ديوان ويمنعنبذه عن الشاعر مطلق النومسي - الصفحة 3

23 - 3 - 2022, 08:38 PM

قصيدة ليه تبعد ..؟- مطلق النومسي

ليه تبعد وانت قربك يوم عيد
وليه ترخصني وانا مغليك يا سمح الجناب

ليه تقسى وانت لين والقسى همك بعيد
وليه فصلت لجمودك من شرايني ثياب

وليه فجاءة تنسحب من دون شرط ومن دون قيد
وليه تلغي ما يسمونه شروط الانسحاب

وليه وليه تترك ظنك الظالم على راسى يذيب
وليه ما واجهتني وخذت من راسى جواب

وليه غبت وليه رحت وليه تتركني وحيد
وليه ما حنيت قلبي من كوابيس الغياب

ما دريت انك وريد الدم او دم الوريد
يعني العيشه بدونك ثامن السبع العجاب

وما دريت اني اعشقك صدق يا العشق العنيد
وان ما قبلك يسمى ايش يمكن نزوة شباب

يعني معقوله ما تدري لا لا لا شئ اكيد
انت تدري بس وش سر الانقلاب

الله اكبر ما انت خابر ليله العمر السعيد
يوم كنا نكتب الذكرى على غلاف الكتاب

وين كنا وين صرنا وليش والا ليه اعيد
المشكله غاب وبعد كل ما يذكرني فيه غاب

لا سؤال ولا وصال ولا اتصال ولا بريد
حال يكسر خاطر الميت وهو تحت التراب

منت والله مستفيد ولاني والله مستفيد
ما كسبت الا عذاب ولا كسبت الا عذاب

والاكيد اللى عليه احلف واقول انه اكيد
ان قلبي من فراقك ذاب وذاب وذاب

23 - 3 - 2022, 08:38 PM

قصيدة قصتي مع النعيرية - مطلق النومسي

تقريبا أذكر عام خمسة وعشرين
هنا هي أول نقطة للبداية

من النعيرية بلاد الموامين
اللي غدت للطيب والشعر راية

جيت ومعي .. شعر .. وطموح .. وذكر زين
وضيدان شاعر فوق حجم الدعاية

جينا زميلين .. ورجعنا زميلين
والطيب من بين الرجاجيل غاية

من شوف هذا الدار .. ياحي ذا العين
دار تضم أهل الهدى والهداية

أحبها من حب ربع مسمين
تربطهم أكثر من علاقة معايه

وحبيتها أكثر .. محبة من اثنين
اثنين كانوا لي .. دروع ووقاية

أولهم .. سليمان ولد ابن جبرين
وعبدالله الثابت .. وهذا كفاية

في مهرجان صار عشق الملايين
كتبت في اجمل واحلا .. رواية

رواية ما تعترف بالعناوين
تحمل من الذكرى .. حكاية .. حكاية

أذكر حضر صفين .. صفين .. صفين
صفين .. صفين .. وراء ناس جايه

وكان الحضور يحمس الراس والعين
وكانوا هناك .. يمين .. بعض أصدقايه

وكنت اتلفت كل ما قلت بيتين
.. وأسمع صدى صوتي .. يحرك صدايه

ياسين .. يا شوف أطرق العود .. ياسين
اللي بنت .. بضلوع قلبي .. بناية

بناية .. ماهي من الجبس والطين
لكنها أكثر أمان وحماية

من حد صدري .. للبحر .. للسما ..لين
إلين أيش ...؟ إلين مالا نهاية

مدري هوس ..؟ مدري طلاسم محبين
بس الأكيد إني .. بحالة غواية

أجمل طقوس الحب بين المجانين
وأحلا جنون اللي .. يصير بدراية

يا متعبة قلب الشقا خفي .. شوين
ترى الهوى .. ماهو مجرد هواية

يدخل مع الدم .. وتضيق الشرايين
ويحتاج له .. تخطيط قلب وعناية

هذا حديث الشعر من سبعة سنين
قدام لا اخذ فيه صك الوصاية

ذكرى شعر .. حطيتها بين قوسين
تاهت تحت صدري .. ولانيب تايه

أذكر خذيت الثلث .. أو نصف ثلثين
وكان الفرح .. غيمة تغطى سمايه

ناس تشجعني برفع الحجاجين
وناس تردد كل قفله معايه

مشكور يا دار الشعر والميادين
رسمت لي على الخريطة ولاية

واليوم جيت وجيتي .. لأجل شيئين
ماهو نفاق .. ولا مدور دعاية

حب النعيرية .. وقدر ابن جبرين
خلوني أبدأ .. عند أول بداية

23 - 3 - 2022, 08:39 PM

قصيدة سوالف عيده- مطلق النومسي

ياجماهير القصيد.. اسمحولي بس دقيقه
او.. ثواني او.. بعد لحظات يمكن انأ نستفيد

ولا نعيد.. ولانزيد.. والنتيجه بالنهايه لاجديد
يصدم الجمهور يمكن يزعل الجمهور يمكن

ييأس.. الجمهور يمكن بس الي مايمكن يصير
ان ..هذا ..اللي اقوله.. يعتبر شعر وقصيد

النجوم.. مرصفه.. والجبال مغلفه
والقمر.. يحلب وله ديدين ويشمل
ويمسح فوق ديده

ياقصيدة جدتي عيده رحمها اللله قالت ياوليدي
قلت.. وشو ياوليدي انتي اخطيتي عليه

لازم تقولي.. حفيدي لان كلمة ياوليدي
تعتبر ضعف.. وتخلف.. لا بل اكبر خطيه

بس.. تدرين وش عليه دامني شاعر ارجواني
وصاير/ن فلتة زماني ولا قوافي ولامعاني

(اويطي) ياهلقصيدة الماغسه ابك اسمع اسمع..
هلا هلابه ياهلا لا ياحليفي ياوله

لاتذبحيني ياذبحه لي ياعجوز.. وترجيني

هذا الشعر وذي اصوله ماهي كلمات/ن مشلوله
لاغاف ولا حتى معني ومقدمها مثل مغفاها

قال الاول وخر وخر قال الثاني لاتتأخر
خبط ولزق وجلة والي واعزي للي يقراها

قصايدهم خبزة رفله بتراب المله محتفله
حتى صارت جدر خميعه مال الله قلل حلاها

اتباعد ونيس الدجة اللي لاصوم ولا حجة
رعية ماهي مرعية والونيس اللي يرعاها

عجزوا عن بدع الجزيله قالوا ذا بحر التفعيله
والله ياسوالف عيدة تسوى التفعيله واغناها

دمعة مي ومدري وشو انخشوا ياناس انخشوا
يامكر وكال الطيطه واللي دورها يلقاها

ياجمهور الله يعينك اصابعك اطرف عينك
والصحافة حيط/ن مايل واللي يامرها ينهاها

لكن دامني بالساحه والله ماقعدهم راحه
لحاربهم واحد واحد وارد اولها لتلاها

وانا مبقى اكود ارضاكم الله يسعد لي مساكم
انتوا راس المال وربحه والنفس وغاية مناها

قلت اللي فيه الكفاية والسلام افضل نهاية
على الرجاجيل السفرة اللي اتجمل بلحاها

23 - 3 - 2022, 08:40 PM

قصيدة حنا بخير مادام أبو متعب بخير - مطلق النومسي

سلام يا الشعب السعودي ...مساء الخير
يأخوننا..." بالدين ".....قبل الفصيلة

أحمل لكم " كلمة .." محبه وتقدير "
من :"شعب ابو ناصر" .. قبيلة.. قبيلة

محبة ماتنشرى... با" الدنانير "
محبه بالروح ماهي ...قليله..!!

حنا ... شعب واحد ...بكل المعايير
انساب واحباب وعروق ..طويلة

معكم دعينا الله وابو متعب " بخير "
" شيخ القلوب " ... تفز وتجيلة ..!!

يامملكه عيدك ....غدى هالسنه غير
عودة حبيب الشعب عيد وفصيلة

نحب " ابو متعب " ... بليا محاذير
حب جليل.... يخص قامة " جليلة "

ليلة وصولة.... حوطت بالتباشير
حكاية... من الف ليلة... وليلة ..!!

وانا نيابة عن جميع .." الجماهير "
الحب غاية والقصايد .." وسيلة "

نكتب قصايدنا ...على " ريشة الطير "
ونشوم ..عن طرق الهزل و الهزيلة ..!!

واللي بقى..." كلمة " بدون أي تغير..
وأقولها.. " عنكم " .. قبيلة.. قبيلة ..!!

" حنا بخير " ان كان ابو متعب " بخير "
والخير ...بوجهه.. جنينا حصيلة ..

23 - 3 - 2022, 08:40 PM

قصيدة شعل المصرقع - مطلق النومسي

جديد مطلق النومسي في مزايين الإبل ،،
في مهرجان أم رقيبة

لا وصلت الشعل جنب يا مباريها
الشعل سبحان ربي يوم سواها

سحر يثير العقول وتنبهر فيها
عشق يمر القلوب وغصب تهواها

عجزت لا ألقى تواصيف تحاليها
وعجزت لا أحصى مع العالم مزاياها

لا وصلت العرض جت تعلن تحديها
ومبشر بالخسارة من تحداها

عز الله أن الحسد مقسوم راعيها
جعل القلوب الحسودة تحت ماطاها

باسم الله أكبر على عين تعاديها
و اللي يبي عوقها جعله فداياها

يا زينها لا مشت والصوت يدعيها
وأرقابها عوج لين تعدل خطاها

وليا استعدت وقام الصوت يشعيها
تساوت أرقابها .. من سرع ممشاها

مهدلات المهادر .. خرع أذانيها
هنف العرانين عرض الخد يزهاها

فجح العراقيب والاذيال توميها
متوخرات السنام .. وجل عضاها

شم الغوارب .. وغربها تكفيها
تاقف على مشط رجلك ما انت وياها

لقيتها مع عيال عجيم أهاليها
عند المصرقع وحي القوم وأسماها

حامينها يوم فعل الناس بايديها
ولا ذكر حي طلعها من حماها

يا حي هاللابة ويا حي طاريها
قبيلة تعرف العالم حماياها

شعل مع ابن المصرقع يوم أحليها
كتيبة حرك الحاكم سراياها

ان مرت أهل الشعل ضاعت هقاويها
وأن مرت أهل الصفر عافت مطاياها

وأن اقبلت قلت جعل الله يحييها
وأن أدبرت قلت جعل الخير ملفاها

يلومني واحد ما قد شقى فيها
ولا مشى قدمها ولا تقفاها

ما شم ريحة نسمها في مفاليها
ولا رقد عندها والليل يغشاها

عشان يعرف علام الناس تشريها
ولا يكذب خبر تزويد مشراها

23 - 3 - 2022, 08:41 PM

قصيدة ياغالية - مطلق النومسي

ياغالية وأنتي وأنا حالة شبيه الإنفصام
والإنفصام الله يعيذك داء معدوم الدوا

وأنتي عيونك نايمه وأنا عيوني ما تنام
تحديث لأطلال المثل أصابعك ماهي سوا

يا أم التراحيب البخيله في زمن جود السلام
ياللي على طيبك تمادى حبل غدرك وإلتوا

بنيتي الإهمال في لحظة غياب الإهتمام
ونويتي أخس النوايا بس قلبي ما نوا

لأنك حلال وأجبروه يمثل أدوار الحرام
تأليف وإخراج الغدر وإذعان قلب ما قوا

إلى متي والوقت يجبرنا علي طول الخصام
إلى متي والقلب يشكى من متاهات الجوا

إلى متي وبكارنا من عدنا تقفي حيام
إلى متي نعلن عطشنا فوق عدان الروا

إلي متى نبقي تحت حكم المعاتب والملام
إلى متى لا قال لا نقول له مالك لوا

تغيرت كل النوايا وإختلف فينا النظام
ولاعاد فنجال الحبش يقدر على رد الخوا

لكن عزاى أني أعرف النور جلاي الظلام
وإن الروايه تنحصر في ذمتك ياللي روا

وبقول لك يا غالية كلمة وهي مسك الختام
أنتي عبارة عن سخافة من سخافات الهوا

23 - 3 - 2022, 08:42 PM

قصيدة للروح صوت -مطلق النومسي

للروح صوت .. وللحناجر صوت .. والفارق كبير
ولا تبين يالكبير .. إلا بنظرات الكبار

وللصوت روح .. وبالحناجر نبرة الأرواح غير
ولا يميزها . سوا من يمتلك نفس العيار

هذا خلاصة ما تعلمته من الدرس الأخير
ياللى قبل هذا معلمني التجرد .. بإختصار

وعلمتني كيف الصبر يطول؟؟ ليا طال المسير
وعلمتني متي؟؟ وليش ؟؟ أحتاج تغيير المسار

وعلمتني أصعد على القمة ولو ساقي كسير
وعلمتني أرفض على نفسي قبول الإنكسار

وعلمتني .. إن الغلا أنعم من سلوك الحرير
وعلمتني إن العقل لا وافق القلب ... إنتصار

وعلمتني إن الوصل .. يعني صعود المستدير
وعلمتني إن الجفا يعني .. بداية إنحدار

وعلمتني .. إني بقربك .. أدري إن قلبي بخير
وعلمتني .. أرسم على بعدك بدايات الدمار

شف وش كثر علمتني ؟؟ يا معلم الورد .. العبير
وشف كيف أنا ماخذ تعاليمك بعين الإعتبار

ياكبر حظي فيك ... لو حظي من الدنيا صغير
ياللى منعني في ثباته عن بلوغ الإنهيار

أيوه يا كبرك بعيني لو عمر وقتك قصير
يا لذة طوال الليالي فوق الأيام القصار

أنفاس روحك .. تنتشي بي فوق موجات الأثير
وهمسات صوتك تنتثر بي فوق جو الإنبهار

وقلبك كتبني . قبل لا يكتب على عروق الضمير
أغليك يا قمة إجا .. وأكرهك يا وادي مشار

هيبة . وعزة نفس .. تغنيني وأنا ماني فقير
والفقر نار .. ولا بعد نار الفقر بالوقت .. نار

هذي بركاتك على حال المواطن .. يالأمير
ياللى بنيت بداخل ضلوعه .. من ضلوعك .. ديار

عطني شويه بال .. واخلي لك القمري يطير
وأخلي عروقك تمايل .. كل ما غنا وطار

وأبني لك قصور السحايب .. في ذرا البحر الغزير
وأجبر عيون الليل تبكي لك على خد النهار

يعني بصور شي لا يمكن على الواقع يصير
حتى تصير أنت الوحيد اللى معه هالشي صار

لأنك بعيني غير ... وبقلبي بعد مخلوق غير
ولأنك بنيت امن الحناجر روح .. نبرتها .. وقار

على إعتبار إنا .. جعلنا بينهم .. فارق كبير
ولا تبين يالكبير .. إلا بنظرات الكبار

23 - 3 - 2022, 08:43 PM

قصيدة دوحه قطر - مطلق النومسي

سلام يادوحة قطر والنظر فوق
وانا وراء حد النظر وانظريني

جيتك وانا اشيل الغلا طاق مطبوق
ليتك تحسين بغلاك وتجيني

ماأقولك جيتك من الشوق محروق

ولاقولك زيدي غلا واحرقيني

جيت اتعلم منك وش يعني الشوق
لاجيت احطك بين قلبي وعيني

غرنوق يادوحه يالبيه غرنوق
وأنا مع الغرنوق بايح كنيني

لايابعد ديرة معمر وفاروق
ولحود وحسين وعلى والخميني

اقولها واقول لو كنت مسبوق
يكفيني انك ياقطر تسمعيني

مدامها مابين عاشق ومعشوق
عاشق ولكن طالبك تعشقيني

اسولف بعشقك على كل مخلوق
ولا لامني كود الردى والدويني

اللي ربوا بالكذب والزور والبوق
تبعدي عنهم وانا قربيني

كم لي وانا اغنيك طاروق طاروق
مابين مسحوب العرب والهجيني

لو بيننا حد ومسافات وفروق
حبك لغى كل شيء بينك وبيني

والله ماهو هرج طايش ومطفوق
لا والذي بقى حدا والديني

انتي وانا ياغاليه دم وعروق
ياديرة يندي عرقها جبيني

ديرة حمد راع المواجيب والذوق
راس السنام وقدوة الطيبيني

معذور احبك واتبت لحبك حقوق
وانا ولو ما اقطع ظماك اشربيني

لعلي اتنفس نسايمك واروق
وارسل عليك من الفرح دمعتيني

والدمع لازاد وجرح صافي الموق
حطيت وجهي بين مجمع يديني

ورفعت راسي لك وانا اقول ياشوق
لا داعبك ريح الكويت اذكريني

23 - 3 - 2022, 08:44 PM

قصيدة الاقلام النسائيه - مطلق النومسي

ضحاله بالفكر والطرح مزري والنقاش أضحل
على أنقاض التخلف والحياة الإبتدائية

وأنا أسمع صوت مع اخر صدى الصدمة يقول إرحل
قبل لا تحتويك من الندم نزعه عدائية

وصلني بعد ماروت دموعه صدري الممحل
وصلني وإنتحر فوق النفوس الإنطوائية

وتركني بين تأنيب الضمير وجرحي المبحل
ودورات الزمن حسب الخطوط الإستوائية

ولاهي غلطتي حذرت قبل الشر يستفحل
ولكن قابلوني بالعبارات الهجائية

وبعد طالت خيوط المشكله يصعب وجود الحل
وصمت الخوف ماهو طبع للروح الفدائية

لذا لابد من فرقا المكان المقرف الموحل
وتسريب الخبر عبر القنوات الفضائية

علشان المليكة تحتفظ في زهرة المنحل
وأنا أحط التوقع للمقادير الفجائية

وأعود لغفوتي في صحوتي بالصاحب الأكحل
أبو رمش يغازل خصلتيه الكستنائية

هذاك اللي يسميني بإسم الشاعر الفطحل
عسى تفدا حياته كل الإقلام النسائية

23 - 3 - 2022, 08:44 PM

قصيدة على الله سم ياقاف الشرف - مطلق النومسي

القصيدة اللتي القاها في أمسيته بمنطقة نجران أمسية ملتقى التميز

على الله سم ياقاف الشرف باسم الله الرحمن .
وصلوا عالذي صلى عليه الرب سبحانه

صلاة الله على محمد رسول الله فخر عدنان
. عدد ماحام طير في سماه ورف جنحانه

وأما بعد ياجمهور ياشعار ياميدان...
ترى الشعر وحياته بين جمهوره وميدانه

وانا مابين جمهوره وميدانه وحان الان .
. يابن فتان موعد قدحة الشاعر وصوانه

فاذا للشعر عين وله خدود وله خشم ولسان
أنا عينه وخشمه لعنبوا خديه ولسانه

وأنا عنيت لي ياأهل الجنوب من الكويت حصان
.سلم راع الحصان ولاسلم لاسلم حصانه

على الله يابياض الوجه وينك عند اهل نجران
وأهل نجران بيض وجيه من يامه لهمدانه

سلام الله على يام وسلام الله على همدان ..
سلام الله سلام توقف الدنياء على شانه

هنا يام العريضه منجم الابطال والشجعان ..
هنا العز وهنا المجد وهنا التاريخ واعيانه

هنا يوقف زمنا باحترام ويعلن الاذعان ..
ليا مرته هيبة يام والا صيت صبيانه

هل الحرب وهل السلم وجلا الظلم وعما العدوان
هل الخيل وهل الهيل وهل المبخر وعيدانه

حديهم لالفاله ضيف واحد يحسبه ضيفان ...
ولاتلقى سوى جزل الذبايح وسط ديوانه

ولاقال ارحبوا وأدخل يدينه داخل الاذان ..
عرفت الصدق قبل يفك للضيفان بيبانه

وهنا همدان بيت الامن والمعروف والعرفان..
ذرى جنب الديار وعون عبدالله واخوانه

سباع رجال مافيهم دني نفس وردي ايمان
على موت الشرف يتسابق المشكل وبزرانه

كرمهم مايشابه له ياكود الوابل الهتان ..
. والا ياحي وبال المزون وحي هتانه

وأنا شاعر وامثل في وقوفي لابة الويلان
صناديد الرجال اللي بخمر الموت سكرانه

فخر فينا الشمال من العراق اليا ورى لبنان
الى ماحد نجد وماورى ضلعه وجيلانه

يكفينا فخر انا بني عما لابن مرخان
ملوك بلادنا وارض الحرم والدين واركانه

وحنا شعب واحد ياعنزه يايام ياهمدان
ولكن مايضر ان الرجل يفخر بجدانه

حقيقه والحقيقه واضحه ماحولها بهتان
وعسى الله يطمس اللي يطمس اهل الحق بهتانه

اقوله يوم انا حليت ضيف بمنطقة نجران
واهل نجران بيض وجيه من يامه لهمدانه

المواضيع المتشابهه لموضوع: ديوان ويمنعنبذه عن الشاعر مطلق النومسي لموضوع: ديوان ويمنعنبذه عن الشاعر مطلق النومسي
الموضوع	كاتب الموضوع	المنتدى	مشاركات	آخر مشاركة
ديوان و نبذه عن عبدالرحمن العشماوي	حنين الأشواق	همس دواوين الشعراء	137	15 - 1 - 2025 04:36 PM
نبذه عن الشاعر الكبير ناصر القحطاني	نجمة الليل	همس دواوين الشعراء	5	15 - 1 - 2025 04:27 PM
ديوان الشاعر حمد البريدي	نجمة الليل	همس دواوين الشعراء	15	15 - 1 - 2025 04:25 PM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM
ديوان و نبذه عن حياة الشاعر على محمد القحطاني	همس الشوق	همس دواوين الشعراء	33	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع