شبكة همس الشوق - ناقتي ياناقتي

ناقتي يا ناقتي جاوزي نقل الكديش
للديار اللي بها العزّ عاليْة العروش

شايل ٍ همي بكمّي و انا نفسي تجيش
ماكن ٍ فيها منَ الوجد لدياري نقوش

صابني من دونها سهم ٍ أجرَد ما يطيش
وارتكز بين الحنايا ينوش القلب نوش

ما يموت الرجل من طعنةٍ و الاّ يعيش
و الله انّ الموت لآ صار راسه ما يشوش

ينثني دون العزايم وهايم له خريش
لآ غدَت صملة فحول ٍ تناهَرْه الجحوش

مسبل ٍ ثوب الخطيّه على جهل ٍ و طيش
مقبل ٍ مدبر يحوش الردى و الذمّ حوش

ما يحسّب للمشاريه لو تنشدْه ليش
ردّ مخموش الحشا ما دريت إنّك تهوش

له ثلآث ٍ من ثلآث (الهشاشه من خديش
و احتقار ان زار و الغشّ من حبّ القروش)

تسبق رجوله يدينه ليا شاف الجريش
وايده تسابق لسانه على هدم العشوش

قربه ازعاج ٍ و بعده خشاش ٍ تحت خيش
داير ٍ و علوم ربعه وراه تقول بوش

ما تجوّدْه المواثيق معصير ٍ و ريش
كلما هبّت هبوب ٍ تبعثر له عفوش

بايع ٍ شاري في الهرج هامور ٍ و شيش
قافل ٍ عن غيره الدرب مآهوب مغشوش

لو بدى من فوق ضلع ٍ رويسه قلت كيش
ما يكاد يبين للعين و الشين مخشوش

اقرب أقرابه عِداه مْتولّجهم بجيش
كلهم شرواه معطينها نفخ ٍ و موش

يالله إنّك لآ تلقّيني شْباع الخبيش
و السباع سْباع لآ عوّدت لطش ٍ و غوش

نغزي صدور المجالس بعلم ٍ له دويش
يكرِب و يطرب هل العزّ وارباب العروش

محتمين القول فعل ٍ و لو بآقصى حنيش
ما نعاب و لآ نهاب ان عرَب و الاّ حبوش

صورة ٍ ما غيّرتها الليالي حتى ً ايش
ما لحقها لآ غبار ٍ و لآ فيها غطوش

كفٍ تمدّ الوفا و آختهاا بطش ٍ وحيش
مدلجين و محتجين ان ظبى و الاّ وحوش

لآ تحاماها حبيش انبرينا يا حبيش
نستقي عذب ٍ زلآل ٍ و نتركها طيوش

ونتفاخر بالجنابي ليا غمّض غطيش
اهل كيف ٍ واهل سيف ٍ غطاريف ٍ طحوش

نقفي ثقات ٍ ثبات ٍ ليا جت من هشيش
أو رفيق ٍ في طريق ٍ عن الدار مهموش

كلّ صدر ٍ شال ربعه وسيع ٍ له بشيش
حقه يْقدّم على كلّ عبّاس ٍ غبوش

ما نسود الاّ نذود و نعود لنا لطيش
سايقينه كنّه القينه مقلّم بخوش

و الله اني لو رضيت الخطا دون العريش
ما رضت (زهران) بي و استقلّيت النعوش