ديوان الشاعرة الراسية

#1 13 - 4 - 2025, 10:54 AM

الشاعرة الراسية: هي الاديبة وشاعرة وكاتبة سعودية كاتبة من الطراز الاول كتبت في عدد من المطبوعات الشعبيه
شاعرة مبدعة بصراحه من اختيارها للمفردات يدل على انها شاعرة متمكنه

الشاعرة الراسية : تتحدث عن بدايتها مع الشعر وهي ابنة 9 سنوات شعر عن المراة العفيفة

الجدير بالذكر أن الشاعرة الراسية بدأت حياتها المهنية في عالم الشعر والأدب منذ سنوات، إذ أنتجت مجموعة من الأعمال الأدبية التي تعبر فيها عن قضايا الحب، الحياة، والوطن، بأسلوب يمزج بين الأصالة والحداثة، وتُعتبر نصوصها مرأة تعكس روح الصحراء والبيئة البدوية التي تنتمي إليها مما أكسبها قاعدة جماهيرية كبيرة

مليون بالميه

مليت وأنا أنتظر ودي وماودي
مليت من كثر ما أحدك على الجيه

يافاهيا والهجر ماهوب من جدي
تو الهجر تو مابانت مواريه

يوم أمطر الحب قلبك واقف ضدي
زعزع نفوذ الغلا وأشعل محانيه

راح الغلا لعنبو جدك على جدي
يالعنبو الحب واللي يجيب طاريه

حدن عليك الزمان وحدني حدي
الين ضاقت وسيعات الخلا فيه

بتعود الأيام كان الضيف ماشدي
وبذكرك طال عمرك كان أنا حيه

يوم أطلق الريح قلبي جيت متعدي
تصدع بوجه الشمال وتدفن الميه

أرتد ذودك وذودي عنك أرتدي
وأقفت تدرهم مجاهيمك على الفيه

يا مخبلك كيف عقب الصد متحدي
خسارتك راجحه مليون بالميه

أربق جنون الكبر تمسي على ردي
خل الليالي تغني جنونها ليه

قد لي سنه والوجع ثوبه على قدي
بشق جيب الوجع وأصبر على الكيه

ياكود طفل الوفا يستر على سدي
وأقول ولى زمانك لعنبو بيه

الموضوع الأصلي : ديوان الشاعرة الراسية || الكاتب : همس الشوق || المصدر : شبكة همس الشوق

13 - 4 - 2025, 11:06 AM

لفتة الأعناق

الا ياللي تحسبني ورى الشهره ابي انساق
انا ما انسقت للشهره ولا شهرتك تغويني

انا حواء وساقتني على تفاحتك الأشواق
ونا ديتك تطعمها غريتك وانت تغريني

خرجنا للسعير وحتت غصون القصيد اوراق
ثمرها جمرة بثت رماد الذاكره فيني

لبست من الورق ثوبا يعزز رغبة المشتاق
يداري ما يداري من ثمره ان صح تخميني

سترنا ما فضحنا وكل ستر يغوي الخفاق
تثنينا على عود ثنيته وانثنى ليني

انا ما غرني حب الظهور ولفتة الأعناق
ولكن غرني وقت طموحه ما يساويني

غرور الشعر ماهمن ولاهميت له بعتاق
ولا همتني الشهره وقلب مايداريني

حلفت اني ما ازيد اليوم واحد واخلف العشاق
حلفت ان فاتني ركبه لامول ليل ياعيني

حلفت ان الهوى كذب فعين الراسيه ما لاق
حلفت وما حلفت اني اخالف صدق تكويني

حلفت ان الشعر فيني مثل قطعة جليد وراق
حلفت اني حويت الصدق في شعري ويحويني

حلفت اني مع عمري اعيش فلحظتين اسباق
حلفت ان ما سبقت العمر لأدفن وانت تبكيني

امانه خلني والروح اطوق ظهرها بعناق
امانه خلني احيا وعبد الحب يرثيني

انا ماودي الشهره واكره ضيها البراق
واذا منك بغيت الجد ترى شهرتك تكفيني

13 - 4 - 2025, 11:13 AM

التحدي

يمين الله يمين الله لأعلمك التحدي كيف
واعلمك القصيد شلون يخضع لي وانا بنيه

واعلمك السما وشلون تمطر والليالي صيف
واعلمك المذاهب الأربعه وتبيت النيه

انا بقولها لك جد ترى ما ينفعك ياحيف
واذا انك "انس" ياعمي تراني ساس جنيه

انا ما ارد لك شوري وشوري مثل حد السيف
اليا منه بتر يبتر بوقت السلم والهيه

يقولون السما زرقا وانا اقول البحر والسيف
بهم نفس الزراق اللي نشوفه بالسما زيه

يقولون الفضا واسع وانا اقول المدى ما شيف
اجل وشلون لا شافو فضاهم للمدى فيه

مداي اكبر من وجيه بها كذب ونفاق وزيف
وصداي ارحب من نفوس الرجال وكل نشميه

امد الكف واراهن واعرف صيغة التعريف
مدام ان الوجيه السود والكفين مقريه

وضوحي مثل عين الشمس ما يحتاج للتوصيف
واعرف ان الجهامه عن وجيه القوم مطويه

ترى هذا قصيدي جاك بلا غش ولاتحريف
واذا منك لمست سهيل تعال وصافح يديه

13 - 4 - 2025, 11:21 AM

أمي بعد المرض

اماه من ضيم المرض لا تونين
يون قلبي من ونينك ويرتاع

يكفخ بصدري خافقي يوم تشكين
كفخة طويرٍ فالسما فرخها ضاع

اماه دمي ناشفٍ فالشرايين
ليت المرض فيني واسليك الأوجاع

اسهر وكل الخلق ياماه ممسين
اصطفقت نجوم السما في ثرى القاع

يالعنبو حمى تخليك تبكين
ويالعنبو حظٍ من البين مطواع

افداك انا بالروح ذالحين ذالحين
واحط قلبي تحت رجليك وانصاع

13 - 4 - 2025, 11:29 AM

كذا والا كذا ترسي السفينه

قبل اودي صاحبي في الف سكة وانتفاضه
ودي اسأل من سرى بالليل لأطراف المدينه

منهو اللي كل ما غردت يبدي لي امتعاضه
منهو اللي كل ما صفقت يصفقني بعينه

منهو اللي لا صدع صوتي يبالغ فأنتهاضه
منهو اللي يوم وقف وقف بحلق الضغينه

منهو اللي هاضته دنياي والا الشعر هاضه
منهو اللي زعزعه صمت الشفاه من السكينه

منهو اللي فالشدايد ماتحدث عن بياضه
منهو اللي يعرف الفزعه ولا ندى جبينه

ليه اخاف الموت والموت الحمر حنا حياضه
نارد حياض المنايا والعدو نبتر يمينه

صاحبي ياصاحبي بالله وش هذي الفضاضه
علم الجاهل كذا والاكذا ترسي السفينه

علم اللي كل مافيهم من الدنيا استعاضه
علم اللي يذبحون الصدق ماسمعوا ونينه

علم اللي لاهرج ماغير يبدي لي اعتراضه
والله ان يبطي ويبطي لين يصبح لي رهينه

13 - 4 - 2025, 12:35 PM

بيت الشعر

بيت الشعر عنك مانوّيت بالتوبه
ولانويت أبتعد عن حمر الأطعاسي

أستهوي الضو بوجه البيت مشبوبه
وأستهوي البن يحمس وسط محماسي

وأشفق لشوف الغضى يبسٍ ومحطوبه
وشوف الدلال الصفر يبري تعوماسي

وأفرح بقرم(ن)يكر النار في ثوبه
وريحة غضاها يرد الروح لأنفاسي

وأسعد بشوف الحلال وحزة غروبه
الى ضوت للعشا تقرع بالأجراسي

والبل تبغي العشا ترغي ومشعوبه
والراعي اللي مع الحيران محتاسي

يازين شوفة نجوم الليل مصحوبه
مع بدرها اللي ينور عتم الأعماسي

ينعش فؤادي نسيم البر وهبوبه
وريح الخزامى الياهبت بنسناسي

والمهره اللي عسفها العود بسلوبه
من دون سرجٍ ركبها عالي الساسي

وشيهانةٍ للقنص تطلع ومطلوبه
تطلع بعيد وغلاها ماله قياسي

بنت البدو شيخة فطنه ورعبوبه
تعوذ من كل شيطانٍ وخناسي

الى لفا الضيف مثل البرق لهلوبه
سيفٍ تصاقل فملعب كل الأجناسي

ماعمرها جات مخزومه ومغلوبه
غندورةٍ والعقل أنفوذه سياسي

مرغوبةٍ حيل ايوالله مرغوبه
من مجلسٍ النشامى فيه جلاسي

يا نار أكلي حطب ماعندنا توبه
حنا بدو دايمٍ نمسي فالأطعاسي

13 - 4 - 2025, 12:38 PM

اشرب من البحر هذي زبدة أخباري

الوعد باكر اليامن هزك الطاري
وترياقك المر مره من معاليقه

الوعد باكر وحانت لحظة ابحاري
الله يعوض خفوق قل توفيقه

اشرب من البحر هذي زبدة اخباري
ولي مع الليل لاخان بمواثيقه

لاغرك الصبح ليل البارحه عاري
والغيم الابيض زمانن مابلع ريقه

اعكف على الشعر ردد جملة اشعاري
وصل نذرته حرام حل تفريقه

يطول فيك المدى ماتلحق اعذاري
الله خلقنا ويفرق في مخاليقه

ودعتك الله بعينن رمشها ساري
الحر لامن كفخ ماسبقه يعيقه

يامضرم النار منت الصادق الضاري
ودعتك الله بقلب ماهوى الضيقه

الفارس اللي لفاني بيح اسراري
اموت واظمأ لشوف الجمره تريقه

اموت لاذاب ثلجه من لظى ناري
بدرا لمع بالظلام وحل توثيقه

الوعد باكر يجيبك صوت جهاري
لاغرب القرب صوتك عز تشريقه

الوعد باكر وباكر مالكم طاري
وترياقي العذب عذبات معاليقه

13 - 4 - 2025, 12:54 PM

الخطا وارد وكلٍ فيه حقه

الخطا وارد وكلٍ فيه حقه
وانت قلبٍ كل نبضاته خطايا

استحق الود ولا ما استحقه
ذا نصيبي منك ياراعي الهدايا

انت يالي تهدي الثوب وتشقه
ما تخاف الله وضلوعي عرايا

كل جرحٍ منك دقه فوق دقه
دقة جروحك مثل وشم الصبايا

البلا اني شفت في الدنيا مشقه
والشقا غيثٍ مغاتره روايا

اذكر اني قلت هاك الما وبقه
واثرني سقت المطيه والعطايا

حسبي الله كيف خفاقي تعقه
تنثر الما كن ما حولك ظمايا

قوم وق القلب ولا قم توقه
ياموردني عى حوض المنايا

يارفيق الدرب قلبي ضاع حقه
وانت ما تبغي مشاريه ووصايا

ذا قراري وانت لو تسمح تلقه
ما بقى للحب في قلبي بقايا

13 - 4 - 2025, 12:57 PM

العالم الثاني

بنفيك من عالمي للعالم الثاني
وأياك تمشي على الجره وتتبعها

في ذمتي ماربح منهو تحداني
والشرهه اللي تجي من دارك اقطعها

نذرٍ علي ّ ما اصافح كف عدواني
كفٍ تهين البنادم ما أطاوعها

عزيت نفسي وعمر أبليس ما أغواني
والحمد لله احشم النفس وأرفعها

بعض الحكي ماتمره طبلة اذاني
أعز أذني عن الزله ولا أسمعها

حتيش لاصرت يا أبن الناس قوماني
ياجعل عينٍ بكت تبكي مدامعها

عشرين عامٍ ترى ما احتجت لأخواني
ياجعل (نجلاء) على الفردوس مرجعها

الطيب ورثي وطيبي طيب جداني
أن أثمر الطيب والا باتجرعها

أصلي عن الناس يابن الناس اغناني
وسود الليالي تراها تمر ما أسرعها

وان مر بي غاليٍ والا تعداني
أضحك وأقول النفوس السود مقلعها

وان غابت الشمس ما تشرق علشاني
وان أشرقت في غيابك قلت ما اروعها

وان سقت ذودي على دارك ووداني
قسمت باللي خلقها اني لاودعها

ولو أن كل الأوادم (تيك) تجفاني
وانا على حق ذا من طيب منبعها

من جد أبنفيك رح للعالم الثاني
واياك تمشي على الجره وتتبعها

في ذمتي ماربح منهو تحداني
والشرهه اللي تجي من مالك أقطعها

13 - 4 - 2025, 01:02 PM

تعود الزلات

حت الغلا وأستنزف القلب تصريح
ذابت معاليق الغلا والغلا ساح

تعودوا الهفات قومٍ مجاريح
تعودوا الزلات من كل جراح

ياطير ياللي عذبتك الملاويح
والجو شعف وبرق وأمطار ورياح

ياطير بشر من يريد التفاريح
انك علي أبعد من الصين لرماح

ياطير وش حد العيون الذوابيح
تبكي خبر موت الشهامه ب صياح

يوم الظمأ يسقي عيون التماسيح
أبتلت أرياق العذارى ل مزاح

ويوم الوله له في حناياي تلويح
صار الهجر مابين مضوى ومسراح

لاغرتك دنيا الفرح والتمازيح
فالقلب كنه بين أصابعك مسباح

ياورد صار الشرب منك شلافيح
ياعزتي للهيل والبن لافاح

يومه ورد داري أركابٍ مشاويح
أسقيتها لين الظمأ منها أنزاح

حنا نصون أهل الوجيه المفاليح
ومن صاننا لو عاند الوقت ماطاح

نسرح اللي بايع الحب تسريح
عندي الكرامه رفرفت مثل الأرواح

راح الغلا يكفيك ياطير تلميح
أرخصت نفسك والعوض فيك وضاح

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه لموضوع: ديوان الشاعرة الراسية لموضوع: ديوان الشاعرة الراسية
الموضوع	كاتب الموضوع	المنتدى	مشاركات	آخر مشاركة
الشاعرة حوراء الهميلي	همسه الشوق	همس دواوين الشعراء	14	15 - 1 - 2025 04:24 PM
الشاعرة سكينة الشريف	همسه الشوق	همس دواوين الشعراء	28	15 - 1 - 2025 04:22 PM
الشاعرة والاديبة الفلسطينية مي زيادة	ناطق العبيدي	همس شخصيات لها بصمة في التاريخ	2	21 - 12 - 2024 07:01 PM
الشاعرة حكاية رق قصيدة ياعونة الله داء علي البريكي	استثنائيه	همس الشعر و الشيلات الصوتيه	8	25 - 8 - 2013 03:53 PM
الشاعرة قمر الجاسم والشاعر عبدالرحمن الشمري	وتين الورد	همس الشعر و الشيلات الصوتيه	9	13 - 8 - 2012 10:13 PM

طلبات الإشراف
	إذا كنت قادراً على الإشراف في شبكة همس الشوق شريطة ان تكون مشاركاتك من فوق [ 5000 مواضيع وردود ]

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع