء قضى عشان تبدأ خطتها وتكمل عليها
بدلت وكعادتها كشخت واقنعت مبارك انها تعبانه وبتنام وعلى هالاساس نام مبارك .
.
.
بدلت وكعادتها كشخت واقنعت مبارك انها تعبانه وبتنام وعلى هالاساس نام مبارك
لكن في عز نومه صحى على صوت همس لف بسرعه وخوف وشاف احد جالس بزواية الغرفه نركز عيونه عليه وفز يبي يشوفه لكن ارتخى برعب اول ماسمع صوا وعد اللي مقابله الجدار وهي تقول : لا لا تكفون لا احد يأذيه مبارك ما أذاني ولا سوى شي يزعجني بالعكس بيسوي كل اللي ابيه لا احد يذبحه
اتسعت عيونه بذهول وابتسمت وعد بخبث اول ماحست فيه وكانت متعمده تجلس قدام الجدار وتتكلم عشان ترعبه ويصدق انها تكلم الجن
وكانت تردد وتقول : بيسوي شروطي لا احد يذبحه
ومدت يدها بهدوء بدون مايحس مبارك وضغطت على المسجل اللي في يدها وكانت مسجله فيه اصوات مرعبه وكأنها ترد عليها
وهنا ضرب الرعب في قلب مبارك اللي رجع تلحف بهدووء وهو معرق ومحتر مايدري وش يسوي
وفجأه رجعت وعد لسرير مبتسمه واول ماشافت منظره وهو يمثل النوم وجبينه معرق واعصابه مشدوده عرفت انه اكل الخطه كامله
انسدحت بضحك وهي تقول في نفسها ( الدنيا كيد ياعقاب وبنشوف كيف اضربك بصديقك اللي شاد الظهر فيه )
_______________________.
وفي بيت ابو خلف
كان خلف جالس مع خواته يناظرهم بهدوء ولفت عليه اماني : خليف وش فيك!؟ تنهدت خلف ببتسامه: ما تعودت عليهم ناقصين
حنان : اي والله اشتقت لوعد حيييل لها صوت بالبيت
ندى : وهالخايس مبارك ماجابها اليوم
وجدان: صح اني ارتحت من اوامرها بس ياشين البيت من دونها
همست ندى بضحك: للإمانه توقعت فيصل بيرتاح ويكيف لكن لو تشوفون ضيقته تخيلوا ما طلع من البيت اليوم ابد ولا قاشر غيث و سالم ولا سوى اي مشكله
ابتسم خلف : ايييه القطو مايحب الا خناقه
حنان : يكسر الخاطر طول اليوم ينتظرها تجي
خلف : يلا المهم انها بخير ومبسوطه كل شي يهون
اماني : كلمتها امي اليوم وصاحت امي وعمتي لين قالوا بس
خلف :ايييه اذا صياح اخذي صياح
لفوا على دق باب السطح وركضت وجدان تفتح: هلا مضاوي
مضاوي :هلا
خلف : وينك مالك حس اليوم
مضاوي : ابد مكروفه
ندى: كثري منها كلٍ ينكرف الا انتي
مضاوي بمزح: مكروفه عقلياً
خلف بنفس المزح : ليييه من اللي اخذ عقلك
مضاوي بضحك: الچويتي
ضحك خلف وهو من يوم ضاري قاله بيخطبون وحده من عماته تمنى لو هي مضاوي لانها اكثر انسانه تناسب ضاري وتفكيره وبيصلحون لبعض : اييه هين
ندى: اقولك ياحبيبتي بتعنسين دامك بهالطفاقه لا بياخذك لا سعودي ولا چويتي على قولك ولا حتى جني
شهقت مضاوي : ليييييه ياعيوني وش ناقصني وبعدين اصبري ان قاله الله بعرس قبلك
زلزلهم الصوت اللي جاء بغضب من الدرج: ماشاء الله على قلة الحياء ��
.
