رواية جبروت الأبتسامة

#1 7 - 12 - 2024, 07:35 AM

رواية جبروت الابتسامة

هذي اول رواية لأختي واعذرونا اذا في بعض الأخطاء..!

الفصل الأول من الرواية

اولا: تعريف بالشخصيات الرئيسية في القصة:

عائلة بو جاسم:
محمد(بو جاسم): شخص عصبي ومايحب يعيد الكلام مرتين!!!
حصة(ام جاسم): تحب بو جاسم وايد وماترفضله اي طلب واللي يقوله لازم يصير!!!...وطباخة ماهرة للغاية!!!
جاسم: البكر والولد الوحيد للعيلة وعلشان جي...هو المدلل في البيت!!!...وهو طالب جامعه تخصص ادارة اعمال!!!
منيرة: البنت الوسطى...طالبة ثانوية عامةوهي ذكية وايد ومتفوقة في دراستها و تطمح انها لما تخلص الثانوية تصير دكتورة أطفال لأنها تحب الأطفال!!!
منى: القعده...طالبة ثاني اعدادي وهي تتميز بروحها المرحة والشقية...قلبها طيب ومحبوبة من كل اللي يعرفونها...وهي اجتماعية وتحب تخالط الناس!!!...لكن عيبها الوحيد هو استهتارها!!!...
عائلة بو حمد:
ناصر(بو حمد): طيب وحبوب وقلبه ابيض مثل الثلج وكل اللي يعرفونه يحبونه بعكس اخوه بو جاسم!!!...
سارة(ام حمد): تتميز بحبها للإختلاط بالناس وضيافتهم!!!...ومع هذا...فإن من اولوياتها بيتها وزوجها وعيالها!!!...وتكون في بعض الاحيان حازمة وعنيدة وتتمسك برايها مهما كان!!!...
حمد: شخص هاااادي و رومانسي حده!!!...هو اليد اليمين لأبوه في الشغل!!!...وما يرفض لأبوه اي طلب!!!
راشد:طموح ومجتهد...يدرس مع ولد عمه جاسم في ادارة الأعمال علشان يساعد ابوه واخوه!!!...وهو بعكس حمد...واقعي و الرومانسية في وادي وهو في وادي!!!<<<سبحان اللي خلق وفرق!!!
خالد: وهو طالب ثانوية عامه...فنان صاحب صوت وذوق رااااااائعين!!!...يطمح انه لما يخلص الثانوية يدش كلية الفنون او يسافر للمعهد الفني بالكويت علشان يصير فنان!!!
رغد: وهي القعده والمدلله في البيت!!!...طالبة اول ثانوي...وهي طالبة مجتهده ومتفوقة وتحلم انها تتخصص بالهندسة!!!...لأن عشقها شي اسمه رياضيات!!!...طيبة وحنونة وما تحب تشوف حد طايح في مشكلة وهي موقادرة تسويله شي!!!...عندها موهبة مو معقولة في الرسم!!!
عائلة بو منصور:
ابراهيم(بو منصور): عصبي وما يطيق يشوف حد من الناس من عقب ماتوفت زوجته وهي قاعده تربي ولده الوحيد اللي هو الثاني توفى عقب شهرين من ولادته!!!...وهو صديق بو حمد وجاره!!!
مريم: البكر...وهي ربة بيت وطباخة شاطرة...تزوجت على حياة امها وربت بنت وسمتها امل على اسم امها!!!...لكن زوجها توفى لما كان مسافر بحادث طيارة!!!...
فاطمة:موظفه في شركة جارهم بو حمد...كفؤ و ماتقصر في شغلها!!!...حقانية واذا شافت الغلط ماتسكت عنه!!!
اسماء:ممرضة في المستشفى...شاطرة في شغلها والكل يحبها في المستشفى...طيبة ولا تحب تغلط على احد او احد يزعل منها!!!...
ايمان: اصغرهم...طالبة في ثاني ثانوي علمي...ومجتهدة...وهي اسم على مسمى...حافظة القرآن كامل و ماتخلي لافرض ولا سنة الا أدتهم لوجه الله!!!...تحلم انها تصير داعية وتهدي الدول غير المسلمة للإسلام!!!...

هؤلاء هم اهم الشخصيات في هذه الرواية...

يتبع

ناطق العبيدي معجب بهذا

الموضوع الأصلي : رواية جبروت الأبتسامة || الكاتب : البارونة || المصدر : شبكة همس الشوق

7 - 12 - 2024, 07:36 AM

ثانيا: الرواية:

في صباح يوم عادي مثل كل يوم...وفي بيت ابو حمد:

ام حمد: يلا...يلا...ياعيال...قومو!!!...تأخرتو على دواماتكم!!!
والمسكينة راح صوتها وهي تنادي فيهم وتقعد فيهم وتتحلطم...وهم بالغصب فتحو عيونهم وقامو اخيرا!!!...
ونفس الشي صار في بيت بو جاسم :
ام جاسم: يلا...ياعيال...ابوكم ناطركم عالفطور!!!...اذا ماقمتو بسرعة بيقلب الدنيا علينا فوق تحت!!!...يلا قومو!!!...
والعيال يسمعون امهم تقول جي الا يطير من عيونهم النوم ويقومون بسرعة!!!...
اما في بيت بو منصور...الكل يكون قاعد عالفطور من وهل لأن كل وحده تكون ضابطة المنبه من الليل ماعدا بو منصور اللي يكون في سابع نومة في الغرفة!!!...
وفي العصر...في بيت ام حمد...:

ام حمد: يابو حمد...شرايك نعزم اخوك بو جاسم واهله و جارنا بو منصور واهله على العشى اليوم؟؟؟...
ابو حمد: على خير ان شاء الله يام حمد...اخوي ممكن يوافق ويجي بس بو منصور هالمسكين ماظنتي يرضى!!!...من يوم توفت زوجته وهو حابس روحه في البيت وكاره الكل وموراضي يشوف الناس!!!...
ام حمد:الله يعينه ويصبره على بلواه!!!...بعد يابو حمد اللي جاه موشوية!!!...فقد زوجته وولده اللي ينتظره من سنين!!!
الله يعينه ان شاء الله!!!...ومريوم وعليا!!!...هي بعد ترملت وهي صغيرة وتحملت مسؤولية بنتها وابوها وخواتها!!!...الله يعينهم ويصبرهم!!!...والله حالهم تقطع القلب!!!...الا يابو حمد...وين حمد؟؟؟...ماأشوفه جاء معاك؟؟؟
ويدخل حمد...ويسلم على امه وابوه ويحبهم على راسهم...
ابو حمد: الطيب عند ذكره!!!...كاهو جاء!!!...سأليه انتي!!!...
ام حمد: وين كنت ياوليدي؟؟؟...
حمد: كان علي كم شغلة يمه!!!...خلصتهم وييت!!!
ام حمد: الله يوفقك ياوليدي ويرضى عنك!!!

وفي بيت بو جاسم...

جاسم يركض يبي يطلع...
ام جاسم: شوي شوي ياوليدي!!!...شفيك مستعيل؟؟؟...توك راد من الجامعه وتبي تطلع؟؟!!...وين رايح؟؟؟
جاسم: يوووووه...يمه خليني...انا مستعيل...ربعي ناطريني الحين علشان نطلع !!!...
ام جاسم: انزين يمه...ماقلنا شي!!!...روح حبيبي...ربي يحفظك ياوليدي!!!
ويطلع جاسم بسرعه!!!...

وفي بيت بو منصور...دق دق دق...

مريم: يبا...انا مريم...افتح الباب يبا!!!...الله يخليك!!!...مسويتلك مجبوس دياي اللي تحبه وايد!!!...
بو منصور: مابي شي!!!...ابي انام!!!...ولا عاد تزعجيني وتطقين الباب لاتشوفين شي عمرج ماشفتيه!!!...زين؟؟؟
زعلت مريم على حال ابوها وهدت الصينية مثل العادة عند الباب وراحت!!!...و بو منصور في الغرفة قاعد يشوف صورة زوجته وصورة ولده قبل لايتوفى...ودموعه تنزل غصب(ن) عنه وفي حلجه غصة موب قادر يبلعها!!!...

ترقبو بقية الأحداث^_*

7 - 12 - 2024, 07:37 AM

عدنا لكم مع بقية احداث الروايه^_^

في نفس اليوم...وفي بيت ابو حمد والكل مجتمعين مثل مابغت ام حمد...عيلة ابو جاسم وعيلة ابو منصور...وبعد الترحيب...
ام حمد: عن اذنكم شوي....دقايق وراده...اخذو راحتكم!!!
وراحت ام حمد معصبه تبي تشوف رغد شفيها مانزلت تسلم عالضيوف؟!!!... تدق الباب...
ام حمد: رغد!!!...رغد!!!...رغدو وويعه فجي الباب!!!...ليش مانزلتي تسلمين عالضيوف؟!!!...البنات ناطرينج تحت!!!...رغد!!!!...
وتفك الباب ام حمد والا تلاقي رغد بسااااااااااابع نومه!!!...
هني ام حمد ماقدرت تتحمل وتمسك اعصابها!!!
ام حمد: نااااااااايمه؟!!!...في نوم هالحزه؟!!!...وويعه قومي عندنا ضيوف!!!!...رغدو قومي لا تفشلينا والا والله...
تقوم رغد متخرعه وبسرعه وتقاطعها!!!...
رغد: لا لا لا يمه!!!...لا تحلفين ولا شي!!!...كاني قمت!!!...الله يهداج يمه خرعتيني!!!...شسوي يعني؟!!!...كنت محتاره شنو البس و فجأه يتني النوده ونمت!!!...شسوي؟!!!
ام حمد: زين يلا بسرعه!!!...تلبسي ونزلي تحت سلمي عالضيوف!!!...ويا ويلج اذا رديتي نمتي!!!...لاتفشلينا؟!!!
رغد: ان شاء الله يمه!!!...ان شاء الله!!!...
ردت ام حمد عالضيوف وقعدت تسولف مع الحريم( تعرفون بعد سوالف الحريم )...وبعدين جت رغد وسلمت وخذت البنات وطلعت فوق علشان يسوونلهم جلسه خاصه بعيد عن الحريم!!!...و كانو الرياييل في المجلس قاعدين يلعبون هند بعد ماخلصو قهوه وسوالف!!!...<<<شوفو الفرق بين قعدة الحريم وقعدة الرياييل!!!...هههههههههههه
عند البنات...
منى: رغدوووووه!!!...يام حمص شيلي هالكتب عن ويهي احسن لج لأني مو طايقتهم!!!....
رغد: منوووووه!!!...شفيها الكتب يعني؟!!...فوق الطاوله موب على قلبج؟!!!...وش ظارينج فيه؟!!!...
منى: الا قاعدين على قلبي وملوعين جبدي!!!...شيليهم عني لا شققهم لج الحين!!!...
منيره: منى!!!...عيب عليج تقولين هالكلام!!!...سكتي بس وويعه!!!...ما عليج منها رغوده!!!...لسانها متبري منها!!!...بنت عمج وتعرفينها!!!
رغد: تعلميني فيها منور؟؟؟...انا اللي اعرفها!!!...خلاص بشيلهم واحطهم في الدرج!!!...زين جذي؟!!!...ارتحتي منوه؟؟؟
منى: توج صرتي اوكيه!!!...
رغد: شفيج امون؟؟؟...ليش ساكته؟؟؟...
ايمان: لا ولا شي حبيبتي!!!...
منى: بنات بنات!!!...شرايكم نشغل هالمسجل و نرقص؟!!!
ايمان: استغفر الله العلي العظيم!!!...يا منى مو زين جذي!!!...بتغضبين ربج وبعدين شنو بيفيدج فيه الرقص؟!!!
منى: يا بنت الحلال نسلي نفسنا شوي!!!...وش فيها يعني؟؟؟
ايمان: ما قلنا شي!!!...سلي نفسج بس بالحلال مو بالحرام!!!...و بعدين هالاغاني مابتكون الا رصاص ينصب في اذنج يوم القيامه وتضرج حتى في الدنيا!!!
منى: خلاص خلاص!!!...مايسوى علينا!!!!...سويتيلنا محاضره بس علشان قلت شرايكم نرقص؟!!!
منيره: منووووووه!!!...شفيج اليوم؟؟؟...امون ما قالت شي غلط!!!...هذا يزاها لأنها تبي مصلحتج وقاعده تحذرج من اللي بيصير؟!!!...يزاج الله خير امون ولا تواخذينها!!!...مدري شفيها اليوم؟؟؟...بالعاده هي مو جذي!!!...
ايمان: ما عليه منور!!!...وانا بس حبيت انبهها لاأكثر ولا اقل!!!...
رغد: تصدقين امون؟!!!...ياحليلج وانتي قاعده تنصحينها!!!...تصلحين داعيه!!!...عليج اسلوب يينن!!!...الله يوفقج وينولج مرادج!!!
ايمان: اللهم آمين حبيبتي...الله يوفق الكل ان شاء الله!!!...
وهني حست ايمان بسعاده مو طبيعيه عالكلام اللي قالته رغد!!!...و حست انها تحمست اكثر علشان تصير داعيه علشان توعي البنات والشباب اللي مثل منى!!!

و عند الحريم...

ام حمد: مريم...شلون الوالد؟؟؟...للحينه على حاله ولا تحسن؟؟؟
مريم: لا والله ياخالتي!!!...على حطة ايدج!!!...موب راضي ينسى ولا هو راضي يتأقلم مع الوضع!!!...انا خايفه عليه!!!
فاطمه: يا خالتي طول اليوم وهو حابس نفسه في هالغرفه وما يطلع كلج!!!...عيزنا معاه واحنا نكلمه وماكو فايده!!!
اسماء: والله صج خايفين عليه!!!...قعدته بالغرفه موب طبيعيه وبتضره وتمرضه!!!...موب زين على صحته!!!
ام حمد: ماعليه يابنات!!!...مسكين ما ينلام!!!...لا تخافون!!!...مرده بيطلع من هالحاله ومرده بيرجع لكم مثل اول واحسن!!!...
ام جاسم: الله يعينه ويصبره على بلواه!!!
ام حمد: يلا ياأم جاسم...يلا يابنيات!!!...حياكم!!!...تقلطو عالعشى!!!
وبعد العشى كل واحد راح على بيته...اللي مستانس من هالجمعه الحلوه واللي متضايق( منى كانت متضايقه شلون طافت جمعة بنات من غير رقص)!!!...

ترقبو بقية الأحداث^_*

7 - 12 - 2024, 07:38 AM

عدنا لكم مع بقية الأحداث^_*

في اليوم الثاني للعشى...كانت فاطمه تبي تروح الدوام...بس لما ركبت السياره تبي تشغلها مااشتغلت!!!...توهقت ماعرفت شتسوي بعمرها؟!!!...الدريول راح يوصل امون على مدرستها واسوم على دوامها!!!...وهي بتتأخر على دوامها ومدير القسم عندهم عسر ومايتقبل اي عذر او اي ظرف!!!...ياربي شتسوي؟!!!...راحت دقت على مكتب التكــسي علشان تطلب واحد وقالولها ان في تكــسي بس بيوصل عقب ساعه لأن راح يوصل زبونه على دوامها!!!...وفطوم قاعده تتحلطم!!!...متوهقه وموب عارفه شتسوي!!!...وهي قاعده تتحلطم!!!...شافت سيارة جارهم بو حمد قدام البيت!!!...فرحت وايد و قالت مافي غيرهم يوصلني!!!...بعدين ترددت!!!...قالت في نفسها: لا...فشله!!!...شلون اطلب منهم يوصلوني؟!!!...انا موظفه عندهم واجي معاهم بنفس السياره؟!!!...ويييييه!!!...فشله!!!...
فجأه تفتح مريوم الباب...
فاطمه: هييييييه!!!!...مريوم حسبي الله على ابليسج خرعتيني!!!!...
مريم: وانا بعد تخرعت منج!!!...شفيج؟!!!...للحين هني؟!!!...على بالي رحتي الدوام!!!...روحي لا تأخرين!!!
فاطمه: مو هذي المشكله!!!...سيارتي خربانه على حظي!!!...مدري شفيها على هالصبح؟!!!...واتصلت بمكتب التكـسي قالولي في واحد بس بيجي عقب ساعه ودريولنا بعد بيتأخر!!!...يعني مسكره بوجهي من كل الجهات!!!...
مريم: زين روحي مع جارنا بو حمد...هو طيب وماراح يقول لأ!!!...بالعكس بيستانس!!!...
فاطمه: شلون اروح معاه؟!!!...انا حيالله موظفه عنده!!!...
مريم: لاتقولين جذي!!!...صدقيني هو طيب وماراح يفكر مثل ماانتي تفكرين!!!...روحي الحين!!!...مو تقولين مدير القسم مالكم عسر؟!!!...روحي الحين وفكري في هالامور بعدين!!!...اكاه!!!...هذا بو حمد وولده حمد طالعين!!!...روحي بسرعه!!!
فاطمه: لا!!!...وييه فشله!!!...ماعليه خل يهزأني المدير بس ماانحرج قدام بو حمد!!!
بو حمد وهو مار بالسياره...شاف مريم وفاطمه واقفين!!!...وقف بسيارته عندهم!!!
بو حمد: السلام عليكم يابنات!!!
مريم وفاطمه مع بعض: وعليكم السلام والرحمه ياعمي!!!
بو حمد: عسى ماشر؟؟؟...شحقه واقفين جي بالشارع؟!!!...وانتي يافاطمه!!!...ليش مارحتي للحين لدوامج؟؟؟
فاطمه ساكته موب عارفه شتقول ومنحرجه!!!
مريم: انا اقولك ياعمي!!!
فاطمه تنقزها وتناظرها علشان تسكت...
مريم: فاطمه اختربت سيارتها ومومحصله حد يوديها الدوام!!!
بو حمد: الله يهداج يابنيتي!!!...جان قلتيلي!!!...انتو عندي مثل بنتي رغد واعز!!!...انتو بنات الغالي بو منصور!!!...يلا تعالي نوصلج بطرجنا يابنيتي!!!
فاطمه: لا ياعمي!!!...مشكور!!!...طلبت تكـسي!!!...كاهو جاي بالطريج!!!
مريم: لا...ياعمي!!!...التكــسي ماراح يجي الا عقب ساعه!!!...
فاطمه تناظر مريم وخاطرها تسكر حلجها اللي موراضي يتسكر!!!
بو حمد: الله يهداج يابنيتي!!!...ركبي معانا!!!...شحقه مستحيه؟!!!...يلا يابنيتي!!!...حلفت عليج الا تركبين!!!...
فاطمه: ياعمي ماله داعي!!!...الله يخليك!!!
حمد: خلاص عاد!!!...ابوي حلف!!!...تكسرين بيمينه؟!!!...هو مافيه شده يصوم 3 ايام!!!...
فاطمه تفاجأت ان حمد هو اللي رد عليها!!!...اول مره تسمع صوته!!!...بالعاده هو ساكت!!!...تنهدت وركبت!!!...وراحو الدوام...وطول الطريج ونفسها عازه عليها شلون ركبت معاهم وتحس ان عزة نفسها وكرامتها انجرحو!!!...هي ماتوعدت تحتاج حق احد!!!...وصلو وكل واحد راح لمكتبه!!!...بس اليوم بالذات...حمد ماكان على طبيعته!!!...طول الوقت سرحان ويفكر وابتسامته ماتفارق شفايفه!!!...ابوه يطالعه مستغرب!!!...شفيه الولد؟!!!...اليوم مو على طبيعته!!!...بالعاده هو مايركز غير في شغله وبس!!!...اليوم كأنه جسد بلا روح!!!...و مابين بو حمد يطالع ولده باستغراب والف سؤال والف فكره تدور براسه!!!...يقاطعه حمد: عن اذنك شوي يبا!!!...شوي وراجع!!!
بو حمد: على وين ياولدي؟!!!...بعد شوي بيبدا الاجتماع!!!...ساعدني علشان نخلص الاوراق!!!
حمد: ماعليه يبه!!!...خل السكرتيره تساعدك!!!...اعذرني الحين يبه!!!
وطلع!!!...وخلى بو حمد بحيرته!!!...وراح لمكتب فاطمه!!!...تفاجأت فاطمه فيه!!!...وشصاير؟!!!...اول مره يجي مكتبي!!!...لا يكون بخصوص التوصيله اليوم؟!!!...ياحسرتي!!!
حمد: السلام عليكم
فاطمه: وعليكم السلام والرحمه!!!
حمد: ممكن اقعد؟!!!
فاطمه: اي حياك تفضل!!!...
حمد: بصراحه انا ريال سيده وماحب اللف والدوران!!!...وصارلي كم يوم وانا قاعد افكر اني اتزوج واكون اسره وبيت وعيال!!!...وبصراحه اكثر!!!...انا فكرت فيج وحاب اسمع رايج قبل لاجيكم البيت مع الاهل!!!...وشرايج؟!!!
فاطمه وعلامات الدهشه واضحه في وجهها!!!: نعم؟!!!...انا؟؟؟!!!...انت تتكلم من صجك؟!!!...بعدين انتبهت على حالها انها تكلم ولد راعي الشركه اللي تشتغل فيها!!!...واعتذرت!!!
حمد: لا تعتذرين!!!...من حقج تستغربين!!!...اكيد الحين تتسائلين ليش اخذت هالقرار؟؟؟
فاطمه: الحقيقه ايه!!!...اقصد...صج ان احنا جيران وابوي وابوك ربع بس مااعرفك عدل!!!...واليوم بس عرفنا بعض!!!...يعني هذا زواج مولعبه؟!!!...
حمد: بصراحه انا ارتحت لج وايد!!!...انا بالعاده موب جريء لهالدرجه ولا احط عيني بعين وحده مهما كانت!!!...بس انتي عجبتيني وايد اليوم ودشيتي راسي!!!...وقلت احسن مااخلي الشيطان يلعب بتفكيري!!!...ادخل من الباب احسن!!!...وانتي بنت اياويد والكل يعرفج!!!...ولا تخافين!!!...انا متأكد من قراري هذا ميه بالميه ومستحيل اتراجع عنه!!!
فاطمه: بصراحه...اتمنى انك تعطيني فرصه افكر شوي وبنفس الوقت تعطي نفسك فرصه علشان تراجع هالقرار!!!
حمد: بالنسبه لج...خذي راحتج...بس بالنسبه لي انا متأكد اني ماراح ارجع عن قراري!!!...يلا اخليج الحين!!!
فاطمه تطالعه باستغرااااااب وفكره توديها وفكره تييبها!!!...معقوله؟!!!...اللي كان بمكتبي تو وطلب ايدي حمد؟!!!...لالالا!!!...ماصدق!!!!

ترقبو بقية الاحداث^_*

7 - 12 - 2024, 07:39 AM

عدنا لكم مع بقية الأحداث^_^

تمت فاطمهـ تفكر طول اليوم وسرحاااانهـ!!!...و حمد مستانس!!!...اثنيناتهم كانو غريبين بطرق مختلفهـ!!!...حمد كان مستانس ومتأكد من قرارهـ وعاجبتهـ فاطمهـ...وفاطمهـ كانت محتارهـ ومستغربهـ من حمد!!!...هي ماتحس اتجاههـ بأي شي ولا عمرها فكرت فيهـ!!!...ويومها طول الليل مانامت وقاعده تفكر!!!...وفي اليوم الثاني...ماراحت فاطمهـ على دوامها وقعدت في البيت!!!...تمت مريم تزن فوق راسها تبي تعرف اختها شفيها؟!!!...لايكون فيها شي؟!!!...روح قلبها شغلها ولاعمرها غابت وتصيبها حالهـ هستيريهـ اذا اتأخرت حتى لو دقيقهـ!!!...شصاير اليوم؟؟؟...قررت فاطمهـ تستشير مريم وتاخذ برايها كونها اختها الكبيرهـ وكونها كانت متزوجهـ من قبل وعندها وجهة نظر بخصوص هالشي!!!...قالت فاطمهـ لمريم كل شي!!!...مريم ماصدقت اللي قاعدهـ تقولهـ فاطمهـ!!!...على بالها تمزح!!!...
قالتلها فاطمهـ: الله يهداج يامريم!!!...في مزح بهالمواضيع؟!!!...وانا اللي حبيت آخذ شورج؟؟!!...
طالعتها مريم باستغراب!!!...: انتي من صجج؟!!!...يوم واحد بس وصلج بالسياره وخلاص دشيتي راسهـ ويبيج زوجهـ!!!...والله شي غريب!!!...بس شقول؟!!!...الحب يسوي العجايب!!!...هذا اللي يسمونهـ الحب من اول نظرهـ!!!...ههههههههه...
فاطمه: مريوم!!!...انتي تعرفين زين اني ماأصدق هالخرابيط اللي مالها داعي!!!...وبعدين...بصراحه انا مانمت البارحه قاعدهـ افكر بهالشي لأنهـ ناطر مني خبر!!!...احنا الاثنين فرق السما عن الارض بيناتنا!!!...هو رومانسي زيادهـ عن اللزوم وانا واقعيهـ ومااحب الرومانسيهـ!!!...مريوم الله يخليج شوري علي وبلا مزح!!!...صراحه تعبت من كثر التفكير!!!
مريم: والله مدري شقولج يافطوم؟!!!...هذا زواج مو يوم ويومين!!!...لازم اثنيناتكم تكونون متأكدين من قراراتكم وانكم حابين تكملون حياتكم ويا بعض!!!...انا برايي ان حمد مافي مثلهـ!!!...ريال والنعم فيه وسيدهـ مايحب يلف ويدور على الرغم من انه رومانسي والدليل انه تقدملج على طول!!!...فكري عدل يافطوم وعسى الله يكتب اللي فيهـ الخير!!!...شرايج الحين تقومين وتستخيرين ربج؟!!!...يمكن يكون حمد بالفعل هو نصيبج!!!...وبعدين الله سبحانه وتعالى هو الوحيد اللي المفروض ناخذ بشورهـ!!!...
فاطمهـ: وانتي قلتيها!!!...
واحضنت فاطمهـ مريم وبعدين راحت تصليلها ركعتين استخارهـ!!!...
وفي نفس الوقت...حمد قاعد ينطر وكان متفائل وايد وكان حاس ان فاطمهـ بتوافق وماراح تقول لا!!!...كان مستغرب من احساسهـ هذا بس كان طاير من الوناسهـ وناطر رد فاطمهـ على احر من الجمر!!!...وهو قاعد ينطر دق تلفونهـ وقطع حبل افكارهـ!!!...رد بعصبيهـ: الو!!!...من معاي؟!!!
.........: يه يه!!!...شدعوهـ؟!!!...وش هالنفس الخايسهـ من الصبح؟!!!
حمد: آسف ماكان قصدي!!!...من معاي لو سمحت؟؟؟
........: حمد؟؟؟...الله يهداك شفيك؟!!!...شدعوهـ ماعرفتني؟؟؟...انت مخزن رقمي بالموبايل شلون ماطلع؟!!!
حمد: يااخوي ماطلع!!!...خلصني من معاي؟؟؟
.......: زين زين!!!...ول!!!...بياكلني هالولد!!!...انا رفيجك صالح اللي ناسيهـ!!!...الله يسامحك بس!!!
حمد: اهلييييييييين صالح!!!...لاتواخذني ياخوك!!!...كنت سرحان وانت قطعت علي افكاري اللي كنت مستانس فيها!!!...علشان كذا عصبت!!!...طمني عنك وش مسوي؟؟؟
صالح: تو الناس!!!...انا بخير وتسرك احوالي!!!...انت طمني عنك شلونك؟!!!...ومن اللي ماخذ عقلك وخلاك تعصب علينا؟!!!!
حمد: ماينفع اقولك عالتلفون الحين!!!...انت بس ادعيلي الحين وبعدين اقولك كل شي!!!...انت وين الحين؟؟؟...للحين بالمانيا ولا رديت؟؟؟
صالح: لا!!!...خلصت اشغالي بالمانيا ونقلت شغلي كلهـ هني و اسأل التوفيق من الله!!!...زين حمد!!!...ودي اشوفك...ابي اتكلم معاك بخصوص الشغل وبنفس الوقت نقعد نسولف مثل قبل!!!...متى اقدر اشوفك؟!!!
حمد: خير ان شاء الله؟!!!...في شي لاسمح الله؟!!!
صالح: يابن الحلال مافي شي!!!...لاشفتك بتعرف كل شي!!!...الحين اقدر اشوفك ولا لأ؟!!!
حمد: والله ياصالح اعذرني اليوم ماأقدر!!!...عندي شغل مو فاضي احك راسي!!! وماراح اقدر اطلع!!!...شرايك نأجلها لبكرهـ؟!!!
صالح: خير ان شاء الله!!!...بكرهـ بكرهـ!!!...عيل اخليك الحين تخلص اشغالك وبكرهـ بتصلك نتفق وين نتقابل؟!!!...
حمد: على خير ان شاء الله!!!...مع السلامهـ!!!

ترقبو بقية الأحداث^_*

7 - 12 - 2024, 07:39 AM

عدنا لكم مع بقية الاحداث^_^
وآسفه عالاطاله!!!

في اليوم الثاني...تقابلو حمد وصالح...
حمد: خير ياخوك؟؟؟وش صاير؟؟؟
صالح: تونا ماقعدنا!!!تبي تدخل بالموضوع على طول؟ خلنا نقعد شوي نشرب...
قاطعه حمد: صالح انت تعرف زين اني مااحب هالمقدمات!!!ادخل بالموضوع على طول!!!
صالح: زين!!!ندخل بالموضوع!!!...مثل ماقلتلك انا نقلت اشغالي كلها هني!!!...والصراحه ابي اكبر الشغل واوسعه وودي بشريك!!!...وقلت في نفسي...احسن مااشارك حد غريب!!!رفيجي اولى!!!والا انت شرايك؟
حمد: مدري والله!!!تدري اني مااقدر اهد ابوي بروحه!!!
صالح: مو مشكله!!!ماقلتلك هد ابوك!!!...خلك في شغلك انا عارف البير وغطاه ولا يهمك!!!علشان جي فكرت اني اضم شركتي لشركتكم!!!...ونصير شراكه كلنا!!!
حمد: والله فكره حلوه وانا من جهتي ماعندي مانع!!!بس خلنا نستشير الوالد بالاول!!!يمكن له راي ثاني!!!
صالح: خوش عيل!!!انطر رد الوالد!!!والحين دامني قلت اللي عندي وخلصت!!!انت قول اللي عندك!!!
حمد: وش قصدك؟؟؟
صالح: لاتتهرب!!!من اللي ماخذ عقلك وخلاك تنسانا!!!
حمد(استحى): بصراحه..........انا قررت اتزوج!!!
صالح: يه يه يه!!!!مبروووووك ياخوي!!!...احلى خبر سمعته!!!...ومن سعيدة الحظ اللي اخذت العقل والقلب؟
حمد(معصب): صالح!!!شفيك؟
صالح: مافيني شي!!!ليش عصبت!!!لاتهرب وقول من يلا!!!
حمد: بنت عمي بو منصور جارنا!!!هي تشتغل معانا في الشركه!!!
صالح: اوووه!!!عمي بو منصور؟ والله زين مااخترت ياحمد!!!الا قولي وش اخباره؟
حمد: الله يعينه بس ويصبر قلبه!!!من يوم توفو مرته وولده وهو حابس روحه في الغرفه موراضي يطلع!!!
صالح: لاحول ولا قوة الا بالله!!!...المهم...ياويلك اذا ماعزمتني على خطوبتك وعرسك زين؟!!!
حمد: تو الناس!!!انطر شوي!!!للحين ماردت علي خبر!!!
صالح: ان شاء الله بترد وان شاء الله يكون ردها الموافقه ونزوجك عاد!!!مسختها وانت قاعد عزابي!!!
حمد وصالح تمو يضحكون شوي!!!
في الليل...فاطمه كانت نايمه!!!...وحلمت انها عروس وانها مستانسه وسعيده!!!وفجأه يحترق العرس كله!!!...اخترعت وقعدت تصارخ!!!قعدت مريم وصحتها من النوم وقامت تسمي عليها وتهديها!!!...وشربتها قلاص ماي!!!...
فاطمه: مريم!!!...شفت حلم يخرع!!!...هذي رؤيا اكيد!!!نصيبي مو حمد!!!...مالازم اوافق عليه!!!
مريم: سمي بالرحمن وتعوذي من الشيطان!!!الله يهداج وش اللي يخليج متأكده؟!!!الا انتي كنتي خايفه وتفكرين قبل لاتنامين وتشكلتلج مخاوفج في هالكابوس!!!
فاطمه: لا يامريم!!!...انا صليت استخاره ونمت!!!وهذا الله سبحانه استجاب لي ورد لي استخارتي!!!...خلاص بكرا برد على حمد واقوله اني ماني موافقه!!!
مريم: فكري شوي!!! لاتستعيلين!!!حمد مايتفوت!!! لاتضيعينه من ايدج!!!
فاطمه: ادري انه مايتفوت ماقلنا شي!!!بس الله مو كاتبلي نصيب معاه!!!حتى لو وافقت يامريم وحتى لو كل شي صار زين!!!...هو مونصيبي!!!خلاص!!!
مريم: براحتج يافطوم!!!...سوي اللي يريحج وماني ضاغطه عليج!!!اذا انتي ماتبينه خلاص!!!
وطلعت مريم...وردت فاطمه تنام!!!
في اليوم الثاني...راحت فاطمه تبي تقول لحمد عن رايها النهائي...بس ناداها مديرها وقعد يصارخ عليها لأنها مقصره في حق شغلها!!!...وعطاها ملفات اكوام علشان تخلصها...فأجلتها لبعدين وقعدت تخلص شغلها!!!

ترقبو بقية الاحداث^_*

7 - 12 - 2024, 07:40 AM

عدنا لكم مع بقية الأحداث^_^

حاولت فاطمه طول اليوم تقول لحمد عن قرارها بس كلما تبي تقوله يصير شي!!!...واخيرا قابلته بالمواقف وهي طالعه!!!...خافت وترددت شوي بس بعدين تشجعت وراحت صوبه!!!...

فاطمه: استاذ حمد!!!...لحظه ابي اقولك شي!!!

حمد: تفضلي قولي عسى خير؟!!!

فاطمه: انا فكرت وايد بعرضك وبصراحه لقيت ان مالنا نصيب فبعض!!!

حمد(منصدم): تقدرين تقولين السبب؟!!!...ليش ماتبيني؟!!!

فاطمه: رجاء استاذ حمد!!!...اتمنى ان قراري هذا مايؤثر على العلاقه بينا وعلى شغلنا!!!...استاذ حمد انت ريال والنعم فيك انا ماقلت شي والف بنت تتمناك بس الله موكاتبلنا نصيب!!!

حمد(معصب): وانتي شدراج؟ تعلمين الغيب مثلا؟!!!

فاطمه: لا انا مااعلم الغيب استغفر الله بس استخرت ربي!!!...وربي رد استخارتي!!!...ورجاء لاتصارخ الناس قامت تطالع علينا!!!

حمد: خليها تطالع شنو يعني؟!!!...انتي رفضتيني لسبب ولازم اعرفه!!!...قولي تقدملج احد ثاني؟!!!...تبين احد ثاني؟!!!

فاطمه: لو سمحت انا مااسمحلك تقولي هالكلام!!!...مومعناته ولد المدير يعني بسكتلك!!!...احترم نفسك احسلك!!!

حمد: وشبتسوين يعني؟!!!...راعي انج تكلمين ولد المدير!!!

فاطمه: عيل انا اقدم استقالتي!!!...مالي قعده في الشركه دام انت فيها!!!

حمد: احسن بعد مابي اشوفج هني!!!

وافترقو الاثنين وهم معصبين من بعض!!!!....

وفي الليل...الاثنين ماقدرو ينامون!!!...حمد مقهور ليش رفضته!!!...مع ان هو حبها وتعلق فيها وفاطمه تفكر بردة فعل حمد تجاه الموضوع!!!...كسر خاطرها!!!...كان متأمل وايد وواثق انها بتوافق!!!...وظلو على هالحال طول الليل!!!

وفي اليوم الثاني...راحت فاطمه لمدير القسم تقدم استقالتها!!!...مدير القسم استغرب!!!...جادلها شوي بس فاطمه اصرت تقدم استقالتها!!!...

مدير القسم: دامج مصره انا ماعندي مانع بس الموافقه موعندي عند المدير!!! (كان يكذب لأنه يدري ان المدير جارهم واكيد بيمنعها!!!)

فاطمه: شلون موعندك؟!!!...انت مدير القسم اللي اشتغل فيه!!!...وعندك كامل الصلاحيات!!!

مدير القسم: لا من قالج هالكلام؟!!!...انا مااقدر اوظف احد ولا اطرد احد!!!...انا بس ادير القسم!!!!

فاطمه(معصبه): زين عيل!!!...الحين بروحله واشوف!!!

راحت فاطمه للمدير وفي يدها استقالتها!!!...بوحمد اول ماقالتله السكرتيره انه فاطمه تبيه ضروري دخلها على طول خاف انه بومنصور فيه شي!!!...وتفاجأ لما شاف ورقة الاستقاله بين ايدينه!!!...

بو حمد: ليش يابنتي؟؟؟...متضايقه من حد هنا بالشركه زعلانه من حد؟!!!...قولي يابنتي لاتخافين ترا باخذلج حقج منه!!!

فاطمه: ابد ياعمي...تسلم ياعمي ادري انك ماتقصر بس الله يخليك وقعلي على الاستقاله بدون ماتسأل!!!...ورجاء لاتضغط علي!!!

وفجأه يدش حمد!!!...ويشوف فاطمه واقفه!!!

بوحمد: تعال ياحمد شوف فاطمه شتقول؟!!!...تبي تستقيل من الشركه!!!...قول شي ياحمد!!!

حمد: خلاص يبه دامها تبي تستقيل كيفها!!!...وقع عالاستقاله!!!...اذا ماتقدر انا اقدر عطنياها اوقعها!!!

جاء حمد يبي ياخذ الورقه!!!...ابوه عصب ووقفه!!!...

بو حمد(معصب): حمد وشهالكلام؟!!!...فاطمه مالها طلعه من الشركه انت فاهم؟!!!

فاطمه: عمي ارجوك وقع انا ماقدر اقعد في الشركه!!!

بو حمد: ليه يابنتي؟!!!...وبعدين وين بتلقين شغل؟!!!...هالايام صعب تلقين شغل وانتي عارفه!!!

فاطمه: بلقى انشاءالله بلقى... الله سبحانه هو الرازق!!!

بو حمد: ماراح اوقع هالاستقاله لما تقوليلي السبب واقتنع فيه يافاطمه!!!

فاطمه(تطالع حمد بنظرات): عمي!!!...الله يخليك وقع عالاستقاله ولاتحرجني!!!...انا عندي اسبابي وحابه احتفظ فيها لنفسي!!!

حمد(معصب): لا قوليله!!!...قوليله انج رفضتيني!!!

فاطمه حست انها ابتدت تكره حمد وتعتبره عدوها!!!

بوحمد: وشمعناة هالكلام؟!!!...حمد...فاطمه ممكن تقولولي شقاعد يصير هني؟!!!

حمد: هذي يايبا تقدمتلها وماتوقعت انها بترفضني!!!...لكنها رفضتني بكل قوة عين!!!

فاطمه(معصبه): قلتلك يااخي هذي قسمه ونصيب والله موكاتب شفيك انت؟!!!...الزواج موغصب بعد!!!

