شبكة همس الشوق - خلي البكا عنك

خلي البكا عنك , جف الدمـع بأهدابـك

ماعـاد ينفـع رجـاك ولـو ترجيـتـي

قبـل تشوفيـن دمعـك ويـش سوابـك

شوفي وش اللـي مـع الايـام سويتـي

رحتي لوقتك , وخانـك وقتـك وجابـك

لاتقولـي إنـك عشـان الحـب رديـتـي

عوّدت قلبـي علـى فرقـاك وغيابـك

كـل ماسألنـي اقـول إنــك توفيـتـي

اللي قبـل كـان يكتـب بـك ويقرابـك

فـي عـز ماكـان محتاجـك تخليـتـي

هواك كذبة عمر عاشـوا بهـا احبابـك

كذابـه ان قلتـي انـك يــوم حبيـتـي

كل الدروب / الـوداع ان مـرت فبابـك

وكـل الامانـي / ضيـاع اليـا تمنيتـي

وجهك ذبل , جف غصنك , طارت اسرابك

مثـل الشقـا يـوم مـر القلـب مريتـي

لو صدق كانت دموعي تحرق أعصابـك

ماكان خنتـي وفـا قلبـي .. وتضحيتـي

زرعت حلـم الزمـان ومـات فترابـك

واغراك صمتـي عـن البعـد وتماديتـي

يكفيني اللي خسـرت وضـاع بأسبابـك

شكراً علـى الحـزن .. كفيتـي ووفيتـي

انا انتهت بـك سنينـي , مقـدر ابدابـك

ودعـت الأوجـاع مـن رديـت عافيتـي

وانتي تركتك على آخـر سطـر بكتابـك

ذكـرى رحلتـي عـن البـال وتلاشيتـي

لو سامحتـك السنيـن ودمعـة عتابـك

ماسامحـك حلمـي اللـي فيـه ضحيتـي

ولو كنتـي العمـر ماعاشـك وغنابـك

قـلـبٍ تركتـيـه للفـرقـا وصديـتـي

ردي على الحزن انتـي حزنـك اولابـك

جيتي حزينه .. وروحـي مثـل ماجيتـي

م/ ن