رواية لأنني خادمه قمة الروعه كامله

17 - 10 - 2024, 08:16 PM

الجزء الثاني عشر // الفصل الثاني

منوة ارتبكت بوضوح : نـعم ؟!
عبيد باستغراب : بلاج ؟
منوة تداركت نفسها : ماله داعي اقولك شي عني ..
عبيد : ليش ؟
منوة : لاني لا اعرفك ولا تعرفني عسب اشرح لك شي عن ماضي عشته ..
عبيد باستنكار : ما توقعه ماضي مشرف !!
منوة غيظت : لو يكون أخيس ماضي فهالدنيا .. انته ما يخصك فاهم ؟!
عبيـد وهو ظاهر : بسيطة على رااااااحتج .. انا كنت ياي أساعدج بس .. بس شكلج ما تبين ..
منوة : الله وياك ..
تنهدت منوة .. وقفلت باب الحجرة البالية ..
كانت أشبه ببيت فتحية .. بس الفرق ان هاي بليا صراصير وفيران ! ..
ما وحى لها تنسدح ع الشبرية ..
الا ودق الباب يعلى ويعلى ..
منوة فجت الباب بضيج : نعم ؟
الحـرمة : وه وه وه .. سلااااامن عليج .. انا يارتج ام عبيد ..
منوة بقلق وهي تسمع اسم عبيد : هلا فـيج الغـالية ..
ام عبيد دشت بليا اذن : ها ناويه تسكنين على طول هني ؟
منوة : مادري .. حسب امكانياتي ..
ام عبيد بفضول : تشتغلين ؟
منوة : مع وقف التنفيذ !! ..
ام عبيد ما فهمت بس اونها عاد : هييييه يمدحون هالشغلة .. شو الاخت بدون ؟
منوة طالعتها برعب : وهذا بشو يهمج ؟؟
ام عبيد : وييه انا ما قلت شي ..
دشوا جيش يهال وراهم ثنتين كبار ..
سهـام : اميييه عيسو ضربني ..
ام عبيد شهقت : اللي ما يستحي .. هذا وانتي يايبتله 5 اولاد ؟
سهام : يبا بنية ويا ويهه جان اقوله صدق انك ويه فقر .. جان يضربني ..
ام عبيد : حسبي الله عليه .. الله فوق .. الله بيراويه .. انتي صبري كم يوم وبيي ..
سهام تطالع منوة : انتي اليارة اليديدة ..
منوة : الظاهر جيه !
سهام : انا سهام .. وهاي ( تأشر ع البنت اللي حذالها) مرت اخويه فوز ..
منوة عقدت حواجبها : اهاا ..
سهام تصارخ : عبود ويهد .. حمود النحس قوم عنه ..
ام عبيد : فوز وينه ريلج ؟
فوز بدون نفس : يعني وين مثلاً ؟؟ فـ شغله ..
ام عبيد : الله والشغل !!!
منوة كان باين من ويهها انها ملانة منهم ..
ام عبيد بخبث : عبيد خبرني عنج ووصاني عليج ..
منوة : اها ..
وتمــوا يسـولفـون ..
مع مرور الوقـت ..
تمت فوز مع منـوة ..
فوز : ادريبج مليتي منهم ..!
منوة ارتبكت : مب جيه السالفة . .بس يعني انا تعبانة وجيه ..
فوز بخبث : تدرين ان عبيد حاط عينه عليج ؟
منوة باستغراب : لا والله ؟؟ مسرع ..!!
فوز : الله يخليج هالعايلة ما يصدقون حد يسكن هني عسب يخطبونه ..
منوة باستغراب : معقـولـة ؟!
فوز : لا تستغربين .. عندج انا وحليلي .. من فقر لين أفقر ..
منوة بحنان : الله يساعدج والله .. بس كيف خذتي ولدهم ؟
فوز : قصدج شبيب ؟؟ الله يسلمج شبيب هذا خلاني احبه بجنووون .. نسيت كل ظروفة وتميت افكر فيه .. الين ما تزوجته .. وشوفة عينج .. جني بس حق اليهال .. لا يصرف علي ولا شي ..
منوة : هو العود ؟
فوز : لا اصغر عن عبيد بسنة ..
منوة بفضول : وعبيد شحقه ما عرس ؟
فوز : اه .. مالت . يتحسب عمره شي .. اونه ما ياخذ أي وحدة ..
منوة : اونه عاد .. ومنو هاي اللي بترضى فيه ؟!
فوز : لا بويه لا تقولين انج ما بتوافقين ياخذج ؟؟
منوة : اكيد ما بوافق .. حشى خلصوا الرياييل !
فوز : ههههههههه وحليله زوين ..
منوة : خلي الشكل .. انتي جوفي وضعه .. اخلاقه .. ليكون يباني اعيش هني ؟؟
فوز : ههههه وانتي الصاااجة .. هذا ما يودر امه ! ..
منوة : عيل خله يودرني ف حالي .. ما يخصني فيه ...
فوز بفضـول : حبيتي قبل ؟
منوة تفكر : مرتيـن ..
فوز : يعني ناس راهين ؟؟
منوة : مممم الاول كان وضعه زيين .. بس بعد ما حبيته وكل شي .. اكتشتفت انه مالج ..
فوز : يعني ما كان يحبج ؟
منوة : ما عرف والله ..بس هو اللي بدى وطرش لي رسالة انه يحبني .. وحرك مشاعري بها .. تصدقين شكله كان يلعب .. عسب جيه نسيت بسرعة ..
فوز : والثاني ؟
منوة تنهدت : هذا اللي حبه قطع أوصالي وخلاني أعيش الحلم معاه .. كان متمسك فيه لدرجة الجنون .. وبدل أحوالي .. وما أنكر انه هو اللي بدى حبه لي ..
فوز سرحت : عنده فلوس ؟
منوة : هو تاجر من تجار هالبلاد .. ما شا الله عليه عايش العز كله ..
فوز سرحت : دام هالكثر تحبينه ؟ ليش افترقتوا ؟
منو تأثرت : لسبب معين .. اليـوم نحن افترقنـا ..
فوز : يا حراااام .. وانتي وين هلج عنج ؟
منوة بألم : هلي ؟ هـه .. هلي بعاااد عني .. عايشين عالمهم الخـاص ..
فوز : ما تجوفينهم يعنـي ؟
منوة بتهرب : بين فترة وفترة ..
فوز : انا هلي تبروا مني ..
منوة : افا .. ليييش ؟!
فوز : لاني تزوجت شبيب غصب عنهم ..
منوة : وما فكروا يزورونج ؟!
فوز : ابداً .. اوني طمست شرف عايلتي بهالزواج ..
منوة : وانتي شو رايج؟
فوز : انا فعلاً طمسته من خذت شبيب .. هالعائلة سمعتها فـ الحضيض !
منوة بخوف : ليش ؟
فوز : الأبو مسجون بقضية قتل من 20 سنـة .. والام طلابة عند بيوت الاوادم .. والبنت متزوجة مدمن مخدرات .. وريلي انا سكير بالدرجة الاولى .. شو تبين اكثر عن جيه ؟!
منوة : لا حول ولا قوة الا بالله العلي العظيم !
فوز : نصيحة مني .. لا تصدقين رمستهم عن عمارهم .. لانهم جذابين ..
منوة : انزين وشو تفسرين كون عبيد شرطي ؟!
فوز : طموح أمه .. اونه عسب يظهّر ابوه من السجن .. جوفي التخلف !
منوة : هه .. الله يســتر !
.
.
ومــــع مـــرور الأيــــام ..
.
.
عند خـالد ..
ام خالد بغيظ : منو هاي اللي متزوجنها ها ؟ ارمس ارمس ..
خالد بصدمة : الحين انا متزوج ؟ شعنه ؟
ام خالد : عيل ظهراتك نصايف الليل شو تعني ؟
خالد غيظ : وانتوا كله تفكرون بشي هب زيين ؟؟!!
عذبة تصيح : وشو تفسر شردتك من أيام عرسي .. حشى ولا جني عروس ..
خالد بتأنيب ضمير : والله يالغالية نسيت انه في أيام حق العرس ..
ام خالد : سير الحين وفز واعتذر لحميد .. مسكين وايد شال فـ خاطره ..
خالد : ان شااااا الله .. الحين بتهديني اسير ارقد ولا شو ؟
ام خالد : مب قبل ما تقولي بلاه ويهك وارم ؟
خالد يتفحص ويهه بعد ما صد لمراية وراه : وين .. مافي شي !
ام خالد : أي ما فيه شي ؟؟ جوف كيف هالات عيونك سودة ..
خالد : اوووه يا امي .. الحين الا تدوريلي العلة يعني ؟
ام خالد : مب هادنتك انا الين ما تنطق ..
خالد غيظ : شو انطق ؟ شو اقول ؟
ام خالد : ليش ما خطبت روضة لين الحين ؟
عذبـة بوضوح : اميه هب غايته الحين ..
ام خالد : الا غايته .. شو انته حاط فـ بالك وحدة ثانية ؟
خالد تنرفز : امييييه شلي رويض من بالج ماباااها ..
ام خالد : انزين شحقه ؟؟!!
خالد : تفكيرها ما يوازي تفكيري .. شكلها مب عايبني ..
عذبة : اميه الا الزواج .. لا تخلينه ياخذها غصب ..
ام خالد : كلـه ولا روضة تسمعون ؟؟ هاي شيخة البنات ..وغصب عنك بنسير باجر نخطبها لك ..
توه يا خـالد بيـرد على امـه .. الا وموبايله يرن ..
طالع الرقم واللي كان غريب ورد بسرعة : الووو ..
الريال : وينك يا دلوعة ماما ؟ تعال خذ مرضعتك ههههههههههه ..
خالد غيظ : يا حقيييييييير .. يا جليل الحيااا .. يا ... يا ... يا ....
ظهـر خـالدعنهم وهو يشتم ويتوعـد ع التلفون ..
وســط صـراخ امـه ..
وصــدمة اخـتـه !!

/
\
/
\
نهاية الجزء الثاني عشر ...

17 - 10 - 2024, 08:16 PM

الجزء الثالث عشر // الفصل الأول

توه يا خـالد بيـرد على امـه .. الا وموبايله يرن ..
طالع الرقم واللي كان غريب ورد بسرعة : الووو ..
الريال : وينك يا دلوعة ماما ؟ تعال خذ مرضعتك ههههههههههه ..
خالد غيظ : يا حقيييييييير .. يا جليل الحيااا .. يا ... يا ... يا ....
ظهـر خـالدعنهم وهو يشتم ويتوعـد ع التلفون ..
وســط صـراخ امـه ..
وصــدمة اخـتـه !!
ام خـــالد تزاعج : خالد .. خاااالد .. ( تطالع عذبة) جفتي ؟؟ يوم اقولكم ان ولدي فيه شي محد يصدقني ..
عذبة وهي تصيح : عين وما صلت على النبي .. عين وما صلت على النبي ..
.
.
بالنسبة لخـالد ..
اللي ركب سيارتـه وتم يلف فهالشوارع من غيظه بلا اي هدف ..
الغضب كان مجتاح اكبر العواطف والمشاعر اللي فيـه ..
كفايـة الضرابة اللي قضاها طول هالليل ورا شخص متخفي بلبس غريب ورا كيبلات التلفونات العمومية ..
تنـهد خالد بقهـر .. ووقف سيارتـه ع ينب الشارع ..
سنـد براسه لورى .. وسرح فـ دوامة أفكـاره ..
خالد يفكـر : ليش كل هالتهديدات الغريبة من قبل هالشخص ؟ منو يكون هو ؟ وشو يبا مني بالضبط ؟ وشو عرفه بمنوة ؟ وأنـــا .. آه انا .. شو محلي من الاعراب فـ كل هالمشكلة ؟؟ .. هل انا ملزم أجامل منوة علـى حساب غياظي ؟ و هلي .. آه يا هي .. الشك اللي ذابحنهم من صوبي .. وشغلي اللي ما قمت اجابله شرات اول .. وعرس اختي اللي باجي له كم يوم ؟ والمجهول الزفت هذا ؟؟ وبعدين يعني ؟؟؟
خطرت على بــاله فكـرة .. يمكن تكون مينونة شـوي ..
تنهد وشغـل سيارته باتجاه أقرب مركز للشرطة .
.
.
من صـوب منوة
عبيد بصدمة : ما تبيني ؟
منوة بخوف : لو سمحت انا ما عرفك ولا اعرف عنك شي .. ابــعد ..
عبيد : ليش انزين ؟ ع الاقل قوليلي سبب مقنع ..
منوة وقلبها يدق بالقو : زين خلاص .. خلني اعرفك عدل عقب بقرر ..
عبيد بأمل : أكيــد ؟
منوة والرعب مالي قلبها : اكيـد ..
عبيد : الحمدلله .. ريحتيني ..
منوة : انزين ( بتردد) ممكن تروح الحين ؟ ابغي ارقد ..
عبيد عقد حواجبه : ما في وحدة فهالدنيا تقول حق خطيبها روح !
منوة والرعب رد دب فـ اوصالها : لا بس اليوم .. انا تعبانة .. يلا اعتبره آخر يوم ..
عبيد : آخر يوم حق شو ؟
منوة : ها .. لا اقصد .. آخر يوم اقولك فيه روح ..
عبيد : زين عيل ( يتقرب منها )
منوة تبعد عنه : باجر باجر .. انا اليوم تعبانة ..
عبيد تنهد : آه .. باجر باجر .. اوكي يلا حبيبتي .. باي ..
وبالغـصب طاع يظهر ..
قفلت منوة الباب على عمرها ..
وتمت تتنافض من الزياغ ..
لا إرداياً زخت منوة الموبايل واتصلت بخالد وهي تعض اصابع الندم انها حاولت مجرد المحاولة انها تبعد عنه..
اول مرة اتصـلت مارد عليها وعطاها مغلق ..
ردت اتصلت مرة ثانية عطاها مشغـول ..
تمــت تصــيح بقـوة والرعب مالي كل شي فيها ..
ردت اتصلت مرة ثالثة ..
خالد كان توه ظاهر من مركز الشرطة ..
وتفاجأ باتصال منوة ..
خالد بلهفة : الـــو ..
منوة وهي تصيح بقوة : الحقني يا خالد ..
خالد قلبه قبضه : بلاج يا منوة ؟
منوة برعب: يبا يتزوجني .. يبا يتزوجنيييي ..
خالد ثار : منو هالحيوان اللي يبا يتزوجج ؟
منوة : دخيلك تعال شلني .. دخييييلك ..!!
خالد بغيظ : وينج انتي ؟
منوة تصيح : ماااااااعرف ..
خالد تذكر : الحين الحين ياي ..
حاول خالد يتذكر اكثر المكان .. وزين ان ذاكرته ما خانته ووصل لنفس المكان ..
خالد اتصل بمنوة ..
منوة وهي تشهق : الــو ..
خالد : يلا اظهري انا برع البناية ..
منوة بفرحة : انزين ..
شـلت منوة بعمرها وظهرت برع الحجرة ..
أما خالد اللي الغيـظ ملى قلبه ..
والقهر استحوذ على اي شعور فيه ..
كان الأفكار تحاصره انه ينهي هالمشكلة ..
ومشكلة الاتصالات ..
وفعـلاً قدر يقنع الشرطة انهم يراقبون كيبل التلفون العمومي
واللي تحدد من خلال الأرقام اللي عطاهم اياها خالد انهم كلهم من نفس المنطقة ..
يعني المتصل اكيـد ساكن هني ..
بس اكيد هالشغلة يبالها وقت ..
لين ما يحددون مكان الكيبل اللي المتهم ينوجد فيه عسب يراقبونه ..
ويقبضون على صاحب التهديد ..
ولازال خالد يتريى منوة ..
حسها طولت وايد .. جان يرد يتصل ..
ريال رد : الوو ؟ منووو ؟
خالد تخبل : وين منوة ؟ وين وديتها ؟
الريال : عيل انته اللي متفق وياها ها ؟ ما بتظهر لك لا تحاتي ..
خالد غيظ : يا حقييييييييييييييييييير ..
ظهر من السيارة ودخل العمارة والشرار بيظهر من عيونه ..
انصـدم بمنوة اللي لاصقة في اليدار تترجى عبيد يبعد عنها ..
خالد ركض صوبه وعطاه كف قوي ..
عبيد زخ مكان الصفعة : انته حبيبها يالنذل ؟
خالد زخه من جتفه بقوة : النذل هو انته ياللي ما تراعي حرمة غيرك ..!
عبيد : ههههههه ضحكتني الصراحة .. شل ايدك عني يالـ *****
خالد يقوي قبضته : يوم انك مب متربي عدل انا لازم اربيك ..
عبيد بحقد : شو تبا منها ؟ هاي لي أنا ..
منوة تصارخ برعب : خالد ابعده عني .. الله يخليك ..
عبيد يطالع منوة بقهر : اعترفي منو ها ؟؟
خالد دزه ع اليدار بقوة لين ما طاح : انته ما تستحي ؟ عيب عليك ..
عبيد بخبث : اقص ايديه اذا اللي بينكم حلال ..
منوة انهارت ويلست تصيح بقوة ..
خالد رد رفعة من الارض وعطاه بكس : صدق انك ما تخيل .. واللي تسويه انته يعني حلال ؟
عبيد : النص بالنص .. شو رايك ؟
خالد فقد أعصابه : منوة .. سيري ركبي السيارة ..
عبيد يحاول يسد دربها : ما تروح لو على جثتي ..
خالد : غصبن عنك بتروح فاهم ؟
عبيد عطى بكس لخالد : ابعـد ..
خالد طاع ع الارض من قوة الضربة ..
وهني منوة تيننت ويلست تصارخ وهي منهارة وطايحة ع الارض ..
عبيد ركض صوبها عسب يهديها ..
هني خالد نش على طول .. وبأقرب حديدة ضربها ع راس عبيد ..
اللي طاح من الألم مب قادر يتحرك ..
ساعتها على طول زخ خالد يد منوة ومشاها لين السيارة ..
وهي منهــــارة من الخاطر ..
خالد بحنان : منوة حبيبتي خلاص ما استوى شي ..
ما كانت منوة قادرة ترد عليه ..
شوي الا ويجوفها خالد تغمض عينها باستسلام ..
خالد تخبل .. وشغل السيارة وسار بها لأقرب مستشفى ..
.
.
مع مرور الوقت ..
الدكتورة : انته بتقربلها حاجة ؟
خالد توتر : ها .. هي ..انا .. خطيبها ..
الدكتورة : شكلها متعرضة لصدمة جامدة اوي .. وانت السبب ..
خالد : انا ؟؟
الدكتورة : كلكو كده .. ههههه .. هيه مجرد اغماءة بسيطة ما تخافش ..
خالد طالعها بشك ..
الدكتورة : يوووه ما تخافش ..
خالد : يعني بترقد هنيه ؟
الدكتورة : ايوه .. طمن اهلها عليها .. وان شا الله حتبقى زي الفل ..
تنهـد خالد بقـهر ..
ومشـى بسيارته عسب يرد البيت ..
ما كان حاس بمرور الوقت ..
وان الوقت الحين متأخر ..
وامه مينة من الصياح عليه ..
ام خالد تطالع ويهه بخوف : انته سرت تحارب ولا شو سالفتك ؟
خالد تنهد : لا تحاتين يا اميه .. هذا واحد كان يهددني ع الموبايل .. وبلغت عليه الشرطة ..
ام خالد تصيح : وهالضربات اللي ع ويهك .. ويدييييه بعد كمن يوم عرس اختك .. كيف بتجابل الاوادم وانته جيه ؟؟
خالد : ما عليه يا اميه ..
ام خالد تصيح بقوة : مب انته خالد ولدي اللي اعرفه .. مب انته ..
خالد يحاول يهديها وسار حب راسها : خلاص يا امي لا تحاتين .. المشكلة انتهت ؟
ام خالد بتفاؤل : يعني خلاص ماشي ظهرات نصايف الليل ؟
خالد يبتسم لها : خلاص يا امي ..
ام خـالد تنفست براحة : الحمدلله ..
بعد كمــن يـوم ..
وفـ نفس يوم عرس عذبـة ..
امـه حطتله كمادات لان ويهه كان من الخاطر مزرق .. من آثار ضرب عبيد ..
وفعلاً خف شوي .. بس الأثر تام ..
الفــليل ..
العرس كان مليان ناس ورياييل ..
خالد كان فكره مشغول بمنوة اللي ما زارها هالكم اليوم لانه التهى بالعرس ..
حميد : اتخبرك منو المعرس فينا انا ولا انته ؟
خالد ابتسم له بغصة : انته اكيد .. تستاهل يا المعرس ..
حميد : اح اح هههههه .. تعال اتخبرك ..
( رن تلفون خالد )
خالد طالع الرقم : اخبرك حميد لحظة ( شل التلفون ) الو ..
الريـال : السلام عليكم اخويه خالد .. وياك النقيب حمد ..
خالد : وعليكم السلام والرحمة
الريال : ابشرك ترانا قبضنا ع الريـال اللي كان يهددك ..
خالد بصدمـة : معقـولة بهالسرعة ؟
الريال : لا الريال ظهر مغفل شوي وبسرعة قدرنا نقص عليه ..
خالد : انزين انزين الحيـن ياينكم ..
( سكر التلفون )
حميد باستغراب : وين ساير ؟
خالـد : شغلة ضرورية ظهرت لي فجأة .. اسمح لي يالنسيب ..
ومشـى خالد بسرعة صوب سيارته ..
وحميد تم يزقره .. وهو ولا يرد عليه ..
/
\
/
\
يتبع //

17 - 10 - 2024, 08:17 PM

الجزء الثالث عشر // الفصل الثاني

من بيـن أجواء العرس اللي كانت "حشرة" ومليانة ناس ..
وبين ربشة حميد وسوالفه ويا خالد ..
نش خالد باستعيال عسب يروح لمركز الشرطـة ..
اتصـل حميد بسرعة فـ خالد ..
خالد وهو توه ركب سيارته : الوو ..
حميد : يا بوك تستهبل ولا شو سالفتك انته ؟
خالد بحيرة : اسمح لي يا حميد والله اني هب رايم أأجل الموضوع ..
حميد : موضوع شو ؟؟ يا ريال عنبو حتى ليلة العرس ما بتحضرها ؟
خالد : والله اسمح لي مب بيدي ..
حميد : عيل منو بيدش وياي ؟ انته تدري ان عذبة مصرة انك انته بالذات من بد اخوانك تدش ..
خالد : البركـة فـ أحمد وراشـد ..اسمح لي حميد ..
حميـد تنهد بقهر من خالد وتصرفاته هالكم يـوم ! ..
وسكر فـ ويهه من غير ما يرد عليه ..
أما خالد اللي ما عطى أي أدنى اهتمام لردة فعل حميد ..
لأنه كان متحرقص يبا يجوف منو هو صاحب هالتهديدات الغريبة والعجيبة ! ..
فكره كان مشغول بـ منوة وحياتها وهلها ..
وبنفسـه وشغله اللي أهمله طول هالفترة ..
بس شرات ما يقولون ..
لـ ج ـل عين .. تكرم ألـف ع ـين .
.
.
حميـد خبر أحمد بالسالفة ..
اللي بدوره اتصل فـ امه وخبرها ..
أم خالد بعد ما سكرت عن أحمد : حسبي الله عليك من ولد .. هاي سواة تسويها يا خلود ؟ ولا بعد ف يوم عرس اختك ؟؟
اسما : امييه شو بلاه خالد ؟
ام خالد : اخوج حضرته ركب سيارته وظهر .. اونه عنده شغل ضروري ..
اسما باستغراب : يعني ما بيدش القاعة ويا حميد ؟
ام خالد : يا ويلي عليج يا عذبة .. وانا اللي شادة الظهر فهالولد .. اسميه ظهر ما يصلح لشي ..
اسما : حرام اميه لا تظلمين خالد يمكن صج انشغل ..
ام خالد : هي امررره .. صدقته انا الحين .. اقص ايديه ان ما كان متزوج بالسـر ..
وع سوالفهم دخلن روضـة و شما ..
روضة : هااه .. منو اللي معرس بالسر خالو ؟
ام خالد توايهها : لا فديتج نرمس عن واحد ما تعرفينه ..
شما تهمس لأسما : جني سمعت طاري خالد ؟
اسما بنفس درجة صوتها : هيه .. خالد ظهر من العرس بعد ما اتصلبه واحد .. واميه معاندة الا انه معرس وبالسر بعد ! ..
شما : لالالا .. مستحيل ما اتوقع خالد يسويها ..
اسما : حتى انا اقول جيه .. خالد ما يداني طاري الحريم ..
شما : وأولهن رويض هههه ..
ام خالد : روضة فديتج وين امج وخالتج ؟
روضـة : ودرناهن صوب القاعة يالسات يسلمن ع العيايز ..
ام خالد : عيل اسمحولي بسير اخاويهن ..
روضـة : مسموحة خالووه .. ( تطالع اسما وشما باجرام ) جني الا سمعتكن ترمسن عني ؟
شما : خيييبة حشى هب اذن .. ولا اذن فيل ..
روضة بدلع : الله اكبر .. عن تاكليني ..
اسما : ههههههه ماشي .. خالد ما بيدش القـاعة ويا حميد ..
روضة : احسـن عسب محد من هالبنات المخبل تجوفه ..
شما : ويييه .. مااالت ..
.
.
فـ مركز الشـرطة .
الملازم حمد : الاسم ؟
الريال : يعقــوب حـامد ..
خالد من سمـع الاسم حس بنفضـة غريبة فـ جسمه !
الملازم حمد : اخويه خالد . لك كافة الحرية في انك تتخذ الاجراء عسب هالسالفة ..
خالد تنهد : مب مشكلة ما قصرتوا والله .. بس ممكن أسأله شحقه لحقني ؟
يعقـوب : هاي امور عائلية وما تنقال جدام الناس ..
الملازم حمد نش : عيل انا بخليكم ترمسون وتتفاهمون وان شـا الله يكون الحل ودي امبينكم ..
خالد : مشكور وما قصرت ..
من بعد ما ظهر الملازم حمد من الغرفة .
خالد بغيظ : منو انته ؟
يعقـوب بضعف حيله : يهمك تعرف ؟
خالد : اكيد يهمني .. واحد سرق النوم من عيوني .. عيشني القلق كله .. كيف ما تباني اهتم في اني اكشف منو هو وشحقه لاحقني ..
يعقوب : تبا تعرف السالفة من بدايتها ..
خالد صبره نفذ : خلصني وقول .
يعقوب : انا اشتغـل عند عمي فارس .. وهو اللي قالي اسويبك جيه .
خالد بقهر : وعمك شو دراه فيه انا ؟
يعقوب : عمي ؟؟ جيه انته ما تدري ان عمي يكون نفسـه ريل أم منوة .؟؟
خالد بصدمة : شو تقول انته ؟
يعقوب : يا خي تباني اخبرك السالفة من بدايتها ولا شو ؟
خالد : قول وامري لله ..
يعقوب : بس عاد يا ريت ما توصل هالسالفة لـ حد ..
خالد : ان شا الله .. بس انته ارمس الحين ..
يعقـوب : من ونحن صغار .. ومنال (أم منوة) محـط أنظار كل شباب الفريج .. هي بنت التاجر .. الجميلة .. واللي خطفت قلوب تجــار ورياييل .. كانت دلوعة ابوها .. وامها توفت بعد ما ولدتها بـ 40 يوم ..
خالد : انزين ؟
يعقوب : بصفته عمي فارس انه يقربلها ويكون ولد عمها .. اللي كان تاجر بعد .. وله اسمـه في السوق .. خطبـها عن حب والكل حاسدنه عليها .. لكن من سوء حظه .. ان فـ ليلة العرس وقبل ما يوقعون ورقة الزواج ياها مرض غريب عجيب .. بسبته تكنسل العرس بكبره .. وابوها ما قصر سفرها بلاد برع .. وظهرت في النهاية محسـودة .. وما انفج هالحسد الا من بعد ما يابوا غسول كل الحريم اللي زهبوها ليلة العرس .. وفعلاً استوت زينة وردت شرات الأولية .. ويمكن احسن ..
خالد : وعمك ؟؟ شو محله من الاعراب الحين ؟
يعقوب : اختفى شرات ما اختفوا كل الخطاطيب فجأة .. ومحد يا عسب يخطبها .. والبنت كملت الـ18 وهي بعدها لا انخطبت ولا شي .. لان الناس ظهرت عليها رمسة انها ممسوسة وراكبنها عفريت ..
خالد : معقولة ؟
يعقوب : هي والله .. عاد عقبها بشهور .. رد محمد للبلاد .. وهو عنده الشهادة العودة .. ودكتوراه ذاك الزمن غير عن دكتوراه هالايام .. وصار محمد حلم كل بنـت لشهادته ووسامته ..
خالد : اكيد خطب منال .
يعقوب : هيه .. شافها وتعلق فيها .. وما همه رمسة الناس عنها .. وابوها ما صدق .. على طول وافق عليه ..
خالد : هذا أبو منوة ؟
يعقوب : هيه .. تزوجها وعاشـو بكل سعادة وهدوء .. ومنها حملت ام منوة بـ منوة ..
خالد : لين الحين كل شي طبيعي ..
يعقوب : اللي ما تعرفه ان فارس ما كان يطيق محمد من الصغر لأنه أشطر عنه فـ كل شي .. ولان هل فارس كانوا دووم الا يعايرونه ويقارنونه بمحمد الفالح فـ دراسته ..
خالد : لا والله ؟
يعقوب : جفت عاد ؟
خالد : بس لين الحين ما عرفت شو سبب هالتهديد ..
يعقوب تجاهل رمسة خالد : عمي فارس حزتها تخبل يوم عرف ان الرمسة اللي انقالت عن منال كلها جذب .. وانها صاحية وما فيها شي ..
خالد : شو سوى ؟
يعقوب : كان كل همه انه ينتقم من عدوه وسارق حبيبته .. وما لقى احسن من صرقة فلوسه .
خالد : وقدر ..
يعقوب : المشكلة ان محمد قلبه ابيض .. وما كان يبخل عليه بفلس .. بالعكس يتمنى له كل خير .. حتى انه فـ مرة من المرات قاله اذا تباني اخطب لك فانا حاضر ..
خالد : انزين ؟
يعقوب : مع مرور السنين .. وبعد ما سمع فارس بحمل منال الثاني .. قرر ينتقم ..
خالد : كيف ؟
يعقوب : انه يخطف منـوة حبيبة ابـوها ..
خالد بصدمـة : هو اللي خطفها ؟؟؟؟ وشو سوى بها ؟
يعقوب : سلمها لي انا .. وانا بدوري ربطتها ووديتها عند بو فايز ..
خالد : وشقايل غيرتوا اسمها من منوة لصوفي ؟
يعقوب : همنا الاول كان ان ننسي محمد اسم منوة .. وكان هدفنا ان نعطيها جواز اماراتي .. بس تزوير مثل هالجواز صعب .. وما حصلنا الا واحد يزور جوازات هنديه .. فسميناها صوفي ..
خالد : وبو منوة شو صابه ؟
يعقوب : ويييه تخبل الريال ويلس يوعد الأوادم ان اللي يحصل بنته له مبلغ عوود .. بس ما شي فايدة .. شهرين ومات الريال من زود الحزن عليها .. وام منوة عقت الياهل من صدمتها ببنتها وريلها .. عاد حزتها عمي فارس جدم عمره .. وسوى عمره الريال الشهم الامين .. وقدر بعد ما خلصت العدة بشهور .. انه يقنعها تتزوجه بحجة ان مالها حد وهو بيستر عليها ..!
خالد بحيرة : احس بعمري اسمع قصة مسلسل ..
يعقوب : ماله داعي تستغرب ..كل شي جايز فهالدنيا ..
خالد : وتعليمها ؟؟ كيف تعلمت ؟
يعقوب : ف مدرسة خاصـة بجوازها الهندي .. عادي ..
خالد : والمصاريف ؟
يعقوب : عاد مب لهالدرجة عمي بخيل .. بس لانه اشفق عليها خصوصاً انها بنت اغلى انسانة عنده ف الدنيا ..
خالد : وين بيتهم ؟
يعقوب : في فريجكم بعد وين ؟
خالد بصدمة : وانته شدراك انا وين ساكن ؟
يعقوب : الله يخلي بو فايز .. هو اللي خبرني بكل شي عنك ..
خالد : وكيف حصلت رقمي ؟
يعقوب : مب صعب ان نلقى رقم شاب تاجر وناجح ف عمله .. صح ولا ؟؟
خالد تنهد : واشحقه كنتوا تسبوني عيل ؟
يعقوب : تهديد لا اكثر .. وهذا بناء على طلب عمي فارس ..
خالد باستنكار : بهالطريقة الناس تهدد ؟
يعقوب : كان المخطط ان نعلمك درس ما تنساه موليه .. بس انته سبقتنا وبلغت الشرطة على عكس توقعاتنا .. اللي بسرعة زخوني ! ..
خالد تنهد : حسبي الله عليك وعلى عمك هذا .. انته تدري ان اليوم عرس اختي وانا مودرنه عسب سواد عيونك ؟
يعقوب : عادي .. شو يعني .. تعال منوة وينها ؟
خالد ما حب يقوله : ما يخصك .. ( نش خالد )
يعقوب : وين ؟
خالد : بزقر الملازم ..
ومن بعد ما يا الملازم حمد ..
الملازم حمد : والحين شو قررت يا استاذ خالد ؟
خالد : انا بتنازل عن كل شي بشرط .. انه يوقع تعهد بانه ما يتعرض لي .. لا هو ولا فارس .. ولا حد من اعوانه ..
يعقوب باستنكار : وعمي شو يخصه ؟
خالد : هذا شرطي .. وانته عاد بكيفك ..
يعقوب : اوف .. امري لله ..
الملازم حمد : المهم ان الحل استوى ودي في النهاية .. والحين بكتب التعهد عسب توقعون عليه ..
.
.
تم تـوقيع التعـهد ..
وانجبر يعقوب يدلي خالد مكان بيت منوة ..
وفي النهـاية وصل يعقـوب بيته ..
.
.
اتصل خالد بحميد ..
حميد بدون نفس : الو ..
خالد : ياخي معرس وزاخ الموبايل ؟ جيه ما دخلوك ؟
حميد : لا .. شو بغيت ؟
خالد : متى بتدش ؟
حميد : وهذا بشو يهمك ؟
خالد : يا بووك بس سؤال والله ..
حميد : اقول سير وجابل اشغالك احسن ..
خالد : افاا .. وانا اللي ودرت الشغل وياي فـ الدرب صوبكم ؟؟
حميد بفرحة : صج ؟
خالد : لا تصدق اتمصخر وياك ..
حميد : مالت .. كم باقيلك لين اتي ؟
خالد : مب مطول .. الا ساعة وربع بالكثير ..
حميد : يا بوك الساعة 12 الا ربع الحينه ..
خالد : خلاص بحاول اسرع .. بس يا ويلك ان دشيت بلياي فاهم ؟
حميد : بفكر ..
خالد : ههههه مالت .. اقول ليكون خبرت قوم اميه اني محد ؟
حميد : هيه واحتشروا من الخاطر عليك .. بالخص عذبة ..
خالد : ما عليه يالسوسة .. انزين لا تخبرهم اني ياي ..
حميد : اوكي ..
خالد : فمان الله ..
.
.
مع مرور الوقـت ..
وع الساعة 12 و20 دقيقة وصل خالد ..
أحمد : يا خي جنك الا ذليتهم .. من الصبح يتصلون بك تعال وتعال ..
حميد : اصبررر (جاف السيارة) ها .. وصل الشيخ ..
أحمد باستغراب : خويييلد ؟؟
خالد فتح الدريشة : صبروا ببركنها وبييكم .. اسمحلنا يالمعرس ..
حميد : ما علي بردها فـ ليلة عرسك ..
.
.
وع ذيج اللحـظة مشوا .. ودشوا كلهم القاعة ..
نشوة الفرح غمرت ام خالد بوجود خالد ..
وعذبة اللي طنشت حميد واهتمت بخالد ..
وروضة اللي مااااتت من القهر من البنيات اللي تفدن خالد جدامها ..
كـــل هاللحظـات الحلوة دامـت في عرس عذبـة & حميــد ..

/
\
/
\
نهاية الجزء الثالث عشر ...

17 - 10 - 2024, 08:18 PM

الجزء الرابع عشر // الفصل الأول

أثنـــاء العرس استوى موقف وايد بابخ بالنسبة لخالد ..
يوم أمه أشرت له على روضة عسب يجوفها وهي كاشخة .. عل وعسى تهتز مشاعره بكشختها ويصر انه ياخذها ..
خالد وهو يطالع روضـة وف خاطره : وحليلج يا امي .. ما تدرين ان مشاعري كلها لـ منوة .. لكني ادري ان الزواج منها حالياً صعـب وايد ..
روضة تخبلت خصوصاً انها كانت بين ربيعاتها اللي قامن يدلعنها وحاسدينها ع ولد الخالة الوسيم .. والخالة الطيبة الحنونة ..
من غير سابق انذار .. أحمد غيظ فجأة . وطلب من خالد انهم يظهرون من القاعة ..
وخالد لبى طلبه جنه يباها من الله .. وسلم على حميد وعذبة وظهر ..
.
.
برع القاعة
خالد : بلاك ياخي .. شوفيك معصب ؟
أحمد متنرفز : جايف الوضع داخل وايد حلو يعني ؟
خالد باستغراب :ما فهمت عليك ..
أحمد يحاول يدور له سبب : لا يعني فستان عذبة وايد مكشوف و ..
خالد بشك : الحين ها اللي مضايجنك ؟!!
أحمد : اكيد ..
خالد : ع العموم انته لازم ما تهتم أصلاً لانها بين حريم ..
أحمد بلامبالاة : انزين انزين ..
خالد : تعال رشود وينه ؟
أحمد : يوم زقرت الهرم ماطاع يظهر واتلصق باميه ..
خالد : صدق انه مغازلجي !! ..
مرت هالليلــة بسـلام وعدت على خير ..
.
.
أم خالد اللي يلست تصيح على عذبة وفراقهـا لـ شهر كامل لانها بتسـافر الليلة ..
وخالد .. اللي جفاه النوم .. ما بين تفكيره بمنوة اللي مادرى عنها هالـ كم يوم جانها نشت ولا لا .. وما بين وجود هلها ورفضـها لهـم .. !!
فعلاً شي يحير !!
اليوم الثاني ..
الكل نش بتثاقل عدا بوخالد اللي لازال متطبع بطبع رياييل اول انهم ما يحضرون اعراس بناتهم ..
واللي كان ساير البر بارحة .. وراد ع المغرب ومصلي العشا وراقد ..
من كثر التفكير رقد خالد متأخر .. ونش متأخر ..
لبس ملابسه بسرعة عسب يلحق على شغله المتراكم من فترة ..
خذ له ساعتين لين ما خلص صفقته اليديدة ..
وأجل المواعيد اللي طافته لأيام ثانية ..
وعلى طول طيران للمستشفى ..
.
.
في المستشفى ..
الدكتورة : الحمدلله كلو سليم .. امس استقرت حالتها .. بس لاحظنا عليها اليوم انو الانهيار زاد شويه .. كانت بتحكي عن اسامي وقتل وجرايم .. ماعرفش مالها !! ..امال اهلها فيين ؟؟
خالد ارتبك : اهلها مب ساكنين هني ..
الدكتورة : ربنا يساعدها ...
خالد : والحين شو حالتها ؟
الدكتورة : دلوقتي تمام التمام .. عطيناها منوم .. ولحد دحين هيه نايمة ..
خالد برعب : ليكون استوابها شي ؟؟
الدكتورة : ما تخافش .. ده اثر المنوم دايم يكون كده ..
خالد : اقدر اجوفها ؟
الدكتورة : تفضـل ..
دخل خالد غرفة منوة ..
كانت نايمة والتعب بادي عليها ..
خصلات من شعرها ظهرت من شيلتها المتهالكة ..
عطت منظر لويهها بالمرض والاهمال اللاإرادي ..
خالد يحاول يقومها : منوة .. منوة ..
كانت تحرك حواجبها وكأنها تجوف كابوس ..
خالد بصوت حزين : منوة دخيلج نشي .. دخيييلج ! ..
منوة .. لا تعليق ..
خالد بصوت اعلى يكرر اسمها : يلا يا منوة يلا نشي بلا كسل ..
فجــت عينها بكسل والتركيز صفر بالنسبة لها ..
خالد ابتسم براحة : يلا يا الكسلانة نشـي ..
منوة وهي تحج عيونها بصوت مبحوح : خالد ؟!
خالد ابتسم لها بحـب ..
تأملـته للحظات .. كان لابس كندورة كركمية ومتعصم بغترة حمرا ..
كانت حاسة انها بحلم ..
لين ما اعلنت دموعها الانهمار ونطقت : خالد وينك خوفتني عليك ؟؟
خالد : والله آسف بارحة كان عرس اختي عذبة ..
منوة ابتسمت : والله ؟ مبروووك ..
خالد بخبث : الله يبارك فيج .. عقبالج ..
منوة تنهدت بحزن : لا انا نصيبي مب الحين .. انزين شو سويت في العرس ؟؟
خالد : انتي ما عليج من بارحة وخبريني .. شخبارج الحين ؟
منوة : والله الحمدلله واايد احسن عن بارحة ..
خالد : يعني بتظهرين ؟؟
منوة بخوف : وين اروح ؟
خالد : الفندق بعد وين ؟!!
منوة : لين متى بتم في الفندق .. خلني في المستشفى ..
خالد : من بتشفين بيعطونج ورقـة الظهرة .. مردج للفندق ..
منوة بحزن : خالد انا حاسة بالذنب تجاهك ..
خالد : انا اشتكيت لج ؟
منوة باحراج : لا بس ..
خالد يقطاعها : عيل خلاص خليني على هواي ..
منوة برهبة : خالد انته ذبحت عبيد ؟
خالد بصدمة : انا ذبحته ؟؟!
منوة : تراه طاح من بعد ما ضربته ع راسه ..
خالد : هههههه لا تحاتين ..ما ذبحته .. كان ناش بس مب رايم يتحرك من العوار ..
منوة : شدراك ؟؟
خالد بنرفزة : تراني جفته فـ مركز الشرطة .. صاحي وجنه البخت ..
منوة بقلق : اشتكى عليك ؟؟
خالد : وهو يرووم ؟! اصلاً عارف اني اقدر اطيحه ف ستين داهية .. هاي قضية شرف مب مصخرة ..
منوة : الحمــدلله ..
خالد : منوتي ..
منوة تفاجأت : شووه ؟؟؟
خالد : هههههههه .. شو رايج بمفاجأة ؟؟
منوة : مفاجأة شووه ؟
خالد : شو رايج تترييني اروح واييبها لج ؟؟
منوة : يعني بتطول ؟؟
خالد : والله حسب .. بس بحاول ما اطول ..
منوة : اوكي الله وياك .. وانا اترياك لا تتأخر ..
.
.
ظهـر خــالد ..
ووجهته لبيــت فارس ومنال ..
بالأحرى بيــت منوة ..
وشو من المصــير بيواجهه ؟؟

/
\
/
\
يتبع //

17 - 10 - 2024, 08:19 PM

الجزء الرابع عشر // الفصل الثاني

جدام بــاب بيـت منوة كان اللقاء الحتـمي بيـن خالد ومصـير منـوة .
ما طرى على بال خالد شي غير مصير منوة المجهول .
حس بنغزة فـ قلبه في ان ممكن يعقوب يقص عليـه ويخدعـه !
ويمكن هالبيت من الأساس ما يكون بيـت منوة .
بس ليـش لا ؟؟
مب كل شـي جايز ..
اكتسب ثـقة شـوي ..
ودق جرس البيـــت ..
وخذ وقت طويل وهو يتريا لين ما حس بصـوت متجه صوب اذنـه .
ظهر صوت السماعة المركبة حذال الجرس .
الصوت : منو يبي ؟
خـالد : بابا فارس موجود ؟
الصوت : منو يقول ؟
خالد بتردد : قولي لـه يعقـوب .
الصوت : جيـن ..
مـا مرت ثـواني الا وبـاب البيـت الصغير ينفـتح بالريموت وتظهر لـه الخدامة وتدليـه مكان ميلس الرياييل .
كانت حديقـــة خضــراء مع ممــرات مائية ع الأطراف عاكسـة منـظر روعة وخـيالي ! ..
خالد كان منبهر بهالبيـت الحـلو ..
ووسط انبهاره مشى صوب الميلس ودخل ..
.
.
على الرغم من ان خـالد عايش العز كـله .
لكن العـز فهالبيت كان يغلب فخـامة بيـتهم، يعتبر بالنسبـة له جداً متواضع !
دخلت الخدامة بالعصـير ..
ومن وراها دخل ريــال من هيئته ينعطى انه فـ سن ابوه والشيب مغطي راسـه .
استنــتج انـه فارس ..
فارس : حيا الله الشيــخ ..
خالد : الله يحييك ويبجيك يالغالي ..
فارس : شحالك وشحال صحتك وأخبار الدنيا وياك ؟
خالد : الحمـدلله بخيــر وما شكي باس .. شحالك انته (بغصة) عمي ان شـا الله بخير ؟
فارس : والله الحمــدلله بخير ..
لحــظة صمــت ..
فارس : ابويـه انته تعرفني ؟
خالد : هيــه .. مب انته العم فارس التاجر العود ؟
فارس : هي نعم .. بشحمه ولحمه ..
خالد بتعمد : وحرمتك أرمـلة المهندس العود بو منوة الله يرحمـه ؟
فارس ويهه تغير : هيه نعم ..
خالد : طلبتـك يا عمي . قول تم ..
فارس : آمر، ان كنت قد الطلب من عيوني .
خالد : بغيـت اكلم حرمتك فـ موضوع مهم .
فارس فج عينـه بصدمة : اشووه ؟ شو يعني تبا تجوفها ؟؟
خالد يقاطعه بعد ما حسها مب حلوة بحقه : السموحة بس انا اقصـد بوجودك، لا تحاتي .
فارس بعدم اقتناع : انزين خبرني الرمسة وانا بوصلها لـها ..
خالد : والله ما روم .. اميـه موصتني ارمسها ويه بويه ..
فارس فج عينه عليه : وامك من وين تعرفها ؟
خالد : ما تعرفها عـدل بس كانت تعرف ابوهـا ..
فارس بضيج : عيل اصبر عليه لين ازقرهـا ..
.
.
مر الوقت ..
الين ما دشت حرمة مغطاية من ساسها لـ راسها .
انقهـر خالد منه وكان وده يجوف ويهها على كثـر وصف يعقوب لـها ( صج قليل ادب يا خويلد )
منال : الســلام عليكم
خالد : عليكم السلام والرحمة .. شحالج (يشد عليها ) يا ام منوة ؟
فارس تغيرت ملامح ويهه
ومنال ردت : الحمدلله نحمده ونشـكره على كل حال .
خالد بتحدي : انا اسمـي خالد .. وساكن فهالفريج ( يوضـح صوته ) يعقـوب اللي يشتغل عند العم فارس خبرني كـل شي ..
منال باستغراب : شو خبرك ؟
فارس طالع خالد بصدمة ..
خالد بشماتة : اشـــيا واااايدة .. أهمها منــوة بنتـــج ..
فارس من الصــدمة يلس ع القنـفة وهو يحاول يستوعب شو السالفة
وحزتها منال شهقـت : منوة بنـتي ؟؟؟!!!
خالد بابتسـامة : لا تحــاتين خالــو ،، بنتج في الحفظ والصون .
منال وهي تطالع فارس وهي مب مصدقة : سمعت يا فارس ؟ يقول انه لقى بنتي .. لقوا بنتي . بنتي منوة بعد 15 ســـنة بجوووفها !! ..
فارس ودقات قلبه تزيد : انـــته جذاب !!
خالد يطالعه باحتقـار : وشو مصلحتي عسب اجذب ها ؟ لا انا متفق ويا بوفايز ولا فتحيــة ولا يعقــوب !!
فارس بدى يتنـفس بوضوح .. وعجز عن الرد ..!
منال بفرحة : دخيـــلك ودني لها .. ابا اجوفها ..
خالد : حيـــاج الله .. تبيني اوديج ؟؟
فارس : جيه الدنيا فوضــى ؟ اقولج ما تسيرين يعني ما تسيرين فاهمة ؟
منال : اشحقـه يا فارس ؟
فارس : كيفي انا قلت ما تسير وخلاص ..
خالد بغيظ : ام وبتجوف بنتها .. شو يعني ما تســـير ؟!
منـال صدت على فارس : مالك حق تمنعني عن بنتي .. يلا يا خالد ودني ..
فارس يصارخ بقوة : يقص عليج هذا !!
خالد بقهر : مب كل الناس جذابة شراتك .. خالو تعالي بوديج ..
منال : خلاص انته اسبقني بزقر الدريول والبشكارة وبندور وراك .
خالد طالع فارس بابتسامة نصـــر ..
وفـــارس ..
طايح فـ مستنقع مب رايم يظهر منه !!
طـول الدرب ..
وام منــوة شوقها يغلبــها لـ منوة ..
كانت شبـه مب مصدقة انها بتجوف بنتها بعد كل هالمــدة ..
بس منو يدري ؟؟ كل شي جايز فهالدنيا !!
.
.
أمـــا خــالد فـ اتخذ قرار مالـه رجعـة عنـه ..
تبون تــعرفونـه ؟!
.
.
أخيـــراً وصلـوا للمستـشفى ..
أول ما نزل خالد للمستشـفى وظهر من السيارة واتجـه لسيارة ام منـوة ..
ام منوة بخوف : بنتي في المستـشفى ؟!
خالد ابتسم لـها : لا تحاتين، وايد تحسنت عن قبل وتروم تظهر الحين بعد جان تبين ..
.
.
اثناء مشيهم في الممرات،
نبه خالد ام منوة بردة فعل منـوة وانها ما تعرف اصلاً بوجودها وانه اكتشف مكانها ..
عسـب ما تنـصدم اذا منوة ردت لحركاتها الاوليه ..
فـتح خــالد البـــاب وطــل منــه ..
منوة بابتسامة : وييينك تأخرت ؟؟
خــالد : شو اسويبها ،، بغيتها اتي بس هي طولت شوي .. واخيراً يت ..
منــوة باستغراب : منو قصدك ؟
خالد فج الباب بكبــره ..
ودخــلت ام منوة المغطـاية بكبرهـا ومن وراها الخــدامة ..
منـوة باستغراب : هذي امك ؟
رفعــت منال غشــوتها ويلسـت تتأمل منــوة شرات اللي مب مصدق انه يجوف هالشي ..
منـوة نفسها من جافت ويهها قلبها تم يدق ..
الشبــــه وايد كبيير !!
تموا جيـــه للحـــظات .. كأنهـــا شهور ..
.
.
خـالد يقطع الصمـت : معقوله ما عرفتي أمـج ؟
منوة تبلع ريجها بخوف : امــــــــي !!! ؟؟
حزتها ما لقت منال غير انها تمشـي صوب منـوة ..
ما كانت حاسـة بشـك ان مب ممكن تكون هاي بنتها ..
وهي تمشي صوبها كانت تصيح وتردد : بنتي ظهرت تشبهني يا محمد .. تشبهني ..
.
.
منال وهي حاظنة منوة وتصيح : بنتي بخير انتي ؟ وينج كل هالفترة .. جلبت الدنيا عليييج ( تصيح بقهر) ابوج مات يا منوة .. مات وخلاني بروحي ..
مــنوة انصعقت من الخبر وكأنها تذكر ابوها عدل : ابويــه مات ؟!!
.
.
شريــــــط الذكـــريات بدى يعيد نفسـه على منوة اللي حسـت نفسها ترد لـ 15 سنـة ورا ..
أيام الحديقـــة اللي كانت تــلعب فيــها ..
رفعـــت راسها عن حظن امها عسب تطالع ويههـــا ..
هي نـــعم !
نفس الويه ..
بس كيف قدرت تنسـى ملامحـــه !! كييييف !!!
.
.
طالعت أمهــا بحزن وارتمت فـ حضنها من يديد : وينـــج يا اميييييه ويييينج عن بنتج اللي تبهــدلت مليووون مرة و اســـتوت ..
خالد يتدارك الموقف ويقاطعها : الظاهر اني الحيـن صدق تطفلت .. عاد اسمحولي ع الرزة ( اونه يصيح ) اه اه اثرتوا فيـــه !!
ابتــسمت لـه منال وهي لازالت عيونها على منوة : مشــكور يا ولدي ع اللي سويته .. عساك ما تجوف الحزن ولا تدل دربـــه يا رب ..
خالد بحب : آمين يا رب .. يلا اسمحــولي ..
طــالع منــوة بابتســامة " اخوية " واللي كانت غارسة نفسها فـ حضـن امها وعيونها وارمة من الصياح ..
ومشـــى عنـــهم ..
.
.
قرر خـــالد انه يبــعد عن منــوة نهائيــاً ..
لا طموح بالزواج ولا شي !
ممكن هالحب اللي ظنـه انـه تشكل كان مجرد شفقـة على حالها لانها كانت مجرد خادمة مواطنـه ..
خالد الشـهم أنقــذ منــوة .. وقرر يختفي عن حياتها للأبـــد !
تتخيـــلون هالشـــي !!؟؟
حقيقة ما أقــدر أتخيــله ..
ولكن هذا قرار خالد اللي اكد انه ما يكن لـ منوة الا مشاعر الأخوة ..
ولازم نحـــترم قراراته ! .
.
.
كان لابد لمـنوة وامهـا انهم يقطعـون الشك باليقين مع تحــليل الـ dna للتـأكد من صلة القرابـة الحقيقيـة ..
والنتيـــجة وللـــه الحمد إيجابــية ..
وقع الدكـــتور أوراق خــروج منــوة ..
وهـــم ظاهرين من المستشفـــى ..
منوة : يعنـــي خلاص ما في ذل بــعد اليـــوم ؟!!
منال بحـــب : اكيد يا حبيبتي .. يلا قوليلي شو استوى بج طول هالمدة ؟؟ ومنو هذا الـ خالد ؟؟
منــوة : اميه الســـالفة وااايد طويـــله ..
منال : ونحن شو ورانا .. نركب السيـــارة وفي البيـــت اسمعج لين ما تتعبين وتقولين دخيلج يا اميه انتي اللي رمسي ..
منوة : هههههههههههه ان شــــــا الله ..
مشــــوا مع بعض باتجاه السيـــارة ..
وكل وحدة تفكر فـ شي معين ..
هل النهاية بتـــمر بسلام لـ منوة ؟
ولا في وعــورة في الطريج ؟
ومنوة لو درت عن قرار خالد بترضى ؟
ولا الحيــن لان وضعها تعدل بتحاول تكســـبه ؟!!!

/
\
/
\
نهاية الجزء الرابـع عشر ...

17 - 10 - 2024, 08:19 PM

الجزء الخامس عشر// الفصل الأول

منــوة : اميه الســـالفة وااايد طويـــله ..
منال : ونحن شو ورانا .. نركب السيـــارة وفي البيـــت اسمعج لين ما تتعبين وتقولين دخيلج يا اميه انتي اللي رمسي ..
منوة : هههههههههههه ان شــــــا الله ..
مشــــوا مع بعض باتجاه السيـــارة ..
وكل وحدة تفكر فـ شي معين ..
.
.
روت منــوة لأمهـا كل معاناتها اللي مرت بهـا ..
من ام أم فايز وبوفايز ..
ومن ذل فتحيـة .. لـ سجنها ..
ومن طيش راجو ومحمد ..
ومن تجربـة حب سيف وفضيحة العرس ..
ومن عمر وشهد .. والخيانة المفضوحة ..
و أخيراً لعايلة خالد .. ومواقف خالد وياهـا ..!
وسبب طيحتها .. وعايلة عبيد الدخيلة !!!
.
.
دخلت منوة البيت وهي مذهولة من كل هالفخامة الموجودة ..
ما كانت قادرة تستوعب ان مقدار الفخامة هذا كانت عايشتنه وهي صغيرة ..
تذكرت معاناتها فـ بيت بوفايز وفتحية ..
تنهدت على مصير فتحية المؤلم ... السجن !! ..
صدت أمها عليها بعد ما لاحظتها انها تسمرت فـ مكانها : شو بلاج يا منوة ؟
منوة بأسف : تدرين يا اميه .. احس ان كـل اللي انا أعيشه وهم × وهم ..
ام منوة : ليش انزين يا منوة ؟
منوة : انا جربت كل شتى أنواع العذاب يا اميه .. كل حياتي كانت مجرد شقى وتعب .. معقولة أحصل الراحة الحين ؟!
ام منوة دمعت عينها : حسبي الله ع اللي سوى كل ها فيج .. اللـه لا يـ ..
منوة تقاطعها : لا يا اميه .. مب زينه الدعاوي .. ع الاقل آخذ حقي بليا دعاوي ع الناس .. آخذ حقي بإيدي ..
قطـع رمستهم تـواجـد فارس ..
ام منوة صدت على فارس : هذي منوة يا فارس .. شفت ؟ خالد ما ظهر يقص علينا ..
منوة تصاصر أمها : اميه هذا ريلج ؟
ام منوة : هيه يا بنتي .. هذا ولد عمي و ريلي .. سيري سلمي عليه ..
نشت منوة له بكل حب ومدت يدها له : شحالك عمي ؟
طالعها فارس بنظرة حقد .. ومد يده لها : الحمدلله بخير ..
منوة تشنجت من مسكته ليدها ..
ليش يوم سلم عليها حست بطيف الماضي يعيد نفسه ؟!
يلس فارس .. وردت منوة ويلست حذال امها ..
كانت تتطالع فارس بربكة طول هاليلسة .. وما كانت تدري ليش ! ..
ام منوة بقهر : بنتي شقت وتعبت ف حياتها يا فارس .. لازم نبلغ الوجهات المختصة انهم ياخذون حق بنتي ..
فارس اللي كان مرتبك : وكيف بيصدقونج يعني ؟
ام منوة : جواز بنتي المزور .. وفتحية المسجونة عندهم .. كل ها وما بيصدقون ؟؟
صد فارس على منوة بذهول : بو فايز عطاج الجواز ؟
منوة طالعته بصدمة : وانته شدراك بـ بوفايز ؟
فارس بخوف : هـا .. منو بوفايز ؟
منوة بغيظ : انته قلت اسمه .. وانا سمعتك ..
ام منوة : يا جماعة بلاكم شو استوى ..
فارس طالع منوة بحقد : متأكدة ان هاي بنتج ؟ ماحيد تربيتج جيه ..
منوة وقفت وطالعته بتحدي : وهي لحقت تربيني بعد ما خطفني بو فايز ؟ بعدين الزم حدودك فاهم ؟ وتعال انته اللي طريت اسمه ع لسانك .. شو دراك فيه ؟
فارس غيظ زيادة : ايه بلاج انتي يالبشكارة ؟
مـنوة طالعته بصدمة كبيرة ويلست وهي تحاول تداري دقات قلبها اللي تزايدت سرعتها ..
ام منوة طالعته بدهشة : وانته شدراك ؟
منوة وهي تتنافض : اقص ايديه اذا هذا ( تأشر على فارس ) ما كان له يد في السالفة اللي استوت بي .. حسبي الله عليـــــك ! ..
أم منوة بصدمة : اشوووه ؟؟؟ معقولة يا فارس ؟؟ تكلم ؟؟ انته اللي سويت كل ها بمنوة ؟
فارس تنفس بقوة وهو يطالع ام منوة ومنوة .. وبلا رد ..
ام منوة : انطق .. ولا مالك ويه تقول شي ؟
منوة دمعت عينها : انا شو ذنبي اني اعيش بذل كل ذيج المدة ؟
فارس كان ساكت .. لان ماله ويه يتكلم ..
ما كان متوقع ان لسانه بيزل وبينهزم من أول مواجهة مع منوة ..
وين كان إصراره انه يشكك في وجودها ؟؟ ويهدد ام منوة بالطلاق ؟؟ وييين !
تموا ساكتين لـ فترة .
الين ما نطق فارس بنفسه : هي نعم .. انا اللي خطفتج ..
منوة بلعت ريجها وطالعته بصدمة : انته ؟
فارس بتأثر : انا ما سويت هالشي عسب انتقم منج انتي .. ولا قصد مني اني أبهدلج واخليج تتعذبين فـ حياتج .. ( رفع من درجة صوته ) انا كان قصدي ارد خطيبتي لي من بعد ما ابوج صرقها مني .. وما كان في بالي غير الانتقام .. فـ خطفتج ..
منوة طالعته بقهر : حرام عليك اللي سويته .. والله حرام ..
فارس ولأول مرة يبين عليه التأثر : لو كنت أبغي أحطمج ما كانت تكفلت بكل مصاريف دراستج في المدرسة الخاصة .. انا .. انا فعلاً غلطت .. بس هذا ما يمنع اني اكون نادم على غلطتي ..
ام منوة ودموعها تنزل بحرقة : وغلطتك ما دفع ثمنها غيري أنا وبنتي ..
منوة شهقت بألم : وابويه يالظالم .. ابوووويه ! ..
منال بقهر : اظهر من بيتي احسن لك .. ولا والله ما بتحصل شي زين مني ..
فارس بصدمة : بعد كل هالعمر تطرديني يا منال ؟؟
منال : وأي عمر عشته وياك يا الخاين ؟؟ عمري انتهى من غياب بنتي .. والحين بيبدى بعد فراقك ..
فارس بانتقام : انا بظهر يا ست الحسن والدلال .. بظهر .. بس والله بتندمـون ..
ظهر فارس من البيـت وسط صياح منوة وأمها ..
.
.
بدت منـال ( ام منوة ) تصلح كل اللي كان مفروض انه يتصلح ..
ودت بكل الأدلـة الكافية لقسم الشرطة .. مع حرصها على الخصوصية وكتمان السر ..
وهم ما قصروا ودلوها على الأماكن اللي ممكن تساندها فـ هالأزمة ..
وأكيد تم القبض على فارس .. والحكم كان السجن 15 سنة مع الأشغال الشاقة ..
أما منوة .. فتمت اجراءات رد الجواز والجنسية الإماراتية الها بعد شهور من هالسالفة ..
بحيث استوت منوة رسمياً .. مواطنة بجواز إماراتي ..
تم تبديل كل شهاداتها الدراسية من إسم صوفي لإسم منوة ..
.
.
وعـادت كل اشراقات الورد لـ مكانها ..
وعادت منوة لطبيعتها اللي نحن نجهلها ..
قررت منوة تدرس فـ معهد يقويها في الانجليزي لين بداية الكورس الدراسي .. عسب تدخل الجامعة بعد غياب سنتين ..
" حقاً تهللت أسايري بعد أن حُلّت طلاسم العقد البحتة .. إلا أن لغزاً واحداً لم أستطع حله حتى هذه اللحظة ! "
لغز منوة كـان خـالد نفسـه ..
بعد ما استشعرت الحب ... تنـاساها .. او حاول يتركها بصمت ..
وجود خالد هل لا زال له أي معنى ؟
/
\
/
\
يتبع //

17 - 10 - 2024, 08:20 PM

الجزء الخامس عشر // الفصل الثاني

بخبث شديد : اميـه
ام منوة : هلا اميه شو تبين فديتج ؟؟
منوة : ممم .. اميه خلاص مب كل الأمور انحلت ؟
ام منوة : هيه فديتج خلاص .. شحقه هالسؤال ؟
منوة بتردد : أخاف اقولج شي وتغيظين عقب ..
ام منوة بشك : لا تحاتين ما بغيظ .. شو السالفة ..
منوة : اميه مب انتي وعدتيني نسير ونزور بيت خالد عقب ما تنحل الأمور ؟
ام منوة : وانتي يا منوة اشحقه تحبين المشاكل ..؟؟ خلاص نحن ما صدقنا محد درى عن اللي استوى بج ..
منوة : دخيلج يا اميه خلينا نسييير ..
ام منوة بحزم : منوة لا تحاولين ..
منوة : ليش انزين ؟
ام منوة : وشو يضمنج انه ما خبر هلـه عن سالفتج ؟
منوة : جان خبرهم يوم كنت اشتغل عندهم ..
ام منوة بغيظ : وليش تحبين تتذكرين اللي استوى بج ؟
منوة : يا اميه لانه ماضــي .. اوه تعالي اميه .. انزين وتليفونه ؟
ام منوة : اوووه تعالي نسيناه !! .. الله يهديج بس شحقه ما ذكرتيني نطرش الدريول يوديه له ؟
منوة بإصرار : اميه نحن اللي لازم نسير .. نسيتي ان نحن بنرد له فلوسه اللي صرفها علي ؟
ام منوة : والله صعبة نروح الهم .. بـ صفتنا شوه نروح ؟
منوة : بعطيج رقمها واتصليبها .. ولا جنه شي استوى ..
ام منوة : وشو اقولها ؟
منوة بحيرة : مادري ..
ام منوة : والله فشيلة !
تموا محتارين لفترة ..
ام منوة : لقيــتها !
منوة : ها بشري ..
ام منوة : بنتصل فـ ام عيسى ..
منوة باستغراب : منو هاي ؟؟
ام منوة : هاي اللي من استخبرت اني تطلقت يت و ركضت تعرفت علي ..
منوة : هيييه .. الرماسـة .. ؟ بلاها ..
ام منوة : بتصلبها وبخبرها اني ابا اتعرف على ام خالد .. وهي عاد بشطارتها بتدبر هالزيارة .. زين جيه ؟؟
منوة بفرحة : ازين من الزين يا اميييه .. فديتج والله ..
.
.
ومع مرور الوقـت ..
مشى اللي فـ بال ام منوة .. وام خالد على الرغم من انها ما تظهر من بيتها الا انها اجتماعية وتحب ترحب بالناس .. فـ خبرتهم ايون متى ما بغوا ..
وقرروا يسيرون لهـا بعد كمن يوم ..
.
.
اليوم الموعود ..
دخلت ام منوة على بنتها ..
منال : خيبة خيييبة .. اشحقه كاشخة هالكثر ؟
منوة ببراءة : كلهن بنات خليني اكشخ امبينهن ..
منال زخت الكلينكس ويلست تمسح الجلوس و الجحال : ماشي .. ما عندنا بنات يتكشخن .. عقب يقولن عنج هب زينة ؟؟ لا بويه ..
منوة بوزت : حرام اميييييييه ..
منال بحزم : تبينا نهون عن السيرة يعني ؟
منوة : لالالالا بويه .. خلاص ..
وتمت الأمور ع طبيعتهـا ..
وساروا مع الدريول لـ بيت بو خالد ..
.
.
ام خالد : حيا الله ام منوة .. ( تطالع منوة بإعجاب ) ماشا الله عليها هاي بنتج ؟ ..
ام منوة : هيه هاي وحيدتي منوة ..
ام خالد : وانا اقول ام عيسى هب من طبايعها تمدح لي حد .. اكيد منوة قمر .. وما خاب ظني ..
ابتسمت لها منوة بحب : تسلمين خالو ..
ام عيسى : عاد ام منوة كانت مستحية تجوفج .. بس عاد البركة كلها فيه ..
ام منوة بكوميدية : لا هب مستحية بس اتغلى ههههههههه ..
ام خالد : ههههههههه عزيزة وغالية يا الغالية ..
دشت أسمـا الصالة وعينها على منوة : السلام عليكم
ردوا عليها السلام .. واشتغلت توايههم ..
وبجيـه تعرفت أسمـا على منوة ..
.
.
مع مرور الأيـام تأقلمت ام خالد ويا ام منوة .. وكانت امبينهم اتصالات وعلاقة صداقة تقوت مع الوقت ..
أما منوة فما كان صعب عليها التأقلم مع اسما لانها تعرف كل طبايعها وصفاتها ... وحتى تعرفت على عذبة بعد فترة .. و كانت علاقتها مع عذبة اقوى شوي من اسما ..
.
.
فـي مرة من المرات .. وهم يرمسون ع التلفون ..
أسما : منوة دخيييلج تعالي براويج خطيبة اخويه خالد ..
منوة وجنه حد صاب ماي بارد عليها : هـــا !!! لالا ما فيه .. اميه ما بتطيع ..
اسما : عن الدلع .. انا برمس خالو .. وان شا الله بتطيع ..
منوة بضيج : بحاول ان شا الله .. تعالي منو خطيبة اخوج ؟
اسما : بنت خالتي .. اسمها روضـة ..
منوة بغصه : اها يعني في ملجة جريبة ؟
اسما : هههههههه اخويه كل يوم يأجل .. اونه مب مستعد ..
سكتت منوة .. وطفرت دمعة من عينها بالغصب : ايواا ..
اسما : تدرين عذبة اختي مهددتني ان ما قدرت اقنعج اتين يا ويلي..
منوة تنهدت : خلاص برمس اميه وبحاول اييكم ..
اسما : هيه فديتج .. يلا سيري الحين واستأذني منها ..
منوة : اسومة ..
اسما : آمري ..
منوة : بتكون عزيمة عودة .. ولا جيه بس انتوا متيمعين .
اسما : ممم نص نص .. بس اكشخي عسب أغايظ بنات خالو اني اعرفج ..
منوة : ههههههه انزين ..
.
.
نزلت اسما للصـالة ..
وهناك عذبة وخالد كانوا يالسين ..
عذبة : ها بشري بتيي ؟
اسما : يا رب اتيي .. بالغصب اقنعتها.. والحين بترمس امها ..
خالد باستغراب : منو ؟
عذبة : وحدة تهبل وتطيح الطيير من السما ..
اسما : اميه تباها حق أحمد ؟؟
عذبة تنرفزت : وشحقه مب لـ خالد ؟
اسما : الصراحة انا قلتلها تعالي جوفي خطيبة خالد ..
عذبة بغيظ : اتخسي رويضو تاخذ خالد ..
خالد : هههههههه ها الواقع عذبو .. انزين منو هاي ؟
عذبة : بنت يارتنا .. يا هي حلوة وخلووقة .. والله يا حظ اللي بياخذها ..
خالد : اوب اوب .. اونها عاد ..
عذبة : صدقني يوم بتجوفها بتطيح واقف ..
خالد : ههههههههه يالله ..
اسما : قلتلها تكشخ شرات ما خبرتيني..
خالد بملل : والله فاضيات ..اقوم واسير اجابل أشغالي أحسن ..
عذبة : وين وين .. والله ما تشبر برع البيت اليوم فاهم ؟؟
خالد : اتخبرج انتي ما عندج ريل ولا شو سالفتج ؟ 24 ساعة يالسة فـ بيتنا !
عذبة : مالت عليك .. حميد دوم الا في الشركة ..وما يخلص الا المسا .. وبعدين تعال منو قال 24 ساعة .. ها يزايه ياية أملي عليكم البيت ؟!!
خالد : بس بس ولا تزعلين .. خلاص حياج الله .. انزين شحقه اتم في البيت ؟
عذبة : اباك بسالفة ( وبخبث ) لو تنطبق السما ع الأرض ما تاخذ رويض ..
.
.
وقـت العزيمة ..
البنات كانن كاشخات وشالات البيت شل بسوالفهن ..
منوة بعد محاولات كبيرة مع امها طاعت تخليها تسير وسارت وياها ..
من اول ما وصلت منوة على طووول سحبوها لـ فوق عند البنات ..
و امها تمت ويا الحريم ..
.
.
روضة : واشحقه ما كنتي تزورينهم قبل هالفترة ؟
منوة بإحراج : لان ريل امي كان مانعنا من الظهرة .. ومن اميه تطلقت منه بدينا نظهر للناس ..
روضـة بغيرة : انزين وشحقه مطولة شعرج ها ؟
عذبة : عوذ بالله انتي شو يخصج ؟
روضة : انزين عادي أنا أسأل بلاج انتي ؟
عذبة : يالله .. اسإلي شرات الأوادم .. شو ها !
منوة بكبرياء : عادي خليها ع راحتها ..
عذبة : فديتج الا انتي طيبة وع نياتج ..
روضة بغيظ : شو قصدج ؟
عذبة : اللبيب بالإشارة يفهم .
اسما : خلاص عاد بلاكم ..
رن تلفـون عذبة ..
جافت الاسم جان تبتسم بخبث : اقول منوة حبيبتي تعالي اباج بسالفة ..
روضة : وهالسالفة ما تنقال جدامنا ؟
عذبة : انتي ما يخصج يالرزة ..
وظهرن من الحجرة ..
يلست عذبة تمشيها الين الصالة اللي مجابلة قسم خالد ..
ومنوة قلبها يدق ..
ما تدري عذبة انها على علم بكل شبر فـ ارجاء هالبيت !
عذبة : منوة حبيبتي برد ع ريلي وبييج .. لا تتحركين ..
منوة بخوف : شو السالفة ؟
عذبة : ههههههه ماشي ماشي .. الحين بتعرفين ..
ومشت عذبة عنها وردت دشت حجرة اسما ..
تمت يالسة لدقايق جيه محتارة تتريى عذبة ..
الين ما انصدمت بصوت القفل ينفتح من حجرة خالد ..
خالد ظهر بكشخته اللي تخبـل ..
وانصدم بهالملاك الموجود ..
ما عرفها انها هي نفسها منوة لان فعلاً منوة تغيرت 180 درجة عن قبل ..
منوة شهقت : خالد ؟؟؟
خالد استغرب في البداية .. لكن من تأمل ملامحها عرفها ..
منــــــوة ..
.
.
فز الخفوق
فزّ الخفوق وقلت يالله عسى خير
أ ثر الليالي عاد غايب قمرها

مع شوفته نشوه و فزّه و تخدير
و عيون خلاّن(ن) تعانق نظرها

يفزّ له قلبي كما فزّة الطير
و الرجل كن اللي تحتها غدرها

ا صبح عمري يا صباح التباشير
نوره ملا قلبي و روحي غمرها

عقب الفراق اللي تعدّى المحاذير
يبّس غصون القلب جافي دهرها

ربّع بـروحي عقب ماهي معاسير
سحابة(ن) هلّت بقلبي مطرها

و اسقَى بها زرعة هوانا بتقدير
غرسة غرام(ن) بالمحبه بذرها

يا عاذلين العين والله مخاسير
و اللي درَى عن حال عيني عذرها

تشوم عيني عن جميع الغنادير
و إن ناظرت عيني فوادي نهرها

يا ناس احبه و المحبه مقادير
هذا هوَى نفسي و هذا قدرها

و الحب ماله يا اهل الحب تفسير
قلبين و الله بالمحبه امرها

لا جيت اصوّر حالة الحب تصوير
و أرد عن حالي لخلّي خبرها

لقيت وجدي فوق كل التعابير
كل الشعر قطره و شوقي بحرها
.
.
خالد بلهفة : منوووة شحالج وشخبارج ... شو مسوية ان شا الله تمام ؟
منوة ما رامت ترد عليه لانها كانت مرتبكة من الخاطر !
خالد : والله يا حظي فيييييج .. معقولة !! .. عذبة تباج لي ؟؟ يا سلام ..
منوة وهي شوي بتصيح : دخيلك اسكت .. ( تذكرت ) هاك خالد ( ظهرت ظرف من شنطتها فيه موبايله و مبلغ محترم ) .. بليز لا تردني ..
خالد باستغراب : شو هااا ؟؟
منوة مشت عنه بخوف : شكلي اليوم بنجتل بسبة عذبوووه .. انا براويها ..
ضحك خالد ع ردة فعلهـا ..
ويلس يجيك شو في الظرف ..
تضايج شوي ان منوة ردت له الفلوس ..
وف نفس الوقت كبرت بـ عينه يوم جافها غالقة الموبايل من تاريخ آخر لقاء امبينهم ..
و حصل فوق 30 مسج كلهم من روضة ( هدوني عليها خلني اقطعها ! )
والله انج كبرتي فـ عيني يا منوة ..
خلاص ما راح اتخلى عنج ..
انتي .. وبس ..
مشى عسب يدخل الظرف فـ حجرته ..
ويوم دخله دشت عذبة ..
عذبة بفضول : ها شو رايك فيها ؟
خالد تنهد بحب : ابـاها عذبو .. ومابا غيرها ..
.
.
بعد ما عدت العزيمـة ع خيـر ..
في الصالة..
عذبة وامها يالسات في الصالة ..
ام خالد : والله خاطري فيها ..
عذبة : فديتها والله تستاهل خالد ..
ام خالد : بس انا اباها لأحمد ..
عذبة : ويه ويه ويه .. شو قلتي اميه .. ليكون تبين رويض لخالد ؟
ام خالد : هيه .. ومنوة تاخذ احمد ..
أسما كانت يالسة تتصوخ الرمسة من عند امها وعذبة ..
وعلى طووول طيران واتصلت بمنوة تبشرها بالخبر التعيس ! ..
أسما : يالله اميه تباج لاخوووويه ..
منوة بحيا : ايواا ..
اسما : والله وناسة لو يستوي عرس خالد واحمد ف يوم واحد ..
منوة بحب : ان شا الله ..
اسما : وااااو .. روضة وخالد فـ قسم .. وانتي واحمد في القسم الثاني من الكوشة .. يـــس !
منوة بصدمة : اشوووه ؟ احمد !!
/
\
/
\
نهاية الجزء الخامس عشر ...

17 - 10 - 2024, 08:21 PM

الجزء السادس عشر // الفصل الأول

اسما : وااااو .. روضة وخالد فـ قسم .. وانتي واحمد في القسم الثاني من الكوشة .. يـــس !
منوة بصدمة : اشوووه ؟ احمد !!
أسما باستغراب : شبلاج منوة ؟ احمد فيه شي ؟
منوة تضايجت من الخـــاطر : اسما هب جنه المفروض ما نرمس عن سوالف شرات هاي ؟
اسما : والله سوري منوة بس من وناستي قلت بخبرج ..
منوة بحزن : لا عادي فديتج ..
اسما انحرجت منها : منوة غناتي برايج انا بخليج الحينه .. بتصلبج باجر اوكيه ؟
منوة : اوكيـه مب مشكلة .. مع السلامة ..
.
.
سكرت عن أسما ولا إرادياً نزلت دموعها بقهـر ..
عيل ليش عذبة بغتني لـ خالد ؟
أنا مب فاهمة شي يا ناااس !
.
.
ما استوت دقايق الا وعذبة متصلتبها ..
تنهدت منوة بضيـج ومسحت دموعها ..
منوة بحزن : الـو ..
عذبة : هلا والله بالغالية .. شو وعيتج من الرقاد ؟
منوة : لا فديتج .. توني كنت ياية برقد بس ..
عذبة : انزيييين يا مرت اخويه ..
منوة تضايجت : مرت اخو مرة وحدة ؟
عذبة : هيه حبيبتي .. انتي مب شويه ..
منوة بدون نفس : مشكورة وما قصرتي .. بس بعد مرت اخوج شويه قويه ..
عذبة : لا والله ؟ تدرين ان خالد تخبـــل علييييييج ؟؟ لا بعد تم يقول اباها عذبو .. ههههههههه يا بوج يننتي الريال .. بس تصدقين غريبة انه ما سأل عن اسمج !! .
منوة ارتبكت وحبت تغير الموضوع : مـاشا الله انتي تبيني لخالد واسما تباني لـ احمد ..!!
عذبة تنرفزت : لا تقوليلي انها اتصلتبج وخبرتج عن سالفة اميه ؟
منوة بضيج : هيـه من شويه كانت ترمسني ..
عذبة بغيظ : هاي اسوم يبالها كف .. اصلاً نحن ما نتشرف ناخذ رويض السووووسة ! ..
منوة بفضول : أتخبرج عذبوو .. انتي شحقه مب طايجتنها ؟
عذبة صخت شويه عقب رمست بغيظ : لانها السوسة وراس الفتنه فهالعايلة ! ..
منوة باستغراب : ما فهمت ..
عذبة بقهر : روضة سوووسة وما ترتاح الا يوم تدمر الواحد .. اسإليني عنها والله اني فاهمتنها ..
منوة بصدمة : معقوولة ؟!
عذبة : والله صـدق .. روضة اذا خذت خالد بتحطمه .. وانا ما ارضـى لاخويه انه يتحطم واسكت لها ..
منوة : بس يا عذبة انا من شفتها ما حسيت انها جيه ..
عذبة : لانها حية وسوسة من تحت لين تحت .. مدام هيه ما فيه خير لأخوها تهقين يكون فيها خير لـ خالد ؟
منوة : والله ما فهمت ..
عذبة بصوت كله ألم : روضة كانت السبب في انه اخوها سيف يودرني .. انا كنت محيرة له من صغرنا وكل الناس تعرف بهالشي .. ومرة من المرات انا تضاربت ويا رويض .. اتخيلي عسب تنتقم مني سارت قالت عني اني هب زينة واني ألعب على سيف ومن هالخرابيط .. ومن هاييج الحزة سيف كرهني ولا عاد ايي بيتنا الا نااادر .. واتخيلي القهر انها يتني تقول انها هي بنفسها كرهت سيف فيـه لاني ما أستاهله!
منوة بصدمة : معقـولة ؟!
عذبة بحزن : انتي ما تدرين كيف كانت حالتي صعبة عقب ما قالتلي .. بس الله فوق وانقذني ويا حميد وخطبني .. والحمدلله ظهر حميد ريال والنعم فيه .. ولا حتى سيف يوصل له بأخلاقه و طبايعه ..
منوة : انزين ما تتوقعين ان ممكن الله هداها الحين ؟
عذبة بغيظ : يمكن .. بس بعد ما بغيها لأخويـه ! ..
منوة : انزين وامج ؟ تراها تباها ..
عذبة تنهدت : اميه روحها سالفة .. تبا ترضي خواتها عسب يلتمون حولها على حساب مشاعر عيالها ..
منوة : والله حرام ! ..
عذبة : ما عليج انتي من هالسالفة .. ويلا خلج مستعدة .. بني نخطب فـ أي وقت .. المعرس مستعيل ويا ويهه ^^ ..
منوة بضيج : دخيلج عذبة .. هالسوالف انا ما حب ارمس عنها ..
عذبة : عاشت عااشت اللي تستحي .. ههههههههه عروس عروس ..
منوة بحزن : يلا عاد عذبووو ! ..
عذبة : انزيييين خلاص هههههههه .. يلا سيري ريحي الحييين وارقدي .. نوم العوافي يا رب ..
منوة : اللـه يعافيج ..
.
.
اليـوم الثـاني ..
و الكل يالس ع الغـدا فـ بيت بو خالد ..
عذبة وهي متعمدة ترمس جدام أبوهـا : ابويه حصلنا عروس حق خالد ..
ام خالد وقفت الأكل وتمت تطال عذبة بغيظ ..
بوخالد : ماشـا االله .. بنت منو ؟
عذبة : بنت المهندس محمد الله يرحمه .. اللي ساكنين فـ فريجنا ..
خالد : ماشـا الله ونعم الأخلاق .. والله انك عرفت تنقي يا خالد .. بالمبارك عليك ..
خالد شق الحلج : الله يبارج فـ حياتك يالغالي ..
ام خالد بغيظ : واشحقه مستانس ها ؟ هب جنه يا مدام عذبة انا قلت بنت محمد لاحمد ؟
احمد : بسـم الله ! .. شبلاج اميه خالد يباها .. حلال عليه ..
خالد يطالع احمد بفخر : تعجبني الصـراحة ..
ام خالد غيظت زيادة : خالد ما بياخذ الا رووووضة .. فاهمين ؟؟
خالد بعصبية : لو تنطبق السما ع الأرض مب ماخذنها .. يا تزوجيني بنت محمد .. يا اني ما اعرس ..
ام خالد : لا والله ؟ وروضـة ؟
عذبة باندفاع : الله يرزقها الريل الصالح .. بس هب خـالد ..
أحمد نش من على الكرسي وطالعهم بغيظ : اميه انا ابا روضـة .. والحين تسيرين تخطبينها لي .. وان ما خطبتيها انسي ان عندج ولد اسمه أحمـد ..
ودز الكرسي بالقـو من غيظه .. وظهر من عندهم لـ حجرته ..
عذبة بدهشـة : ها بلاه ؟؟ ما صدقنا نفج لزقة رويض من خالد .. الحين هو يباها ؟؟!! ..

/
\
/
\
يتبع //

17 - 10 - 2024, 08:21 PM

الجزء السادس عشر // الفصل الثاني

عذبة بدهشـة : ها بلاه ؟؟ ما صدقنا نفج لزقة رويض من خالد .. الحين هو يباها ؟؟!! ..
خالد : أي لزقة وأي خرابيط يا عذبة ؟ احمد هب طبيعي .. شو صابه ؟؟
ام خالد برعب : بو خالد الحق علينا بلاك ساكت جيه .. انطق .. تكلــــم !! ..
بوخالد قام من مكانه : في يوم تدخلت بينكم يوم ضاربت سيف على سالفة عذبة .. واستوت قطيعة عودة مدتهـا شهور .. وهددتيني ما اتدخل مرة ثانية .. تذكرين يا ام خالد ؟
ام خالد ارتبكت : بس هالسالفة تخص ولدك الحين ..
بو خالد : تراه يبا ياخذ بنت اختج .. زوجيه وفكينا من الصدعة ..
ام خالد بإصرار : أنا أباها لخالد !
بو خالد : والله كيفج .. تبينه يظيع من ايديج انتي حرة .. بعدين لا تقولين يا ليتني زوجته ! ..
مشى بو خـالد عنهم و سار فـوق ..
بينمـا اسما وعذبـة .. وخالد وامه .. تموا حيرانين ..
اسما : والحين شو بتسوون ؟
عذبة بغيظ : انتي تعالي شحقه رمستي منوة وقلتيلها ان اميه تباها لاحمد ؟
خالد تينن : احمـــــد ؟؟ ياخي شو سالفتكم انتووووا ؟؟
عذبة : لا تحاتي .. قول زين ان البنية قالت انها ما تحب ترمس فهالسوالف ولا جان رحنا فيها ..
اسما : وانا شدراني.. سمعتكم ترمسون وخبرتها ..
خالد بقهر : Cnn حشـى مب اسما ..
ام خالد : وليدي يهددني وبيروووح عني .. وانتوا مشغولين بام المشاكل منووووووووووه ؟؟؟
عذبة بقهر : اميييه .. منوة ما يخصها .. يالله عادة رويض النحسة موول ما سوت مشاكل .. ترى بسبتها أحمد غيظ علينا ..
ام خالد : لو هاييج منوة ما كانت موجودة جان على طول زوجنا خالد روضـة ..
عذبة : هيه ترى احمد كان بيخليكم .. اميه جيه احسن .. ع الأقل احمد هب حاقد على خالد ..
خالد بضيج : بسير أرمسـه ..
عذبة : الله يهديه ان شا الله ..
.
.
وسار خالد حجرة احمد ..
خالد دق الباب : ممكن أدش ؟
احمد كان متساند بإيديه بحيـرة ..
خالد يحاول يلطف الجو : ها ما جوفك يالس ع اللابتوب ؟؟!
احمد : اووه يا خالد .. اظني انته عارف اشحقه انا متضايج ..
خالد : اوكي ما اختلفنا .. بس ماله داعي انك تتضايج من الأساس .. ياخي خذها منو يودك ؟
احمد : ترى اميـه تباها لـك ..
خالد : كااااانت تباها لي لاني العود .. والحين يوم درت انك تباها رضت .. واستوى كل شي عادي ..
احمد تهلل ويهه : احلف ؟
خالد : لا اتمصخر عليك انا ويا هالويه ..!
أحمد : هههههههه ..
خالد بامتنان : مشكور يا احمد ..
احمد باستغراب : عـ شو ؟
خالد : على انك خطبت روضـة ..
احمد : انته ليش ما تباها ؟
خالد : لان قلبي تعلق بـ منوة .. ولا غيرها قدر يحتله ..
احمد بشك : جيه من متى انته تعرفها ؟
خالد ارتبك : ها .. جفتها مرة وحدة .. بس حسيت ان هالانسانة اللي تناسبني ..
احمد : اونك عاااااد .. خويلد .. تهقى اميه تسامحني ع الحركة البايخة اللي سويتها ؟
خالد : اكيد ما يبالها رمسة .. سير لها واستسمح منهـا ..
احمد : يالله انزين نش ويايه .. تراني ما عرف شو اقول فهالمناسبات خخ ..
خالد : ههههههههه مناسبة ها ؟؟
.
.
ونزلـوا لأمهم اللي تمت ويا عذبة بس ..
احمد يحب راسه امه : اميه اسمحيلي ع اللي سويته من شوي ..
ام خالد تطالعه بحزن : حرام عليك يا احمد .. جيه تسوي بأمك اللي تحبك وتحاتيك ؟؟ جان قلتلي من زمان كنت خطبتها لك ..
خالد وعذبة طالعوا بعض بغبـاء ..
احمد افتشل وصد على خالد وعذبة وطالعهم بعبط ..
خالد : هيه هيه .. كله احمد يدلعونه ..
عذبة : بسك خلّود اكثر واحد مدلع انته ..
خالد يسوي لها مالت : من زين ويهج يا الكريهة .. تعالي وينه حميد ؟
عذبة غيظت : هيه هب فاضي لنا .. تو الناس .. صباح الخير .. تراه الصبح يا وسلم على اميه وابويه ويابني هني لانه بيسافر ..
احمد : ويـن ؟؟
عذبة : افغانستـان ..
خالد بخبث : يا حيك يا حمييد .. اسميك بتطيح على الحسن كله .. العيون العسلية اللي جنها عيون المهـا .. ولا الحواجب .. رهييييبة ..
احمد ع نفس الموجة : ولا شعر الشنب الله يخليك ..
خالد : هههههههه ..
عذبة بقهر : عسب جييييه من طلبوه للدورة هناك طاع على طول .. ما عليه انا براويه ..
ام خالد : حشى هب صاحية انتي .. جوفي ويوههم وهم يستهبلون عليج ..
عذبة تطالعهم بإجرام : ويا هالويوه الغبرة خليتوني اشك فـ ريلي !! ..
خالد : ههههههههههههههههههههههه .. ( تذكر ) اوه تعالوا .. متى بتخطبون لي ولأحمد ؟
احمد : من الحين اقولكم ترى عرسي قبله ..
خالد : ايه ايه انا العود ..
احمد : ما يخصني .. مشكلتك ..
ام خالد بضيج : خلاص باجر ان شا الله ارمس اختي ام سيف واشاورها .. اقول خالد ما تبا شمـا ؟
عذبة بغيظ : اميييييه وبعدييين ..؟؟
رشود ظهر لهم : ايه انا ابا شما وان ما خطبتوها لي بنتحر ..
خالد بغباء : ايييه وين تبا ؟
راشد بعبط : اعيد فلم احمد يوم ع الغدا ههههههه ..
احمد بانتقام : انا براااويك يالهرم ..
عذبة : ههههه .. اميه باجر سيري واخطبي لاحمد ..
احمد باستغراب : جيه انتي ما بتسيرين وياها ؟
عذبة بخبث :افا عليك انا اول وحدة هناك .. ( فـ خاطرها ) عسب أغـايظ رويض هههههههه ..
.
.
وباليوم اللي عقبه .. اتصلت ام خالد وجست نبض ام سيف انهم يايين يخطبون ..
عاد منو يقول وناسة روضـة ذاك اليـوم !! ..
عنـد الرياييل كل شي روتيني وحسب الأصـول ..
أمـا عند الحريـم ..
عذبة بخبث : ان شا الله أحمـد يملج من صوب .. وخالد نخطب له من الصوب الثاني ..
روضة بغصة : وخالد بياخذ منو ؟
اسما بعفوية : بياخذ منوة .. هو اللي بغاها .. واحمد بغاج انتي ..
فجت روضـة عيونها ع الآخـر ..
صدمــة ما بعدها صـــدمة !! ..
ام خالد : زين يا ام سيف شو الشور الحينه .. متى تبون الملجة ؟
ام سيف روحها كانت متفاجأة : مادري والله .. الشور شو روضة ..
ام خالد : وانتي شو رايج يا روضة ؟؟
روضة بغيظ : مابا أملـج عليـه ..
عذبة وأم خالد بصدمة : اشوووه ؟؟ ما تبينه ؟؟؟

/
\
/
\
نهاية الجزء السادس عشر ...

17 - 10 - 2024, 08:22 PM

الجزء السابع عشر // الفصل الأول

ام خالد : وانتي شو رايج يا روضة ؟؟
روضة بغيظ : مابا أملـج عليـه ..
عذبة وأم خالد بصدمة : اشوووه ؟؟ ما تبينه ؟؟؟
ام سيف تتدارك الموقف : لا لا ويه ويه .. قصدها ما تبا ملجة .. يعني الملجة والعرس فـ يوم واحد ..
روضة طالعت أمها بغيظ .. ونشت وسارت حجرتها ..
وشوي وامها سارت وراهـا ..
ام خالد : اشبلاها روضة ؟ بلاها هب ع بعضها ؟
عذبة ابتسمت : شكلها ما تبا احمد ..
ام خالد : وييييه ما تبا ولدي ؟ امنو قاال ؟
اسما : عذبو هي ما قالت شي ..
عذبة : صح ما قالت شي بس جوفن ويهها شقايل غدى يوم عرفت ان احمد هو اللي خطبها هب خالد .. ولا يوم نشت عنا جيه .. شو هالأدب ؟؟
ام خالد بحسرة : يا ويلي عليها .. خاطرها فـ خالد ..
عذبة تنرفزت : نشي وخبريهم انج تبين خالد ياخذها .. ( بمكر ) ولا تدرين سيري لهم صدق .. وجوفي احمد شو بيسوي ..
ام خالد برعب : سكتي انتي .. مب قايلة شي انا بلاج كلتيني ؟؟
.
.
فـ حجرة روضة ..
روضة بقهر : الحين انا ابا خالد .. احمدوه شو اللي رزه في السالفة ؟
ام سيف : اووه يا رويض .. اللي ما يباج لا تصيحين تبينه ..
روضة : الا بصيييح وبنقهر .. انتي ما جفتي ويه عذبو يوم انها ياية تتشمت فيه ؟ فقتها الخايسة يعل ريلها يرد من سفرته وشال وياه درزن حريم معرس عليهن عسب يحترق قلبها شرات ما حرقت لي قلبي اليووم ..
ام سيف بحزم : رويض صخي .. والله لو تسمعج بزوالج ..
شوي الا والباب يندق عليهم ..
ظهرت عذبة راسها من الباب : خالو ممكن ارمس روضة رواحنا ؟
تنرفزت روضة زيادة ..
ام سيف : خلاص خذوا راحتكم ..(تصاصر عذبة ) لا تلومينها ان قالت شي غلط لانها شالة فـ خاطرها ان احمد اللي خطبها هب خالد ..
عذبة بخبث : ولا يهمج خالو ..
ومشت ام سيف لبرع الحجرة .. وسكرت عذبة الباب : هـا بلاج ؟؟
روضة بقهر : لا تقوليلي انج انتي راعية هالفكرة السخييييفة ؟؟
عذبة : حشى عليه جيه جايفتني حقودة شراتج أخرب حياة اخويه ؟؟
روضة : يا سلاااام وانا الحين استويت خراب ها ؟
عذبة تطالعها باحتقار : سمي اللي بتسمينه .. يكون بعلمج ان احمد هو اللي بغاج .. ولا انا كنت معارضة زواجج .. بس شو اسوي عنيد ومخه يابس .. قلت لازم ارضى ..
روضة بحقد : واشحقه احمد يعرس قبل خالد ؟
عذبة وهي تبا تحرقها : قلنا حرام نزوجه وتتمين انتي مودرة والناس ترمس عليج .. احسن ياخذج احمد من صوب .. وخالد ياخذ منوة فديت روحها من الصوب الثاني ..
روضة بقهر : الله ياخذ هالمنوة اللي مادري طلعت لي من وين !! ..
عذبة : اوه ما تدرين ان خالد يبااها وميييت عليها ؟؟ كان يبانا نسير نخطب له اليوم .. بس قلنا ما يستوي .. نخطبج انتي .. وعقب نخطب له ..
روضة بقهر : جذابة انتي .. اصلاً خالد يباني بس أحمد أصـر علي ..
عذبة : هه .. وحليلج ما تدرين انه كان يبا الفكة منج .. والحين احمد المسكين ابتلش فيـج .. بعدين تعالي ترى المسجات المايعة اللي كنتي تطرشينها خالد ما جافها .. لان الموبايل كان عندي .. وخالد ما قرى الا مسج واحد .. .
روضة انقهرت : انزين خلاص .. سيري وقولي حق امج اني مابا ولا واحد من عيالج ..
عذبة : وييييه محلاها من ساعة .. بسير اخبرهم ..
ونشت عذبة عسب تسير الصالة .. بس روضة زختها وسبقتها عسب تخبرهم انها موافقة على احمد .. وهي مدعية السعادة كلها عسب تقهر عذبة ! ..
من جهتها عذبة كانت مسوتلها اكبر طاف .. لانها عارفة ان مستحيل احمد يتحملها .. كم يوم وبيكرهها .. هاي ما تنطاق ..
بس على الرغم من كل شي .. فـ روضة تمت تتشرط وطلبت انهم يسوون ملجة عودة ما في شراتها ..
وتحددت عقب شهـر..
.
.
خالد : خلاص اميه الحين أحمد وملجته عقب كم اسبوع .. يلا نشي واخطبيلي منوة ..
ام خالد بضيج : اوووه انته شبلااااك ؟؟ اصبر خلنا نخلص من عرس اخوك .. ومن عقبها الله كريم ؟
خالد : اوووف لين متى بتريى ؟؟
عذبة : ما عليه خويلد .. ان شا الله من تستوي ملجة احمد عقبها نسير نخطب لك منوة .. ايه اسمو بعد مب تخبرينها ؟؟
خالد : هيييه يا ويلج ان درت ..
اسمـا : حشى عوووذ بالله كلتوووني .. مب قايلة شي اوووف ..
.
.
بعـد شهـر // تحديداً ملجة أحمـد وروضـة ..
أم خـالد الفرحة كانت مب سايعتنها وهي تجوف روضة بتاخذ احمد ..
حتى يمكن كره منوة خف شوي عندها ..
روضة كانوا ملبسينها ثوب وكندورة .. وبكبرهـا لابسة ذهب ..
باختصـار كانت تراثيـة بمعنى الكلمة ! ..
كانت وايد محلوة ، خصوصاً بمكياجها النيلي واللي ضام وياه تدرجات الفوشي الجريء ..
حتى ان عذبة ما توقعتها بكل هالجمال ! ..
يابوا لهـا هدية الملجة واللي كانت عبارة عن مندوس عـود نسبياً وفيـه كم قطعة ذهب على كمن كندورة على كمن عطور وهدايا متنوعة .. واللي كان شي فخم وراهي انحط حذال الكوشـة ..
ودخلـوها من عقبها بين النـاس ..
وعاد روضة والثقـة ..
يلست ع الكراسي اللي في الكوشة نفسهـا ..
وما استوت الساعة 10 .. الا وأحمد يهدد ويتوعد اذا ما دخلوه ..!
.
.
عذبة : الووو .. وينج منوووو ؟؟
منوة : عذبوه ظيعنا البيت ! .. نحن الحين صوب شيشة البترول .. وين نروح عقب ..
عذبة : اقولج البيت مرة ورى الشيشة بالضبط .. لونه بيج رقـم 36 ..
منوة : اوكيه خلاص .. بخبر الدريول ويايين ان شـا الله ..
ما استوت ربع ساعـة ..
الا ومنوة داشـة بيـت روضـة ..
ما فصخت عباتها.. بس نزلت شيلتها وحطتها ع جتفها ..
وكانت فاتحة شعرها على طوله .. وحاطة ميك اب خفيف وااايد ..
عذبة بذهول : يا ويلي يا وييييلي ع الحسن كله .. منوو قريتي على عمرج ؟
منوة ابتسمت لها : فديتج والله عيونج الحـلوة ..
ام منوة توايه عذبة : وينها امج عيل ؟
عذبة : هني خالوه .. صبري بنسير كلنا رباعة .. (تغمر لمنوة ) عسب تجوف منوة بعد ..
طبعـاً المعنويات كانت عند منوة 100% .. من عرفت ان روضة اختفت عن طريجها وخذت أحمد ..
.
.
ام خالد وهي منبهرة بمنوة : ماشا الله عليج يا بنتي .. الله يحفظج ..
عذبة زاخة ايد منوة : يلا عيل نخليكم الحين بنسير فوووق ...
بس طبعاً قبل لا يسيرن فوق سارت منوة وسلمت ع روضة اللي ما شلت عيونها عن منوة من دشت ..
وروضـة نفسها انقهرت من وجود منوة ! ..
بس تظاهرت وغياضاً في عذبة ان مافي شي !! ..
.
.
عذبة بخبث : فديت خطيبة اخويه .. والله انه محظووظ فيـج ..
ابتسمت لها منوة بإحراج ..
ومشـوا لـ فوق ..
وروضـة معنوياتهـا ... زفت !! ..
.
.
عند البنات ..
عذبة : أقدم لكم منوة.. خطيبة اخويه خـالد ..
كل البنات طالعوهـا بذهول حتى منوة نفسها انحرجت من هالنظرة ! ..
منوة تصاصر عذبة : ايه عن الحركات !! ..
عذبة : جب جب .. اخويه خالد بيموت عليها وهي تقول حركات .. والله !! ..
ابتسمت منـوة بسعادة غـامرة ..
وردوا نـزلوا تحت ..
وحدة من البنات : عسب جيه هون عن رويض .. ماشا الله حلوة وشعرها عذااااب ..
.
.
مع مرور الوقـت ..
دخل أحمد وهو شاق الحلج انه خلااااص حقق امنيته وتزوج روضـة ..
قصـوا الكيكـة .. ولبسهـا الخـاتم ..
وسط دموع راعيات الأفلام الهندية (ام خالد & ام سيف) خخ ..
.
.
على آخـر الملجة ..
نش أحمد ووياه روضـة ..
وساروا يلسوهم فـ حجرة منفصـلة ..
بينما الرياييل دخلوا الصـالة .. >> يحبون الفوضى ..
ومنهم خـالد ..
منوة كانت على وشك انها تسير قبل ما احمد يدش ..
بس عذبة عاد وحبها حق الأفلام الهندية ..
اتريت لين ما خالد يا .. واتلصقت بمنوة ويلست تطالع خالد بخبث وتأشر على منوة ..
خالد كان فرحـان من كل خاطره فابتسم ابتسامة حلوة لمنوة ..
و أم خـالد لازالت شالة فـ خاطرها ولو القليـل ! ..
.
.
أحداث كثيرة ومواقف أكثـر استوت ..
منها روحة منوة لبيتهم ..
واهل العرس تصوروا وعقب ذلفوا لبيوتهم خخ ..
.
.
باليـوم الثـاني ..
خالد : الحينه مب انتوا قلتوا لي اصبر لين ملجة احمد ؟ هكوه ملج .. يلا سيروا خطبوا لي ..
عذبة : يااااا ربييييه منك انته ..
خالد : انتي اللي حرضتيني انزين ؟ ولا انا ما كنت حاط فـ بالي ..
عذبة : هههههههه ويا هالويه .. بعد لسانيييين !! ..
خالد : اميييه ليش ما تسيرون اليوم وتخطبون ؟
ما ردت ام خالد عليـه ..
عذبة وخالد طالعوا بعض باستغراب
عذبة : اميه شو رايج ؟ شبلاج صاخه ؟؟
ام خالد : لو تنطبق السمـا ع الأرض .. ما طبيت بيت هاللي يسمونها ( باستهزاء ) منـوة ..

/
\
/
\
يتبع //