زلزلهم الصوت اللي جاء بغضب من الدرج: ماشاء الله على قلة الحياء
فزوا كلهم على صوت ابو خلف اللي صحى على اصواتهم وطلع بغضب : خييير انتي وياها اخر الليل وللحين جالسين!؟
مضاوي اللي توزت ماتبيه يشوفها ويغسل شراعها
خلف : الحين قايمين يبه
ابو خلف: والله لو اوصل الغرفه واشوف احد باقي لتوطى بطنه يلا
نزلوا كلهم ونزلت معهم مضاوي عشان مايشوفها لين يروح وترجع لاهلها لكن الصدمه ان ابو خلف قفل كل الابواب ووقفت وهي تشهق: ياويلي من امي وابوي الحين يدوروني ما يحصلوني
خلف : وانتي ماقلتي لا احد
مضاوي : كلهم نايمين وجيت وخليتهم
اماني : نامي هنا بسيطه
مضاوي: والله!؟ ادري بسيطه لكن اذا ما لقوني بيلعنون خيري
خلف : وش بتسوين نامي والصباح رباح
افترقوا ووقفت مضاوي وهي خايفه انهم يقلبون الدنيا عليها
_______________________.
وفي بيت ابو نادر
كان نادر في غرفته ماطلع من بعد مارجع من المستشفى وخصوصاً بعد ما امه وصلت اللي صار لابوه وكبرت السالفه
لفت شوق تناظره بضيق وهي تشوفه متضايق : نادر انا اسفه
لف نادر بهدوء: على وشو!
شوق : اني سببت بينكم مشكله
نادر: المشكله صايره من زمان يا شوق مالك علاقه انتي
شوق : بس ...
سكتها نادر اللي لف بهدوء: خلاص ياشوق سالفة وبتنحل نامي انتي
دخلت شوق باللحاف وهي كارهه ضيق اليوم ومشاكل اليوم
لكن نادر ماكان يدري كيف يتصرف مستحيل يظلم شوق ويخليهم يظلمونها ومستحيل يوقف ضد امه وابوه ولازم يشوف حل لكن كل ما التفت وشاف دموع شوق تضيق به الوسيعه زود
_______________________.
عند ضاري
اللي من الفرحه عجز ينام وهو يفكر ويتخيل وينتظر بكره يحس انه موعود بشي لكن خايف من هالشي وهو للحين مايدري وش ردة فعل عقاب وش اللي بيترتب على هالمووضوع
اخذ نفس وهو يقول ( يارب لا تعلقني بحاجة ماهي لي يارب )
_______________________.
ومن بكره
في بيت مبارك اللي عجز ينام وهو يتذكر اللي صار امس التفت يناظر وعد اللي جلست قريب منه وابعد شوي وابتسمت وعد : مبارك ابيك توديني لاهلي اسلم عليهم
مبارك : زين
وعد : وش قلت على السفرر !
مبارك: قلت لك انه تم وبعد ما نرجع ترتبين الاغراض عشان نمشي
وعد ابتسمت بكل سعة صدر ووقفت تجهز بفرح وهي اشتاقت لاهلها
كان مبارك يراقبها بهدوء وهو لازم يحل هالمشكله اللي طلعت بوجهه عشان ينعم بوعد وقربها
طلعت وعد : انا جهزت !
مبارك : يلا
اتجهه لبيت ابو خلف
_______________________.
وفي بيت الجد قايد
الكل نزل للفطور الا مضاوي مفقوده
.
.
وفي بيت الجد قايد
الكل نزل للفطور الا مضاوي مفقوده ونزل عقاب اللي من امس وهو في ضغط نفسي من سالفة ضاري يفكر في اي شي يكفر فيه عن افعاله لكن بدون مايبين لضاري
محمد : عقاب شفت مضاوي!
عقاب : لا وينها غريبه ما صحتني اليوم!
عهد: ما ندري صحينا مالقيناها
شهد: يمكن في بيت عمي
ابو ناصر: عزوز وانا جدك روح دورها عندهم
عزوز: ابشر
ركض يدق الباب وفتح ابو خلف : هاه عزوز عزوز:عمي جدي يقول عمتي مضاوي عندكم!
ابو خلف : مضاوي! وش يجيبها هالحزه !
وقفوا كلهم مستغربين وقالت ام ناصر: ياويلي وين راحت البنت !
انتشروا يدورونها لكن فجأه طلعت من غرفة البنات وهي خايفه : انا هنا
لف ابو خلف بغضب: وش جابك هنا! خبله انتي !