بو حمد: ومتى صار هالحجي وشلون؟!!!

فاطمه: عمي رجاء وقع عالاستقاله وولدك بعدين بيفهمك على كل شي!!!

حمد اخذ الورقه من عند ابوه بسرعه ووقعها وقطها بويه فاطمه!!!

حمد: هاج هالاستقاله والباب يوسع جمل!!!...ولاتظنين بموت من عقبج!!!...ومابي اشوفج مره ثانيه هني فاهمه؟!!!

فاطمه عصبت وطلعت من الشركه!!!...وبو حمد مندهش ومستغرب من اللي صار!!!...وقعد حمد وفهم ابوه على كل شي!!!

ترقبو بقية الأحداث^_*

7 - 12 - 2024, 07:40 AM

بقية الأحداث^_*

رجعت فاطمه البيت معصبه ودخلت الغرفه وسكرت على حالها الباب ماتبي احد يكلمها!!!...حاولت معاها مريم وايد بس مافي فايده!!!...وظلت على هالحال تقريبا طول اليوم لما اخيرا طلعت من الغرفه وقالت لمريم كل شي!!!...مريم عصبت وماتوقعت ردة فعل حمد بتكون هالشكل!!!...كانت بتروح تكلم امه بس فاطمه حلفتها انها ماتروح وقالتلها ان خلاص مالهم شغل فيهم لايزورونهم ولا يكلمونهم!!!...يكفي اللي صار!!!...كانت فاطمه زعلانه بس في نفس الوقت حمد كان زعلان ومعصب اكثر منها!!!...ماكان متوقع انها ترفضه!!!...والمشكله يحاول يسيطر على نفسه بس موقادر!!!...هو عنده عزة نفس ومع هذا قلبه مندفع لفاطمه ويبيها ومحتار شيسوي؟!!!...قال بنفسه يمكن بعدها بينسيه بس انقهر وايد لما حس انه اشتاقلها اول ماطلعت من الباب ووده انه يلحقها ويرجعها!!!...بس عزة نفسه منعته من هالشي!!!...وبسبب فاطمه وحمد قامت العداوة بين العيلتين تكبر وتكبر!!!...في نفس الوقت...في بيت بو جاسم...

دق دق دق

منيره: منى...منى...منى...افتحي الباب منوه من مساعه واقفه بسرعه!!!

منى: افففففف....خير شتبين مايصير الواحد يقعد مع حاله شوي؟!!!

منيره: ليش قاعده لحالج انشاءالله يالمينونه؟!!!...وليش ماتفتحين الباب صارلي ساعه اناديج مع الويه!!!

منى: خير شتبين؟!!!

منيره: يلا بدلي بنروح بيت عمي!!!

منى: وليييييش ماتقولين جي من مساعه!!!....يلا خمس دقايق واكون جاهزه!!!

طالعت منيره منى باستغراب!!!...تقول بنفسها شفيها منوه؟!!!...اول مره تتحمس للروحه حق بيت عمي!!!

لما وصلو لبيت عمهم شافو الكل وجهه متغير والجو متكهرب ومستغربين موعارفين شسالفه؟!!!

ام جاسم: ام حمد؟!!!....شفيكم شصاير؟!!!

ام حمد: شقولج ياوخيتي ياام جاسم؟!!!...حسبي الله عليها بس نكدت علينا الله يسامحها!!!

ام جاسم وبناتها يطالعون فبعضهم موفاهمين شي!!!

ام جاسم: منو؟!!!!

ام حمد: فطوم بنت بو منصور الله....استغفر الله بس مابي ادعي عليها!!!

ام جاسم: فطوم؟!!!...ليش شسوت؟!!!...شصار ياام حمد قوليلي؟!!!

ام حمد: قعدي قعدي ياام جاسم قعدو يابنات الحين بقولكم كل شي!!!

وقالت ام حمد لام جاسم وبناتها كل شي!!!

كان الكل منصدم ويتمنون انه اللي صار ماصار!!!...وكانت اكثر وحده متأثره بالموضوع منى!!!

منى: وحمد ياعمتي...هو يحبها؟!!!...شمعنى اختارها هي يخطبها؟!!!...شنو الحلو فيها؟!!!

ام حمد: الله واعلم يابنيتي!!!...مدري شاللي حبه فيها الله يسامحها بس اذا براسه عقل يشيلها من باله ولا عاد يفكر فيها!!!

في اليوم الثاني...طلعت فاطمه تدور على شغل يديد تشتغله!!!...وهي في الطريق مرت على السوبرماركت تشتري ماي لأنها تعبت وايد من الدواره!!!...في السوبر ماركت صادفت منى وصديقتها هناك!!!

منى: اوووه...هذي انتي فطيم؟!!!...اشوف المكان ظلم لما دشيتي!!!

فاطمه طالعت منى بنظرات وكانت تبي ترد عليها بس فاطمه كانت تعبانه وايد ومالها خلق ترادد احد الحين!!!...فدفعت حق الماي وحقرتها وطلعت!!!

منى عصبت وطلعت وراها...

منى: هييي...منو انتي تحقريني وتطلعين؟!!!...على شنو شايفه نفسج انتي؟!!!

فاطمه: شوفي انتي...انا روحي بخشمي وموناقصتج!!!...ذلفي عن ويهي احسلج ولا ترا بتندمين!!!

منى: لا يمممه خوفتيني!!!...شبتسوين يعني؟!!!...حبيبتي...لاتنسين انتي قاعده تكلمين منى مو اي وحده!!!...انتي منو تهدديني؟!!!...اعرفي مع منو تتكلمين بعدين تكلمي!!!

فاطمه: اكيد عارفه انا مع منو اتكلم!!!...وعارفه بعد انا منو!!!...انا فاطمه وانتي منى والفرق واضح بينا!!! (وابتسمت ابتسامه ساخره)!!!

منى عصبت: انتي شقصدج؟!!!

فاطمه: والله عاد اللي على راسه بطحه يحسس عليها!!!

ركبت فاطمه السياره وماردت على منى اللي قاعده تصارخ وراها!!!...منى عصبت وانقهرت وايد وكان خاطرها تمسك فاطمه من رقبتها وتخنقها وتخلص!!!

ترقبو بقية الأحداث^_*

7 - 12 - 2024, 07:41 AM

باك مع بقية الأحداث

من بعد هالسالفه...كانت منى على اعصابها ومقهوووره من فاطمه لأن حمد حبها!!!...صج ان فاطمه رفضت حمد وحمد معصب منها بس هاي ماينفي ان حمد اختارها وحبها ومن لقاء واحد بس بينهم!!!...وهي اللي على طول قدامه مافكر فيها!!!...هذا كان اللي يدور براس منى واللي كانت تفكر فيه ومومخليها تنام!!!...اما فاطمه نست السالفه هذي كلها ولا عاد تفكر فيها!!!...كان كل اللي شاغل بالها انها تلقى شغل بأسرع وقت ممكن!!!...وهي كانت تدور من شركه لشركه ومن مؤسسه لمؤسسه أخيرا حصلت اعلان عن شركه توها فاتحه يديد ومحتاجة لأكبر عدد من الموظفين!!!...ماصدقت خبر وراحتلهم على طول!!!...ومدير الموظفين لما قابلها وشاف الـcv مالها استانس وايد كأنها طايحه عليه من السما!!!...على طول وظفها وفاطمه لما شافته مستانس عليها طارت من الفرحه وقعدت تحمد الله وتشكره طول الطريق!!!....تمت تداوم في هالشركه تقريبا شهر!!!...لما شافوها انها كفو في شغلها رقوها وخلوها مديرة على قسمها وهالشي فرحها وايد وايد!!!...كانت حاسة ان الابواب تفتحت قدامها وانها حالها كل ماله ويصير احسن وان كل اللي صارلها كان خيره لها!!!...وفي يوم من الايام كانت فاطمه رايحه لمكتبها وتفاجأت لما شافت مديرهم جاي ومعاه حمد!!!...اي حمد هي موغلطانه هذا حمد!!!...شلي جابه الشركه وشيسوي مع المدير؟!!!...قامت افكار فاطمه توديها وتييبها خايفه ان حمد درا انها تشتغل في هالشركه وبيسوس براس المدير عشان يطردها من الشغل!!!...شافت الفراش رايح لمكتب المدير ومعاه قهوه نادته عشان تسأله وتريح بالها!!!...بس ماارتاح بالها ابد!!!...صادها احباط شديد لما قالها الفراش ان حمد شريك في هالشركه وان المدير صديقه!!!...قامت تندب حظها!!!...وبعدين قالت في نفسها!!!...بس هو مايعرف اني اشتغل هني!!!...ومايجي الشركه وايد وماراح نتقابل كلج يعني ليش الخوف؟!!!
طمنت نفسها وراحت لمكتبها وقالت حتى لو بيصير شي انا متمسكه بشغلي ومالي شغل فيه هو كيفه يصطفل!!!...

بجهه ثانيه بعيد عن قصة حمد وفاطمه...كان جاسم ماشي مع شلته مستانس بحياته وكل شي عنده سهالات!!!...وهو كان ماشي مع ربعه بالجامعه صادفو واحد من الشباب جاء بيقعد معاهم ويتعرف عليهم!!!...طبعا جاسم وبسبب غروره قعد يطالعه من فوق لتحت وموعاجبه الوضع!!!..

جاسم: انت منو؟!!!

.......: اعرفك بنفسي...اسمي خليفه وبين ربعي تعودت ينادوني خلفوه فنادني خلفوه احسن!!!...انا يديد في الجامعه وماعندي احد وحاب اني اكون واحد منكم اذا سمحتو!!!

جاسم (من غير نفس): ايه!!!...تشرفنا!!!...اسمي جاسم!!!...وهذيلا حسن وعادل!!!...والحقيقه يااخ خليفه احنا ماودنا واحد زياده في شلتنا!!!

خليفه: اهااا...فهمت!!!...ياخساره عاد!!!...كنت ناوي اعزمكم اليوم على سهره تينن!!!...بس يلا بتكون من نصيب غيركم مالكم نصيب انتو فيها!!!

جاسم وربعه وقفو يطالعون فبعض متفاجئين!!!...

جاسم: ها؟!!!...سهره؟!!!...شنو هالسهره؟!!!

خليفه: لا لا خلاص!!!...انتو ماتبون!!!

جاسم: الصراحه احنا فكرنا شوي اعتقد ان مافيها شي لو زاد عددنا واحد!!!

خليفه (في نفسه حاس انه انتصر عليهم): زين عيل!!!...تشرفت بمعرفتكم!!!...تفضلو!!!...هذي ورقة بالعنوان اللي بتكون فيه السهره نتقابل هناك!!!

جاسم وربعه كأنهم حصلو كنز!!!...طارو من الوناسه!!!...السالفه فيها سهره!!!...اكيد بيكون الجو فللله!!!....مادرو ان هالسهره بتكون بداية لمعاناتهم ودمارهم!!!...كان خليفه هدفه من كل هالشي ان يكسبهم لصالحه ويستفيد منهم لأنهم اغنياء!!!

راحو جسوم وربعه السهره وعجبهم الوضع هناك واستانسو وايد!!!...فقامو يروحون كل يوم هناك لأن السهره هذي كانت يوميه!!!...وجاسم وربعه بدو يتعلقون بخلفوه ويزيد تعلقهم فيه يوم عن يوم!!!...سالفة السهر برا البيت هذي كانت تزعج ام جاسم!!!...كل يوم على نفس الموال!!!....يرد البيت وتقعد تهاوشه وتعطيه نصايح وهو ولا على باله!!!!...يطنش ويقول بينه وبين حاله امي ماعندها سالفه!!!...ماتخلي الواحد يستانس ويروق!!!...ام جاسم قالت حق بوجاسم لأنها تدري فيه عصبي وبيوقف ولده عند حده بس تفاجأت بردة فعله!!!...بوجاسم مااهتم للموضوع كلج وقالها خلي الولد يستانس مع ربعه يامره انتي شفيج؟!!!...الحين كل ربعه يسهرون ليش نحرمه من السهر ونخليه مطنزه قدام ربعه!!!...ازعجت اللامبالاه هذي ام جاسم وايد وماعرفت شنو بتسوي!!!!...اما جاسم فاستمر على سهراته وحتى انه اهمل بجامعته!!!...وفي سهره من السهرات!!!...قدر خليفه بمكره ودهائه انه يخلي جاسم وربعه مدمنين مخدرات!!!...ومن هنا بدت مشكلة جاسم الكبيره واللي هو ماكان حاس فيها!!!

وفي نفس الوقت...كانت منيره طايحة بمشكله كبيره ومحتاجه حد يساعدها بس موقادره تتكلم مع احد او توثق باحد!!!...كانت في وحده تروح وترد عليها تهددها اذا ماسوت اللي تبيه بتندم قد شعر راسها!!!...طبعا منيره قعدت على اعصابها!!!...شتقصد هذي؟!!!...من وين جايبه كل هالثقه وشعندها هي؟!!!...احتارت منيره وموعارفه شتسوي؟!!!...تقول للشرطه؟!!!...بس ابوها بيسويلها سالفه كبيره!!!...كانت البنت تبيها تييب اوراق سرية خاصه بالشركه من عند ابوها!!!...منيره ماكان لها خص بالشركه اصلا ومب فاهمه شي!!!...بس البنت تهدد!!!...ظلت منيره تفكر وتحاتي شنو اللي تقدر تسويه البنت؟!!!...منيره مستحيل تخون ابوها ومستحيل تسوي اللي تبيه بس البنت تتكلم من منطلق ثقه!!!...يعني شبتسوي؟؟؟ وشنو اللي عندها ضدي وليش انا بالذات اللي تهددني؟!!!...ليش مااختارت جسوم هو اللي ينفع لهالشغله اكثر!!!!...ظلت منيره تفكر وفكره توديها فكره تييبها!!!...ومب عارفه شنو سر هالبنت؟!!!...وشنو تبي في الاوراق!!!...وكلما يت تبي تقول لأبوها خافت انه يعصب عليها!!!...لأن ابوها عصبي وهم اساسا ماياخذون ويعطون معاه وايد!!!...شلون بتقوله على التهديدات؟!!!

كانت البنت فعلا عند كلامها وتقدر تنفذ تهديدها!!!...عرفت منيره بهالشي لما شافت فيديو خافت منه وايد!!!...عطتها البنت الفيديو وكان هالفيديو بيوديها ويودي ابوها واهلها كلهم بستين الف داهيه لو تقدم للشرطه لأنه كان دليل قوي على أن كل الثروه اللي عندهم والفلوس موحلال وبالحرام!!!...كانت منيره متفاجئه ومنصدمه وماتوقعت هالشي ابدا!!!...لأنه فلوسهم كانت حلال وهي متأكده من هالشي وهي ورث اصلا!!!...ألف سؤال وسؤال تمو يدورون براس منيره وكلهم مولاقيتلهم جواب!!!...احتارت منيره شبتسوي الحين وشلون تخلص من هالمشكله والاهم شلون تتأكد وتجاوب على الاسئله اللي بمخها!!!...فكرت تقول لجاسم بس جاسم مايدري وين الله حاطه لاهي بسهراته وربعه ومنى توها صغيره ماتبي تعقدها في هالمشاكل الكبيره!!!...وابوها اللي طاح من عينها عقب الفيديو ماتقدر تواجهه وتسأله بكل صراحه لأنه عصبي ومايتفاهم!!!...وامها ماتتحمل صدمات يكفيها اللي فيها!!!...انزين وين تروح؟ وشبتسوي؟!!!...وفجأه طرا فبالها عمها بوحمد!!!...هو الوحيد اللي يقدر يجاوبها على اسئلتها وبكل رحابة صدر ويساعدها بمشكلتها لأنه يعرف يتعامل مع هالاشكال!!!...ماانتظرت وراحت على طول لعمها في الشركه!!!...تفاجأو كلهم لما شافوها لأنها ولا مره فكرت تروح الشركه!!!...المهم طلبت من كل اللي كانو في المكتب انهم يطلعون عشان تبي تكلم عمها على انفراد!!!!...عصب حمد في البدايه وقالها انه ابوه مايخش عنه شي وعادي لو تكلمت قدامه!!!...رفضت منيره واصرت انها تكون مع عمها على انفراد!!!...طلع حمد لما شاف ابوه موافق على كلام منيره!!!...قعدت منيره وكانت كل الاسئله على طرف لسانها تنطرها بس تفتح فمها عشان تطلع!!!

منيره: عمي...أنا ييت اليوم ابي اكلمك بموضوع وايد وايد ضروري وعندي اسئله وايد وابي اجوبه صريحه منك

بوحمد( مستغرب وخايف من اللي تبي تقوله منيره) : خير يابنيتي وشصاير؟!!!

منيره: ياعمي انا طايحه بمشكله كبيره بتوديني وتودي اهلي كلهم بستين الف داهيه!!!

بوحمد: شصاير تكلمي!!!

منيره: عمي...في بنت في الجامعه تهددني اذا مايبتلها اوراق سريه حق شركة ابوي بتفضحنا!!!

بوحمد: شنووو؟!!!...لا يكون بتسوين اللي تبيه وتبيني اساعدج؟!!!

منيره: لا ياعمي موهذي المشكله!!!...هاك شوف الفيديو وبتفهم كل شي لأن انا مب قادره اعبر!!!
أخذ بو حمد الفيديو وكان قلبه بيوقف لما شاف الفيديو وقام يرجف وعظامه صكت فبعضها من المفاجأه!!!
بوحمد: لا يابنيتي هالفيديو مستحيل يكون حقيقي أكيد مسوين فيه شي ومزورينه!!!
منيره: ياعمي شلون بيزورون فيديو مستحيل!!!...هذا فيديو ياعمي لو كان صوره كنت بقول مزورينها بس فيديو!!!
بوحمد: يابنيتي فكري معاي الحين...لو كان صج الكلام اللي في الفيديو ليش ماراحو يهددون ابوج ليش يهددونج انتي؟!!!...وبعد لو كان صج كان ماانطرو اصلا ولا تعبو حالهم عشان اوراق سريه عشان يفلسون الشركه!!!...يقدمونها للشرطه وخلصت السالفه ليش كل هالسالفه هذي؟!!!
منيره: يعني شلون ياعمي؟
بو حمد: هالفيديو مركب او اللي فيه موابوج أكيد واحد يمثل انه ابوج!!!...يبون يضحكون عليج!!!...لأنه لو كان ابوج صج كان راحو يهددون ابوج!!!...خلاص يابنيتي خلي هالسالفه علي انا بحلها انتي لاتاكلين هم!!!...بس انتي عطيني اوصاف البنت اللي تهددج عشان اتصرف معاها!!!...انتي حاولي تتجنبينهم قد ماتقدرين!!!
حست منيره براحه عقب كلام عمها وصدقته!!!...وعطته اوصاف البنت!!!
عقب ماراحت منيره ظل بوحمد فمكتبه يفكر في هالمصيبه وشلون بيخلص منها!!!...الأكيد ان الفيديو موصج ويقدر بشوية تحقيقات يثبت انه تمثيل!!!...بس المصيبه انه عرف الناس اللي ورا هالفيديو واللي يهددون منيره وهم ناس حاقدين على بوجاسم من زمااااان!!!
انتظرو بقية الاحداث^_*

7 - 12 - 2024, 07:42 AM

قصة بوجاسم مع هالناس ابتدت من يوم تزوج بوجاسم من ام جاسم!!!...الحقيقه ان بوجاسم قبل مايتزوج ام جاسم كان متزوج بنت رفيج ابوه بالسر ومحد يدري عنهم الا اخوه بوحمد وكشفهم صدفه بعد!!!><...وبعدين ابوه أجبره انه ياخذ ام جاسم فما قدر الا انه يترك البنت بحالها ويطلقها!!!...البنت انقهرت منه وايد واحقدت عليه وراحت كانت بتقول كل شي لابوه لأنها كانت تدري ان كل اللي يهم بوجاسم الفلوس واذا ابوه درا بهالسالفه بيمنعه من كل شي!!!...بس بوحمد لما شافها جايه عند ابوه ماخلاها تدخل وهددها اذا قالت اي كلمه لأنه مثل ماراح ينضر بوجاسم هي بعد بتنضر!!!...ومن بعد هالسالفه ماشافها بوحمد وسمع انها سافرت وماعاد احد سمع عنها اي شي!!!...وبو حمد شك انه هي نفسها ورا هالسالفه فحقق ورا هالموضوع لين ما تأكد من شكه وطلعت انها هي فعلا ورا هالسالفه!!!...بس ماعرف منو هالبنت اللي مع منيره بالجامعه؟!!!...هالبنت هي اللي تروح وتيي من البيت وطليقة بوجاسم في البيت ماتحركت!!!...وحسب اللي يعرفه بوحمد ان رفيج ابوه مقطوع من شجره ماعنده اهل وزوجته كان عندها اخو وحيد بس ماييب عيال!!!...انزين من وين جت البنت؟ وشقصتها؟!!!...شك بوحمد بالسالفه وخاف انه يطلع ظنه بمحله!!!...وفعلا بعد ماسأل بوحمد عن هالبنت عرف انها بنت طليقة بوجاسم بس يقولون ابوها متوفي ومحد شافه من قبل!!!...اذا كانت السالفه صج زين ليش تهديداتهم لمنيره؟ وليش يبون يدمرون بوجاسم بالسوق؟!!!...معقوله هي حاقده عليه لين الحين؟!!!...الف سؤال وسؤال كانو يدورون براس بوحمد!!!...فقرر انه اول شي لازم يكشف ان اللي بالفيديو موبوجاسم هذا واحد غيره عشان مايكون هالفيديو تهديد وسلاح يحاربونه فيه!!!...ظل بوحمد ورا هالسالفه لغاية مااتفاجئ ان البنت اللي مع منيره بالجامعه هي اللي ورا كل شي!!!...هي اللي تخطط وتدبر وحتى امها ماتدري شسالفه؟!!!...وفعلا الفيديو كان تمثيل بتمثيل وبوحمد قدر يعرف منو هاللي مثل انه بوجاسم وسجل اعترافه بشريط وراح سيده عند البنت يتفاهم معاها!!!...البنت اول ماشافت بوحمد ماعرفته بس بعدين قالها بوحمد انه اخو بوجاسم وعم منيره اللي قاعده تهددها!!!

البنت: انا مااعرف عن شنو تتكلم انت؟!!!

بوحمد: كانت خطتج ماشيه صح بس ماتوقعتي انه منيره بتلجألي صح؟

البنت: للحين مافهمت قصدك!!!

بوحمد: شوفي لاتحاولين تنكرين لأن كل شي انكشف!!!...والفيديو اللي عندج ماعاد منه فايده فهمتي؟!!!...لأني اعرف انه كله تمثيل بتمثيل واقدر اثبت هالشي!!!

البنت انصدمت وتفاجأت شلون عرف بهالشي وشنو الدليل اللي عنده؟!!!

بوحمد: انا بس ابي اعرف شي واحد!!!...ليش هالحقد هذا كله؟ انا عرفت كل شي بس مافهمت ليش الحقد؟

ظلت البنت تطالع بوحمد من فوق لتحت وشرار الحقد قاعد يطلع من عيونها كأن هالسؤال فتحلها جرح قدييييييم كانت تحاول تنساه بس ماقدرت!!!

ماقدرت البنت تتحمل فقامت تصرخ بويه بوحمد وتصيح وبو حمد ظل واقف يسمعها شتقول ومومصدق اللي قاعد يسمعه!!!

البنت: الحقد اللي بقلبي عليه هو السبب فيه ولاني قادره اسامحه!!!...بدال ماتعاتبني روح عاتب اخووك اللي ظلمني انا وامي طول هالسنين ولا سأل عني ولا كأني بنته من لحمه ودمه!!...ايه بنته لاتطالعني جذي وادري ان محد فيكم يدري!!!...لأن امي خبت عليكم حملها بس هو ليش تزوج امي مادام انه موريال وموقد كلمته؟!!!...ليش قالها انه يحبها وهو مايحبها؟!!!...مافكر شبيصير فيها لما تركها وكان كل همه نفسه وبس!!!...المفروض يوقف قدام العالم كلها ويقول ياناس هذي زوجتي وانا احبها ومستحيل اخليها!!!...ليش خلاها تتعذب؟!!!...طوول هالسنين وانا يتيمه مع ان امي وابوي عايشين!!!...حرمني من احساس الابوه وعيش اخواني بأحلى عيشه!!!...لما اشوف اخواني اللي في الجامعه شلون اقول بنفسي ليش انا غير عنهم ليش؟!!!
يستاهل اني ادمره وادمر كل شي يتعلق فيه!!!...يستاهل اني ادفنه بالحياه يستاهل كل شي يصير فيه وماراح يشفى غليلي الا لما آخذ حقي وحق امي من عيونه!!!

تسمر بوحمد مكانه مومصدق اللي يسمعه!!!...وطلعت في ويهه علامات استفهام كبيره واسئله كثيره تدور براسه تدور على جواب بس مومحصله!!!><

بو حمد: شلون؟؟؟انتي بنت اخوي؟؟؟هند كانت حامل لما تركها بوجاسم؟؟؟ليش ماقالت؟؟؟ليش ماتكلمت؟؟؟

البنت: امي نفسها عزيزه عليها...شلون تبيها تقوله انها حامل وهو قالها خلاص انا ماابيج؟!!!...تعذبت امي وايد بسبة هالشي وماعرفت شتسوي ووين تروح خصوصا انه محد يدري انها متزوجه!!!...تحججت بالدراسه وقالت لجدي انها بتسافر ألمانيا عشان تدرس وانولدت انا هناك وكبرت هناك!!!...بسبته كبرت وتربيت بديرة الغربه والله العالم شكثر تعذبنا انا وامي هناك!!!...بس امي كانت مضطره تظل هناك عشاني وماردينا بلادنا الا قبل كم شهر!!!...انا مخلصه دراستي هناك بس دخلت الجامعه هني عشان اشوف اخواني!!!...لأني سألت عن ابوي وعرفت ان لي اخوان منه في الجامعه!!!...لما شفت اخواني تحسرت على حالي وكرهت ابوي اكثر!!!...ماكنت ابي ادخلهم بالموضوع لأن هم مالهم ذنب بس كانت الطريقه الوحيده اللي اقدر اوصل فيها لابوي وادمره!!!...بس مع الاسف الظاهر خطتي ماكانت مدروسه عدل والدليل وقوفك قدامي الحين ومعاك هالشريط!!!

بوحمد: يابنيتي ابوج لويدري عنج صدقيني ماراح...

البنت: مابي اسمع اي تبريرات ولا اعذار!!!...اللي صار صار وخلاص اذا انت خايف عليه مني انا ماراح اسوي شي بخلي كرهي له بقلبي وابدا ماراح اقرب عليه ولا على اخواني بس بشرط!!!

بوحمد: شرط؟!!!

البنت: ماابي اي احد منهم يدري باللي قلته لك الحين!!!...ماابيهم ولا ابي اتعرف عليهم ولا ابيهم يشفقون علي!!!...مثل ماانت شايف انا موقاصرني شي الحمدلله!!!...امي وشركه جدي مكفيني وزياده والحمدلله على كل حال!!!

بوحمد: مثل ماتحبين يابنيتي بس ممكن اطلب منج طلب!!!

البنت: تفضل!!!

بوحمد: يابنيتي اذا تسمحين ممكن نظل نتواصل؟!!!...ازوج وتزوريني ونصير اهل صج!!!...مهما يكون انتي بنتنا ومااقدر اخليج عقب اللي عرفته!!!

البنت: عمي على عيني وراسي بس انا مابي احد يدري فيني واذا تميت تروح وتيي علينا بتكون محل شبهه والكل بيشك واحنا الحين راس مالنا سمعتنا!!!

بوحمد: الله يخليج يابنيتي ماابيج تقطعيني!!!...طيب تعالي زوريني في المكتب دايما!!!...او اشتغلي عندي بالشركه!!!

البنت: انشاالله بتم ازورك بس انا الحين مديرة شركة يدي فماله داعي اشتغل عندك!!!

بوحمد: ماشاءالله عليج!!!...حلووو هالكلام زين شرايج لو نتشارك شركتنا وشركتكم مع بعض!!!

البنت: ماله داعي تحس انك ملزوم فيني!!!

بو حمد: ابد يابنيتي والله هذا من طيب خاطر وموعلشان انج بنت اخوي!!!

تأثرت البنت بموقف عمها اللي اصر انه يكون قريب منها وحست ان الدم بدا يحن لما شافت حنيته وطيبة قلبه وحست انها مرتاحه وهي قاعده تشوف عمها وهو يبتسم وتناسى كل شي سوته والسبب اللي خلاه قدامها الحين!!!

ظلو بوحمد واريج يتواصلون على طول ومحد يدري فيهم!!!...وام اريج كانت معصبه على اريج لأنها تشوف عمها بس ماتقدر تنمعها لأن شخصية اريج قويه وعنيده والا تسوي اللي براسها لو شنو!!!
وبوحمد طمن منيره ان كل شي انتهى والبنت خلاص ماعاد تهددها وندمانه على كل شي وجت اريج اعتذرت من منيره وطلبت منها انهم يكونون اصدقاء وفعلا هذا اللي صار!!!...منيره سامحت اريج وصارو الثنتين رفيجات ومن اعز الرفيجات بعد!!!...دخلت اريج بيت ابوها على اساس انها رفيجة منيره وتعرفت على اخوانها وصار الوضع بينهم على احسن مايكوون!!!...كانت اريج بتطير من الفرحه لأنها واخيرا صارت بين اخوانها لكن لما تتذكر انها ماتقدر تقول لأخوانها انا اختكم تحزن وايد وتندب حظها وكان الوحيد اللي يواسيها ودايما معاها في كل خطوه بو حمد!!!...لكن في يوم من الايام...اكتشفت اريج مصيبة اخوها جاسم وانه صار مدمن وان ناس خطيرين مسيطرين عليه وقاعدين يستغلونه!!!...كان لازم تشوف حل لهالمشكله بدون محد يدري ومن غير مشاكل!!!...بس شلون؟!!!...قعدت اريج طول اليوم تفكر!!!...كانت بتقول لعمها يساعدها بس ماحبت تدخله في هالمشكله لأن هالناس خطيرين وهي تعرفهم عدل!!!...شافت منهم وايد في المانيا وتعرف شلون يفكرون!!!...اذا دخلت بوحمد بالسالفه بتعرض حياته للخطر!!!...المهم الحين تلقى مخرج لأخوها لأنه هو بعد حياته في خطر طول ماهو بين ايدينهم!!!...واخيرا لقت الحل!!!...لازم تمسك عليهم دليل قوي وتضبط كل اللي معاهم بس اول شي لازم تخلص اخوها جاسم من ايدينهم عشان ماينمسك معاهم!!!...شلون تقنعه يبتعد عنهم وهو مدمن؟!!!...لازم تلقى طريقه!!!...قررت اريج وعرفت شبتسوي ومن وين تبدا وبدت بالتخطيط واختيار الناس اللي يساعدونها!!!...هي عندها معارف وايد وبتستعين فيهم بهالشغله!!!....في جهه ثانيه بعييييييده تماما عن عيلة بوجاسم...كان بومنصور كالعاده في غرفته يحاولون بناته يطلعونه من هالجو اللي عايش فيه بس مب قادرين!!!...فاطمه كل يوم قبل ماتروح شغلها تمر عليه تحاول تكلمه بس مايعطيها فرصه!!!...ومريم بعد كل شوي تمر عليه تحاول تخليه ياكل بس مافي فايده!!!...ياكل لقمه وحده باليوم يادوب تخليه عايش!!!...وايمان يوميا عقب ماتخلص دراستها تقعد عند باب غرفته وتقرا قرآن وتدعي وبكل صلاه تدعيله عشان يطلع من هالحال اللي هو فيها!!!...لكن هذا كله مافاد فيه!!!...كان مسكر آذانه عن كل شي وعايش بحزنه!!!...وفي يوم من الايام...فاطمه وايمان كل وحده راحت على دوامها ومريم كانت ملتهيه بشغل البيت!!!...اضطرت مريم تروح الجمعيه لأنها كانت محتاجه كم غرض منها!!!...ماكان احد في البيت الا بومنصور وامل الصغيره!!!...قعدت امل من النوم وظلت تصيح وتصيح لأن مافي احد في البيت وكانت خايفه!!!...سمع بومنصور صياح امل وحاول انه يتجاهله لأن عباله انه امها الحين بتسكتها بس وين امها موسامع صوتها؟!!!...ماقدر يستحمل وطلع من الغرفه وراح حق امل!!!...لما شاف امل حس بشعور غريب استغربه ماعرف شنو بس شعور حلو!!!...قرب منها ومسكها وحضنها!!!...سكتت امل وقامت تبتسم وتضحك!!!...حس بومنصور بسعاده موطبيعيه لما شاف امل تضحك من بعد ماكانت تصيح ولأول مره ابتسم ونسى حزنه!!!...غريب شلون هالبنت قدرت تنسيه حزنه؟!!!...رجعت امل نامت بحضن بومنصور وهي مبتسمه!!!...كان منظرها روعه!!!...رجعت مريم للبيت وماصدقت عيونها وبغت تطير من الفرحه!!!...ركضت على ابوها تحضنه وتصيح!!!...بومنصور قام يصيح معاها!!!...ووعدها من اليوم ورايح بيحاول يتجاوز حزنه ويوقف على ريوله عشان بناته وعشان امل!!!...مريم ماقدرت تصبر واتصلت على فاطمه بسرعه وفاطمه استأذنت وجت البيت تبي تشوف بعيونها لأنها ماصدقت مريم!!!...كانو الكل فرحانين وكلهم اسجدو شكر لله!!!...وايمان لما رجعت من المدرسه ظلت تصلي وتحمد ربها طول اليوم!!!...واخيرا ابوهم رجعلهم!!!...وبومنصور لما شاف فرحة بناته فيه...حس انه يملك هالدنيا هذي كلها وتحسف على كل الوقت اللي ضيعه بالحزن وبعيد عن بناته وتحسف على كل دمعة نزلت من عيون بناته بسبته!!!...ورجعت الحياة فيه من عقب ماكان ميت طول هالسنين!!!

تغيرت الاحوال في بيت بومنصور للأحسن...فاطمه تقدملها واحد معاها بالشغل وهي وافقت عليه من بعد طوول تفكير وحمد كان بيقوم الدنيا ويقعدها من كثر ماكان معصب!!!...ماكان مقتنع ليش وافقت على هذاك الموظف اللي على قده ورفضته هو!!!...اعتبرها اكبر اهانه له والمشكله انه موقادر ينساها ولا قادر يسوي شي!!!....تزوجت فاطمه وكانو الاثنين مستانسين وفرحانين فبعضهم وايد!!!...حمد كان بيموت من القهر بس موقادر يسوي شي!!!...فاطمه مستانسه ومرتاحه بحياتها واختيارها كان صعب عليه وموقادر يتحمله بس هذا اللي يريحها وهذا هو المهم!!!...اما منى كانت تبي تفجر فاطمه من غيرتها منها!!!...حتى وهي متزوجه وبعيده عن طريقها متعبتها ومعذبتها!!!...وبعيد عن هالاجواء كانت اريج تعيش مغامره مثل الافلام البوليسيه بس شتسوي لازم تطلع اخوها من هالمصيبه اللي هو فيها!!!...طلبت اريج من واحد من اللي يشتغلون عندها انه يحاول يتفق مع هذيك العصابه على صفقة مخدرات وطبعا يكون كل شي مسجل بشريط فيديو بدون محد يحس!!!...وكان عندها واحد من معارفها ضابط شرطه وساعدها في خطتها هذي عشان يكون شاهد انه هي واخوها مالهم ذنب!!!...عطاها التعليمات شنو بتسوي بالحرف وبدت هي بالتنفيذ!!!...كان صعب ان العصابه يقتنعون ان هالرجال يبي يسوي صفقة مخدرات لأنهم مايعرفونه بس طبعا لما شافو شنطة الفلوس وقالهم ان جاسم هو اللي طرشه اقتنعو!!!...في هالاثناء اخذت اريج جاسم غصبن عنه بمساعدة بعض اللي يشتغلون عندها يعني مثل ماتقولون عملية اختطاف!!!...ودته مركز لمعالجة الادمان وكان جاسم معصب وايد ومومتفاعل كلش بس الدكاتره والممرضين هناك يعرفون شغلهم عدل مع المدمنين!!!...بعد تقريبا اسبوعين ظلت فيهم اريج على اعصابها!!!...قدرو اريج ورجالها انهم يقبضون على هالعصابه من اصغرهم لأكبرهم!!!...وجاسم كان للحين في مركز الادمان يتعالج وكان في بطء شديد يتحسن لأنه يتعالج غصبن عنه وكان حده عنيد!!!...وبعد القبض على العصابه قالت اريج لأبوحمد كل شي وطلبت منه انه يطمن العيله على جاسم ويشيلون البلاغ اللي حاطينه عنه وبدون مايدرون انه جاسم يتعالج من الادمان!!!...فعلا قدر بوحمد يسوي هالشي وقالهم انه جاسم كالعاده مسافر مع ربعه بدون مايقولهم وان واحد من ربعه متصل على ولده وقاله عنهم!!!
مر على غياب جاسم شهرين تقريبا وبعدها تحسن جاسم وتعالج تماما من الادمان!!!...رجع لأهله واهله طبعا كانو معصبين عليه لأنه سافر وماقالهم وغاب كل هالمده!!!...قعد يضحك جاسم وبعدها وعد امه وابوه انه ماعاد يعذبهم مره ثانيه وبيحاول قد مايقدر انه يرفع راسهم فوق ويخليهم يفتخرون فيه!!!...مر اسبوع تقريبا وجاسم كان يشد حيله بدراسته بالجامعه وبعّد عن رفجانه اللي كانو مأثرين عليه وتعرف على رفجان يدد!!!...وفي يوم من الايام كان حمد عازم رفيجه صالح عندهم بالبيت وكانت منيره توها راده من الجامعه وتلاقو عند باب البيت!!!...صالح اعجب بمنيره وحبها ومنيره بعد!!!...دشت منيره البيت بسرعه وكان قلبها يدق بسرعه!!!...وصالح بعد استحى ونزل راسه!!!...ثاني يوم جاء صالح مع اهله وطلبو يد منيره ووافقت وتزوجو هم الاثنين!!!

ترقبو بقية الأحداث^_*

المواضيع المتشابهه لموضوع: رواية جبروت الأبتسامة لموضوع: رواية جبروت الأبتسامة
الموضوع	كاتب الموضوع	المنتدى	مشاركات	آخر مشاركة
رواية شياطين تدوس الارواح واو احلا رواية قريتها	البارونة	همس للقصص وحكايات وروايات	12	24 - 12 - 2024 01:34 PM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
جبروت عواطف	همسة الشوق	همس عذب الكلام والخواطر المنقوله	10	29 - 3 - 2018 04:38 PM
بتسم ودع الدنيا تبكي من جبروت إبتسامتك	سجات التهاويل	همس المواضيع العامة	12	1 - 11 - 2013 12:10 AM
دعي الدنيا تبكي من جبروت ابتسامتك يا	رونق صلاله	همس المواضيع العامة	7	2 - 6 - 2011 06:12 AM

الذين يشاهدون محتوى الموضوع الآن : 4 ( الأعضاء 0 والزوار 4)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع