لولا البكا ما ينشرح خاطر ولاينزاح ويل
خل الكدر يطفي سعير الليلــتين اللي خلت
.
دام العيون اليا اهملت تشفي القليل من الغليل
الله يبارك فالعيون اللي ليا ضقت اهملت
.
دمعة قهر تثبت لي ان اللي يحبوني قلـــيل
ولاضحكه بوجيه ناس لي تضايقت انكــلت
.
البارحه يوم الهموم تحط فالصدر وتشيل
والشاهد الله ماحبــست فمحجري دمع وفلت
.
الدمعه اللي ماتهز صدور ربعــــي لاتسيل!!
اكنــها مثل الجمر ولايقولون انزلت
.
اللي وهو ما فزلي وده يحملني جميل
اجيه برجولي عشان اشكي له الحال ؟ اكملت
.
ماكل من شافك قوي يحزن ليا جيته ذليل
الناس ليا من حست بضعف الشجاع استنذلت
.
بعيونهم ببقى مثل ماللهبوب من النخيل
على كثر ماضامها صفق اللواهيب اعتـــلت
.
وشلون احس ان العذاب اللي على متني ثقـــيل
وانا ادري ان اللي تصبرني على الحزن وصلت
.
معشوقتي وإن ضف صدري من ليالي الحزن ليل
ياكـــثر ماشربت معي من علقم الحزن وكلت
.
معشوقتي ما للفرح برجوعها يمي سبيل
الا مثل ما للربيع من الزهور ليا ذبلت
.
معشوقتي من عمر جيل ومدرسة مليون جيل
معشوقتي رمز السنين اللي تجلت وانجلت
.
اللي على كثر المصايب كل مافيها جميل
الناس لي كبرت تشين وذيك لي كبرت حلت
.
لامن تثــنت للهبوب تمــيّل اللي مايميل
وان مالت عقول الخفاف من الرجاجيل اثقلت
.
كن الكلام بثغرها مجرى سبيل للسلسبيل
مسترسله لو ماضميت ولو ضميت استرسلت
.
تقبل على لون المسا لاجات مفتوله جديل
غصبن عن عيون النسا مايرمشن اليا قبلت
.
عشقتها لاني من اللي يعشقون المستحيل
صدقتها لانها لـ قالت القول : افعلت
.
الترفه اللي تنطح الفريّــس وتفك الدخيل
ما فالرجال اللي حمل حزني مثل ماستحملت
.
لو كل خلق الله ملو ماتمل وماتميل
لان الرجال في هالزمن قلو هذيك استرجلت
.
يوم ان وقفتهم معي من باب مايخدم بخيل !!
هذيك ما وقفت جنبي .. هذيك هي تبهذلت
.
خانوا وهي ماخونت عالو وعيت لاتعيل
تبدلتت كل الوجوه وذيك ما تبدلت
.
لانه ليا عز الرجا ما للخليل الا الخليل
ماقد قرت في محجري قصة عن الحزن وسلت
.
كن الذي يجري معي يجري على الطرف الكحيل
اليا رضيت ترضى عشاني وان تزعلت زعلت
.
تدوي بخفاقي دوي لين احيت الحلم القتيل
عشق بدويه لبدوي لاجت على البذل ابذلت
.
معها اعرف اني قوي حتى وانا مافي حيل
واعدها بمية خوي كان الهموم استفحلت
.
دام الشدايد تظهر بصاحبك معدنه الاصيل
ليت السنين اللي حدتني لـ الضياع استعجلت
.
الشده اللي تثبت ان اللي يحبوني قليل
ولا ضحكه بوجيه ناس لي تضايقت انكلت
.
بنت ليا منك وقعت تشيلك من القاع شيل
ابرك من وجيه الرجال اللي ليا طحت جفلت