مضاوي ركضت ورا ظهر خلف اللي واقف وقال خلف يدافع عنها : امس كانت معنا وبعد ماقفلت انت الابواب نامت هنا
ابو خلف : انتي ماتقريييين ما تنثبرين في مكانك
ابو ناصر: وراك يا بنتي تخوفينا
محمد : ماصار شي يا جماعه خلاص
عقاب : تعالي يا جنيه امشي
طلعت مضاوي تركض قبل يضربها ابو خلف ودخلت بيتهم ولفت بضحك: وصلنا منطقة الامان
هيا : مجنونه انتي
ضربتها ام ناصر بغضب : والله ان عدتيها لكسر يدينك
مضاوي : طيب طيب
ورجعوا كل واحد لبيته ووقف عقاب بعد ما تجهز لدوامه وطلع وهو للحين شايل هم ضاري مايدري كيف بيواجهه وكيف بيقدر يتصرف
لكن وقف بهدوء يناظر سيارة مبارك واللي نزلت من سيارة مبارك نزلت وعد مثل عادتها شامخه ولا حتى تنتظر مبارك
ناظرته وعد بحده من فوووق لتحت وصدت وتركته وهي تدق الباب وتوجهه عقاب لمبارك وهو يسلم عليه بحراره وقال بصوت عالي : حي الله العريس وجهك منور
ضحك مبارك بغبنه : الله يسلمك
عقاب: حياك اقل.. قبل يكمل كلمته قالت وعد بحده : ابوي واخواني جو يا مبارك
التفت عقاب بحده مقهور شلون تقطع عزيمته لمبارك شلون تقطع كلامه
جاء ابو خلف اللي يرحب بوعد وخلف بعد وفيصل والكل يركض يسلمون على وعد قبل مبارك وصد عقاب بغضب وطلع لدوامه معصب ومقهور
وابتسمت وعد وابعدت وهي تركض لامها وخواتها
وتقدموا يدخلون مبارك ويرحبون فيه
_______________________.
وفي بيت النوخذه
كان جابر جالس بهدوء وهو يقلب كاسة الشاهي بيده
لفت ليلى باستغراب : جابر شنو فيك ساهي وتفكر صاير شي
جابر : لا مافيني شي
ليلى بهمس: اذا فيه شي قولي ترا انا اعين واعاون
التفت جابر لها بهدوء ووقف : تعالي وياي
ركضت ليلى وراه ودخل جابر وهو يسكر الباب : قعدي
جلست ليلى : لا تخوفني
جابر بارتباك : انتي تعرفين بنات القايد صح! .
.
.
جابر بارتباك : انتي تعرفين بنات القايد صح!
لفت ليلى برعب : ايه ليييش سألت !
جابر : ا ا تعرفين منو ااماني !؟ وشنو تصير حق خلف!
شهقت ليلى: شنو تبي بالبنت ! ليش تسأل
جابر: قصري صوتچ لا احد يسمعچ
ليلى خافت اكثر : جابر شحقه تسأل عن اخت خلف
ابتسم جابر : يعني اخته
ليلى: ايه اخته ! انت شعليك فيها!؟
جابر : ليلوه قلت لچ قصري صوتچ
ليلى: قبل بتقولي شعرفك فيها
جابر : ما اعرفها بس يوم الزواج.... كمل باقي اللي صار وختم كلامه يقول : وانا ماقصدي شي لكن البنت اعجبتني واجد و قمت افكر في موضوع الزواج لكن بسألچ عنها قبل
لفت الدنيا في ليلى وهي خايفه يصير شي ينكشف فيها امرها هي وخلف لكن خلف بعد يفكر بالزواج ويفكر يخطبها !؟ ويمكن يصير بينهم زواج ويصيرون انساب رجعت على صوت جابر: وين رحتي!؟ ليلى: مارحت مكان افكر شلون بتتصرف مع امي وابوي
جابر : اول قولي شتعرفين عنها وبعدين نتصرف
ليلى بدت تكلم جابر عن اماني وهي تحس انها خايفه ومرتبكه تعرف ان جابر ماعنده خرابيط ويحب خلف كثير واكيد نيته طيبه لكن خايفه
بعد ماجابر اخذ كل التفاصيل طلع وهو فعلياً يفكر بجد وترك ليلى خايفه ومحتاره
_______________________. وعند نادر
طلع من البيت قبل يبلش بمشكله جديد لكن حرص على شوق ما تحتك في احد
طلع يمشي على وجهه لكن ابتسم لا شعورياً اول ماشاف ضاري ومعه تركي مقبلين عليه وهم كعادتهم يضحكون
ضاري : حي الله نادر
نادر: الله يحيك يا ضاري وشلونك! تركي كيفك
تركي: حمدلله بخير
ضاري : حنا بخير انت وشلونك
نادر ببتسامه باهته: ماشي حالي
تركي : اسمع اجل خذ خويكم ذا بروح اخلص شغلي واشغلني
نادر : هاته محتاجينه
راح تركي ووقف ضاري بعيد وهو يدقق النظر في نادر وضحك نادر: وش فيك تناظرني كذا ؟؟
ضاري : ابد بشوف هالسواد اللي في وجهك وش سببه
نادر : المشكله نفسها هي نفسها وابشرك صارت اكبر
ضاري : لا حوووول الله تعال تعال
جلسوا ونادر ساكت مايدري وش يقول لكن ضاري بطريقته خلاه يتكلم
ولف ضاري بهدوء: الحين شوق ماهي بنت خالتك!
نادر : ألا بنت خالتي
ضاري : طييييب وش فيها امك عليها
نادر: وش دراني انا اقولك امي قلبت علي وعليها وعلى الدنيا ابي افهم وش صار ماعرفت
ضاري : والله مدري وش اقولك وضعك صعب لكن يمكن السالفه غيره !
نادر: بزران حنا يا ضاري ! وش غيرته
ضاري : يا ابن الحلال انت ولدهم الوحيد وفجأه قلبت وتغيرت وحست الدنيا اكيد بيفكرون ان شوق هي السبب
نادر بغضب: والله اذا فيه سبب هو مؤامرتهم علي ، يتحملون هاللي سووه .
.
.
ضاري : يا ابن الحلال انت ولدهم الوحيد وفجأه قلبت وتغيرت وحست الدنيا اكيد بيفكرون ان شوق هي السبب
نادر بغضب: والله اذا فيه سبب هو مؤامرتهم علي ، يتحملون هاللي سووه
ضاري : طيب اجلس معهم وفهمهم
نادر: افهمهم وش اذا هم مايبون يسمعون
ضاري : شوف اذا بتعاند وتكبر راسك وتطنش ترا الموضوع بيكبر يا نادر
سحب نادر زقارته بغضب: خير ان شاء للله خير
سكتوا وبعد فتره لف نادر: تعرف وينهم العيال؟؟ ضاري : ما شفت احد منهم والله حتى المحل باقي ما فتحوه
نادر: غريبه ! المهم يلا بروح لشغل
ضاري: يلا حتى انا
_______________________.
في بيت ابو خلف
رغم وجود مبارك الا ان العيال كلهم عند وعد وكان خلف يناظرها ببتسامه يشوف على ملامحها هدوء
ام وعد : هاه يمه عساك مرتاحه
وعد : حمدلله
فيصل: وعيييد اذا مبارك سوا اي شي يزعجك علميني وانا اقوم بالواجب
خلف بهدوء: ماعليها وعد خوف
ندى: وش فيكم متحاملين على الرجال ما سوى شي
سالم : يعني اذا سوى
ضحكت وعد : ماعليكم
ام خلف : انتم ليش هنا !؟ روحوا عند الرجال
خلف : ايييه روحوا
ام خلف : وانت وين بتروح !؟ خلف : بروح اجهز الذبيحه عشان الغداء واعزم الجيران
ام خلف: زين
رجعوا لمبارك ورجعوا البنات لوعد اللي كانت قد ماتقدر تكون واثقه وقويه
مضاوي: هاه وعد ان شاء الله مرتاحه
ابتسمت وعد : اووه فوق ماتخيلون
اماني بمزح: يعني ممكن نشوف تطورات وحب وغرام !
ابتسمت وعد : اذا صارت بتشوفينها
عهد باستهزاء : لا عاد دوري التطورات عند كل البنات الا وعد
لفت لها وعد بكرهه مخبى: اييييه صادقه تدور السخافات عند كل الناس الا عندي تعرفيني ماني حي الله ولا اجي على وجهي من كلمتين حلوه
ناظرتها مضاوي بهدوء والكل سكت وسكتت وعد
_______________________.
وفي مجلس ابو خلف
كان عقاب مسلط انظاره على مبارك كان يشوفه يسولف ويتكلم لكن يبان عليه التفكييير وعرف عقاب ان وعد لها يد واكيد سوت شي وكان ينتظر الفرصه اللي يختلي فيها بمبارك لكن ماعطوه فرصه وانصدم اول ماسمع مبارك يقول انه بعد الغدا بيسافر شهر العسل
صد وهو يقول ( هاذي بدايتها يا مبارك وخلتك تسافر وانت ما تحب السفر لكن هين الله لا يخليني ان خليتك تسافرين )
ماصدق طلعوا كلهم وابتسم وهو يقول :والله الظاهر انك استسلمت ! وييين السفر وانت وييين اخبرك ما تحبه !
صد مبارك بهدوء: وش نسوي ياعقاب اسم إنا عرسان
ضحك عقاب باستهزاء وخبث ولعانه :ايييه اجل كلام النهار يمحيه الليل يا عريس
.
.
.
ضحك عقاب باستهزاء وخبث ولعانه :ايييه اجل كلام النهار يمحيه الليل يا عريس
التفت مبارك بحرج: ابد كلامي ثابت لكن ما ودنا نزعل بنت عمك ونقصر عليها
قرب عقاب بهدوء وابتسم: القصور ما تجي منك يامبارك لكن الحق ينقال وانت رجال راتبك على قد حالك وديونك تاخذ راتبك كله وأجار بيت وتقسيط سياره وحالك يشوف الطريق ! وحنا مانبي منك الا تحفظ بنتنا وتكون رجال صالح مانبي منك لا سفريات ولا تضغط على نفسك ولا زوجناك الا ندري انك كفو والسفر ماهو مهم هالوقت اصبر لين تعدل امورك وسافر بعدين
لف مبارك على عقاب بهدوء: والله انك صادق بس !
عقاب: لا بس ولا هم يحزنون قلت لك انت عندك أولويات واذا تفكر ان وعد بتزعل ابد ماعليك وترا حنا عايله مانحب السفر الواجد والخرابيط واهم ماعلينا ان محل البنت بيتها لا سفر ولا بطيخ
ابتسم مبارك تطمن مادام اهل وعد مايحبون السفر ومتشددين يمديه يسوي اللي يبي : اجل خيرها بغيرها
وابتسم عقاب اللي حس ان مبارك اقتنع وتأكد انه خرب على وعد وارتاح شوي وهو ييقول بنفسه (اجل بتسافرييين وتدجين على كيفك معصي والله وانا عقاب )
_______________________.
في بيت النوخذه
بعد صلاة الظهر كان البيت هادي والكل في غرفهم يريحون شوي الا ليلى اللي امها حالفه عليها تنظف البيت ودق الباب وفتحت الباب بغضب متوقعته سعود اللي ازعجها هو والبزران يدقون الباب ورفعت المكنسه بغضب لكن نزلتها بفشله وشهقت
وابعدت عن الباب بسرعه وصد خلف بضحك وهو اللي كان جاي يعزم للغداء : افاا يا بنت النوخذه! كذا تستقبلون ضيوفكم
تفشلت ليلى : ع بالي سعود جنني من ساع يدق الباب وينحاش
ابتسم خلف بخفه : لا بارك الله في سعود هاللي ماعنده ذوق
ابتسمت ليلى بحب وهي تراقبه من فتحات الباب وكان خلف مبتسم على منظرها غاضب وقال: شلونك من بعد اخر مره
ابتسمت ليلى وهي تتذكر موقف البقاله وقالت تقلد كلامه : ابد من المسلمين اللي يؤمنون بالله ويحلفون انهم بخير وألف نعمه
ضحك خلف :هذا المهم
ليلى بهدوء : وانت !
استعجل خلف وقال: بخييير
وضحكت ليلى اللي كانت بتكمل سؤالها بس قاطعها ولف ضحك وهو حاااب ضحكتها كثيير : مادريت ان جوابي يضحك لذا الدرجه
تفشلت ليلى وقالت: لا مايضحك لكن استعجلت ماخليتني اكمل واقول ! وانت ليه ما تؤمن بالله وترحم نفسك وتلبس شي يدفي قلنا لك إحنا في فصل الشتاء وبرررد يامعووود
اخذ خلف نفس ملييييان حب وابتسم : ياامعووووده قلت لك إني اعيش في خامس الفصول وانا احتاج برررد يبرد على قلبي شوي وماعلي خلااف .