تدري وش اكبر جرح منك اخذته كلمه احبك قلتها وانت كذاب - الصفحة 127

9 - 12 - 2012, 12:24 AM

وشبابيك البلد ماتت
وفيها أطفال حارتنا
على الشباك ذبلانين ..
منسيين
ونتكسر
وتتكسر أغانينا ،أمانينا ،خطاوينا
وحكاية جدتي عن أرض
نزلها الموت
وكان الصاعد فينا
ونتكسر
مثل مافينا تتكسر
بلاد ومدرسه وتاريخ
وأماني معلقه بسور المدارس
بعثرتها الريح
مثل ما أمي تحطبها اليهود
بكلمة أستيطان
أنا أمي مثبته بالأرض
قويه جذور عزتها
أنا أمي خضرااا
وطويله
مثل أشعار أمتها

9 - 12 - 2012, 12:25 AM

هذا القلم حبره من قلـوب الاحبـاب
وشلون مايكتب من الطيـب للطيـب

انتـم تصبـون المحبـه بـالاهـداب
وطشيت انا دمعـي بعيـن المكاتيـب

وشلون ادور من ورى شعري القاب
وانتـم تشبـون المحبـه تراحـيـب

قلت القلم وان طاب منكـم اذا طـاب
وانا علي اسمو بجنابه عـن العيـب

مدام هذا الطيب انتـم لـه اصحـاب
ودايـم تمـدون الهـلا والمواجيـب

أنا عرفت ضيوفكم لـو هـم اجنـاب
من طيبكم صـارو عليكـم معازيـب

اهلي واشوف الارض تنبت بالاعشاب
اهلي واشوف العز منهم هو يطيـب

مشوار شعري لو تجي فيه الانشـاب
اطحن ظلـوع انشابهـم بالمخاليـب

المجد حطيتـه علـى راس مرقـاب
رغم انهم يخفـون عنـي المراقيـب

وان رددو ان الشعـر فيـه انـيـابانياب
هم من فعـل شعـري معاطيـب

تجمعو يبغون راسـي بـلا اسبـاب
وانا اغنـي للوطـن يومـه صويـب

تجمعو في وصف تلعـات الارقـاب
وانا في وصف الام عنـدي اساليـب

وان كانهم فوق المنابـر هـم ذيـاب
شفني على المنبر انا بروحي الذيـب

جنبت انااسفاف الشعر لأجل الاشناب
وقلت احشم المعنى من اجل الرعابيب

مدام اجي واحسب لكم ميـة حسـاب
والله مايلحـق قصيـدي عـذاريـب

الشعر له فعـل وتواريـخ وانسـاب
يصيب هقوات السنافـي ولا يخيـب

وهذا الشعر ادري له حضور وغياب
وبقلوبكم مثلي حضر لو هـو يغيـب

ودام القلم حبره من قلوب الاحبـاب
لابد انا اسمو في جنابه عـن العيـب

9 - 12 - 2012, 12:25 AM

غريب تبيعني وقلبـي فـداك بنبضـه وعمـره
وتتركني بشموس الويل وتاخـذ منـي ظلالـي

افا ماكنت احسب انك تخـون الملـح والعشـره
ولا فكرت يجيني يـوم وتتركنـي انـا لحالـي

تروح وتترك بقلبي طعـون الوقـت والحسـره
واداري جرحي عن عين الشماته وعين عذالـي

عطيتك من حلا ايامي وشربت من الوصل مـره
عشان اليا لفـت سـود اليالـي توقـف قبالـي

عطيتك حب في شريـان قلبـك صافـي نهـره
ولا بين في عينك يا ضعيـف النفـس والحالـي

نعم بغيابك اتشكـل مـن الاوهـام الـى جمـره
واحرق اللي بقى فينـي مـن الاحـلام وامالـي

هنا بحرق من اوراقي وهم مستقبلـي وقصـره
واحرق طيوفك بزفرة اسف مـن نـار موالـي

خلص كل الوفى بهالوقت ما فـي وافـي سـره
حبيب يبيع كل عمـره عشـان يعيـش للغالـي

وش اللي يجني هالطيب في هذا الوقت من صبره
ماغير الشوك وجروح اليـال وضيـم غربالـي

بوقف قلبـي روح العـب بعيـد وانقلـع بـره
اقص الراس لو مثلك يمر لو مـره فـي بالـي

بوقفني واقـول انهـا ضريبـة وافـي قـدره
بذرة الصدق ولا اتحسف على نكـران الانذالـي

نعم مجروح ولكن ما يطيح القلـب مـن كبـره
مثل ما اخطيت انا بحالي بوقفنـي انـا لحالـي

9 - 12 - 2012, 12:25 AM

شفت ابيض عيونك من الحب يبرق
في اسود عيونك وتشطرني ليليـن

الاسـود يعانـق بياضـك وتفـرق
عن يومنا وعيونك تصيـر يوميـن

مغيب عينك يرتمي بحضن مشـرق
هذا لانك كـون جمعـت الاثنيـن

طالبك تدخل وسط ليلـي وتحـرق
كل الظلام وعلق بعمـري فجريـن

ينام صبح في جفونـك ويشـرق
بعيونك الثنتيـن احلـى صباحيـن

وانا اذا جيتك اجي بليـل ابسـرق
من محجر عيونك قصيد ونهاريـن

حا/ءك تسافر بي الى الباء/ واشرق
حب/ واطل للناس منك في شمسين

9 - 12 - 2012, 12:26 AM

لعملك والزمان اللي رمانـي لـك يعلمنـي
اعز النفس وبصبر الشموخ بدمـي ارويهـا

حسبتك من جروح الوقت والايـام ترفعنـي
وتحط روحي على كفيك في عز وتداريهـا

حسبتك راس اكيد الراس للامجاد ياخذنـي
ولا فكرت مثلك للوطـى عيونـه يمشيهـا

تبي ذلي تهبى لاانت ولا هالوقـت يذللنـي
عيونك للوطى وعيني على القمرا اضريهـا

صحيح الشوق لأرواق الرصيف المر يدفعني
وتفاصيل الحنين هناك فـي بالـي اناديهـا

ولكن توصل لنشـوة غـرورك ماتقدرنـي
تحسب اني ارد باشواق عمري لك واهديهـا

غريبه كنت احسب انك مع الايـام تعرفنـي
مع انك تدري اني لابغيت اعميها(ن) اعميها

صحيح احساسي ضيعني وطيبي حيل بهذلني
ومعك لا ينفع الاحساس والطيبـه ومعانيهـا

واذا في يوم اشواقي تبي عنـدك توصلنـي
ومن كفوف الوله تاخذ يدينـي لـك توديهـا

يمين الله ولا لك غيـر يميـن الله تحلفنـي
اذا نفسـي توصلنـي لمثلـك والله لأفنيهـا

9 - 12 - 2012, 12:26 AM

تعال ارسم بقايا الحلم وكمل باقـي الصـوره
وعلقها على قلـب يشوفـك حلـم يهنـى بـه

وعلي اترك سواد الوقت والويلات وكسـوره
وتعال بشوفي واتغطى عن أية ريـح بأهدابـه

لشيلك عن ظلام خذ شعاعي واهتنـي بنـوره
واذا بك جرح حي الله راعي الجرح ومن جابه

همومك هاتها فينـي احبـك يعنـي مقـدوره
احبك تنمحي همومك ولا لك هـم تشقـى بـه

انا لك من هنا حتى مغيـب العمـر وزهـوره
الى مشرق مشيب العمر ليـن يغيـب بترابـه

نويت اخذك واعطيك الخفوق وباقي شعـوره
حلالك دمر وعمر حبيبـي انـت اولـى بـه

تظلل بالحنان ولك غيـوم الشـوق ممطـوره
ولا تفكر بأي لحظـه يمسـك قلبـي بعتابـه

واذا عاتب انا احشه حبيبي لك مـن جـذوره
واحبك فيك من قلبك هو اطهر قلب اسمى بـه

حبيبي بس تعال ارسم وكمل باقـي الصـوره
وعلي الباقي لاتحاتي جروح الوقـت وانيابـه

9 - 12 - 2012, 12:26 AM

ذبحني الحب وكم شخص ذبحه الحب ولى وراح
وكم قلب يعيش بحـب ولكـن بالهـوى مذبـوح

اذا هاليل يجي عندك وياخذ من شعـرك وشـاح
اكيد القمرى لاشافت حضورك تختفـي وتـروح

قمر قلبك مـن عيونـك تمـده للفضـا وان راح
يفل النجم وانت تفل كل ضوك وسـط هالـروح

تمر ارض القصيد بكل عطر تتبختـر ومرتـاح
بعدها كل سطر وده يضمك بس عشـان يفـوح

اذا ترضى ااكون افراح اذا تزعل اكون اتـراح
نعم اتقاسمك بيـن ابتسامـات الهـوى والنـوح

انا سلمتك القلـب النقـي وفـي يـدك مفتـاح
تعال ادخل وسط بيتك وعمر بالحنايـا صـروح

رضا عمري اذا تزعل اشوح العمر لك ملـواح
ولك كلمة تعال ولاتجي في صوتي كلمـة روح

فديتك لاتحاتـي لـو تجينـي منـك أي جـراح
ابيها لجل اوصلك واغنـي لخاطـرك مسمـوح

انت بزينك بطولك فـي شكلـك سيـدي ذبـاح
ياعم أجرح ولا تقصر وحط جروح فوق جروح

يهون الجرح لا صارت رموشك كل ابوها رماح
ولا اكابر عشان اطلع انا من عيونـك المذبـوح

9 - 12 - 2012, 12:27 AM

لكل حاكم وطن لكن يابـو متعـب لـك الاوطـان
ضوى قلبك يمر ديـار خلـق الله وتشـرق لـك

دعاء وحـب وعيـون تـرف وشوفهـا شفقـان
لشوفك وانت كل طيب العيـون يفـز وينظرلـك

صدى صوتك تمكن واستقر في داخـل الوجـدان
تطمن شعبك وحنـا مـع هالشعـب نسمـع لـك

سماع قلوب ونتهجـى تفاصيلـك مـن الاحـزان
تقول بخير وحنا هم بعد فـي خيـر مـن اجلـك

وبعد ماوجهك اتبسم وهو المنـور مـن الايمـان
بعدها كل عرق مـن لمـح وجهـك تبسـم لـك

لاصرت الخير وافعالك شموس تضـوي البلـدان
اجل لابارك الله في شعر مايجيـك ويكتـب لـك

ولا صرت انت الوحيد اللي يكون الحب لك عنوان
تجي قبل الرياض ديار اخو مريـم تبـارك لـك

وتتحمدلـك بكـل السلامـه يارفـيـع الـشـان
وفرح دار الصباح يطير يم عينـك يرفـرف لـك

لانك وجهنـا المشـرق مـن الإسـلام للاديـان
ولان كل الخصـال الطيبـه منـك وتقـرب لـك

واذا ردت على الاحسان كثير الخيـر والاحسـان
كفوف من هنا حتى حـدود الصيـن تدعـي لـك

نحمد الله على كل حال وانـت الحـال والخـلان
ويكفي قبل كل هذي العيون قلـوب تصعـد لـك

وتدعي لك عساك بخير يا ارحـم قلـب للانسـان
وصدق العين يتعانق مـع الدعـوات ويدمـع لـك

عسى الله يطول بعمرك يابو متعب ترى من شـان
وصل كل الرجوله يطول عمره سيـدي بوصلـك

لانك من شعـل عمـر المهابـه واوقـد التيجـان
بشموخ نزل علوم الطويلـة بعـز وتخضـع لـك

تزيد اصلك فعل وتزيـد فعـل وتكمـل النقصـان
ولا به نقـص الا مكتمـل مـن فعلـك واصلـك

تفاصيلك ماهي الا كتـاب الصحـراء والفرسـان
وتهاويلك في وسط عقول خلـق الله تشهـد لـك

تواصيفك يابو متعب اذا احتـارت بهـا الاذهـان
ابي تعذر خيـال لـو يشـح ولا وصـل كلـك

ترى وصفك يجي بسنين ماهو فـي قلـم والـوان
بمعنى سنيـن خلـق الله اذا توصـف ماتوصلـك

واذا ردت علي وصورتك مـرت علـى الاعيـان
اقول انك من سيوف الامـام وسيفـه يشبـه لـك

محيط المرجلـه الهـادي ولكـن للعـدا طوفـان
ياعلـك مثـل مـا انـت بشموخـك دوم ياعلـك

تزوم تقزم اعـداءك وتهـدي شعبـك المرجـان
تحل الصعب وكل صعب مايقدر يوصـل لحلـك

حفظك الله كثر ما اهديت لبيـوت البشـر قـرأن
وحفظك الله كثر ما قلوبنا في حـب تنبـض لـك

وحفظك الله كثر ماتمر شعبـك داخـل الشريـان
وفينا يكتمل وصلك يصيـر الشعـب وحنـا لـك

لانك غير ولا غيرك توحـد فـي غـلا الانسـان
ولأن في قلبك نعانق معاني الحـب ونكتـب لـك

ولان مالك وطـن واحـد تكـون لكلنـا اوطـان
تجي قبل الرياض ديار اخو مريـم تبـارك لـك

9 - 12 - 2012, 12:29 AM

لَنْ أجْعَلْ سَعادَتْي تَرْتَبَطْ بِـِـ وُجْودِ أحَدِهِمْ ،،، أشْكُـركَــ رَبْي فِـــ وُجوُدَكَــ يَكْفْينْـي ♥

9 - 12 - 2012, 12:30 AM

لماذا ..!؟

( العَيب ) عِندنا . .

أشدّ من ( الحرام )

هل لأننا نهتم للخَلق ،

أكثر من الخالق !

المواضيع المتشابهه لموضوع: تدري وش اكبر جرح منك اخذته كلمه احبك قلتها وانت كذاب لموضوع: تدري وش اكبر جرح منك اخذته كلمه احبك قلتها وانت كذاب
الموضوع	كاتب الموضوع	المنتدى	مشاركات	آخر مشاركة
احبك ايه احبك اوتدري انا كذاب	صمتي شموخ	همس الشعر والقوافي	4	11 - 3 - 2019 05:31 AM
مادام احبك قلتها وانت كذاب	همس الشوق	همس الشعر والقوافي	2	25 - 4 - 2017 04:05 PM
احبك كلمه قلتها وان كانها تكفيك	ياقلبي اكتفيت	همس الشعر والقوافي	4	17 - 6 - 2015 03:14 PM
اول كلمه قلتها اول ماصحيت من النوم	تكفون نسوني غلاها	همس للالعاب و التسالي	6	21 - 10 - 2014 06:56 PM
احبك وانت زعلان واحبك وانت راضي	اخفي غلاك	همس عالم ادم ازياء الرجل عالم الرجل العصري	10	10 - 1 - 2012 04:59 PM

الذين يشاهدون محتوى الموضوع الآن : 16 ( الأعضاء 0 والزوار 16)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع