مجموع الأوسمة: 17

خلف: قبل تطرد وتقطع وترمي اعرف هاللي جايبها من اي قذاره جايبها ولا لعبت عليك بكلمتين وصدقت لكن لا تلعب عليك يبه لا هي شريفه ولا الولد اللي في بطنها ولدك ودبسوها فييييك بأسم انك شايييب ولا تدري عن الماء اللي يمشي تحت رجولك
شهقت حوريه وركضت لابو خلف تقول : يرضييييك يا ناصر يتهمني بشرفي يتهمني بالحرام ياناصر هذا اللي مقدر اسكت عليييه
ابو خلف : خللييييييف ياقليل التربيه هذا اخر ماطلع مع يا ابن الكلب اسمع اسمع تقش قشك وتنقلع من بيتي والمنافق ما يجلس عندي ومب بس انت لحالك انت ومن يشد على يدك سمعتني
ام خلف : طالت وشمخت يا ناصر
فيصل: تتخلى عن اهلك عشان هاذي!؟
جاء ابو ناصر وام ناصر على صوت الهواش وفتحت وجدان الباب وهي مصدومه ابو ناصر: وجدان وانا جدك وش هالصراخ
وجدان ببكى: ابوي طق خلف وطردنا من البيت
ام ناصر: ياويلي ياويلي
ابو ناصر: وشووو ولييه؟؟ سالم : عشان حوريه
دخل ابو ناصر بغضب: لا والله اللي ماعرفت اربي ياناصر هاذي اخر سواياك في عيالك
ابو خلف : اي عيال هذولا نقمه نقمممه ولا ابيهم في بيتي ابد
ام ناصر: خاااف ربك خاف ربك ولا لعبت في عقلك بنت ابليس
.
.

ام ناصر: خاااف ربك خاف ربك ولا لعبت في عقلك بنت ابليس
ابو ناصر: الله لا يحدهم عليك ولا يضيعون وانا وراهم وبيتي لهم سند لكن حط في بالك ان البيت اللي يضفهم ما يستقبلك ابد
ابو خلف : باللي مايحفظهم
خلف : لا تطيعها يبه لا تطيعها بتندم
اخذه ابو ناصر: تعال تعال ياخلف وانتم يابنات جيبوا اغراضكم وتعالوا
فيصل : والله بتندم يبه والله بتندم
سحبهم ابو ناصر واخذهم وهم كلهم مصدومين ومرعوبين ماهم مستوعبين ابد اللي صار وكان خلف يفووور من الغضب والكل خايف عليه
وصحى محمد والكل صحوا على صوت خلف الغاضب
محمد :خلف اركد وانا عمك وعلمنا وش السالفه !؟ فيصل: وش اكبر منها طردتنا من البيت !؟ محمد : فييصل بس خلنا نسمع
ندى: ياعمي هاللي ما تستحي كبت المويه بطريق امي وطاحت امي منها ويوم جاء خلف قالت... وكملت لللي صار
وقف فيصل: وشووووو طالت وشمخت
خلف : وليتها على هاذي بس
ام ناصر. تكلم ياولدي وش صار؟؟ خلف : هاللي ماتخاف الله حامل قبل تزوج ابوي
ابو ناصر:لا لا ياولدي كلش الا الظلم المره توها حامل وابوك قايل متزوجها من فتره
خلف: لا يا جدي ما ظلمتها ابد ما ظلمتها وابوي ماتزوجها من فتره تزوجها قبل يجيبها عندنا بيومين ووعد سمعتها تكلم وتقول انها متزوجته عشان يستر عليها ولا احد يدري وزود عليه شايفته غبي ويحسب الولد ولده
محمد : اعوووذ بالله اعوذ بالله مصيبه اذا هالكلام صحيح
خلف : انا كنت بقولكم ونشوف حل لكن ماخلف لنا فرصه
ابو ناصر: وعلمت ابوك
خلف : اييه وماهو مصدقني
ام ناصر: اكيد اكيد انه ماهو مصدق ياولدي هذا صعب صعب ومافيه دليل
ام خلف : حسبي الله ونعم الوكيل
محمد :طيب انت اهداء
فيصل : لا انا اللي بهد الدنيا على راسها
مسكه عزوز وقال محمد بغضب: فيصصصصصل اجلس ماهو وقتك اجلس
وقف خلف وهو يفتح ازاريره مايبي بهالوقت بعد يطيح اخذ نفس وامه وراه تمسح عليه وندى معها دواه
جلس بتعب وهو يقول : ان ما انحلت هالسالفه من لين يوم قدام وشاف له حل وطلعها من بيتنا والله والله مايردني الا الشرطه واخليهم يطلعون الكذب والصدق
ابو ناصر: تعوذ من ابليس واركد وننام الحين وبكره خييير
بدوا الكل يسكتون ويهدون وتفرقوا للغرف
وكانوا البنات بيموتون من القهر ومضاوي اللي بيغمى عليها من القهر:وليييه ساكتين ليه ماطبيتي عليها وذبحتيها
ندى: عجزت عجزت
شهد:قوموا نطب عليها ونغسل شراعها
سحر: اجلسي انتي فكينا شرك بعد
هيا: انا ماني مستوعبه كلاام خلف ابداً .
.
.

سحر: اجلسي انتي فكينا شرك بعد
هيا: انا ماني مستوعبه كلاام خلف ابداً
اماني : كنت حاسه محد بيفكنا منها الا وعد وخلف
عهد : الله يستر لايكونون ظالمينها
ندى: لا والله ياعمري!؟؟ حبيبتي اخواني ماهم ظلام ولا يتبلون على احد
عهد : نقول ان شاء للله
سحر : هدوا ياجماعه وخلونا ننام الحين واكيد بيحلها جدي وعمي اهدوا
ندى: ااااه ياقلبي اااه
وجدان: لو وعد فيه كان كسرتها تكسير
حنان: حمدلله ماهي فيه ولا ابتلت فيها
مضاوي : الله يجيبك ياوعد
سكتوا وهم مقهورين ماهم مستوعبين
_______________________.
بالنسبه لخلف كان مع محمد في غرفته
لكن عجزت عينه تنام مييييت من القهر ميييت من كلامها له ومن استغلالها لابوه اللي اول مره يكون على عماه بهالطريقه صح انه ابوه صعب بس ماهو لدرجة يصدق حوريه
محمد: ياخلف تعوذ من ابليس ياخلف ونم
خلف: كيف بنام علمني كيف بنام وانا اشوف اللي صاير فينا
محمد : صصدقني لحلها لو اضطر اني اطلع ابوك من البيت
التفت له خلف : كيف؟؟
محمد: ناسي ان البيت بأسمي واقدر اقوله يطلع هو وياها لين يعقل ويرجع
خلف : ااخ بس اخ
محمد : معقوله انه ماهو مستوعب بلاويها معقوله
خلف : لاعبه عليييه ياعمي غاسله مخه انت ما تدري وش يصير له وشلون يطلع من عندها مقلوب راسه
محمد :هونها وتهوون وان شاء للله بنحلها ارتاح بس ارتاح
جلس خلف بضيق وهو يحاول ينام بقدر المستطاع
_______________________.
عند ابو خلف
طبعاً ما صدق كلام خلف ومستحيييل يصدقه وكسبت حوريه هالنقطه بصفها وبدت مسيرتها فالكذب أليييين وصل ابو خلف لقناعه تاااااااااامه انهم كذابيين وانهم مايبون له يفرح بطفل وينبسط فيه ولا حس ابد بتأنيب الضمير أبداً ولا زعل انه ضرب خلف وهاذي اول مره
وحط راسه ببساطه ونااام
لكن حوريه ما نامت وهي تحس انها قريب الخطر ولازم تسوي شي يقطعهم نهائي من حياته
_______________________.
عند وعد
كان يوم السعد انها بتفتك من عقاب رسمياً وبينشغل بنفسه
وصلت وبدت تنزل اكسسواراتها لكن لفت على صوت مبارك اللي دخل وهو مخبي يدينه وراء ظهره
لفت وعد ببتسامه وصدت : وش فيك!؟ مبارك:لا لا لا تنزلين شي ولا تخربين كشختك خليك زي ما انتي
وعد : ليه!؟؟
مبارك: لفي اول شي
لفت وعد وفجأه طلع مبارك من وراه هديه وهو مبتسم
وضحكا وعد بصدمه: مو من جدك
مبارك: الا والله من جدي ، انا ادري مهما سويت ما رح تنسين لللي صار لكن عطيني فرصه واوعدك اعوضك
انصدمت وعد ماعمرها توقعت ابداً ان مبارك يسويها لكن طلع احسن من توقعها ضحكت وهي تاخذ الهديه وجلست وهي تفتحها
.
.
.
لفت وعد وفجأه طلع مبارك من وراه هديه وهو مبتسم
وضحكا وعد بصدمه: مو من جدك
مبارك: الا والله من جدي ، انا ادري مهما سويت ما رح تنسين لللي صار لكن عطيني فرصه واوعدك اعوضك
انصدمت وعد ماعمرها توقعت ابداً ان مبارك يسويها لكن طلع احسن من توقعها ضحكت وهي تاخذ الهديه وجلست وهي تفتحها وكانت طقم ألماس خفيف ابتسمت بإعجاااب
وجلس مبارك:اعجبك!
وعد : حلووو مشكور تعيش وتجيب
مبارك : ابد انتي اللي تحلييينه
ضحكت وعد وهنا ذاب مبارك اللي ماصدق الايام تجمعه الليالي مع وعد ويكون فعلاً متزوج من اجمل انسانه عرفهارغم قوتها
اما وعد تغيرت نظرتها لمبارك كثير وتتمنى انه يتغير صدق وماكانت تمانع ابداً في استمرارية زواجهم و...��
_______________________.
في بيت نادر
ابد ماعرف النوم هالليله ابد ابد طول ليله وهو يراقب شوق مايدري كيف انقلبت موازييينه وصار رسمياً يحبها يالله ياصغرها بجنبه وياللله قد ايش يحس انه سعيييد سعيد معها رغم ان اللي بينهم اشياء بسيييطه جداً بسيطه لكن كفيله انها تفجر الحب في قلب نادر
اما شوق كانت ملاحظه نظرات نادر من يوم رجعوا لكنها تحس انها لو اعطت نفسها مجال ممكن تتفوق عليه بالنظرات ونامت وهي تحس بالامان بجنب نادر
_______________________.
من بكره
عند العريس عند عقاب الللي صحى وهو يسمع صوت حركه حوله اعتدل وهو متوقعه عبد العزيز لكن تذكر انه تزوج اول ماشاف جود ترتب حوله اغراضها
ووقفت بخجل وهو تقول : ازعجتك !
قطب عقاب حواجبه بهدوء : ا لا لا
وقف ودخل بهدوء يغسل واخذ فتره يستوعب وبعدها طلع وفعلاً كانت وجد جاهزه وكاشخه
ورفع عقاب يده يناظر الساعه ولا هي الا ثواني ودق الباب وراح مستعجل واول مافتحه حصل عزوز واقف مبتسم وفي يده صينية فطور مزينه ومجهزه
عزوز: صباح الخيييير ياعريس
ابتسم عقاب : صباح النور
عزوز : مافيييه فكه بتصبح على وجهي حتى في صباحية عرسك لكن خذ هذا فطوووركم جهزته سحر وجدتي وبالعافيه وعاد الغداء والقهوه ننتظرك عندنا
ضحك عقاب : امري لله مالي مفر ، ويلا مشكورين
ضحك عزوز: ادخلها عنك !
ضربه عقاب بغضب: استح على وجهك
عطاه عزوز وراح وهو يضحك وما قاله وش صاير في بيت جده
اما عقاب رجع لوجد بهدوء وهو مايدري كيف يبي يتصرف معها يحس انه تايهه نزل الفطور بهدوء وابتسامه : صباح الخير تعالي افطري
جات وجد بهدوء وجلست مقابله وماكان عقاب يناظرها ابد يحس انه مجبور يناظر الارض ومايحط عينه عليها .
.
.

جات وجد بهدوء وجلست مقابله وماكان عقاب يناظرها ابد يحس انه مجبور يناظر الارض ومايحط عينه عليها
مايدري وش الرهبه اللي متملكته لدرجة انه عجز ياكل وقف وهو يقول :اذا قضيتي بنروح عند جدي
وجد : خلاص خلصت انا
عقاب : زين
لف ياخذ شماغه ويكشخ ويتعدل ويجهز لطقطقة العيال اكيييد
اما وجد ماكانت فاهمه من تصرفاته شي ولا تدري كيف بتكمل
_______________________.
عند خلف
اللي من صبح الله وهو جالس بالسطح عجز عجز يتقبل اللي صار امس ولف على صوت امه : خلف يمه ليه جالس هنا
خلف: ويين اجلس يمه وييين!
ام خلف : لا يضيق صدرك يا حبيبي بتنحل يا يمه بتنحل
خلف : الله يعين يارب الله يعين
ام خلف : يلا قوم ياحبيبي وانزل جدك وعمك ينتظرونك
خلف : يلا
نزل خلف وهو كل شوي يوقف وينادي عشان الطريق واتجهه لجده وهو ياخذ مفتاح المحل منه
محمد : اجلس افطر
خلف: مابييه يا عمي
ام ناصر: لا تروح جيعان ياولدي
خلف : مالي نفس
اخذ اغراضه وطلع مستعجل وهو زهقان من نفسسسه ومر ابو نهيان وليلى واهله ولا انتبه لهم وهو الضيق بين على وجهه
فتح الدكان بغضب وجلس بضييق وهو ينتظر احد من الشباب يجي يخفف عنه شووي
_______________________.
انا ليلى
كانت تمشي ورا اهلها مستغربه من مرور خلف الغاضب لللي اول مره تشوفه كذا
اكلها قلبها عليييه ماكانت مع الناس وهي تراقبه دخلت البقاله مع امها وماصدقت طاحت بيدها ورقه وقلم وبسرعه كتبت فيها ( خلف ! بسم لله عليك شنو فيييك !؟ مريت وخاطرك ضايق !؟ ان شاء الله مافيه شي عود ، انطرك من اسبوع ما شفتك ما ادري شنو صاير فيك ، الله يخليك طمني عليييك )
حطتها بيدها وطلعت وهي اجباري يمرون محل ابو ناصر
واول ما مروا ولفت ماشافت احد غير خلف ورمت الورقه بسرعه
وانتبه لها خلف ووقف وهو لاهي عنها هالفتره وركض واخذ الورقه وكان فعلاً محتاج هالسطرين اللي ردت روحه وهونت عليييه رغم انها عاديه بس اسعدته ابتسم بهدوء وهو مايدري كيف بيرد عليها
سكرها اول ماشاف ضاري جاي ووقف ودخل ضاري كالعاده مبتسم: هاااه كيف اخر حبه من العزوبيييين
خلف : اسكت لا اشق ثيابي .
.

.

خلف : اسكت لا اشق ثيابي
ضاري : افااا وش فيييك مسرع ماطقتك الغيره من عقاب وطفشت
خلف : والله انك فاضي
ضاري : خليييف وش صاااير !؟ خلف : ابد ابووووي طار عقله وانا بموت
ضاري : لييه!؟ خلف : اسمع يا رجال اسممع ... بدا يقوله وهو بيطق من القهر
ووقف ضاري بذهول : وشهههو وصلللت معها لهالمواصيل ! وش بتسووون
خلف : لازم اقنعه انها تكذب تكذذذب لازم يدري ان هاللي في بطنها مب ولده
ضاري: اشهد انت واختك ولا تدري خله يسوي تحليل ولا يسأل عن عمر الحمل من متى ويشوف
خلف : هو اذا طااااع يبي يسوي ذا كله لكن مسيطره علييه
ضاري : اكيد جدك ومحمد بيتصرفون اكيد
دخل نادر: يتصرفون في وشو!؟ خلف: تعال انت بعد تعال
دخل نادر وجلس يسمع بلاوي خلف اللي مصدوم منها وهم يحاولون يحصلون حل
_______________________.
في بيت وعد
رجعت من المعهد وصادفها ماجد عند باب بيتها وابتسمت بفرح: خاااالي ماجد
ماجد : هلا هلا باللي تزوجت وتغلت
وعد : لا والله ياخالي ماتغليت بس انشغلت تفضل تفضل
دخل ماجد : وين زوجك!؟ وعد : نزلني وراح
ماجد: زييين ماهو فيه
وعد : خلني اجهز القهوه وارجع لك
بسرعة البرق جهزت القهوه وجات ببتسامه: طمني عنك ان شاء الله انك نويت تمم موضوعك
ماجد : يعني والله قلت دام عقاب تزوج يمكن اخطب منه ويوافق
وعد : بيوافق ماعليك منه و...
سكتت على صوت التليفون : دقيقه
اخذته وهي ترد : هلااا ندى
ندى : وعد وينك
وعد : في بيتي
ندى: اسمعي تعالي بسرعه
وعد : بسم لله وش فيه
ندى: ابوي طردنا من البيت وخلف قال لجدي عن بلاوي حوريه وحنا محتاسين ويبيك جدي تجين ويسمع اللي سمعتيه
وعد : وشهووو طردكم !؟ انا اورييييها هاللي ما تستحي ! جايه جايه
سكرت وقف ماجدد: وش فيك من طرد من!؟
وعد : ابوي طرد اخواني من البيت عشان بنت ابليس اللي تزوجها
ماجد : نععععم !؟ وعد : اللي سمعت ونبي نروح
ماجد: يلا يلا
طلعوا بسرعه ووعد تحكي لماجد عن اللي سمعته وماجد في ذهووول
_______________________.
وفي بيت الجد قايد
طبعاً الكل قامت قيامته بعد ما حوريه شالت اغراضهم ورمتها من فوق عليهم وهنا محد قدر يسكت وفي عز الشوشره دق االباب وكان عقاب اللي انصدم من المكان وحوسته ومن وجيهم الغاضبه
التفت على وجد اللي ناظرته بصدمه لكن ركضت سحر تاخذها : حياك وجد حياك
عقاب: وش ذا!؟ وش صايير؟!
.
.
.

التفت على وجد اللي ناظرته بصدمه لكن ركضت سحر تاخذها : حياك وجد حياك
عقاب: وش ذا!؟ وش صايير؟!
اخذوا وجد داخل والتفت عقاب : وش صاير
محمد :يا بنات اجمعوا الاغراض ، وانت ادخل ادخل
دخل عقاب وجلس بصدمه وهو يشوف اهل عمه كلهم هنا : احد يقول وش صاير
ابو ناصر: هاللي ما يستحي طاردٍ عياله عشان وحده ما تخاف الله ولا تتقيه
عقاب : وشوووو !؟ ما مداه يستوعب الا دق الباب بكل قوه وفجأه دخلت وعد بغضب وما اهتمت لوجود عقاب : جدييي صدق اللي اسمعه
محمد : وعد وش فيك!
وعد : وش فيني بعد !؟ فيه اكبر من اللي صار عشان يصير فيني شي
دخل ماجد بهدوء: سلام عليكم
وقفوا يسلمون عليه ووعد متكتفه ولف محمد : اجلسي اصلاً نبيك في موضوع
جلست وعد وكل ذا قدام عقاب اللي تتالت عليه المصايب للحظه
_______________________.
وعند خلف
فز على زول فيصل اللي مقبل عليه يركض وعزوز ماسكه يحاول يهديه ودخل فيصل بغضب: خللف
خلف : وش فييييك!
ضاري :فيصل وش فيك !؟
فيصل: قم قم شف بنت الحراااام وش مسويه!؟ نادر: فييصل اجلس اجلس لا يصير لك شي
جلسوه والتفت خلف على عزوز: وش صااير !؟ عزوز بضيق: صحييينا لقينا حوريه راميه كل عفشكم بالحوش
خلف : وشهووووو !؟ فيصل: لا تقولي اسكت الحييين
مارد خلف اللي طلع مستعجل ولحقه فيصل ولحقهم عزوز وبقوا ضاي ونادر مذهولين
نادر : لا الشايب استخف وقعد
ضاري : ياااهي مصيبه ياشيخ لكن الله يعينهم
جلسوا في الدكان لين يجي احد ويسكره وهم للحين في ذهول
_______________________.
وفي بيت الجد قايد
ماكان احد صوب وجد اللي مفجوعه من اللي صاير والكل يهدي مضاااوي وندى وباقي البنات
ام ناصر: خلاص خلاص اص اص
ام خلف : بس يا بنات بتنحل ان شاء الله بتنحل
ام وعد : حسبي لله عليييه وعليها حسبي لله
مضاوي: فكوني والله والله لجيب راسها
هيا : بسسس خلاص اسكتوا محد له كلام لين ابوي يتكلم
سحر اللي حبت تلطف الجو: خلونا من السالفه بتنحل ان شاء الله وتعالوا نتقهوى مع وجد
ام ناصر: ايي والله فشله نسيناها الله ينكد على هالحوريه اللي نكدت علينا الله ينكد عليها
ام خلف : قوموا قوموا
اتجهوا لها وهي جالسه مع شهد اللي تسولف وترقع الوضع
ام ناصر: ماعليه يابنتي خليناك لحالك
وجد : لا يا جده عادي
ام خلف : كيفك ياوجد
وجد : حمدلله
بالقوه قدروا البنات يفتحون موضوع
_______________________.!
في مجلس الجد قايد
دخل خلف بغضب : جدي
وقف محمد بسرعه: خلف اهداء بنروح الحييين لابوك ونتفاهم
وعد : لازم تنحل هالسالفه لازم .
.
.

وعد : لازم تنحل هالسالفه لازم
ماجد: ان ما انحلت اختي وعيالها بيروحون معي
ابو ناصر: يا ماجد تعوذ من ابليس خلنا في مشكله وحده
فيصل: وش بتسووون يعني بتسكتون
محمد : محد ساكت لكن اصبروا
عقاب: هالادميه من يوم دخلت هالبيت وهو معتفس
ناظرته وعد بغضب وصدت
ابو ناصر: اجهزوا بنروح له
الكل استعد ووعد معهم كأنها رجال بينهم لكن قطع عليهم صوت صراخ وركضوا كلهم
وجاء سالم مفجوع ويقول : ندى ومضاوي واماني وجدان راحوا لحوريه بالبيت وطقوها
ركضوا كلهم للباب الفاصل وفتح خلف الباب ودخل وشاف المنظر اللي اثلج صدره كانوا متجمعين على حوريه ومكفخينها
واسرع يفككهم قبل يسوون كارثه ووقفت حوريه بغضب وهي تصرخ: والله لربيكم ياعيال الكلب
خلف: اص اص ولا كلمه
في هاللحظه جاء ابو خلف يركض من برا على صوت الصراخ : وش ذا وش ذا!؟ ابعدوا كلهم وركضت له حوريه تبكي : ألحقني ياناصر ضربوني وبيطحون ولدي
ابو خلف: لا ياللي ما تستحون تستفردون على حرمه
دخل ابو ناصر وقال: نااااصر سكتنا لها ولك كثييير لكن لين هنا وبس
ابو خلف: وانت معهم يبه
ابو ناصر: اييه اييه معهم لين تعقل وتعرف انك غلطان
ابو خلف: وش غلطي!؟ هااه!؟ خلف : اول شي هاللي في بطنها ماهو ولدك وهي بنفسها قالته
وعد : وانا سمعتها بأذني ومستعده احلف مليون يمين وديين
ابو ناصر: وهاللي جايبها انت ماتدري وش اصلها تبي تطلعها من بيتنا وتحقق من ولدها اذا هو ولدك او لا
ابو خلف : مستحيييل وصلت فيكم لظلم والشرف
فيصل: اذا هي صادقه خلها تقول انه ولدك
محمد من ورا الباب : وتسوي التحاليل اذا ماعندها شي تخاف منه
ابو خلف: معصي ما تسويها
ابو ناصر: هي كلمتين يا ناصر ومالها ثالث يا انك تحل هالبلاوي ولا تطلع من هالبيت كله
ابو خلف : تطردوني من بيتي
محمد : ما يضامون عيالك عشان وحده من الشارع وهم ابدى من هاللي ضامها عندك ومبديها على عيالك
وقف ابو خلف بذهول يسمع اعتراضهم عليه ويناظر حوريه اللي تبكي كل هالتضاد ضرب براسه لكن غضب وزعل وقال: مافيه شي اتحقق منه وبيتكم مالي قعدة فيه
بعد هالكلام طلعوا وتركوه بعد ما اخذوا البنات ومحد ابداً قالهم شي بالعكس قال فيصل: عسى يدينكم ما تمسها النار
خلف : وش بيصير الحين!
محمد : اكيد انه بيفكر وبيشوف الصح ماعليكم اجلسوا اجلسوا
ابو ناصر: جيبوا الغداء خلنا نتغدا ونعين من الله خييير
ماجد : انا بشوف اختي
خلف : زين ، وعد ادخلي .
.
دخلت وعد وجلس عقاب بهدوء وهو كل يوم يكتشف ان وعد مستحيل شي يكسرها
بعد موجة الغضب والهواش الكل جلس والكل هدا وارسل خلف فيصل وعزوز يسكرون المحل وهم ينتظرون حل من ابو خلف
_______________________.
مرت اليوم
وهم على حالهم محد راح الا عقاب اخذ وجد لأهلها ورجع في نفس اليوم
ووعد راحت مع مبارك ووصتهم ذا صار شي يتصلون فيها
اما ماجد حاول ياخذ اخته ام وعد وبناتها عنده لكن رفض خلف رفض قطعي وجلسوا
ومن بكره طلع ابو خلف من البيت وكان هذا محبط لهم لانه معناه ان ابوهم تخلى عنهم ورجعوا لبيتهم وهم مزاجهم جداً سيء
ومن هاليوم مر اسبوع ومازال خلف شايل اهله وناسي نفسه وناسي ليلى وينتظر بس متى يرجع ابوه وهو مقتنع باللي يقولونه
صحى من الصبح واخذ اغراضه وطلع شافهم جالسين للفطور كلهم
ندى: خلف تعال للفطور
فيصل: لا تفوتك شكشوكه
خلف : مابي بفطر مع الشباب خلص وألحقني
ام خلف: انتبه لنفسك ياحبيبي
خلف : ابشررري
طلع وهو توه يتذكر ليلى وانه لازم يرد عليها وكان هذا اول شي ناوي يسويه دخل الدكان وجلس وهو يشوف الوقت بدري اخذ ورقه وكتب فيها ( اسعد الله مساك يا بنت النوخذه .. انا اسف اني لهيت عنك وتركتك بدون خبر لكن ظروفي هالايام لك عليها واتعبتني حيييل ! لكن انا اسف للمره الثانيه وان شاء الله انك تكونين بخير مثل ماعهدتك ولا تخليني بدون خبر طمنيني عنك كل فتره وان شاء الله ايام وينتهي هذا كله .. وطول فترة غيابي حاولي تسلين بهالاغنيه.. ( لاتحسبنِّـي دَالِـه عَنـك ناسيـك ..
لاوالَّلذي تَنصـى المَخاليـق بيتـه
لاشك حالِ الياس دون الرِّجا فيـك ..
مَالي عن المكتـوب لـو مارِضيتـه)
.. استودعك الله ياليلى ..خلف )"
كان خلف فعلاً يستودعها الله خوف من اي شي يبعدها عنه
طلع لسعود الصغير وهو يناديه: تعال
سعود : هاه
عطاه خلف الورقه: ودها لبيت النوخذه قل من وعد لليلى
سعود : كم تعطيني
خلف : خذ ريال ريلا
ركض سعود وخلف يراقبه لين اختفى ورجع للمحل
_______________________.
في بيت النوخذه
كانت ليلى شايله خلف واختفائه وتدعي يجي منه خبر لو ماهو لها لو يجي عند جابر المهم تشوفه
ابو نهيان: انا رايح ياليلى اذا ردت امچ خليها تتصل بنهيان يبيها
ليلى: الله وياك يبه ، طيب
طلع ابو نهيان وحصل سعود : هلا يبه شنو تبي!؟
سعود طلع الورقه: هاذي لليلى من عند وعد
ابو نهيان: زين عطيني اعطيها
اعطاه سعود وركض وترك ابو نهيان اللي كان بيعطي ليلى الرساله بس كانت الرساله ماهي مسكره مضبوط وفي طرفها مكتوب ( خلف) ��
.

اعطاه سعود وركض وترك ابو نهيان اللي كان بيعطي ليلى الرساله بس كانت الرساله ماهي مسكره مضبوط وفي طرفها مكتوب ( خلف)
للوهله الأولى ما صدق الاسم لكن قرر يفتح الرساله وليته ما فتحها تصلبت يدينه على الورقه يقرا ولا يفهم وش المكتوب يحاول يستوعب ما قدر
كيييف ليلى !! بنته واعز عياله تسوي به كذا مستحيل دقق في الرساله وواضح فيها انها مو اول رساله وانه مشغول عنها وكثيييير كلام خنق ابو نهيان وغمم على عيونه
وماكان احد بالبيت الارهو وليلى ووقف واتجهها وهو يناظرها بذهول ولفت عليه مبتسمه :يبه شنو فيك رديت!؟
لكن طاحت عينها على الورقه ودق قلبها بخوف وناظرت ابوها وشافت نظرته ماهي نظرته المعتاده وجهه اسود وحواجبه معقوده
رفع الورقه برجفه وقال: شنو هذا!
ليلى بخوف : شنو!؟
صرخ ابو نهيان : انا أسالك شنوووو هذا ؟
ليلى بان عليها الخوف وارتبكت لكن قالت: مدري مدري
سحبها ابو نهيان: اقررري هالورقه اقرييييها اشووف
عجزت ليلى تمسكها من الخوف ماعمرها توقعت ان بيوم ابوها بيعصب عليها كذا اخذتها غصب وغمضت بقووه اول ماشافت اسم خلف
وكان ابو نهيان في صدمته للأن ويتمنى انه ماهو حقيقي: لييييلى تكلمي وش بينچ وبيييينه
بكت ليلى على طول وهي تقول : والله فاهم غلط والله فاهمني غلط ولا بيني وبينه شي والله
صرخ ابو نهيان : مابينكم!؟ وهالكلام وهالرساله والظروف والخرابيط اللي يخربطها
حاولت ليلى انها تنكر وتسوي شي وتكذب لكن ابوها بعد دموعها ايقن انه صدق من غير ما يحس ضربها كف بقهر وهو يهزها: تكلللللللمي شنو صاااار بينكم تكلمي
ليلى :واللله ماصار شي يا يبه والله ما صار شي
ابو نهيان: لا تكذبييييين ياليلى كفااايه هاللي سويتيه فيني وانا اللي اعطيتچ ثقه وخليتچ على راحتچ
ليلى: والله ما نزلت راسك يبه والله ماسويت شي يضرك والله
ابو نهيان: انطقي قولي وش صار !؟ومن متى تعرفيييينه!؟ وكيف عرفتيييه!؟ ليلى ماكان بيدها شي الا تعلم لكن قالت انه شافها بالصدفه عند جابر وانه مابينهم الا رسايل وبدا فيها هو وقال انه نيته جد وبيخطبها لكن خطبة جابر وقفته هالفتره
وبعد كلامها انهار ابوها وهو يضربها بكل غضب وهو مجروووح منها اكثر من ماهو زعلان رفعها بغضب وهو يصرخ: لوووو هو صادق ويبيچ جاء طلبچ من ابوچ ماجلس يلعب ويااااااچ يا غشييييييمه لكن كله ذنبي انا كللللله ذنبي اللي عطيتچ الثقه لكن انا اراوييييييچ واراووووييييه
وقومي ذلفي غرفتچ وياويلچ تطلعيييين
طلع بغضب وتركها تبكي بإنهييييييييييييييييييار
.
.
.

وقومي ذلفي غرفتچ وياويلچ تطلعيييين
طلع بغضب وتركها تبكي بإنهييييييييييييييييييار بتمووت ماتدري وش تسوي اخذت الرساله وركضت تبي تناظر تشوف وين ابوها راييييح ووهي خايفه لو يدري جابر وش يسوي
_______________________.
وفي بيت عقاب
اللي بدا يتأقلم على وضعه ويستوعب وبما ان ماعنده اجازه طويله من اليوم راجع لشغل
طلع بعد ما جهز وقابلته وجد ببتسامه : عقاب رايح
عقاب : اييه واخلص على الساعه ظ¦ وبمر لخواتي اقولهم يجون عندك لين اجي
وجد : زين بنتظرهم انا واجهز لهم القهوه تبي اسوي لك شي اذا رجعت
ناظرها عقاب بهدوء وهو من يوم تزوجها وهي تداريه واللي يبيه تسويه بدون جدال وهذا اللي يبيه : سوي اي شي ينوكل
وجد: ابشر
طلع عقاب بهدوء وهو يحس انه اشترا راحت باله بهالزواج
اتجهه لبيت جده قايد ودخل وهو ينادي ياولد
طلعت مضاوي تركض : هلا هلاا بالملح والقبله وييييينك غايب من امس
عقاب: ماني بفاضي لك انا انسان مستقر
عزوز: اذبحووووني فدا للاستقرار
ضحكت سحر: اذا بتداوم قول لوجد تجي لنا
عقاب : لا لا هي قالت لي اناديكم عندها نادوا البنات وروحوا لها
ضحك محمد : والله كبرت يا عقاب
عزوز: وغرقان فالدلع
ضحك عقاب : اقول اعقلوا
مرتهم شهد لابسه عبايتها ووقفها عقاب: وييين!!
شهد: بروح لوجد
محمد : ماشاء للله ما انتظرتي
هيا: العبايه جاهزه
شهد: والله انا ماصدقت يجي نفر جديد يغير جوي وعقاب راضي عليه ومايقول شي عشان كذا فمان الله
طلعت وهم يضحون
هيا: الله يسامحك يا عقاب مسبب لها عقده
مرتهم مضاوي بعد لابسه وطلع عقاب وهو يضحك واتجهه لبيت ابو خلف ووقف يدق الباب وطلع فيصل : هلا عقاب
عقاب : هلا وين خلف !؟ فيصل: طلع بدري
عقاب : زين ما جاء خبر من عمي
فيصل : لا
عقاب : ماعليييه بتيسر ان شاء الله
فيصل : ان شاء الله
طلع عقاب لدوامه ورجع فيصل لأهله وهو رغم اختفى ابوه لكنهم مرتاحين بدون مشاكل
_______________________.
.

وفي بيت نادر
طلع وهو يسمع شوق تغني وتسقي زرعها اللي بدت تزرعه في الحوش ابتسم وهو يقول : يا صباح الرضا
لفت شوق ببتسامه: صباح النور والنوير
نادر : لو دريت اني كل يوم بصحى على صوت اغاني كان من زمان جايب هالزرع
شوق ببتسامه: هذاك دريت يعني لا تقصر
نادر: في خدمتك يا شوقه المهم تبقين رايقه
شوق :مشكوورر لكن وييين لابس ورايح !؟ ولا تقول بتروح من دون فطور
نادر: والله مالي نفس افطر لكن ان شاء الله بتغداء معك لكن الحين بمر امي وابوي اشوفهم
شوق : صادق مايصير تقطعهم وانا بعد بتصل في اهلي
نادر: زين الله يقويك
طلع نادر وهو مبسوط من الراحه اللي عايش فيها و هالايام السعيييييده وراضي ومقتنع بنصيبه
_______________________.
وفي بيت ضاري
تقريباً بدا تجهز غرفته وخلاص ما باقي الا الاثاث والزواج قرب وهو للحين ماهو قادر يتقبل فكرة رفض مضاوي واجبارهم لها لكن مصيبته انه مايقدر يكسر فرحة امه وهو يشوفها تروح وتجي وتجهز لزواجه وكل الحاره صارت تكلم بزواجه
طلع من الغرفه وسكرها وهو يسمع امه تناديه للفطور وتقول : ان اشاء الله الحين نبي نفطر ونطلع ونشتري لك اثاث الغرفه كله ونسكرها ليييين يجي العرس وممنوع تدخلها الا مع عروسك
ضحك ضاري : اللي تامرين فيه يا ام المعرس
ام ضاري ببتسامه: واذا قضينا بتوصلني عند شوق بسلم عليها واشوف وشلونها
ضاري : والله شكلي بضيع فالطوشه شوق من هنا ( وتصاعب يقول مضاوي وقال ) والعروس المنتظره من هنا
ضحكت ام ضاري : قلت لك من قبل محدٍ مثل ضاري ابد لكن شكلك بتحتكر الحب كله لك
ضاري : يحق لي والله اصير اناني فيك
ام ضاري : ماعليه بكره اذا جو عيالك بتشوف ان كلامي صح
ابتسم ضاري وهو ماهو بالع هالفكره ابد رغم انه حلم بها كثير لكن قبل يسمع ويدري عن اللي صارر
_______________________.
وفي السوق
عند خلف كان جالس في دكانه بأمان الله وهو في زاويه الدكان ما احد يشوفه لكن جاء له سعود يقول : خلف خلف
ابتسم خلف توقعه رد من ليلى لكن قال: ليلى تنتظرك ورا هالبيوت تبي تشوفك
فز خلف بفرح ماتوقع هذا ردها وهو فعلاً كان محتاااج يشوفها اخذ اغراضه بسرعه وطلع وهو يقول : ممدوح عينك على الدكان
ممدوح :طيب
وطلع يركض للبيوت مايدري وش ينتظره هناك ولا وشهو مصيره.
.
.
.
خلف بفرح ماتوقع هذا ردها وهو فعلاً كان محتاااج يشوفها اخذ اغراضه بسرعه وطلع وهو يقول : ممدوح عينك على الدكان
ممدوح :طيب
وطلع يركض للبيوت مايدري وش ينتظره هناك ولا وشهو مصيره
واول ما وصلها فز اول ما سحبه احد وهو يكتف واول مالتفت خلف رجع بقوه اول ما حس ب لكمه على وجهه ما استوعب وش صار لكن اول مارفع راسه شاف ابو نهيان وهنا دق قلبه بخوف وهو خايف من ردة هالفعل مايمديه يستوعب الا باغته بغضب وهو يضربه : لا ياللي ما تستحي ولا تنتخي وثقت فيك ودخلتك بيتي وتسوي فيني چذييييه ياقليل الاصل والتربييه
حاول خلف يتخلص ووقف بذهول : انا ماني فاهم عليييك ياعمي
ابو نهيان بغضب: عمت عيييينك حتى عمت عييينك ما انت فاااهم يحق لك ما تفهم مثلك مايفهم الا انه يجي للبيوت من ظهره ويستغل ويلعب ببنات الناس
هنا تأكدت خلف من خوفه وصار لازم يوقف وقفت رجل : لا ياعمي لا انا ما استغليت احد ولا لعبت بأحد ويشهد الله اني مانويت بنتك بش... سكته ابو نهيان بكف غاضب: هذا واحنا جيرانكم وضيوفكم وانسابكم وماخذين بنتكم وصرنا رجال ودقينا الباب وحشمناكم وانت ماحشمتنا ولا خفت من الله
خلف غمض بقوه : والله والله ما نويت الشينه والله وكنت ناوي هالاسبوع اخطب لكن صارت مشكله وابوي طالع من البيت ماندري وين اراضيه لكن والله ماغدرت ووالله مابيني وبين بنتكم شي يخجلك ولا يلحق شرف اذى ولله والله مانويت اخونكم وانا ابيها بالحلال
ضربه ابو نهيان للمره الثالثه : تخسي ويخسي مثلك ياخذ بنتي ولا يدنس شرفها لكن اسمعني زيييين والله والله لو اشوفك توطوط من بيتنا ولا من صوب ولدي والله لاذبحك واخلي فضيحتك على كل لسان وطس لا اشوف وجهك وانا بستر علييييك عشان بنتي ولا انت ما انت كفو
ما ترك لخلف مجال ابد ودفه ومشى بعد ما اشبعه ضرب وهو مقهووور وكان متحسف انه اكتشف من بنته هالشي غمض عيونه بغضب واتجهه لبييته وهو زعلان
اما خلف بالقوه تمالك نفسه ووقف وهو خاااايف خاايف على ليلى ولا هو ماهمه نفسه وكان خايف يدري جابر ويحوس الدنيا كان وده يلحقه بس يخاف انه يكبرها اتجهه للمسجد وهو يغسل وجهه وخشمه اللي نزف دم لكن اخر شي شافه قطرات الدم بيده وبعدها طاح مغمى عليه من اثر الضرب متكرر على صدره
_______________________.
وفي بيت النوخذه
كانت ليلى تبكي وهي تركض وتخبي كل شي يخص خلف وهي ترجف ترجف خايفه من الجاي
وفزت على صوت الباب ووقفت بخوف ولاهي الا ثواني وضرب باب غرفتها ابو نهيان .
.
.
وفزت على صوت الباب ووقفت بخوف ولاهي الا ثواني وضرب باب غرفتها ابو نهيان ودخل وهو يسحبها من شعرها: اسمعيني زييين يا ليلوه والله والله لأعيد تربيتچ والله والحين تلميييين كل اغراضچ انتي وامچ وبتذلفين للكويت وان جبتي طاري عن اللي صار لأي مخللوووق والله لدفنچ بمحلچ سمعتي!؟ وانا ساكت مابي اقول اللي صار عشان ماينحني راسي بين الناس وللحين ما انخلق اللي بيحني راسي
دفها بغضب وطلع وهو ينتظر رجعت ام نهيان وجابر
اما ليلى مابقى بقلبها ولا عقلها الا اثار الدم على ثياب ابوها وهي طاح قلبها ماتدري وش صار في خلف ولا وييينه ولا وش سوى فيييه ابوه والقهر اللي بعيون ابوها ماهو سهل ابد
انهارت تبكي وهي تجمع الاغراض وماتبي يجي احد ويحس بالسالفه وتصير بمليون مصييببه
_______________________.
وعند ضاري
بعد ماوصل امه لشوق اخذ طريقه لسوق وتقابل مع نادر هناك
ضاري: من وين جاي ؟؟
نادر: مريت امي وابوي وسلمت عليهم وجيت
ضاري : وعساهم عرفوا انهم غلطانين
ضحك نادر: ياشيخ وييين هم اصلا مايشوفون غلطهم لكن الله يسامحهم ، انت منين جاي
ضاري: وصلت امي لنديمتك ومريت لخلف وما لقيته قلت اروح اغسل واروح له البيت
نادر: اييه ايه تعال نغسل في حمامات المسجد
دخلوا لكم تجمدوا اول ماشافوا خلف طايح بأرضه ودمه مغرق وجهه الاسود
انصعق نادر اللي صرخ: خلللللف
ركض له نادر وهو مرعوب: خللللف خلللف
اجتمعوا يرفعونه وينادونه بس ابد ماله حس واجتمعوا الناس على صوت صراخهم
وجاء ممدوح يركض : وش صاااير وش فيه خلف !؟ صرخ نادر: جيييب سيارتك اسرع اسرررع
ركض ممدوح وقابله فيصل ومحمد وعزوز وقالهم والكل جاء يركض لكن رفعوه الشباب بسرعه لسياره والكل ركض معه مرعوبين من اللي صاير
_______________________.
وفي دوام عقاب
كان جالس وشاف مبارك جاي من بعيد وهندامه متغيير وصاير نظييف ووجهه بيتشقق من الابتسامه رفع عقاب حواجبه مستغرب ومره مبارك مبتسم: صباح الخير ياعريس ! غريبه مداوم اللي مثلك يروح شهر العسل
ناظره عقاب بحده: مخليين الدلع لأهل الدلع
ضحك مبارك: والله انصحك بالدلع ياعقاب وزين انك تزوجت ابيك تعيش بالنعيم مثل ما انا عايش
احتدت نظرة عقاب له لكن قطع عليه اتصال وعد ووقف مبارك بسرعه وهو يرد ويقول : هلا يا بعد الدنيا كلها هلا ياوعد
طارت عيون عقاب بذهول وهو يراقبه وهو يكلم بالتليفون قدامه ومصدوم من تغير مبارك لكن الصدمه انه كان يكلمها وكأنه يطمنها عليه انه وصل .