تدري وش اكبر جرح منك اخذته كلمه احبك قلتها وانت كذاب - الصفحة 125

9 - 12 - 2012, 12:15 AM

الليل هم وحزمة جروح وأوراق

وأنا أتناثر ب آخر الليل وأبقى

ما غير أولع كل تناهيد الأشواق

واللي بقى من الشوق دمعات حرقى

ما أقول ضاق الصدر لكن إذا ضاق

تنكسر ضلوعي على الروح وأشقى

وحدي وعيوني تمتلي وجيه وفراق

كان البكا فرقى ورى دموع فرقى

يا طيب! تاخذني على الناس بعناق

والحين أنا وياك والحزن نبقى

معقول ما مروا على بحر الأحداق

ولا شافوا دموعي من الشوق غرقى!

هذا انا من الليل واقف ومشتاق

وهذي كفوفي من الوله دوم عرقى

من ليل وإشراق الى ليل وإشراق

وارجع..أعيد حكاية الليل وأرقى

وأرقى انتظر بالليل نجمي إذا فاق

وأصاحبه حتى السما تصير زرقا

وأبقى وحيد ولا معي غير الأوراق

اكتب جروحي وسط الأوراق وأبقى

9 - 12 - 2012, 12:15 AM

حزين ومورقه عيوني دموع من على الاهداب
يهزهزني الجفا وتطيح دموعي من أخراهدابي

ذبل عمري ولا مرو على هذا العمر غياب
وتتساقط عيون اللي رحلو في داخل كتابي

مسكت اللي قدرت اكتب تفاصيله في وسط كتاب
مثل شوق المطر لما يعانق وحشة ترابي

اشم الدمع من ليل المواجع والسنين اعتاب
وعرفت ان الحنين الريح وجابت ريحة احبابي

وانا لا مرني لو هو عطر من ريحة الأحباب
ابتسمت وكل مافيني يطمن رعشة اصوابي

انا المطفي تحت سقف الحياه ووحشة الابواب
مادام ان الوله علق عيوني من على ابوابي

يجون وأكثري يشعل أمل من جمرة الاعصاب
يجون ولا لقيت الا الأمل معطوب بأعصابي

وجوني اغراب وراحو مثل ماجوني بعد اغراب
ارحلو من قبل لايطفي العطر بكفوف ترحابي

غريب الوقت او الناس الغريبه بكلمة الاحباب
اشوف الدمع فيهم مثل ماشفته على اهدابي

9 - 12 - 2012, 12:16 AM

على هذا الشطر امشي واوازن عمري بالاحساس
يهزون الشطر حتى يطيح العمر واحساسه

وأناأمشي فوق جمرات الليالي وحملي الوسواس
أضل واهتدي أحيان من بالي ووسواسه

فتحت الريح كم مره وانا واقف على القرطاس
ركلت الحبر من شفت الصديق يفح خناسه

سكبت الخطوه في ضحك الزوايا المورقه من الناس
الين اشذرت في عمر الطريق وقلب جلاسه

9 - 12 - 2012, 12:18 AM

انا من بين كفينك شعور يشبه الشعره
اقولك شي ترى فدوه حياتي لو قطعتيني

اخذت من الصبر لا لا اخذ مني الصبر صبره
مدام بغيبتك محد يجي مثلك ويحييني

تعالي يابعد روح الشعور ويابعد عمره
انا البارح لهذا اليوم ابد ماغمضت عيني

تنفستك شعور وفاح من صدر الغلا عطره
تنهدتك وشفت الضيق يتنهد عناويني

يضيق الكون بعيوني واشوف الكون ثقب ابره
واشوف الموت ياعمري مابين عيونك وبيني

كتبتك شوق من شفت الفراق بعمري ياكبره
مو مثل اللي يقول لاانتي ولا غيرك تذليني

مو انتي العز ولو ما انتي اقول انتي ترى وكره
اصيله والاصيله ماخلق الله توطيني

واذا ردت على العز الكريم ودورو صقره
انا ليه احلف وانتي تشوفينه بجناحيني

احبك ينثني هذا الكلام ويرتفع قدره
احبك يرتعش هذا النجم يتشكل بطيني

احبك نور في هذا المسى واقعد على بحره
احبك لاتخلين الفراق امواجه تمحيني

يالله وانتي بعيون المسى بهذا المسى قمره
قريبه حيل في اسود عيوني انتي تضميني

وبعض احيان تكوني داخل ظلوع الغلا جمره
وكل هذا الوله ماهب من عيونك حرقتيني

وبعض احيان تكوني داخل اشواق العمر زهره
عشان الزهره لو بتموت تموت وعطرها فيني

بغيت اقول شي لكن او انسي بس على فكره
هي الحريه اني اختار قيدك وادخل يديني

وانا اخترتك وخليني وسط كفينك الشعره
اقولك شي ترى فدوه حياتي لو قطعتيني

9 - 12 - 2012, 12:18 AM

بعد لك وجه تجيني بعد ماذوقتني امرارك
ياعمي طير خلاص انسى ولاتفكر تطق بابي

اخاف بس صج تموت فيني اقول الا انت شخبارك
اقول فارق واخذ كذبة تموت فيني وتحيابي

طفى ضو المحبه وأنطفى في عمري مشوارك
وعرفت اقسى الطعون اللي تجي من خنجر اقرابي

خلاص الحين بس الحين عرفت شلون امطارك
تصب هناك لكل الناس وتنسى تروي ترابي

تعال وشوف برواز العيون وفيه انظارك
هو التذكار مدام انت النظر وتجمل اهدابي

اشوف بس أخذ الاشواك وغيري ياخذ ازهارك
ياطيبي كنت احسب الجرح منك حيل يزهابي

من اول تنشغل فيني وفيني تشغل افكارك
واشوف الحين ماتقدر تطيق تشوف ترحابي

عمت عين الظما ان كان الظما يترجى انهارك
وعمت عين الهوى ان كان الهوى بيشتت اعصابي

تخاف القلب لا اظلم غلاه يموت بأنوارك
أبد لاتخا ف متعود على طعنات أحبابي

مو مية نار تحرقني بقت هي بس على نارك
ابشرك مابقى اي شي تحرقه كفو اصحابي

تجيني ويعني وبعدين شسوي يعني لأعذارك
تصوبني وترضي كل غرورك من ورى صوابي

اقول اسكت ولا تكثر ترى مليت تكرارك
طلبتك لين ماجفت عيوني من ورى اعتابي

توكل ما بقى لك شي في عمري كود تذكارك
أو اسمع حتى تذكارك كسرته داخل أهدابي

9 - 12 - 2012, 12:18 AM

هدير الماء.. انا.. طيب علامك يالورق ظميان
ابي ترمي القلم وسط الصور وتبلل الحاني

انا ادري وجه كل هذي الصور ياصاحبي ذبلان
ولكن تلقى من باقي ملامحهم ورى اشجاني

تقضب في حبل هذا الغلا ولاتقطع الخلان
وحتى لو نسو صوت الحزن من رنة أوزاني

وزفير لانفثني رحت أولع صوتي البردان
وصور ووجيه من نار وجمر..فى داخل اجفاني

هنا بنت تبللهاالاغاني وتلبس الالحان
وهنا كنت ارقى من فم الدعاوي فوق شيطاني

وهنا لامرت الذكرى وسط بالي على جنحان
ادورني وسط عمري ولا القى فيني اغصاني

وهنا عشق يغنيني ويفرد للمسى أغصان
اجي طاير على هذا الغناء يكسر لي جنحاني!!

وهنا ام محاجرها أتشرب من فضا القرأن
قلبت عيوني بعيون العجوز وشفت قرأني

خليط القمح والماء السرابي من ورى الاجفان
أنا هذا الأنا ولا معايا واحد ثاني

اجوع وينكسر وجه الاماني واشبع الاشجان
ظما وهذا النهر يجري ويروي اطراف شرياني

اشوف بداخلي طلسم معاني وتمتة شيطان
وعلى الاوراق من امشي اكون بهيئة ايماني

انا من مر من فوق السراط المستقيم الأن
وبعد نشوة حبر تحت الشتايم روح تلقاني

أكون احيان في قلبي وفي عقلي بعض احيان
ولا ادري من يوديني ويوقفني على لساني

انا المفقود من عين السؤال شلون حال فلان
اغط عمري وسط ليل الحسافه بأه والقاني

اقول الدان تتهشم ضلوعي دان ليله دان
وغيري في ألم ليله يصبح من على داني

كتبتك ياتعب عمري ودور لك على انسان
يقط برده ويرميني في وسط البرد وحداني

9 - 12 - 2012, 12:19 AM

الشتاء فصله يجي بعد الفراق
والحزن غيماته في جبد الوله

الرعد قلت الرعد هذا اشتياق
يضرب عيوني وتدمع مرحله

ليه راحو ليه جوني في نفاق
تقفي وجيه وجيه مقبله

صرت انا خارج مداهيل النطاق
ماسوى قلبي بيد يني احمله

رغم وسع الكون اشعر باختناق
كل وجه في ضلوعي اسعله

ليه كل شخص يسفرني بعناق
القى جرحي بالورق من منجله

شي يطاق وشي والله مايطاق
مهزله في مهزله في مهزله

طعم واحد في حياتك له مذاق
أسئله في اسئله في اسئله

الشتاء بقلبي يجي بعد الفراق
ليت في قلبي حديهم وأشعله

9 - 12 - 2012, 12:19 AM

تجيني طيف ياعمري على جنحان شوقي لك
أخاف أرمش من عيوني وأبعثر صورة وصالك

حبيبي لاتجيني قول .وين أنت..وأنا أجيلك
أبيك تقول..وين أنت وعلى عيوني أنا اسعالك

وربي فوق روس الشوك لخلي القلب يمشيلك
واخلي ظلالي يسبقني قبل يحضني منزالك

ثواني بس أبي اتهندم من عيونك وباهديلك
في عينك ضحكة حتي تكحل عين عذالك

يقولو الناس بغيابي تشب القلب ويضويلك
حنيني ومن وهج شوقه يميل القلب لامالك

قضى دمعي من عيوني أبي من عينك ابكيلك
ابنثر من ورى عيوني دموع عيون ترحالك

تعبت اهرب من الأشيا البسيطه من تفاصيلك
تعبت اسأل زوايا البيت عن اول واخر أحوالك

وحتى الشوق من صبح الدرايش قام يهديلك
عصافير الرضا ترفرف على بيبان مدخالك

هنا ترمي صباح الخير قبل لا تروح وأدعيلك
وهنا تضوي مساء الخير في عيني من هلالك

انا من الليل يقطفني شعوري لك واغنيلك
أنا من الصبح يليلني الحزن من لون موالك

حرام الليل ماهو ليل اذا ماكنت في ليلك
وحرام الصبح ماهو صبح اذا ما كنت بظلالك

تروح وقلت احط روحي على كفي واناديلك
نزعت العمر من شفت الغلا بالروح نادالك

بربك قول و ش سوى الفراق بوجه منديلك
تسيل الوان طيفي فيه الا من البكا سالك

حبيبي لايبكيك الفراق ولا يهد حيلك
أخاف الدمع من عينك يجفف صورتي فبالك

تعال احتاج اسولفلك عن الايام و أشكيلك
وافض غيم الحزن و انثر حنين الشوق بأقبالك

تعال وحط في قلبي هموم الفرقا وأشيلك
لأن القلب ماهو قلب اذا في نبضه ماشالك

وقف دمعي من عيوني ابي من عينك ابكيلك
أخاف ابكي على طيفك وأبعثر صورة وصالك

9 - 12 - 2012, 12:19 AM

فراق وكان له صوت يهز ويفتق المستور
يمر بين الحنايا ويجرح عروقي في زلزاله

انا المشطور في نصفي هنا وهناك بعد مشطور
وتحت هذا الركام اللي بقى هو قلب ب لحاله

انا كنت اكثرك كنتي اكثري يااكثري المهجور
وتتهاوى ضلوعي من صفير اليل وأغلاله

ورحتي والحزن يطحن تفاصيل الصور ويدور
ولكن مادرو مزن الصور في بالي هماله

يابنت اللا مدام أن النعم هي كلمة المجبور
قوليها والبحر يكسر شموخه من على جاله

الا ياليت هم يدرون عمر كل الحياه شعور
وان الحب بالعاشق تكون البصمه في باله

يحسبون الغلا قتل وجنازات المحبه سطور
مع أن الحب لو تقتل وصوله يزيد بأوصاله

أحبك والمدى أقرب من عيوني على العصفور
أحبك والجدار اللي أحتوانا طول ظلاله

أحبك ينتفض هذا المسى من أول يدين النور
احبك جوع يطفي حياتي ويشبع اشعاله

مثل حكي الندى لما يعانق بالحنين زهور
في قلبي شفت قطرات الوله في عين مواله

أنا قلت الفراق أطهر تراب داخل الديجور
وقلت أهدي من عيون الضوى دمعات ل هلاله

ونبت في داخل عيون المسى ضو من الممطور
وعرفت أن الوداع أزهر في قلبي قمرة أرحاله

9 - 12 - 2012, 12:20 AM

بنادق مهجتي معبى فشقها والغلا نيشان
ابطلق روحي في قلب القصيدوانبض ابياته

ابذبح حزني من اقصى الشعور لأول الاخوان
وأسيل عمره وتشرب عيون العمر دمعاته

وحيد ولامعي الا اخويه بداخلي غفيان
ترفرف ضحكته واطلق نعاسي لصبح ضحكاته

في بالي يرقد وأدري حزين وشارد وبردان
وانا انثر برده من فوق الخيال وجمر سجاته

ينام واعقد بعين الاغاني جمرة التحنان
ينام واعقد بعين البدايه كل نهاياته

يدور القلب تتفتت ظلوعه يطحنه حرمان
يجوع القلب يحضني في جوعي واكل فتاته

واطل من الألم احضن حياة الشارع الولهان
يلملم حسرتي ويكسر وجودي بشوق أضاءاته

ياخي اقعد الدنيا رمت من تحتي النيران
وهذا العمر مايحمل بجوفي الا انكساراته

تعبت امليني طعون تصب من خنجر الخلان
تعبت استنزف عيوني دموع لعين طعناته

ياخي ليه تغيب وليه تتركني واناشفقان
لقرم يقلب جبال الهموم بعزة ثباته

أعرفه لاوصل كنه صقر من صفوة الويلان
يكش جلد السما ان شافت مخاليبه وهداته

رجال تربط حزام القبيله وتنفلت شجعان
واخويه يربط رجال القبيله حزام هقواته

كريم ماهو من يبني فعايل صيته الديوان
في صدره دلته وهيلهوفناجيله وتمراته

اذا كان الكرم حمس الهلا في مهجة الضيفان
اخويه من حمس قلبه لضيفه وصب فزعاته

وكم تكفى انرمت بين البشر ممزوعة الوجدان
اخويه قبل لاترمى عليه يقط نخواته

حزين السيف بكفوف الاوادم طافي ذبلان
بعد مانام دم اللي سقى فعله وومضاته

ياخي اقعد وقعد خضوعي بداخل الشريان
تنام ولابقى هم قطف من دمي غفواته

غريبه شلون يكسرك الغياب ويغلبك نسيان
ودفتر جيتك ياخي طوى من عمري صفحاته

يجيني مدري ولكن اعرفه لاوصل جيعان
قسم وان جاني لاانحرني لجوعه تحت خطواته

وصل زوله هذاك اللي وصل مايشبهه انسان
هذاك اللي وصل شايل عذاب العمر واهاته

وجيت الحين ياخيي بعد ماشالتك امتان
بعد ماودهم غسل الجسد عن كل نزواته

ابد لاينغسل هذا الشهم مغسول بالفرسان
أخويه من غسل روح الجسد في طهر نياته

أيا دفان دخيل الله لاتدفن ايا دفان
دخيلك خلني أدفن في بالي جمر بسماته

وأهف بسماته من هذا المكان لأخر الأحزان
وأنا اطحن موته في جوع الكلام واخبز سكاته

أنام شلون لاصار الاخو جايع وانا شبعان
اخوي اللي كسر قلبه لجوعي وجاع لحظاته

اخوي اللي يمزمزني معاليقه اذا عطشان
اخوي اللي ثنى عمره من اجل اطلع مسافاته

يدين القبر ضميني وسط حضن الاخو نعسان
ابرقد دام لي قلب دفن وياه نبضاته

اكيد انه وسط قبره سمع طق الخطاوي الان
الا ياليت انا المدفون وانا اسمع طق خطواته

المواضيع المتشابهه لموضوع: تدري وش اكبر جرح منك اخذته كلمه احبك قلتها وانت كذاب لموضوع: تدري وش اكبر جرح منك اخذته كلمه احبك قلتها وانت كذاب
الموضوع	كاتب الموضوع	المنتدى	مشاركات	آخر مشاركة
احبك ايه احبك اوتدري انا كذاب	صمتي شموخ	همس الشعر والقوافي	4	11 - 3 - 2019 05:31 AM
مادام احبك قلتها وانت كذاب	همس الشوق	همس الشعر والقوافي	2	25 - 4 - 2017 04:05 PM
احبك كلمه قلتها وان كانها تكفيك	ياقلبي اكتفيت	همس الشعر والقوافي	4	17 - 6 - 2015 03:14 PM
اول كلمه قلتها اول ماصحيت من النوم	تكفون نسوني غلاها	همس للالعاب و التسالي	6	21 - 10 - 2014 06:56 PM
احبك وانت زعلان واحبك وانت راضي	اخفي غلاك	همس عالم ادم ازياء الرجل عالم الرجل العصري	10	10 - 1 - 2012 04:59 PM

الذين يشاهدون محتوى الموضوع الآن : 33 ( الأعضاء 0 والزوار 33)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع