رواية واكتشفت اني لقيطه كامله

12 - 3 - 2014, 12:27 AM

الساعه خمسه ونص العصر ..
في مستشفى الـ***** الخصوصي ..

كان سامي نايم عالكنبه في نفس الغرفه اللي فيها إياد ..
سمع جواله يدق فأخذه بكسل ولقى مكتوب "جمس بوند يتصل بك" ..
سامي بضجر: اووف .. شيبي ذا ..؟!
تعدل وجلس وقفل في وجه مراد ..
فرك عيونه عشان يتصحصح وطالع قدامه فشاف إياد نايم عالسرير ..
فتذكر امس لمن صلحوا لإياد عملية خياطة الجرح ومن وقتها وهو نايم ..
طالع سامي في ساعده اللي غرزوه غرزتين ولفوا عليها شاش ..
سامي: شقصة ذولا الهمجيين بالضبط ..؟!
رفع نظره لإياد اللي كان نايم ..
سامي: يا زينه وهو نايم .. يطلع بريء .. بس اذا صحي يطلع شيطان ..
تنهد وهو يطالع في إياد وقال بهمس: اسيل ..
قعد ساكت فتره طويله وهو يفكر فيها ..
طلع جواله واتصل بمدير الحرس حق قصر ابوه ..
سامي: الو .. اكرم ..
اكرم: نعم استاذ سامي ..
سامي: اسمع .. ابي منك خدمه ولا ابي احد يدري عنها ..
اكرم: حاضر ..
سامي: ابيك تطلع لي من الاتصالات رقم موبايل وحده اسمها اسيل عبدالرحمن الرملي .. فاهم ..؟!
اكرم: حاضر ..
سامي: بسرعه .. انا راح انتظر اتصالك .. باي ..
اكرم: مع السلامه ..
قفل سامي جواله وحطه بجيبه ..
لف نظره يطالع في جوال إياد اللي يدق عالصامت ..
سامي: من امس الليل وعمي يتصل .. خايف على ولده وبنته البكر راميها .. بالله فيه اب جذي ..
عض على شفته من القهر والحقد ..
اخذ نفس طويل يهدي نفسه وقال: المهم اللحين هو وين اسيل ..؟!
سكت فتره طويله بعدين قال: ما اصدق ان البنت اللي صار بيني وبينها اكثر من موقت تصير بنت عمي .. شلون اسيل البنت اللي كرشتني تكون بنت عمي ..
طالع في الارض فتره طويله بسرحان وتفكير ..
رفع راسه يطالع في إياد ..
وبسرعه خاطفه مررت في مخيلته شكل شخص آخر منسدح بدل إياد ..
فتح عيونه بصدمه وهو يشوف هالشخص ..
بسرعه غمض عيونه وحط راسه بين إيده وهو يهزه بلا ..
يهز راسه بعنف وكأنه يحاول يطرد هالشيء من راسه ..
ما يبي يتذكر ..
ما يبي يتذكر ابدا ..
بدأت حرارة جسمه ترتفع والعرق يصب من جبينه ..
إيده بدأ يحس فيها ترتجف ..
حط إيده على اذنه بسرعه ..
صدى صوت يتردد في داخله وما يبي يسمعه ..

" صدقني انه ما راح يخلي الامر يعدي على خير "
" صدقني انه ما راح يخلي الامر يعدي على خير "
" صدقني انه ما راح يخلي الامر يعدي على خير "
" ما راح يسكت "
" ما راح يسكت "
" ما راح يسكت "
هز راسه بلا ..
يبي يطرد هالصوت من راسه ..
صرخ بإنفعال: بــــــــــــــــــــــــــــــــــــس ..

دخل هالصوت العالي في اذن إياد فبدأ يصحى من البنج ..
فتح عيونه واول مظهر شافه هو السقف ..
تأفف وهو يقول بهمس: عرفت وين انا .. في بيتي الثاني ..
لف عاليمين شوي فشاف واحد جالس وحاط راسه بين إيده يطالع في الارض ..
حاول يتعرف عليه لأن الرؤيه معدومه عنده تقريبا ..
رفع سامي راسه وطاحت عيونه على إياد ..
سامي: صحيت ..؟!
ابتسم إياد لأنه عرفه وقال بتعب: لا باجي نايم ..
هز سامي راسه وهو يقول: ياخي توك صاحي من البنج .. ما تعرف تبدأ بكلمه حلوه .. لازم تبدأ بالاستفزاز والاستهزاء .. اعوذ بالله ..
إياد: من الشيطان .. تراه الشيطان واحد بجد بجد غثيث ..
سامي: لا ما اتوقع .. لأن في العالم كله ماكو اغث منك ..
ابتسم إياد بضعف وهو يقول: كلامك يحسسني انك تكرهني ..
سامي: وهذا هو الصج .. فعلا اكرهك ..
إياد بصوت خافت من شدة التعب: عيل منو اللي ساعدني ودخلني المستشفى ويلس عندي عشان يطمئن علي ..؟!
طالع سامي فيه وهو يكتم عصبيته ..
إياد وهو يقلد صوت سامي: لا يكون جرحك خطير ..
وكمل بإستفزاز: مين اللي قال هالجمله وهو بيموت من شدة الخوف علي ..؟! انت ..!!! لا مستحيل .. انت تقول انك تكرهني فكيف تحاجيني بذا الاهتمام .. ههه بس للأسف هو انت ..
صك سامي على اسنانه بقوه وقال: ابي افهم شيء واحد .. انت تعبان وتوك طالع من عمليه .. ابي افهم ما تعرف تنطم ياخي .. حتى وانت تعبان لسانك طويل .. هذا اللسان ما يعرف يدش في فمك ويسكت ..؟!
إياد: ههههههههههههه عجبني كلامك .. بالله أقين اقين يا سامي ههههههههههههههههههههـ.... آآه ..
حس بألم فضييييع في جنبه من كثرة الضحك ..
سامي: اححسسسن ..
إياد وهو عاض على شفته من الألم: اوبسس .. بجد شكلك تكرهني هههه ..
طالع سامي في ساعته ووقف وهو يقول: انا الغلطان اللي يالس مع بزر .. بااي ..
طلع وقفل الباب وراه ..
راقبه إياد بنظره لين طلع وقعد فتره طويله يراقب الباب بسرحان ..
لف عاليمين وشاف جواله ومحفضته عالكومدينه الصغيره اللي جنب السرير ..
كان جواله ما زال يدق عالصامت ..
طالع إياد في الشاشه من بعيد وعرف انه ابوه يتصل ..

" جـــــــــذاب .. ابوك يجذب عليك "
إياد: ابوي جذاب ..؟! لا اكيد السالفه فيها لبس .. ابوي عمره بحياته ما جذب علي ..
طالع في الجوال فتره طويله بتفكير بعدين مد إيده واخذ محفضته ..
فتح المحفضه وطلع بطاقة الصراف ..

" اختك يا استاذ إياد مب ميته "
إياد: معقوله اسيل ذي تكون اختي مثل ما قال بدر ..؟! ومعقول صج تكون اختي مب ميته مثل ما قال سامي ..؟!
سرح فتره طويله في البطاقه بعدين قال: ما ابي اخوان او اخوات ابدا .. ما ابيهم عشان لا ينصب اهتمام ابوي عليهم وينساني ..
تنهد وقال: هذا الحجي اللي كنت اقوله لنفسي .. بس واضح ان السالفه بتكون غير ..
رجع البطاقه في المحفضه وغمض عيونه يريح نفسه شوي ..

.................................................. .................

اما سامي فكان في سيارته وساند ظهره عالمقعد يفكر ..
طالع في ساعته وقال: الجامعه اللحين خلصت من زمان ..
تنهد وقال: امس تهاوشت مع ابوي .. شكلي يطلع بايخ إذا رجعت اليوم .. وغير جذي انا مالي نفس ارجع في هالفتره .. لأني لو شفته راح انفعل وارفع صوتي اكثر ..
لف راسه يطالع في المستشفى وهو يقول: كان بودي اقول للخبل اللي راقد هناك اني ما يلست عنده عشاني خايف عليه .. لا انا يلست عشان ماكو مجان اروح له ..
دخل إيده بجيبه وطلع جواله وهو يقول: بأشوف ريان ان كان فاضي ايلس عنده يومين ..
دق على ريان وبعد فتره رد يقول: اهليييين سامو ..
سامي بإبتسامه: يا هلا .. كيفكم اليوم بدوني ..؟! اكيد زفت ..
ريان: سامي .. تعرف لو انك تبطل الغرور شوي جان طلعت افضل واحد فينا ..
سامي: هههههه حرام عليك ..
ريان: ههه المهم انت ليه اتصلت ..؟!
سامي: شفيك مستعيل ..؟!
ريان: لأني مشغول شوي ..
سامي: مشغول ..؟! آها .. عيل مابي اعطلك .. مع السلامه ..
ريان بسرعه: لحضه لحضه ..
سامي: نعم ..
ريان: شكنت تبغى يا سامي ..؟!
سكت سامي شوي بعدين قال: لا ابد بس بغيت ايي عندك شوي .. اقصد مو شوي .. يعني بغيت اقعد عندك يومين او يوم ونص ..
ريان: متزاعل مع ابوك ..؟!
سامي: ...............................
ريان: طيب اوكي .. بس حاليا والله مشغول بس تقدر تيي بعد المغرب .. انا انتظرك اوكي ..؟!
سامي: اوكي ..؟!
ريان: ياللا مع السلامه ..
سامي: مع السلامه ..
قفل سامي جواله واسند ضهره للمقعده وهو يقول: واللحين وين اطس ..؟!
ابتسم وقال: بروح عند البنت اليديده دانا .. يسس ..
اخذ جواله ودق عليها وبعد كم رنه ردت وهي تقول: هـ هلا ..
سامي: اهلييين دانا شخبارج ..؟!
ارتبكت دانا بقووه وهي تقول: ها .. آ إيه تمام ..
سامي: ههههههه مرتبكه وبقوه .. عادي عادي اعتبريني ما ادري انج بنت وسولفي زي دايم ..
انحرجت وسكتت ..
سامي: ههههه انحرجت ..
قلب انحراجها الى عصبيه من اسلوبه ..
سامي: المهم هذا مو موضوعنا .. اسمعي دانا انا يوعان ما تغديت .. وما احد آكل لوحدي في المطعم .. وشسمه انا متهاوش مع ابوي ومابي ادخل القصر وريان مشغول .. فقلت ماكو غير عادل سابقا يستضيفني في بيته خمس ساعات ..
فتحت دانا عيونها بصدمه وهي تقول: في بيتـــي ..؟؟!!!!
سامي: لا بيت الييران اللي ينبكم عاليمين .. إيه اكيد بيتج .. ياللا اعطيني العنوان ..
هزت راسها بلا وهي حاسه بالورطه اللي حطت نفسها فيه من كذبها ..
هي قايله لهم انها غنيه وبنت عز واشياء كثيره ..
واللحين سامي يبي يجي .. من فين بتدبر له قصر ..؟!
سامي: دانــــــا وين رحتي ..؟!
دانا: ها ..
سامي وهو يقلدها: ها .. شفيج فاغره ..؟!
دانا بإرتباك: آآه شسمه انا .. انا هذا .. اقصد انا مشغوله .. ايه زي ريان مشغوله ..
سامي: ههههههههههههههههههه ..
دانا في نفسها: "شفيه يضحك"..
سامي: هههه دانا والله واضح انج جذابه ..
تورطت دانا وقالت في نفسها: "من متى ذا صاير ذكي" ..
سامي: انا عارف انج مستحيه بس ترى عادي .. اعتبريني ما اعرف انج دانا .. خليني ازور بيتج مثل ما زرتي بيتي ..
دانا: ما اقدر انا مشغوله مرره .. خلها وقت ثاني ..
سامي: لا مو مشغوله .. انا اعرفج عدل .. اذا كنتي بجد مشغوله فما راح تقدرين تقولين جذي لأنج مستحيه .. اما اذا كنتي ما تبين احد ييج فراح تقولين انج مشغوله ..
دانا في نفسها: "يمممه منه يخوف .. ذا من متى صار ذكي ويفهم .. اللحين شلون اطلع نفسي منها" ..
سامي: دانا وين رحتي ..؟!
دانا: ها ..
سامي: شفيج كل ما ابي ايي عندج ترفضين ..؟! هذي مو اول مره ..
دانا بإرتباك: آ .. لأنه .. أ شسمه .. عشان ..
سامي: عشان وشو .. دانا والله اني يوعان وابي آكل ..
وكمل بصوت حزين ومؤثر: اذا ما اكلت بعدين امووت واترككم .. دانا تبيني اموت ..؟!
دق قلب دانا بقوه من كلامه وقالت: خلاص بأعطيك العنوان ..
ابتسم بإنتصار .. قدر يقنعها ..
ضحك في نفسه وهو يقول: "والله وقدرت تقنعها يا سامي .. بسم الله على عقلي اعرف افكر" ..
دانا بإرتباك: بس سامي بصارحك بشيء ..
سامي بثقه: تبين تقولين انج تحبيني صح ..؟!
عصبت دانا ولو كان عندها كان رمت الجزمه في وجهه ..
سامي في نفسه: "شفيها سكتت ..؟!"
ابتسم بثقه وهو يقول في نفسه: "اكيد انحرجت .. طبعا فأنا بسم الله علي اطيح الطير من السماء .. وه بس فديتني" ..
قعدت دانا ساكته فتره بعدين قالت: البيت اللي ساكنه فيه مو قصر ..
ما استوعب سامي كلامها فقال: شتقصدين ..؟!
غمضت دانا عيونها وقالت بسرعه عشان لا ترتبك وتهون: انا جذبت عليكم .. انا مو بنت عز .. انا وحده حالتها الماديه سيئه ..
اخذت نفس وهي تنتظر ردت فعل سامي بس كان ساكت وما جاوبها ..
دانا في نفسها: "يا ربي ليه ساكت .. قلبي مو مطمئن" ..
بعد حول نصف دقيقه قال سامي بهدوء: يعني كنتي جذابه ..؟!
دانا بدفاع: والله غصب عني .. انتم كنتم تجبروني عالجذب .. والله مو بكيفي ..
سامي: ههههه شوي وتبجي ..
اندهشت دانا من رده وعصبت وقالت في نفسها: "ويقول ان إياد اكبر استفزازي .. حتى انت استفزازي" ..
سامي: طيب وين بيتج ..؟!
تنهدت وقالت له العنوان ..
بعد ما خلصت قفلت الجوال وراحت بسرعه عند امها ..
دخلت غرفة امها فجأه وقالت: يمـــــــــه ..
انفجعت الام وقالت: بسم الله الرحمن الرحيم .. شفيج ..؟!
دانا: يمه واحد من ربعي في الجامعه بيي يتغدا عندنا ..
عصبت الام وقالت: شنـــــــــو ..؟! شنو يعني يتغدى ..؟! باجي نص ساعه عن العصر وذا يبي يتغدا ..!!
دانا بترجي: امي بلييز لا تعصبين .. هو متهاوش مع اهله وما تغدى ويوعان .. حراام .. خلي في قلبج رحمه ..
تنهدت الام وقالت: طيب وش نصلح لهالولد ..؟!
هزت دانا كتفها وقالت: مدري .. هو من طبقه عاليه ومدري وش يحب ياكل ..
الام: والله ما علي فيه .. بصلح مصقع دياي وجريش وبس .. اذا يبي يرضى اهلا وسهلا .. واذا مايبي يرضى فيصقع راسه في اي جدار ..
دانا: جريش ..!! اممم ما اتوقع انه يحبه ..
طنشتها الام وراحت للمطبخ ..
وقفت دانا في مكانها فتره بعدين قالت: وش البس ..؟! لبس بنات ولا اولاد ..؟!
راحت لغرفتها وهي تقول: لبس اولاد احسن ..
لبست وجهزت نفسها وبدأت ترتب البيت وامها تصلح الغدا ..

بعد حول ساعه وقف سامي سيارته قدام بيت دانا ..
نزل من السياره وهو يطالع في البيت بدهشه ..
سامي: بيتها ما يي قد جناحي .. مررره صغير ..
طالع في جدران البيت الخارجيه وطالع في باب الحوش الامامي ..
كلها قديمه جدا ..
سامي بإستغراب: شلون ذي مستحمله تعيش هني ..؟! لو انا مجانها جان انتحرت ..
قعد فتره طويله واقف وسرحان يفكر في دانا وفي حالتها ..
شوي ابتسم بإستهزاء وقال: عالاقل هي مرتاحه ومو خايفه من المستقبل .. مافي شيء يعكر حياتها ..
تنهد وتقدم ودق جرس البيت ..

لفت دانا على امها وقالت بخوف: ياء ..
الام: طيب شفيج خايفه ..؟!
دانا بإرتباك: لأني مب .. مب متعوده .. لأنه .. مدري .. بس خايفه ..
الام: اقول قومي افتحي وبلا هرج فاضي ..
ترددت دانا وبعدها خرجت للحوش اللي مساحته سته في سته متر بس ..
فتحت باب الحوش وعلى وجهها ابتسامه بالصعوبه طلعت ..
طالع سامي فيها وقال: اهلييين كيفك ..؟!
دانا: تمام ..
سامي: شسمه انا .. انا ياي ازور اختك دانا .. ممكن ادخل ..
فتحت عيونها بطريقه هبله وهي تطالع فيه بدهشه ..
حك سامي راسه وهو يقول في نفسه: "وش هالنضره الغبيه" ..
دانا في نفسها: "هذا من صجه ولا يستهبل .. اللحين انا دانا فشلون ما عرفني .. اكيد يستعبط" ..
دانا: انا دانا .. اخوي في شغله ..
طالع سامي فيها بتفاجؤ وطالع في ملابسها ..
سامي: هههههه دانا .. والله حسبت انج اخوك .. ليه لابسه ملابس اولاد ..؟! شككتيني في نفسي ..
دانا: يعني ما تعرف شكلي ..؟!
سامي: إلا اعرف بس حسبت انج اخوك لأنكم تؤام واكيد انكم نسخه طبق الاصل في الشكل .. لو انج لبستي لبس بنات جان ما تلخبطت ..
دانا تغير الموضوع: ليه تأخرت ..؟!
سامي: ضيعت الطريج شوي ..
انتبهت دانا للشاش اللي بإيده وقالت بخوف: سلامات .. من فين هالجرح ..
طالع سامي في ايده وقال: ههههه حادثه بسيطه .. لا تشغلي بالج ..
طالعت في ايد فتره بعدين قالت: طيب تفضل ادخل ..
دخل سامي البيت وهو يلف عيونه في المكان ..
فتحت باب المجلس وقالت: تعال ادخل هني ..
سامي: لا مو لازم بأقعد في الصاله ..
وجلس عالكنبه ..
طالعت دانا فيه بعدين قفلت الباب وقالت: شتحب تشرب ..؟!
سامي: مابي اشرب .. انا يوعاإآآاآن ..
هزت راسها وراحت عند امها ..
اخذ سامي الريموت وبدأ يقلب في التلفزيون ..
جت الام وهي راسمه على وجهها ابتسامه وتقول: يا هلا بوليدي .. يا حي الله من يانا .. زارتنا البركه ..
قام سامي وهو يقول بثقه: ايه اعرف .. بسم الله علي في كل مجان ازوره يتبارك .. الله يحفضني ان شاء الله ..
اعطته دانا نظره قويه بمعنى بطل فشخره ..
خاف سامي من نظرتها وقال بسرعه: البيت منور بوجودكم يا خاله .. الله يحفضكم ان شاء الله ..
حست دانا على نفسها انها اعطته ذيك النظره فحست بالاحراج من تصرفها ..
الام: استريح يا وليدي استريح ..
جلس سامي وجلست الام وهي تقول: دانا جيبي الغدا ..
راحت دانا تجهزه في صحون وكذا ..
لفت الام على سامي وقالت: انت في اي قسم تدرس ..؟!
سامي: في المبنى اللي ينب مبنى دانا ..
الام: انا اسألك في اي قسم ..؟!
سامي: ايييه سوري لخبطت .. انا ادرس في قسم الـ***** ..
الام: الله يوفقك ان شاء الله ويسعدك ..
طالع سامي فيها والابتسامه على وجهه ..
يحسد دانا على هالام الطيبه ..
يتمنى يكون عنده ام مثلها في كل شيء ..
ايش فايدة القصور والفلل والسيارات اذا كان صاحبها مو مرتاح ..
اذا كان صاحبها يفتقد لحنان الام واهتمام الاب ..
اذا كان صاحبها يعيش هالمعاناه اللي مو قادر يتخلص منها ..
قطع تفكيره دانا اللي حطت صحن الاكل عالطاوله قدامه ..
طالعت الام في دانا وقال: شفيج لابسه ملابس ريال .. مو تقولين عرفوا انج بنت ..؟! ليه ما تسنعتي ولبستي وحده من فساتينج المكركبه في الدولاب ..؟!
انحرجت دانا وقالت بإرتباك: بروح .. بروح اييب لك كوب ماي .. استأذن ..
وراحت للمطبخ بسرعه ..
سامي: هههههه يا لبى قلبها .. تنحرج بسرعه ههههههههه ..
لفت الام عليه بحده وضربته براسه وهي تقول: شهالحجي يا جليل الحيا .. احترم نفسك لا اوريك شغلك ..
سامي: آآه سوري آسف .. الكلمه انا متعود اقولها .. والله مو قصدي شيء ..
الام: هي خلني اسمعك تقولها مره ثانيه شوف وش راح يصير لك ..
سامي: صدقيني توبه ..
اشرت ام دانا عالاكل وهي تقول: طيب ياللا كل .. مو تقول انك يوعان ..
سامي: لا ما قلت ..
الام بعصبيه: إلا دانا قالت لي ..
سامي بخوف: ايه صح .. بس كنت اقصد اني ما قلت لج انتي ..
الام: خلاص حصل خير .. ياللا كل ..
لف سامي وجهه عالاكل وعقد حواجبه وهو يشوفه ..
سامي: وش ذا ..؟!
الام: جريش ومصقع دياي ..
سامي: آها عرفتها .. قد شفتها في اذاعة ايام الثانوي لمن يقولون انواع الاكلات الشعبيه .. خلاص بطلوا ذي الاكلات يا خاله بطلوها ..
تراجع عن كلامه لمن شاف نظرتها وقال بسرعه: اصلا الموضه اللحين هي اكل هالاكلات .. اللـــــــــه لذيذه ..
واخذ الملعقه وبدأ ياكل ..
لفت الام وجهها عالمطبخ وهي تقول: وينها هالبنت تأخرت وما يابت الماي ..؟!
سامي: هههههه هي ما راحت تييب الماي .. هي كانت تتهرب من الموقف المحرج ههههه ..
طالعت الام فيه وهي مو فاهمه كلامه ..
بعد فتره شبع سامي من الاكل اللي بصراحه اعجبه جدا ..
ما كان متوقع ان طعمه يكون كذا ..
رفعت الام الاكل ودخلت المطبخ وقالت لدانا تروح تجلس عند الضيف لأنه ما يصير تتركه لوحده ..
دخلت دانا الصاله وشافت سامي يقلب في القنوات بطفش ..
اول ما شافها قال بملل: ما عندكم دش ..؟!
هزت راسها بإحراج وهي تقول: لا ..
جلست عالكنبه وقالت تغير الموضوع: ليه غايب اليوم ..؟!
فتح سامي فمه بيرد بس دق جواله فطلعه وشاف انه مدير الحرس ..
رد سامي وهو يقول: ها بشر ..
اكرم: للأسف يا سيد سامي انت اعطيتني اسم بنت ميته من سنوات كثيره ..
سامي بصدمه: منو قال ..؟! انا متأكد من الاسم .. يمكن انت لخبطت .. هي اسمها اسسسييل عبد الرححمن الرمملي ..
اكرم: ايوه هالاسم صاحبته ميته ..
انصدم سامي اكثر وهو يقول: اكرم كلامك مو معقول .. ابحث عنها مره ثانيه .. انا ابغاها .. فاهم شنو يعني ابغاها ..؟!
اكرم: حاضر راح ادور مره ثانيه وفي هالمره راح اوسع دائرة بحثي .. بس يمكن اتأخر شوي ..
سامي: خذ الوقت اللي تبيه بس المهم تلقاها .. فاهم ..؟!
اكرم: حاضر ..
سامي: مع السلامه ..
اكرم: مع السلامه ..
قفل سامي الجوال وفكره كله منشغل في اسيل ..
اما دانا فكانت تراقبه بعيونها وهي تقول بداخلها: "سامي مهتم بهالاسيل كثير .. ما قد اهتم ببنت قد ذي البنت .. واللحين طالب من حرسه يطلعونها له .. واضح جدا انه يحبها .. ابي افهم شنو المميز في ذي الاسيل .. ودي بس اشوفها واعرف وش اللي عاجب سامي فيها عشان يهتم كل هالاهتمام" ..
هزت راسها بلا وهي تقول: "دانا اصحي .. وش هالحجي اللي تقولينه .. حتى لو كان يحبها انتي شدخلج" ..
دق قلبها بقوه وهي تطالع في سامي وقالت في نفسها: "معقوله ....؟! لا لا .. هذا واحد من الشله وعادي اهتم" ..
شوي عقدت حواجبها ورددت بهمس: اسيل عبد الرحمن الرملي ..!!
فتحت عيونها بصدمه ..
نفس اسم البنت اللي انتشر عنها اشاعه في الجامعه ..
-معقوله سامي مهتم ببنت لقيطه مو معروف اصلها ..؟؟!!!
هالسؤال هو اول سؤال خطر ببالها ..
هزت راسها وهي تقول في نفسها: "دانا بطلي حقاره .. واذا كانت البنت لقيطه وش فيها .. المفروض ما اتكلم عنها بالطريجه ذي" ..
رفعت نظرها لسامي وقالت في نفسها: "عيل امس لمن انصدم وتركنا كان السبب هو الرساله ذي" ..
بلعت ريقها وقالت لا شعوريا: انت تحب اسيل ..؟!
هالسؤال اللي كان يدور في مخها من زمان واللحين طلع للسانها بدون لا تقصد ..
عضت على شفتها وهي تلعن نفسها على تصرفها ..
طالع سامي فيها بعد ما سمع سؤالها ..
سكت فتره طويله وهو يطالع فيها وكأنه يسأل نفسه هالسؤال ..
مرت دقيقتين وهو يفكر بسؤالها ..
شوي ابتسم وهو يقول: طبعا احبها ..
انصـــــــــدمت من رده وفتح عيونها على آخرها ..
خنقتها العبره وهي مو داريه ليش خنقتها ..
ودها تصارخ .. ودها تبكي ..
بس المشكله مو عارفه ليش ..
يحبهـــــــــا ..؟؟!!!
ليش ومن متى وكيف ..؟!
نزلت راسها بسرعه عشان لا تبان دموعها اللي تجمعت في عيونها ..
كمل سامي كلامه وهو يقول: طبعا احبها حب القرابه .. هي بنت عمي وطبيعي احبها مثل ما احب ولد عمي او اي احد يقرب لي ..
رفعت راسها بسرعه تطالع فيه ..
ابتسمت لا ايراديا وهي تقول في نفسها: "يعني ما يحبها الحب اللي في بالي .. الحمد لله" ..
سامي بهدوء: اما ان كنتي تقصدين حب اللي نهايته زواج فأنا اقولج لا ما احبها هالحب .. ومستحيل احب وحده ثانيه بذا الحب ..
تنهد بعدين وقف وقال: دانا انا نعسان .. ابي آخذلي غفوه على سرير مريح ..
قامت وقالت: تفضل ..
ودخلته غرفة عادل ..
قفل الباب وراه بعدين عقد حواجبه يردد: طبيعي احبها مثل ما احب ولد عمي ..
فتح عيونه بدهشه بعدين قال بعصبيه: يخسى هالإياد .. لو اموت ما احبه ..
رمى نفسه عالسرير يريح نفسه ..

================================================== ==================

12 - 3 - 2014, 12:29 AM

الساعه ١٢ في منتصف الليل ..
انتهى وقت شغل اسيل ..
كان شغلها هو ترتيب الملابس ووضع الاسعار عليها ومساعدة الزوار في شراء الملابس ..
في نفس شغلها يشتغل معها اثنين غير المحاسب خالد ..
واحد ولد قطري اسمه جواد عمره ٢٥ سنه وشخصيته هاديه وما يحب يتدخل في شؤون اي احد ..
والثاني بنت اسمها ليلى عمرها ٢٣ سنه وهي طيبه مررره بس شخصيتها ضعيفه جدا ..
تعرفت اسيل عليهم وكلامها مع جواد كان جدا قليل لأنه ما يحب يحتك بأحد ..
اما ليلى فصارت زي صديقتها في شغلها ..
ارتاحت اسيل كثير لمن شافت انه فيه احد غير خالد في المحل لأنها خايفه من هالخالد كثير ..

لمت ليلى اغراضها في شنطتها وهي تقول: ههه واخيرا خلص وقت الشغل .. مرره متعب ..
اسيل: فعلا ..
ليلى: الجو اليوم جدا بارد .. اتوقع انه راح ينزل مطر ..
اسيل: يمكن ..
فتح اسيل جوالها عشان تاخذ رقم ليلى زي ما اتفقوا من البدايه ..
اول ما فتحت الجوال انهالت عليها كميه كبييره من الرسائل والمس كول وغيره ..
تضايقت وما فتحت ولا وحده منها .. هي تبي تنسى كل شيء فات وتعيش من جديد بلقبها الجديد ..
اسيل: اعطيني رقمج ..
ليلى: *****٠٥٦٦٥ << بداية رقمي .. لا احد يحاول يتصل << ..
سجلت اسيل الرقم وحفضته في الاسماء ..
وقفت عن الضغط بالازرار وهي تطالع في اسم آرثر من بين الاسماء ..
تجمعت الدموع بعيونها ..
مات .. طيب ليش مات وتركها ..؟!
تحبه .. هي تحبه فليش يتركها ..؟!
عضت على شفتها تمنع شهقتها من الخروج ..
ودها اللحين ترتمي في حضنه وتنفجر في البكاء ..
ودها تعبر عن كل اللي في داخلها وهو يمسح على شعرها وظهرها ويهديها ..
مسحت دموعها بسرعه بعد ما سالت على خدها بدون شعور ..
طالعت ليلى فيها وهي حاسه ان هالبنت وراها مشكله كبييره ..
من يوم ما جت وهي كلامها قليل ودايم سرحانه ونظرة الحزن ما تفارق عيونها ..
حتى الابتسامه ما قد ابتسمتها ابدا ..
طالعت اسيل في ليلى وقالت: خلاص انا بأعطيج رنه عشان تسجلي رقمي عندج اوكي ..؟!
ليلى: اوكي .. ياللا مع السلامه ..
اسيل: باي ..
خرجت ليلى وخرج وراها جواد ..
حطت اسيل جوالها في جيبها واتجهت للباب بتطلع ..
وقفها صوت خالد يقول: لحضه يا اسيل ..
دق قلبها بخوف ولفت عليه وقالت: نعم ..
اشر بأصبعه بمعنى قربي ..
ما قربت .. وقفت بثبات في مكانها وهي تقول: انا مستعيله ..
ابتسم وقال: شفيه اسلوبج عدائي ضدي ..؟! لا تنسي اني اعتبر المسؤول الاول في هالمحل من بعد صاحبته مرام .. لا تحديني اقطع رزقج ..
حست ان موقفها ضعيف ..
اسيل القويه اختفت .. ما تقدر توقف في وجهه ..
زمان كانت توقف في وجه الناس لأنها عارفه ان وراها سند واخوان وابو يساعدها ..
اللحين ما وراها ولا احد ..
اذا عاندت وطيحت نفسها في مشكله فماراح يكون فيه احد يساعدها ويمسك بإيدها ..
قام من فوق الكرسي حقه وقرب منها شوي وقال: اللحين وين رايحه ..؟!
رجعت خطوه ورى وقالت: رايحه البيت ..
خالد: طيب جم عدد اخوانج ..؟!
سكتت فتره طويله ..
اذا قالت ما عندي اخوان فراح يتمادى بتصرفاته اكثر ..
واذا قالت عندي اخوان تخاف يكون عارف من قبل انها بدون اصل ويصير جوابها بدون فايده ..
حط إياديه على كتفها ونزل نفسه شوي على طولها وهو يقول: ليه ما تردين ..؟!
زادت نبضات قلبها وحست بجسمها يرتعش من الخوف والرعب ..
حس برعشتها فأبتسم اكثر وقال: اموووت انا عاللي يخافون .. ترى انا ما آكل ..

ابعد إيد خالد بقووه عن اسيل ومسك يد اسيل وسحبها معاه لبرى المحل ..
مسك خالد ايده وقال: مين هالعنيف اللي اخذها ..؟! معقوله اخوها ..؟!
طالعت اسيل في الولد اللي ماكان غير صاري نفسه ..
ابعدها عن المحل بعدين لف عليها وقال: اذاج بشيء ..؟!
هزت اسيل راسها بلا ..
صاري: اعذريني لأني ما ضربته على حركته الواطيه بس قلت يمكن يكون احد يقرب لج واكون اسأت الضن فيه ..
طالعت اسيل فيه وقالت: وليه ما يكون انا الواطيه مو هو ..؟! شمعنى ما ضنيت اني شخص سيء واني انا اللي خليته يسوي جذي ..؟!
صاري بإبتسامه: ببساطه .. لأنج تعرفي طارق واي واحد يعرف طارق مستحيل يكون سيء ..
اسيل بحده: قلت ما اعرفه .. وجم مره اقولك خلاص ابعد عني .. اعتبر نفسك ما تعرفني ..
صاري: آسف بس انا مابي اتركج ابدا .. اعتبريني اخوج الكبير ..
اسيل: اسمع .. ان ما تركتني بحالي بأخبر عليك الشرطه فاهم ..؟!
طنش كلامها وهو يقول: شكل هالشغله مو كويسه .. راح ادور لج عن شغل ثاني ..
تجمعت الدموع في عيونها وقالت بصوت باكي: انت ما تفهم .. اتركني بحالي ..
طالع فيه وقطع قلبه صوتها الباكي فقال بحنان: ما اقدر .. انتي مالج احد في الدنيا فأعتبريني اخوج .. ابي اساعدج يا اسيل ..
مسحت دموعها وقالت وهي تبكي: مابي مساعده .. الله يخليك اتركني .. اكره اشوف نضرات الشفقه من احد .. ابعد .. ابعد عني ..
انكسر خاطره عليها وبقوه فحط إيده على كتفها وقال: اسيل .. الوحده شيء صعب .. مافي انسان يقدر يكمل حياته وهو وحيد .. انا ما اناضرج بشفقه .. انا بس اتخيل نفسي بمجانج .. وقتها راح اتمنى احد يكون لي مثل الاخ .. فعشان جذي ابي اكون لج مثل الاخ ..
جلست عالارض وبدأت تبكي من كلامه ومن كل شيء في حياتها ..
جلس قدامها وحط إيده على كتفها وقال بهمس: اسيل ما يصير تبجين انتي كبيره .. شوفي شلون الناس يناضرونا ..؟! ياللا خليج اقوى من جذي ..
دخل إيده في جيبه وطلع منديل وقال: خذي مسحي دموعج .. ياللا ..
استمرت تبكي حول الدقيقتين بعدها بدأت تهدأ واخذت المنديل منه ..
مسحت دموعها فأبتسم وقال: ياللا قومي ..
قام ومد ايده لها عشان يقومها ..
قامت وقالت: صاري ..
صاري: هلا ..
اسيل: شكرا ..
صاري بإبتسامه: العفو ..
طالعت فيه فتره بعدين قالت: اشكرك على كل شيء سويته لي .. بس صدقني ان شغلي لا بأس فيه .. تعرفت على وحده ومابي اتركها .. صعب تلقالي شغله ثانيه .. انا مرتاحه ..
طالع صاري فيها بنضرات شك بعدين قال: طيب بأزورج بين فتره وفتره عشان اطمئن عليج طيب ..؟!
اسيل: طيب .. واللحين تقدر تروح .. بيتي قريب من هنا وبأروح له بنفسي .. ما ابي احد يعرف طريج البيت لأسباب خاصه ..
طالع فيها فتره طويله بعدين قال: اوكي .. تصبحين على خير ..
اسيل: وانت من اهله ..
قعد واقف فتره بعدها راح لجهة سيارته ..
دخلت اسيل ايدها في جيبها وطلعت حاجتين ..
اسواره ذهب اشتراها لها ابوها لمن نجحت في الثانوي والثانيه ساعة آرثر ..
تبي تبيع وحده منهم عشان تستأجر لنفسها شقه وتأمن حياتها ..
كلها الثنتين غاليه عندها ومو عارفه تفرط في ايش ..
قعدت فتره طويله تفكر وهي محتاره جدا ..
بعد مده من التفكير قررت انها تروح تسعرها ..
اللي سعرها منخفض عن الثانيه تبيعها ..
راحت لأحدى محلات الذهب والمجوهرات ..
دخلت المحل واتجهت للبائع السوري ..
اسيل: السلام عليكم ..
البائع: اهلين يا أمر .. شرفتينا والله .. اي خدمه ..؟!
قدمت اسيل الاسواره والساعه وهي تقول: ممكن تسعر لي ثمن هذي ..؟!
اخذها وهو يقول: طبعا ممكن نسعرها كرمال هالوج الطيب .. انتزريني دقايق ..
بدأ يسعرها بآلته واسيل تراقبه ليين انتهى ..
رجع لها الساعه والاسواره وهو يقول: الساعه بـ ٣٥٠٠ ريال قطري والاسواره بـ ٣١٥٠ ريال .. <<١٠ ريال سعودي = ٩،٧١ ريال قطري <<
طالعت اسيل في الاسواره فتره بحزن ..
لازم تبيعها .. سعرها اقل وهي اللي راح تنباع ..
اعطته الاسواره وقال: طيب ابغى ابيع هذي ..
اخذها وهو يقول: من عينيا .. راح ابيع لك إياها ..
فباعتها واخذت الفلوس ..
استأجرت لها تاكسي وراحت على اقرب عماره من هالسوق ..
استأجرت شقه بمبلغ ١١٠٠ شهريا ..
صحيح كانت صغيره بس جدا مرتبه ..
دخلتها وانسدحت عالسرير تحسب ..
اسيل: اللحين باجي معاي ٢٠٥٠ .. باجر بأنزل السوق اشتري لي بعض الملابس والحاجيات الخاصه بخمسميه تقريبا واشتري مواد غذائيه واشياء للمطبخ بخمسميه كمان ..
سكتت فتره بعدين قالت: اصلا ما اعرف اطبخ .. خلاص بأشتري اندومي وتوست وجبن وتونه .. اشياء بسيطه اقدر اسويها و .....
تنهدت وقالت: راتبي ١٠٠٠ .. والإيجار ١١٠٠ .. اذا خلصت الفلوس اللي عندي من فين راح ادفع للإيجار والاكل وغيرها ..
غمضت عيونها بألم وهي تفكر في المستقبل لين نامت ..

================================================== ==================

12 - 3 - 2014, 12:29 AM

الساعه خمس الفجر ..
في هالغرفه الكبيره في قصر منصور زوج ريما ..
هالغرفه الخاصه بريما وبس ..
كانت منسدحه عالسرير وحالتها النفسيه سيئه ..
اولا موت ابوها ..
ثانيا حالة اخوها ..
ثالثا احداث تلك الليله المشؤمه مع ياسر مو راضيه تفارق خيالها ..
منصور في بداية الامر حاول يهديها بس هي كانت تبعده عنها فصار ما يقرب منها ابدا ..
يدخل ياكل ويطلع ينام وبعدين يخرج للجامعه او المستشفى عن صاحبه ..
وهي حابسه نفسها في هالبيت بعيد عن الكل ..
زارت امها مره وفارس مرتين ..
والوقت الباقي في غرفتها ..
دموعها خلاص جفت من كثر البكى ..
تقبلت حقيقة الامر بأن ابوها رحل وفارس مازال بالغيبوبه ..
بس كل ما تذكرت موقفهم مع بعض واستهبالهم وضحكهم تبكي ..
فصارت كل يوم تدعي ربها ان فارس يقوم بسرعه وبالسلامه ..
جلست عالسرير وحضنت مخدتها وهي سرحانه ..
تتذكر ابوها .. عطفه .. حنانه .. اهتمامه .. ابتسامته ..
تتذكر اخوها .. ضحكته .. استهباله .. حنيته .. كلامه ..
نزلت دموعها اللي ضنت انها جفت من كثر بكائها ..
تبيهم يرجعون من جديد ..
وهي كمان تبي ترجع ريما اللي قبل ما تتعرف على ياسر ..
تبي عائلتهم ترجع مثل ما كانت قبل ..
اللحين تشتتوا ..
الاب مات وتركهم ..
وهي تدمرت حياتها ..
امها نفسيتها تعبانه ..
اخوها الكبير صار كالصنم ما يستجيب لأي شي حوله ..
اخوها الصغير ما زال في غيبوبه ..
واسيل ......

"اسيل مو اختج"
كلام فيصل لحد الآن صعب عليها تفهمه ..
شلون تكون مو اختها وهي عايشه معهم من طفولتها ..
مو قادره تستوعب انها مو اختها مع ان امها شرحت لها كـــــــــل السالفه ..
صحيح كانت جافه في التعامل معها بس كانت تحبها ..
ايه تحبها لأنها اختها .. مافي احد يكره اخوه ابدا ..
بس صدمه قويه لها لمن عرفت انها مو اختها ..
بس الاحداث اللي أكدت لها هالحقيقه ..
كره فيصل وامها لأسيل هو اكبر دليل انها صدق مو من هالعائله ..
حضنت المخده اكثر ويدور في بالها كلام امها عن اسيل لمن زارتها آخر مره ..
ضايقها كلام امها كثير ..
هي مقدره شعور امها ان بنتها تندفن بدون شهادة وفاة وان اسيل سرقت جميع اوراق واثباتات بنتها ..
بس في نفس الوقت اسيل مالها ذنب في هذا ابدا ..
كسرت اسيل خاطرها ..
ريما المغروره انكسر خاطرها على اسيل ..
هي بنفسها استغربت من نفسها ..
تحس ان الغرور قل عندها ..
من بعد ذيك الليله صارت مو متكبره ..
كل ما حاولت تتكبر تتذكر مستوى نفسها وما تغتر بنفسها ..
غمضت عيونها وهي تفكر في اسيل ..
وين راحت وعند مين وايش مسويه ..؟!
من فين تاكل وفين تنام ومع مين تسولف ..؟!
هل هي مرتاحه او متضايقه او حياتها دمار ..؟!
هل مازالت حيه او ماتت او مريضه في المستشفى ..؟!
اسئله كثيره تدور في بالها ..
قطع تفكيره منبه الجوال عالساعه ٦ الصبح ..
قامت عشان تصلي الفجر وتنام ..
كرهت الجامعه وما عاد تبي تروح لها ..
فتحت باب غرفتها فلاحظت ورقه ملصقه عالباب ..
طالعت فيها وكانت من منصور مكتوب فيها : (( الساعه ٦ صحيني عشان اروح الجامعه .. نومي ثقيل وما اقدر اصحى بالمنبه )) ..
قعدت فتره واقفه وهي تطالع في الورقه ..
اخذتها ورمتها في الزباله اكرمكم الله ..
توضت وصلت الفجر وبعدها اخذت ورقه ولصقتها على باب غرفته وكتبت فيها : (( الساعه ٦ ياللا اصحى اصحى )) ..
دخلت غرفتها ..
اذا هو ما عنده لسان فحتى هي ما راح تستخدم لسانها ..
وكمان المفروض لمن رجع من صلاة الفجر ما نام ..
يعني الغلط غلطه هو ..
انسدحت على سريرها وغطت في نوم عميق ..

================================================== ==================

في نفس هالوقت ..
وفي مدينه اخرى ..
واخيرا سمحوا لبسام بزيارة امه ..
من امس وهو ينتظرها عند بابها ومانعينه يدخل بسبب سوء حالة امه الصحيه ..
اللحين صحيت وعشان كذا سمحوا لبسام بالدخول ..
دخل الغرفه وجاء عند امه ..
مسك ايدها وباسها وهو يقول بخوف: سلامات يالغاليه .. سلامات ما تشوفين شر ..
دمعت عيون امه وقالت: بسام ولدي .. واخيرا شفتك .. خفت اموت وانا ما شفتك ..
بسام بسرعه: بسم الله عليج من الموت .. يعل يومي قبل يومج يا يمه ..
الام: الله لا يقوله يا حبيبي ..
دمعت عيون بسام وهو حاضن إيد امه ويقول: يمه انا آسف .. آسف لأني تركتج لوحدج .. آسف لأني كنت اناني .. آسف لأني صديت عنج .. يمه سامحيني ..
ابتسمت الام بحزن وهي تقول: انا اللي اتأسف .. اللي سويته في الماضي ما ينغفر ابدا .. اللي سويته جايد .. مره جايد ..
طالع بسام فيه والعبره حارقته بحلقه ..
هذه امه .. هذه دنيته .. هذه آخرته .. هذه جنته ..
ليييش عاملها بهالطريقه ..؟؟!!!
الغضب اعماه ..
اعماه وخلى تصرفاته شرسه ..
نزلت دموعه غصب عنه ..
مدت امه إيدها ومسحتها وقالت بحنان: لا تبجي يا ولدي لا تبجي ..
زادت دموعه في النزول من كلامها ..
كان حققييير في تصرفاته ..
كان يفكر في نفسه وبس وما اهتم لمشاعر امه ..
ابتسمت الام وقالت: لقيت سجى ..؟!
غمض عيونه بألم واسدح راسه على صدر امه وهو يقول بضعف: تعبت .. تعبت وانا ادورها .. تعبت جسديا ونفسيا ..
حضنته امه وهي تمسح على ظهره وقالت: ان شاء الله تلقاها يا ولدي ..
بسام بصوت مخنوق: آآه يا يمه تعبت .. ابوها ليش صلح جذي .. ما كنت اتوقع انه شخص سيء ابدا .. اكثر من مره قابلته وانا في الاعدادي .. كان طيب في كل شيء .. تصرفه وكلامه وكان حنون .. شلون اصدق انه كان يلبس قناع الطيبه .. آآه يا يمه آآه ..
مسحت امه على شعره وهي تقول: لا تذبحني بهالآآه .. لا تتألم وانا موجوده يا ولدي ..
بسام بألم: اختي .. اختي طعنتني بتصرفها .. ليه صلحت جذي ليه ..؟! ما اقدر اصدق .. ابدا .. ما اقدر ..
دمعت عيون امه وهي تقول: اهدأ حبيبي اهدأ ..
غمض بسام عيونه بقوه وهو يقول بضعف: الناس يحسدوني على الحياه اللي عايشها .. ماهم دارين اني في عذاب .. اني عايش في ألم .. آآآآه ..
حضنته امه لصدرها تهدئ منه ..

يمـــــــــــــه .. يمــــه يمــــه ..
يمـــــــــــــه .. يمــــه يمــــه ..

يمه عسى ما ازعجتك اليوم يمه ..؟
احس في صدري عذاب وحريقه ..!
يضمني حزني وانا حيل اضمه ..
كنه ضناي وشوفته شوف ضيقه ..!

يمه وانا ابنك واذا قلت يمه ..
شوفي لهمي والمواجع طريقه ..
ضميني لصدرك ثمانين ضمه ..!
ضمة عشيق مفارق عن عشيقه ..

كانك سألتي خاطري وش همه ..؟
بعلمك وابي جواب الحقيقه ..
ليه الزمان اليوم مافيه ذمه ..؟
وليه الطعون اللي بصدري عميقه ..؟

يمه عسى ما ازعجتك اليوم يمه ..؟
احس في صدري عذاب وحريقه ..!
يضمني حزني وانا حيل اضمه ..
كنه ضناي وشوفته شوف ضيقه ..!

ليه انخدع في ناس كانت مهمه ..؟
ويوم اكتشفها وهم ماله حقيقه ..!
ليه الذي وقت الرخا كان قمه ..؟
وقت الشدايد ما لقينا طريقه ..؟

ازيد يمه ولا كافي مغمه ..؟
اشوف عينك من هماها غريقه ..

يمه دخيلك آسف آآه يمه ..
كني جرحتك وانتي اغلى صديقه ..
يمه دخيلك آسف آآه يمه ..
كني جرحتك وانتي اغلى صديقه ..

كني جرحتك وانتي اغلى صديقه ..

بعد فتره ابتعد بسام عن صدرها ومسح دموعه وهو يقول: آسف ضايقتج معاي ..
الام والدموع في عيونها: لا عادي .. انا امك ومن حقك تشتكي لي همك ..
ابتسم وهو يقول: يا رب تقومين بالسلامه ..
طالعت الام فيه فتره طويله بعدين قالت: بسام .. اخاف اموت وامنيتي ما تحققت ..
بسام: تقصدين أ....
الام: ايه .. بسام ولدي تقدر تحقق لي هالطلب ..
بسام بدهشه: يمه والله ما اقدر .. هم مانعينا وما اقدر .. وغير جذي انا مستحـ....
قاطعته الام وهي تبكي: عشاني يا وليدي .. هذا هو طلبي الوحيد يا بسام ..
ما استحمل بسام دموع امه فقال بحنان: من عيوني يالغاليه .. اول ما تشفين راح اسافر ..
مسكت إيده وهي تقول: بسام ولدي .. عشاني سافر اللحين ..
بسام بسرعه: ما راح اروح واتركج .. مستحيل ..
الام بتعب: عشان خاطري .. يمكن ما اقدر اعيش اكثر ..
بسام بخوف: بسم الله عليج يمه .. لا تقولين هالحجي ..
الام بترجي: عشاني يا بسام سافر اليوم .. الله يخليك سافر يا ولدي .. هذي امنيتي الاخيره ..
فأضطر بسام ينصاع لها مع انه مو راضي يتركها وهي في هالحاله ..
بسام: حاضر .. حاضر يمه .. اللي تبينه بيصير ..
ارتاحت الام وقالت: مشكور حبيبي ..
غمضت عيونها وهي تقول: واللحين اقدر انام وانا مرتاحه ..
ابتسم وباسها في راسها وقال: نوم العوافي ..
تأمل امه فتره بعدها طلع وراح للمطار يحجز على اقرب طياره خارج الخليج ..

================================================== ==================

12 - 3 - 2014, 12:31 AM

يوم الاربعاء الساعه سبعه الصبح ..
كان الجو مغيم ورائحة الامطار منتشره في جميع ارجاء الدوحه ..
المطر ما كان غزير ولا شوي .. كان متوسط ..
تكتف انس وقال: جذا الحال ما راح يمشي .. اللحين ممكن تقولي ليش بتغيب اليوم كمان ..؟!
ما رد عليه طارق وقاعد يضبط ازارير جاكيته ..
انس: عالاقل قول وين بتروح ..؟!
اخذ طارق ساعته يلبسها وما رد على انس ..
انس بقهر: تصطفل ..
واخذ شنطته وطلع من العماره ..
تنهد طارق وهو يشوف انس طالع ..
فتح الدرج وطلع ورقه منها وحطها في محفضته ..
دخل المحفضه بالصعوبه في جيب بنطلونه الضيق ..
اخذ المفاتيح والجوال وطلع من غرفته ..
فتح باب الشقه وطلع واتجه للمصعد بس تذكر حاجه ..
من زمان ما وصل الولد واخته لمدارسهم ..
راح لباب الشقه ودق الباب ..
شوي فتح وسيم واول ما شاف طارق ابتسم وقال: طارق ..
احنى طارق جسمه شوي لجهة وسيم وقال بإبتسامه: ههه تتذكر اسمي ..؟!
هز وسيم راسه بإيوه وهو يقول: اكيييد ..
طارق: طيب شفيك مو مجهز روحك .. ما تبي تروح المدرسه ..؟!
وسيم: لا انا بغيب ..
طارق: وليش ..؟! الغياب مو حلو يا بطل .. بعدين تمر دروس وما تصير تفهمها .. كيف بتنجح وانت تغيب ..؟!
طالع وسيم فيه وقال: طيب ليش انت امس غبت ..؟!
تورط طارق وقال: لأني كنت تعبان .. عندي سبب بس انت ما عندك ..
وسيم: إلا ..
طارق: طيب وشهو ..؟!
وسيم: اليوم حلقة بن تن الاخيره وابي اشوفها ..
رفع طارق حواجبه وقال: اللحين انت تسمي هذا عذر ..؟! ما يصير يا حبيبي .. الدراسه اهم من افلام الكرتون ..
بوز وسيم شفته وقال: بس ابغى اشوف الحلقه الاخيره ..
طارق: فيه طرق ثانيه غير الغياب .. تقدر تشوف اعادتها او تشتري الشريط من المكاتب لأنه مشهور ..
وسيم: اولا ما ادري متى اعادتها وثانيا ما عندنا فلوس تكفي الايجار عشان نشتري اشرطه ..
لانت ملامح طارق وقال: يا حبيبي ..
مسح على شعر وسيم وقال: طيب جم ناقصكم ..؟!
وسيم: مدري بس كثير لأن الايجار صار كثييير .. وكمان صار حتى فاتورة اللمبات والمكيفات والمويه علينا ..
عقد طارق حواجبه وهو يقول: وشو ..؟! فواتير الكهربا والماي عالعماره ..
هز وسيم راسه بلا وهو يقول: هذا اول .. اللحين يقولون لازم احنا ندفعها ..
فارت اعصاب طارق وقال: انت متأكد ..؟!
هز وسيم راسه يقول: ايه متأكد .. سالم الدب رقم اثنين هو اللي قال جذي ..
عصب طارق وراح المصعد ووسيم يطالع فيه ..
وسيم: يا رب يضربه ..
انفتح باب المصعد وتوجه طارق للاستقبال ..
طارق بعصبيه: صحيح الكلام اللي سمعته بأن الفواتير صارت علينا ..؟!
الموضف: ايه صحيح ..
طارق بقهر: طيب ليييه ..؟؟؟!! لويــــــن يبي يوصل هالسسالم ..؟! وش يبغى بالضبط من خلال هالاوامر السافله ..؟!
الموضف: اهدأ .. انا مالي دخل عشان تهاوشني ..
ضبط طارق اعصابه وقال: طيب ليش ما قلت له ان اللي يسويه غلط ..؟!
الموضف: آسف ما ابي اقطع رزقي بنفسي ..
طارق بتهديد: يصير خير .. انا عارف شلون اتصرف معاه .. سسافل ..
خرج من العماره وركب سيارته متجه للشغله اللي كان يبغى يسويها ..
وقف سيارته بعد ما وصل ونزل وهو حاط قبعة الجاكيت فوق راسه بسبب الامطار الخفيفه ..
طالع في اللوحه وكان مكتوب فيها ..
(( مدرسة الـ**** الابتدائيه ))
ألتفت اول شيء وشاف مطعم ..
دخل وافطر فيه لأنه ما افطر الصباح ..
بعد ما خلص كانت الساعه تقريبا ثمانيه ..
دخل المدرسه وراح للمدير ..
دخل وقال: السلام عليكم ..
المدير: اهليين وعليكم السلام ..
تصافحوا بالايادي وبعدها جلس طارق عالكنب ..
جلس المدير على كرسيه وقال: في ايش تبيني اخدمك ..؟!
اعطاه طارق الورقه اللي في محفضته وقال: ممكن تستدعي لي الولدين ذولا لو سمحت ..
اخذ المدير الورقه وقال: طيب ..
شال سماعة التلفون وقال: مساعد الله لا يهينك ممكن تنادي لي الطالبين وسيم وشادي عمر العالي .. وسيم صف ثاني وشادي صف سادس ......... ايه مشكور .......... مع السلامه ..
قفل التلفون وقال: دقايق ويناديهم لك ..
هز طارق راسه وبدأ ينتظر ..
مرررت ساعـــــــــه وصارت الساعه ثمانيه وطارق ما زال ينتظر والمدير منشغل في اوراقه ..
طارق في نفسه: "ليش الوقت هذا كله ..؟!"
شوي دخل الاستاذ مساعد وقال: آسف عالتأخير ..
طالعوا فيه وطالع طارق حواليه بس ما شاف اي ولد ..
المدير: وين الاولاد ..؟!
مساعد: رحت للصف الثاني وسألت عن وسيم فطلع غايب .. ورحت للصف السادس وقالوا ان شادي غايب ..
اصيب طارق بكتله هائله من الأحباط ..
كان متوقع انه يقابل واحد منهم عالأقل ..
مساعد: بس طلاب الصف السادس كان جذابين ويغطون على شادي واصحابه اللي هربوا من الحصه ..
طالع طارق فيه بسرعه وهو يقول: يعني شادي مو غايب ..
مساعد: لا مو غايب .. شارد من الحصه واللحين قاعدين ندور عليه ..
ارتاح طارق وبقوه وقال: خلاص انا بأنتظركم هنا لين تحصلونه ..
مساعد: بس فيه احتمال يكون هرب من المدرسه لأنه قد سواها في مره من المرات ..
طارق: عادي ماكو مشكله .. بأنتظر لين الظهر ..
وفعلا بدأ ينتظر ظهور السيد شادي الشارد ..

.................................................. ....................

الساعه 12 وفي الجامعه ..
عند شلة غيدا ..
خلود: بطلي هبل يا حموود ..
غيدا بإصرار: مستحيل ..
غدير: غيدا لا يكون من صجك بتفضحين سامي .. السالفه اللي قلتيها لنا قبل شوي جدا خطييره .. لو انشرتيها صدقيني ما راح يسكت لا هو ولا اصحابه ولا ابوه نفسه ..
تهاني: يمكن تتورطي اكثر يا غيدا ..
خلود: اذا منقهره من سامي صلحي فيه كل اللي في بالج إلا هذا .. اعقلي لأن اكيد ابو سامي راح يندمج ..
غيدا بإصرار: قلت لكم انا مو خايفه من احد .. يكفي ان بشروه الغبيه فلتت من إيدي من دون لا انتقم منها ..
خلود: انا حذرتج واللي عقله في راسه يعرف خلاصه ..
غدير: خالد معاه حق .. انتي عقلج في راسج وفاهمه وش بتكون العواقب .. بس انصحج تبطلين غباء ..
تهاني: غيدا لا تكوني عنيده وشرسه .. ما كنتي بهالشر من قبل ..
غيدا بحقد: هم .. هم كلهم خلوني جذي ولازم انتقم منهم ..
غدير بقلة حيله: اوكي صلحي اللي تبغيه .. شوفيه هناك يالس مع ربعه .. اصرخي بأعلى صوت وافضحي سامي جدام الطلاب ..
هزت غيدا راسها وهي تقول: طبعا ..
عقلها يقول طبعا بس ضميرها يقول مستحيل ..
مقهوره منه وتبي تنتقم بس ماهي شريره لهالدرجه ..
عالاقل ضميرها ما زال صاحي ويمنعها ..
بس عقلها كمان صاحي ويحرضها ..
عقلها يقول روحي وافضحيه هو وامه سيلينيا ..
وضميرها يقول انتي كذا بتنهين حياته وتموتيه ..
عايشه في صراع نفسي وعيونها عليه وهو جالس بين اصحابه يسولف ومبسوط ..
ومازال اصبعها في فمها تاكل اضافرها من التوتر ..
خلود: شفيج ما تحركتي على قولتج ..؟!
غيدا: اكيد راح اتحرك ..
تهاني: غيدا والله حرام .. لو انتي بمجانه والله ما ترضينها على نفسج ..
غدير: صدقيني لو تاخذي سكين وتطعنيه اهون من اللي بتسويه ..
وما زالت غيدا غارقه في بحيرة التردد والارتباك والحيره ..
مازال الصراع النفسي داخلها مستمر ..
إلى الآن مو قادره تختار شيء محدد ..
اظافرها صارت تطلب النجده من كثر ما تقظم فيها وتاكلها ..
قامت بطريقه مفاجئه فقالت تهاني: لا يكون بتروحين تفضحين ..؟!!! غيدا بلييز اعقلي .. عن الهبل هذا ..
خلود: صحيح اكره سامي بس اذا سويتي جذي ماراح ترحمج عائلة الراهي ..
غدير: مينونه ..
غيدا: مالكم شغل فيني ..
واتجهت بخطوات ثابته ناحية شلة سامي ..

.................................................. .........................

الساعه صارت ١٢ الظهر ومازال طارق ينتظرهم يلقون شادي واصحابه ..
اما شادي فمسكوه اكثر من مره بس اذا غفلوا عنه يهرب وفي باله خطه تمشي بعد ما عرف ان فيه احد ينتظره عند المدير ..
تعب طارق من الانتظار ومع هذا عنده امل انهم يمسكون شادي ..
اما شادي فمصر ان يخلي اليوم اسسود وما يروح للمدير لأسباب خاصه بالنسبه له ..
عند مكتب المدي كان طارق جالس والمدي مو موجود لانه عنده شغله يسويها ..
طالع طارق في ساعته وقال: عندي احساس يقول اني مستحيل اقابله اليوم ..
تنهد وقام يلف في غرفة المدير شوي لان رجله وجسسمه كله تعب من الوقفه ..
انتظر ومازال ينتظر ومو داري وش نهاية هالانتظار ..

وش راح يصير بين غيدا وسامي وهل راح يتقابل طارق وشادي ..؟!
اجابة هالسؤال في البارت الجاي ..

+.. مقتطفات ..+
فصرخت شهد بإنفعال: بـــــــــس خـــــــــلاص كـــــــــافي .. مو قادره اتحمل يا راشد .. اكــــــــــــرهك ..
+.. .. .. .. .. .. ..+
رفع إياد راسه وطالع في عيون ابوه وقال: يبه ابسألك سؤال وابيك تياوبني بصراحه ..
+.. .. .. .. .. .. ..+
دمعت عيون اسيل وقالت بهمس: فارس .. فارس رد علي .. انا اسيل يا فارس ..
+.. .. .. .. .. .. ..+

|$[ نهاية البارت ]$|

12 - 3 - 2014, 07:26 PM

|$[ البارت الحادي عشر الجزء الثالث ]$|

الصراع النفسي اللي بداخلها انتهى بقرار واحد ..
هي تبغى تفضحه وفي نفس الوقت ما تبغى ..
اتجهت لشلته وهي تبغى تضارب وبس ..
عالاقل تطلع قهرها فيه ..
هي عارفه انه انسان عصبي واذا تمادت راح يغلط عليها وفي هالوقت اكيد بتتهور وتفضحه ..
بس ما همها ..
وقفت قدام الشله وقدام سامي بالضبط ..
طالعوا الشله فيها .. ما استغربوا وجودها ..
سامي: اهلييين غيدا ..
طالعت فيه بنظرات كره وحقد ..
طالع سامي فيها وهو مستغرب من نظراتها ..
دايم نظراتها سخريه او استهزاء او نظرات وحده فاضيه تبي تضارب ..
ابتسمت غيدا بإستهزاء وقالت بصوت شوي مرتفع: اهليييين بولد سيلينيا .. كيفك ..؟!
تحولت نضرات سامي الى نضرات حاده وهو يقول: غيـــــــــدا ..
غيدا بنفس الابتسامه: ألا ما قلت لي شنو آخر اخبار جاكي ..؟!
فتح سامي عيونه على آخرها من الصدمه وهو يطالع فيه ..
تكتفت غيدا وهي تقول بإبتسامتها الساخره: طيب باتريك اتصل عليكم ولا لا ..؟!
حطت إيدها على فمها وهي تقول: اوووه سوري نسيت .. اذا اتصل عليكم فأكيد ما عاد راح نقدر نشوف ويهك في الجامعه ابدا .. بس انت مويود وهذا يعني انه ما اتصل ..
كملت بإستهزاء: اعذرني على سؤالي الغبي يا سامي ..
جف الدم في وجه سامي من قوة الصدمه والدهشه ..
ذي تعرف كل شيء ..
كان يحسبها تعرف الاشياء السطحيه مو كل شيء ..
ابتسمت غيدا وهي مستمتعه بنظرات الرعب اللي في عيونه ..
الرعب من الماضي والمستقبل ..
الخوف من الحقيقه ..
الخوف من ان حياته تنقلب بمجرد رجوع هذا الشخص مره اخرى ..
مين هالشخص وليه سامي خايف منه ..؟!
محد عارف الاجابه غير غيدا وشلتها وسامي ..
اما شلة سامي وبعض الطلاب اللي متابعين الحدث ماهم فاهمين شيء ..

دقات قلب سامي حطمت الرقم القياسي في النبض ..
يحس بحراره فضيعه في جسمه والعرق يصب من جبينه وهو يطالع في الارض بنظرات خوف ورعب ..
كل الاحداث تنعاد قدام عيونه ..
احداث قديمه .. قديمه جدا ..
احداث حصلت وهو طفل ومع هذا يتذكرها ..
كلام ابوه يتردد في اذنه ..
كلام سمعه من تسع سنوات وما نساه ابدا ..
ما نسى ولا جمله ولا كلمه ..
حتى حرف واحد ما نساه ..
شلون ينسى هالكلمات اللي هزت كيانه ..
تسارعت انفاسه مع تسارع الذكريات اللي تمر بذهنه ..
ابتسمت غيدا .. اللي يشوفها يقول ماهي غيدا اللي اعرفها ..
في ذي اللحضه طلع الجانب الشرس من شخصيتها ..
جانب شري ويتلذذ بمعاناة الناس ..
جانب ما يصحى الضمير فيه ابدا ..
جانب ما يهتم بشعور الناس ابدا ..
غيدا بإبتسامه: طيب عالأقل ما تعرف وش هي أخبار تولار ..؟! المفروض تكون عارف صح ..؟!
تزايدت نبضات قلبه وتسارعت انفاسه اكثر من كلامها وسؤالها ..
عاجز يقوم يسكتها لأنها اوقعته في دوامة الماضي ..
اصبح اسير خوفه ورعبه ومو قادر يسيطر على نفسه ابدا ..
تحولت نظرات غيدا وهي تقول بشراسه: تستاهل .. هذي هي العيشه اللي تستحقها يالجذاب .. ياليتك من ذا الحال واردى ..
عدلت وقفتها وقالت بحقد: اكرهـــــــــك وما اتمنى لك الخير ابدا .. اتمنـــــــــى كل اصحابك والجامعه يعرفون وش هي حقيقتك المقرفه ..
وكملت بصوت اعلى: حقيقتك اللي تقول انك ميرد ابـ.......
طــــــــــــــــــآإأآاآخ ..
تلقت صفعه قويه على خدها ..
اقوى كف اخذتها لحد الآن ..
هدأ الجو فتره وهم يطالعون في غيدا المصدومه ..
وكأن هالكف صحى سامي من الدوامه اللي كان فيها فرفع راسه وهو يشوف ريان واقف قدام غيدا ..
طالعت غيدا في عيون ريان ..
اول ما طاحت عينها في عينه ارتعبت من نظراته المخيفه ..
ريان بحده مرعبه: انجبـــــــــي يا السسافلـــــــــه قبل لا اذبححححج ..
اقشعر جسمها فجأه من نبرته المخيفه ..
حاولت تفتح فمها ترد او تتكلم بس ما قدرت ..
نظراته اخرست لسانها ..
طالعوا صاحباتها فيها وهم مستغربين من سكوتها ..
اشر ريان على ورى وهو يقول بنفس النبره المخيفه: انقلعـــــــــي ..
عصبوا شلتها من كلامه لها وعصبوا اكثر من سكوت غيدا ..
رجعت غيدا خطوه لورى وهي تطالع في ريان بعدين نقلت نظرها تطالع في سامي اللي مو مستوعب إي شي حوله ..
واخيرا فتحت فمها وقالت: راح ارجع لكم ..
لفت وراح تحت انظار شلتها المصدومين من ردها ..
المفروض ترفع صوتها وتهاوش مو تنسحب زي المهزومه ..
لا .. هذي مو غيدا اللي يعرفوها ..
راحوا لها يستفسرون عن سبب انسحابها بالطريقه ذي ..
لف ريان وجلس قدام سامي وحط ايده على كتفه وهو يقول: سامي .. سامي لا تهتم لكلامها .. ذي وحده واطيه ومستعد اربيها اذا تبيني اربيها ..
ما فهم سامي كلامه ..
اصلا مو داري من اللي يكلمه ..
وقف سامي وهو يقول: انا رايح للسياره ..
قام ريان معاه وهو يقول: طيب بأوصلك ..
بعدوا ريان وسامي والشله يطالعون فيهم بإستغراب ..
وكل واحد فيهم يحاول يفسر اللي صار لنفسه ..
ماهم فاهمين شيء ..
الشيء الوحيد اللي فهموه هو ان رفيجهم سامي عنده مشكله واضح انها جايده ..
الطلاب اللي كانوا واقفين يراقبون ابتعدوا تدريجيا ما عدا اروى اللي مازالت واقفه تفكر ..

اما عن ريان وسامي ..
ركب سامي السياره واسند ظهره عالمرتبه وهو مغمض عيونه يرتاح ..
ريان: تحتاج اييب لك شيء ..؟!
هز سامي راسه بلا ..
ريان: اوكي انا رايح وبأخليك تاخذ راحتك طيب ..؟!
سامي: .................................. ..
تنهد ريان وابتعد عن سياره سامي ..

فتح سامي عيونه بهدوء وطالع في الدركسون بسرحان ..
من يوم وهو صغير مو قادر يسيطر على خوفه من هالماضي ..
لازم تصيبه حالة الرعب اذا تذكره ..
خلاص مو قادر يتحمل هالخوف ابدا ..
يتمنى الموت عشان يرتاح ..
طول حياته وهو خايف من شيء ممكن يصير في اي لحضه ..
تعب من هالخوف .. تعب من هالحياه ..
تعب ومو قادر يتحمل اكثر ..
انفتح باب السياره في هالوقت وركبت اروى ..
لف سامي راسه يشوف مين اللي ركب بس ما قدر يعرف مين هي ..
عقله ما زال مشوش تماما ..
ابتسمت اروى وقالت: سوسو حبيبي سلامتك ما تشوف شر ..
طالع فيها فتره بعدين اسند راسه عالمرتبه وغمض عيونه ..
اروى: اذا تبيني اييب غيدا عند ريولك تعتذر انا حاضر بس المهم ما تضايق نفسك جذي ..
ما رد عليها سامي لأنه اصلا مو عارف مين اللي يتكلم ..
مسكت اروى ايده وقالت بنبره حزينه: ابتسم .. يضايقني شكلك وانت متضايق .. سامي لا تخلي وحده حقيره مثل غيدا تأثر فيك .. ابتسم عشاني ..
فتح سامي عيونه ولف يطالع في اروى ..
ابتسمت وهي تقول: ياللا ابتسم يا سوسو ..
سامي بسرحان: دانا .. ابي اقعد لوحدي ..
عقدت اروى حواجبها وهي تقول في نفسها: "منو ذي دانا بعد حتى يتخيلها بدالي .. ما صدقنا افتكينا من اسيل اللي طلعت لقيطه تييني دانا بعد" ..
شوي بدأت الرؤيا توضح عنده وبدأ يستوعب اللي حواليه ..
طالع في اروى فتره بعدين سحب إيده وقال بحده: شنـــــــــو اللي يابج هنــــــي ..؟!
اروى: ييت عشانك يا سوسو ..
عض على شفته من العصبيه ونزل من السياره وراح لجهتها ..
فتح الباب وسحبها من ايدها وطلعها من السياره بقووه ..
سامي بعصبيه: انسسانه قممه في الوقاحه .. للمره الاخيره اقولج بعدي عن طريجي قبل لا اندمج .. ترى انا انسسان ما عنده صبر عشان اصبر على تصرفاتج الدنيئه ..
عدلت نفسها ووقفت عدل وقالت: خلاص انا بجذي اطمئنيت عليك .. باي حبيبي ..
وراحت وسامي يتابعها بنظراتها ..
مسك إيده اللي جرحها جراح بألم لأنها آلمته لمن سحب اروى ..
فتح باب السياره ودخلها وانطلق بسرعته المتهوره المعتاده ..

================================================== ==================

دق جرس الحصه الاخيره معلنا عن نهاية اليوم الدراسي لطلاب الابتدائي ..
وطارق العالي مازال جالس في غرفة المدير ونفس الكنبه كمان ..
تنهد وقال: كان احساسي صادق .. مستحيل اقابله اليوم ..
قام وخرج من المكتب ..
وهو خارج مر بالساحه فوقف شوي يطالع في الطلاب ..
ابتسم بإستهزاء وهو يقول: شهالغباء .. عبالك انك بتلقاه بسهوله بين هالطلاب كلهم ..؟!
خرج من المدرسه واتجه لسيارته وهو يفكر في شادي ..
طارق: هارب من الحصه .. شكل ولد العم ذا طالب مشكلجي درجه اولى ..
رفع راسه يطالع في الجو اللي كان مغيم وكأنه ينذر بهطول امطار غزيره ..
وقف قدام باب سيارته يطالع في الشباك ..
ارتفع حاجبه وانخفض اكثر من مره وهو يحاول يكتم عصبيته ..

فيس يضحك وماد لسانه ومكتوب تحته (( مستحيل تصيدني )) ..

هذا هو اللي كان مرسوم عالشباك باللون الابيض الواضح وبالخط العريض ..
لف طارق حوله ..
يمين .. شمال .. بس مالقى اي احد قريب ..
طارق: منو هالغبي اللي كاتب ذا ..؟!
ابتسم واحد يقول: انا ..
لف طارق ورى فشاف ولد واقف بعيد شوي عن طارق ..
رفع طارق حاجبه وقال: وعلى اي اساس كاتب هذا الكلام يا بابا ..؟!
الولد وهو يقلد طارق: وعلى اي اساس كاتب هذا الكلام يا بابا ..؟!
طالع طارق في الولد فتره بعدين قال: ياوب يا حبيبي قبل لا استعمل اسلوب ثاني .. فاهم يا بطل ..؟!
الولد بإستهزاء ينشد: يا بطلنا المغوار هيــــا ..
ابتسم طارق ببرود وهو يقول في نفسه: "ذا ميرد بزر فلا تحط عقلك بعقله يا طارق" ..
طارق: انا اللحين مستعيل .. ابي ارجع البيت ارتاح .. فممكن تقولي على اي اساس كاتب هالحجي على سيارتي ..؟!
رفع الولد حاجبه وقال: جذي .. نذاله .. عشان بعدين لا تسوي نفسك بطل مغوار وتيي المدرسه ..
استغرب طارق من كلامه وقال: شكلك ملخبط ..
تكتف الولد وقال بثقه: لا لا انا مو ملخبط .. مو انت حسين اخو البزر سلطان اللي فقعت ويهه وعشان جذي يااي تنتقم لأخوك ..
ضحك طارق غصب عنه وقال بتحدي: ههههه للأسف غلطان ..
اعتدل الولد في الوقفه وهو يقول بتفاجؤ: ججذاب ..!!
ابتسم طارق وهو يهز راسه بلا ..
طالع الولد فيه وهو بقمة الدهششه بعدين قال بإصرار: إلا انت حسين .. اذا ما كنت حسين عيل ليه ياي عند المدير تدور علي .. انت حسين يعني حسين ..
طارق: شرايك اعطيك بطاقتي عشان تتأكد اني مو حسين .. اصلا ما سألت عنك ابدا .. اول مره اشوفك ياخي ..
عقد الولد اللي بالتأكيد كان شادي حواجبه بعدين قال بثقه: طيب اعطني بطاقتك عشان اتأكد لأني واثق انك حسين بس قاعد تجذب علي ..
طارق: بأعطيك بطاقتي على شرط اذا طلع حجي صج تمسح اللي انت كاتبه ..
شادي في نفسه: "تحلم" ..
طارق: ها شنو قلت ..؟!
شادي بتسليك: طيب طيب ..
رفع طارق حواجبه وهو فاهم ان شادي يسلك ..
شادي بتأفف: سوري .. منجد راح امسحه ..
طلع طارق بطاقته واعطاها شادي ..
طالع شادي في البطاقه فتره طويله ..
طارق بإستهزاء: ها وش مكتوب ..؟! لا يكون مكتوب حسين اخو سلطان ..؟!!
رفع شادي نظره يطالع في طارق وقال في نفسه: "شذي الورطه .. فعلا هو مو اخو سلطان .. طيب سلطان قال انه اليوم بييب اخوه حسين .. اوووف والله ما امسح الدريشه ابدا .. لازم احط ريلي واهرب" ..
ابتسم شادي ومد البطاقه لطارق بأدب وهو يقول: مكتوب طارق مو حسين ..
اخذ طارق البطاقه وقال: ها ..!! عشان المره اليايه تبطل تزعج العالم وانت مو متأكد ..
زادت ابتسامة شادي وقال: اعتذر يا طارق .. لو اموووت ما امسسح سيارتك ..
وقبل لا يستوعب طارق كلامه شرد شادي بعيد عن طارق وقال بصوت عالي وهو يهرب: وعلى فكره ترى لقبك مثل لقبي .. حنا من نفس القبيله واكيد اموون عليك يا البطل المغوار هههه ..
طالع طارق في شادي وهو يهرب وعقله مشوش يحاول يستوعب كل شيء ..
فتح عيونه بصدمه وهو يقول: مثل لقبي ..!!! لا يكووون ..؟!!
صرخ بأعلى صوت: شـــــــــاإآآادي وقـــــــــف ..
وراح بسرعه ناحية الجهه اللي هرب منها شادي ..
وقف طارق من الجري عند نهاية الرصيف ..
طارق: وين راح هالولد ..؟! من اي جهه بالضبط ..؟!
اخذ نفس طويل لأنه تعب من الجري ..
جلس عالكرسي فوق الرصيف وهو يطالع في الجهه اللي ضيع شادي فيها ..
مو داري من اي جهه لف ..؟!
وغير كذا بدأت الامطار تهطل رشاش في البدايه ..
طارق بقهر: غبي .. شلوون ما عرفت ان هو نفسه شادي ..؟! فعلا غبي ..
ضحك وهو يقول: هههه توك تعرف انك غبي ..
رفع طارق راسه بتفاجؤ ولف ورى وشاف شادي واقف وهو شايل شنطته ..
شادي: كنت بنحاش بس استغربت انك تناديني بأسمي فياني فضول اعرف شلون تعرفني ..
ابتسم طارق براحه ..
وقف وجاء عند شادي وجلس على طول شادي وهو يقول: ابي اتأكد انت شادي ولد عمر العالي ..؟!
استغرب شادي وتفاجئ .. هذا شدراه عن اسمه بالكامل ..؟!
ففضل انه يكذب عشان يتجنب اي مشكله يمكن يطيح فيها ..
شادي: للأسف لا .. ابوي اسمه سالم مو عمر ..
زادت ابتسامة طارق وهو يقول: اعطني كتابك عشان اتأكد ..
عصب شادي وقال: اييييه انا شادي ولد عمر .. شتبي ..؟!
فتح طارق عيونه بعدم تصديق وهو يقول: متأكد ..؟!
تكتف شادي وقال: اييه متأكد ..
انبسسط .. فرح .. استانس ..!
واخييييرا لقى واحد منهم ..
لحد الآن مو قادر يصدق ..!!
طارق براحه: واخيرا ..
شادي: انا اسألك شتبي ..؟!
تعالى صوت الرعد القوي في المكان ومن بعدها بدأ ينزل امطار غزيره ..
سحب طارق شادي معاه تحت مظلة احد المحلات ..
ضرب شادي رجل طارق وهو يقول: وقسسم انك بطل مغوار .. ساعدتني عشان لا تتبلل كتبي من الماي ..
جلس طارق قدام شادي وقال بإبتسامه: عارف منو انا ..؟!
شادي بفضول: لا مو عارف ..
طارق: انا ولد عمك علي ..
طالع شادي فيه بصدمه ورجع خطوه لورى وهو يقول: مستحيل .. ابوي ما عنده اخوان .. شلون ذا ..؟!
تنهد طارق وقال: قصه طويله يا شادي .. بس فعلا ابوك عنده اخ اسمه علي واخت اسمها علياء .. وانا ولد عمك علي ..
من بعد كلام طارق قعد الجو بينهم هاديء ما عدا اصوات الرعد واصوات تساقط الامطار واضواء البرق ..
بعد فتره طويله من الصمت سأل شادي بلهفه: يعني تقدر تساعد شهد ..؟!
عقد طارق حواجبه وهو يقول: شهد ..؟! منو شهد ذي ..؟!
شادي: هذي اختي الكبيره .. هي تشتغل عند الدب المتغطرس .. تقدر تساعدها ..
ما فهم طارق السالفه بس قال بإبتسامه: اكييد اقدر اساعدها .. اللحين انت وين بيتك ..؟!
شادي: في عمارة واحد اسمه سالم .. الدب رقم اثنين ..
عقد طارق حواجبه وهو يقول: تقصد في عمارة السالم للشقق المفروشه ..
شادي: ايوه ..
طارق بعدم تصديق: اكييد تمزح ..!!
شادي: لا ما امزح ..
اشر طارق على ورى وهو يقول: تقصد العماره اللي طريجها من نفس طريج هالشارع ..؟؟!!!
شادي: ايوه ..
هز طارق راسه بعدم تصديق وهو يقول: لا اكييد انت متلخبط .. شلون شقتكم في نفس العماره اللي انا فيها ..؟!
هز شادي راسه بلا وهو يقول: انا مو متلخبط .. انا متأكد ..
انصصدم طارق من رد شادي ..
شلون معاه في نفس العماره وهو مو داري ..
طارق: بصراحه صدمتني .. ما توقعت تكونوا في نفس العماره اللي انا فيها ..
شادي: انت اللي صدمتني لأني ما توقعت ان ابوي عنده اخوان ..
ابتسم طارق بعدين طالع في الجو وقال: صعب نطلع في هالمطر عشان نروح السياره .. كتبك راح تنعدم واوراق اللي بالمحفضه راح تنعدم .. ويمكن يصيبنا البرد اذا مشينا من تحته ..
جلس شادي وقال: طيب ننتظر لين يخف شوي ..؟!
اعتدل طارق في جلسته واسند ظهره على باب المحل ..
تنهد وبدأ يفكر في اولاد عمه ..
شهد وشادي ووسيم ..!!
فعلا حس براحه كبيييره لمن قابل واحد منهم ..
لف راسه يطالع في شادي فشافه حاضن نفسه من شدة البرد ..
طالع طارق فيه فتره طويله بعدين نزل الجاكيت حقه وحطه على ظهر شادي ..
طالع شادي فيه وقال: لا مو لازم .. خله لك لأن بلوزتك كمها قصير ..
هز طارق راسه وهو يقول: انا مو بردان .. خذه عشان يدفيك ..
اخذه شادي ولبسه وقال بهمس: شكرا ..
ابتسسم طارق وقال: العفو ..
طالع شادي في طارق فتره طويييله بعدها ابتسم ..
واخييرا حياتهم راح تتغير ..
ارتاح لطارق كثيير ومتأكد انه راح يوقف بجنبهم ويساعدهم ..
تنهد براحه وهو يتخيل بمخيلته الصغيره حياه اخرى ومن نوع آخر ..

لكن السؤال هو .. هل كتبت لهم السعاده فعلا او كتب لهم موسما آخر من التعاسة والشقاء ..؟!

================================================== ==================

12 - 3 - 2014, 07:30 PM

كانت واقفه وهي سانده راسها عالشباك تطالع في المطر بنظرة حزن ..
الدموع تملأ عيونها وهي تشوف هالمطر ..
نفس هالجو وهالمطر كان موجود في نفس اليوم والوقت اللي اكتشفت فيه انها لقيطه ..
نزلت دموعها وهي تتذكر ذاك اليوم ..
امها .. اخوها فيصل .. خبر موت ابوها .. خبر دخول اخوها في غيبوبه ..
وخبر انها مجججرد دخخيله بحياتهم ..
هزت راسها بقوه وكأنها تبغى تنساهم ..
جلست عالكنبه وهي تحاول تشيلهم من بالها ..
ما يستحقون انها تفكر فيهم ..
كلهم كانوا ضدها ويكرهوها ..
الام ما عمرها حضنتها او باستها ..
عمرها ما حسستها انها منهم ابدا ..
نظراتها كلها نضرات حقد وقهر تجاهها ..
ريما ما كانت لها اخت ابدا ..
دايم تصارخ في وجهها ..
دايم تتجاهلها ولا كأنها اختها ..
دايم تعتبرها شيء زائد لا غير ..
فيصل وآآه من فيصل ..
كانت تتمنى يبتسم في وجهها بس ..
بس للأسف كان اشرس واحد فيهم ..
يضربها .. يشتمها .. يتهمها ..
ما عمره قال كلمه حلوه عنها ابدا ..
الاب .. ابو فيصل ..
هو كان السبب الرئيسي في معاناتها ..
ما اعترف لها من صغرها ..
ما فكر ابدا انه يحسسها بقيمة نفسها تجاه نفسها ..
لو وداها الميتم كان بتكون حياتها ارحم من كذا بمليون مرره ..
واخيرا فارس ..
شهقت وبدأت تبكي ..
كلهم كانوا سيئين تجاهها ..
امها تشتمها واخوها يضربها واختها تتجاهلها ..
فارس هو الوحيد في هالعائله اللي وقف جنبها ..
وقف ضد امه وضد اخوه عشانها مع انها مو اخته ابدا ..
عمرها بحياتها ما حست بالحنان كثر ما حسسها فارس فيه ..
كان بالنسبه لها اهلها كلهم ..
تعالت شهقاتها وصوت بكائها اكثر ..
كان يصبرها .. كان يطلب منها انها تتحمل ..
كان يواسيها .. كان يسولف معها كثير ..
تحبه .. تحبه وتتمنى تششوفه ..
هو بالنسبه لها الاخو الوحيد في العالم ..
مافي احد بالعالم يساوي معزة فارس ..
غطت وجهها بإيدها وبدأت تبكي وتفرغ كل اللي في قلبها بالبكاء ..
قعدت حول نص ساعه وهي على هالحال .. حتى راسها صصدع من البكى ..
بعدها قررت انها تروح له .. تزوره ..
قامت وجهزت نفسها واخذت معها مظله وخرجت من العماره ..
استأجرت لها تاكسسي واتجهت للمستشفى اللي زارت فيه ابوها في جو مثل هالجو ووقت مثل هالوقت ..
بعد ربع او ثلث ساعه نزلت من السياره ودخلت المستشفى ..
تقدمت لموضفة الاستقبال وقالت: لو سمحتي ..
الموضفه: اهلين وسهلين ..
اسيل: غرفة المريض فارس عبد الرحمن الرملي رقمها جم ..؟!
دققت الموضفه في ازرار الكمبيوتر بعدها قالت بإبتسامه: غرفه ٢١٧ ..
اسيل: شكرا ..
الموضفه: العفو ..
طلعت اسيل المصعد لين وصلت للدور اللي فيه غرفة فارس ..
بدأت تتمشي بين الغرف بهدوء تااام وتحس بمراره بحلقها ..
ودها تصيح وتبكي ..
جاها هالشعور اول ما قربت من غرفة فارس ..
مدت إيدها بتردد وفتحت الباب بهدوء ..
حست بنسمة هوا بارده اول ما فتحت الغرفه ..
ما تدري هل الغرفه بارده ولا حرارة جسمها ترتفع تدريجيا ..
دخلت الغرفه وطاحت عينها على فارس ..
حطت إيدها على فمها وانهمرت الدموع من عيونها وهي تشوفه بالشكل هذا ..
الاسلاك حول من كل مكان والحروق الواضحه على جانب رقبته وإيده ..
الاكسجين اللي بفمه والاجهزه اللي حوله ..
تقدمت اكثر لين وقفت عند السرير تطالع فيه ..
اما هو فمازال في الغيبوبه ومو داري عن اي شيء حوله ..
دمعت عيون اسيل وقالت بهمس: فارس .. فارس رد علي .. انا اسيل يا فارس ..
مدت إيده ومسكت إيده وقالت بهمس: فارس عفيه اصحى .... فارس ابـ ـيـك تسساعدني .. قووم عششان خاطر اسسوله ..
ارتجف صوتها اكثر وهي تقول: انا احتاجك يا اخووي .. قووم ..
لفت بنظرها عليه .. عيونه فمه إيده ..
تتمنى شيء يتحرك بس للأسف مافي شيء ..
جلست عالكرسي اللي جنب سريره وبدأت دموعها تنزل وهي تقول: فارس محد باجي لي غيرك .. حتى آرثر مات وتركني .. الشخص الوحيد اللي كنت متأكده انه مستحيل يقصر معاي مات ..
اختنق صوتها وهي تقول: لا تتركني انت بعد ..
طالعت فيه تنتظر منه اي استجابه ..
بس من دون فايده ..
حطت راسها عالسرير وبدأت تبكي ..
مخنوقه وتبي احد تفضفضله ..
ودها تشكي همها لأحد يهمه امرها ..
ودها تطلع اللي بقلبها لأحد فاتح قلبه لها ..
ودها تسـ.....
انقطع بكائها فجأه ورفعت راسها تطالع في فارس ..
طالعت في ايده اللي ماسكتها ..
ايييه تحرك ..
حست بحركة اصابعه ..
وقفت وهزته على خفيف وهي تقول: فارس .. فارس انت صاحي صح ..؟! فــــارس ..
بس ما حصلت منه اي ردت فعل ..
معقوله تتخيل ..؟!
لا هي ما تتخيل .. هي متأكده ..
حست فيه .. حست بحركته ..
هذا يعني انه راح يصحى من الغيبوبه ..
نزلت دموعها من شدة فرحها ..
انفتح الباب في هالوقت فلفت اسيل بسرعه وبخوف تشوف مين اللي دخل ..؟!
كل شيء تتمناه إلا انه يكون احد من اهلها سابقا ..
ما تبغى تشوف اي واحد منهم ابدا ..
ارتاح قلبها لمن شافت انه احد الممرضين ..
جاء الممرض وبدأ يغير كيس المغذي واسيل تطالع فيه ..
اسيل: لو سمحت ..
الممرض: نأم ..
اسيل: قبل شوي اخوي تحرك .. يعني هو صحي ولا لا ..؟!
رفع الممرض راسه يطالع فيه بعدين لف يطالع في احداثيات الاجهزه واسيل تنتظر جوابه ..
سمعت اصوات من برى الغرفه وانصدمت ..
هالاصوات تعرفها تماما ..
خرجت بسرعه برى الغرفه تطالع وفعلا طلع هو نفسه فيصل واقف يكلم احد الدكاتره ..
لفت وجهها على طول بعيد عنهم وراحت من الجهه الثانيه ..
مشيت في السيب متجهه للمصعد وهي ودها ترجع وتطمئن على حالة فارس ..
بس مستحيل ترجع وفيصل موجود ..
مستحيل ترجع واحد من اهلها موجود ..
صقعت في طريقها بواحد بالغلط فقالت: سوري ..
طالع الولد فيها ببرود ولا رد عليها ..
دخل المصعد في نفس الوقت اللي دخلت فيه اسيل ..
ضغط الزر على آخر طابق عالاسفل ..
بعدها حط إيده في جيبه وهو مسند ظهره عالجدار يطالع فيها بقمة البرود ..
اما اسيل فكانت واقفه وهي تطالع في الارض بسرحان تفكر ..
تكلم الولد وقال بهدوء: انتي اسيل الرملي صحيح ..؟!
تفاجأت اسيل ..
لا انصصدمت ورفعت راسها تطالع في الولد ..
اول شي جذب انتباهها هو جرح في حاجبه الايسر ..
طالعت في الولد وهذي هي المره الاولى اللي تشوفه فيها ..
كان مظهره الخارجي يدل عالرجوله والهيبه والشخصيه القويه ..
هزت راسها بإيه وهي تقول: ايه اسيل ..
هزت راسها بإيه وهي مو داريه ليش جاوبت على سؤاله ..
طالع فيها هذا الشخص اللي ما كان غير مهند وقال في نفسه: "هذي البنت اللي تضارب طارق وغاب يومين عشانها" ..
ترددت اسيل بس في النهايه تشجعت وقالت: شدراك اني اسيل ..؟!
طالع فيها بنضراته البارده لفتره بعدين قال: شفتج في المحل امس وسألت عن اسمج ..
طالعت اسيل فيه بعدين قالت: وليه سألت عن اسمي ..؟!
انفتح باب المصعد وخرج مهند وهو يقول ببرود: اسئلتج كثيره ..
راح واسيل تلاحقه بعيونها المتسائله ..
ليش سأل عن اسمها ..؟!
اكيييد فيه سبب ..
حست ان الفضول بيذبحها ..
خرجت من المستشفى واستأجرت لها سيارة تاكسي ..
ركبتها واتجهت للسوق عشان تشتري لها لوازم تحتاجها قبل لا يبدأ دوامها ..

================================================== ==================

وقف بدر سيارته قدام المستشفى الخصوصي ونزل منها ..
دخل المستشفى واتجه لناحية الغرفه اللي فيها إياد ..
فتح الباب ودخل وهو يقول: هههههه اهليين إياد ..
فتح إياد عيونه وطالع في بدر وهو يقول بضجر: ويع .. لا تضحك ..
بدر: هههههه ابسألك جم مره خشيت فيها هالمستشفى ..؟!
لف إياد وجهه وهو يقول: مدري ..
جلس بدر عالكرسي وقال: صدقت لمن قلت ان المستشفى بيتك الثاني ..
طالع إياد فيه وقال: خلنا نغير الموضوع ..
بدر: اوكي براحتك ..
إياد: جم يبت انا في الاحياء ..؟!
بدر: هههه جم تتوقع ..؟!
إياد: مدري ..
بدر: يبت خمسه يالفاشل ..
إياد: ههههه اول مرره آخذ خمسه .. هذا كله من دعاء ولد العم .. اصلا انا الغلطان اللي اقول له ادعيلي ..
بدر: هههههه طيب شفيك تضحك وكأنك مبسوط ..؟!
إياد: ولد العم مو سهل .. دعائه مستجاب ..
بدر: عيل انتبه منه خخخ ..
إياد: تصدق انه هو اللي ساعدني في مهاوشتي مع جراح وهو اللي يابني هني ..؟!
بدر: امممآ ..؟!!!
إياد: والله من جد .. قلت لك انه يحبني بس انت ما صدقت ..
بدر: ههههه من فين لك كل هالثقه ..؟!
إياد: هههه يمكن منه ..
ابتسم بدر وانتبه لجوال إياد اللي يدق عالصامت ..
بدر: إياد موبايلك يدق ..
طالع إياد في الجوال ولف وجهه بضيقه لمن شاف انه ابوه ..
طالع فيه بدر بإستغراب بعدين قال يغير الجو: إياد شصار مع جراح ويزن ..؟!
لف إياد عليه وقال: كسروا دريشة سيارتي .. قهروني بتصرفهم ..
بدر: ههههههه طيب وبعدين ..؟!
إياد: بس كانوا يبوون مني رقم الحساب حق البطاقه اللي سرقها ضاري مني .. رفضت فدخلت بمهاوشه مع جراحوه الججلب .. وكان يستعمل سكين وعشان جذي موقفي كان ضعيف وبقوه فياء بعدين سامي وساعدني وبعدها هربوا ..
بدر: ليش هربوا ..؟!
هز إياد كتفه بما ادري ..
بدر: طيب لمتى بتقعد ساكت عنهم ..؟!
إياد: اذا عندك طريجه فأتحفني ..
بدر: مدري .. حاول تدبر لك طريجه ..
إياد: مافي غير اني اشتكي عليهم بس المشكله ان ابو الاستاذ جراحوه مركزه كبير في الشرطه ..
بدر: فيه طريجه وحده بس ..
إياد: ايش ..؟!
بدر: نحاول نستدرج هالشله بمجان خارج الدوحه .. يعني نكون بعيد عن المدينه اللي لأبو جراح سلطه فيها .. مثلا الخور ونشتكي عليهم هناك وبجذي ما يقدر ابو جراح يتستر عليهم لأن هالمنطقه مو من صلاحياته ..
إياد: قد صلحناها قبل ..
بدر: عارف وما ضبطت .. نحاول نصلحها مره ثانيه بس بخطه افضل واضمن ..
إياد: صدقني ما ينفع .. لأنهم صاروا اكثر حذر من قبل .. لازم نطلع طريجه ثانيه ..
بدر: طيب قول لأبوك يتدخل ..
سكت إياد فتره بعدين قال: قد قلت له من قبل بس ما قدر .. واللحين هو معين جاسوس على ابو جراح عشان يطلع عليه مخالفات وينفصل من شغله ..
بدر بتفكير: ابو جراح .....!!! إياد يت في بالي فكره بس خلني اتأكد اول منها بعدين اقولك ..
طالع إياد فيه فتره بعدين ضحك وقال: هههه اممآ تعرف تفكر يا بدر ..
طالع فيه بدر بنص عين وهو يقول: ليه عبالك اني جحا ..؟!!
إياد: ههههههه حلوه .. بالله اقين يا بدر ..
بدر: اقول بطل استهبال وقولي انت ليه ما ترد على ابوك اللي يتصل عليك من اول ..؟!
اختفت الابتسامه من وجه إياد وقعد ساكت فتره طويله بعدها قال: بدر .. كنت ابي اسألك .. انت مو اول حكيتني عن بنت اسمها اسيل ..؟! انت كنت صاج في كلامك ولا لا ..؟!
ابتسم بدر: كنت صاج .. لا ومتأكد انها اختك بعد الحجي اللي قالته لي لبنى امس ..
إياد: اي حجي ..؟!
بدر: قالت ان ذيج البنت طلعت مو من عائلة الرملي .. هي لقيطه وعايشه تحت مسمى بنتهم الميته .. لمن مات ابوها اتضحت السالفه وانكشفت ..
هز إياد راسه بلا وهو يقول: مستحيل .. ابوي قال انها ماتت .. اقصد انه مستحيل يكون جذاب ..
بدر: ............................
طالع إياد في جواله فتره طويييييله وهو يفكر ..
لف على بدر وقاله: رد عليه وقول له اني بالمستشفى ..
اخذ بدر الجوال ورد على ابو إياد ..
اما إياد فكان يطالع في بدر وهو يفكر ..
مثل ما قال من قبل .. لازم يسأله ويستفسر عن كل شيء ..

================================================== ==================

12 - 3 - 2014, 07:31 PM

في العصر ..
هدأ الجو تقريبا وانتهت الامطار ..
وهذه هي سيارة منصور تنطلق بسرعه لناحية بيت ام فيصل عشان يودي بنتها تطمئن عليها ..
كان يسوق وهو حددده معصب ومتنرفز ..
لف على ريما وقال: اللحين وش استفدتي من حركتج البايخه الغبيه .. ما رحت الجامعه بسببج ..
ريما ببرود: مو مشكلتي ..
منصور: إلا مشكلتج ونص .. انا كاتب صحيني هذا يعني لازم تصحيني ..
ريما: لو قلتها بلسانك جان صحيتك بلساني .. بس انت كاتبها بورقه فراح اصحيك بورقه .. هذي هي استراتيجيتي في التعامل ..
ضرب الدركسون بقهر .. فاتته اليوم محاضره من اهم المحاضرات بسبب استراتيجيتها الغبيه ..
وهو مسرع بالطريق مرت من جنبهم شاحنه مليانه بقر ..
فقال عشان يقهر: يقربولج ذولا ..؟!
طالعت في البقر بعدها قالت: ايوه ..
منصور بإبتسامه: وربي كنت حاس .. وايش هي صلة قرابتج فيهم ..؟!
ريما ببرود: اهل زوجي ..
فتح منصور عيونه بصدمه وهو يسمع كلامها ..
اسرع اكثر بالسياره من شدت قهره ..
كان يبي يقهرها بس قلبت السالفه لمصلحتها ..
عندها برودة اعصاب تنرفزه ..
تقهره بتصرفاتها وكلامها ..
ترفع ضغطه بحركاتها وغرورها ..
هذا غييير انها اصلا مو بنت ..
يعني المفروض يكرهها بس مو قادر .. وهذا اللي بيجننه ..
يحاول يكرهها بأي طريقه بس ما يقدر ..
يعيد في راسه شريط احداث ذيك الليله عشان يكرهها ..
بس كل ما تذكر استحقرها بس ما كرهها ..
يبي يكرهها .. يبي اي شيء يساعده في كرهها ..
بس مافي شي ..
يحبها حب جنون ..
حب مو طبيعي ابدا ..
اكثر من مره قعد مع نفسه يفكر في حياته معاها ..
ونهاية كل تفكير يقرر قرار واحد بس ..
هو انه يجلس معاها ويسألها .. هل هي بنت او لا ..؟!
ان كانت بنت فخلاص انتهى كل شيء وراح يفتح معاها صفحه جديده ..
وان كانت لا فراح يطلقها ويبعدها عنه عشان يقدر ينساها ..
ولحد الآن ما جلس معاها لأنه عارف وش بيكون جوابها ..
لأنه عارف ومتأكد انها مو بنت ..
وعشان كذا ما يبي يسألها عشان ما يطلقها ..
يحبهـــــا بششكل يجننه ..
حياته متوتره جدا ..
حياته ملخبطه عالآخر ..
يبي ينهي هالموضوع بس مو بالطلاق ..
يبي يسألها عشان يخلص وفي نفس الوقت ما يبي لأنه قد سألها قبل كذا وجاوبته ..
مع انها جاوبته وقالت له انها مو بنت بس قاعد يقنع نفسه انها كانت في ذاك الوقت ملخبطه ومو قصدها ابدا ..
يدور ألف حجه وحجه عشان ما يطلقها ..
وقف قدام بيت ام فيصل وقال: الساعه سبعه بأيي اخذج ..
فتحت ريما باب السياره ونزلت ..
منصور: ريما ..
لفت وطالعت فيه فتردد كثير بعدها قال: انتبهي على نفسج ..
طالعت فيه فتره بعدها قفلت باب السياره وراحت لبيت امها ..
غمض منصور عيونه بقوه وهو مقهور من تصرفاته الحنونه اللي تطلع غصب عنه ..
حرك السياره وراح المستشفى يزور صديقه فارس ..
اما ريما فدخلت البيت وشافت ام مايد عند امها ومعها بنتها الصغيره غاده ..
رسمت على وجهها ابتسامه وسلمت على ام مايد ..
ام مايد: اهلييين ريما شخبارج ..؟!
ريما: الحمد لله تمام شخبارج انتي ..؟!
ام مايد: والله بخير الله يعافيج ..
ام فيصل: ليه ما يبتي بنتج غيدا بدل ما تقعد في البيت بروحها ..
ام مايد: والله حاولت فيها بس مو راضيه تيي .. خلاص خلوها تقعد على راحتها ..
جلست ريما عالكنبه فجلست غاده جنبها وقالت بصوت منخفض: ريما ..
طالعت فيها ريما وقالت: نعم ..
غاده: وين اسيل ..؟!
سكتت ريما فتره بعدها هزت كتفها وهي تقول: مدري ..
غاده: طيب صحيح انها لقيطه ما عندها اهل ..؟!
انصدمت ريما من غاده .. ما كانت تتوقع انها تعرف ..
ريما بهدوء: ايه صحيح ..
غاده: طيب خلاص قولولها تيي تعيش عندنا .. راح نكون بمثابة اهلها واكثر ..
تنهدت ريما وقالت: شلون نقول لها واحنا ما نعرف وينها ..؟!
طالعت غاده فيها بحزن وقالت: انا دايم افكر فيها .. والله انها طيبه ..
ابتسمت ريما بسرحان وهي تقول: فعلا ..
سرحت ريما شوي في افكارها وقالت في نفسها: "كانت طيبه بس انا قابلت طيبتها بالسحر .. وكل هذا عشان آرثر .. شلون كنت افكر يوم فضلت آرثر على اسيل" ..
خنقتها العبره فقامت وقالت: استأذن شوي ..
وطلعت فوق لغرفتها ..

.................................................. ..............

في جهه اخرى وفي غرفه اخرى ..
كانت غيدا جالسه عالارض ومسنده ظهرها على دولاب الملابس وهي سرحانه ..
غيدا: هبله .. كنت هبله .. شلون سيطرت علي فكرة الانتقام .. الانتقام شيء مو كويس ابدا .. نهايته راح تكون في الهاويه ..
سكتت شوي بعدين قالت: لا احسسن يستاهل .. هو السبب .. لو مالعب بمشاعري ذاك الوقت جان حياتي احسن من جذي ..
حطت راسها بين إيدها وهي حاسسه بصداع ..
صراعها النفسسي ما تدري متى بيخلص ..؟!
ما تدري هل اللي تصلحه صح او غلط ..؟!
هي ما جت لهالجامعه إلا عشان تنتقم ..
بس ما تدري هل تصرفها ذا صحيح او لا ..؟!
قعدت فتره طويله وهي تنتقل من تفكير إلى تفكير ..
من الانتقام إلى الرحمه ..
من ضميرها إلى عقلها وقلبها ..
وكل ماله راسها يزيد الصداع فيه ..
فتنهدت وهزت راسها بلا وكأنها تبي تشيل هالافكار وترتاح ..
قامت واخذت لها دش يعدل لها راسها ..
خرجت من الحمام وبإيدها المنشفه تنشف شعرها الناري ..
وقفت فجأه عن التنشيف وطالعت في نفسها بالمرايه ..
غيدا بقهر: السؤال اللي يقهرني هو لييه سمعت كلام ريان وانقلعت من جدامهم ..؟! شلووون اثر علي هالغبي ..؟!
نشفت شعرها بعنف ورمت المنشفه عالكرسي وقالت: طلع شكلي غغبي وبايخ .. اووووف ..
اخذت لها حبتين باندول وشربت بعدها مويه وانسدحت عالسرير ..
بتاخذ لها غفوه لعل وعسى تنسى احداث هاليوم عشان لا تزعج نفسها بالتفكير فيها ..
غمضت عيونها ونامت ..

================================================== ==================

على شاطئ البحر وفي الليل ..
كان الجو راايق وباارد وهاادي ..
كان جالس بسيارته وفاتح بابها يطالع في الجو ..
سرحان وكل شوي يطالع في جواله ..
ينتظر اتصال او رساله او اي شيء ..
تنهد وقال: ليه تأخرت ..؟!
سكت بعدين كمل: اصبر شوي .. البنت ما يمديها تسوي كل شيء بسرعه ..
تنهد للمره الثانيه ونزل من سيارته السودا ..
وقف قدام البحر يتأمله فتره طويله ..
ابتسم وهو يطالع في البحر ويتذكر لمن طاحت فيه فنزل يساعدها ..
كانت ذاك الوقت غابت عن وعيها وهي بين آيادي الاخطبوط العملاق ..
تأذت ايده ذاك الوقت بس ما كان مهتم كثر ما هو مهتم بمساعدتها ..
ابتسم وهو يتذكر المواقف اللي صارت بينهم فوق ظهر السفينه ..
اختفت ابتسامته وهو يتذكر كلامها ..

"انا ما احبه .. انا اموت فيه"
غمض عيونه وهو يتذكر ذاك الموقف اللي صدمه بالكامل ..
يحبها ويموت فيها بس انصعق لمن قالت له انها تحب آرثر ..
جلس عالارض وتكى بإيده على ورى وهو يطالع في السماء ..
ابتسم وهو يقول: وينج يا اسيل ..؟! من اي طريج رحتي ..؟! صدقيني ابي اساعدج وبس ..
كمل بصوت مخنوق شوي: راح اكون لج مثل الاخ زي ما تبين ..
تنهد وهو يتذكر الاحداث اللي صارت اليوم الصباح ..
كان يبي يوصل لأسيل بأي طريقه بس كان جوالها دايم مغلق فأضطر يروح الجامعه ..
يبي يشوف صديقتها المقربه ندى ويسألها لعل وعسى تكون عارفه شي ..

:::::::::::::::::::::::::::::::::::::::::::::::::: ::::::::::::::::::::::
وقف سيارته قدام باب الجامعه في الصباح بدري وبدأ يراقب الطلاب ..
يدور بعيونه عن ندى ..
اكثر من مره قالت له اسيل انها صديقتها اللي تشتكي لها كل شي ..
هو ما قد شاف ندى غير مره وحده لمن جت قبل فتره للبيت تسأل عن اسيل ..
ذاك الوقت كان موجود وشافها ..
دار بعيونه بين الطلاب ..
انتظر حول نص ساعه ليين لمحها نازله من سيارة اخوها ..
نزل من سيارته وراح عندها وقال: اهلين ندى ..
طالعت فيه ندى وقالت: اهلين .. اي خدمه ..؟!
ابتسم وقال: انا وائل ولد عم اسيل ..
ندى: آآه عرفتك .. اهليين كيفك ..؟!
وائل: الحمد لله تمام .. اممم ندى ابي منج خدمه ..
ندى: تفضل ..
وائل: اكثر من مره قالت لي اسيل انج رفيجتها المفضله اللي تقولج كل اسرارها ..
ابتسمت ندى بحزن ..
وائل: ندى ابي اسألج .. انتي تعرفين مجان اسيل ..؟! بليييز يا ندى لا تخبين علي ..
ندى: وربي اني مو عارفه .. اتمنى اني اعرف مجانها ..
وائل: طيب ما تعرفين وين ممكن تروح ..؟! انتي عارفه اسيل اكثر مني وعارفه وش الاماكن اللي تحبها والاماكن اللي تكرهها ..
ندى: فكرت كثير بس بجد مو داريه ..
طالع فيها وائل فتره بعدها قال: طيب اسمعي .. بأعطيج رقمي واول ما توصلين لأي خيط اتصلي علي .. اوكي ..؟!
هزت ندى راسها وقالت: اوكي ..
:::::::::::::::::::::::::::::::::::::::::::::::::: ::::::::::::::::::::::

وائل: ولحد الآن ما اتصلت ابدا .. وين ممكن تكوني يا اسيل ..
وقف وراح لسيارته وهو يقول: مهما كان راح ادور عليج حتى لو اضطررت ادور خارج الدوحه بعد ..
ركب سيارته وشيك على جواله يشوف ان جاه اتصال او رساله ..
بس للأسف ما جاه شي ..
حرك سيارته متجه لمكان مو عارف وش هو ..

12 - 3 - 2014, 07:35 PM

|$[ البارت الثاني عشر الجزء الاول ]$|

انفتح باب المصعد وخرج منه طارق وشادي ..
عقد طارق حواجبه وهو يقول في نفسه: "مو هذا نفس الدور اللي فيه شقتنا ..؟!"
اتجه شادي ناحية شقة اخوانه وقال: هنا ..
راح طارق عنده ودخل هو وشادي للداخل ..
فتح شادي الابواب وهو ينادي على اثير ووسيم ..
اما طارق فكان واقف وهو يدور بعيونه عالصاله وهو مستغرب ..
كانت الصاله منضمه تماما وما فيها اي اغراض خصوصيه ..
وفي نفس الوقت مستغرب ان باب الشقه كان مفتوح ..
خرج شادي من احدى الغرف ووجهه مقلوب ..
عقد طارق حواجبه وقال: شادي شفيك ..؟!
شادي بدهشه: الغرف فاضيه .. مافيه اغراضي ولا اغراض اثير ووسيم ..
تفاجئ طارق من كلامه وهو يقول: شلون يعني اغراضهم مو مويوده ..؟!
هز شادي كتفه ويقول: دورت في كل مجان بس مالقيت شيء من اغراضنا ..
انصدم طارق من الوضع ..
هم مو موجودين واغراضهم مو موجوده ..
هذا ما يعني غير شيء واحد ..
... طلعوا من البيت ...
..........: انتم ليه هنا ..؟!
لفوا ناحية الباب يشوفون مين اللي يتكلم ..
كان رجال في الثلاثين من عمره لابس لبس التنضيف ومعاه ادوات التنضيف ..
طارق بإستغراب: منو انت ..؟!
العامل: انتم اللي مين ..؟! هذه الشقه خلاص طلعوا اهلها منها وما باجي غير اننا ننضفها ..
طارق بصدمه: شلووون يعني طلعوا اهلها منها ..؟؟!!!!!
العامل: ما دفعوا إيجار هالشهر مقدما فأنطردوا ..
فتح طارق عيونه من الصدمه وقال شادي بقهر: شلووون تبونا ندفع وانتم زودتم الايجار كثيير .. ما عندنا غير فلوس قليله والباجي مع شهد .. احنا قلنا انتضروا يومين عشان تييب لنا شهد الفلوس .. لييييه ما تنتظرون ..؟!
طالع طارق في شادي وهو يتكلم بعدين لف يطالع في العامل ..
العامل: قوانين هالعماره غير .. ما عندهم شيء اسمه انتظار .. كل شيء في وقته ..
شادي بإنفعال: حرااام عليكم .. لو انتظرتوا يووميين ما راح ينقص منكم شيء .. مديركم ذا وااحد اناني وحماار ..
العامل بصراخ: اسسكت وانطـــــــم يالبــــزر ..
عصب طارق وقال بحده: جـــــــب .. لا تصارخ عالولد بالطريجه ذي لأقص لسانك ..
انقهر العامل فتكتف وقال: طلعوا من الشقه بسرعه .. طلعوا ..
شادي بعناد: انا ما راح اطلع ابدا .. راح تيي شهد وتدفع لكم الفلوس ..
العامل بحده: قلت اطلعوا من هنا ..
طارق: محد راح يطلع من هالشقه .. واذا مستعيلين عالايجار فراح ادفعه لكم اللحين ..
حرك إيده وكمل: واللحين ياللا اطلع من هني لأنك ازعجتنا ..
ابتسم شادي وقال للعامل بإستهزاء: بسرعه اطلع ولا تأخرنا .. ياللا اطلع .. اطلع ..
عصب العامل وقال: لكم ساعتين ان ما دفعتوا راح اخبر صاحب العماره وهو راح يأدبكم ..
اخذ اغراضه وطلع ..
لف شادي على طارق وقال: طارق وين راحوا اثير ووسيم ..؟!
هز طارق كتفه وهو يقول: مدري .. حسبي الله عليه هالسالم .. ما ادري قلبه ذا مصنوع من ايش .. انسان جشع ..
لف على شادي وقال: انت قلت ان اختك الكبيره شهد تشتغل .. وين مجان شغلها يمكن اثير ووسيم راحوا لها ..؟!
هز شادي راسه وهو يقول: ما راحوا لها .. لأننا اصلا ما نعرف وين المجان ..
طارق: طيب ما عندكم رقمها ..؟!
شادي: ايوه عندنا بس لها فتره طويله مقفول موبايلها .. اكييد الدب المتغطرس اخذه .. ججلب ..
كان بيسأله طارق عن شغل شهد اكثر لأنه مو عارف اي شي عنها بس بطل لأن هذا مو وقته ..
الاهم هو انه يعرف وين اثير ووسيم ..
طارق: اسمع انا بأخليك عند رفيجي انس وبروح ادور عليهم .. اكيد هم قريبين من هني ..
شادي: لا .. بروح معاك ..
طارق بحده: ايلس عند انس ..
شادي بعناد: ما راح ايلس .. بروح ادور عنهم لوحدي ..
عصب طارق فمسكه من ايده وسحبه وراه بالقوه وشادي يحاول يبعده بس مو قادر ..
فتح طارق باب شقته ودخل هو ومعاه شادي ..
كان انس جالس يذاكر فلمن شافه قال: هههه واخير فتحوا لكم الطريج ..
شوي عقد حواجبه وهو يشوف شادي ..
طارق: انس خل ذا الولد عندك وانتبه لا يهرب ابدا .. انا عندي شغله بأسويها وارجع ..
انس: منو ذا ..؟!
طارق: شادي .. ولد عمي ..
انس بصدمه: لقيته ..؟؟!!!!
حاول شادي يبعد ايد طارق وهو يقول: فج إيدي آآه .. عمى ذي إيد غوريلا مو انسان ..
انس: شفيه جذي ..؟!
طارق: قصه طويله .. خذ امسكه واحذر من انه يهرب وانت ما تدري .. تراه داهيه ..
قام انس ومسك شادي اللي بدأ يضاربه اول ما مسكه ..
انس: آآه اهدأ لا تضارب ..
دخل طارق غرفته وفتح درجه واخذ منه مبلغ كبير بعدها طلع من الغرفه ..
شادي بعصبيه وهو يطالع في طارق: يا حمار اتركوني .. ذولا اخواني مو اخوانك ..
طارق: اشش خلك مؤدب مع انس اوكي ..؟!
شادي بقهر: انت اصلا اكبر حمار .. اكرهك يا جلب ..
حرك طارق إيده وهو يقول: لمن ارجع لي حساب مع لسانك الطويل ..
خرج وقفل الباب وراه ..
شادي بصراخ: والله لأوريــــــك يا ططـــــــــاإرق ..
دخل طارق المصعد ونزل للدور الارضي ..
خرج واتجه لمكتب الإيجارات ..
دخل المكتب فطالع فيه الرجال اللي جالس وقال: اهليين طارق .. غريبه ياي .. انتم دفعتم امس ..
طارق: ياي ادفع للشقه اللي بإسم شهد العالي ..
هز راسه وفتح الاوراق اللي قدامه بعدين قال: بس خلاص انا طردت اصحاب الشقه لأنهم تأخروا ..
ضرب طارق ايده بالطاوله بقوه وقال بحده: رجع اسم الشقه لهم .. بسسرعه ..
انفجع الرجال بعدين قال: ليه ما عندك اسلوب محترم في الحجي ..؟! انت بجذي كأنك تهددني ..
طارق وهو يضغط عالكلمات: اخـلــص ..
تنهد الرجال وقال: اوكي راح ارجع العقد وآخذ الايجار منك .. بس لعلمك راح اخبر الرئيس سالم بالامر ..
رمى طارق الفلوس عالطاوله وقال: وياليت تقول بعد ان طارق يتمنى انك تفضي نفسك عشان يقابلك ..
خرج وقفل الباب وراه وطلع من العماره ..
اتجه للبواب وقال: اهليين يا عم ..
البواب: اهلا يا طارق .. كيفك ..؟!
طارق: الحمد لله تمام .. يا عم حبيت اسألك .. فيه بنت طلعت هي وولد من العماره اليوم ..؟!
البواب: والله فيه كثير من الاولاد والبنات اللي طلعوا .. بس جم عمرهم ..؟!
طارق: الولد ثمان سنوات والبنت اكبر منه بس مو عارف عمرها ..
البواب بتفكير: ايه طلعوا اثنين بنفس المواصفات .. بس كانوا شايلين معهم شنط وراحوا في سياره تنتظرهم ..
طارق بإستغراب: سياره ..؟؟!!!
البواب: ايه .. سيارة اجره ..
طارق في نفسه: "يالله وين راحوا ذولا" ..
طالع في البواب وسأله: طيب من اي طريج راحوا ..؟!
اشر البواب عاليسار وهو يقول: لو ما خانتني الذاكره اتوقع انه من هالجهه ..
طارق بإبتسامه: شكرا يا عم ..
البواب: العفو ..
راح طارق للسياره وانزعج من الشكل المرسوم عالشباك ..
ركب واضطر يطفي مكيف السياره عشان يفتح الشباك وما تبان الرسمه ..
حرك سيارته لجهة اليسار مع انه مو داري فين يدور ..

================================================== ==================

في الظهر نزلت روان من الدرج وهي تتثاوب ..
ما شبعت من النوم مع انها نايمه امس بدري ..
شافت قدامها احدى الخدم ترتب كالعاده ..
روان: هيييه سيناتي ..
سيناتي: نأم ..
روان: وين رشود ..؟!
سيناتي: سير راشد مو موجود ..
روان: عيل صلحي لي غدا ..
سيناتي: طيب انتا ايس يبغى ..؟!
حركت روان ايدها بلا مبالاه وهي تقول: اي شي ..
سيناتي: حاضر ..
جلست روان عالكنبه وفجأه تذكرت وقالت بسرعه: سيناتي لحضه لحضه وقفي ..
لفت عليها وقالت: نأم ..
روان: ابيج تسوين لي السوتشي ..
سيناتي: ايس هادا سوتشي ..؟!
روان بحماس: هاذي اكله يابانيه .. شفت امس حلقات الانمي حق كاي .. الولد اللي بالسوني .. اعطوه هالوجبه عشان ياكل بس ما اكل غير لقمه .. يا حياتي مرره يحزن ..
سيناتي: بس انا ما يعرف يسوي هادا اكل ..
روان: قولي لريتا لأنها تعرف ..
سيناتي: حادر ..
راحت فأخذت روان الريموت تقلب في التلفزيون ..
من قناه لقناه .. لحد الآن ما قررت وش تبغى ..
شوي جتها سيناتي مسرعه وتقول: روان روان تئالي ..
لفت عليها روان وهي تقول: بسم الله شفيج ..؟!
سيناتي: هادا بيبي حق شهد يبكي واجد ..
روان: يا حياتي ..
قامت وراحت لغرفة شهد ..
دخلت وشافت خدامه عند شادن اللي تصارخ وتبكي ..
جت روان وشالت شادن وهي تقول: يا قلبو خلاص اهدأي ..
بس ما زالت شادن تبكي وتصارخ ..
طالعت روان في الخدامه اللي كانت عندها وقالت: وين شهد عشان تسوي لشدوون حليب ..
طالعت الخدامه في سيناتي وسيناتي تطالع فيها ..
روان بإستغراب: شفيكم تطالعون في بعض ..؟!
سيناتي: اسألي سير راشد .. هوا يعرف وين شهد ..
عقدت روان حواجبها وهي تقول بتعجب: راششد ..!!!
قعدت فتره تطالع فيهم وهي تفكر بعدين قالت: طيب وحده منكم تروح تصلح حليب لشادن ..
سيناتي: انا ما يعرف ..
الخدامه الثانيه: حتى انا ما يعرف ..
روان: قولوا للخدامه المصريه .. اكيد تعرف .. بسسرعه ..
سيناتي: حادر ..
وراحوا عنها ..
جلست روان عالسرير وهي تهز شادن عشان تسكت وفي نفس الوقت تفكر ..
وين شهد ..؟!
وايش يقصدون لمن قالوا راشد يعرف وينها ..؟!
بدأ صراخ شادن يخف بس مازالت تبكي ..
ابتسمت روان وهي تطالع في شادن وقالت: ياليت عندي اخت صغيره مثلج .. يا حياتي تدنن ..
شوي دخلت سيناتي ومعها الرضاعه وقالت: خلاس سميحه سوت حليب ..
روان: اوكي خذي شدوونه وشربيها ..
اعطتها روان شادن بعدها طلعت وراحت لغرفتها ..
اخذت جوالها واتصلت على راشد ..
روان: الله يستر منك يا خوي ..
دق ودق ليين قفل ..
تأففت روان واتصلت مرره ثانيه ..
دق ودق وفي آخر رنه رد ..
روان: ما بغيت ترد يا حضرة الراشد ..
راشد بهدوء: روان ..!
روان بإستغراب: راشد شفيك ..؟!
راشد: ما فيني شيء ..
روان: طيب وين شهد ..؟! لمن اسأل الخدم يقولون اسألي راشد .. وينها ..؟!
سكت راشد فتره طويله وما رد عليها ..
روان: راشد ليش ما ترد علي ..؟!
كملت بخوف: راشد انت وش مسوي بشهد ..؟! راشد ياوبني ..
راشد: انا بالمستشفى ..
روان: اي مستشفى وليش ..؟!
راشد: المستشفى اللي دايم نروح له ..
روان: طيب ليش في المستشفى ..؟!
راشد بصوت منخفض: شهد في غرف الطوارئ .. و .. و مدري .. يمكن حيه .. و .. يمكن لا ..
انصصدمت روان من رده وقفلت الجوال في وجهه ..
قامت ولبست لها اي لبس بسرعه ونزلت من الدرج ..
خرجت للحوش وركبت مع السواق سعود واتجهت للمستشفى ..

.................................................. ................

وهناك عند قسم الطوارئ ..
كان راشد جالس على احد كراسي الانتظار الخارجيه ..
خايف انها تموت ..
اذا ماتت فراح يصير قاتل ..
هو يضرب يشتم يهين الناس .. بس عادي عنده ..
كل شيء يسويه عادي إلا القتل ..
إلا القتل فهذا مو عادي ..
مو عادي ابدا ..
حط راسه بين ايده وهو قلقان ..
الصباح كانت طايحه قدامه مثل الجثه ..
مافي شيء فيها يتحرك ابدا ..
ارتبك .. توتر .. ما عرف يتصرف ..
كان يطالع فيها بصدمه وبس ..
في النهايه اخذ جواله واتصل عالطوارئ يجون ياخذوها ..
ومن بعدها ما يعرف شيء ..
ما يعرف ان كانت ميته او حيه ..
جالس في الكراسي الخارجيه ..
ما دخل يسأل عن حالتها ..
خايف من الاجابه ..
يخاف يكون الجواب صدمه عنيفه له ..!
تنهد وقال: ان شاء الله ما اكون قاتل .. يا رب مابي اكون قاتل .. مستحيل اكون قاتل ..
قاتـــــــــل ..!!
كلمه خلته يهذي فيها طول الوقت ..

دخلت روان المستشفى وشافت راشد جالس عالكراسي ..
جت عنده وقالت بخوف: راشد وين شهد ..؟!
رفع راشد راسه وطالع فيها ..
جلست روان جنبه وقالت: شتقصد بأنك مو عارف ان كانت حيه او ميته ..؟!
هزته وهي تقول: راشد شسالفه وشنو صار ..؟! ياوبني يا راشد واللي يسلمك ..
اخذ راشد نفس بعدها قال بهدوء: كانت بتشرد من البيت فضربتها .. طاحت وصك راسها بالطاوله ونزفت دم .. مدري ان كانت بخير او لا ..؟! بس ..
طالعت فيه روان بصدمه وقالت: حرام عليك يالظالم .. لييه يا راشد ..؟!
لف راشد وجهه وما رد عليها ..
روان: وينها اللحين وشصار عليها ..؟!
هز كتفه وهو يقول: مدري .. ما سألت لأني خايف تكون ماتت فأصير وقتها قاتل ..
قامت روان وقالت: تعال معي نسأل عنها ..
راشد بخوف: ايش ..؟!
روان: اللي سمعته ..
تردد راشد وبعدها قام وراح هو وروان عند الدكتور المسؤول ..
بعد فتره من البحث عرفوا الدكتور المختص عنها ..
دخلوا عنده المكتب ..
الدكتور بإبتسامه: اهليين وسهلين ..
روان: اهليين دكتور .. حبينا نسألك عن مريضه جت هنا الصباح اسمها شهد .. كيف هي ..؟!
اختفت ابتسامة الدكتور وقال: انتم اهلها ..؟!
روان: ايوه ..
الدكتور: تفضلوا اجلسوا ..
جلسوا وقالت روان بخوف: شصار عليها بالضبط ..؟! يعني هي بخير او .. او لا ..؟!
تنهد الدكتور وقال: خلوا إيمانكم بالله قوي .. ربنا عز وجل ان اعطى شيء لابد يي يوم وياخذه .. لازم نؤمن بقضاء الله وقدره ..
انصصدموا من كلامه وتجمعت دموع روان في عينها وهي تقول بهمس: ماتت ..؟!!
سؤالها كان هو نفسه سؤال راشد ..
بس سؤال راشد كان بطريقه ثانيه ..
كان يسأل في نفسه هل صرت قاتل ..؟!
طالع الدكتور فيهم وقال: الحمد لله على كل حال .. اطمئنوا هي مازالت حيه ولله الحمد ..
ارتاحوا وبقوووووه ..
اهم شيء عند روان انها حيه ..
واهم شيء عند راشد انه ما صار قاتل ..
روان: عيل كيف هي حالتها اللحين وليش ويهك مقلوب ..؟!
الدكتور: حاليا هي تحت تأثير البنج وان شاء الله تصحى بعد ساعتين او ثلاث ..
هزت روان راسها بمعنى كمل وهي حددها خايفه من طريقة كلامه ..
شهد فيها شيء وهذا واضح ..
بس وش هالشيء ..؟!
لف الدكتور نظره عليهم بعدها قال: اذا عالصحه ان شاء الله تقوم بالسلامه .. هي تلقت ضربه قويه اسفل راسها وانجرح بششده .. صلحنا لها تضميد وطهرنا المجان ولله الحمد ..
سكت شوي وروان تطالع فيه وهي على اعصابها ..
تنهد بعدين كمل: انه على كل شيء قدير .. قريبتكم شهد ما اتوقع ابدا انها تسترجع نظرها اللي فقدته .. لا حول ولا قوة إلا بالله ..
فتحوا عيونهم بصصدمه من الكلام اللي قاله الدكتور ..
اختنق صوت روان وهي تقول بخفوت: يعني صارت عمياء ..؟!
هز الدكتور راسه بهدوء بعدها قام وطلع من الغرفه عشانهم في مرحلة الصصدمه ويحتاجون يجلسون لحالهم ..
لفت روان نظرها تطالع في راشد اللي كان ساكت ويطالع في الأرض ..
نزلت دموعها على خدها وهي تقول بصوت مرتجف: ها .. ارتحت اللحين يا راشد ..؟! البنت فقدت اهم نعمه واهم حاسه بسببك .. صارت عمياء .. خاف ربك يا راشد .. انا احبك .. احبك وايد بس ما احب تصرفاتك .. انت عنيف .. لييييش ..؟!
لف وجهه على جنب وقال بهدوء: محد قالها تحاول تشرد ..
روان بإنفعال: بـــــــس كافــــــــي يا راششــــــد .. حتــــــى لو ماكو سبب تضربها .. حـــــــــط نفســـــك بمكانهـــــا وحس شووي .. حـــــــرام والله حـــــرام ..
وغطت وجهها بإيدها تبكي وتشاهق ..
طالع راشد فيها بحزن وجاء عندها وحضنها وهو يقول بهمس: لا تبجين .. ما اتحمل اشوف دموعج ..
تمسك ببلوزته وبدأت تبكي على صدره وهي تقول: هي يتيمه .. وحيده .. فقيره .. مالها سند .. حرام ..
حضنها راشد اكثر وما رد على كلامها ..
روان وهي تبكي: راشد سفرها .... راشد عالجها برى واللي يسلمك .... حرام تضل عميا طول عمرها .... هي لساتها صغيره ..
وبرضوا ما رد عليها راشد ..
فضل السكوت على الكلام ..
لأن يمكن الكلام يكون شوي قاسي ..

12 - 3 - 2014, 07:37 PM

في العصر ..
كان جالس في الصاله وقدامه بعض الاوراق ..
تحاليل وفحوصات وادويه واستشعارات ..
كان يقراها ويقلب فيها ويكتب ملاحضات عالدفتر ..
جت اخته الصغيره ووقفت فتره تطالع فيه بعدين قالت: مهند وش تسوي ..؟!
رفع مهند راسه وابتسم لمن شافها وقال: قاعد اشوف الاوراق الخاصه بمامتنا ..
بوزت شفتها بطريقه طفوليه وقالت: طيب ليش ..؟!
مد ايده ولخبط بشعرها وهو يقول: يا حياتي .. مهتمه وايد هههه ..
برطمت وقالت: لا تخرب شعري .. قعد ساعات كثيييييره وانا ازبطه ..
مهند: هههه حلوه ساعات كثيره ..
مدت إيدها ترتبه وهي تقول: اوووف انت ما تحس .. انا اتعب كثير .. ياليت امي بخير زي كل امهات البنات عشان تصلح شعري زيهم ..
تلاشت الابتسامه من فم مهند وهو يطالع في اخته ..
راحت رزان لغرفتها عشان ترتب شعرها ومهند يتابعها بنظرات ..
شوي تحولت تلك النظرات الى نظرات شرسه وهو يتذكر طارق ..
هو السبب في كل اللي هم فيه ..
هو السبب الرئيسي ..
لو طارق ما قتل ابوه كان ما دخل هو السجن ومرضت امه ..
امه مرضت بسبب فقدانها لأهم اثنين بحياتها ..
زوجها وولدها ..
لو طارق ما قتل ابوه كان اخته رزان عاشت حياه طبيعيه مثل كل البنات اللي بسنها ..
كان بتحس بأهتمام امها وعطف ابوها عليها ..
لو طارق ما قتل ابوه كان اللحين خلص دراسته واخذ شهادة التخرج الجامعيه ..
كان اللحين قاعد يدور على شغل يشتغله عشان يأمن حياته اذا تزوج ..
يككـــــــــرهه ..
يكره طارق لآخر نبض بحياته ..
يكرهه ويتمنى له اسوء حياه واسوء ميته ..
وده اللحين يقتله ويخلص على حياته عشان يرتاح ..
وده ما يخلي فيه عرق ينبض ابدا ..
جت اخته في هالوقت وقالت: مهند ..
طالع فيها فشافه لامه شعرها بإيدها واليد الثانيه فيها ربطه ..
مدت الربطه له وهي تقول: صلحه بشعري .. يدي تعبت وانا احاول ..
ابتسم لها وقال: من عيوني ..
اخذ من ايدها الربطه وبدأ يصلح شعرها ..
ضبطه وقال: خلصت ..
لفت عليه وقالت: يوووه احبك .. مره طيب مثل عمو اللي دايم يشتري لي هولز ..
ابتسم لها وكملت بحماس: كان دايم يينا ويوديني الملاهي والبحر وناكل في مطعم .. واخيرا قدرت اقهر البنات مثل ما يقهروني .. ودايما يشتري لي الهولز اللي احبه .. احب عمو كثير ..
فرح مهند لفرحتها مع انه مو عارف مين تقصد بكلمة عمو ..
بس اكيد البواب لأنه هو الوحيد اللي تناديه بعمو ..
اختفى حماسها وقالت بتساؤل: ليش من يوم ما ييت انت صار ما يي ..؟!
مهند: اكيد عنده اشغال كثيره يا حبيبتي ..
رزان بحزن: ابي اشوفه .. هو اكثر واحد احبه في العالم ..
مهند: طيب وانا ..؟!
رزان: اممم حتى انت اكثر واحد احبه ..
مهند: طيب ماما ..؟!
رزان بابتسامه: انت وماما وعمو اكثر واحدين احبهم في العالم كله ..
ابتسم عالتعبير حقها وبعدين وقف وبدأ يلم الاوراق ..
رزان: بتروح مجان ..؟!
مهند: ايوه .. حأروح احجز لنا نسافر بريطانيا عشان نعالج ماما وترجع مثل ما كانت ..
نطت رزان من الفرح وهي تقول: من جد ..؟!
هز راسه بإيه فحضنته بقوه وهي تقول: احبك يا احلى مهند بالعالم ..
حط إيده على راسها وهو يقول: وانا بعد احبج ..
بعدت عنه وقالت: متى بنسافر ..؟!
مهند: راح اخلي شوي بعيد عشان ننتهي من بعض الالتزامات في المستشفى اللي هني وبعدها نروح .. بس المشكله هي دراستج ..
رزان: مو لازم ادرس .. اهم شيء اروح ..
هز راسه بلا وقال: حتى انا عندي دراسه .. راح نقعد في بريطانيا اسبوع واحد بعدها نرجع هني ولمن تصير بخير نسافر عشان نييبها .. اعرف واحد من ربعي يدرس طب في بريطانيا وراح اعتمد عليه ..
دفته رزان لبرى وهي تقول: طيب روح احجز .. ياللا احجز ..
مهند: هههه لحضه خليني آخذ مفاتيحي وجزماتي واوراق مهمه ..
بعدت عنه وقالت: ياللا خذهم ..
ابتسم لها ولحماسها ..
اخذ الاغراض اللازمه وبعدها راح عشان يحجز رحله لبريطانيا ..

================================================== ==================

في مدينة اخرى غير الدوحه ..
وفي دولة اخرى غير قطر ..
بل في قارة آخرى غير آسيا ..
في قارة اوربا ..
وفي دولة بريطانيا ..
وفي مدينة ليفربول ..
هبطت الطياره القادمه من الدوحه على اراضي ليفربول البريطانيه ..
بدأ ركاب الطائره بالنزول ومن بينهم احد ابطال روايتي ..
ومن بينهم كان بسام ..
مر بعدت إجراءات وبعدها طلع من المطار ..
وقف وهو يلف عينه يمين وشمال ..
ضحك واحد وراه وهو يقول: تدورني ..؟!
لف بسام وابتسم لمن شاف انه وليد ..
حضنه وهو يقول: اهليين وليد .. وربي لك وحشه ..
وليد: هههه ادري ادري ..
بعد عنه بسام يطالع فيه وقال: ما تغيرت ابدا .. نفس شكلك ونفس ملامحك ونفس طريجة كلامك ..
وليد: هههه اما انت احسك نحفت شوي .. هههههه لا يكون تسوي رجيم ..
بسام: ههههه امممآ رجيم عاد ..
وليد: ههه امش امش اوصلك ..
راح بسام مع وليد وركبوا بسيارة وليد اللي كانت واقفه ..
حرك وليد بالسياره وهو يقول: وين تبي تروح اللحين ..؟!
بسام: وصلني لأي فندق عشان اريح من السفر .. وربي تعبت من طول المسافه ..
وليد: الله يعينك .. آلا صح ما قلت لي ليش ييت لبريطانيا ..؟!
تنهد بسام وقال: قصه طويله بعدين احكيها لك ..
وليد: اوكي براحتك ..
بسام: شخبار دراستك ..؟!
وليد: والله تمام وجدا عاديه وروتينيه وما فيها شيء يديد ..
بسام: هههههههه ..
وليد: اييه صح ياء طالب يديد قطري .. قعد اسبوع وراح .. ياخي ذا الطالب حماس ويونسني ..
بسام: ههه اهم شيء انك استمتعت اسبوع وبس ..
وليد: ههههه يب هذا اهم شيء .. وانت وش اخبارك مع الجامعه اليديده ..؟!
بسام: لا بأس .. في البدايه كرهتها بس بعدين تأقلمت معها ..
وليد: طيب شخبار بنت اختك اللي خبرتني عنها ..؟!
تنهد بسام وقال: مالقيتها ..
طالع وليد فيه بعدين طالع في الطريق وقال: ان شاء الله تلقاها .. لا تضايق نفسك جذي ..
هز بسام راسه وهو سرحان ..
وقف وليد سيارته قدام احد الفنادق وقال: وصلنا ..
بسام: اوكي مع السلامه .. لا تنسى تزورني باجر ..
وليد: هههه لا توصي حريص .. اليوم بأخليه راحه لك .. بس باجر صدقني راح اسنتر عندك لين تمل ..
بسام: ههههه ياللا باي ..
وليد: بااي ..
نزل بسام من السياره ودخل الفندق ..
استأجر لنفسه جناح ودخل فيه يريح ..
حط الشنطه قدامه وجلس عالكنبه ودق على الخدامه راما ..
ردت فقال: اهليين راما .. ها خرجتي ولا باجي ..؟!
راما بتأفف: ايه اخيرا انا يقدر يخرج .. هدا مصعب سوى قرقر واجد ويقول انه هو فاز ..
بسام: يا شيخه اخيرا افتكينا منه .. وربي مافي القف منه ابدا .. واللحين وين انتي ..؟!
راما: انا خلاس يخرج من باب فندق ..
بسام: اوكي انتظري شوي ليين يي مروان عشان ترجعي للخور ..
راما: حادر .. اقول بابا بسام ..
بسام: يا جماعه نادوني بسسسام وبس ..
راما: يوووه نسيت .. بسام مصعب هادا قال قولي لبسام انه هو جبان واجد .. هرب عشان هو ما يعلم عليك انتا انك قتل واحد ويدفنه في مصر ..
هز بسام راسه بقلة حيله وهو يقول: سوي نفسك ما سمعتي شيء .. واحمد ربي انها آخر مره اشوفه فيها .. ياللا مع السلامه ..
راما: مع السلامه ..
قفل بسام الجوال وحطه جنبه ..
فتح شنطته عشان يطلع منها عنوان المكان اللي وصته امه يروح له ..
طلع ملف داخله الكثير من الاوراق وبدأ يقلب فيها ..
وهو يقلب طاحت عينه على صوره من بين الاوراق ..
على طول تذكر ان هذه الصوره اللي شافها في درجه اللي في جناح الفندق اللي كان فيه ..
طلع الصوره عشان يعرف وشهو بالضبط اللي صدمه ذاك الوقت لمن شافها ..
طالع في الصوره فتره بعدين عقد حواجبه وهو يطالع ..
الصوره فيها شيء غريب ..
يحس ان البنت اللي بالصوره تشبه احد ..
تشبه احد مو غريب عليه ..

انصصعق من ششدة الصصدمه لمن عرف انها تششبه اخته ..
فيها شبه من سميه ..
وعيونها فيها شبه من زوج اخته سميه ..
هز راسه بدهشه وهو يطالع في الصوره ..
خرجت الحروف من فمه بصدمه يقول: سـ ـجـ ـى ..!!!
معقولـــــه ..؟؟!!!
معقوله تكون هالبنت هي نفسها بنت اخته ..؟؟!!!
معقوله تكون هي نفسها سجى ..؟؟!!!
ابتسم غصب عنه ..
اللحين المهمه بتكون اسهل لأنه صار يعرف شكلها ..
بس المشكله ما يعرف اي شيء عنها ..
بس لحضه ..!!
هذه الصوره ليش كانت في غرفته ..؟!
هذا يعني انها كانت تسكن هناك قبله ..
هذا يعني ان مصعب كان يقصد هالبنت لمن تكلم ذاك الوقت ..
نزل راسه بأحباط وهو يقول: هذا يعني لازم اقابل مصعب مره ثانيه عشان اعرف عن هالبنت اكثر ..
آخذ نفس بعدها طالع في الصوره مره ثانيه ..
يحس نفسه قد شافها قبل فتره ..
فتح فمه من شدة الدهشه والصدمه ..
هي نفسها البنت اللي شافها قدام البحر ..
البنت اللي قالت انها لقيطه ..
عوره قلبه وبقوه ..
البنت اللي كانت تبكي واللي كانت تعبانه ذاك الوقت هي سجى ..
هذا يعني ان بنت اخته مو بخير ..
هذا يعني انها تعاني وبقوه ..
عض على شفته وقال بحقد: حسبي الله عليك يا زوج اختي .. انت السبب في كل هذا ..
حط راسه بين ايده يطالع في الارض بألم ..
يبغى يرجع بسرعه ويساعدها ..
يبغى ينقذها من العذاب اللي هي فيه ..
قعد فتره على نفس حالته بعدين قام ورجع الصوره مكانها ..
طلع الاوراق اللي يحتاجها وحطها على جنب ..
بينام اللحين عشان يريح من السفر وبكره راح يروح للمجان اللي قالته له امه ..
اخذ شنطه للغرفه وبدأ يرتب ملابسه في الدولاب ..
هو كذا بطبيعته يحب النظام والترتيب ..
ما يرتاح اذا شيء من اغراضه معفوس ..
بعد ما خلص انسدح عالسرير ..
دقيقتين بس وبعدها صار في سابع نومه ..

12 - 3 - 2014, 07:38 PM

في الليل وفي بيت دانا ..
كانت جالسه تطالع في مسلسل تتابعه ..
اول ما خلص تنهدت ..
اخذت الريموت وبدأت تقلب ..
توها تحس ان التلفزيون يكون ممل من دون دش ..
هزت راسها وقالت: طول عمري احسه عادي بس بعد ما قال سامي انه ممل حسيته ممل ..
انفتح الباب ودخل اخوها عادل ..
قامت عشان تروح عنده بس حست بألم مفاجئ في جنبها الايمن ..
جلست ومسكت جنبها بألم ..
اتجه عادل لجهتها وقال: كيفج دنو ..؟!
دانا: تمام .. عادل من زمان ما سألتك .. وش صار على علاجك الطبيعي ..؟!
تنهد عادل وقال: الدكتور يقول فيه تحسن بسيط بس انا مو حاس بأي تحسن ابدا ..
دانا بفرحه: حلو .. هذا يعني انك قاعد تتحسن .. الدكتور هو افهم بشغله ..
عادل: المهم وين امي ..؟!
دانا: راحت تزور الييران ..
عادل: آها .. ها كيف الجامعه وياج ..؟!
دانا: تمام .. مرره حلوه ..
ابتسم وهو يطالع فيها ..
عادل: كنت راح اوقف العلاج الطبيعي لأني متأكد انه ماله فايده .. بس بطلت .. ابي اتعالج وحتى لو كانت نسبة الشفاء قليله .. ابي اريحج من الدراسه عشاني .. ابيج تدرسين عشان نفسج ودراستج ..
ابتسمت دانا وقالت: احبك ..
عادل: ههههه احرجتيني ..
دانا: ههههههههه خلاص ما احبك ..
عادل: آمممآ عاد هههه ..
بعدها لف بكرسيه وقال: ياللا استأذن .. ابي اريح شوي ..
دانا: تصبح على خير ..
عادل بإبتسامه: وانتي من اهله ..
راح لغرفته واسدح نفسه عالسرير ينام ..
لفت دانا عالتلفزيون تطالع فيه ..
بعدها قامت وراحت المطبخ ..
حاسه بجوع وتبي تاكل اي شيء ..
اخذت لها اثنين توست ودهنتها بالمرتديلا واخذت علبة بيبسي وجلست عالطاوله تاكل ..
طالعت في البيبسي وهي تتذكر تحذيرات امها واخوها ..
مانعينها من الغازيات عشان الانيميا اللي عندها ..
دانا: قاروره وحده ما راح تأثر ..
بدأت تاكل وهي تفكر في الدراسه والجامعه ..
شوي تذكرت الموقف اللي بين غيدا وسامي ..
دانا: يا ترى شسالفه ..؟! سامي وراه مشكله جايده وغيدا تعرفها .. ومين هم ذولا الاشخاص اللي قالتهم غيدا ..؟!
قعدت تاكل وهي تفكر فيهم ..
بعد ما خلصت وقفت فحست بالألم مره ثانيه ..
مسكت جنبها بألم وهي تقول: شذا الالم اللي صار يي كثير ..؟!
اعتدلت في وقفتها ورتبت من مكانها ..

.................................................. ................

اما عن سامي في هالوقت ..
وقف سيارته قدام القصر ونزل منها ..
دخل من الباب فشاف قدامه مراد فتأفف بينه وبين نفسه ..
مراد بإستهزاء: شوفوا الولد المعصب رجع مره ثانيه للقصر ..
طالع سامي فيه بقرف وقال: اسسكت ..
وطلع لغرفته ومراد يتابعه بنظراته ..
مراد: هههه خف علينا يالمعصب ..
طـــــــــآإاآخ ..
قفل سامي باب غرفته بقووه ..
رمى شنطته عالسرير وهو يقول: اووف منك يا ريان .. يعني لازم تصلح فيها انك الصديق اللي يهتم بمصلحة صديقه .. مالي نفس ارجع البيت ..
تربع فوق سريره وبدأ يطلع كتبه يذاكر ..
لف بنظره عالغرفه يدور على اللاب لأنه يحتاجه في البحث حقه ..
شافه فوق الطاوله اللي جنب الدولاب ..
تكسل يقوم يجيبه فأسدح نفسه عالسرير ومد ايده يجيبه ..
وهكذا بدأت المحاولات المستعصيه في الوصول له ..
وصل لحافة السرير وشوي ويمسك اللاب ..
تزحلقت إيده وطاح من فوق السرير طيحه أليمه ..
سامي: آآه .. حسبي الله عليك من لاب توب .. ليش انت بعيد ..؟!
قام وهو ماسك إيده المجروحه لآنها آلمته من الطيحه ..
اخذ اللاب ورجع يتربع فوق السرير ..
فتحه وبدأ يصلح لبحثه ..
شوي دق جوال فشاف ان المتصل هو اكرم ..
اخذ سامي الجوال ورد بسرعه يقول: اهليين اكرم .. ها بشر شصار ..؟!
اكرم: بحثت عن كل شيء له علاقه بأسيل الرملي ..
سامي: ايه وبعدين ..؟!
اكرم: هي عباره عن بنت ماتت من حول اكثر من ١٧ سنه .. لها شهادة وفاة وعندها كمان قبر .. عرفت مين هم اهلها ..
سامي بسرعه: شلوون يعني ماتت من ١٧ سنه ..؟؟!!!
اكرم: انتظر لحضه باجي ما خلصت ..
سامي: آها .. طيب كمل ..
اكرم: عرفت كل المعلومات عن اهلها وسألت بعض الناس في الحي نفسه .. بعضهم قالوا ان بنتهم اسيل حيه وتدرس حاليا بالجامعه .. والبعض الثاني قال انها حيه وتدرس بالجامعه بس طلعت مو بنتهم وان بنتهم الحقيقيه ماتت من زمان .. وبجذي استنتجت ان بنتهم اسيل ماتت من طفولتها واخذوا وحده ثانيه وربوها على اساس انها بنتهم وقبل فتره ظهرت الحقيقه فأضطروا يطلعون لبنتهم الحقيقيه شهادة وفاة واثبات وجود قبرها .. اما البنت الثانيه فصارت الآن بدون اصل او بطاقه تثبت هويتها ..
قعد سامي فتره ساكت يقلب الامر براسه ..
تقريبا فهم الكثير من الاسئله اللي كانت تدور في باله ..
بس المشكله لحد الآن ما عرف مكانها ..
سامي: طيب اعطني عنوان اهلها .. بروح احاجيهم .. يمكن يعرفون وينها ويمكن ما تزال عندهم ..
اكرم: حاضر .. دقايق وارسل لك العنوان بالتفصيل ..
سامي: باي ..
اكرم: مع السلامه ..
قفل سامي الجوال وبدأ يفكر بأسيل ..
يمكن بكره او بعده راح يروح لبيتها ويقابل اهلها ..
يتفاهم معاهم ويعلمهم انه من قرايبها عشان يرجعونها له ..
اخذ نفس عميق وبدأ يكمل مذاكرته ..
ابتسم على نفسه وقال: والله صرت دافور مثل دانا وصالح .. يا رب احفضني .. وه بس فديتني اينن حتى وانا دافور ..
انبسط من الكلام اللي قاله لنفسه ..
طلع البحث وبدأ يطبعه ..

المواضيع المتشابهه لموضوع: رواية واكتشفت اني لقيطه كامله لموضوع: رواية واكتشفت اني لقيطه كامله
الموضوع	كاتب الموضوع	المنتدى	مشاركات	آخر مشاركة
رواية الا ليت القدر كامله	نَقاء أنامِل	همس للقصص وحكايات وروايات	71	7 - 9 - 2014 02:20 AM
رواية رغد وبدر كامله	سجات التهاويل	همس للقصص وحكايات وروايات	133	7 - 9 - 2014 02:14 AM
رواية شغب بنوته كامله	نَبض♡~	همس للقصص وحكايات وروايات	16	16 - 2 - 2014 05:50 PM
رواية ارادة رجل كامله	ادمنت تعذيبك	همس للقصص وحكايات وروايات	35	22 - 4 - 2012 01:48 AM
رواية جرحني و صار معشوقي كامله	ادمنت تعذيبك	همس للقصص وحكايات وروايات	103	28 - 2 - 2012 10:10 PM

الذين يشاهدون محتوى الموضوع الآن : 5 ( الأعضاء 0 والزوار 5)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية واكتشفت اني لقيطه كامله

همس للقصص وحكايات وروايات